ᤗᤠᤶᤍᤡᤰ 6 - LIFOTNT

¹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤠᤱᤃᤠ᤹ ᤑᤠᤖᤥᤴ ᤌᤣ ᤔᤧᤳᤋᤢᤱ᤹. ᤀᤠᤸᤗ ᤂᤧᤏᤧ᤹ ᤁᤧᤏᤡᤛᤢ᤹॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤗᤧᤵᤔᤠᤛᤡᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤴ ᤁᤧᤛᤠᤰᤐᤠ ᤆᤠ᤺ᤳᤋᤢᤱ᤹॥ ᤂᤢᤏᤧ᤹ ᤁᤢᤗᤠᤈᤣ᤹ᤀᤥᤗᤠᤶ ᤂᤧᤱᤜᤠ᤹ ᤏᤠ᤺ᤵᤔᤠᤍᤣᤔᤠᤛᤡᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤸᤗᤧ ᤁᤧᤛᤠᤰᤐᤠ ᤋᤢᤔᤢᤖ ᤕᤠ᤺ᤴᤍᤢᤱ᤹॥”

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤥᤛᤠᤴ ᤀᤢ᤺ᤳᤋᤢ᤹

² ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥

³ ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒᤀᤥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤥᤛᤣ᤺ᤴᤎᤠᤰᤛᤡᤱᤅᤠᤀᤠᤱ ᤘᤕᤠᤱ ᤁᤖ ᤀᤠᤱᤃᤠ᤹ ᤀᤠᤛᤣᤛᤣ ᤔᤡᤱ ᤕᤜᤘᤣ ᤍᤠᤱᤒᤠᤗᤠᤶ ᤂᤧᤱᤜᤠ᤹ᤖᤧᤀᤥ ᤀᤥᤛᤣ᤺ᤴᤎᤠᤱ ᤔᤧᤈᤥ᤺ᤰᤛᤡᤱᤅᤠᤴ॥

⁴ ᤂᤧᤱᤜᤠ᤹ ᤘᤣ᤹ ᤗᤠᤈᤣ᤹ᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤕᤢᤅᤧᤒᤠ ᤁᤴ ᤁᤏᤠᤏ ᤗᤠᤈᤣᤴ ᤔᤠᤱᤜᤢᤵ ᤆᤥᤃᤢᤱ ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤡᤏᤡᤱ ᤔᤧᤳᤋᤢᤱᤛᤡᤱᤅᤠᤱ ᤔᤠᤱᤜᤢᤵᤐᤠᤱ ᤆᤥᤃᤢᤱᤅᤠᤱ ᤘᤕᤧ॥

⁵ ᤀᤠᤱᤃᤠ᤹ ᤀᤠᤸᤗ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤢᤰᤂᤧ᤺ᤴ ᤏᤢ ᤔᤧᤖᤡᤱᤅᤡᤴ ᤂᤧᤵᤛᤢᤱᤅᤠᤱ ᤘᤠ᤹ᤀᤠ॥ ᤔᤡᤛᤪᤡᤜᤠ᤹ᤖᤧ ᤂᤧᤱᤜᤠ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤔᤧᤈᤥᤃᤢᤛᤡᤱᤀᤠᤱ ᤘᤠ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤱᤅᤠᤱ ᤘᤠ᤹॥

⁶ “ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹. ‘ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ. ᤀᤠᤱᤃᤠ᤹ ᤂᤡᤏᤡ᤹ ᤋᤠᤱᤛᤧ᤺ᤵᤏᤡᤱ᤹ ᤜᤧᤰᤁᤩᤠᤱ ᤔᤡᤛᤪᤡᤜᤠ᤹ᤖᤧ ᤕᤥᤰ ᤁᤧᤶᤈᤥᤃᤡᤒᤠᤗᤠᤶ ᤛᤧᤴᤏᤧᤏᤡᤱ᤹॥ ᤀᤠᤱᤃᤠ᤹ ᤔᤢᤰᤛᤠᤶᤛᤠᤒᤠ ᤀᤠᤜᤢᤰᤁᤡᤸᤗᤧ ᤛᤠ᤺ᤵᤛᤢᤱᤛᤡᤱᤅᤠᤱ ᤔᤡᤛᤪᤡᤜᤠ᤹ ᤁᤡᤵᤔᤠ ᤁᤧᤄᤢᤒᤠ ᤂᤢᤶᤍᤡᤱ ᤐᤡᤖᤢᤱᤛᤡᤱ ᤜᤧᤰᤁᤩᤠᤱ ᤂᤡᤏᤡ᤹ ᤋᤠᤱᤛᤧ᤺ᤵᤏᤡᤱ᤹॥

