ᤗᤠᤶᤍᤡᤰ 5 - LIFOTNT

ᤔᤡᤛᤪᤒᤠ ᤜᤠᤱᤅᤡᤸᤗᤧ ᤁᤢᤍᤃᤡ ᤔᤥᤛᤠᤴ ᤏᤢ ᤜᤠᤖᤢᤏᤧᤴ

¹ ᤂᤧᤴ ᤀᤣᤃᤠᤱ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤡᤛᤪᤒᤠ ᤜᤠᤱᤅᤧᤀᤥ ᤐᤣᤛᤧᤳᤇᤡᤀᤠᤱ ᤔᤧᤳᤋᤧᤛᤢ. “ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤐᤣ᤺ᤰᤔᤠ ᤑᤠ᤺ᤰᤋᤧᤛᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤀᤠᤱᤃᤠ᤹ ᤔᤠᤱᤛᤧᤘᤠ ᤔᤧᤵᤔᤠᤖᤧ ᤗᤠᤃᤡ ᤗᤳᤇᤠ ᤋᤱᤏᤠᤶᤎᤡᤰ ᤔᤧᤍᤥᤛᤢᤖ॥’”

² ᤑᤠᤖᤥ ᤜᤠᤱᤅᤡᤸᤗᤧ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠᤴ ᤜᤠ᤺ᤵᤐᤣ᥅ ᤀᤠᤱᤃᤠ᤹ ᤂᤢᤏᤧ᤹ ᤁᤢᤒᤠ᤺ᤴᤏᤡᤴ ᤂᤧᤵᤛᤢᤱᤅᤠᤱ ᤌᤣᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤐᤣᤰ ᤑᤠ᤺ᤰᤋᤢᤱᤛᤡᤱᤒᤠᤒᤣ᥅ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤠᤴ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤐᤣ᤺ᤰᤔᤠ ᤔᤧᤓᤠ᤺ᤰᤋᤢᤱᤛᤡᤱᤅᤡᤴ॥”

³ ᤔᤥᤛᤠᤴ ᤏᤢ ᤜᤠᤖᤢᤏᤧᤸᤗᤧ ᤏᤥᤃᤵ ᤐᤡᤖᤧᤳᤇᤢᤀᤠᤱ ᤔᤧᤳᤋᤧᤛᤢ. “ᤜᤡᤒᤪᤢᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤣ ᤔᤡᤰ ᤏᤡᤔᤠ ᤛᤢᤑᤥ ᤐᤡᤖᤡᤃᤧᤀᤠᤱ ᤘᤠ᤹॥ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤛᤢᤶᤕᤠᤴ ᤌᤠᤖᤡᤰ ᤗᤠᤶᤍᤡᤰ ᤆᤥ᤺ᤰᤔᤠ ᤀᤠᤏᤡᤃᤣ ᤀᤠᤓᤠ᤺ᤰᤋᤧ᤹ ᤜᤧᤰᤁᤩᤠᤱ ᤀᤠᤏᤡᤃᤣ ᤂᤧᤵᤔᤥ ᤐᤣᤃᤡᤃᤧᤀᤠᤱ ᤀᤠᤏᤡᤃᤣ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤶᤒᤧ॥ ᤀᤠᤏᤡᤃᤣ ᤀᤰᤂᤣ ᤔᤧᤈᤥᤃᤢᤶᤒᤧᤴᤏᤧᤓᤃᤪ ᤔᤠᤱᤍᤢᤰᤔᤠ ᤀᤡᤃᤪ ᤌᤱᤗᤠᤶᤒᤠ ᤂᤢᤏᤧ᤹ ᤂᤠᤵᤐᤢᤌᤩ᤺ᤱ ᤆᤥᤃᤡᤃᤧ॥”

