ᤗᤠᤶᤍᤡᤰ 37 - LIFOTNT

ᤔᤠᤱᤜᤢᤵ ᤛᤴᤍᤥᤰ ᤆᤥ᤺ᤰᤔᤠ ᤕᤠ᤺ᤶᤒᤰ

¹ ᤒᤈᤗᤧᤗᤖᤧ ᤒᤒᤢᤗ ᤛᤡᤱᤅᤡᤸᤗᤧᤴ ᤔᤠᤱᤜᤢᤵ ᤛᤴᤍᤥᤰ ᤆᤥᤃᤢ॥ ᤂᤧᤸᤗᤧ ᤁᤢᤗᤠᤶᤋᤡ ᤜᤢᤰᤛᤡᤰ ᤏᤧᤳᤇᤡᤀᤠᤱ ᤁᤢᤓᤪᤧ᤺ᤱ. ᤁᤢᤓᤧᤖᤧ ᤜᤢᤰᤛᤡᤰ ᤌᤡᤰᤁᤠᤱ ᤁᤢᤓᤪᤧ᤺ᤱ ᤏᤢ ᤁᤢᤗᤡᤱᤃᤧᤴᤏᤡᤴ ᤜᤢᤰᤛᤡᤰ ᤌᤡᤰᤁᤠᤱ ᤁᤢᤓᤪᤧ᤺ᤱᤒᤠ ᤆᤥᤃᤧ॥

² ᤂᤢᤏᤧ᤹ ᤂᤧᤴ ᤛᤡᤃᤠᤱ ᤏᤢ ᤗᤠ᤺ᤰᤁᤠᤳ ᤗᤧᤵᤔᤠᤱ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤒᤪᤡᤱ ᤐᤡᤛᤠᤱ ᤛᤠᤶᤔᤩᤠᤱᤅᤡᤸᤗᤧ ᤁᤢᤃ᤺ᤱᤃᤩᤠ ᤑᤳᤇᤢ॥

³ ᤂᤢᤏᤧ᤹ ᤂᤧᤸᤗᤧ ᤗᤠᤃᤡ ᤗᤡᤛᤡ ᤛᤠᤶᤔᤩᤠᤱ ᤁᤢᤴᤍᤢᤸᤗᤥᤜᤠ᤹ ᤕᤥ᤺ᤴᤍᤢᤀᤠᤱ ᤌᤃᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤸᤗᤧ ᤁᤢᤗᤠᤱᤜᤠ᤹ᤀᤥ ᤑᤳᤇᤢ—ᤏᤧᤳᤇᤡ ᤁᤢᤴᤍᤢᤸᤗᤥᤜᤠ᤹ ᤌᤡᤰᤗᤧᤵᤔᤠᤱ ᤏᤢ ᤏᤧᤳᤇᤡ ᤁᤢᤴᤍᤢᤸᤗᤥᤜᤠ᤹ ᤘᤣ᤹ ᤗᤧᤵᤔᤠᤱ ᤑᤳᤇᤢ॥

⁴ ᤂᤧᤒᤩᤠᤱ ᤂᤢᤏᤧ᤹ ᤒᤒᤢᤗ ᤛᤡᤱᤅᤡᤸᤗᤧᤴ ᤋᤰᤗᤠᤱᤜᤠ᤹ ᤆᤥᤃᤢᤀᤠᤱ ᤂᤧᤱᤜᤠ᤹ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢ॥

⁵ ᤂᤢᤏᤧ᤹ ᤂᤧᤴ ᤁᤢᤒᤱᤔᤠ ᤋ᤹ᤗᤠᤱᤜᤠ᤹ ᤔᤠᤱᤜᤢᤵ ᤛᤴᤍᤥᤰ ᤏᤧᤵᤔᤠᤱ ᤐᤡᤛᤠᤱ ᤁᤧᤒᤵᤐᤠ ᤁᤢᤴᤍᤢᤸᤗᤥᤜᤠ᤹ᤀᤥ ᤕᤠᤰᤋᤢ॥

