ᤗᤠᤶᤍᤡᤰ 35 - LIFOTNTᤏᤠ᤺ᤶᤛᤡᤱᤔᤠ ᤕᤧᤴ ᤌᤡᤶᤒᤣ 1 ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ ᤑᤢᤰᤂᤢᤛᤡᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤂᤡᤏᤡ᤹ ᤆᤥ᤺ᤰᤔᤠ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ— 2 ᤋᤢᤰᤛᤡ ᤕᤧᤴ ᤌᤠᤖᤡᤰ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤄᤥᤛᤢᤶ᤹. ᤁᤖ ᤏᤢᤛᤡᤃᤣᤰᤐᤠ ᤕᤧᤴᤏᤡᤴ ᤂᤡᤏᤡ᤹ ᤗᤠᤃᤡ ᤛᤣᤛᤣᤒᤠ ᤆᤥᤰᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤧᤱᤃ ᤛᤠᤒ᤻ᤒᤠᤌᤖᤥ॥ ᤂᤧᤸᤗᤧ ᤕᤠ᤺ᤴᤍᤡᤰ ᤀᤠᤳᤋᤡᤸᤗᤧ ᤕᤠ᤺ᤶᤒᤰ ᤆᤥᤃᤢ᤹ ᤂᤧᤴ ᤛᤧᤵᤔᤠ ᤐᤥᤱ᤹॥ 3 ᤛᤠᤒ᤻ᤒᤠᤌ ᤕᤧᤴᤏᤡᤸᤗᤧ ᤕᤠ᤺ᤴᤍᤡᤰ ᤂᤡᤏᤡ᤹ ᤀᤠᤳᤋᤡᤴ ᤜᤡᤶᤔᤥᤀᤠᤱ ᤔᤡ ᤔᤧᤍᤢᤵᤋᤧᤶᤔᤡᤴᤏᤧ᤹ᤀᤥ॥” ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤆᤡᤃᤰᤘᤠᤜᤠ᤹ ( ᤗᤠ ᥈᥋:᥇-᥏ ) 4 ᤔᤥᤛᤠ᤺ᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ— 5 ᤂᤡᤏᤡ᤹ ᤗᤢᤶᤔᤥᤗᤠᤶᤒᤠ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤜᤢᤰᤘᤠ ᤋᤠᤖᤧᤶᤔᤧ᤹॥ ᤀᤠᤒᤠᤅᤣ ᤏᤡᤱᤘᤠ᤹ᤀᤥᤗᤠᤶ ᤐᤡᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤁᤴ ᤆᤡᤃᤰᤘᤠᤜᤠ᤹ ᤋᤠᤖᤢᤖ—ᤛᤠᤶᤔᤩᤠᤱ. ᤕᤢᤵᤐᤠ. ᤜᤧᤰᤁᤩᤠᤱ ᤁᤠᤛᤠ 6 ᤜᤡ᤺ᤰᤁᤱᤁᤱᤒᤠ. ᤐᤠᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤂᤡ ᤏᤢ ᤗᤡᤵᤗᤡᤱᤃᤣ ᤂᤡ᤺ᤸᤗᤧᤴ ᤏᤤᤏᤠᤛᤢᤳ ᤆᤡᤖᤡᤰ. ᤜᤧᤰᤁᤩᤠᤱ ᤔᤧ᤺ᤴᤍᤠ ᤔᤢᤖᤡᤰ. 