⁷ ᤀᤠᤱᤃᤠ᤹ ᤂᤡᤏᤡ᤹ ᤀᤠᤒᤠᤅᤣ ᤀᤠᤔᤏᤠ ᤐᤥᤱᤔᤠᤖᤧ ᤗᤠᤃᤡ ᤋᤠ᤺ᤰᤏᤡᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠ॥ ᤂᤧᤒᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤀᤠ. ᤔᤡᤛᤪᤡᤜᤠ᤹ᤖᤧ ᤕᤥᤰ ᤁᤧᤶᤈᤥᤃᤡᤒᤠᤗᤠᤶ ᤂᤢᤏᤧ᤹ ᤂᤡᤏᤡ᤹ ᤁᤧᤗ᤺ᤳᤋᤡ ᤁᤧᤓᤧᤳᤋᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶ᤹॥

⁸ ᤀᤠᤳᤋᤡᤴ ᤗᤠᤈᤣᤴ ᤀᤠᤱᤃᤠ᤹ ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒᤧᤴ ᤐᤡᤏᤡᤱ ᤔᤧᤳᤋᤢᤱᤛᤡᤱᤅᤠᤱ ᤔᤠᤱᤜᤢᤵ ᤆᤥᤃᤢᤱᤅᤠᤱ ᤘᤕᤧ. ᤂᤧᤴ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤂᤡᤏᤡ᤹ ᤁᤧᤳᤏᤡᤱ᤹ ᤜᤧᤰᤁᤩᤠᤱ ᤂᤧᤴ ᤗᤠᤈᤣᤴ ᤀᤠᤱᤃᤠ᤹ ᤂᤡᤏᤡ᤹ ᤕᤢᤰᤁᤥ ᤐᤡᤏᤡᤱ᤹॥ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠᤖᤥ॥’”

⁹ ᤔᤥᤛᤠ᤺ᤸᤗᤧ ᤂᤧᤴ ᤐᤠ᤺ᤴᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤢᤛᤡ. ᤁᤖ ᤂᤧᤴ ᤐᤠ᤺ᤴᤏᤡᤴ ᤂᤧᤶᤔᤠ ᤂᤧᤱᤜᤠ᤹ ᤔᤧᤴᤍᤧᤴᤍᤧᤴ ᤌᤣᤀᤠᤱᤓᤧᤸᤗᤧ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤛᤡᤀᤠᤱ ᤕᤥᤰ ᤔᤧᤈᤥᤃᤢᤛᤡᤒᤠᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤛᤠᤱ ᤐᤢᤃᤧᤀᤠᤱ ᤔᤧᤘᤕᤧ॥

¹⁰ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ.

¹¹ “ᤐᤣᤃᤧ᤹. ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤂᤧᤴ ᤗᤠᤈᤣ᤹ᤀᤥᤗᤠᤶᤒᤠ ᤐᤣ᤺ᤰᤔᤠ ᤁᤧᤓᤠ᤺ᤰᤋᤢᤛᤡᤖᤀᤣ ᤐᤥᤱ᤹ ᤑᤠ᤹ᤀᤠᤱ ᤂᤧᤴ ᤔᤡᤛᤪᤒᤠ ᤜᤠᤱᤅᤡᤴ ᤔᤧᤳᤋᤧ᤹॥”

¹² ᤁᤖ ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤴ ᤔᤧᤳᤋᤢ. “ᤀᤠᤱᤃᤠ᤹ ᤐᤠ᤺ᤵᤔᤠᤀᤣ ᤔᤧᤸᤗᤧᤔᤏᤠᤒᤧᤸᤗᤧ ᤀᤠᤒᤠ᤺ᤴᤏᤡᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤱᤄᤧᤵᤛᤢᤴ᤹. ᤜᤠᤱᤅᤡᤸᤗᤧᤃ ᤀᤠᤳᤋᤠᤴ ᤂᤧᤵᤛᤢᤀᤠᤱᤒᤣ᥅”

