ᤗᤠᤶᤍᤡᤰ 38 - LIFOTNTᤘᤕᤠᤃᤧᤴ ᤛᤡᤍᤢᤱᤈᤓᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ 1 ᤒᤈᤗᤧᤗᤖᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ ᤒᤒᤢᤗ ᤛᤡᤱᤅᤡᤸᤗᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤆᤥᤃᤢ॥ ᤂᤧᤸᤗᤧ ᤜᤢᤰᤛᤡᤰ ᤅᤠᤛᤡ ᤁᤢᤗᤠᤶᤋᤡ. ᤜᤢᤰᤛᤡᤰ ᤅᤠᤛᤡ ᤁᤢᤓᤧᤖᤧ. ᤁᤢᤛᤢᤰᤐᤠ ᤗᤡᤛᤡ ᤁᤧᤒᤵᤐᤠ ᤏᤢ ᤜᤢᤰᤛᤡᤰ ᤛᤢᤶᤛᤡ ᤁᤧᤒᤵᤐᤠ ᤁᤢᤗᤡᤱᤃᤧᤴ ᤆᤥᤃᤧ॥ 2 ᤂᤧᤸᤗᤧ ᤗᤡᤛᤡᤀᤣ ᤁᤢᤛᤢᤰᤐᤥ ᤂᤢᤏᤧ᤹ ᤆᤶᤒᤧᤵᤐᤠ ᤁᤢᤍᤠᤱᤜᤠ᤹ ᤆᤥᤃᤢ॥ ᤂᤧᤴ ᤁᤢᤍᤠᤱᤜᤠ᤹ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤜᤠᤒᤠ ᤂᤧᤴ ᤗᤳᤇᤠ ᤁᤢᤀᤠ᤺ᤳ ᤛᤡᤱᤅᤡᤸᤗᤧᤴ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤁᤠᤛᤠ᤺ᤸᤗᤧ ᤛᤢ᤺ᤵᤋᤢ॥ 3 ᤂᤧᤸᤗᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤁᤧᤖᤧᤰ ᤛᤠᤔᤠ ᤐᤢᤔᤠᤜᤠ᤹. ᤗᤱᤄᤳᤜᤠ᤹. ᤛᤠᤱᤔᤠ ᤇᤧ᤺ᤱᤃᤩᤠᤜᤠ᤹. ᤛᤠ ᤗᤰᤔᤠ ᤛᤢᤶᤈᤢᤗᤡᤜᤠ᤹ ᤏᤢ ᤔᤡ ᤏᤧᤔᤠ ᤂᤠᤶᤗᤧᤰᤜᤠ᤹—ᤁᤠᤛᤠ᤺ᤸᤗᤧᤴ ᤆᤥᤃᤢ॥ 4 ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤗᤠᤃᤡ ᤂᤧᤸᤗᤧ ᤁᤢᤛᤡᤃᤠᤱ ᤁᤧᤖᤧᤰ ᤐᤡᤛᤠᤱ ᤁᤢᤃ᤺ᤱᤃᤩᤠ᤺ᤸᤗᤧ ᤁᤢᤛᤡᤃᤠᤱ ᤁᤢᤕᤠᤶᤗᤧᤱᤒᤠ ᤁᤒᤪᤡᤱ ᤁᤢᤗᤢᤶᤔᤥ ᤌᤠᤖᤡᤰᤁᤣ ᤁᤧᤃᤧᤵᤐᤠ ᤁᤠᤛᤠ ᤆᤡ᤹ᤗᤡᤱᤃᤣ᤺ᤸᤗᤧ ᤌᤡᤰ ᤆᤥᤃᤢ॥ 