ᤗᤠᤶᤍᤡᤰ 7 - LIFOTNT

¹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤂᤧᤏᤧ᤹ ᤑᤠᤖᤥᤸᤗᤧ ᤁᤢᤗᤠᤃᤡ ᤔᤠᤱ ᤜᤧᤰᤋᤱᤒᤠ ᤆᤥ᤺ᤰᤏᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤁᤧᤶᤓᤢ᤹ ᤜᤠᤖᤢᤏᤧᤴ ᤂᤧᤏᤧ᤹ ᤁᤧᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤐᤥᤱᤅᤠᤱ ᤐᤠ᤺ᤳ॥

² ᤀᤠᤱᤃᤠ᤹ ᤂᤧᤏᤧ᤹ ᤔᤧᤳᤏᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤶᤓᤢ᤹ ᤜᤠᤖᤢᤏᤧᤴ ᤔᤧᤳᤋᤧ᤹॥ ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤁᤧᤗᤠᤈᤣ᤹ᤗᤠᤶᤒᤠ ᤐᤣ᤺ᤰᤔᤠ ᤑᤠ᤺ᤰᤋᤧᤛᤧ᤹ ᤑᤠ᤹ᤀᤠᤱ ᤜᤠᤱᤅᤡᤴ ᤔᤧᤳᤋᤢ᤹॥

³ ᤁᤖ ᤀᤠᤱᤃᤠ᤹ ᤜᤠᤱᤅᤡᤴ ᤜᤠᤍᤡᤱ ᤁᤧᤎᤰᤐᤠ ᤆᤥᤃᤢᤱ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤡᤛᤪᤀᤥ ᤀᤠᤰᤂᤩᤠᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱᤛᤠᤱ ᤂᤧᤸᤗᤧ ᤂᤧᤏᤧ᤹ ᤁᤧᤒᤠ᤺ᤴᤏᤡᤴ ᤔᤧᤄᤧᤵᤛᤢᤴ᤹॥

⁴ ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤔᤢᤰᤛᤠᤶᤔᤡᤴ ᤔᤡᤛᤪ ᤗᤠᤈᤣ᤹ᤀᤥ ᤀᤥᤛᤣ᤺ᤴᤎᤠᤱ ᤆᤥᤃᤢᤱ᤹. ᤜᤧᤰᤁᤩᤠᤱ ᤕᤶᤒᤠ ᤂᤠᤛᤧᤴ ᤆᤥᤃᤢᤱᤅᤠᤱ ᤀᤠᤱᤃᤠ᤹ ᤀᤠᤎᤰᤛᤢᤒᤠ. ᤀᤡᤛᤪᤠᤀᤡᤗᤡ ᤀᤠᤛᤢᤘᤠᤱᤜᤠ᤹ ᤔᤡᤛᤪᤗᤠᤶᤒᤠ ᤗ᤺ᤳᤋᤢᤱ ᤑᤧᤳᤋᤢᤱᤛᤡᤱ᤹॥

⁵ ᤀᤠᤸᤗ ᤀᤠᤱᤃᤠ᤹ ᤔᤡᤛᤪᤡᤜᤠ᤹ ᤔᤢᤰᤛᤠᤶᤛᤠᤒᤠ ᤀᤠᤜᤢᤰᤁᤡᤸᤗᤧ ᤛᤠ᤺ᤵᤛᤢᤱᤛᤡᤱᤅᤠᤱ ᤂᤢᤴᤇᤡ᤹ ᤗᤢᤶᤔᤥᤗᤠᤶᤒᤠᤀᤣ ᤀᤡᤛᤪᤠᤀᤡᤗᤡᤜᤠ᤹ ᤗ᤺ᤳᤋᤢᤱ ᤑᤧᤳᤋᤢᤱᤛᤡᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤔᤡᤛᤪᤡᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥”

⁶ ᤔᤥᤛᤠᤴ ᤏᤢ ᤜᤠᤖᤢᤏᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤔᤢᤖᤠ ᤔᤧᤳᤋᤢᤛᤡᤒᤠ ᤜᤧᤰᤁᤣᤀᤣ ᤆᤥᤃᤧᤳᤇᤢ॥