⁴ ᤂᤧᤒᤩᤠᤱ ᤔᤡᤛᤪᤒᤠ ᤜᤠᤱᤅᤡᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤳᤋᤢᤛᤡ. “ᤔᤏᤠᤜᤠ᤹ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤶᤒᤠᤱᤔᤠᤛᤡᤖᤧ ᤁᤢᤒᤣᤴ ᤌᤣᤒᤣ᥅ ᤂᤧᤴ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤂᤢᤴᤇᤡ᤹ ᤕᤠ᤺ᤶᤒᤰ ᤆᤥ᤺ᤰᤛᤧ ᤐᤠᤱᤄᤧᤍᤣᤛᤧᤛᤧ᤹॥”

⁵ ᤑᤠᤖᤥᤸᤗᤧ ᤕᤠᤶᤔᤥ ᤔᤧᤳᤋᤢᤛᤡ. “ᤀᤥᤔᤧᤳᤋᤧᤛᤧ᤹. ᤂᤧᤱᤜᤠ᤹ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹. ᤁᤖ ᤂᤡᤴᤇᤡ᤹ᤃ ᤂᤧᤱᤜᤠ᤹ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤶᤒᤠᤱᤔᤠᤛᤡ ᤏᤡᤱᤘᤠ᤹ ᤁᤧᤈᤥ᤺ᤰᤛᤢᤖ ᤁᤧᤘᤠ᤹ᤛᤡ᥄”

⁶ ᤀᤠᤶᤓᤠ ᤂᤧᤴ ᤕᤧᤴᤗᤧ ᤕᤠ᤺ᤴᤍᤡᤰ ᤜᤠᤱᤅᤡᤸᤗᤧ ᤕᤠ᤺ᤶᤒᤰᤁᤥ ᤔᤏᤠ ᤁᤧᤓᤶᤒᤠ ᤔᤡᤛᤪᤡᤜᤠ᤹ ᤏᤢ ᤕᤠ᤺ᤶᤒᤰ ᤀᤥᤃᤧᤔᤧᤵᤐᤠ ᤀᤡᤛᤪᤠᤀᤡᤗᤡᤜᤠ᤹ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤢᤛᤡ.

⁷ “ᤀᤡᤛᤪᤠᤀᤡᤗᤡᤜᤠ᤹ ᤂᤠᤶᤗᤧᤰ ᤆᤥ᤺ᤰᤔᤠᤖᤧ ᤗᤠᤃᤡ ᤁᤧᤒᤡᤖᤢᤶᤛᤡᤶᤒᤠ ᤕᤠ᤹ᤗᤠᤱᤅᤡᤴ ᤀᤠᤸᤗᤀᤠᤱᤎᤥ ᤔᤧᤒᤡᤖᤠᤶᤛᤡᤶᤔᤡᤴᤏᤧ᤹॥ ᤂᤧᤱᤜᤠ᤹ ᤔᤧᤒᤣ᤺ᤰᤁᤠᤱ ᤆᤠᤜᤠ ᤔᤧᤈᤥ᤺ᤰᤐᤠ ᤕᤠ᤹ᤗᤠᤱᤅᤡᤴ ᤀᤠᤒᤠᤅᤣ ᤔᤧᤃᤥ᤺ᤳᤋᤢ ᤔᤧᤍᤠᤖᤢᤖ॥

