ᤗᤠᤶᤍᤡᤰ 36 - LIFOTNT1 “ᤁᤸᤗᤧᤆᤥᤃᤢᤸᤗᤧ ᤒᤈᤗᤣᤗ. ᤀᤥᤜᤥᤗᤡᤀᤠᤒ ᤏᤢ ᤁᤧᤖᤧᤰ ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤔᤏᤠᤜᤠ᤹ ᤂᤧᤴ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤴ ᤆᤥ᤺ᤰᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤛᤡᤰᤁᤢᤶ ᤏᤡᤱᤘᤠ᤹ᤛᤠᤒᤠ ᤏᤢ ᤛᤢᤶᤒᤥᤎᤠᤛᤠᤒᤠ ᤆᤥᤃᤢᤛᤡᤀᤠᤱ ᤘᤠ᤹. ᤂᤧᤱᤜᤠ᤹ ᤁᤧᤖᤧᤰᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤁᤢᤀᤡᤛᤡᤰ ᤔᤧᤈᤥᤃᤢᤖᤖᤥ॥” ᤔᤏᤠᤜᤠ᤹ᤖᤧ ᤜᤢᤰᤘᤠ ᤔᤧᤍᤠᤖᤢ᤹ 2 ᤂᤧᤒᤩᤠᤱ ᤒᤈᤗᤣᤗ. ᤀᤥᤜᤥᤗᤡᤀᤠᤒ ᤏᤢ ᤕᤜᤘᤣ ᤍᤠᤱᤒᤠᤸᤗᤧ ᤛᤢᤶᤒᤥᤎᤠᤛᤠᤒᤠ ᤜᤧᤰᤁᤩᤠᤱ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤁᤧᤎᤢᤰᤐᤠ ᤏᤡᤱᤘᤠ᤹ ᤐᤡᤖᤢᤛᤡᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤥᤛᤠ᤺ᤸᤗᤧ ᤀᤢ᤺ᤳᤋᤢᤛᤡ. 3 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤣᤛᤣ ᤛᤠ᤺ᤱᤃᤠᤜᤡᤶ ᤆᤥ᤺ᤰᤔᤠ ᤕᤠ᤺ᤶᤒᤰᤗᤧ ᤗᤠᤃᤡ ᤌᤣᤎᤣᤜᤠ᤹ ᤔᤧᤍᤠᤖᤢᤀᤠᤱ ᤘᤕᤧ. ᤂᤧᤴ ᤁᤧᤖᤧᤰ ᤜᤢᤰᤘᤠᤜᤠ᤹ ᤂᤧᤱᤜᤠ᤹ᤖᤧ ᤔᤥᤛᤠ᤺ᤸᤗᤧ ᤁᤢᤜᤢᤰᤗᤠᤶᤒᤠ ᤔᤧᤍᤠ᤺ᤰᤋᤢ॥ ᤔᤏᤠᤜᤠ᤹ᤖᤧ ᤋᤠᤏᤠᤶ ᤌᤰᤔᤠ ᤀᤠᤒᤠᤅᤣ ᤏᤡᤱᤘᤠ᤺ᤸᤗᤧ ᤘᤣ᤹ ᤜᤢᤰᤘᤠᤜᤠ᤹ᤀᤠᤱ ᤔᤧᤍᤠᤖᤢ॥ 