ᤗᤠᤶᤍᤡᤰ 39 - LIFOTNTᤏᤡᤱᤘᤠ᤹ᤑᤢᤛᤠᤶᤒᤠ ᤆᤠᤱ 1 ᤛᤣᤛᤣᤍᤧᤴᤏᤥᤒᤠ ᤔᤠᤱᤛᤧᤘᤠ ᤕᤠ᤺ᤶᤒᤰᤗᤧ ᤗᤠᤃᤡ ᤂᤧᤱᤜᤠ᤹ᤖᤧ ᤜᤡ᤺ᤰᤁᤱᤁᤱᤒᤠ. ᤐᤠᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤆᤠ᤺ᤶᤔᤏᤠᤒᤠ ᤂᤡᤗᤠᤶ ᤌᤠᤰᤔᤏᤠᤒᤠ ᤆᤠᤱᤜᤠ᤹. ᤜᤧᤰᤁᤩᤠᤱ ᤜᤠᤖᤢᤏᤧᤸᤗᤧ ᤁᤢᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤛᤢᤳᤌᤥ ᤆᤠᤱᤜᤠ᤹ ᤔᤧᤈᤥᤃᤢ॥ 2 ᤀᤣᤐᤥᤍᤧᤱᤃ ᤂᤧᤱᤜᤠ᤹ᤖᤧ ᤛᤠᤶᤔᤩᤠᤱ. ᤜᤧᤰᤁᤩᤠᤱ ᤜᤡ᤺ᤰᤁᤱᤁᤱᤒᤠ. ᤐᤠᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤂᤡ ᤏᤢ ᤆᤢᤴᤈᤢᤴ ᤗ᤹ᤖᤡᤰ ᤑᤔᤏᤠᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤔᤧᤈᤥᤃᤢ॥ 3 ᤂᤧᤱᤜᤠ᤹ᤖᤧ ᤛᤠᤶᤔᤩᤠᤱᤅᤡᤴ ᤔᤧᤓᤧ᤺ᤳᤇᤢᤀᤠᤱ ᤐᤠ᤹ᤐᤠ᤺ᤶᤒᤠ ᤁᤢᤗᤧᤵᤜᤠ᤹ ᤔᤧᤄᤰᤋᤢ ᤜᤧᤰᤁᤩᤠᤱ ᤀᤡᤍᤠ᤺ᤰᤜᤠ᤹ ᤔᤧᤈᤥᤃᤢ॥ ᤂᤧᤴ ᤜᤡ᤺ᤰᤁᤱᤁᤱᤒᤠ. ᤐᤠᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤂᤡ ᤏᤢ ᤆᤢᤴᤈᤢᤶᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤥ ᤋᤱᤔᤠᤖᤧ ᤗᤠᤃᤡ ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤆᤥᤒᤣᤃᤢ᤺ᤸᤗᤧ ᤁᤢᤕᤠ᤺ᤶᤒᤰ ᤘᤕᤧ॥ 4 ᤀᤣᤐᤥᤍᤧᤴ ᤀᤡᤓᤢᤵᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤂᤧᤴ ᤏᤧᤳᤇᤡ ᤁᤢᤕᤠᤀᤥ ᤔᤧᤈᤰᤋᤢᤒᤠ ᤏᤧᤳᤇᤡ ᤑᤰᤋᤠᤱᤅᤥ ᤁᤢᤀᤡᤓᤢᤵᤔᤠᤜᤠ᤹ ᤔᤧᤈᤥᤃᤢ॥ 