⁸ ᤁᤖ ᤀᤠᤸᤗᤥ ᤁᤶᤓ ᤌᤠᤖᤡᤰ ᤂᤧᤱᤜᤠ᤹ᤖᤧ ᤀᤠᤰᤂᤩᤠᤖᤡᤰ ᤂᤠᤶᤗᤧᤰ ᤔᤧᤈᤥᤃᤢᤖ ᤔᤧᤘᤕᤧ ᤂᤧᤶᤔᤩᤠᤰᤁᤣ ᤂᤧᤱᤜᤠ᤹ ᤆᤥ᤺ᤰᤔᤠ ᤐᤠᤱᤄᤠᤶᤛᤡᤶᤔᤧ᤹॥ ᤀᤠᤰᤂᤩᤠᤖᤡᤰᤁᤠᤱ ᤔᤧᤛᤢ᤺ᤴᤏᤧᤴᤗ ᤆᤒᤧ᤺ᤳᤇᤡᤰᤗᤰ ᤆᤥ᤺ᤰᤔᤠ ᤔᤧᤓᤠ᤺ᤰᤋᤠᤶᤛᤡᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤁᤧᤗᤧᤶᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹॥ ᤂᤧᤸᤗᤧᤆᤥᤃᤢᤸᤗᤧᤀᤣ ᤂᤧᤱᤜᤠ᤹ ᤀᤰᤂᤣ ᤔᤧᤗ᤹ᤀᤠᤱ ᤔᤧᤀ᤺ᤰᤗ ᤔᤧᤘᤠ᤹. ‘ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤐᤣ᤺ᤰᤔᤠ ᤀᤠᤓᤠ᤺ᤰᤋᤧ᤹॥’

⁹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤢᤰᤛᤢᤰ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤠᤱᤄᤠᤶᤛᤡᤶᤔᤧ᤹ ᤜᤧᤰᤁᤩᤠᤱ ᤏᤠ᤺ᤶᤛᤡᤱᤔᤠ ᤔᤧᤓᤠ᤺ᤰᤋᤠᤶᤛᤡᤶᤔᤡᤴᤏᤧ᤹॥ ᤜᤧᤰᤁᤣ ᤐᤥᤱᤅᤡᤸᤗᤧ ᤂᤧᤱᤜᤠ᤹ ᤀᤡᤱᤗᤧᤰᤐᤠ ᤐᤠᤴ ᤂᤧᤶᤔᤠ ᤕᤠ᤺ᤴᤍᤡᤰ ᤔᤧᤴᤍᤠᤏᤧᤴ॥”

¹⁰ ᤂᤧᤒᤩᤠᤱ ᤕᤠ᤺ᤶᤒᤰᤁᤥ ᤔᤏᤠ ᤁᤧᤓᤶᤒᤠ ᤔᤡᤛᤪᤡᤜᤠ᤹ ᤏᤢ ᤕᤠ᤺ᤶᤒᤰ ᤀᤥᤃᤧᤔᤧᤵᤐᤠ ᤀᤡᤛᤪᤠᤀᤡᤗᤡᤜᤠ᤹ ᤔᤧᤒᤣᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤔᤧᤔᤧᤳᤋᤢᤛᤡ. “ᤜᤠᤱᤅᤡᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹. ᤀᤠᤸᤗᤀᤠᤱᤎᤥ ᤀᤠᤏᤡᤃᤣ ᤕᤠ᤹ᤗᤠᤱ ᤔᤧᤒᤡᤀᤠᤛᤡᤃᤧᤴ॥

¹¹ ᤂᤡᤏᤡ᤹ ᤀᤠᤒᤠᤅᤣ ᤀᤠᤳᤋᤡᤏᤢᤛᤠᤱ ᤕᤠ᤹ᤗᤠᤱ ᤁᤧᤃᤥ᤺ᤳᤋᤢᤶ ᤁᤧᤍᤠᤖᤢᤶᤗ ᤐᤥᤱ᤹॥ ᤁᤖ ᤋᤃᤡᤒᤠ ᤕᤠᤖᤡᤰᤁᤣ ᤂᤠᤶᤗᤧᤰ ᤁᤧᤈᤥᤃᤢᤶᤗ ᤐᤥᤱ᤹॥”

¹² ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪ ᤗᤠᤈᤣ᤹ ᤂᤠᤖᤠᤰ ᤕᤠ᤹ᤗᤠᤱ ᤆᤣ᤺ᤰᤘᤠ ᤁᤥ᤺ᤵᤔᤠᤖᤧ ᤗᤠᤃᤡ ᤔᤧᤛᤧᤖᤧᤀᤠᤱ ᤔᤧᤘᤕᤧ॥