4 ᤛᤣᤛᤣᤍᤧᤴᤏᤥᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤖᤧᤰ ᤁᤢᤜᤢᤰᤆᤥ ᤁᤧᤏᤢ᤹ᤒᤠ ᤆᤥᤒᤣᤃᤢ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤕᤠ᤺ᤶᤒᤰᤜᤠ᤹ ᤔᤧᤗᤧᤖᤢᤀᤠᤱ ᤔᤥᤛᤠᤀᤥ ᤔᤧᤍᤩᤧ. 5 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤥᤛᤠᤴ ᤔᤧᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤆᤥ᤺ᤰᤔᤠᤖᤧ ᤗᤠᤃᤡ ᤀᤡᤱᤈᤠᤱ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤆᤠᤜᤠ ᤁᤧᤈᤥ᤺ᤰᤐᤠᤏᤢ᤺ᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤆᤡᤃᤰᤘᤠᤜᤠ᤹ ᤔᤏᤠᤜᤠ᤹ᤖᤧ ᤔᤧᤍᤠᤖᤢᤖ ᤔᤧᤒᤳ॥” 6 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤔᤧᤳᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤠ᤺ᤱᤃᤠᤜᤡᤶ ᤁᤢᤗᤧ᤺ᤶ ᤁᤴ ᤐᤠ᤺ᤴᤏᤡᤴ ᤀᤢᤘᤠ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢ. “ᤛᤣᤛᤣᤍᤧᤴᤏᤥᤒᤠ ᤜᤢᤰᤘᤠᤖᤧ ᤗᤠᤃᤡ ᤀᤠᤸᤗ ᤀᤠᤳᤋᤡᤴ ᤕᤧᤶᤒᤡᤳᤇᤠ ᤀᤡᤃᤪ ᤔᤧᤴᤇᤢᤔᤠ᤺ᤸᤗᤧ ᤘᤣ᤹ ᤌᤧᤔᤠ ᤐᤠ᤺ᤴᤏᤠᤱ ᤔᤧᤈᤥᤃᤢᤴᤗ॥” ᤁᤶᤓᤗ᤹ᤖᤡᤰ ᤔᤏᤠᤜᤠ᤹ ᤀᤠᤸᤗᤛᤠᤱ ᤘᤣ᤹ ᤕᤖᤡᤰ ᤆᤡᤃᤰᤘᤠ ᤋᤠ᤺ᤵᤔᤠ ᤔᤧᤶᤓᤠ᤺ᤰᤋᤢᤛᤡᤴ. 