5 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧᤒᤠ ᤁᤢᤀᤡᤛᤡᤰ. ᤂᤧᤸᤗᤧ ᤁᤢᤛᤶᤎᤠᤱ ᤁᤧᤒᤵᤐᤠ ᤛᤠ᤹ᤖᤡᤰ ᤏᤢᤖᤡᤰ ᤔᤧᤓᤕᤢᤒᤠ ᤁᤧᤱᤅᤥ ᤕᤢᤶᤔᤏᤠᤒᤠ ᤑ᤹ᤀᤡ᤺ᤴ ᤀᤣᤐᤥᤍᤧᤴᤏᤢ ᤁᤧᤍᤢᤶᤒᤠ ᤗᤳᤇᤠ ᤆᤡᤖᤡᤰ ᤂᤧᤸᤗᤧᤰ ᤜᤧᤰᤁᤣ ᤕᤠ᤺ᤶᤒᤰ ᤁᤧᤒᤥᤱᤒᤠ ᤛᤠᤶᤔᤩᤠᤱ. ᤏᤢ ᤜᤡᤕ᤺ᤰᤕᤱᤕᤱᤒᤠ. ᤐᤠᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤂᤡ ᤏᤢ ᤆᤢᤴᤈᤢᤴ ᤗ᤹ᤖᤡᤰ ᤑᤔᤏᤠᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤘᤕᤧ॥ 6 ᤂᤧᤱᤜᤠ᤹ᤖᤧ ᤛᤠᤶᤔᤩᤠᤱᤅᤥᤒᤠ ᤁᤢᤜᤱᤜᤠ᤹ᤀᤥ ᤀᤏᤡᤰᤛ ᤔᤢᤎᤡᤱᤗᤢᤱᤜᤠ᤹ ᤔᤧᤍᤡ᤺ᤰᤛᤢ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤕᤧᤶᤒᤡᤳᤇᤠ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤜᤠ᤹ ᤀᤣ᤺ᤵᤛᤠᤵᤐᤥ ᤐᤵᤐᤠ ᤜᤧᤰᤁᤣ ᤂᤧ᤹ᤕᤥ ᤔᤧᤛᤠᤵᤋᤢ॥ 7 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢᤒᤠ ᤜᤧᤰᤁᤣ ᤂᤧᤱᤜᤠ᤹ᤖᤧ ᤀᤣᤐᤥᤍᤀᤥ ᤁᤧᤒᤵᤐᤠ ᤑᤰᤋᤠᤱᤅᤥᤒᤠ ᤁᤢ᤹ᤀᤡᤓᤢᤵᤔᤠᤜᤠ᤹ᤀᤥ ᤀᤡᤛᤪᤠᤀᤡᤗᤒᤠ ᤕᤧᤶᤒᤡᤳᤇᤠ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤏᤡᤱᤘᤠ᤹ᤛᤥᤰ ᤔᤢᤎᤡᤱᤗᤢᤱ ᤐᤥᤱᤔᤠᤖᤧ ᤗᤠᤃᤡ ᤂᤧᤱᤜᤠ᤹ ᤂᤧᤵᤔᤥ ᤔᤧᤓᤳᤇᤢᤖᤥ॥ ᤛᤠ᤺ᤱᤒᤣ ᤛᤧ᤺ᤵᤆᤠᤱ ᤔᤧᤈᤥᤃᤢ ( ᤗᤠ ᥈᥎:᥇᥋-᥉᥆ ) 8 ᤂᤧᤱᤜᤠ᤹ᤖᤧ ᤀᤣᤐᤥᤍᤀᤥᤒᤠ ᤕᤠ᤺ᤶᤒᤰ ᤁᤢᤀᤡᤛᤡᤰ ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤆᤥᤒᤣᤃᤢ᤺ᤸᤗᤧ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤁᤡᤸᤗᤧᤴ ᤛᤠ᤺ᤱᤒᤣ ᤛᤧ᤺ᤵᤆᤠᤱ. ᤛᤠᤶᤔᤩᤠᤱ. ᤜᤡ᤺ᤰᤁᤱᤁᤱᤒᤠ. ᤐᤠᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤂᤡ ᤏᤢ ᤆᤢᤴᤈᤢᤴ ᤗ᤹ᤖᤡᤰ ᤑᤔᤏᤠᤒᤠ ᤆᤡᤖᤡᤰᤁᤡᤸᤗᤧᤴ ᤔᤧᤈᤥᤃᤢ॥ 