¹³ ᤂᤧᤴ ᤕᤠ᤺ᤶᤒᤰᤁᤥ ᤁᤧᤓᤶᤒᤠᤜᤠ᤹ᤖᤧ ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤖ ᤁᤧᤛᤠᤰᤐᤠ ᤔᤧᤈᤠ᤺ᤳᤋᤢᤛᤡ. “ᤕᤠ᤹ᤗᤠᤱ ᤐᤡᤀᤠᤛᤡᤃᤧᤸᤗᤧ ᤌᤡᤰᤕᤠ᤺ᤴᤗᤧ ᤀᤠᤰᤂᤩᤠᤖᤡᤰ ᤂᤠᤶᤗᤧᤰ ᤁᤧᤈᤥᤃᤢᤶ ᤂᤧᤶᤔᤩᤠ᤺ᤰᤁᤧ ᤁᤧᤈᤥᤃᤢᤶᤗ ᤐᤥᤱ᤹॥”

¹⁴ ᤑᤠᤖᤥᤸᤗᤧ ᤁᤢᤕᤠ᤺ᤶᤒᤰᤁᤥ ᤔᤏᤠ ᤁᤧᤓᤶᤒᤠ ᤔᤡᤛᤪᤡᤜᤠ᤹ᤖᤧ ᤕᤠ᤺ᤶᤒᤰ ᤀᤥᤃᤧᤔᤧᤵᤐᤠ ᤀᤡᤛᤪᤠᤀᤡᤗᤡᤜᤠ᤹ ᤔᤧᤜᤡᤵᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤀᤠᤱ ᤛᤣ᤺ᤴᤔᤧᤍᤥᤛᤢᤛᤡ. “ᤋᤃᤡᤒᤠ ᤕᤠᤖᤡᤰᤁᤣ ᤂᤠᤶᤗᤧᤰ ᤔᤧᤴᤈᤥ᤺ᤰᤁᤣ ᤔᤡ᤺ᤵᤔᤠ ᤏᤢ ᤀᤠᤀᤡᤴ ᤂᤡᤏᤡ᤹ ᤔᤏᤠᤜᤠ᤹ᤖᤧ ᤕᤠ᤺ᤶᤒᤰᤁᤡᤴ ᤌᤣᤀᤠᤱ ᤆᤥ᤺ᤰᤔᤠ ᤔᤧᤴᤇᤢᤖᤢᤴ᥅”

¹⁵ ᤂᤧᤒᤩᤠᤱ ᤔᤏᤠ ᤕᤠ᤺ᤶᤒᤰᤁᤥ ᤁᤧᤓᤶᤒᤠ ᤀᤡᤛᤪᤠᤀᤡᤗᤡᤜᤠ᤹ ᤑᤠᤖᤥᤀᤥ ᤔᤧᤒᤣᤀᤠᤱ ᤐᤣᤗᤡ ᤔᤧᤓᤠᤰᤋᤢ. “ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠᤜᤠ᤹ ᤀᤠᤍᤠᤱᤒᤠᤖᤧ ᤌᤣᤀᤠᤱ ᤀᤰᤂᤣᤗ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤳᤋᤢᤛᤡᤒᤠᤒᤣ᥅