⁶ ᤂᤢᤏᤧ᤹ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤗᤧᤴ ᤗᤳᤇᤠ ᤁᤢᤍᤧᤵᤑᤣ᤹ ᤆᤥᤃᤢ॥ ᤂᤧᤸᤗᤧ ᤁᤢᤗᤠᤶᤋᤡ᤺ᤴ ᤜᤢᤰᤛᤡᤰ ᤏᤧᤳᤇᤡᤀᤠᤱ ᤁᤢᤓᤪᤧ᤺ᤱ ᤏᤢ ᤁᤢᤓᤧᤖᤧᤴ ᤜᤢᤰᤛᤡᤰ ᤌᤡᤰᤁᤠᤱ ᤁᤢᤓᤪᤧ᤺ᤱ ᤁᤧᤒᤵᤐᤠ ᤆᤥᤃᤧ॥

⁷ ᤌᤘᤠ᤺ᤸᤗᤧ ᤌᤰᤔᤏᤠ ᤗ᤺ᤵᤔᤏᤠᤒᤠ ᤛᤠᤶᤔᤩᤠᤱᤅᤡᤸᤗᤧᤴ ᤏᤧᤳᤇᤡ ᤁᤖᤢᤒᤜᤠ᤹ ᤂᤢᤏᤧ᤹ ᤆᤥᤃᤢ॥ ᤂᤢᤏᤧ᤹ ᤁᤢᤍᤧᤵᤑᤣ᤹ ᤏᤧᤵᤔᤠᤱ ᤗᤧᤵᤔᤠᤱ ᤆᤥᤃᤢ—

⁸ ᤗᤳᤇᤠ ᤁᤖᤢᤒ ᤌᤡᤰ ᤁᤢᤕᤠᤀᤥᤏᤢ ᤘᤣ᤹ ᤁᤖᤢᤒᤧᤴ ᤘᤣ᤹ ᤗᤧᤵᤔᤠᤱᤒᤠ ᤁᤢᤕᤠᤀᤥ ᤕᤢᤰᤂᤢ॥ ᤂᤧᤴ ᤏᤧᤳᤇᤡ ᤁᤖᤢᤒᤜᤠ᤹ ᤏᤢ ᤁᤢᤍᤧᤵᤑᤣᤴ ᤗᤳᤇᤠ ᤛᤠᤶᤔᤩᤠᤱ ᤁᤢᤀᤠ᤺ᤳᤗᤠᤶ ᤏᤧᤵᤔᤠᤱ ᤁᤢᤕᤠᤀᤥ ᤆᤥᤃᤢ॥

⁹ ᤂᤧᤴ ᤏᤧᤳᤇᤡ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤗᤠᤵᤜᤠ᤹ ᤌᤠ᤺ᤱ ᤗᤧᤵᤔᤠᤱ ᤜᤵᤑᤧ ᤑᤧᤛᤢᤛᤡᤀᤠᤱ ᤁᤢᤍᤧᤵᤑᤣᤴ ᤀᤡ᤺ᤵᤋᤣᤛᤢᤀᤠᤱ ᤐᤳᤇᤧᤛᤡ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤖᤠᤜᤠ᤹ᤃ ᤋᤰ ᤏᤢ ᤋᤰ ᤁᤢᤍᤧᤵᤑᤣ᤹ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤐᤳᤇᤧᤖᤥ॥

ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤏᤠᤒᤠ ᤂᤖᤧ᤺ᤱ ᤏᤧᤔᤠ ᤆᤵᤋᤧᤴ

¹⁰ ᤒᤈᤗᤧᤗᤖᤧ ᤒᤒᤢᤗ ᤛᤡᤱᤅᤡᤸᤗᤧᤴ ᤆᤵᤋᤧᤴ ᤆᤥᤃᤢ॥ ᤂᤧᤸᤗᤧ ᤁᤢᤗᤠᤶᤋᤡ᤺ᤴ ᤜᤢᤰᤛᤡᤰ ᤏᤧᤳᤇᤡ. ᤁᤢᤓᤧᤖᤧᤴ ᤜᤢᤰᤛᤡᤰᤌᤡᤰ ᤏᤢ ᤁᤢᤗᤡᤱᤃᤧᤴᤏᤡᤴ ᤜᤢᤰᤛᤡᤰ ᤌᤡᤰᤁᤠᤱ ᤁᤢᤓᤪᤧ᤺ᤱ ᤐᤳᤇᤧ॥