9 ᤂᤧᤴ ᤗᤡᤛᤡ ᤁᤢᤛᤢᤰᤐᤠ ᤁᤧᤒᤵᤐᤠ ᤏᤢ ᤏᤡᤗᤧᤱ ᤔᤧᤓᤠᤰᤋᤢᤒᤠ ᤆᤥᤃᤧ॥ ᤂᤧᤴ ᤛᤥ᤺ᤰᤐᤡᤳᤋᤠ ᤌᤡᤰ ᤁᤢᤗᤠᤶᤋᤡ ᤏᤢ ᤛᤥ᤺ᤰᤐᤡᤳᤋᤠ ᤌᤡᤰ ᤁᤢᤓᤧᤖᤧ ᤁᤧᤒᤵᤐᤠ ᤆᤥᤃᤧ॥ 10 ᤂᤧᤵᤔᤥ ᤔᤢᤎᤡᤱᤗᤢᤱᤜᤠ᤹ᤖᤧ ᤗᤡᤛᤡ ᤁᤢᤍᤡ᤺ᤰᤗᤠ ᤔᤧᤍᤡ᤺ᤰᤛᤢ ᤔᤧᤓᤳᤇᤢ॥ ᤌᤡᤰᤛᤡᤃᤣᤰᤐᤠ ᤁᤢᤍᤡ᤺ᤰᤗᤠ᤺ᤴ ᤜᤧ᤺ᤋᤩᤱᤕᤱᤒᤠ ᤔᤢᤎᤡᤱᤗᤢᤱ. ᤜᤡ᤺ᤰᤕᤱᤕᤱᤒᤠ ᤔᤢᤎᤡᤱᤗᤢᤱ. ᤀᤶᤍᤠᤱᤒᤠ ᤔᤢᤎᤡᤱ ᤐᤳᤇᤧ॥ 11 ᤏᤡᤛᤡᤃᤣᤰᤐᤠ ᤁᤢᤍᤡ᤺ᤰᤗᤠᤀᤥ ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤔᤢᤎᤡᤱᤗᤢᤱ. ᤁᤢᤓᤡᤱᤗᤠ ᤔᤢᤎᤡᤱᤗᤢᤱ ᤏᤢ ᤗᤣ᤺ᤳᤋᤠᤱᤒᤠ ᤔᤢᤎᤡᤱᤗᤢᤱ ᤐᤳᤇᤧ॥ 12 ᤛᤢᤶᤛᤡᤃᤣᤰᤐᤠ ᤁᤢᤍᤡ᤺ᤰᤗᤠᤀᤥ ᤔᤠᤰᤁᤢᤶ ᤁᤧᤗ᤹ᤒᤠ ᤁᤢᤜᤧ᤺ᤳᤗᤠ ᤔᤢᤎᤡᤱᤗᤢᤱ. ᤘᤖᤧᤱᤗᤧᤱᤒᤠ ᤁᤢᤜᤡ᤺ᤰᤗᤠ ᤁᤢᤜᤧ᤺ᤳᤗᤠ ᤔᤢᤎᤡᤱᤗᤢᤱ ᤏᤢ ᤐᤠᤖᤠᤴᤗᤠ ᤆᤠ᤺ᤶᤒᤠ ᤔᤢᤎᤡᤱᤗᤢᤱ ᤐᤳᤇᤧ॥ 13 ᤜᤧᤰᤁᤩᤠᤱ ᤗᤡᤛᤡᤃᤣᤰᤐᤠ ᤁᤢᤍᤡ᤺ᤰᤗᤠᤀᤥ. ᤏᤢᤎᤡ ᤆᤠ᤺ᤶᤒᤠ ᤔᤢᤎᤡᤱᤗᤢᤱ. ᤀᤏᤡᤰᤛ ᤔᤢᤎᤡᤱᤗᤢᤱ ᤏᤢ ᤀᤶᤀᤶ ᤁᤧᤗ᤹ᤒᤠ ᤔᤢᤎᤡᤱᤗᤢᤱ ᤐᤳᤇᤧ॥ 14 ᤂᤧᤴ ᤔᤢᤎᤡᤱᤗᤢᤱᤜᤠ᤹ ᤀᤡᤛᤪᤠᤀᤡᤗᤒᤠ ᤕᤧᤶᤒᤡᤳᤇᤠ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤜᤠ᤹ ᤁᤢᤀᤡᤛᤡᤰ ᤌᤡᤒᤥᤱᤅᤠᤱ ᤏᤧᤳᤇᤡ ᤘᤕᤧ॥ ᤁᤧᤖᤧᤰᤁᤥ ᤀᤣ᤺ᤵᤛᤠᤵᤐᤥ ᤗᤰᤔᤏᤠᤒᤠ ᤁᤢᤀᤡᤛᤡᤰ ᤌᤡᤒᤥᤱᤅᤠᤱ ᤏᤧᤳᤇᤡ ᤌᤠ᤺ᤰᤜᤠ᤹ᤀᤥᤒᤠ ᤗᤳᤇᤠ ᤔᤢᤎᤡᤱᤗᤢᤱ ᤌᤰᤔᤠ ᤗᤳᤇᤠ ᤗᤳᤇᤠ ᤔᤡᤱ ᤐᤳᤇᤧ॥ 15 ᤂᤧᤱᤜᤠ᤹ᤖᤧ ᤛᤠ᤺ᤱᤒᤣ ᤛᤧ᤺ᤵᤆᤠᤱᤗᤧ ᤗᤠᤃᤡ ᤀᤡᤍᤠᤰ ᤜᤧᤰᤁᤣ ᤔᤠ᤺ᤵᤔᤏᤠᤒᤠ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱ ᤛᤡᤁᤪᤡᤜᤠ᤹ ᤔᤧᤈᤥᤃᤢ. 