¹⁶ ᤀᤠᤏᤡᤃᤣ ᤕᤠ᤹ᤗᤠᤱ ᤔᤧᤄᤥᤛᤢᤶᤒᤧᤴ ᤜᤧᤰᤁᤣᤛᤠᤱ ᤀᤠᤏᤡᤃᤣ ᤂᤠᤶᤗᤧᤰ ᤆᤥ᤺ᤰᤔᤠ ᤕᤠᤵᤔᤡ ᤀᤡᤱᤈᤠᤱ ᤔᤧᤒᤡᤖᤡᤃᤧ॥ ᤁᤶᤓᤪᤰ ᤔᤣ᤺ᤴ ᤀᤠᤸᤗ ᤀᤠᤏᤡᤃᤣ ᤜᤡᤵᤔᤠᤀᤠᤱ ᤔᤧᤜᤣ᤺ᤰᤋᤡᤃᤧᤀᤠᤱ ᤘᤠ᤹॥ ᤁᤖ ᤀᤠᤍᤠᤱᤒᤠᤖᤧ ᤁᤧᤔᤏᤠᤜᤠ᤹ᤖᤧᤀᤣ ᤕᤠ᤺ᤶᤒᤰᤁ ᤔᤧᤓᤣ᤺ᤴᤍᤢᤀᤠᤱ ᤘᤠ᤹॥”

¹⁷ ᤑᤠᤖᤥᤸᤗᤧ ᤔᤧᤳᤋᤢᤛᤡ. “ᤂᤡᤏᤡ᤹ ᤐᤗᤧᤶ ᤁᤧᤗᤧᤔᤡ ᤜᤧᤰᤁᤩᤠᤱ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤴᤈᤥᤃᤢᤶᤔᤡᤴ॥ ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤁᤧᤒᤠ᤺ᤳᤋᤢᤶ᤹. ‘ᤕᤜᤘᤣ ᤍᤠᤱᤒᤠᤀᤥ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ ᤀᤠᤏᤡᤃᤣ ᤐᤣ᤺ᤰᤔᤠ ᤀᤠᤓᤠ᤺ᤰᤋᤧ॥’

¹⁸ ᤕᤠ᤺ᤶᤒᤰᤁᤥ ᤏᤢ᤺ᤰᤂᤧᤶ ᤐᤣᤃᤧᤶᤔᤧ᤹॥ ᤂᤡᤏᤡ᤹ ᤕᤠ᤹ᤗᤠᤱ ᤁᤧᤱᤄᤥᤛᤢᤶᤔᤡᤴ ᤁᤖ ᤋᤃᤡᤒᤠ ᤕᤠᤖᤡᤰᤁᤣ ᤂᤠᤶᤗᤧᤰ ᤁᤧᤈᤥᤃᤢᤶᤗ ᤐᤥᤱ᤹॥”

¹⁹ ᤋᤃᤡᤒᤠ ᤕᤠᤖᤡᤰᤁᤣ ᤌᤡᤰᤕᤠ᤺ᤴᤎᤰ ᤂᤠᤶᤗᤧᤰ ᤆᤥ᤺ᤰᤔᤠ ᤐᤥᤱ᤹ ᤁᤧᤗ᤹ᤒᤠ ᤐᤠᤴ ᤔᤧᤄᤧᤵᤛᤢᤀᤠᤱ ᤂᤧᤴ ᤕᤠ᤺ᤶᤒᤰᤁᤥ ᤁᤧᤓᤶᤒᤠ ᤗᤠᤶᤗᤥᤜᤠ᤹ᤖᤧ ᤀᤠᤸᤗ ᤀᤠᤏᤡ᤹ ᤁᤧᤛᤠᤰᤐᤥ ᤀᤠᤎᤩᤧᤖᤧᤳᤇ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢ॥

²⁰ ᤂᤧᤴ ᤕᤠ᤺ᤶᤒᤰᤁᤥ ᤁᤧᤓᤶᤒᤠ ᤗᤠᤶᤗᤥᤒᤠᤜᤠ᤹ ᤔᤧᤏᤢ᤺ᤰᤂᤧ ᤔᤧᤓᤧᤖᤧᤸᤗᤧ ᤗᤠᤶᤔᤥ ᤔᤥᤛᤠᤴ ᤏᤢ ᤜᤠᤖᤢᤏᤧᤸᤗᤧ ᤂᤧᤱᤜᤠ᤹ ᤜᤠᤱᤄᤧᤛᤢᤛᤡᤖ ᤕᤢᤅᤧᤛᤡᤒᤠ ᤂᤧᤱᤜᤠ᤹ᤖᤧ ᤔᤧᤍᤢᤔᤢᤛᤡ॥