7 ᤌᤣᤀᤠᤱᤓᤧᤸᤗᤧ ᤛᤣᤛᤣᤍᤧᤴ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤀᤥ ᤆᤠᤜᤠ ᤁᤧᤈᤥ᤺ᤰᤐᤠᤏᤢ᤺ᤸᤗᤧ ᤕᤖᤡᤰ ᤆᤡᤃᤰᤘᤠ ᤘᤕᤧᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤛᤣᤛᤣ ᤁᤢᤛᤠ᤺ᤱᤃᤠᤜᤡᤶ ᤆᤥ᤺ᤰᤔᤠ ᤕᤠ᤺ᤶᤒᤰ ( ᤗᤠ ᥈᥌:᥇-᥉᥍ ) 8 ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤀᤠᤰᤂᤩᤠᤖᤡᤰ ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤆᤥᤒᤣᤃᤢ ᤔᤧᤘᤕᤧ. ᤂᤧᤱᤜᤠ᤹ᤖᤧ ᤌᤡᤒᤥᤱ ᤑᤥ᤺ᤴᤍᤠ ᤁᤧᤒᤵᤐᤠ ᤛᤣᤛᤣ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢ॥ ᤂᤧᤴ ᤑᤥ᤺ᤴᤍᤠᤜᤠ᤹ ᤆᤢᤴᤈᤢᤴ ᤗ᤹ᤖᤡᤰ ᤑᤔᤏᤠᤒᤠ ᤜᤧᤰᤁᤩᤠᤱ ᤜᤡ᤺ᤰᤕᤱᤕᤱᤒᤠ. ᤐᤠᤖᤠᤴᤗᤠ ᤏᤢ ᤜᤧ᤺ᤳᤋᤠᤱᤒᤠ ᤂᤡ᤺ᤸᤗᤧᤴ. ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤆᤥᤒᤣᤃᤢᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤖᤢᤒᤜᤠ᤹ ᤁᤧᤒᤵᤐᤠ ᤘᤕᤧ॥ 9 ᤁᤧᤖᤧᤰ ᤑᤥ᤺ᤴᤍᤠᤜᤠ᤹ᤖᤧ ᤁᤢᤗᤠᤶᤋᤡ ᤏᤡᤒᤥᤱᤅᤠᤱ ᤕᤧᤳᤇᤡ ᤜᤢᤰᤛᤡᤰ ᤏᤢ ᤁᤢᤓᤧᤖᤧᤴ ᤜᤢᤰᤛᤡᤰ ᤗᤡᤛᤡ ᤁᤧᤒᤵᤐᤠ ᤆᤥᤃᤧ॥ ᤁᤧᤖᤧᤰ ᤑᤥ᤺ᤴᤍᤠᤜᤠ᤹ᤖᤧ ᤁᤢᤛᤡ᤺ᤰᤔᤠᤴ ᤗᤳᤇᤠ ᤐᤖᤡᤰᤐᤠ ᤆᤥᤃᤧ॥ 10 ᤂᤧᤱᤜᤠ᤹ᤖᤧ ᤅᤠᤛᤡ ᤑᤥ᤺ᤴᤍᤠᤜᤠ᤹ ᤌᤡᤰᤏᤢ ᤘᤣ᤹ᤀᤡᤴ ᤔᤧᤈᤰᤋᤢ. ᤘᤣ᤹ ᤅᤠᤛᤡ ᤑᤥ᤺ᤴᤍᤠᤜᤠ᤹ᤀᤠᤱ ᤌᤡᤰᤏᤢ ᤘᤣ᤹ᤀᤡᤴ ᤔᤧᤈᤰᤋᤢ॥ 11 ᤌᤡᤰᤛᤡᤃᤣ᤺ᤰᤐᤥ ᤔᤧᤈᤰᤋᤢᤒᤠ ᤁᤢᤗᤰᤁᤡᤸᤗᤧ ᤏᤠᤛᤔᤠ ᤑᤥ᤺ᤴᤍᤠ᤺ᤸᤗᤧ ᤁᤢᤕᤠᤀᤥ ᤂᤧᤱᤜᤠ᤹ᤖᤧ ᤜᤡ᤺ᤰᤁᤱᤁᤱᤒᤠ ᤁᤢᤛ᤺ᤶᤔᤠ ᤔᤧᤈᤥᤃᤢ॥ ᤏᤡᤛᤡᤃᤣᤰᤐᤠ ᤔᤧᤈᤰᤋᤢᤒᤠ ᤁᤢᤗᤰᤁᤡᤸᤗᤧ ᤏᤠᤛᤔᤠ ᤑᤥ᤺ᤴᤍᤠ᤺ᤸᤗᤧ ᤁᤢᤕᤠᤀᤥᤀᤠᤱ ᤜᤧᤰᤁᤣᤀᤣ ᤔᤧᤈᤥᤃᤢ॥ 12 ᤗᤳᤇᤠ ᤑᤥ᤺ᤴᤍᤠᤀᤥ ᤂᤧᤱᤜᤠ᤹ᤖᤧ ᤅᤠᤒᤥᤱ ᤁᤢᤛ᤺ᤶᤔᤠᤜᤠ᤹ ᤔᤧᤈᤥᤃᤢ. ᤜᤧᤰᤁᤩᤠᤱ ᤁᤧᤈᤰᤛᤡᤱᤒᤠ ᤁᤢᤗᤰᤁᤡᤸᤗᤧ ᤏᤠᤛᤔᤠ ᤑᤥ᤺ᤴᤍᤠ᤺ᤸᤗᤧ ᤁᤢᤕᤠᤀᤥᤀᤠᤱ ᤂᤧᤱᤜᤠ᤹ᤖᤧ ᤅᤠᤒᤥᤱ ᤁᤢᤴᤍᤥᤸᤗᤥᤜᤠ᤹ ᤔᤧᤈᤥᤃᤢ॥ ᤂᤧᤴ ᤁᤢᤛ᤺ᤶᤔᤠᤜᤠ᤹ ᤌᤡᤰᤏᤢ ᤘᤣ᤹ᤀᤡᤴ ᤋᤢᤶᤍᤢᤶᤒᤠ ᤐᤳᤇᤧ॥ 13 ᤂᤧᤱᤜᤠ᤹ᤖᤧ ᤅᤠᤒᤥᤱ ᤛᤠᤶᤔᤩᤠᤱ ᤁᤢᤴᤍᤢᤸᤗᤥᤜᤠ᤹ ᤔᤧᤈᤥᤃᤢᤀᤠᤱ ᤑᤥ᤺ᤴᤍᤠ᤺ᤸᤗᤧ ᤁᤢᤍᤢᤶᤒᤣᤜᤠ᤹ ᤂᤧ᤺ᤰᤆᤢᤖᤡᤜᤠ᤹ᤖᤧ ᤌᤡᤰᤏᤢ ᤘᤣ᤹ᤀᤡᤴ ᤔᤧᤍᤢᤶᤛᤢ॥ ᤁᤶᤓᤗ᤹ᤖᤡᤰ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤴ ᤗᤳᤇᤠ ᤐᤥ᤺ᤰᤂᤧ॥ 14 ᤛᤣᤛᤣ ᤛᤠ᤺ᤱᤃᤠᤜᤡᤶ ᤌᤠ᤺ᤱᤒᤠ ᤛᤠ᤺ᤱᤃᤠ᤺ᤴ ᤋᤧᤵᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤔᤧ᤺ᤴᤍᤠ ᤔᤢᤖᤡᤰᤐᤠ ᤌᤡᤒᤥᤱᤅᤠᤱ ᤌᤡᤰ ᤁᤢᤄᤠᤵᤔᤠᤜᤠ᤹ ᤔᤧᤈᤥᤃᤢ॥ 15 ᤁᤧᤖᤧᤰ ᤑᤥ᤺ᤴᤍᤠᤜᤠ᤹ᤖᤧ ᤁᤢᤗᤠᤶᤋᤡᤴ ᤛᤢᤶᤒᤥᤱ ᤜᤢᤰᤛᤡᤰ ᤁᤢᤗᤠᤶᤋᤡ ᤏᤢ ᤜᤢᤰᤛᤡᤰ ᤗᤡᤛᤡ ᤁᤢᤓᤧᤖᤧ ᤁᤧᤒᤵᤐᤠ ᤆᤥᤃᤧ॥ ᤂᤧᤴ ᤌᤡᤒᤥᤱᤅᤠᤱ ᤌᤡᤰ ᤑᤥ᤺ᤴᤍᤠᤜᤠ᤹ ᤗᤳᤇᤠ ᤐᤖᤡᤰᤗᤧ ᤁᤢᤛᤡ᤺ᤰᤔᤠ ᤁᤧᤒᤵᤐᤠ ᤆᤥᤃᤧ॥ 16 ᤂᤧᤱᤜᤠ᤹ᤖᤧ ᤅᤠᤛᤡ ᤑᤥ᤺ᤴᤍᤠᤜᤠ᤹ ᤌᤡᤰᤔᤧᤳ ᤛᤥᤖᤡᤰ ᤏᤢ ᤋᤢᤰᤛᤡ ᤑᤥ᤺ᤴᤍᤠᤜᤠ᤹ ᤌᤡᤰᤔᤧᤳ ᤛᤥᤖᤡᤰ ᤔᤧᤈᤰᤋᤢ॥ 