¹³ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤢᤛᤡ. “ᤔᤡᤛᤪ ᤗᤠᤈᤣ᤹ᤗᤠᤶ ᤀᤡᤛᤪᤠᤀᤡᤗᤡᤜᤠ᤹ ᤗ᤺ᤵᤔᤠᤋᤣ᤹ᤔᤠᤛᤡᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤴᤇᤡ᤹ ᤔᤧᤳᤏᤧᤛᤡᤱᤅᤠᤱ ᤘᤠ᤹ ᤑᤠ᤹ᤀᤠᤱ ᤂᤧᤴ ᤔᤡᤛᤪᤡᤜᤠ᤹ ᤏᤢ ᤜᤠ᤹ᤱᤅᤡᤴ ᤔᤧᤳᤋᤧᤛᤧ᤹ᤀᤥ॥”

ᤔᤥᤛᤠ ᤏᤢ ᤜᤠᤖᤢᤏᤧᤸᤗᤧ ᤂᤢᤴᤇᤡ᤹ ᤔᤡᤱᤛᤪᤠ

¹⁴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹ᤖᤧ ᤗᤠᤶᤗᤥᤒᤠ ᤔᤏᤠᤜᤠ᤹ ᤁᤴᤜᤠ᤹ ᤔᤧᤘᤕᤧ— ᤀᤡᤛᤪᤠᤀᤡᤗᤖᤧ ᤁᤢᤛ᤻ᤛᤠ ᤋᤢᤶᤒᤠ ᤖᤢᤒᤣᤏ ᤘᤕᤧ. ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤜᤏᤥᤁ. ᤐᤸᤗᤢ. ᤜᤣᤛᤪᤥᤏ ᤏᤢ ᤁᤷᤔᤡ ᤔᤧᤘᤕᤧ॥ ᤖᤢᤒᤧᤏᤧᤸᤗᤧ ᤁᤢᤎᤠ᤺ᤰᤜᤠ᤹ ᤜᤠᤒᤠ ᤁᤴᤜᤠ᤹ ᤔᤧᤘᤕᤧ॥

¹⁵ ᤛᤡᤔᤡᤕᤥᤏᤖᤧ ᤋᤢᤰᤛᤡ ᤁᤢᤛ᤻ᤛᤠ ᤕᤧᤶᤒᤳᤇᤠ ᤔᤧᤘᤕᤧ— ᤕᤔᤢᤀᤣᤗ. ᤕᤠᤔᤡᤏ. ᤀᤥᤜᤍ. ᤕᤠᤁᤡᤏ. ᤛᤥᤜᤖ ᤏᤢ ᤁᤏᤠᤏᤡ ᤔᤧᤴᤇᤢᤔᤠ ᤗᤧᤵᤔᤠᤱᤒᤠ ᤛᤦᤗ॥ ᤂᤢᤴᤇᤡ᤹ ᤀᤠᤒᤠᤅᤣ ᤀᤠᤒᤠᤅᤣ ᤔᤡᤱ ᤁᤢᤀᤡᤛᤡ᤺ᤰᤐᤠ ᤜᤡᤶᤛᤕᤱᤜᤠ᤹ᤖᤧ ᤂᤢᤏᤡ᤹ ᤌᤠ᤺ᤰᤌᤧᤒᤠ ᤔᤧᤒᤥ᤺ᤰᤂᤧ॥

¹⁶ ᤗᤧᤒᤡᤖᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤛᤢᤶᤛᤡ ᤔᤧᤘᤕᤧ— ᤃᤣᤷᤛᤥᤏ. ᤁᤜᤠᤋ ᤏᤢ ᤔᤖᤠᤖᤡ॥ ᤂᤧᤱᤜᤠ᤹ ᤀᤠᤒᤠᤅᤣ ᤀᤠᤒᤠᤅᤣ ᤂᤢᤴᤇᤡ᤹ ᤔᤡᤱ ᤁᤢᤀᤡᤛᤡ᤺ᤰᤐᤠ ᤜᤡᤶᤛᤕᤱᤜᤠ᤹ᤖᤧ ᤂᤢᤏᤡ᤹ ᤌᤠ᤺ᤰᤌᤧᤒᤠ ᤔᤧᤒᤥ᤺ᤰᤂᤧ॥ ᤗᤧᤒᤡᤴ ᥇᥉᥍ ᤋᤱᤒᤣ ᤌᤠᤖᤡᤰ ᤜᤡᤅᤧ॥