²¹ ᤂᤧᤱᤜᤠ᤹ᤖᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤔᤧᤳᤋᤢᤛᤡ. “ᤂᤡᤴᤇᤡ᤹ ᤌᤧᤔᤠ ᤁᤧᤈᤥᤃᤢᤛᤡᤀᤠᤱ ᤁᤧᤘᤠ᤹ᤛᤡ. ᤕᤜᤘᤣ ᤍᤠᤱᤒᤧᤸᤗᤧ ᤏᤡᤛᤢᤀᤠᤱ ᤘᤠ᤹॥ ᤂᤡᤴᤇᤡ᤹ ᤁᤧᤈᤥᤃᤢᤛᤡᤸᤗᤧ ᤜᤠᤱᤅᤡᤴ ᤏᤢ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤀᤠᤏᤡᤃᤧᤏᤢ ᤂᤢᤴᤇᤡ᤹ ᤕᤠ᤺ᤰᤗᤧ᤹ᤖᤧᤀᤠᤱ ᤘᤠ᤹॥ ᤂᤧᤸᤗᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤴᤇᤡ᤹ ᤂᤢᤶᤍᤡᤱ ᤁᤧᤒᤡᤛᤡ᤹॥ ᤂᤧᤴᤇᤡ᤹ ᤁᤧᤈᤥᤃᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤠᤏᤡᤃᤣ ᤛᤧᤵᤔᤠᤖᤧ ᤗᤠᤃᤡ ᤂᤧᤔᤠ᤹ ᤆᤥ᤺ᤰᤔᤠ ᤗᤠᤶ ᤔᤧᤄᤥᤛᤢᤀᤠᤱ ᤘᤠ᤹॥”

ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤀᤥ ᤁᤢᤗᤢᤱᤜᤠᤴ ᤐᤠ᤺ᤴᤜᤠ᤹ ᤕᤢᤰᤂᤢ

²² ᤂᤧᤒᤩᤠᤱ ᤔᤥᤛᤠᤴ ᤕᤠᤶᤔᤥ ᤕᤜᤘᤣ ᤍᤠᤱᤒᤠᤴ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠᤀᤣ. ᤌᤣᤀᤠᤱ ᤂᤧᤏᤧ᤹ ᤁᤧᤔᤏᤠᤜᤠ᤹ ᤁᤧᤛᤠᤰᤐᤥ ᤁᤧᤎᤠᤛᤢᤛᤡᤒᤠᤒᤣ᥅ ᤂᤧᤏᤧ᤹ ᤌᤣᤀᤠᤱ ᤀᤠᤱᤃᤠ᤹ ᤁ᤹ᤕᤥ ᤁᤧᤒᤠᤱᤄᤠᤱᤒᤠᤒᤣ᥅

²³ ᤂᤧᤏᤧ᤹ ᤁᤧᤔᤡᤱᤅᤥ ᤀᤠᤱᤃᤠ᤹ ᤐᤣᤃᤠᤱᤅᤠᤱ ᤜᤠᤱᤅᤡᤴᤏᤢ ᤐᤠᤖᤠᤱᤒᤠ ᤕᤧᤶᤔᤠᤱᤎᤥ ᤂᤧᤸᤗᤧ ᤁᤴᤜᤠ᤹ ᤀᤠᤸᤗᤛᤠᤱ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤔᤧᤳᤋᤢᤛᤡᤀᤠᤱ ᤘᤠ᤹॥ ᤁᤴᤜᤠ᤹ ᤛᤧᤶᤔᤠᤛᤡᤖᤧ ᤗᤠᤃᤡ ᤂᤧᤏᤧ᤹ ᤌᤧᤔᤠᤀᤠᤱ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤖᤥ॥”