7 ᤜᤧ᤺ᤳᤋᤠᤱᤒᤠ ᤆᤠ᤺ᤶᤔᤏᤠᤒᤠ ᤔᤧᤸᤗᤢᤰ ᤜᤥᤖᤡᤰ. ᤛᤠ᤹ᤖᤡᤰ ᤏᤢᤒᤠ ᤛᤠᤜᤥᤖᤡᤰ. ᤜᤧᤰᤁᤩᤠᤱ ᤒᤒᤢᤗ ᤛᤡᤱ. 8 ᤀᤥ᤺ᤳᤋᤡ᤺ᤸᤗᤧ ᤗᤠᤃᤡ ᤏᤡ᤺ᤱᤃᤣ᤹. ᤂᤧᤒᤩᤠᤱ ᤔᤠᤱᤌᤥ᤺ᤰᤏᤠ ᤐᤡᤔᤠᤛᤡ ᤏᤡ᤺ᤱᤃᤣ᤹ᤖᤧ ᤗᤠᤃᤡ ᤔᤠᤖᤢᤰ ᤏᤢ ᤁᤢᤏᤠᤶᤃᤧᤏᤢ᤹ᤒᤠ ᤛᤢᤰᤐᤠ ᤜᤠ᤺ᤶᤔᤠᤖᤧ ᤗᤠᤃᤡ ᤔᤠᤖᤢᤰ. 9 ᤀᤣᤐᤥᤍ ᤏᤢ ᤛᤠ᤺ᤱᤒᤣ ᤛᤧ᤺ᤵᤆᤠᤱᤅᤥ ᤋᤡ᤺ᤱᤔᤠᤖᤧ ᤗᤠᤃᤡ ᤀᤏᤡᤰᤛ ᤏᤢ ᤘᤣ᤹ ᤔᤢᤎᤡᤱᤗᤢᤱᤜᤠ᤹॥ 10 “ᤂᤡᤏᤡ᤹ ᤗᤢᤶᤔᤥ ᤀᤠᤰᤂᤩᤠᤖᤡᤰ ᤁᤢᤜᤢᤰᤆᤥ ᤁᤧᤏᤢ᤹ᤒᤠ ᤔᤧᤘᤠ᤹. ᤂᤧᤱᤜᤠ᤹ ᤁᤧᤖᤧᤰ ᤔᤧᤍᤠᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤈᤥᤃᤢᤖ— 11 ᤛᤣᤛᤣ ᤛᤠ᤺ᤱᤃᤠᤜᤡᤶ ᤏᤢ ᤂᤧᤸᤗᤧ ᤁᤢᤄᤠᤵᤔᤠ. ᤛᤠ᤺ᤱᤃᤠᤜᤡᤶᤔᤥᤒᤠ ᤁᤠᤵᤐᤥ ᤛᤠᤱᤛᤠᤱ ᤁᤠ᤺ᤱᤓᤠᤜᤠ᤹. ᤂᤧ᤺ᤰᤆᤢᤖᤡᤜᤠ᤹. ᤛᤡᤱᤓᤧᤸᤗᤧᤰᤜᤠ᤹. ᤁᤢᤛᤠᤰᤔᤠ ᤁᤢᤎᤣ᤺ᤰᤔᤠᤜᤠ᤹. ᤛᤡᤳᤗᤠᤱᤜᤠ᤹ ᤏᤢ ᤁᤢᤕᤢᤰᤏᤠᤍᤧᤴᤜᤠ᤹. 12 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰ ᤏᤢ ᤂᤧᤸᤗᤧ ᤁᤢᤒᤱᤔᤠ ᤋᤰᤗᤠᤱᤜᤠ᤹. ᤁᤢᤍᤧᤵᤑᤣ᤹ ᤏᤢ ᤁᤢᤎᤣ᤺ᤰᤔᤠ ᤑᤥ᤺ᤴᤍᤠᤜᤠ᤹. 13 ᤆᤵᤋᤧᤴ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤋᤰᤗᤠᤱᤜᤠ᤹ ᤏᤢ ᤂᤧᤵᤔᤥᤒᤠ ᤁᤧᤖᤧᤰ ᤛᤠᤔᤠ ᤛᤠᤷᤍᤠᤶᤜᤠ᤹ ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤏᤠᤒᤠ ᤛᤣᤛᤣ ᤂᤖᤧ᤺ᤱ. 14 ᤛᤣᤔᤡ᤺ᤴᤗᤧ ᤗᤠᤃᤡ ᤛᤣᤔᤡᤕᤢᤱᤍᤧᤴ ᤏᤢ ᤂᤧᤵᤔᤥᤒᤠ ᤛᤠᤔᤠ ᤛᤠᤷᤍᤠᤶ ᤇᤰᤁᤱᤜᤠ᤹. ᤜᤧᤰᤁᤩᤠᤱ ᤛᤣᤔᤡ᤺ᤸᤗᤧ ᤗᤠᤃᤡ ᤏᤡ᤺ᤱᤃᤣ᤹. 15 ᤛᤢᤰᤐᤠ ᤜᤠ᤺ᤶᤔᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤏᤢ ᤂᤧᤵᤔᤥᤒᤠ ᤋᤰᤗᤠᤱᤜᤠ᤹. ᤔᤠᤱᤌᤥ᤺ᤰᤏᤠ ᤐᤡᤔᤠᤛᤡ ᤏᤡ᤺ᤱᤃᤣ᤹. ᤁᤢᤏᤠᤶᤃᤧᤏᤢ᤹ᤒᤠ ᤛᤢᤰᤐᤠ. ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤑᤥ᤺ᤴᤍᤠ. 16 ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤍᤧᤴ ᤏᤢ ᤂᤧᤸᤗᤧ ᤗᤠᤃᤡ ᤁᤠᤛᤠ ᤆᤡ᤹ᤗᤡᤱᤃᤣ᤹. ᤂᤧᤸᤗᤧ ᤁᤢᤍᤰᤗᤠᤱᤜᤠ᤹ ᤜᤧᤰᤁᤩᤠᤱ ᤁᤧᤖᤧᤰ ᤛᤠᤔᤠ ᤛᤠᤷᤍᤠᤶᤜᤠ᤹. ᤘᤠᤜᤵᤛᤡᤱᤔᤠ ᤁᤠᤛᤠ ᤇᤧ᤺ᤱᤃᤩᤠ. ᤂᤧᤸᤗᤧ ᤁᤢᤕᤢᤰᤏᤠᤜᤠ᤹ᤏᤢ ᤛᤥᤛᤥᤖᤡᤰ. 17 ᤗᤰᤂᤢᤶᤔᤥᤒᤠ ᤑᤥ᤺ᤴᤍᤠᤜᤠ᤹ ᤏᤢ ᤛᤡᤳᤗᤠᤱᤜᤠ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤢᤰᤏᤠᤍᤧᤴᤜᤠ᤹. ᤗᤰᤂᤢᤶᤔᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤗᤠᤃᤡ ᤑᤥ᤺ᤴᤍᤠ. 18 ᤛᤣᤛᤣ ᤛᤠ᤺ᤱᤃᤠᤜᤡᤶ ᤏᤢ ᤗᤰᤂᤢᤶᤔᤥ ᤁᤢᤜᤠᤵᤔᤠ ᤗᤰᤆᤢᤜᤠ᤹ ᤏᤢ ᤀᤡᤍᤠ᤺ᤰᤜᤠ᤹. 19 ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤔᤠᤱᤛᤧᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤑᤔᤏᤠᤒᤠ ᤆᤠᤱᤜᤠ᤹—ᤜᤠᤖᤢᤏ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤗᤠᤃᤡ ᤛᤢᤳᤌᤥᤒᤠ ᤆᤠᤱᤜᤠ᤹ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤠ᤺ᤶᤒᤰᤁᤥ ᤔᤠᤱᤛᤧᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤆᤠᤱᤜᤠ᤹॥” ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤘᤠᤕᤠᤱ 20 ᤂᤧᤒᤩᤠᤱ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ ᤔᤥᤛᤠ᤺ᤸᤗᤧ ᤁᤢᤍᤃᤡᤗᤠᤶ ᤛᤧᤶᤔᤢ᤹ᤀᤡ ᤔᤧᤒᤥ᤺ᤰᤂᤧ॥ 