16 ᤛᤠᤶᤔᤩᤠᤱᤅᤡᤸᤗᤧᤴ ᤏᤧᤳᤇᤡ ᤔᤢᤎᤡᤱᤗᤢᤱᤜᤠ᤹ ᤑᤶᤔᤠ ᤁᤢᤜᤱᤜᤠ᤹ ᤏᤢ ᤛᤠᤶᤔᤩᤠᤱ ᤁᤢᤴᤍᤢᤸᤗᤥ ᤏᤧᤳᤇᤡ ᤔᤧᤈᤥᤃᤢ ᤜᤧᤰᤁᤩᤠᤱ ᤏᤧᤵᤔᤠᤱ ᤁᤢᤴᤍᤢᤸᤗᤥᤜᤠ᤹ ᤛᤠ᤺ᤱᤒᤣ ᤛᤣ᤺ᤵᤆᤠᤱᤅᤥᤒᤠ ᤌᤠ᤺ᤱ ᤗᤧᤵᤔᤠᤱ ᤏᤠᤜᤠᤱ ᤁᤳᤏᤠᤜᤠᤱ ᤁᤢᤕᤠᤀᤥ ᤔᤧᤓᤳᤇᤢ॥ 17 ᤛᤠ᤺ᤱᤒᤣ ᤛᤣ᤺ᤵᤆᤠᤱᤅᤡᤸᤗᤧ ᤁᤢᤕᤠ ᤁᤢᤕᤠᤀᤥ ᤁᤧᤒᤵᤐᤠ ᤂᤧᤴ ᤁᤢᤴᤍᤢᤸᤗᤥᤀᤥ ᤏᤧᤳᤇᤡ ᤛᤠᤶᤔᤩᤠᤱ ᤛᤡᤰᤁᤪᤡᤜᤠ᤹ ᤔᤧᤕᤠᤰᤋᤢ॥ 18 ᤏᤧᤵᤔᤠᤱ ᤛᤡᤰᤁᤪᤡᤜᤠ᤹ᤖᤧ ᤘᤣ᤹ ᤏᤧᤳᤇᤡ ᤁᤢᤕᤠᤜᤠ᤹ ᤂᤧᤴ ᤏᤧᤵᤔᤠᤱ ᤔᤢᤎᤡᤱᤕᤢᤱᤔᤠ ᤁᤢᤜᤱᤅᤥ ᤔᤧᤍᤢᤶᤛᤢᤀᤠᤱ ᤀᤣᤐᤥᤍᤀᤥᤒᤠ ᤑᤰᤋᤠᤱᤅᤥᤒᤠ ᤁᤢᤀᤡᤓᤢᤵᤔᤥ ᤋᤃᤠᤱ ᤗᤧᤵᤔᤠᤱ ᤔᤧᤓᤳᤇᤢ॥ 19 ᤂᤧᤱᤜᤠ᤹ᤖᤧ ᤏᤧᤳᤇᤡ ᤛᤠᤶᤔᤩᤠᤱ ᤁᤢᤴᤍᤢᤸᤗᤥ ᤔᤧᤈᤥᤃᤢᤀᤠᤱ ᤛᤠ᤺ᤱᤒᤣ ᤛᤧ᤺ᤵᤈᤠᤱᤅᤥᤒᤠ ᤀᤣᤐᤥᤍ ᤛᤡᤃᤠᤱ ᤗᤧᤵᤔᤠᤱ ᤘᤣ᤹ ᤏᤧᤵᤔᤠᤱ ᤁᤢᤛᤢᤰᤐᤥᤒᤠ ᤁᤢᤃ᤺ᤱᤃᤩᤠᤀᤥ ᤔᤧᤓᤳᤇᤢ॥ 20 ᤂᤧᤱᤜᤠ᤹ᤖᤧ ᤀᤠᤸᤗᤛᤠᤱ ᤏᤧᤳᤇᤡ ᤛᤠᤶᤔᤩᤠᤱ ᤁᤢᤴᤍᤢᤸᤗᤥᤜᤠ᤹ ᤔᤧᤈᤥᤃᤢᤀᤠᤱ ᤀᤣᤐᤥᤍᤧᤸᤗᤧ ᤁᤢᤍᤃᤠᤱ ᤗᤧᤵᤔᤠᤱ ᤑᤰᤋᤠᤱᤅᤥ ᤀᤡᤄᤣ᤺ᤱᤔᤏᤠᤒᤠ ᤁᤢᤛᤡᤃᤠᤱᤗᤠᤶ ᤏᤢ ᤀᤣᤐᤥᤍᤒᤠ ᤑᤥ᤹ᤀᤥ ᤕᤢᤶᤔᤏᤠᤒᤠ ᤑ᤹ᤀᤡ᤺ᤸᤗᤧ ᤁᤢᤛᤶᤎᤠᤱᤒᤠ ᤁᤢᤍᤔᤠᤍᤧᤴᤏᤥ ᤔᤧᤓᤳᤇᤢ॥ 21 ᤛᤠ᤺ᤱᤒᤣ ᤛᤧ᤺ᤵᤈᤠᤱᤅᤡᤱᤃ ᤂᤧᤵᤔᤥ ᤁᤧᤒᤵᤐᤠ ᤁᤢᤴᤍᤥᤸᤗᤥᤜᤠ᤹ᤗᤠᤶ ᤀᤣᤐᤥᤍᤀᤥᤒᤠ ᤁᤢᤴᤍᤥᤸᤗᤥᤜᤠ᤹ᤀᤥ ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤁᤢᤏᤠᤶᤔᤡᤸᤗᤧ ᤑ᤹ᤀᤡᤀᤥ ᤀᤡᤔᤧᤄᤣ᤺ᤰᤂᤢ. ᤜᤧᤰᤁᤣᤗ᤹ᤖᤡᤰ ᤂᤧᤴ ᤀᤣᤐᤥᤍᤧᤴ ᤏᤠ ᤏᤢ ᤁᤳᤏᤠ ᤛ᤺ᤶᤔᤠ ᤔᤧᤄᤥᤏᤧᤴ॥ ᤜᤧᤰᤋᤱᤒᤠᤀᤣ ᤆᤥ᤺ᤰᤔᤠ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧᤖᤥ॥ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤘᤣ᤹ ᤂᤢᤴᤇᤡ᤹ ᤆᤠᤱᤜᤠ᤹ ( ᤗᤠ ᥈᥎:᥉᥇-᥊᥉ ) 22 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤣᤐᤥᤍᤒᤠ ᤁᤧᤖᤧᤰ ᤗᤃᤣ᤺ᤵᤐᤧᤴ ᤜᤡ᤺ᤰᤁᤱᤁᤱᤒᤠ ᤆᤠ᤺ᤶᤔᤏᤠᤒᤠᤸᤗᤧ ᤌᤠᤰᤔᤏᤠᤒᤠ ᤆᤡᤖᤡᤰᤁᤡᤸᤗᤧᤴ ᤔᤧᤈᤥᤃᤢ॥ 