¹¹ ᤂᤢᤏᤧ᤹ ᤂᤧᤴ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢ. ᤜᤧᤰᤁᤩᤠᤱ ᤂᤧᤴ ᤁᤒᤪᤡᤱ ᤐᤡᤛᤠᤱ ᤛᤠᤶᤔᤩᤠᤱᤅᤡᤸᤗᤧ ᤁᤢᤃ᤺ᤱᤃᤩᤠ ᤑᤳᤇᤢ॥

¹² ᤂᤧᤸᤗᤧ ᤁᤧᤖᤧᤰ ᤐᤡᤛᤠᤱ ᤜᤢᤰᤋᤠᤵᤐᤣ ᤌᤡᤰ ᤁᤢᤓᤧᤖᤧ ᤁᤧᤒᤵᤐᤠ ᤁᤢᤕᤠ ᤌᤡᤰ ᤆᤥᤃᤢ. ᤜᤧᤰᤁᤩᤠᤱ ᤁᤒᤪᤡᤱ ᤐᤡᤛᤠᤱ ᤛᤠᤶᤔᤩᤠᤱᤅᤡᤸᤗᤧ ᤁᤢᤃ᤺ᤱᤃᤩᤠ ᤑᤳᤇᤢ॥

¹³ ᤆᤵᤋᤧᤴᤗᤧ ᤗᤠᤃᤡ ᤂᤢᤏᤧ᤹ ᤕᤥ᤺ᤴᤍᤢᤀᤠᤱ ᤗᤡᤛᤡ ᤛᤠᤶᤔᤩᤠᤱ ᤁᤢᤴᤍᤢᤸᤗᤥᤜᤠ᤹ ᤆᤥᤃᤢ. ᤜᤧᤰᤁᤩᤠᤱ ᤂᤧᤴ ᤁᤢᤴᤍᤢᤸᤗᤥᤜᤠ᤹ ᤂᤧᤴ ᤆᤵᤋᤧᤴᤏᤡᤸᤗᤧ ᤗᤡᤛᤡ ᤁᤢᤗᤠᤱ ᤁᤧᤒᤵᤐᤠ ᤁᤢᤛᤢᤰᤐᤥ ᤑᤳᤇᤢ॥

¹⁴ ᤂᤧᤴ ᤁᤢᤴᤍᤢᤸᤗᤥᤜᤠ᤹ ᤆᤵᤋᤧᤴ ᤐᤱᤔᤠ ᤋᤰᤗᤠᤱᤜᤠ᤹ᤖᤧ ᤗᤠᤃᤡ ᤁᤢᤗᤡ᤺ᤱᤔᤠᤍᤧᤴ ᤐᤥᤱᤗ ᤑᤠ᤹ᤀᤠᤱ ᤁᤵᤔᤏᤠᤒᤧᤸᤗᤧ ᤁᤢᤕᤠᤀᤥᤀᤣ ᤐᤳᤇᤧ॥

¹⁵ ᤂᤢᤏᤧ᤹ ᤂᤧᤴ ᤆᤵᤋᤧᤴᤏᤡᤴ ᤐᤱᤔᤠᤖᤧ ᤗᤠᤃᤡ ᤂᤧᤴ ᤋᤰᤗᤠᤱᤜᤠ᤹ ᤒᤒᤢᤗ ᤛᤡᤱᤅᤡᤸᤗᤧᤴ ᤆᤥᤃᤢᤀᤠᤱ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢ॥

¹⁶ ᤂᤢᤏᤧ᤹ ᤆᤵᤋᤧᤴᤏᤥᤒᤠ ᤛᤠᤔᤠᤜᤠ᤹. ᤀᤡᤃᤪ ᤆᤩᤧᤳᤌᤩᤠᤜᤠ᤹. ᤛᤠᤱᤋᤧᤖᤧ᤺ᤱᤜᤠ᤹. ᤆᤸᤗᤠᤱᤏᤠ ᤂᤥᤷᤕᤠᤜᤠ᤹ ᤏᤢ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠ ᤜᤢᤱᤔᤠ ᤂᤥᤷᤕᤠᤜᤠ᤹ ᤁᤧᤖᤧᤰ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤗᤧᤴ ᤆᤥᤃᤢᤖᤥ॥