21 ᤀᤠᤳᤋᤡᤴ ᤀᤠᤳᤋᤡᤴᤜᤠ᤹ ᤂᤢᤴᤇᤡ᤹ ᤛᤡᤰᤗᤢᤱᤔᤠ᤹ ᤏᤢ ᤏᤡᤱᤘᤠ᤺ᤸᤗᤧ ᤔᤢᤖᤠ ᤔᤧᤳᤋᤢᤛᤡ. ᤂᤧᤱᤜᤠ᤹ᤖᤧ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤕᤠ᤺ᤶᤒᤰ. ᤂᤧᤸᤗᤧ ᤗᤠᤃᤡ ᤁᤧᤖᤧᤰ ᤔᤠᤱᤛᤧᤘᤠ ᤆᤥ᤺ᤰᤔᤠ ᤕᤠ᤺ᤶᤒᤰ ᤏᤢ ᤛᤢᤳᤌᤥ ᤆᤠᤱᤗᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤜᤢᤰᤘᤠᤕᤠᤱ ᤔᤧᤍᤠᤖᤢ॥ 22 ᤀᤠᤒᤠᤅᤣ ᤏᤡᤱᤘᤠ᤺ᤸᤗᤧ ᤔᤢᤖᤠ ᤔᤧᤳᤋᤢᤛᤡᤒᤠ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠ ᤂᤰᤐᤧᤳᤗᤧ ᤁᤧᤖᤧᤰ ᤐᤖᤡᤰᤐᤠ ᤛᤠᤔᤠᤜᤠ᤹—ᤁᤧᤓᤡ᤺ᤵᤔᤠ. ᤁᤢᤴᤍᤢᤸᤗᤥ. ᤛᤫᤠᤃᤣᤵ ᤏᤢ ᤆᤥ᤺ᤰᤛᤡᤱᤔᤠ ᤛᤠᤶᤔᤩᤠᤱ ᤘᤠ᤺ᤳᤋᤡ ᤛᤠᤔᤠᤜᤠ᤹ ᤔᤧᤍᤠᤖᤢ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤔᤩᤠᤱᤅᤡᤴ ᤕᤜᤘᤣ ᤍᤠᤱᤒᤠᤀᤥ ᤌᤠ᤺ᤱ ᤐᤱᤔᤏᤠᤒᤠ ᤜᤢᤰᤘᤠ ᤁᤢᤀᤡᤛᤡᤰ ᤔᤧᤍᤥᤴᤍᤢ॥ 23 ᤀᤠᤳᤋᤡᤴᤜᤠ᤹ᤖᤧ ᤜᤡ᤺ᤰᤁᤱᤁᤱᤒᤠ. ᤐᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤂᤡ. ᤆᤢᤴᤈᤢᤶᤒᤠ ᤂᤡ᤺ᤸᤗᤧᤴ ᤏᤤᤏᤠᤛᤢᤳ ᤆᤡᤖᤡᤰ. ᤔᤧ᤺ᤴᤍᤠ ᤔᤢᤖᤡᤰ. ᤜᤧ᤺ᤳᤋᤠᤱᤒᤠ ᤆᤠ᤺ᤶᤒᤔᤏᤠ ᤔᤧᤸᤗᤢᤰ ᤜᤥᤖᤡᤰᤜᤠ᤹. ᤏᤢ ᤛᤠ᤹ᤖᤡᤰ ᤏᤢᤒᤠ ᤛᤠᤜᤥᤖᤡᤰᤐᤠᤜᤠ᤹ ᤔᤧᤃᤳᤋᤢ. ᤂᤧᤱᤜᤠ᤹ ᤔᤧᤍᤠᤖᤢ॥ 24 ᤕᤢᤵᤐᤠ ᤏᤢ ᤁᤠᤛᤠ᤺ᤸᤗᤧ ᤜᤢᤰᤘᤠ ᤁᤧᤍᤥᤶᤒᤠ ᤁᤧᤖᤧᤰᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤜᤢᤰᤘᤠ ᤁᤢᤛᤡᤱᤒᤠ ᤔᤧᤍᤠᤖᤢ॥ ᤀᤠᤳᤋᤡᤴ ᤀᤠᤳᤋᤡᤴᤜᤠ᤹ᤀᤥ ᤁᤢᤓᤠ ᤔᤠᤱᤛᤧᤘᤠ ᤕᤠ᤺ᤶᤒᤰᤗᤧ ᤗᤠᤃᤡ ᤒᤒᤢᤗ ᤛᤡᤱ ᤏᤧᤛ᤻ᤛᤧ. ᤂᤧᤴ ᤂᤧᤱᤜᤠ᤹ᤖᤧ ᤔᤧᤍᤠᤖᤢ॥ 