23 ᤂᤧᤸᤗᤧ ᤁᤢᤗᤢᤶᤔᤥ ᤁᤠᤸᤍᤠᤖᤧᤸᤗᤧ ᤁᤢᤜᤱ ᤜᤧᤰᤋᤱᤒᤠ ᤗᤃᤣ᤺ᤵᤐᤡᤸᤗᤧ ᤁᤢᤜᤱ ᤔᤧᤓᤳᤇᤢ. ᤜᤧᤰᤁᤩᤠᤱ ᤔᤧᤴᤍᤧ᤺ᤱᤔᤠᤖᤧ ᤗᤠᤃᤡ ᤁᤢᤜᤱ ᤁᤒᤪᤡᤱ ᤘᤖᤢ᤺ᤰ ᤋᤷᤄᤧᤘᤠ ᤔᤧᤍᤕᤢᤀᤠᤱ ᤁᤢᤒᤣ ᤔᤧᤛᤧᤖᤢ᤹॥ 24 ᤂᤧᤸᤗᤧ ᤕᤥ ᤁᤢᤓᤧᤖᤠᤀᤥ ᤜᤡ᤺ᤰᤁᤱᤁᤱᤒᤠ. ᤐᤠᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤂᤡ ᤏᤢ ᤆᤢᤴᤈᤢᤴ ᤗ᤹ᤖᤡᤰ ᤑᤔᤏᤠᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤑᤢ᤹ᤗᤧᤛᤣ᤹ᤜᤠ᤹ ᤔᤧᤈᤥᤃᤢ॥ 25 ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ ᤐ᤺ᤱᤃᤣ᤹ᤜᤠ᤹ ᤔᤧᤈᤥᤃᤢᤀᤠᤱ ᤂᤧᤴ ᤕᤥ ᤁᤧᤒᤵᤐᤠ ᤋᤣ᤺ᤵᤑᤧᤖᤠᤀᤥ ᤁᤒᤪᤡᤱ ᤑᤢ᤹ᤗᤧᤛᤣ᤹ᤜᤠ᤹ᤖᤧ ᤁᤢᤗᤢᤶᤔᤥ ᤁᤢᤗᤢᤶᤔᤥ ᤂᤧᤱᤜᤠ᤹ᤖᤧ ᤔᤧᤓᤳᤇᤢ॥ 26 ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤧᤸᤗᤧ ᤆᤠᤱᤔᤏᤠᤒᤠ ᤗᤃᤣ᤺ᤳᤋᤡᤸᤗᤧ ᤕᤥ ᤁᤢᤓᤧᤖᤠᤀᤥ ᤗᤳᤇᤠ ᤐ᤺ᤱᤃᤣ᤹ ᤏᤢ ᤕᤠᤶᤔᤥ ᤗᤳᤇᤠ ᤑᤢ᤹ᤗᤧᤛᤣ᤹ ᤆᤢᤰᤋᤧᤖ ᤁᤒᤪᤡᤱ ᤔᤧᤓᤳᤇᤢ. ᤜᤧᤰᤋᤱᤒᤠ ᤆᤥ᤺ᤰᤔᤠᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧ॥ 27 ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤗᤠᤃᤡ ᤑᤔᤏᤠᤒᤠ ᤆᤢᤴᤈᤢᤶᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤜᤰᤛᤢ᤺ᤵᤐᤠ ᤆᤠᤱᤜᤠ᤹. 28 ᤜᤧᤰᤁᤩᤠᤱ ᤆᤢᤴᤈᤢᤶᤒᤠ ᤏᤤᤏᤠᤛᤢᤳ ᤑᤧᤋᤠ ᤏᤢ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤘᤣ᤹ ᤑᤧᤋᤠᤜᤠ᤹ ᤏᤢ ᤆᤢᤴᤈᤢᤶᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤛᤡᤃᤠᤱ ᤆᤠᤱᤔᤠ ᤆᤠᤱᤜᤠ᤹ ᤂᤧᤱᤜᤠ᤹ᤖᤧ ᤔᤧᤈᤥᤃᤢ॥ 