⁷ ᤑᤠᤖᤥ᤺ᤴᤏᤢ ᤐᤠᤖᤧᤛᤡᤒᤠ ᤕᤧᤶᤔᤥ ᤔᤥᤛᤠᤴ ᤕᤧᤵᤐᤥᤱ ᤋᤱᤒᤣ ᤁᤧᤖᤧᤀᤠᤱ ᤘᤕᤧ ᤜᤧᤰᤁᤩᤠᤱ ᤜᤠᤖᤢᤏᤧᤴ ᤕᤧᤵᤐᤥᤱᤅᤠᤱ ᤛᤢᤶᤛᤡ ᤋᤱᤒᤣ ᤁᤧᤖᤧᤀᤠᤱ ᤘᤕᤧᤖᤥ॥

ᤜᤠᤖᤢᤏᤧᤸᤗᤧ ᤁᤢᤍᤰᤁᤠ᤺ᤳ

⁸ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤳᤋᤢᤛᤡ.

⁹ “ᤑᤠᤖᤥᤸᤗᤧ ᤂᤡᤴᤇᤡ᤹ ᤀᤠᤵᤑᤣᤰ ᤔᤡᤰᤛᤣᤴ ᤐᤡᤔᤠᤖᤧ ᤗᤠᤃᤡ ᤂᤢᤏᤧ᤹ ᤗᤳᤇᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤒᤠᤱᤛᤡᤏᤧᤓᤃᤪ ᤜᤠᤖᤢᤏᤧᤸᤗᤧ ᤁᤢᤍᤰᤁᤠ᤺ᤳᤋᤡᤴ ᤑᤠᤖᤥᤸᤗᤧ ᤁᤢᤍᤃᤡ ᤗᤠᤵᤑᤢᤔᤠ ᤐᤠᤱᤄᤧ᤹ ᤜᤧᤰᤁᤩᤠᤱ ᤂᤧᤴ ᤀᤛᤣ᤺ᤰ ᤐᤥᤱ᤹॥”

¹⁰ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤑᤠᤖᤥᤀᤥ ᤐᤣᤛᤧᤳᤇᤡᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤜᤧᤰᤁᤣ ᤆᤥᤃᤧᤛᤢ॥ ᤜᤠᤖᤢᤏᤧᤸᤗᤧ ᤁᤢᤍᤰᤁᤠ᤺ᤳᤋᤡᤴ ᤕᤠᤱᤛᤡᤱᤅᤠᤱ ᤑᤠᤖᤥ ᤜᤠᤱᤅᤡᤴ ᤏᤢ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤗᤠᤵᤑᤢᤛᤢ ᤜᤧᤰᤁᤩᤠᤱ ᤂᤧᤴ ᤗᤳᤇᤠ ᤀᤛᤣ᤺ᤰ ᤐᤥ᤺ᤰᤂᤧ॥

¹¹ ᤂᤧᤒᤩᤠᤱ ᤜᤠᤱᤅᤡᤸᤗᤧᤀᤠᤱ ᤛᤡᤰᤁᤢᤶᤛᤠᤒᤠ ᤁᤢᤔᤏᤠᤜᤠ᤹ ᤏᤢ ᤁᤢᤃᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤀᤢ᤺ᤳᤇᤧ ᤐᤠᤱᤄᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤀᤠᤱ ᤔᤡᤰᤗᤧ᤺ᤱᤔᤠᤗᤠᤶ ᤜᤧᤰᤋᤱᤒᤠᤀᤣ ᤔᤧᤈᤥᤃᤢ॥

¹² ᤁᤧᤖᤧᤰᤗᤧ ᤂᤢᤴᤇᤡ᤹ ᤋᤰᤁᤠ᤺ᤳᤜᤠ᤹ ᤗᤠᤵᤔᤧᤓᤢᤛᤢ ᤜᤧᤰᤁᤩᤠᤱ ᤂᤧᤴ ᤋᤰᤁᤠ᤺ᤳᤜᤠ᤹ ᤀᤛᤣ᤺ᤰ ᤔᤧᤒᤥ᤺ᤰᤂᤧ॥ ᤁᤖ ᤜᤠᤖᤢᤏᤧᤸᤗᤧ ᤁᤢᤍᤰᤁᤠ᤺ᤳᤋᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤰᤁᤠ᤺ᤳᤜᤠ᤹ ᤗᤖᤢᤍᤣᤛᤢᤛᤡ॥