25 ᤀᤠᤒᤠᤅᤣ ᤜᤢᤰᤁᤡᤸᤗᤧ ᤔᤧᤗ᤺ᤴᤍᤢᤒᤠ ᤜᤡ᤺ᤰᤁᤱᤁᤱᤒᤠ. ᤐᤠᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤂᤡ ᤏᤢ ᤆᤢᤴᤈᤢᤶᤒᤠ ᤏᤤᤏᤠᤛᤢᤳ ᤆᤡᤖᤡᤰ ᤁᤧᤃᤵᤔᤠ ᤁᤢᤜᤢᤰᤘᤠ ᤁᤧᤏᤢ᤹ᤔᤠ ᤔᤧᤴᤇᤢᤔᤠᤜᤠ᤹ᤖᤧ ᤂᤧᤴ ᤔᤧᤍᤠᤖᤢ॥ 26 ᤀᤠᤒᤠᤅᤣ ᤏᤡᤱᤘᤠ᤹ᤗᤠᤶ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤃᤵᤔᤠ ᤏᤢ ᤛᤢᤶᤒᤥᤎᤠᤔᤠ ᤔᤧᤴᤇᤢᤔᤠᤜᤠ᤹ᤖᤧ ᤔᤧ᤺ᤴᤍᤠ ᤔᤢᤖᤡᤰᤁᤡᤴ ᤔᤧᤗ᤺ᤴᤍᤢ॥ 27 ᤗᤠᤶᤗᤥᤒᤠᤜᤠ᤹ᤖᤧ ᤀᤣᤐᤥᤍ ᤏᤢ ᤛᤠ᤺ᤱᤒᤣ ᤛᤧ᤺ᤵᤆᤠᤱᤅᤥ ᤋᤡ᤺ᤱᤔᤠᤖᤧ ᤗᤠᤃᤡ ᤀᤏᤡᤰᤛ ᤔᤢᤎᤡᤱᤗᤢᤱ ᤜᤧᤰᤁᤩᤠᤱ ᤘᤣ᤹ ᤁᤢᤔᤧᤴ ᤁᤧᤄᤡ᤺ᤰᤐᤠ ᤔᤢᤎᤡᤱᤜᤠ᤹ ᤔᤧᤍᤠᤖᤢ॥ 28 ᤛᤣᤔᤡᤖᤧ ᤗᤠᤃᤡ ᤏᤡ᤺ᤱᤃᤣ᤹. ᤔᤠᤱᤌᤥ᤺ᤰᤏᤠ ᤐᤡᤔᤠᤛᤡ ᤏᤡ᤺ᤱᤃᤣ᤹ᤖᤧ ᤗᤠᤃᤡ ᤔᤠᤖᤢᤰ ᤏᤢ ᤁᤢᤏᤠᤶᤃᤧᤏᤢ᤹ᤒᤠ ᤛᤢᤰᤐᤠ ᤜᤠ᤺ᤶᤔᤠᤖᤧ ᤗᤠᤃᤡ ᤔᤠᤖᤢᤰ ᤔᤧᤍᤠᤖᤢ॥ 29 ᤕᤜᤘᤣ ᤍᤠᤱᤒᤠᤸᤗᤧ ᤔᤥᤛᤠᤗᤠᤶ ᤀᤡᤱᤈᤠᤱ ᤐᤡᤖᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ᤖᤧ ᤗᤠᤃᤡ ᤏᤡᤱᤘᤠ᤹ᤀᤥ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤃᤵᤐᤠ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤧᤴᤇᤢᤔᤠᤜᤠ᤹ ᤏᤢ ᤕᤧᤶᤒᤡᤳᤇᤠᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤏᤡᤱᤘᤠ᤺ᤸᤗᤧ ᤔᤢᤖᤠ ᤔᤧᤳᤋᤢᤛᤡᤒᤠ ᤁᤢᤀᤡᤛᤡᤰ ᤜᤢᤰᤘᤠ ᤔᤧᤍᤠᤖᤢᤖᤥ॥ ᤛᤣᤛᤣ ᤛᤠ᤺ᤱᤃᤠᤜᤡᤶ ᤁᤧᤈᤥ᤺ᤰᤐᤠ ᤆᤥᤒᤣᤃᤢᤜᤠ᤹ ( ᤗᤠ ᥉᥇:᥇-᥇᥇ ) 30 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤢᤛᤡ. “ᤀᤥᤔᤧᤳᤋᤧᤶᤔᤧ᤹. ᤕᤜᤢᤍᤠ ᤌᤠ᤺ᤰᤁᤥᤒᤠ ᤜᤢᤖᤖᤧ ᤁᤢᤶᤔᤧᤴᤇᤠ᤹. ᤀᤢᤖᤡ᤺ᤸᤗᤧ ᤁᤢᤛ᤻ᤛᤠ ᤒᤈᤗᤣ᤺ᤸᤗᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤀᤢ᤺ᤳᤋᤢᤀᤠᤱ ᤘᤠ᤹॥ 