ᤗᤠᤶᤍᤡᤰ 4 - LIFOTNTᤔᤥᤛᤠᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢ 1 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤴ ᤔᤧᤳᤋᤢ. “ᤁᤖ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤠᤱᤃᤠ᤹ ᤏᤠᤔᤧᤴᤇᤠ᤹ᤀᤠᤴ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤔᤧᤱᤄᤧᤵᤛᤢᤴᤏᤠᤱ ‘ᤕᤜᤘᤣ ᤍᤠᤱᤒᤧᤴ ᤂᤧᤏᤧ᤹ᤀᤥ ᤏᤡᤎᤠ᤺ᤶᤛᤡᤱᤒᤠ ᤔᤣ᤺ᤴ’ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤸᤗᤧ ᤀᤠᤱᤃᤠ᤹ ᤌᤧᤔᤠ ᤆᤥᤃᤢᤱᤒᤠᤒᤣ᥅” 2 ᤕᤜᤘᤣ ᤍᤠᤱᤒᤧᤸᤗᤧ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤁᤧᤜᤢᤰᤁᤥ ᤌᤧᤔᤠ᤺ᤴ ᤁᤧᤃᤳᤋᤢ᤹᥅” ᤂᤧᤸᤗᤧ ᤐᤠ᤺ᤳᤋᤢ᤹. “ᤋᤰᤁᤠᤳ॥” 3 ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢ. “ᤂᤧᤴ ᤂᤠᤶᤒᤠᤱᤅᤥ ᤗᤠᤵᤑᤢᤛᤧ᤹॥” ᤔᤥᤛᤠ᤺ᤸᤗᤧ ᤋᤰᤁᤠ᤺ᤳᤋᤡᤴ ᤂᤠᤶᤒᤠᤱᤅᤥ ᤗᤠᤵᤑᤢᤛᤢ ᤜᤧᤰᤁᤩᤠᤱ ᤂᤧᤴ ᤀᤛᤣ᤺ᤰ ᤐᤥ᤺ᤰᤂᤧ ᤂᤧᤒᤩᤠᤱ ᤔᤥᤛᤠᤴ ᤁᤡᤛᤧᤀᤠᤱ ᤂᤧᤳᤇᤡᤱ॥ 4 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤁᤧᤜᤢᤰᤁᤡᤴ ᤛᤴᤇᤧ᤹ᤀᤠᤱ ᤂᤧᤸᤗᤧ ᤁᤢᤔᤡᤀᤥ ᤋᤧᤶᤛᤧ᤹॥” ᤜᤧᤰᤁᤩᤠᤱ ᤔᤥᤛᤠ᤺ᤸᤗᤧ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤋᤧᤶᤛᤢ. ᤂᤧᤒᤩᤠᤱ ᤂᤧᤴ ᤂᤢᤏᤧ᤹ ᤁᤢᤜᤢᤰᤁᤥ ᤕᤠᤶᤔᤥ ᤋᤰᤁᤠ᤺ᤳᤋᤣ ᤐᤥ᤺ᤰᤂᤧᤒᤣ॥ 