17 ᤌᤡᤰᤛᤡᤃᤣᤰᤐᤠ ᤔᤧᤈᤰᤋᤢᤒᤠ ᤗᤰᤁᤡᤸᤗᤧ ᤏᤠᤛᤔᤠ ᤑᤥ᤺ᤴᤍᤠ᤺ᤸᤗᤧ ᤁᤢᤕᤠᤀᤥ ᤂᤧᤱᤜᤠ᤹ᤖᤧ ᤅᤠᤒᤥᤱ ᤁᤢᤛ᤺ᤶᤔᤠᤜᤠ᤹ ᤔᤧᤈᤥᤃᤢ॥ ᤘᤣ᤹ ᤔᤧᤈᤰᤋᤢᤒᤠ ᤗᤰᤁᤡᤸᤗᤧ ᤏᤠᤛᤔᤠ ᤑᤥ᤺ᤴᤍᤠ᤺ᤸᤗᤧ ᤁᤢᤕᤠᤀᤥᤀᤠᤱ ᤂᤧᤱᤜᤠ᤹ᤖᤧ ᤅᤠᤒᤥᤱ ᤁᤢᤛ᤺ᤶᤔᤠᤜᤠ᤹ ᤔᤧᤈᤥᤃᤢ॥ 18 ᤕᤠᤶᤔᤥ ᤂᤧᤱᤜᤠ᤹ᤖᤧ ᤂᤧᤴ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤄᤠᤵᤔᤧᤴ ᤋᤢᤶᤔᤠᤀᤠᤱ ᤗᤳᤇᤠ ᤆᤥ᤺ᤰᤔᤠᤖᤧ ᤗᤠᤃᤡ ᤅᤠᤒᤥᤱ ᤁᤠᤛᤠ ᤂᤧ᤺ᤰᤆᤢᤖᤡᤜᤠ᤹ ᤔᤧᤈᤥᤃᤢ॥ 19 ᤛᤠ᤺ᤱᤃᤠᤜᤡᤶᤔᤡᤴ ᤂᤠᤵᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤜᤧ᤺ᤳᤋᤠᤱᤒᤠ ᤆᤠ᤺ᤶᤔᤏᤠᤒᤠ ᤔᤧᤸᤗᤢᤰ ᤜᤥᤖᤡᤰᤐᤠᤜᤠ᤹ᤗᤠᤶ ᤗᤳᤇᤠ ᤁᤢᤍᤧᤵᤔᤠ ᤔᤧᤈᤥᤃᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤶᤎᤠᤱ ᤛᤠ᤹ᤖᤡᤰ ᤏᤢᤒᤠ ᤛᤠᤜᤥᤖᤡᤰᤜᤠ᤹ᤖᤧᤴ ᤗᤳᤇᤠ ᤘᤣ᤹ ᤁᤢᤍᤧᤵᤔᤠ ᤔᤧᤈᤥᤃᤢ॥ 20 ᤂᤧᤱᤜᤠ᤹ᤖᤧ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤸᤗᤧ ᤗᤠᤃᤡ ᤒᤒᤢᤗ ᤛᤡᤱᤓᤧᤸᤗᤧᤰᤜᤠ᤹ ᤋᤰᤐᤧᤳ ᤋᤰᤐᤧᤳ ᤁᤧᤕᤧᤵᤐᤠ ᤔᤧᤈᤥᤃᤢ॥ 21 ᤁᤧᤖᤧᤰ ᤛᤡᤱᤓᤧᤸᤗᤧᤰᤜᤠ᤹ᤖᤧ ᤁᤢᤗᤡᤱᤃᤧᤴ ᤜᤢᤰᤛᤡᤰ ᤌᤡᤒᤥᤱ ᤁᤣ᤺ᤶᤒᤠ ᤏᤢ ᤁᤢᤓᤧᤖᤧᤴ ᤜᤢᤰᤛᤡᤰ ᤌᤡᤰᤁᤠᤱ ᤁᤢᤓᤪᤧ᤺ᤱ ᤁᤧᤒᤵᤐᤠ ᤆᤥᤃᤧ॥ 22 ᤁᤧᤖᤧᤰ ᤛᤡᤱᤓᤧᤸᤗᤧᤜᤠ᤹ᤀᤥ ᤆᤶᤒᤧᤵᤐᤠ ᤏᤧᤳᤇᤡ ᤏᤧᤳᤇᤡ ᤌᤡᤰᤏᤢ ᤘᤣ᤹ᤀᤡᤴ ᤋᤢᤶᤍᤢᤶᤒᤠ ᤔᤧᤕᤧᤵᤛᤢᤀᤠᤱ ᤕᤧᤒᤧ॥ ᤀᤠᤶᤓᤠ ᤁᤴ ᤐᤖᤡᤰᤗᤧ ᤂᤧᤱᤜᤠ᤹ᤖᤧ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤁᤧᤖᤧᤰ ᤛᤡᤱᤓᤧᤸᤗᤧᤰᤜᤠ᤹ ᤔᤧᤈᤥᤃᤢ॥ 23 ᤂᤧᤱᤜᤠ᤹ᤖᤧ ᤛᤣᤛᤣ ᤛᤠ᤺ᤱᤃᤠᤜᤡᤶ ᤕᤥ ᤗᤧᤵᤔᤠᤱᤒᤠ ᤗᤰᤁᤡᤸᤗᤧ ᤗᤠᤃᤡ ᤏᤡᤒᤥᤱ ᤛᤡᤱᤓᤧᤸᤗᤧᤰᤜᤠ᤹. 24 ᤜᤧᤰᤁᤩᤠᤱ ᤏᤡᤒᤥᤱᤅᤣ ᤛᤡᤱᤓᤧᤸᤗᤧᤰᤜᤠ᤹ᤖᤧ ᤁᤢᤛᤡᤃᤠᤱ ᤗᤡᤒᤥᤱ ᤕᤢᤵᤐᤠ ᤁᤢᤕᤢᤰᤏᤠᤍᤧᤴᤜᤠ᤹ ᤔᤧᤈᤥᤃᤢ—ᤗᤳᤇᤠ ᤛᤡᤱᤓᤧᤸᤗᤧᤰ ᤛᤡᤃᤠᤱ ᤏᤧᤳᤇᤡ ᤁᤢᤕᤢᤰᤏᤠ. ᤜᤧᤰᤁᤩᤠᤱ ᤗᤳᤇᤠ ᤜᤠᤛᤶᤛᤶᤒᤠ ᤌᤰᤔᤠ ᤗᤳᤇᤠ ᤁᤢᤕᤢᤰᤏᤠ ᤏᤧᤛ᤻ᤛᤧ॥ 25 ᤌᤡᤰᤏᤠᤜᤠᤱ ᤗᤧᤵᤔᤠᤱ. ᤀᤡᤃᤪ ᤛᤣᤛᤣ ᤛᤠ᤺ᤱᤃᤠᤜᤡᤶ ᤌᤥ ᤗᤧᤵᤔᤠᤱ ᤂᤧᤱᤜᤠ᤹ᤖᤧ ᤏᤡᤒᤥᤱ ᤛᤡᤱᤓᤧᤸᤗᤧᤰᤜᤠ᤹. 26 ᤜᤧᤰᤁᤩᤠᤱ ᤂᤧᤸᤗᤧ ᤗᤠᤃᤡ ᤗᤡᤒᤥᤱ ᤁᤢᤕᤢᤰᤏᤠᤍᤧᤴᤜᤠ᤹ ᤕᤢᤵᤐᤠ᤺ᤸᤗᤧᤴ ᤔᤧᤈᤥᤃᤢ—ᤁᤧᤖᤧᤰ ᤛᤡᤱᤓᤧᤸᤗᤧᤰ ᤌᤰᤔᤠ ᤛᤡᤱᤓᤧᤸᤗᤣᤰᤁᤡᤸᤗᤧ ᤁᤢᤛᤡᤃᤠᤱ ᤏᤧᤳᤇᤡ ᤁᤢᤕᤢᤰᤏᤠ ᤔᤧᤈᤥᤃᤢ॥ 27 ᤛᤣᤛᤣ ᤛᤠ᤺ᤱᤃᤠᤜᤡᤶ ᤏᤠᤶᤎᤠ ᤗᤧᤵᤔᤠᤱ ᤏᤠᤛᤔᤠ ᤁᤢᤗᤰᤁᤡᤸᤗᤧ ᤗᤠᤃᤡ ᤂᤧᤱᤜᤠ᤹ᤖᤧ ᤋᤢᤰᤛᤡ ᤛᤡᤱᤓᤧᤸᤗᤧᤰᤜᤠ᤹ ᤔᤧᤈᤥᤃᤢ॥ 28 ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤏᤠᤛᤔᤠ ᤁᤢᤛᤢᤰᤐᤠᤜᤠ᤹ᤖᤧ ᤗᤠᤃᤡ ᤏᤧᤳᤇᤡ ᤛᤡᤱᤓᤧᤸᤗᤧᤰᤜᤠ᤹ ᤔᤧᤈᤥᤃᤢ॥ 29 ᤂᤧᤴ ᤏᤧᤳᤇᤡ ᤁᤢᤛᤢᤰᤐᤥᤒᤠ ᤛᤡᤱᤓᤧᤸᤗᤧᤰᤜᤠ᤹ ᤔᤢᤀᤠᤱᤎᤥ ᤌᤠ᤺ᤱ ᤌᤠᤖᤡᤰ ᤏᤡᤗᤧᤱ ᤁᤢᤄᤠᤵ ᤁᤢᤄᤠᤵ ᤑᤠᤰᤛᤡᤱᤅᤠᤱ ᤐᤳᤇᤧ॥ ᤁᤶᤓᤗ᤹ᤖᤡᤰ ᤂᤧᤱᤜᤠ᤹ ᤗᤳᤇᤠ ᤁᤢᤴᤍᤢᤸᤗᤥᤀᤥ ᤆᤰᤛᤡᤱᤅᤠᤱ ᤐᤳᤇᤧ॥ ᤁᤶᤓᤗ᤹ᤖᤡᤰᤁᤣ ᤂᤧᤱᤜᤠ᤹ᤖᤧ ᤂᤧᤴ ᤏᤧᤳᤇᤡ ᤗᤳᤇᤠ ᤐᤖᤡᤰᤐᤠ ᤔᤧᤈᤥᤃᤢ॥ 30 ᤁᤧᤖᤧᤰᤗᤧ ᤕᤧᤳᤇᤡ ᤛᤡᤱᤓᤧᤸᤗᤧᤰ ᤔᤧᤒᤥ᤺ᤰᤂᤧ. ᤜᤧᤰᤁᤩᤠᤱ ᤂᤧᤸᤗᤧ ᤗᤠᤃᤡ ᤕᤢᤵᤐᤠ᤺ᤸᤗᤧᤴ ᤌᤡᤒᤥᤱᤅᤠᤱ ᤋᤢᤰᤛᤡ ᤁᤢᤕᤢᤰᤏᤠᤍᤧᤴᤜᤠ᤹ ᤔᤧᤈᤥᤃᤢ॥ ᤗᤳᤇᤠ ᤗᤳᤇᤠ ᤛᤡᤱᤓᤧᤸᤗᤧᤰ ᤛᤡᤃᤠᤱ ᤏᤧᤳᤇᤡ ᤏᤧᤳᤇᤡ ᤁᤢᤕᤢᤰᤏᤠ ᤏᤧᤛ᤻ᤛᤧ॥ 31 ᤂᤧᤱᤜᤠ᤹ᤖᤧ ᤒᤒᤢᤗ ᤛᤡᤱᤅᤡᤸᤗᤧᤴ ᤐᤧᤖᤧᤶ ᤁᤢᤛᤠᤰᤔᤠ ᤛᤡᤱᤜᤠ᤹ ᤔᤧᤈᤥᤃᤢ—ᤛᤣᤛᤣ ᤛᤠ᤺ᤱᤃᤠᤜᤡᤶ ᤌᤡᤰᤗᤧᤵᤔᤠᤱᤒᤠ ᤛᤡᤱᤓᤧᤸᤗᤧᤰᤜᤠ᤹ᤖᤧ ᤗᤠᤃᤡ ᤅᤠᤛᤡ ᤐᤧᤖᤧᤶ ᤁᤢᤛᤠᤰᤔᤠ ᤛᤡᤱ. 32 ᤜᤧᤰᤁᤩᤠᤱ ᤘᤣ᤹ ᤗᤧᤵᤔᤠᤱᤒᤠ ᤛᤡᤱᤓᤧᤸᤗᤧᤰᤜᤠ᤹ᤖᤧ ᤗᤠᤃᤡ ᤁᤢᤛᤠᤰᤔᤠ ᤅᤠᤛᤡ ᤐᤧᤖᤧᤶᤛᤡᤱ. ᤏᤢ ᤏᤠᤶᤎᤠ ᤗᤧᤵᤔᤠᤱ ᤏᤠᤛᤔᤠ ᤁᤢᤗᤰᤁᤥᤒᤠ ᤛᤡᤱᤓᤧᤸᤗᤧᤰᤜᤠ᤹ᤖᤧ ᤗᤠᤃᤡ ᤅᤠᤛᤡ ᤁᤢᤛᤠᤰᤔᤠ ᤐᤧᤖᤧᤶᤛᤡᤱ ᤔᤧᤕᤠᤰᤋᤢ॥ 33 ᤂᤧᤱᤜᤠ᤹ᤖᤧ ᤛᤡᤱᤓᤧᤸᤗᤧᤰᤜᤠ᤹ᤖᤧ ᤁᤢᤗᤢᤶᤔᤥ ᤁᤧᤒᤵᤐᤠ ᤁᤢᤛᤠᤰᤔᤠᤱᤃ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤧᤸᤗᤧ ᤗᤳᤇᤠ ᤁᤢᤕᤠᤀᤥᤏᤢ ᤘᤣ᤹ ᤁᤢᤕᤠᤀᤥ ᤌᤠᤖᤡᤰ ᤂᤠᤖᤠᤰ ᤁᤧᤃᤧᤵᤐᤠ ᤔᤧᤈᤥᤃᤢ॥ 34 ᤂᤧᤱᤜᤠ᤹ᤖᤧ ᤂᤧᤴ ᤛᤡᤱᤓᤧᤸᤗᤧᤰᤜᤠ᤹ ᤛᤠᤶᤔᤩᤠᤱᤅᤡᤸᤗᤧ ᤔᤧᤛᤢ᤺ᤵᤋᤢ. ᤜᤧᤰᤁᤩᤠᤱ ᤁᤢᤛᤠᤰᤔᤠᤜᤠ᤹ ᤋᤧᤶᤔᤠᤖᤧ ᤗᤠᤃᤡ ᤛᤠᤶᤔᤩᤠᤱ ᤁᤢᤴᤍᤥᤸᤗᤥᤜᤠ᤹ ᤔᤧᤈᤥᤃᤢ॥ ᤂᤧᤱᤜᤠ᤹ᤖᤧ ᤂᤧᤴ ᤐᤧᤖᤧᤶᤒᤠ ᤁᤢᤛᤠᤰᤔᤠᤜᤠ᤹ᤀᤠᤱ ᤛᤠᤶᤔᤩᤠᤱᤅᤡᤸᤗᤧ ᤔᤧᤛᤢ᤺ᤵᤋᤢ॥ 