ᤗᤠᤶᤍᤡᤰ 40 - LIFOTNTᤛᤣᤛᤣ ᤛᤠ᤺ᤱᤃᤠᤜᤡᤶ ᤕᤠᤖᤡᤵ ᤆᤥ᤺ᤰᤔᤠ ᤏᤢ ᤋᤥ᤺ᤶᤔᤠ 1 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤌᤡᤰᤛᤡᤃᤣᤰᤐᤠ ᤗᤠᤀᤥᤒᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤋᤢᤶᤔᤠᤍᤧᤴ ᤛᤣᤛᤣ ᤛᤠ᤺ᤱᤃᤠᤜᤡᤶ ᤆᤥᤃᤧ᤹॥ 3 ᤂᤧ᤹ᤕᤥ ᤔᤠᤱᤜᤢᤵ ᤛᤠᤵᤗᤢᤱ ᤁᤧᤕᤠᤰᤐᤠ ᤛᤴᤍᤥᤰᤁᤡᤴ ᤕᤢᤰᤂᤧ᤹ᤀᤠᤱ ᤑᤥ᤺ᤴᤍᤠ᤺ᤸᤗᤧ ᤂᤧᤴ ᤌᤣ᤺ᤰᤋᤧ᤹॥ 4 ᤆᤵᤋᤧᤴᤏᤡᤴ ᤛᤡᤃᤠᤱ ᤌᤧᤰᤋᤧ᤹ᤀᤠᤱ ᤂᤧᤸᤗᤧ ᤁᤢᤛᤶᤎᤠᤱ ᤁᤧᤏᤧᤒᤠ ᤆᤡᤃᤰᤘᤠᤜᤠ᤹ ᤐᤄᤧᤶ ᤂᤧᤶᤍᤢᤖ ᤏᤧᤛ᤻ᤛᤧ᤹. ᤜᤧᤰᤁᤩᤠᤱ ᤛᤣᤔᤡ ᤕᤢᤱᤍᤧᤴᤏᤡᤴ ᤛᤡᤃᤠᤱ ᤁᤣ᤺ᤳᤋᤧ᤹ᤀᤠᤱ ᤂᤧᤵᤔᤥ ᤛᤣᤔᤡ ᤜᤠ᤺ᤶᤔᤠ ᤇᤰᤁᤱᤜᤠ᤹ ᤋᤱᤄᤧ᤹॥ 5 ᤔᤠᤱᤜᤢᤵ ᤛᤠᤵᤗᤢᤱ ᤁᤧᤕᤠᤰᤐᤠ ᤛᤴᤍᤥᤰᤁᤡᤸᤗᤧ ᤁᤢᤍᤃᤠᤱ ᤛᤢᤰᤐᤠ ᤜᤠ᤺ᤶᤔᤠ ᤛᤠᤶᤔᤩᤠᤱ ᤛᤠᤱᤋᤧᤖᤧ᤺ᤱᤅᤡᤴ ᤕᤢᤰᤂᤧ᤹. ᤜᤧᤰᤁᤩᤠᤱ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤳᤋᤥᤒᤠ ᤑᤥ᤺ᤴᤍᤠᤴ ᤑᤳᤇᤧ᤹॥ 6 “ᤋᤢᤶᤔᤠᤍᤧᤴ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤍᤃᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤕᤢᤰᤂᤧ᤹॥ 7 ᤂᤧᤴ ᤀᤣᤃᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤗᤢᤶᤔᤥ ᤇᤧ᤺ᤱᤃᤩᤠᤴ ᤕᤢᤰᤂᤧᤀᤠᤱ ᤂᤧ᤹ᤕᤥ ᤆᤫᤠ᤺ᤳ ᤁᤣ᤺ᤳᤋᤧ᤹॥ 8 ᤜᤧᤰᤁᤩᤠᤱ ᤗᤰᤂᤢᤶᤔᤥᤒᤠ ᤐᤠ᤺ᤴᤜᤠ᤹ ᤁᤒᤪᤡᤱ ᤑᤠᤰᤋᤧ᤹. ᤜᤧᤰᤁᤩᤠᤱ ᤗᤰᤂᤢᤶᤔᤥ ᤗᤠ᤺ᤵᤔᤠ ᤗᤠᤶᤎᤣ᤺ᤳᤋᤥᤒᤠ ᤑᤥ᤺ᤴᤍᤠᤴ ᤂᤡᤱᤄᤧ᤹॥ 9 “ᤔᤠᤱᤌᤥ᤺ᤰᤏᤠ ᤐᤡᤔᤠᤛᤡ ᤏᤡ᤺ᤱᤃᤣ᤺ᤴ ᤕᤠᤱᤛᤡᤱᤅᤧ᤹ᤀᤠᤱ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤴ ᤏᤢ ᤂᤧᤵᤔᤥ ᤁᤧᤕᤢᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤠᤱᤌᤥ᤺ᤰᤏᤠ ᤆᤥᤃᤧ᤹ ᤂᤧᤒᤩᤠᤱ ᤂᤧᤴ ᤏᤢ ᤂᤧᤵᤔᤥᤒᤠ ᤁᤧᤖᤧᤰ ᤛᤠᤔᤠᤜᤠ᤹ ᤔᤠᤱᤛᤧᤘᤠ ᤕᤠ᤺ᤶᤒᤰᤗᤧ ᤗᤠᤃᤡ ᤛᤢᤳᤌᤥ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤴ ᤛᤣᤛᤣ ᤐᤥᤱ᤹॥ 10 ᤂᤧᤒᤩᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤁᤧᤖᤧᤰ ᤛᤠᤔᤠᤜᤠ᤹ᤀᤠᤱ ᤔᤠᤱᤌᤥ᤺ᤰᤏᤠ ᤆᤥᤃᤧ᤹ᤀᤠᤱ ᤂᤧᤴ ᤛᤣᤛᤣ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤴ ᤛᤠ᤹ᤖᤡᤰ ᤛᤣᤛᤣᤒᤠ ᤐᤥᤱ᤹॥ 11 ᤇᤧ᤺ᤱᤃᤩᤠᤴ ᤏᤢ ᤂᤧᤸᤗᤧ ᤁᤢᤗᤠᤱᤜᤠ᤹ ᤔᤠᤱᤌᤥ᤺ᤰᤏᤠ ᤐᤡᤖᤧ᤹ᤀᤠᤱ ᤛᤢᤳᤌᤥ ᤆᤥᤃᤧ᤹॥ 12 “ᤂᤧᤴ ᤀᤣᤃᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤥ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤋᤠᤖᤧᤛᤧ᤹ᤀᤠᤱ ᤂᤧᤱᤜᤠ᤹ ᤆᤫᤠ᤺ᤳᤋᤡᤸᤗᤧ ᤘᤠᤖᤢ᤺ᤵᤛᤧᤛᤧ᤹॥ 13 ᤜᤧᤰᤁᤩᤠᤱ ᤜᤠᤖᤢᤏᤧᤴ ᤛᤢᤳᤌᤥ ᤆᤠᤱᤜᤠ᤹ ᤆᤠᤰᤋᤧᤀᤠᤱ ᤂᤧᤴ ᤔᤠᤱᤌᤥ᤺ᤰᤏᤠ ᤐᤡᤖᤧ᤹. ᤂᤧᤒᤩᤠᤱ ᤂᤧᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠᤀᤥ ᤀᤠᤱᤃᤠ᤹ ᤀᤠᤗᤠᤃᤡ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤛᤢᤳᤌᤥ ᤆᤥᤃᤧ᤹॥ 14 ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤋᤠᤖᤧᤛᤧ᤹ᤀᤠᤱ ᤂᤧᤱᤜᤠ᤹ ᤜᤰᤛᤢ᤺ᤵᤐᤠ ᤗᤃᤣ᤺ᤵ ᤆᤠᤰᤋᤧᤛᤧ᤹॥ 15 ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤏᤢᤍᤡᤱ ᤐᤠᤴ ᤔᤠᤱᤌᤥ᤺ᤰᤏᤠ ᤁᤧᤒᤡᤖᤢᤒᤠ ᤜᤧᤰᤁᤣᤀᤣ ᤂᤧᤱᤜᤠ᤹ᤀᤠᤱ ᤔᤠᤱᤌᤥ᤺ᤰᤏᤠ ᤐᤡᤖᤧᤛᤧ᤹. ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠᤀᤥ ᤀᤠᤱᤃᤠ᤹ ᤀᤠᤗᤠᤃᤡ ᤔᤠᤱᤛᤧᤘᤠ ᤕᤠ᤺ᤶᤒᤰ ᤔᤧᤈᤥᤃᤢᤖ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤠᤱᤌᤥ᤺ᤰᤏᤠ᤺ᤱᤃ ᤗᤳᤇᤠ ᤛᤍᤠᤍᤡᤱ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤌᤠ᤺ᤰᤜᤠ᤹ᤖᤧ ᤗᤠᤃᤡ ᤐᤥᤱ᤹॥” 16 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤜᤧᤰᤁᤣᤀᤣ ᤂᤢᤏᤧ᤹ ᤁᤧᤖᤧᤰ ᤆᤥᤃᤢ॥ 