5 ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢ. “ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠ ᤌᤠ᤺ᤰᤌᤧᤒᤠ ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤧ᤹ᤀᤥ ᤀᤥ᤺ᤴᤎᤠᤰᤛᤡᤱᤒᤠᤖᤧᤳᤇ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤀᤠᤶᤓᤠ ᤁᤴ ᤕᤠ᤺ᤶᤒᤰᤁᤥᤗᤠᤶᤒᤠ ᤏᤠᤔᤧᤛᤠ᤹ᤖᤢᤖ॥” 6 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤔᤥᤛᤠᤴ ᤀᤠᤸᤗᤛᤠᤱ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤁᤧᤜᤢᤰᤁᤡᤴ ᤁᤧᤜᤧᤵᤛᤢᤒᤠ ᤛᤢᤱᤄᤣ᤺ᤰᤘᤠᤀᤥ ᤁᤣ᤺ᤋᤧ᤹॥” ᤂᤢᤏᤧ᤹ ᤁᤢᤜᤢᤰᤁᤡᤴ ᤜᤧᤵᤛᤢᤒᤠ ᤛᤢᤱᤄᤣ᤺ᤰᤘᤠᤀᤥ ᤁᤣ᤺ᤳᤋᤢ. ᤜᤧᤰᤁᤩᤠᤱ ᤁᤢᤜᤢᤰᤁᤡᤴ ᤗᤠ᤺ᤰᤁᤠᤳ ᤗ᤺ᤳᤋᤢᤸᤗᤧ ᤂᤧᤴ ᤛᤧ᤹ᤔᤠ ᤋᤢᤰᤔᤧᤸᤗᤧ ᤋᤖᤢᤀᤠᤱ ᤁᤢᤜᤢᤰᤁᤡᤴ ᤏᤠ᤺ᤱ ᤜᤧᤰᤁᤣ ᤑᤛᤢ᤺ᤰᤁᤩᤠ᤺ᤵᤐᤠ ᤐᤥ᤺ᤰᤂᤧᤒᤣ॥ 7 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤁᤧᤜᤢᤰᤁᤡᤴ ᤕᤠᤶᤔᤥ ᤛᤢᤱᤄᤣ᤺ᤰᤘᤠᤀᤥ ᤕᤠᤰᤋᤧ᤹॥” ᤔᤥᤛᤠ᤺ᤸᤗᤧ ᤜᤧᤰᤁᤣᤀᤣ ᤆᤥᤃᤢ ᤜᤧᤰᤁᤩᤠᤱ ᤕᤠᤶᤔᤥ ᤁᤢᤜᤢᤰᤁᤡᤴ ᤗᤠ᤺ᤰᤁᤠᤳ ᤗ᤺ᤳᤋᤢᤸᤗᤧ ᤂᤧᤴ ᤂᤢᤏᤧ᤹ ᤁᤢᤎᤰᤁᤥᤒᤠ ᤏᤧᤰᤛᤠ ᤜᤧᤰᤋᤱᤒᤠᤀᤣ ᤏᤢᤒᤠ ᤐᤥ᤺ᤰᤂᤧ॥ 8 ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤒᤠ᤺ᤴᤏᤡᤴ ᤏᤠᤔᤧᤴᤇᤠ᤹ᤖᤢᤴ ᤜᤧᤰᤁᤩᤠᤱ ᤂᤧᤴ ᤋᤃᤡᤒᤠ ᤔᤡᤰᤛᤣ᤺ᤴᤏᤡᤴ ᤏᤛᤠᤴ ᤔᤧᤴᤈᤥᤃᤢᤴᤏᤧᤓᤃᤪ ᤁᤴ ᤔᤡᤰᤛᤣ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤏᤛᤠᤴ ᤔᤧᤈᤥᤃᤢ᤹॥ 