¹³ ᤁᤖ ᤑᤠᤖᤥᤴ ᤀᤠᤸᤗᤛᤠᤱ ᤜᤠᤍᤡᤱ ᤁᤧᤎᤰᤐᤠ ᤐᤥ᤺ᤰᤂᤧᤀᤠᤱ ᤕᤢᤅᤧ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤔᤥᤛᤠᤴ ᤏᤢ ᤜᤠᤖᤢᤏᤧᤸᤗᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤂᤧᤶᤔᤠ ᤔᤧᤍᤧᤴᤍᤧᤴ॥

ᤔᤡᤛᤪᤀᤥ ᤕᤧᤳᤋᤢᤰᤂᤣᤜᤠ᤹—ᤔᤠᤰᤂᤡ᤹

¹⁴ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤑᤠᤖᤥᤴ ᤜᤠᤍᤡᤱ ᤁᤧᤎᤰᤐᤠ ᤐᤥ᤺ᤰᤂᤧᤀᤠᤱ ᤘᤠ᤹ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤐᤣ᤺ᤰᤔᤠ ᤔᤧᤓᤠ᤺ᤰᤋᤢᤛᤡᤴ॥

¹⁵ ᤋᤠᤏᤠᤶ ᤂᤠᤀᤥ᤺ᤳᤋᤡᤸᤗᤧ ᤜᤠᤱᤅᤡᤴ ᤏᤡᤗ ᤘᤜ᤺ᤱᤅᤥ ᤐᤣ᤺ᤰᤁᤡᤸᤗᤧ ᤂᤧᤏᤧ᤹ ᤐᤣᤃᤧ᤹ᤀᤠᤱ ᤂᤢᤏᤧ᤹ ᤋᤢᤔᤧ᤹॥ ᤂᤧᤴ ᤀᤛᤣ᤺ᤰ ᤁᤧᤒᤥᤱᤒᤠ ᤋᤰᤁᤠ᤺ᤳᤋᤡᤴ ᤋᤣ᤹ᤖᤧᤀᤠᤱ ᤐᤣᤃᤧ᤹ ᤂᤧᤒᤩᤠᤱ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤂᤧᤴ ᤜᤠᤱᤄᤧ᤹ᤀᤠᤱ ᤕᤢᤅᤧ᤹॥

¹⁶ ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤧ᤹. ‘ᤕᤜᤘᤣ ᤍᤠᤱᤒᤠ. ᤜᤡᤒᤪᤢᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤐᤣ᤺ᤰᤔᤠ ᤑᤠ᤺ᤰᤋᤧᤛᤧ᤹ ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤢᤏᤧ᤹ ᤔᤠᤱᤛᤧᤘᤠ ᤔᤧᤔᤧᤳᤋᤢ᤹ ᤑᤠ᤹ᤀᤠᤱ ᤁᤧᤔᤧᤳᤇᤧ ᤂᤢᤏᤧ᤹ ᤀᤠᤱᤃᤠ᤹ ᤐᤠᤱᤄᤠᤱᤒᤠ॥ ᤁᤖ ᤀᤠᤸᤗ ᤌᤠᤖᤡᤰ ᤂᤧᤏᤧ᤹ ᤁᤧᤱᤄᤧᤵᤛᤢᤴ॥