31 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤸᤗᤧ. ᤁᤧᤖᤧᤰ ᤐᤖᤡᤰᤐᤠ ᤆᤥᤒᤣᤃᤢ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤧᤜᤡᤏᤡᤱᤘᤠ᤹ ᤏᤢ ᤛᤡᤰᤁᤢᤶ ᤏᤡᤱᤘᤠ᤹ᤖᤧ ᤂᤢᤏᤧ᤹ ᤁᤢᤎᤡᤶ ᤆᤥᤃᤢᤀᤠᤱ ᤘᤠ᤹॥ 32 ᤂᤧᤸᤗᤧ ᤛᤠᤶᤔᤩᤠᤱ. ᤕᤢᤵᤐᤠ. ᤁᤠᤛᤠᤀᤥ ᤁᤢᤓᤢᤱ ᤗᤰᤔᤠ ᤛᤡᤰᤁᤢᤶ ᤏᤡᤱᤘᤠ᤹. 33 ᤜᤧᤰᤁᤩᤠᤱ ᤗᤢᤱ ᤂᤰᤔᤠ ᤏᤢ ᤁᤠᤶᤔᤠ. ᤛᤡᤱ ᤗᤰᤔᤠ ᤂᤧᤒᤩᤠᤱ ᤁᤧᤖᤧᤰ ᤐᤖᤡᤰᤐᤠ ᤆᤥᤒᤣᤃᤢᤖᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤛᤡᤰᤁᤢᤶ ᤏᤡᤱᤘᤠ᤹ ᤂᤥᤛᤢᤀᤠᤱ ᤘᤠ᤹॥ 34 ᤂᤢᤏᤧ᤹ ᤏᤢ ᤍᤠᤏᤖᤧ ᤁᤢᤎᤠ᤺ᤰᤁᤥᤒᤠ ᤀᤜᤡᤛᤠᤔᤠᤁᤖᤧ ᤁᤢᤛ᤻ᤛᤠ ᤀᤜᤡᤜᤥᤀᤠᤒᤧᤸᤗᤧ ᤘᤣ᤹ᤜᤠ᤹ ᤜᤢ᤹ᤛᤢᤛᤡᤖ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤏᤡᤱᤘᤠ᤹ ᤐᤡᤖᤢᤛᤡᤀᤠᤱ ᤘᤠ᤹॥ 35 ᤂᤧᤱᤜᤠ᤹ᤖᤧ ᤁᤧᤖᤧᤰ ᤐᤖᤡᤰᤐᤠ ᤆᤥᤒᤣᤃᤢᤖᤧ ᤕᤠ᤺ᤶᤒᤰ. ᤁᤢᤛᤠᤵ ᤗᤰᤔᤠ. ᤜᤡ᤺ᤰᤕᤱᤕᤱᤒᤠ. ᤐᤠᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤂᤡ ᤏᤢ ᤆᤢᤴᤈᤢᤶᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤥ ᤑᤢᤱ ᤗᤰᤔᤠ ᤏᤢ ᤑᤔᤠ ᤕᤠ᤺ᤶᤒᤰᤁᤥ. ᤁᤧᤖᤧᤰ ᤐᤖᤡᤰᤗᤧᤴ ᤆᤥᤒᤣᤃᤢ ᤏᤢ ᤆᤥᤒᤣᤃᤢᤖᤧ ᤆᤥ᤺ᤰᤔᤏᤠᤒᤠ ᤜᤢᤰᤘᤠᤏᤢ᤹ᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤖ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤛᤢᤶᤒᤥᤎᤠᤛᤠᤒᤠ ᤆᤥᤃᤢᤛᤡᤀᤠᤱ ᤘᤠ᤹ᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.