17 ᤁᤶᤓᤗ᤹ᤖᤡᤰ ᤏᤡᤛᤡᤃᤣᤰᤐᤠ ᤋᤱᤒᤣᤀᤥᤒᤠ ᤌᤡᤛᤡᤃᤣᤰᤐᤠ ᤗᤠᤀᤥᤒᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤡᤸᤗᤧ ᤕᤠ᤺ᤴᤍᤡᤰ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤴ ᤔᤧᤓᤥ᤺ᤰᤂᤢ॥ 18 ᤔᤥᤛᤠ᤺ᤸᤗᤧ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤴ ᤑᤥ᤺ᤰᤂᤢᤀᤠᤱ ᤂᤧᤸᤗᤧ ᤁᤢᤕᤢᤰᤏᤠᤜᤠ᤹ ᤕᤢᤰᤂᤢ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤛᤡᤱᤓᤧᤸᤗᤧᤰᤜᤠ᤹ ᤋᤰᤐᤧᤳ ᤕᤧᤵᤛᤢᤀᤠᤱ ᤂᤧᤱᤜᤠ᤹ᤀᤥ ᤁᤢᤛᤠᤰᤔᤠ ᤐᤧᤖᤧᤶᤛᤡᤱᤜᤠ᤹ ᤁᤣ᤺ᤳᤋᤢᤀᤠᤱ ᤂᤧᤵᤔᤥᤒᤠ ᤛᤡᤳᤗᤠᤱᤜᤠ᤹ ᤕᤧᤵᤛᤢ॥ 19 ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤛᤶᤎᤠᤱ ᤁᤢᤄᤠᤵᤔᤧᤴ ᤂᤡᤱᤄᤢᤀᤠᤱ ᤁᤢᤄᤠᤵᤔᤧᤸᤗᤧ ᤁᤢᤛᤶᤎᤠᤱ ᤁᤢᤍᤧᤵᤔᤠ ᤁᤣ᤺ᤳᤋᤢ॥ 20 ᤜᤧᤰᤁᤩᤠᤱ ᤂᤢᤏᤧ᤹ ᤏᤧᤳᤇᤡ ᤛᤠᤵᤗᤢᤱᤜᤠ᤹ ᤋᤠᤖᤢᤀᤠᤱ ᤔᤠᤱᤜᤢᤵ ᤛᤴᤍᤥᤰᤁᤥ ᤕᤠᤰᤋᤢ ᤂᤧᤒᤩᤠᤱ ᤋᤰᤗᤠᤱᤜᤠ᤹ ᤔᤠᤱᤜᤢᤵ ᤛᤴᤍᤥᤰᤁᤥ ᤑᤳᤇᤢ. ᤜᤧᤰᤁᤩᤠᤱ ᤁᤢᤍᤧᤵᤑᤣᤴ ᤛᤴᤍᤥᤰᤁᤡᤸᤗᤧ ᤁᤢᤛᤶᤎᤠᤱ ᤕᤢᤰᤂᤢ॥ 21 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤔᤠᤱᤜᤢᤵ ᤛᤠᤵᤗᤢᤱ ᤁᤧᤕᤠᤰᤐᤠ ᤛᤴᤍᤥᤰᤁᤡᤴ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤁᤣ᤺ᤳᤋᤢ. ᤜᤧᤰᤁᤩᤠᤱ ᤁᤢᤎᤣ᤺ᤰᤔᤠ ᤑᤥ᤺ᤴᤍᤠᤴ ᤂᤡᤱᤄᤢᤀᤠᤱ ᤔᤠᤱᤜᤢᤵ ᤛᤴᤍᤥᤰᤁᤡᤴ ᤌᤣ᤺ᤰᤋᤢ॥ 22 ᤜᤧᤰᤁᤩᤠᤱ ᤔᤥᤛᤠ᤺ᤸᤗᤧ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤌᤥ ᤗᤧᤵᤔᤠᤱ ᤁᤧᤒᤵᤐᤠ ᤑᤥ᤺ᤴᤍᤠ᤺ᤸᤗᤧ ᤗᤠ᤺ᤰᤁᤠᤳ ᤐᤡᤛᤠᤱ ᤆᤵᤋᤧᤴᤏᤡᤴ ᤕᤢᤰᤂᤢ॥ 23 ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧᤒᤠ ᤀᤡᤛᤡ᤺ᤰ ᤂᤧᤸᤗᤧ ᤁᤢᤛᤶᤎᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤧᤍᤥᤴᤍᤢᤒᤠ ᤂᤖᤧ᤺ᤱᤅᤡᤴ ᤐᤧᤴᤇᤢ ᤏᤧᤛ᤻ᤛᤢ॥ 24 ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤂᤢᤏᤧ᤹ ᤆᤵᤋᤧᤴᤏᤡᤸᤗᤧ ᤁᤢᤍᤃᤠᤱ ᤛᤣᤛᤣ ᤛᤠ᤺ᤱᤃᤠᤜᤡᤶ ᤕᤥ ᤗᤧᤵᤔᤠᤱ ᤛᤣᤔᤡ ᤕᤢᤱᤍᤧᤴᤏᤡᤴ ᤕᤢᤰᤂᤢ॥ 