29 ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤆᤢᤴᤈᤢᤴ ᤗ᤹ᤖᤡᤰ ᤑᤔᤏᤠᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ. ᤜᤧᤰᤁᤩᤠᤱ ᤜᤡ᤺ᤰᤁᤱᤁᤱᤒᤠ. ᤐᤠᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤂᤡ᤺ᤸᤗᤧᤴ ᤑᤢᤱ ᤁᤧᤗᤰᤐᤧᤸᤗᤧ ᤁᤢᤕᤠ᤺ᤶᤒᤰ ᤆᤥᤃᤢᤒᤠ ᤑ᤹ᤀᤡ ᤔᤧᤈᤥᤃᤢ. ᤜᤧᤰᤋᤱᤒᤠᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧ॥ 30 ᤂᤧᤱᤜᤠ᤹ᤖᤧ ᤗᤧᤵᤐᤧᤵᤐᤠ. ᤛᤢᤳᤌᤥ ᤋᤡᤆ᤺ᤴ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤗᤧᤴ ᤔᤧᤈᤥᤃᤢ. ᤜᤧᤰᤁᤩᤠᤱ ᤂᤧᤵᤔᤥ ᤀᤣ᤺ᤵᤛᤠᤵᤐᤥ ᤗᤰᤔᤏᤠᤒᤠ ᤜᤧᤰᤁᤣ ᤁᤴ ᤐᤠ᤺ᤴᤜᤠ᤹ “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤣᤛᤣᤒᤠ” ᤗ᤹ᤖᤡᤰ ᤔᤧᤗᤰᤋᤢ॥ 31 ᤂᤧᤱᤜᤠ᤹ᤖᤧ ᤛᤢᤳᤌᤥ ᤋᤡᤆ᤺ᤴ ᤑᤧᤋᤠᤀᤥ ᤑᤶᤔᤠᤖᤧ ᤗᤠᤃᤡ ᤂᤧᤴ ᤜᤡ᤺ᤰᤁᤱᤁᤱᤒᤠ ᤁᤢᤏᤠᤶᤔᤡᤸᤗᤧ ᤀᤡᤔᤧᤄᤣ᤺ᤰᤂᤢ. ᤜᤧᤰᤋᤱᤒᤠᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧᤖᤥ॥ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤴ ᤆᤥ᤺ᤰᤔᤠ ᤔᤧᤛᤢᤖᤢ ( ᤗᤠ ᥉᥋:᥇᥆-᥇᥏ ) 32 ᤁᤶᤓᤗ᤹ᤖᤡᤰ ᤋᤢᤶᤔᤠᤍᤧᤴ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤁᤧᤖᤧᤰ ᤕᤠ᤺ᤶᤒᤰᤁᤡᤴ ᤆᤥ᤺ᤰᤔᤠ ᤆᤢᤖᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤜᤧᤰᤁᤣᤀᤣ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤈᤥᤃᤢ॥ 