ᤗᤠᤶᤍᤡᤰ 34 - LIFOTNTᤏᤡᤛᤡᤃᤣᤰᤐᤠ ᤁᤢᤃᤠᤵ ᤛᤠᤵᤗᤢᤱ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤋᤃᤡᤒᤠ ᤜᤧᤰᤁᤣᤀᤣ ᤗᤢᤱᤅᤡᤸᤗᤧᤴ ᤛᤠᤵᤗᤢᤱ ᤏᤧᤳᤇᤡ ᤂᤧᤖᤧᤀᤠᤱ ᤋᤠᤖᤧ᤹॥ ᤂᤧᤏᤧ᤹ ᤂᤧᤴ ᤋᤃᤡ ᤁᤧᤜᤧᤖᤢ ᤁᤧᤍᤣᤛᤢᤒᤠ ᤛᤠᤵᤗᤢᤱᤅᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤀᤠᤶᤓᤠ ᤂᤧᤴ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤂᤧᤴ ᤛᤠᤵᤗᤢᤱᤅᤥ ᤛᤠᤵᤋᤢᤱ᤹॥ 2 ᤋᤠᤏᤠᤶᤛᤠ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤛᤡᤏᤤ ᤁᤥ᤺ᤰᤔᤠᤀᤥ ᤌᤥ᤺ᤰᤛᤡᤱᤅᤧ᤹ ᤜᤧᤰᤁᤩᤠᤱ ᤁᤥ᤺ᤰᤔᤠᤸᤗᤧ ᤁᤢᤛᤶᤎᤠᤱ ᤀᤠᤱᤃᤠ᤹ ᤀᤠᤒᤣᤛᤠᤱ ᤌᤠᤅᤧ᤹॥ 3 ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤂᤧᤏᤧ᤹ᤏᤢ ᤔᤧᤴᤎᤠᤱᤏᤧᤴᤗ. ᤜᤧᤰᤁᤩᤠᤱ ᤁᤥ᤺ᤰᤔᤠᤀᤥᤒᤠ ᤀᤠᤳᤋᤡᤴ ᤋᤧᤴᤏᤥᤀᤠᤱ ᤀᤥ᤺ᤴᤔᤧᤴᤎᤠᤰᤛᤡᤱᤅᤡᤴᤗ॥ ᤀᤠᤳᤋᤡᤴ ᤔᤧᤸᤗᤢᤰ ᤔᤧ᤺ᤴᤍᤠᤰ ᤀᤡᤃᤪ ᤌᤰᤛᤠ ᤐᤡᤳᤜᤠ᤹ᤀᤠᤱ ᤁᤥ᤺ᤰᤔᤠᤸᤗᤧ ᤁᤢᤍᤃᤡ ᤗᤧᤵᤔᤠᤱ ᤆᤠᤔᤧᤸᤗᤠᤶᤏᤧᤸᤗ॥” 4 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤋᤃᤡᤒᤠ ᤜᤧᤰᤋᤱᤒᤠ ᤗᤢᤱᤅᤡᤸᤗᤧᤴ ᤛᤠᤵᤗᤢᤱ ᤏᤧᤳᤇᤡ ᤂᤰᤋᤢ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤔᤧᤳᤋᤢᤒᤠ ᤁᤢᤀᤡᤛᤡᤰ ᤋᤠᤏᤠᤶᤛᤠ ᤐᤥᤃᤧ᤹ᤀᤠᤱ ᤛᤡᤏᤤ ᤁᤥ᤺ᤰᤔᤠᤀᤥ ᤌᤥ᤺ᤰᤛᤡᤱ॥ ᤂᤢᤏᤧ᤹ ᤁᤢᤜᤢᤰᤁᤥ ᤂᤧᤴ ᤏᤧᤳᤇᤡ ᤛᤠᤵᤗᤢᤱᤜᤠ᤹ᤀᤠᤱ ᤋᤣ᤹ᤖᤢᤀᤠᤱ ᤐᤣ॥ 5 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤴ ᤂᤠ᤹ᤔᤡ᤺ᤵᤐᤥ ᤌᤠᤛᤡᤱ ᤕᤧ. ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤂᤧᤵᤔᤥ ᤕᤧᤶᤛᤡᤱᤅᤠᤱ ᤂᤢᤏᤧ᤹ ᤁᤢᤔᤡᤱ “ᤕᤜᤘᤣ ᤍᤠᤱᤒᤠ” ᤁᤧᤗ᤹ᤒᤠ ᤀᤢᤘᤠ ᤆᤥᤃᤢ॥ 