25 ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧᤒᤠ ᤁᤢᤀᤡᤛᤡᤰ ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤛᤣᤔᤡᤜᤠ᤹ ᤋᤱᤄᤢ॥ 26 ᤔᤥᤛᤠ᤺ᤸᤗᤧ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤑᤥ᤺ᤴᤍᤠ᤺ᤸᤗᤧ ᤁᤢᤍᤃᤠᤱ ᤛᤠᤶᤔᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤕᤢᤰᤂᤢ॥ 27 ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤂᤧᤵᤔᤥ ᤁᤢᤏᤠᤶᤃᤧᤏᤢ᤹ᤒᤠ ᤛᤢᤰᤐᤠ ᤜᤠ᤺ᤴᤍᤢ॥ 28 ᤜᤧᤰᤁᤩᤠᤱ ᤂᤢᤏᤧ᤹ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤥ ᤑᤥ᤺ᤴᤍᤠᤴ ᤑᤥ᤺ᤴᤍᤢ॥ 29 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧᤒᤠ ᤁᤢᤀᤡᤛᤡᤰ ᤋᤢᤶᤔᤠᤍᤧᤴ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤕᤢᤰᤂᤢ ᤜᤧᤰᤁᤩᤠᤱ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤋᤥ᤺ᤴᤍᤢ॥ 30 ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤗᤢᤶᤔᤥ ᤂᤢᤏᤧ᤹ ᤇᤧ᤺ᤱᤃᤩᤠᤴ ᤕᤢᤰᤂᤢᤀᤠᤱ ᤘᤠᤜᤵᤛᤡᤱᤔᤠᤖᤧ ᤗᤠᤃᤡ ᤆᤫᤠ᤺ᤳ ᤁᤣ᤺ᤳᤋᤢ॥ 31 ᤔᤥᤛᤠ. ᤜᤠᤖᤢᤏ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤂᤧᤵᤔᤥ ᤂᤢᤴᤇᤡ᤹ ᤜᤢᤰ ᤗᤠᤱᤜᤠ᤹ ᤘᤠᤔᤧᤜᤵᤋᤢ॥ 32 ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤔᤧᤗᤠᤛᤧᤸᤗᤧ ᤀᤡᤃᤪ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤧᤒᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤱ ᤜᤢᤰᤜᤠ᤹ ᤘᤠᤔᤧᤜᤵᤋᤢ॥ 33 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤛᤣᤛᤣ ᤛᤠ᤺ᤱᤃᤠᤜᤡᤶ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤁᤧᤖᤧᤰ ᤐᤡᤛᤠᤱ ᤗᤰᤂᤢᤶᤔᤡᤸᤗᤧ ᤁᤢᤕᤠ ᤑᤥ᤺ᤰᤂᤢ. ᤜᤧᤰᤁᤩᤠᤱ ᤗᤰᤂᤢᤶᤔᤥᤒᤠ ᤗᤠᤶᤎᤣ᤺ᤳᤋᤥᤒᤠ ᤑᤥ᤺ᤴᤍᤠᤴ ᤑᤥ᤺ᤴᤍᤢ॥ ᤁᤶᤓᤗ᤹ᤖᤡᤰ ᤔᤥᤛᤠ᤺ᤸᤗᤧ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤢᤖᤢᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱ ( ᤂᤠᤏᤡ᤺ᤳ ᥏:᥇᥋-᥈᥉ ) 34 ᤂᤧᤒᤩᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤡᤴ ᤂᤠ᤹ᤔᤡ᤺ᤳᤋᤡᤸᤗᤧ ᤐᤴᤇᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤴ ᤛᤎᤧᤰ ᤋᤡᤶᤛᤧ॥ 35 ᤂᤶᤓᤩᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤔᤥᤛᤠᤴ ᤗᤠ᤺ᤵᤔᤠ ᤔᤧᤛᤢᤰᤋᤧᤴ. ᤌᤣᤀᤠᤱᤓᤧᤸᤗᤧ ᤂᤧᤴ ᤂᤠ᤹ᤔᤡ᤺ᤳᤋᤡᤴ ᤂᤧᤵᤔᤥ ᤜᤠᤒᤠ ᤐᤳᤇᤧᤃᤖᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤴ ᤛᤎᤧᤰ ᤋᤡᤶᤛᤧ॥ 36 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤗᤠᤶᤍᤡ᤺ᤰᤜᤠ᤹ᤀᤥ. ᤀᤠᤸᤗ ᤂᤧᤴ ᤂᤠ᤹ᤔᤡ᤺ᤳᤋᤡᤴ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤗᤠᤶ ᤌᤠ᤺ᤱ ᤐᤥᤃᤧᤸᤗᤧ ᤂᤧᤱᤜᤠ᤹ ᤋᤃᤡ ᤔᤧᤎᤠᤛᤡᤱ॥ 37 ᤁᤖ ᤂᤧᤴ ᤂᤠ᤹ᤔᤡ᤺ᤳᤋᤡᤴ ᤌᤠ᤺ᤱ ᤔᤧᤶᤒᤥ᤺ᤰᤁᤣ ᤀᤠᤰᤂᤧᤴᤍᤩᤠᤴ ᤌᤠᤖᤡᤰ ᤂᤧᤴ ᤂᤧᤵᤔᤥ ᤐᤳᤇᤧ ᤂᤧᤶᤔᤩᤠᤰ ᤌᤠᤖᤡᤰ ᤂᤧᤱᤜᤠ᤹ ᤔᤧᤴᤎᤠᤛᤡᤱᤅᤧᤴ॥ 38 ᤂᤧᤸᤗᤧᤆᤥᤃᤢᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱ ᤋᤃᤡ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤗᤠᤶᤍᤡᤰ ᤂᤠᤖᤠᤰ ᤗᤧᤴᤍᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤄᤠ᤹ᤔᤡ᤺ᤳᤋᤧᤴ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤐᤳᤇᤧ. ᤜᤧᤰᤁᤩᤠᤱ ᤛᤧᤴᤍᤡᤰ ᤆᤤᤲ ᤂᤠ᤹ᤔᤡ᤺ᤳᤋᤥ ᤔᤡ ᤐᤳᤇᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.