ᤛᤣᤔᤡᤕᤢᤱᤍᤧᤴ ᤔᤧᤈᤥᤃᤢ

¹⁷ ᤂᤢᤏᤧ᤹ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤴ ᤌᤃᤢᤀᤠᤱ ᤛᤣᤔᤡᤕᤢᤱᤍᤧᤴ ᤆᤥᤃᤢ॥ ᤂᤧᤸᤗᤧ ᤁᤢᤕᤢᤰᤏᤠ. ᤁᤢᤗᤠᤱ. ᤑᤢᤱ ᤜᤧᤰᤋᤱᤒᤠ ᤆᤸᤗᤠᤱᤏᤠ ᤂᤥᤷᤕᤠ. ᤁᤢᤓᤧᤰᤔᤧᤳ ᤏᤢ ᤁᤢᤓᤢᤱᤜᤠ᤹ ᤁᤧᤖᤧᤰ ᤜᤠᤒᤠ ᤂᤧᤴ ᤗᤳᤇᤠ ᤁᤢᤀᤠ᤺ᤳᤗᤠᤶᤒᤠ ᤆᤥᤃᤢ॥

¹⁸ ᤂᤧᤸᤗᤧ ᤋᤢᤰᤛᤡ ᤁᤢᤒᤥᤖᤠᤰᤜᤠ᤹ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤐᤳᤇᤧ—ᤁᤢᤒᤥᤖᤠᤰ ᤛᤢᤶᤛᤡ ᤛᤣᤔᤡᤕᤢᤱᤍᤧᤴ ᤌᤡᤰᤗᤧᤵᤔᤠᤱ ᤏᤢ ᤁᤢᤒᤥᤖᤠᤰ ᤛᤢᤶᤛᤡ ᤘᤣ᤹ ᤗᤧᤵᤔᤠᤱ ᤐᤳᤇᤧ॥

¹⁹ ᤗᤳᤇᤠ ᤁᤢᤒᤥᤖᤠᤰᤁᤥ ᤂᤈᤱᤛᤣ᤹ ᤑᤢᤱ ᤜᤧᤰᤋᤱᤒᤠ ᤛᤢᤶᤛᤡ ᤆᤸᤗᤠᤱᤏᤠ ᤂᤥᤷᤕᤠ. ᤜᤧᤰᤁᤩᤠᤱ ᤂᤧᤴᤏᤢ ᤛᤥᤛᤥᤖᤡᤰ ᤁᤢᤓᤧᤰᤔᤧᤳ ᤏᤢ ᤁᤢᤓᤢᤱᤜᤠ᤹ ᤐᤳᤇᤧ॥ ᤘᤣ᤹ᤛᤔᤠ ᤁᤢᤒᤥᤖᤠᤰᤁᤥᤀᤠᤱ ᤛᤢᤶᤛᤡ ᤆᤸᤗᤠᤱᤏᤠ ᤂᤥᤷᤕᤠᤜᤠ᤹ ᤐᤳᤇᤧ॥ ᤛᤣᤔᤡ ᤕᤢᤱᤍᤧᤴᤏᤥᤗᤠᤶ ᤁᤧᤗ᤺ᤶᤒᤠ ᤂᤧᤴ ᤋᤢᤰᤛᤡ ᤁᤢᤒᤥᤖᤠᤰᤜᤠ᤹ ᤗᤳᤇᤠ ᤐᤖᤡᤰᤐᤠ ᤆᤥᤃᤧ᤹॥

²⁰ ᤛᤣᤔᤡᤕᤢᤱᤍᤧᤴᤏᤥ ᤂᤈᤱᤛᤣ᤹ ᤑᤢᤱ ᤜᤧᤰᤋᤱᤒᤠ ᤗᤡᤛᤡ ᤆᤸᤗᤠᤱᤏᤠ ᤂᤥᤷᤕᤠᤜᤠ᤹. ᤀᤠᤵᤑᤣᤰ ᤀᤠᤵᤑᤣᤰ ᤁᤢᤓᤢᤱᤑᤧᤰᤔᤣᤳ ᤏᤢ ᤑᤢᤱᤜᤠ᤹ᤀᤠᤱ ᤐᤳᤇᤧ॥