6 ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤴ ᤂᤢᤏᤧ᤹ ᤁᤢᤒᤣᤛᤠᤱᤗᤠᤶ ᤐᤥ᤺ᤰᤂᤧᤀᤠᤱ ᤀᤰᤂᤣ ᤁᤧᤗ᤹ᤒᤠ ᤀᤢᤘᤠ ᤆᤥᤃᤢ. “ᤕᤜᤘᤣ ᤍᤠᤱᤒᤠ. ᤕᤜᤘᤣ ᤍᤠᤱᤒᤠᤴ ᤔᤏᤠ ᤛᤠ᤹ᤖᤡᤰ ᤗᤢᤱᤔᤠ᤹ ᤁᤧᤍᤢᤰᤐᤠ ᤏᤢ ᤁᤧᤏᤢ᤹ᤒᤠ ᤏᤡᤱᤘᤠ᤹ᤑᤢᤔᤠᤱ. ᤜᤧᤰᤁᤩᤠᤱ ᤜᤏᤧ ᤁᤢᤛᤡᤰ ᤔᤧᤶᤒᤥ᤺ᤰᤔᤏᤠᤒᤠ ᤏᤢ ᤛᤠ᤹ᤖᤡᤰ ᤏᤠᤛᤡ ᤁᤧᤎ᤺ᤵᤐᤠ ᤆᤥᤰ. ᤂᤧᤒᤩᤠᤱ ᤌᤎᤵ ᤔᤧᤸᤗ᤹ᤔᤏᤠᤒᤠ ᤔᤡᤶ ᤀᤠᤔᤧᤵᤔᤧᤵᤐᤠ ᤏᤢ ᤏᤛᤠ᤺ᤴᤛᤠᤒᤠ ᤆᤥᤰ॥ 7 ᤂᤢᤏᤧ᤹ ᤜᤧᤴᤇᤡᤱ ᤜᤧᤴᤇᤡᤱ ᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡ. ᤜᤧᤰᤁᤩᤠᤱ ᤑᤧᤴᤕᤠ᤺ᤶᤒᤰ. ᤐᤡᤑᤩᤢᤱ ᤏᤢ ᤗᤠᤕᤥᤴ ᤗᤧᤵᤔᤡ ᤆᤥᤃᤢ᤹॥ ᤁᤖ ᤂᤢᤏᤧ᤹ ᤀᤠᤵᤋᤡᤰᤛᤠᤒᤠᤴ ᤀᤠᤰᤂᤣ ᤑᤠ᤹ᤀᤠᤱᤛᤠᤱ ᤂᤢᤶᤍᤡᤱ ᤐᤡᤖᤢ॥ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹. ᤔᤧᤴᤇᤠ᤹ᤜᤠ᤹ ᤜᤧᤰᤁᤩᤠᤱ ᤛᤢᤶᤛᤡᤃᤣᤰᤐᤠ ᤗᤡᤛᤡᤃᤣᤰᤐᤠ ᤌᤠ᤺ᤰ ᤌᤠᤖᤡᤰ ᤂᤢᤶᤍᤡᤱ ᤐᤡᤖᤢᤛᤡ᤹॥” 8 ᤂᤧᤒᤩᤠᤱ ᤔᤥᤛᤠᤴ ᤜᤠᤖᤠᤘᤖᤠ᤹ ᤂᤠᤶᤒᤠᤱᤅᤥ ᤀ᤺ᤰᤂᤢᤶ ᤑᤴᤇᤡᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤳᤋᤢ॥ 9 ᤂᤢᤏᤧ᤹ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤍᤠᤱᤒᤠᤖᤧ ᤁᤧᤏᤡᤔᤥ ᤁᤧᤏᤡᤱᤘᤠ᤹ ᤁᤧᤍᤠᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤏᤧᤓᤃᤪ. ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧ. ᤕᤜᤘᤣ ᤍᤠᤱᤒᤠᤴᤏᤣ ᤀᤠᤏᤡᤃᤧᤏᤢ ᤛᤥᤖᤡᤰ ᤗᤠᤱᤄᤣᤃᤧ᤹॥ ᤁᤴᤜᤠ᤹ ᤀᤠᤎᤡᤱᤃᤠᤏᤡ ᤔᤏᤠ ᤔᤧᤒᤥ᤺ᤰᤂᤧᤛᤠᤱ ᤀᤠᤏᤡᤃᤣ ᤑᤧᤴᤕᤠ᤺ᤶᤒᤰ ᤏᤢ ᤗᤠᤕᤥᤗᤠᤶ ᤗᤧᤵᤔᤡ ᤀᤠᤒᤡᤖᤧ᤹ᤀᤠᤱ ᤗᤰᤂᤥᤒᤠ ᤁᤢᤀᤡᤛᤡᤰ ᤀᤠᤒᤠᤅᤣ ᤁᤧᤔᤠᤏᤠ ᤜᤧᤰᤁᤣ ᤀᤠᤍᤠ᤺ᤰᤋᤧ᤹ᤀᤥ॥” ᤁᤢᤛᤱ ᤔᤠᤱᤜᤢᤵ ( ᤗᤠ ᥈᥉:᥇᥊-᥇᥏ ; ᤛᤠᤶᤕᤥ ᤀᤡᤱ ᥍:᥇-᥋ . ᥇᥌:᥇-᥇᥍ ) 10 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤂᤧᤏᤧ᤹ᤏᤢ ᤀᤠᤱᤃᤠ᤹ ᤗᤳᤇᤠ ᤔᤠᤱᤜᤢᤵ ᤌᤡᤰ ᤆᤥᤃᤢᤱ᤹॥ ᤂᤧᤏᤧ᤹ ᤁᤧᤖᤧᤰ ᤁᤧᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤠᤱᤃᤠ᤹ ᤛᤠ᤹ᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱ᤹. ᤂᤧᤴ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤁᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤳᤋᤡᤴᤏᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤀᤠᤓᤧᤸᤗᤧᤀᤠᤱ ᤔᤧᤴᤈᤥ᤺ᤰᤁᤣ ᤘᤠ᤹॥ ᤂᤧᤏᤧ᤹ ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤧᤕᤢᤱ᤹. ᤂᤧᤏᤧ᤹ ᤁᤧᤗᤠᤃᤡ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤗᤳᤇᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢᤱ᤹ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤏᤡᤛᤢ᤹॥ 11 ᤀᤠᤀᤡᤴ ᤀᤠᤱᤃᤠ᤹ ᤂᤧᤏᤧ᤹ ᤐᤡᤏᤧᤖ ᤐᤳᤋᤠᤒᤠ ᤀᤡᤱᤈᤠᤱᤅᤡᤴ ᤂᤧᤏᤧ᤹ ᤀᤡ᤺ᤳᤋᤧ᤹ ᤏᤠ᤺ᤳᤋᤧ᤹. ᤀᤠᤱᤃᤠ᤹ ᤂᤧᤏᤧ᤹ ᤁᤧᤍᤃᤡᤗᤠᤶᤒᤠ ᤀᤣᤔᤥᤖᤡ. ᤁᤏᤠᤏᤡ. ᤜᤡᤳᤋᤡ. ᤐᤖᤡᤈ᤻ᤈᤡ. ᤜᤡᤒ᤻ᤒᤡ ᤏᤢ ᤕᤒᤢᤛᤡᤜᤠ᤹ ᤏᤠ᤺ᤳᤋᤢᤱᤍᤣᤛᤢᤱᤛᤡᤱ᤹॥ 12 ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤘᤕᤧ᤹᥄ ᤂᤧᤏᤧ᤹ ᤁᤧᤒᤣ᤺ᤰᤗ ᤁᤧᤒᤵᤐᤠ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤏᤢ ᤂᤧᤏᤧ᤹ ᤋᤱᤔᤣ ᤔᤧᤈᤥᤃᤧᤴᤏᤧ᤹. ᤔᤣ᤺ᤴᤏᤧᤓᤃᤪ ᤂᤧᤱᤜᤠ᤹ ᤂᤡᤏᤡ᤹ ᤗᤠᤃᤡ ᤆᤧᤴ ᤔᤧᤒᤥᤱ᤹॥ 