¹⁷ ᤃᤣᤷᤛᤥᤏᤖᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤧᤳᤇᤡ ᤘᤕᤧᤛᤡ— ᤗᤡᤒ᤻ᤏᤡ ᤏᤢ ᤛᤡᤔᤡ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤖᤡᤰ ᤔᤢ᤹ᤀᤡᤍᤠᤱᤛᤠ ᤔᤧᤘᤕᤧ॥

¹⁸ ᤁᤜᤠᤋᤖᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤗᤡᤛᤡ ᤔᤧᤘᤕᤧ— ᤀᤔᤪᤠᤔ. ᤕᤡᤛᤜᤠᤖ. ᤜᤣᤒᤪᤥᤏ ᤏᤢ ᤀᤢᤈ᤻ᤈᤡᤀᤣᤗ ᤘᤕᤧ॥ ᤁᤜᤠᤋᤧᤴ ᥇᥉᥉ ᤋᤱᤒᤣ ᤌᤠᤖᤡᤰ ᤜᤡᤅᤧ॥

¹⁹ ᤔᤖᤠᤖᤡᤖᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤧᤳᤇᤡ ᤘᤕᤧᤛᤡ॥ ᤔᤜᤗᤡ ᤏᤢ ᤔᤢᤛᤡ॥ ᤗᤧᤒᤡᤖᤧ ᤁᤢᤎᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤜᤠ᤹ ᤁᤴᤜᤠ᤹ᤀᤣᤖᤥ॥

²⁰ ᤀᤔᤪᤠᤔᤧᤸᤗᤧ ᤀᤠᤒᤠᤅᤣ ᤁᤢᤴᤏᤩᤠ ᤕᤥᤁᤣᤒᤣᤍᤧᤴ ᤔᤣ᤺ᤰᤂᤡᤶ ᤔᤧᤳᤋᤢ. ᤂᤧᤸᤗᤧ ᤜᤠᤖᤢᤏᤧᤴ ᤏᤢ ᤔᤥᤛᤠᤴ ᤛᤠᤘᤠ᤺ᤴᤍᤢᤛᤡ॥ ᤀᤔᤪᤠᤔᤧᤴ ᥇᥉᥍ ᤋᤱᤒᤣ ᤜᤡᤅᤧ॥

²¹ ᤕᤡᤛᤜᤠᤖᤖᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤛᤢᤶᤛᤡ ᤔᤧᤘᤕᤧ— ᤁᤥᤖᤜ. ᤏᤣᤐᤣᤃ ᤏᤢ ᤈᤡᤁᤪᤡ॥

²² ᤀᤢᤈ᤻ᤈᤡᤀᤣᤗᤖᤧᤀᤠᤱ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤛᤢᤶᤛᤡ ᤔᤧᤘᤕᤧ— ᤔᤡᤛᤠᤀᤣᤗ. ᤀᤣᤗᤛᤠᤑᤠᤏ ᤏᤢ ᤛᤡᤌᤪᤡ॥

²³ ᤜᤠᤖᤢᤏᤧᤸᤗᤧ ᤀᤶᤔᤡᤏᤠᤍᤠᤒᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤏᤜᤛᤥᤏᤖᤧ ᤁᤢᤴᤛᤠ᤹ ᤀᤣᤗᤡᤛᤡᤒᤠ᤺ᤴ ᤔᤣ᤺ᤰᤂᤡᤶ ᤔᤧᤳᤋᤢ. ᤂᤧᤸᤗᤧ ᤏᤠᤍᤠᤒ. ᤀᤒᤡᤜᤢ. ᤀᤣᤗᤠᤈᤠᤖ ᤏᤢ ᤀᤡᤋᤠᤔᤖᤧᤴ ᤛᤠᤘᤠ᤺ᤴᤍᤢᤛᤡ॥

²⁴ ᤁᤥᤖᤜᤖᤧ ᤁᤢᤛ᤻ᤛᤠᤜᤠ᤹— ᤀᤛ᤻ᤛᤡᤖ. ᤀᤣᤸᤁᤠᤏᤠ ᤏᤢ ᤀᤒᤡᤀᤠᤛᤠᤐ ᤔᤧᤘᤕᤧ॥ ᤁᤥᤖᤜᤖᤧ ᤁᤢᤜᤡᤶᤛᤕᤱᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ॥