9 ᤁᤖ ᤂᤧᤱᤜᤠ᤹ᤖᤧ ᤁᤴ ᤏᤧᤵᤔᤠᤱ ᤔᤡᤰᤛᤣ᤺ᤴᤜᤠ᤹ᤀᤠᤱ ᤏᤠᤔᤧᤴᤇᤠ᤹ᤖᤢᤴ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤒᤠ᤺ᤴᤏᤧᤴᤏᤠᤱ ᤔᤧᤱᤄᤧᤵᤛᤢᤴᤏᤧᤓᤃᤪ ᤏᤡᤗ ᤘᤜ᤺ᤱᤅᤥᤒᤠ ᤁᤢᤓᤠ ᤆᤫᤠ᤺ᤳᤆᤡ ᤑᤧᤳᤋᤧ᤹ᤀᤠᤱ ᤁᤢᤛᤧᤱᤃᤪᤠ ᤂᤠᤶᤒᤠᤱᤅᤥ ᤜᤢᤰᤂᤧ᤹॥ ᤂᤧᤏᤧ᤹ ᤏᤡᤗ ᤘᤜ᤺ᤱᤅᤥᤗᤠᤶ ᤁᤧᤓᤧᤳᤋᤢᤒᤠ ᤂᤧᤴ ᤆᤫᤠ᤺ᤳᤋᤡᤴ ᤂᤠᤶᤒᤠᤱᤅᤥ ᤔᤠᤰᤂᤡ᤹ ᤐᤥᤱ᤹॥” 10 ᤁᤖ ᤔᤥᤛᤠ᤺ᤸᤗᤧ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠᤀᤣ ᤀᤠᤱᤃᤠ᤹ ᤔᤧᤒᤠᤱᤄᤠᤱᤅᤡᤴᤏᤧ᤹ᤀᤥ॥ ᤀᤠᤱᤃᤠ᤹ ᤏᤢᤖᤡᤰᤁᤠᤱ ᤐᤠ᤺ᤵᤔᤠ ᤔᤧᤛᤢᤰᤁᤠᤴ॥ ᤀᤠᤍᤠᤱᤒᤠᤖᤧ ᤁᤧᤒᤠ᤺ᤴᤈᤠ᤺ᤰᤁᤡᤴ ᤂᤧᤵᤛᤢᤱᤅᤠᤱᤛᤠᤱ ᤀᤠᤱᤃᤠ᤹ ᤏᤢᤖᤡᤰ ᤐᤠ᤺ᤵᤔᤠ ᤁᤧᤛᤢᤰᤐᤠ ᤔᤧᤶᤒᤥᤱᤅᤣ ᤘᤠ᤹ᤀᤠ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤔᤛᤢᤀᤠᤱ ᤀᤠᤶᤒᤪᤠ ᤂ᤹ᤖᤢᤖᤖᤰ ᤐᤠ᤺ᤵᤔᤠ ᤛᤢᤰᤁᤠ॥” 11 ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤔᤏᤠᤴ ᤐᤠ᤺ᤵᤔᤠᤖᤧ ᤗᤠᤃᤡ ᤜᤠ᤺ᤳᤗᤧ ᤔᤢᤖᤠ ᤐᤡᤖᤢᤒᤣ᥅ ᤜᤠ᤺ᤳᤗᤧ ᤂᤢᤏᤧ᤹ ᤁᤢᤒᤠᤴ ᤔᤧᤸᤗ᤺ᤶᤔᤏᤠᤒᤠ ᤀᤡᤃᤪ ᤁᤢᤏᤠᤃᤧᤎᤠᤰᤐᤠ ᤆᤥᤃᤢᤒᤣ᥅ ᤜᤠ᤺ᤳᤗᤧ ᤂᤢᤏᤧ᤹ ᤔᤡᤰ ᤐᤡᤖᤢ ᤀᤡᤃᤪ ᤔᤡᤰᤑ᤺ᤶᤒᤠ ᤆᤥᤃᤢᤒᤣ᥅ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤈᤥ᤺ᤰᤐᤠ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤴᤏᤣ ᤔᤣ᤺ᤶᤒᤡ᥅ 12 ᤀᤠᤸᤗ ᤂᤧᤏᤧ᤹ ᤐᤣᤃᤧ᤹. ᤀᤠᤱᤃᤠ᤹ ᤐᤠ᤺ᤵᤔᤠᤖᤧ ᤗᤠᤃᤡ ᤑᤠ᤹ᤏᤧ॥ ᤌᤧᤔᤠ ᤐᤠ᤺ᤵᤔᤠ ᤐᤥᤱ᤹. ᤀᤠᤱᤃᤠ᤹ ᤂᤧᤏᤧ᤹ ᤜᤢ᤹ᤏᤧ॥” 13 ᤁᤖ ᤔᤥᤛᤠ᤺ᤸᤗᤧ ᤏᤥᤃᤵ ᤐᤡᤖᤢ. “ᤔᤣ᤺ᤴ. ᤕᤜᤘᤣ ᤍᤠᤱᤒᤠᤀᤣ. ᤁᤢᤓᤠ ᤘᤣ᤹ ᤌᤡᤰ ᤐᤠᤱᤄᤧ᤹ᤀᤥ॥” 