¹⁷ ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤜᤠᤱᤅᤣ. ᤂᤢᤏᤧ᤹ ᤁᤢᤕᤠ᤺ᤶᤒᤰᤜᤠ᤹ ᤂᤧᤏᤧ᤹ ᤁᤧᤏᤡᤛᤢᤀᤠᤱ ᤂᤢᤏᤧ᤹ ᤜᤠ᤺ᤳᤗᤧᤳᤇ ᤑᤠ᤹ᤀᤠᤱ ᤂᤢᤏᤧ᤹ ᤁᤢᤛᤣ᤺ᤴ ᤁᤧᤏᤡᤛᤢ᤹॥ ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤁᤴ ᤋᤰᤁᤠ᤺ᤳᤋᤡᤸᤗᤧ ᤏᤡᤗ ᤘᤜ᤺ᤱᤅᤥᤒᤠ ᤆᤫᤠ᤺ᤳᤋᤡᤴ ᤜᤡᤵᤋᤢᤱ᤹ ᤜᤧᤰᤁᤩᤠᤱ ᤆᤫᤠ᤺ᤳᤋᤡᤴ ᤔᤠᤰᤂᤡ᤹ ᤐᤥᤱ᤹॥

¹⁸ ᤘᤜ᤺ᤱᤅᤥᤒᤠ ᤅᤠᤜᤠ᤹ ᤔᤧᤛ᤻ᤛᤡ᤹᤺. ᤜᤧᤰᤁᤩᤠᤱ ᤘᤜ᤺ᤱᤅᤡᤴ ᤛᤠ᤹ᤖᤡᤰ ᤏᤠᤶᤛᤢᤒᤠᤸᤗᤧ ᤆᤥᤃᤢᤸᤗᤧ ᤔᤡᤛᤪᤒᤠ ᤔᤏᤠᤜᤠ᤹ᤖᤧ ᤆᤫᤠ᤺ᤳᤋᤡᤴ ᤌᤢᤱᤔᤠ ᤔᤧᤴᤇᤢᤰᤋᤢᤴ᤹॥’”

¹⁹ ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤜᤠᤖᤢᤏᤧᤴ ᤔᤧᤳᤋᤧ᤹. ‘ᤂᤧᤏᤧ᤹ ᤁᤧᤍᤰᤁᤠ᤺ᤳᤋᤡᤴ ᤕᤠᤱᤛᤡᤱᤅᤧ᤹ᤀᤠᤱ ᤔᤡᤛᤪᤀᤥ ᤁᤧᤏᤧᤏᤧᤒᤠ ᤆᤫᤠ᤺ᤳ. ᤀᤡᤃᤪ ᤘᤜ᤺ᤱ. ᤂᤠᤘᤠ. ᤏᤢ ᤘᤖᤰᤁᤥᤒᤠ ᤆᤫᤠ᤺ᤳᤋᤡᤴ ᤔᤠᤰᤂᤡ᤹ ᤐᤥᤱᤒᤣ᤺ᤰᤗ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤁᤢᤛᤶᤎᤠᤱ ᤁᤧᤜᤢᤰᤁᤡᤴ ᤛᤴᤇᤧ᤹॥’ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤠᤰᤂᤡ᤹ ᤐᤥᤱ᤹॥ ᤔᤡᤛᤪ ᤗᤠᤈᤣ᤹ ᤁᤧᤖᤧᤰ ᤁᤧᤏᤧᤒᤠ ᤆᤫᤠ᤺ᤳ. ᤂᤷᤒᤠ ᤏᤢ ᤗᤢᤱᤒᤠᤰᤘᤠ ᤆᤫᤠ᤺ᤳᤜᤠ᤹ᤀᤠᤱ ᤔᤠᤰᤂᤡ᤹ ᤐᤥᤱ᤹॥”

²⁰ ᤂᤧᤒᤩᤠᤱ ᤔᤥᤛᤠᤴ ᤏᤢ ᤜᤠᤖᤢᤏᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢᤛᤡᤒᤠ ᤜᤧᤰᤁᤣᤀᤣ ᤆᤥᤃᤧᤛᤢ॥ ᤜᤠᤱᤅᤡᤴ ᤏᤢ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤜᤠᤖᤢᤏᤧᤸᤗᤧ ᤁᤢᤍᤰᤁᤠ᤺ᤳᤋᤡᤴ ᤑᤥ᤺ᤰᤂᤢᤀᤠᤱ ᤘᤜ᤺ᤱᤅᤡᤴ ᤜᤡᤵᤋᤢ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤏᤧᤒᤠ ᤁᤧᤖᤧᤰ ᤆᤫᤠ᤺ᤳᤜᤠ᤹ ᤔᤠᤰᤂᤡ᤹ ᤐᤥ᤺ᤰᤂᤧ॥