5 ᤂᤧᤴ ᤁᤠᤛᤠ ᤆᤡ᤹ᤗᤡᤱᤃᤣᤸᤗᤧ ᤗᤡᤛᤡ ᤁᤢᤛᤢᤰᤐᤥ ᤋᤰᤗᤠᤱᤜᤠ᤹ᤖᤧ ᤁᤢᤗᤡ᤺ᤱᤔᤠᤍᤧᤴ ᤑᤶᤔᤠᤖᤧ ᤗᤠᤃᤡ ᤂᤧᤸᤗᤧ ᤗᤡᤛᤡ ᤁᤢᤴᤍᤢᤸᤗᤥᤜᤠ᤹ ᤑᤳᤇᤢ॥ 6 ᤋᤰᤗᤠᤱᤜᤠ᤹ ᤒᤒᤢᤗ ᤛᤡᤱᤅᤡᤸᤗᤧᤴ ᤆᤥᤃᤢᤀᤠᤱ ᤂᤢᤏᤧ᤹ ᤂᤧᤴ ᤁᤠᤛᤠ᤺ᤸᤗᤧ ᤛᤢ᤺ᤵᤋᤢ॥ 7 ᤂᤧᤴ ᤋᤰᤗᤠᤱᤜᤠ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤕᤠᤀᤥᤒᤠ ᤁᤢᤴᤍᤢᤸᤗᤥᤜᤠ᤹ᤀᤥ ᤂᤧᤴ ᤐᤱᤔᤠᤖᤧ ᤗᤠᤃᤡ ᤌᤧᤰᤋᤢ॥ ᤂᤧᤸᤗᤧ ᤂᤧᤴ ᤛᤡᤱᤓᤧᤸᤗᤧᤰᤜᤠ᤹ᤗᤠᤶ ᤂᤧᤴ ᤁᤢᤜᤥ᤺ᤴᤍᤪᤠ ᤁᤧᤒᤵᤐᤠ ᤆᤥᤃᤢᤖᤥ॥ ᤆᤫᤠ᤺ᤳ ᤕᤠᤱᤔᤠ ᤁᤠᤛᤠ ᤂᤵᤐᤩᤠ ( ᤗᤠ ᥉᥆:᥇᥎ ) 8 ᤂᤧᤸᤗᤧ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠ᤺ᤵᤔᤠᤍᤧᤴᤏᤥ ᤔᤠᤱᤛᤧᤘᤠ ᤁᤧᤈᤥ᤺ᤰᤔᤠ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤌᤥ᤹ᤛᤡᤱᤔᤠ ᤛᤧᤗᤧᤱᤄᤥᤜᤠ᤹ᤗᤠᤶ ᤜᤵᤛᤡᤱᤔᤠ ᤁᤠᤛᤠ ᤇᤧᤱᤃᤩᤠ ᤏᤢ ᤂᤧᤸᤗᤧ ᤁᤢᤗᤠᤱ ᤆᤥᤃᤢᤖᤥ॥ ᤗᤰᤂᤢᤶ ( ᤗᤠ ᥈᥍:᥏-᥇᥏ ) 9 ᤂᤧᤒᤩᤠᤱ ᤂᤢᤏᤧ᤹ ᤗᤰᤂᤢᤶ ᤆᤥᤃᤢ॥ ᤂᤧᤸᤗᤧ ᤕᤥ ᤗᤧᤵᤔᤠᤱᤒᤠ ᤗᤰᤁᤡᤸᤗᤧ ᤁᤢᤗᤠᤶᤋᤡ᤺ᤴ ᤁᤡᤵ ᤌᤡᤰ ᤜᤢᤰᤛᤡᤰ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤂᤧᤵᤔᤥ ᤆᤢᤴᤈᤢᤴ ᤗ᤹ᤖᤡᤰ ᤑᤔᤏᤠᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤑᤥ᤺ᤴᤍᤠᤜᤠ᤹ ᤐᤳᤇᤧ॥ 