14 ᤁᤴ ᤐᤠ᤺ᤴᤏᤥ ᤕᤜᤘᤣ ᤍᤠᤱᤒᤧᤴ ᤔᤥᤛᤠ᤺ᤴᤏᤢ ᤁᤢᤕᤠ᤺ᤰᤗᤧ᤹ᤖᤧ ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢ. “ᤁᤧᤶᤓᤢ᤹ ᤗᤧᤒᤡ ᤜᤠᤖᤢᤏᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤏᤧ᤹ ᤌᤣ ᤁᤧᤒᤠ᤺ᤳᤋᤢ᤹᥅ ᤂᤢᤏᤧ᤹ ᤏᤢᤖᤡᤰᤁᤠᤱ ᤐᤠ᤺ᤵᤔᤠ ᤁᤧᤗᤧᤒᤠ ᤆᤥᤰ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱ᤹॥ ᤛᤧᤰᤂᤠ᤺ᤸᤗᤧ ᤂᤢᤏᤧ᤹ ᤀᤠᤸᤗᤥ ᤂᤧᤏᤧ᤹ ᤁᤧᤍᤢᤶᤛᤧ ᤑᤧᤸᤗ ᤐᤳ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤡᤀᤠᤱ ᤁᤢᤏᤡᤱᤘᤠ᤹ ᤋᤠ᤹᤺॥ 15 ᤂᤢᤏᤧ᤹ᤏᤢ ᤐᤠᤖᤧ᤹ ᤜᤧᤰᤁᤩᤠᤱ ᤌᤣ ᤐᤠ᤺ᤵᤔᤠ ᤐᤥᤱ᤹. ᤂᤧᤴ ᤔᤧᤳᤋᤧ᤹॥ ᤜᤧᤰᤁᤩᤠᤱ ᤌᤣ ᤆᤥ᤺ᤰᤔᤠ ᤐᤥᤱ᤹. ᤂᤧᤴᤇᤡ᤹ ᤏᤧᤵᤔᤠᤱ ᤀᤠᤱᤃᤠ᤹ ᤐᤠ᤺ᤵᤔᤠ ᤜᤢ᤹ᤏᤧᤛᤡᤱ᤹॥ 16 ᤂᤧᤏᤧ᤹ ᤁᤧᤗᤠᤃᤡ ᤂᤢᤏᤧ᤹ ᤐᤠᤴ ᤁᤧᤒᤠ᤺ᤵᤐᤠ ᤐᤥᤱᤅᤠᤱ ᤔᤏᤠᤜᤠ᤹ᤏᤢ ᤋᤠ᤹ᤈᤧᤱ᤹॥ ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱ ᤜᤧᤰᤋᤱᤒᤠ ᤐᤥ᤺ᤰᤂᤧᤀᤠᤱ ᤂᤧᤸᤗᤧ ᤌᤧᤔᤠ ᤐᤠ᤺ᤵᤔᤠ ᤐᤥᤱ᤹. ᤂᤧᤴ ᤐᤠ᤺ᤴᤏᤡᤴ ᤂᤢᤏᤧ᤹ ᤔᤧᤳᤋᤧ᤹॥ 17 ᤁᤖ ᤁᤴ ᤋᤰᤁᤠ᤺ᤳᤋᤡᤴ ᤂᤧᤏᤧ᤹ ᤁᤧᤜᤢᤰᤁᤥᤀᤣ ᤋᤣ᤹ᤖᤧᤀᤠᤱ ᤐᤣᤃᤧ᤹॥ ᤂᤧᤏᤧ᤹ ᤁᤴ ᤋᤰᤁᤠ᤺ᤳᤋᤥᤗᤠᤶ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤁᤧᤈᤥᤃᤢᤖᤥ॥” ᤔᤥᤛᤠᤴ ᤔᤡᤛᤪ ᤗᤠᤈᤣ᤹ᤀᤥ ᤏᤢ᤺ᤱ᤹ 18 ᤂᤧᤴ ᤀᤣᤃᤠᤱ ᤔᤥᤛᤠᤴ ᤏᤢ᤺ᤰᤂᤧᤀᤠᤱ ᤂᤢᤏᤧ᤹ ᤁᤢᤴᤏᤢ᤺ᤵᤐᤠ ᤕᤡᤋᤪᤥᤀᤥ ᤋᤩᤧᤀᤠᤱ ᤔᤧᤳᤋᤢ. “ᤀᤠᤸᤗ ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧ. ᤀᤠᤶᤓᤢ᤹ ᤀᤠᤴᤛᤠ᤹ᤛᤡᤖᤧ ᤂᤢᤴᤇᤡ᤹ ᤋᤢᤶᤛᤧ ᤔᤡᤛᤪ ᤗᤠᤈᤣ᤹ᤀᤥ ᤐᤣ᤺ᤰᤔᤠ ᤑᤠ᤺ᤰᤋᤠᤱᤅᤧ᤹ᤀᤥ. ᤂᤧᤱᤜᤠ᤹ ᤁᤢᤜᤡᤱᤘᤧᤳᤋᤣ ᤔᤧᤘᤠ᤹ᤒᤡ ᤀᤡ ᤌᤣ ᤔᤧᤈᤥ᤺ᤰᤗ ᤔᤧᤕᤠᤰᤐᤡ ᤂᤢᤴᤇᤡ᤹ ᤋᤢᤶᤛᤧ ᤐᤣ᤺ᤰᤔᤠ ᤐᤥ᤺ᤰᤂᤧ॥” ᤕᤡᤋᤪᤥ᤺ᤸᤗᤧ ᤔᤧᤳᤋᤢ. “ᤐᤥᤱ᤹. ᤏᤢᤖᤡᤰᤁᤠᤱ ᤐᤣᤃᤧ᤹ᤀᤥ॥” 