²¹ ᤆᤫᤠ᤺ᤳᤋᤥᤒᤠ ᤅᤠᤜᤠ᤹ ᤔᤧᤛᤩᤧ ᤜᤧᤰᤁᤩᤠᤱ ᤔᤡᤛᤪᤡᤜᤠ᤹ᤖᤧ ᤆᤫᤠ᤺ᤳᤋᤣ ᤌᤢᤱᤔᤠ ᤔᤧᤴᤇᤢᤰᤁᤣ ᤌᤠᤖᤡᤰ ᤛᤠ᤹ᤖᤡᤰ ᤏᤠᤶᤒᤛᤢ ᤛᤢᤛᤧ॥ ᤔᤡᤛᤪᤒᤠ ᤁᤧᤖᤧᤰ ᤆᤫᤠ᤺ᤳᤜᤠ᤹ ᤔᤠᤰᤂᤡ᤹ ᤐᤥ᤺ᤰᤂᤧ॥

²² ᤁᤖ ᤔᤡᤛᤪᤒᤠ ᤁᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹ᤖᤧᤀᤠᤱ ᤂᤢᤴᤇᤡ᤹ ᤔᤡᤰᤗᤧ᤺ᤱᤔᤠᤗᤠᤶ ᤜᤧᤰᤋᤱᤒᤠᤀᤣ ᤔᤧᤈᤥᤃᤢ॥ ᤜᤧᤰᤁᤣ᤺ᤸᤗᤧ ᤑᤠᤖᤥ ᤜᤠᤱᤅᤡᤴ ᤋᤃᤡ ᤜᤧᤰᤁᤣᤀᤣ ᤜᤠᤍᤡᤱ ᤁᤧᤎᤰᤐᤠ ᤐᤥ᤺ᤰᤂᤧ॥ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤜᤠᤱᤅᤡᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤸᤗᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤂᤧᤶᤔᤠ ᤔᤧᤍᤧᤴᤍᤧᤴ॥

²³ ᤐᤖᤢᤔᤠᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤡᤏᤡ ᤂᤧᤶᤄᤧᤶ ᤔᤧᤸᤗᤠᤵᤐᤣ ᤂᤢᤏᤧ᤹ ᤜᤠᤱᤜᤡᤶ ᤗᤧᤵᤔᤠᤱ ᤌᤠᤛᤡᤱᤅᤠᤱ ᤐᤣ॥

²⁴ ᤁᤧᤖᤧᤰ ᤔᤡᤛᤪᤡᤜᤠ᤹ᤖᤧ ᤌᤢᤱᤔᤠ ᤆᤫᤠ᤺ᤳ ᤔᤧᤃᤥ᤺ᤳᤋᤢᤖ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤘᤒᤠᤰ ᤋᤔᤠ ᤔᤧᤜᤣ᤺ᤰᤋᤢ ᤌᤣᤀᤠᤱᤓᤧᤸᤗᤧ ᤘᤜ᤺ᤱᤅᤥᤒᤠ ᤆᤫᤠ᤺ᤳᤋᤡᤴ ᤌᤢᤱᤔᤠ ᤔᤧᤴᤇᤢᤰᤋᤢᤴ॥

²⁵ ᤕᤜᤘᤣ ᤍᤠᤱᤒᤧᤸᤗᤧ ᤘᤜ᤺ᤱᤅᤥᤒᤠ ᤆᤫᤠ᤺ᤳᤋᤡᤴ ᤔᤠᤰᤂᤡ᤹ᤀᤥ ᤗᤧᤰᤂᤢᤀᤠᤱ ᤀᤣᤃᤠᤱ ᤘᤣ᤹ ᤕᤧᤳᤏᤠᤶ ᤗᤧᤰᤋᤧᤒᤣᤖᤥ॥