²⁵ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠ ᤀᤣᤗᤠᤈᤠᤖᤧᤸᤗᤧ ᤐᤋᤡᤀᤣᤗᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ᤀᤥ ᤗᤳᤇᤠ ᤔᤣ᤺ᤰᤂᤡᤶ ᤔᤧᤳᤋᤢ. ᤂᤧᤸᤗᤧ ᤐᤡᤏᤜᤠᤛᤧᤴ ᤛᤠ ᤁᤳᤋᤢ॥ ᤗᤧᤒᤡᤜᤠ᤹ᤖᤧ ᤂᤢᤏᤡ᤹ ᤜᤡᤶᤛᤕᤱᤜᤠ᤹ᤀᤥᤒᤠ ᤔᤢᤗᤡ ᤔᤏᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤌᤠ᤺ᤰᤌᤠ᤺ᤰ ᤁᤢᤀᤡᤛᤡᤰ ᤁᤴᤜᤠ᤹ᤀᤣ ᤔᤧᤘᤕᤧ॥

²⁶ ᤀᤡᤛᤪᤠᤀᤡᤗᤡᤜᤠ᤹ ᤂᤢᤴᤇᤡ᤹ ᤔᤏᤠᤛᤢᤶ ᤁᤢᤀᤡᤛᤡᤰ ᤔᤡᤛᤪᤗᤠᤶᤒᤠ ᤗ᤺ᤳᤋᤧ ᤑᤧᤳᤋᤧᤛᤧ᤹ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤒᤠ ᤂᤧᤴ ᤔᤥᤛᤠᤴ ᤏᤢ ᤜᤠᤖᤢᤏᤧᤴᤏᤣ ᤔᤧᤳᤋᤢᤛᤡᤀᤠᤱ ᤘᤕᤧ॥

²⁷ ᤔᤡᤛᤪᤗᤠᤶᤒᤠ ᤀᤡᤛᤪᤠᤀᤡᤗᤡᤜᤠ᤹ ᤗ᤺ᤵᤔᤠ ᤑᤧᤵᤔᤠᤛᤡᤖᤧ ᤗᤠᤃᤡ ᤔᤡᤛᤪᤒᤠ ᤜᤠᤱᤅᤡᤴᤏᤢ ᤐᤠᤴ ᤁᤧᤒᤠ᤺ᤵᤐᤠ ᤔᤥᤛᤠᤴ ᤏᤢ ᤜᤠᤖᤢᤏᤧᤴᤏᤣ ᤘᤕᤧᤛᤡ॥

ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠ᤺ᤴᤏᤢ ᤜᤠᤖᤢᤏᤧᤴ ᤀᤡᤱᤈᤠᤱ ᤐᤡᤖᤢᤛᤡ

²⁸ ᤀᤠᤳᤋᤡᤴ ᤕᤧᤴᤏᤥ ᤕᤜᤘᤣ ᤍᤠᤱᤒᤠᤴ ᤔᤥᤛᤠ᤺ᤴᤏᤢ ᤐᤠᤖᤧᤀᤠᤱ ᤘᤕᤧ.

²⁹ ᤀᤠᤶᤓᤠ ᤂᤧᤸᤗᤧ ᤕᤠ᤺ᤴᤍᤡᤰ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢ. “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ ᤀᤠᤱᤃᤠ᤹ ᤂᤧᤏᤧ᤹ ᤌᤣᤎᤣ ᤐᤠ᤺ᤴᤜᤠ᤹ ᤔᤧᤳᤏᤧᤀᤠᤱ ᤘᤠ᤹. ᤂᤧᤱᤜᤠ᤹ ᤁᤧᤖᤧᤰ ᤔᤡᤛᤪᤒᤠ ᤜᤠᤱᤅᤡᤴ ᤔᤧᤳᤋᤧ᤹॥”

³⁰ ᤁᤖ ᤔᤥᤛᤠ᤺ᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤐᤠ᤺ᤵᤔᤠ ᤁᤧᤗᤧᤒᤠ ᤔᤧᤈᤥᤰᤁᤠᤴ ᤁᤧᤗ᤹ᤒᤠ ᤀᤠᤍᤠᤱᤒᤠᤖᤧ ᤁᤧᤏᤡᤛᤢ᤹॥ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤜᤠᤱᤅᤡᤸᤗᤧ ᤀᤠᤰᤂᤣᤀᤠᤱ ᤂᤧᤵᤛᤢᤒᤣ᥅”