19 ᤔᤥᤛᤠᤴ ᤔᤡᤍᤩᤠᤏ ᤗᤠᤈᤣ᤹ᤗᤠᤶ ᤌᤠᤛᤡᤱᤔᤠᤏᤢ᤺ᤸᤗᤧ ᤋᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤔᤡᤛᤪ ᤏᤢ᤺ᤰᤂᤧ ᤐᤣᤃᤧ᤹॥ ᤂᤧᤏᤧ᤹ ᤛᤧᤵᤔᤠ ᤁᤧᤃᤥ᤺ᤵᤐᤠᤜᤠ᤹ ᤁᤧᤖᤧᤰ ᤔᤧᤛᤩᤧ ᤔᤧᤄᤧᤖᤧ॥” 20 ᤁᤸᤗᤧᤆᤥᤃᤢᤸᤗᤧ ᤔᤥᤛᤠ᤺ᤸᤗᤧ ᤂᤢᤏᤧ᤹ ᤁᤢᤔᤣᤳ ᤏᤢ ᤁᤢᤛ᤻ᤛᤠᤜᤠ᤹ ᤗᤳᤇᤠ ᤀᤍᤱᤅᤥ ᤕᤢᤰᤂᤢᤛᤡ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤁᤠ᤺ᤳᤋᤡᤴ ᤁᤢᤜᤢᤰᤁᤥ ᤕᤠᤱᤛᤡᤱᤅᤠᤱ ᤂᤢᤏᤧ᤹ ᤔᤡᤛᤪ ᤗᤧᤵᤔᤠᤱ ᤌᤠᤛᤡᤱ॥ 21 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤠᤸᤗ ᤂᤧᤏᤧ᤹ ᤔᤡᤛᤪ ᤗᤠᤈᤣ᤹ᤀᤥ ᤁᤧᤏᤢ᤺ᤱᤅᤠᤱ ᤁᤧᤒᤣ᤺ᤰᤗ ᤁᤧᤒᤳ॥ ᤀᤠᤱᤃᤠ᤹ ᤂᤧᤏᤧ᤹ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠᤖᤧ ᤗᤠᤃᤡ ᤔᤢᤰᤛᤠᤶ ᤐᤡᤏᤧᤀᤠᤱ ᤘᤠ᤹. ᤂᤧᤱᤜᤠ᤹ ᤁᤧᤖᤧᤰ ᤜᤠᤱᤅᤡᤸᤗᤧ ᤁᤢᤍᤃᤡ ᤆᤥ᤺ᤰᤔᤠᤖᤧ ᤗᤠᤃᤡ ᤏᤡᤱᤘᤠ᤹ ᤀᤡ᤺ᤳᤋᤧ᤹॥ ᤁᤖ ᤀᤠᤱᤃᤠ᤹ ᤜᤠᤱᤅᤡᤴ ᤜᤠᤍᤡᤱ ᤁᤧᤎᤰᤐᤠ ᤆᤥᤃᤢᤱ᤹ ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤐᤣ᤺ᤰᤔᤠ ᤔᤧᤓᤠ᤺ᤰᤋᤢᤛᤡᤴ᤹॥ 22 ᤂᤧᤒᤩᤠᤱ ᤂᤧᤏᤧ᤹ ᤜᤠᤱᤅᤡᤴ ᤀᤰᤂᤣ ᤔᤧᤳᤋᤧ᤹. ‘ᤕᤜᤘᤣ ᤍᤠᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤀᤡᤛᤪᤠᤀᤡᤗᤧᤴ ᤀᤠᤱᤃᤠ᤹ ᤀᤠᤛ᤻ᤛᤠ ᤋᤢᤶᤒᤠᤖᤥ॥ 