35 ᤂᤧᤱᤜᤠ᤹ᤖᤧ ᤜᤡ᤺ᤰᤁᤱᤁᤱᤒᤠ. ᤐᤠᤖᤠᤴᤗᤠ. ᤜᤧᤰᤁᤩᤠᤱ ᤜᤧ᤺ᤳᤋᤠᤱᤒᤠ ᤆᤠ᤺ᤶᤔᤏᤠᤒᤠ ᤛᤧᤔᤢᤖᤡᤰᤁᤡᤸᤗᤧ ᤔᤧᤓᤕᤢᤀᤠᤱ ᤔᤧᤈᤰᤋᤢᤒᤠ ᤆᤢᤴᤈᤢᤶᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤗᤳᤇᤠ ᤑᤥ᤺ᤴᤍᤠ ᤔᤧᤈᤥᤃᤢ ᤂᤧᤒᤩᤠᤱ ᤂᤧᤵᤔᤥ ᤁᤢᤗᤠᤵ ᤁᤧᤒᤵᤐᤠ ᤁᤖᤢᤒᤧᤸᤗᤧ ᤁᤢᤈᤀᤡ᤺ᤳ ᤔᤧᤈᤥᤃᤢᤀᤠᤱ ᤁᤢᤓᤢᤱ ᤔᤧᤗᤰᤋᤢ॥ 36 ᤂᤧᤱᤜᤠ᤹ᤖᤧ ᤂᤧᤸᤗᤧ ᤗᤠᤃᤡ ᤒᤒᤢᤗ ᤛᤡᤱᤅᤡᤸᤗᤧᤴ ᤗᤡᤛᤡ ᤛᤡᤳᤗᤠᤱᤜᤠ᤹ ᤔᤧᤈᤥᤃᤢᤀᤠᤱ ᤛᤠᤶᤔᤩᤠᤱᤅᤡᤸᤗᤧ ᤔᤧᤛᤢ᤺ᤵᤋᤢ॥ ᤂᤧᤵᤔᤥᤒᤠ ᤛᤠᤶᤔᤩᤠᤱ ᤁᤢᤘᤣ᤹ᤔᤠ ᤂᤧ᤺ᤰᤆᤢᤖᤡᤜᤠ᤹ ᤐᤳᤇᤧ॥ ᤂᤧᤱᤜᤠ᤹ᤖᤧ ᤑᤥ᤺ᤴᤍᤠᤜᤠ᤹ ᤑᤥ᤺ᤶᤔᤠᤖᤧ ᤗᤠᤃᤡ ᤗᤡᤛᤡ ᤕᤢᤵᤐᤠ ᤁᤢᤕᤢᤰᤏᤠᤜᤠ᤹ ᤔᤧᤈᤥᤃᤢ॥ 37 ᤂᤧᤱᤜᤠ᤹ᤖᤧ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤗᤠᤃᤡ ᤜᤡ᤺ᤰᤁᤱᤁᤱᤒᤠ. ᤐᤠᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤂᤡ ᤏᤢ ᤆᤢᤴᤈᤢᤴ ᤗ᤹ᤖᤡᤰ ᤔᤧᤓᤕᤢᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ. ᤑᤢᤱ ᤁᤧᤗᤰᤐᤧᤸᤗᤧ ᤕᤠ᤺ᤶᤒᤰ ᤆᤥᤃᤢᤒᤠ ᤗᤳᤇᤠ ᤑᤥ᤺ᤴᤍᤠ ᤔᤧᤈᤥᤃᤢ॥ 38 ᤂᤧᤱᤜᤠ᤹ᤖᤧ ᤂᤧᤸᤗᤧ ᤗᤠᤃᤡ ᤅᤠᤛᤡ ᤛᤡᤳᤗᤠᤱ ᤏᤢ ᤁᤢᤘᤣ᤹ᤔᤠ ᤂᤧ᤺ᤰᤆᤢᤖᤡᤜᤠ᤹ᤀᤠᤱ ᤔᤧᤈᤥᤃᤢ॥ ᤂᤧᤱᤜᤠ᤹ᤖᤧ ᤛᤡᤳᤗᤠᤱᤅᤡᤸᤗᤧ ᤁᤢᤛᤶᤔᤧᤴ ᤏᤢ ᤂᤧᤸᤗᤧ ᤁᤢᤘᤣ᤹ᤔᤠ ᤁᤢᤏᤠᤶᤔᤡᤴ ᤛᤠᤶᤔᤩᤠᤱᤅᤡᤸᤗᤧ ᤔᤧᤛᤢ᤺ᤵᤋᤢ. ᤂᤶᤓᤩᤠᤱ ᤂᤧᤸᤗᤧ ᤅᤠᤛᤡ ᤁᤠᤛᤠ ᤁᤢᤕᤢᤰᤏᤠᤜᤠ᤹ ᤔᤧᤈᤥᤃᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.