10 ᤂᤧᤵᤔᤥᤒᤠ ᤛᤡᤳᤗᤠᤱᤜᤠ᤹ ᤏᤡᤒᤥᤱ ᤏᤢ ᤂᤧᤸᤗᤧ ᤁᤢᤒᤢᤱᤜᤠ᤹ᤀᤠᤱ ᤏᤡᤒᤥᤱ ᤁᤠᤛᤠ᤺ᤸᤗᤧᤴ ᤕᤢᤅᤧ॥ ᤛᤡᤳᤗᤠᤱᤅᤥᤒᤠ ᤂᤧ᤺ᤰᤆᤢᤖᤡᤜᤠ᤹ ᤏᤢ ᤂᤧᤸᤗᤧ ᤁᤢᤀᤢ᤺ᤱᤔᤠ ᤁᤢᤏᤠᤶᤜᤠ᤹ ᤕᤢᤵᤐᤠ᤺ᤸᤗᤧᤴ ᤘᤕᤧ॥ 11 ᤌᤥ ᤗᤧᤵᤔᤠᤱᤒᤠ ᤁᤢᤗᤰᤁᤡᤸᤗᤧ ᤗᤠᤃᤡᤀᤠᤱ ᤁᤡᤵ ᤌᤡᤰ ᤜᤢᤰᤛᤡᤰ ᤁᤢᤗᤠᤶᤋᤡ ᤁᤧᤒᤵᤐᤠ ᤑᤥ᤺ᤴᤍᤠᤜᤠ᤹ ᤏᤢ ᤂᤧᤵᤔᤥᤒᤠ ᤏᤡᤒᤥᤱ ᤛᤡᤳᤗᤠᤱᤜᤠ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤒᤢᤱᤜᤠ᤹ᤀᤠᤱ ᤏᤡᤒᤥᤱᤅᤣ ᤁᤧᤖᤧᤰ ᤁᤠᤛᤠ᤺ᤸᤗᤧᤴᤏᤧ ᤕᤢᤅᤧ॥ ᤁᤖ ᤛᤡᤳᤗᤠᤱᤜᤠ᤹ᤖᤧ ᤁᤢᤀᤢ᤺ᤱᤔᤠ ᤂᤧ᤺ᤰᤆᤢᤖᤡᤜᤠ᤹ ᤏᤢ ᤁᤢᤏᤠᤶᤜᤠ᤹ ᤕᤢᤵᤐᤠ᤺ᤸᤗᤧᤴ ᤐᤳᤇᤧ॥ 12 ᤏᤠᤶᤎᤠ ᤐᤡᤛᤠᤱᤗᤧ ᤗᤠᤃᤡ ᤅᤠᤒᤥᤱ ᤜᤢᤰᤛᤡᤰ ᤁᤢᤗᤠᤶᤋᤡ ᤁᤧᤒᤵᤐᤠ ᤑᤥ᤺ᤴᤍᤠᤜᤠ᤹ ᤐᤳᤇᤧ॥ ᤂᤧᤵᤔᤥᤒᤠ ᤛᤡᤳᤗᤠᤱᤜᤠ᤹ ᤌᤡᤒᤥᤱ ᤏᤢ ᤁᤢᤕᤢᤰᤏᤠᤜᤠ᤹ ᤌᤡᤒᤥᤱᤅᤣ ᤕᤢᤅᤧ. ᤁᤖ ᤛᤡᤳᤗᤠᤱᤜᤠ᤹ᤀᤥᤒᤠ ᤂᤧ᤺ᤰᤆᤢᤖᤡᤜᤠ᤹ ᤏᤢ ᤁᤢᤏᤠᤶᤜᤠ᤹ ᤕᤢᤵᤐᤠ᤺ᤸᤗᤧᤴ ᤐᤳᤇᤧ॥ 13 ᤛᤣᤛᤣ ᤛᤠ᤺ᤱᤃᤠᤜᤡᤶᤔᤧᤸᤗᤧ ᤁᤢᤍᤃᤠᤱ ᤗᤧᤵᤔᤠᤱ ᤏᤠᤱᤃᤧᤴ ᤗᤧᤵᤔᤠᤱᤒᤠ ᤁᤢᤓᤧᤖᤧᤴ ᤅᤠᤒᤥᤱ ᤜᤢᤰᤛᤡᤰ ᤏᤧᤛ᤻ᤛᤧ॥ 14 ᤕᤶᤒᤠ ᤗᤠᤶᤎᤣ᤺ᤳᤋᤥᤒᤠ ᤌᤡᤰᤏᤠᤜᤠᤱ ᤗᤧᤵᤔᤠᤱᤒᤠᤸᤗᤧ ᤗᤠᤃᤡ ᤌᤡᤒᤥᤱᤅᤠᤱ ᤅᤠᤛᤡ ᤜᤢᤰᤛᤡᤰ ᤁᤢᤗᤠᤶᤋᤡ ᤁᤧᤒᤵᤐᤠ ᤑᤥ᤺ᤴᤍᤠᤜᤠ᤹ ᤐᤳᤇᤧ॥ ᤂᤧᤵᤔᤥᤒᤠ ᤛᤡᤳᤗᤠᤱᤜᤠ᤹ ᤛᤢᤶᤛᤡ ᤏᤢ ᤁᤢᤕᤢᤰᤏᤠᤜᤠ᤹ᤀᤠᤱ ᤛᤢᤶᤛᤡᤀᤣ ᤕᤢᤅᤧ॥ 15 ᤘᤣ᤹ ᤗᤧᤵᤔᤠᤱᤒᤠᤸᤗᤧ ᤗᤠᤃᤡ ᤀᤰᤋᤱᤒᤠᤀᤣ ᤆᤥᤃᤧ॥ ᤗᤰᤂᤢᤶᤔᤥᤒᤠ ᤗᤠᤶᤎᤣᤳ ᤆᤢᤵᤛᤠᤱ ᤏᤢ ᤑᤧᤴᤇᤠᤱ ᤗᤧᤵᤔᤠᤱ ᤌᤡᤒᤥᤱᤅᤠᤱ ᤅᤠᤛᤡ ᤜᤢᤰᤛᤡᤰ ᤁᤢᤗᤠᤶᤋᤡ ᤁᤧᤒᤵᤐᤠ ᤑᤥ᤺ᤴᤍᤠᤜᤠ᤹ ᤐᤳᤇᤧ॥ ᤂᤧᤵᤔᤥᤒᤠ ᤛᤡᤳᤗᤠᤱᤜᤠ᤹ ᤛᤢᤶᤛᤡ ᤏᤢ ᤂᤧᤸᤗᤧ ᤁᤢᤕᤢᤰᤏᤠᤜᤠ᤹ ᤛᤢᤶᤛᤡᤀᤣ ᤕᤢᤅᤧ॥ 16 ᤗᤰᤂᤢᤶ ᤁᤧᤖᤧᤰ ᤐᤡᤛᤠᤱ ᤁᤧᤖᤧᤰ ᤑᤥ᤺ᤴᤍᤠᤜᤠ᤹ ᤆᤢᤴᤈᤢᤴ ᤗ᤹ᤖᤡᤰ ᤑᤔᤏᤠᤒᤠ ᤆᤡᤖᤡᤰᤁᤡᤸᤗᤧᤴ ᤐᤳᤇᤧ॥ 17 ᤛᤡᤳᤗᤠᤱᤅᤡᤸᤗᤧ ᤁᤢᤒᤢᤱᤜᤠ᤹ ᤁᤠᤛᤠ᤺ᤸᤗᤧᤴ ᤕᤢᤅᤧ. ᤁᤖ ᤛᤡᤳᤗᤠᤱᤜᤠ᤹ᤀᤥᤒᤠ ᤂᤧ᤺ᤰᤆᤢᤖᤡᤜᤠ᤹ ᤏᤢ ᤁᤢᤀᤢ᤺ᤱᤔᤠ ᤁᤢᤏᤠᤶᤜᤠ᤹ᤃ ᤕᤢᤵᤐᤠ᤺ᤸᤗᤧᤴ ᤐᤳᤇᤧ॥ ᤂᤧᤸᤗᤧ ᤁᤢᤛᤶᤜᤠ᤹ ᤕᤢᤵᤐᤠ᤺ᤸᤗᤧ ᤔᤧᤛᤢ᤺ᤵᤋᤢᤀᤠᤱ ᤐᤳᤇᤧ॥ ᤗᤰᤂᤢᤶᤔᤥᤒᤠ ᤁᤧᤖᤧᤰ ᤛᤡᤳᤗᤠᤱᤜᤠ᤹ᤖᤧ ᤁᤢᤀᤢ᤺ᤱᤔᤠ ᤁᤢᤏᤠᤶᤜᤠ᤹ ᤕᤢᤵᤐᤠ᤺ᤸᤗᤧᤴ ᤐᤳᤇᤧ॥ 18 ᤗᤰᤂᤢᤶᤔᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥᤒᤠ ᤑᤥ᤺ᤴᤍᤠᤴ ᤑᤢᤱ ᤁᤧᤗᤰᤐᤧᤸᤗᤧ ᤁᤢᤕᤠ᤺ᤶᤒᤰ ᤁᤧᤗᤠ᤺ᤵᤐᤠ ᤜᤡ᤺ᤰᤁᤱᤁᤱᤒᤠ. ᤐᤠᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤂᤡ ᤏᤢ ᤆᤢᤴᤈᤢᤴ ᤗ᤹ᤖᤡᤰ ᤌᤠᤰᤔᤏᤠᤒᤠ ᤏᤤᤏᤠᤛᤢᤳ ᤆᤡᤖᤡᤰᤗᤠᤶ ᤔᤧᤈᤥᤃᤢᤒᤠ ᤆᤥᤃᤧ॥ ᤂᤧᤸᤗᤧ ᤁᤢᤗᤠᤶᤋᤡ᤺ᤴ ᤏᤡᤒᤥᤱ ᤜᤢᤰᤛᤡᤰ ᤏᤢ ᤁᤢᤗᤡᤱᤃᤧᤴᤏᤡᤴ ᤗᤰᤂᤢᤶᤔᤥᤒᤠ ᤑᤥ᤺ᤴᤍᤠ᤺ᤴᤏᤢ ᤁᤢᤍᤱᤒᤠ ᤜᤢᤰᤛᤡᤰ ᤅᤠᤛᤡ ᤁᤧᤒᤵᤐᤠ ᤆᤥᤃᤧ॥ 19 ᤂᤧᤵᤔᤥᤒᤠ ᤛᤡᤳᤗᤠᤱᤜᤠ᤹ ᤗᤡᤛᤡ ᤏᤢ ᤂᤧᤸᤗᤧ ᤁᤠᤛᤠ ᤁᤢᤕᤢᤰᤏᤠᤜᤠ᤹ ᤗᤡᤛᤡᤀᤣ ᤕᤢᤅᤧ॥ ᤂᤧᤵᤔᤥᤒᤠ ᤂᤧ᤺ᤰᤆᤢᤖᤡᤜᤠ᤹ ᤏᤢ ᤁᤢᤀᤢ᤺ᤱᤔᤠ ᤁᤢᤏᤠᤶᤜᤠ᤹ ᤕᤢᤵᤐᤠ᤺ᤸᤗᤧᤴ ᤐᤳᤇᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤶᤜᤠ᤹ᤀᤠᤱ ᤕᤢᤵᤐᤠ᤺ᤸᤗᤧ ᤔᤧᤛᤢ᤺ᤵᤋᤢᤀᤠᤱ ᤐᤳᤇᤧᤖᤥ॥ 20 ᤛᤣᤛᤣ ᤛᤠ᤺ᤱᤃᤠᤜᤡᤶ ᤏᤢ ᤂᤧᤴ ᤁᤒᤪᤡᤱ ᤐᤡᤛᤠᤱᤒᤠ ᤗᤰᤂᤢᤶᤔᤥᤒᤠ ᤁᤧᤖᤧᤰ ᤁᤢᤀᤢ᤺ᤱᤔᤠ ᤗᤰᤆᤢᤜᤠ᤹ ᤁᤠᤛᤠ᤺ᤸᤗᤧᤴ ᤕᤢᤅᤧᤖᤥ॥ ᤛᤣᤛᤣ ᤛᤠ᤺ᤱᤃᤠᤜᤡᤶ ᤆᤥ᤺ᤰᤔᤠ ᤆᤡᤃᤰᤘᤠᤜᤠ᤹ 21 ᤔᤠᤱᤜᤢᤵ ᤛᤠᤵᤗᤢᤱ ᤁᤧᤕᤠᤰᤐᤠ ᤏᤡᤱᤘᤠ᤹ᤑᤢᤔᤠᤱ ᤛᤴᤍᤥᤰ ᤁᤧᤕᤢᤱᤒᤠ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤗᤠᤃᤡ ᤀᤥᤃᤵ ᤁᤧᤒᤥᤱᤒᤠ ᤆᤡᤃᤰᤘᤠ ᤛᤠᤔᤠᤜᤠ᤹ ᤔᤥᤛᤠ᤺ᤸᤗᤧ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤠᤖᤢᤏᤖᤧ ᤁᤢᤛ᤻ᤛᤠ ᤀᤡᤋᤠᤔᤠᤖᤗᤠᤶ ᤗᤧᤒᤡᤜᤠ᤹ᤖᤧ ᤔᤧᤈᤥᤃᤢᤀᤠᤱ ᤘᤕᤧᤒᤠ ᤐᤠ᤺ᤴᤜᤠ᤹ᤖᤧ ᤐᤥᤎᤰᤁᤡᤴ ᤜᤠᤒᤠ ᤁᤴᤗᤥ॥ 22 (ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤕᤜᤢᤍᤠᤖᤧ ᤁᤢᤎᤠ᤺ᤰᤁᤥᤒᤠ ᤜᤢᤖᤧᤸᤗᤧ ᤁᤢᤶᤔᤧᤴᤇᤠ᤹. ᤀᤢᤖᤡ᤺ᤸᤗᤧ ᤁᤢᤛ᤻ᤛᤠ ᤒᤈᤗᤧᤗᤖᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤥᤃᤢ॥ 