²¹ ᤛᤣᤔᤡ ᤕᤢᤱᤍᤧᤴᤏᤥᤗᤠᤶ ᤁᤧᤗ᤺ᤶᤒᤠ ᤋᤢᤰᤛᤡ ᤁᤢᤒᤥᤖᤠᤰᤜᤠ᤹ᤀᤥ ᤌᤡᤰᤛᤡᤃᤣᤰᤐᤠ ᤁᤢᤃᤠᤵᤐᤡᤴ ᤁᤢᤒᤥᤖᤠᤰ ᤛᤡᤃᤠᤱ ᤗᤳᤇᤠ ᤁᤢᤓᤧᤰᤔᤧᤳ. ᤏᤡᤛᤡᤃᤣᤰᤐᤠ ᤁᤢᤃᤠᤵ ᤁᤢᤒᤥᤖᤠᤰ ᤛᤡᤃᤠᤱ ᤏᤡᤛᤡᤃᤣᤰᤐᤠ ᤁᤢᤓᤧᤰᤔᤧᤳ. ᤜᤧᤰᤁᤩᤠᤱ ᤛᤢᤶᤛᤡᤃᤣᤰᤐᤠ ᤁᤢᤃᤠᤵ ᤁᤢᤒᤥᤖᤠᤰ ᤛᤡᤃᤠᤱ ᤛᤢᤶᤛᤡᤃᤣᤰᤐᤠ ᤁᤢᤓᤧᤰᤔᤧᤳ ᤐᤳᤇᤧ॥

²² ᤛᤣᤔᤡᤕᤢᤱᤍᤧᤴ. ᤂᤧᤸᤗᤧ ᤁᤢᤓᤧᤰᤔᤧᤳ ᤏᤢ ᤁᤢᤒᤥᤖᤠᤰᤜᤠ᤹ ᤌᤰᤔᤏᤠᤒᤠ ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ ᤗᤳᤇᤠ ᤁᤢᤀᤠ᤺ᤳᤗᤠᤶᤒᤠ ᤆᤥᤃᤢᤀᤠᤱ ᤘᤕᤧ॥

²³ ᤂᤢᤏᤧ᤹ ᤏᤢᤛᤡ ᤛᤣᤔᤡ ᤜᤠ᤺ᤶᤔᤠ ᤇᤰᤁᤱᤜᤠ᤹ ᤏᤢ ᤛᤣᤔᤡ ᤁᤢᤜᤠ᤺ᤶᤔᤠᤜᤠ᤹ᤖᤧ ᤁᤢᤓᤡ᤺ᤵᤔᤠ ᤗᤠᤓᤡ᤺ᤳᤜᤠ᤹ ᤏᤢ ᤂᤧᤵᤔᤥᤒᤠ ᤔᤠᤰᤛᤢ᤺ᤴᤍᤠ ᤋᤠ᤺ᤰᤔᤧᤴ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤗᤧᤴ ᤆᤥᤃᤢ॥

²⁴ ᤂᤢᤏᤧ᤹ ᤛᤣᤔᤡᤕᤢᤱᤍᤧᤴ ᤏᤢ ᤂᤧᤵᤔᤥᤒᤠ ᤁᤧᤖᤧᤰ ᤛᤠᤔᤠᤐᤢᤔᤠᤜᤠ᤹ ᤋᤥᤖᤠ ᤌᤡᤰ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤗᤧᤴ ᤆᤥᤃᤢᤖᤥ॥