33 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤴ ᤔᤥᤛᤠᤀᤥ ᤔᤧᤍᤠᤖᤢ. ᤂᤧᤴ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤡᤴ ᤏᤢ ᤂᤧᤵᤔᤥᤒᤠ ᤁᤧᤖᤧᤰ ᤛᤠᤔᤠᤜᤠ᤹—ᤁᤢᤀᤢ᤺ᤱᤔᤠ ᤗᤰᤆᤢᤜᤠ᤹. ᤛᤡᤱᤓᤧᤸᤗᤧᤰᤜᤠ᤹. ᤁᤢᤛᤠᤰᤔᤠ ᤛᤡᤱᤜᤠ᤹. ᤛᤡᤳᤗᤠᤱᤜᤠ᤹. ᤁᤢᤕᤢᤰᤏᤠᤜᤠ᤹. 34 ᤜᤧ᤺ᤳᤋᤠᤱᤒᤠ ᤔᤧᤈᤠ᤺ᤴᤍᤢᤒᤠ ᤔᤧᤸᤗᤢᤰ ᤜᤥᤖᤡᤰᤐᤠ ᤁᤢᤎᤣ᤺ᤰᤔᤠᤜᤠ᤹. ᤛᤠ᤹ᤖᤡᤰ ᤏᤢᤒᤠ ᤛᤠᤜᤥᤖᤡᤰ ᤁᤢᤎᤣ᤺ᤰᤔᤠᤜᤠ᤹. ᤁᤢᤎᤣ᤺ᤰᤔᤠ ᤑᤥ᤺ᤴᤍᤠ. 35 ᤔᤠᤱᤜᤢᤵ ᤛᤠᤵᤗᤢᤱ ᤁᤧᤕᤠᤰᤐᤠ ᤛᤴᤍᤥᤰᤁᤡᤴ ᤏᤢ ᤂᤧᤸᤗᤧ ᤁᤢᤒᤱᤔᤠ ᤋᤰᤗᤠᤱᤜᤠ᤹ ᤜᤧᤰᤁᤩᤠᤱ ᤁᤢᤍᤧᤵᤑᤣ᤹. 36 ᤆᤵᤋᤧᤴ ᤏᤢ ᤂᤧᤸᤗᤧ ᤁᤧᤖᤧᤰ ᤁᤢᤛᤠᤔᤠᤜᤠ᤹ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤏᤠᤒᤠ ᤂᤖᤧ᤺ᤱ. 37 ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ ᤛᤣᤔᤡᤕᤢᤱᤍᤧᤴ ᤂᤧᤒᤩᤠᤱ ᤂᤧᤵᤔᤥᤒᤠ ᤛᤣᤔᤡ ᤜᤠ᤺ᤶᤔᤠᤜᤠ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤧᤖᤧᤰ ᤁᤢᤛᤠᤔᤠᤜᤠ᤹ ᤏᤢ ᤀᤥ᤺ᤳᤋᤡ᤺ᤸᤗᤧ ᤗᤠᤃᤡ ᤏᤡ᤺ᤱᤃᤣ᤹. 38 ᤛᤠᤶᤔᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴ. ᤔᤠᤱᤌᤥ᤺ᤰᤏᤠ ᤐᤡᤔᤠᤛᤡ ᤏᤡ᤺ᤱᤃᤣ᤹. ᤁᤢᤏᤠᤶᤃᤧᤏᤢ᤹ᤒᤠ ᤛᤢᤰᤐᤠ. ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤗᤠᤃᤡ ᤑᤥ᤺ᤴᤍᤠ. 