23 ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤔᤧᤳᤏᤧ. “ᤀᤠᤱᤃᤠ᤹ ᤀᤠᤛ᤻ᤛᤠᤴ ᤐᤣ᤺ᤰᤔᤠ ᤑᤠ᤺ᤰᤋᤧ᤹ ᤜᤧᤰᤁᤩᤠᤱ ᤂᤧᤸᤗᤧ ᤀᤠᤱᤃᤠ᤹ ᤔᤠᤱᤛᤧᤘᤠ ᤔᤧᤳᤋᤠᤖ॥ ᤂᤧᤏᤧ᤹ ᤂᤧᤴ ᤐᤣ᤺ᤰᤔᤠ ᤁᤧᤶᤓᤠ᤺ᤰᤋᤢᤴᤏᤧᤓᤃᤪ. ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤂᤧᤏᤧ᤹ ᤁᤧᤛ᤻ᤛᤠ ᤋᤢᤶᤒᤧᤴ ᤛᤩᤧᤖᤢᤱ᤹॥”’” 24 ᤜᤧᤰᤁᤩᤠᤱ ᤗᤠᤶᤔᤥ ᤕᤠᤱᤎᤥ᤺ᤰᤔᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤋᤢᤔᤢ ᤂᤧᤒᤩᤠᤱ ᤂᤢᤏᤧ᤹ ᤛᤧᤵᤔᤠ ᤁᤥ᤺ᤳᤋᤢ॥ 25 ᤁᤖ ᤛᤡᤵᤐᤥᤖᤠ᤺ᤸᤗᤧ ᤗᤳᤇᤠ ᤜᤠᤃᤧᤛᤢᤰᤐᤠ ᤁᤢᤜᤧᤰᤔᤠ ᤗᤢᤱᤛᤧᤖᤢᤱᤒᤧᤴ ᤕᤠᤱᤛᤡᤱ ᤜᤧᤰᤁᤩᤠᤱ ᤁᤢᤛ᤻ᤛᤠ᤺ᤸᤗᤧ ᤁᤢᤈᤢᤳᤆᤢ᤹ᤒᤠᤸᤗᤧ ᤁᤢᤛᤶᤔᤡᤴ ᤜᤧᤃᤢᤀᤠᤱ ᤔᤥᤛᤠ᤺ᤸᤗᤧ ᤁᤢᤗᤠᤱᤅᤡᤴ ᤛᤢᤛᤢ ᤐᤡᤖᤢ. ᤁᤶᤓᤗ᤹ᤖᤡᤰ ᤜᤷᤍᤥ ᤜᤧᤃᤢᤀᤠᤱ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤀᤠᤱᤃᤠ᤹ ᤀᤠᤗᤠᤃᤡ ᤔᤠᤰᤂᤡ᤹ᤗᤠᤶᤒᤠᤒᤠ ᤀᤠᤜᤡᤶᤛᤠᤒᤠᤏᤧᤖᤥ॥” 26 (“ᤂᤧᤏᤧ᤹ᤃ ᤔᤠᤰᤂᤡ᤹ᤗᤠᤶᤒᤠᤒᤠ ᤀᤠᤱᤃᤠ᤹ ᤀᤠᤜᤡᤶᤛᤠᤒᤠᤏᤧᤖᤥ” ᤗ᤹ᤖᤧᤒᤠᤴ ᤛᤡᤵᤐᤥᤖᤠ᤺ᤸᤗᤧ ᤜᤷᤍᤥ ᤜᤧᤰᤔᤠᤴ ᤐᤠ᤺ᤳᤋᤢᤒᤠᤖᤥ॥) ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤛᤧᤖᤢᤴ॥ 27 ᤀᤠᤶᤓᤠ ᤁᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤖᤢᤏᤧᤴ ᤔᤧᤳᤋᤢ. “ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤐᤣᤃᤧ᤹ᤀᤠᤱ ᤔᤥᤛᤠᤴ ᤋᤢᤔᤧ᤹॥” ᤁᤶᤓᤗ᤹ᤖᤡᤰ ᤜᤠᤖᤢᤏᤧᤴ ᤔᤥᤛᤠ᤺ᤸᤗᤧ ᤁᤢᤍᤢᤶᤛᤧ ᤛᤣᤛᤣ ᤁᤥ᤺ᤰᤔᤠᤀᤥ ᤐᤣ ᤜᤧᤰᤁᤩᤠᤱ ᤂᤢᤏᤧ᤹ ᤋᤢᤔᤢᤀᤠᤱ ᤜᤧᤵᤐᤪᤧᤰ ᤜᤧᤵᤋᤢ॥ 