23 ᤂᤢᤏᤧ᤹ᤏᤢ ᤍᤠᤏᤖᤧ ᤁᤢᤎᤠ᤺ᤰᤁᤥᤒᤠ ᤀᤜᤡᤛᤠᤔᤠᤰᤁᤧᤸᤗᤧ ᤁᤢᤛ᤻ᤛᤠ ᤀᤥᤜᤥᤗᤡᤀᤠᤒᤧᤴ ᤆᤥᤒᤣᤃᤢ ᤕᤠ᤺ᤶᤒᤰ ᤆᤥ᤺ᤰᤔᤠ. ᤜᤧᤰᤁᤩᤠᤱ ᤆᤀᤡ᤺ᤳᤜᤠ᤹ ᤆᤥ᤺ᤰᤔᤠ ᤏᤢ ᤜᤡ᤺ᤰᤁᤱᤁᤱᤒᤠ. ᤐᤠᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤂᤡ ᤂᤧᤒᤩᤠᤱ ᤆᤢᤴᤈᤢᤶᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤥ ᤑᤢᤱ ᤗᤰᤔᤠ ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤘᤕᤧᤛᤡ॥) 24 ᤛᤣᤛᤣᤍᤧᤴᤏᤥᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ᤖᤧ ᤗᤠᤃᤡ ᤌᤠ᤺ᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠᤀᤥᤒᤠ ᤁᤧᤖᤧᤰ ᤛᤠᤶᤔᤩᤠᤱᤅᤡᤴ. ᤛᤣᤛᤣᤍᤧᤴᤏᤥᤒᤠ ᤛᤣᤁᤣᤗᤖᤧ ᤁᤢᤎᤠᤱᤔᤠ ᤁᤢᤀᤡᤛᤡᤰ ᥈᥏ ᤋᤥᤖᤠ ᤏᤢ ᥍᥉᥆ ᤛᤣᤁᤣᤗ ᤘᤕᤧ॥ 25 ᤛᤱᤈᤢᤶᤓᤥᤀᤥ ᤕᤠᤶᤏᤠ᤺ᤳᤏᤡ᤺ᤳ ᤔᤧᤈᤥᤃᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤵᤐᤠᤴ ᤛᤣᤛᤣᤍᤧᤴᤏᤥᤒᤠ ᤛᤣᤁᤣᤗᤖᤧ ᤁᤢᤎᤠᤱᤔᤠ ᤁᤢᤀᤡᤛᤡᤰ ᥇᥆᥆ ᤋᤥᤖᤠ ᤏᤢ ᥇.᥍᥍᥋ ᤛᤣᤁᤣᤗᤒᤠ ᤘᤕᤧ— 26 ᤋᤱᤒᤣ ᤏᤡᤒᤥᤱ ᤏᤢ ᤂᤧᤴᤏᤢ᤺ᤸᤗᤧ ᤕᤖᤡᤰ ᤋᤱᤒᤣ ᤁᤧᤃᤧᤵᤐᤠ ᤔᤏᤠᤜᤠ᤹ ᤔᤧᤏᤡᤖᤢᤛᤡᤀᤠᤱ ᤔᤧᤘᤕᤧ. ᤂᤧᤱᤜᤠ᤹ ᥌᥆᥉. ᥋᥋᥆ ᤔᤏᤠᤜᤠ᤹ ᤁᤧᤖᤧᤰᤗᤠᤶᤒᤠ ᤒᤣᤁᤠ ᤌᤡᤰᤌᤡᤰ ᤀᤡᤃᤪ. ᤛᤣᤛᤣᤍᤧᤴᤏᤥᤒᤠ ᤁᤢᤎᤠᤱᤔᤧᤸᤗᤧ ᤁᤢᤓᤪᤧ᤺ᤱ ᤛᤣᤁᤣᤗ ᤘᤕᤧ॥ 27 ᥇᥆᥆ ᤋᤥᤖᤠᤴ ᤛᤣᤛᤣᤍᤧᤴ ᤏᤢ ᤑᤥ᤺ᤴᤍᤠᤜᤠ᤹ᤖᤧ ᤁᤢᤕᤢᤰᤏᤠᤍᤧᤴᤜᤠ᤹ ᤕᤥ᤺ᤶᤔᤠᤖᤧ ᤗᤠᤃᤡ ᤘᤕᤧ॥ ᤗᤳᤇᤠ ᤁᤢᤕᤢᤰᤏᤠ ᤌᤰᤔᤠ ᤋᤥᤖᤠ ᤌᤡᤰ ᤕᤠᤃᤧ. ᤁᤧᤖᤧᤰ ᤁᤢᤕᤢᤰᤏᤠᤍᤧᤴᤜᤠ᤹ᤀᤥ ᥇᥆᥆ ᤋᤥᤖᤠ ᤕᤠᤃᤧ॥ 28 ᤂᤧᤴ ᥇.᥍᥍᥋ ᤛᤣᤁᤣᤗᤗᤠᤶ ᤂᤧᤱᤜᤠ᤹ᤖᤧ ᤛᤡᤳᤗᤠᤱᤜᤠ᤹ᤖᤧ ᤗᤠᤃᤡ ᤂᤧ᤺ᤰᤆᤢᤖᤡ ᤔᤧᤈᤥᤃᤢ. ᤂᤧᤸᤗᤧ ᤁᤢᤛᤶᤜᤠ᤹ ᤔᤧᤛᤢ᤺ᤵᤋᤢ ᤜᤧᤰᤁᤩᤠᤱ ᤁᤢᤀᤢ᤺ᤱᤔᤠ ᤁᤢᤏᤠᤶᤜᤠ᤹ ᤔᤧᤈᤥᤃᤢ॥ 29 ᤌᤠ᤺ᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠᤀᤥᤒᤠ ᤁᤠᤛᤠᤴ ᥍᥆ ᤋᤥᤖᤠ ᤏᤢ ᥈.᥊᥆᥆ ᤛᤣᤁᤣᤗᤒᤠ ᤘᤕᤧ॥ 30 ᤜᤠᤒᤠ ᤂᤧᤴᤗᤠᤶᤒᤠᤀᤣ ᤂᤧᤱᤜᤠ᤹ᤖᤧ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤗᤠᤃᤡ ᤁᤢᤕᤢᤰᤏᤠᤜᤠ᤹. ᤁᤠᤛᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤜᤧᤰᤁᤩᤠᤱ ᤂᤧᤸᤗᤧ ᤗᤠᤃᤡ ᤁᤠᤛᤠ ᤆᤡ᤹ᤗᤡᤱᤃᤣ᤹ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤁᤧᤖᤧᤰ ᤛᤠᤔᤠᤜᤠ᤹. 31 ᤂᤧᤒᤩᤠᤱ ᤁᤧᤖᤧᤰ ᤐᤡᤛᤠᤱᤒᤠ ᤗᤰᤂᤢᤶᤔᤥᤒᤠ ᤁᤢᤕᤢᤰᤏᤠᤜᤠ᤹ ᤏᤢ ᤗᤰᤂᤢᤶᤔᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥᤒᤠ ᤁᤢᤕᤢᤰᤏᤠᤜᤠ᤹. ᤜᤧᤰᤁᤩᤠᤱ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤁᤧᤖᤧᤰ ᤁᤢᤀᤢ᤺ᤱᤔᤠ ᤗᤰᤆᤢᤜᤠ᤹ ᤏᤢ ᤗᤰᤂᤢᤶᤔᤥᤒᤠ ᤁᤧᤖᤧᤰ ᤐᤡᤛᤠᤱᤒᤠ ᤁᤢᤀᤢ᤺ᤱᤔᤠ ᤗᤰᤆᤢᤜᤠ᤹ ᤔᤧᤈᤥᤃᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.