39 ᤁᤠᤛᤠ᤺ᤸᤗᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴ. ᤂᤧᤵᤔᤥᤒᤠ ᤁᤠᤛᤠ ᤆᤡ᤹ᤗᤡᤱᤃᤣ᤹. ᤂᤧᤵᤔᤥᤒᤠ ᤋᤰᤗᤠᤱᤜᤠ᤹ ᤏᤢ ᤂᤧᤸᤗᤧ ᤁᤧᤖᤧᤰ ᤁᤢᤛᤠᤔᤠᤜᤠ᤹. ᤆᤫᤠ᤺ᤳ ᤕᤠᤱᤔᤠ ᤇᤧ᤺ᤱᤃᤩᤠ ᤏᤢ ᤂᤧᤸᤗᤧ ᤁᤢᤗᤠᤱᤜᤠ᤹ 40 ᤗᤰᤂᤢᤶᤔᤥᤒᤠ ᤑᤥ᤺ᤴᤍᤠᤜᤠ᤹. ᤂᤧᤵᤔᤥᤒᤠ ᤛᤡᤳᤗᤠᤱᤜᤠ᤹ ᤏᤢ ᤁᤢᤕᤢᤰᤏᤠᤜᤠ᤹. ᤗᤰᤂᤢᤶᤔᤥᤒᤠ ᤗᤠᤶᤎᤣ᤺ᤳᤋᤥᤒᤠ ᤑᤥ᤺ᤴᤍᤠ. ᤂᤧᤵᤔᤥᤒᤠ ᤀᤡᤍᤠ᤺ᤰᤜᤠ᤹ ᤏᤢ ᤁᤢᤀᤢ᤺ᤱᤔᤠ ᤗᤰᤆᤢᤜᤠ᤹ ᤜᤧᤰᤁᤩᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ. ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤗᤠᤃᤡ ᤔᤠᤱᤛᤧᤘᤠ ᤆᤥ᤺ᤰᤔᤠ ᤁᤧᤖᤧᤰ ᤛᤠᤔᤠᤜᤠ᤹ 41 ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤔᤠᤱᤛᤧᤘᤠ ᤆᤥ᤺ᤰᤔᤠ ᤕᤠ᤺ᤶᤒᤰᤗᤧ ᤗᤠᤃᤡ ᤑᤔᤏᤠᤒᤠ ᤆᤠᤱᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠ ᤜᤠᤖᤢᤏᤧᤸᤗᤧ ᤛᤢᤳᤌᤥ ᤁᤢᤈᤠᤱᤜᤠ᤹ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠᤀᤥ ᤔᤠᤱᤛᤧᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤆᤠᤱᤜᤠ᤹॥ 42 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤐᤡᤖᤢᤒᤠ ᤀᤡᤱᤈᤠᤱ ᤁᤢᤀᤡᤛᤡᤰ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤈᤥᤃᤢ॥ 43 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤂᤧᤴ ᤕᤠ᤺ᤶᤒᤰᤜᤠ᤹ ᤀᤥᤔᤧᤳᤋᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤰᤂᤣᤗ᤹ᤖᤡᤰ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧ ᤂᤧᤱᤜᤠ᤹ᤖᤧ ᤜᤧᤰᤋᤱᤒᤠᤀᤣ ᤔᤧᤈᤥᤃᤢᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.