28 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤔᤡᤛᤪ ᤗᤠᤈᤣ᤹ ᤐᤣ᤺ᤰᤔᤠ ᤀᤡᤱᤈᤠᤱ ᤐᤡᤖᤢᤸᤗᤧ ᤔᤧᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤥᤛᤠ᤺ᤸᤗᤧ ᤜᤠᤖᤢᤏᤧᤴ ᤆᤧᤰᤋᤢ॥ ᤀᤠᤳᤋᤡᤴ ᤀᤠᤳᤋᤡᤴ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤂᤢᤏᤧ᤹ ᤆᤥ᤺ᤰᤔᤠ ᤐᤠᤱᤄᤢᤀᤠᤱ ᤘᤕᤧ. ᤂᤧᤴᤏᤠᤱ ᤔᤥᤛᤠ᤺ᤸᤗᤧ ᤜᤠᤖᤢᤏᤧᤴ ᤆᤧᤰᤋᤢ॥ 29 ᤜᤧᤰᤁᤩᤠᤱ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤡᤛᤪ ᤐᤣᤛᤧᤳᤇᤡ ᤂᤧᤒᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤗᤠᤶᤗᤥᤒᤠᤜᤠ᤹ ᤛᤥᤖᤡᤰ ᤑᤢᤰᤂᤧᤛᤢᤛᤡ॥ 30 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤜᤠᤖᤢᤏᤧᤸᤗᤧ ᤂᤧᤱᤜᤠ᤹ ᤆᤧᤰᤋᤢᤛᤡ॥ ᤔᤥᤛᤠ᤺ᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤀᤠᤱ ᤀᤥ᤺ᤴᤎᤠᤰᤋᤢᤛᤡ॥ 31 ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤏᤛᤠᤴ ᤔᤧᤈᤥᤃᤢ. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤀᤥᤔᤧᤳᤋᤢᤛᤡᤒᤠ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤰᤂᤧ᤺ᤴ ᤏᤡᤛᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢ ᤜᤧᤰᤁᤩᤠᤱ ᤂᤧᤱᤜᤠ᤹ ᤀ᤺ᤰᤂᤢᤶ ᤔᤧᤓᤴᤇᤡᤱᤅᤠᤱ ᤕᤜᤘᤣ ᤍᤠᤱᤒᤠᤴ ᤛᤧᤘᤠ ᤏᤢ ᤔᤠᤱᤛᤧᤘᤠ ᤔᤧᤔᤧᤳᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.