ᤛᤢᤰᤐᤠ ᤜᤠ᤺ᤶᤔᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ

²⁵ ᤂᤢᤏᤧ᤹ ᤒᤒᤢᤗ ᤛᤡᤱᤅᤡᤸᤗᤧᤴ ᤛᤢᤰᤐᤠ ᤜᤠ᤺ᤶᤔᤠᤍᤧᤴ ᤆᤥᤃᤢ॥ ᤂᤧᤸᤗᤧ ᤁᤢᤗᤠᤶᤋᤡ ᤜᤢᤰᤛᤡᤰᤌᤡᤰ ᤏᤢ ᤁᤢᤓᤧᤖᤧ ᤜᤢᤰᤛᤡᤰᤌᤡᤰ ᤆᤥᤃᤧ॥ ᤂᤧᤴ ᤗᤡᤛᤡ ᤁᤢᤛᤢᤰᤐᤠ ᤁᤧᤒᤵᤐᤠ ᤆᤥᤃᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤡᤱᤃᤧᤴᤏᤡᤴ ᤜᤢᤰᤛᤡᤰ ᤏᤧᤳᤇᤡ ᤁᤧᤒᤵᤐᤠ ᤆᤥᤃᤧ॥ ᤂᤧᤸᤗᤧ ᤁᤢᤍᤠᤱᤜᤠ᤹ ᤀᤠᤶᤓᤠ ᤂᤧᤴ ᤗᤳᤇᤠ ᤛᤡᤱᤅᤡᤸᤗᤧᤴ ᤕᤢᤅᤧ॥

²⁶ ᤂᤢᤏᤧ᤹ ᤂᤧᤸᤗᤧ ᤌᤠ᤺ᤱ ᤗᤧᤵᤔᤠᤱᤒᤠᤴ ᤏᤢ ᤁᤧᤖᤧᤰ ᤐᤡᤛᤠᤱᤒᤠ ᤁᤢᤕᤠᤶᤗᤧᤱᤒᤠᤜᤠ᤹ ᤂᤧᤸᤗᤧ ᤆᤶᤒᤧᤵᤐᤠ ᤁᤢᤍᤠᤱᤜᤠ᤹ᤀᤠᤱ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢ. ᤜᤧᤰᤁᤩᤠᤱ ᤂᤧᤸᤗᤧ ᤗᤠᤃᤡ ᤁᤒᤪᤡᤱ ᤐᤡᤛᤠᤱ ᤗᤳᤇᤠ ᤛᤠᤶᤔᤩᤠᤱᤅᤡᤸᤗᤧ ᤁᤢᤃ᤺ᤱᤃᤩᤠ ᤆᤥᤃᤢ॥

²⁷ ᤂᤧᤸᤗᤧ ᤁᤢᤒᤱᤔᤠ ᤋᤰᤗᤠᤱᤜᤠ᤹ᤖᤧ ᤗᤠᤃᤡ ᤁᤢᤗᤡ᤺ᤱᤔᤠᤍᤧᤴ ᤐᤵᤔᤠᤖᤧ ᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤏᤧᤵᤔᤠᤱ ᤁᤢᤕᤠᤶᤗᤧᤱᤒᤥ ᤏᤧᤳᤇᤡ ᤛᤠᤶᤔᤩᤠᤱ ᤁᤢᤴᤍᤢᤸᤗᤥ ᤆᤥᤃᤢᤀᤠᤱ ᤏᤧᤵᤔᤠᤱ ᤐᤡᤛᤠᤱ ᤂᤧᤵᤔᤥ ᤑᤳᤇᤢ॥

²⁸ ᤋᤰᤗᤠᤱᤜᤠ᤹ ᤒᤒᤢᤗ ᤛᤡᤱᤅᤡᤸᤗᤧᤴ ᤆᤥᤃᤢᤀᤠᤱ ᤂᤢᤏᤧ᤹ ᤂᤧᤱᤜᤠ᤹ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢᤖᤥ॥

ᤔᤠᤱᤌᤥ᤺ᤰᤏᤠᤖᤧ ᤗᤠᤃᤡ ᤏᤡ᤺ᤱᤃᤣ᤹ ᤏᤢ ᤛᤢᤰᤐᤠ

²⁹ ᤂᤢᤏᤧ᤹ ᤔᤠᤱᤌᤥ᤺ᤰᤏᤠ ᤐᤡᤔᤠᤛᤡ ᤛᤢᤳᤌᤥ ᤏᤡ᤺ᤱᤃᤣ᤹ ᤏᤢ ᤑᤢᤱᤏᤠᤶ ᤁᤧᤈᤥ᤺ᤰᤐᤠᤸᤗᤧ ᤁᤢᤀᤡᤛᤡᤰ ᤛᤠ᤹ᤖᤡᤰ ᤁᤢᤏᤠᤶᤃᤧᤏᤢ᤹ᤒᤠ ᤛᤢᤳᤌᤥ ᤛᤢᤰᤐᤠ ᤆᤥᤃᤢᤖᤥ॥