13 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤕᤴᤇᤧ ᤐᤡᤖᤧᤛᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤢᤳᤌᤥ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤒᤠ ᤗᤢᤱᤜᤠ᤹ ᤑᤕ᤺ᤵᤑᤕ᤺ᤵ ᤕ᤺ᤵᤛᤧ ᤐᤡᤖᤧᤛᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤛᤣᤖᤠ ᤔᤠᤱᤛᤡᤳᤗᤠᤱᤜᤠ᤹ ᤆᤩᤧᤵᤋᤧᤀᤠᤱ ᤛᤥ᤺ᤴᤍᤧ ᤐᤡᤖᤧᤛᤧ᤹॥ 14 “ᤂᤡᤏᤡ᤹ ᤘᤣ᤹ ᤀᤠᤳᤋᤡᤴ ᤔᤠᤱᤅᤡᤴᤏᤠᤱ ᤛᤧᤘᤠ ᤔᤧᤔᤧᤳᤋᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ. ᤂᤢᤏᤧ᤹ ᤁᤢᤔᤡᤱᤃ ‘ᤁᤢᤏᤠ ᤁᤧᤜᤧᤶᤒᤠᤖᤥ’ ᤁᤢᤏᤠ ᤁᤧᤜᤧᤶᤒᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣᤖᤥ॥ 15 “ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹. ᤂᤧᤴ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤏᤢ ᤂᤡᤏᤡ᤹ ᤋᤱᤔᤣ ᤔᤧᤈᤥᤃᤧᤶᤔᤡᤴᤏᤧ᤹. ᤔᤣ᤺ᤴᤏᤧᤓᤃᤪ ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤒᤠᤅᤣ ᤔᤠᤱᤜᤠ᤹ ᤔᤧᤍᤡᤶᤍᤢ ᤔᤧᤏᤠ᤺ᤳᤋᤢᤛᤡᤀᤠᤱ ᤏᤡᤱᤘᤠ᤹ᤀᤥ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤜᤧᤰᤋᤱᤒᤠ ᤔᤧᤈᤥᤃᤢᤸᤗᤧ ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤠᤱᤜᤠ᤹ᤖᤧ ᤗᤠᤃᤡ ᤘᤕᤠᤃᤧᤴ ᤛᤡᤍᤢᤱᤛᤓᤠ ᤔᤧᤈᤥᤃᤢᤸᤗᤧ. ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤧᤶᤀᤢ᤺ᤳᤋᤡ᤹ ᤂᤧᤒᤩᤠᤱ ᤂᤡᤏᤡ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤍᤢᤱᤈᤓᤠᤜᤠ᤹ ᤁᤧᤈᤠᤶ᤹॥ 16 ᤀᤠᤸᤗ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤴᤇᤢᤔᤠ ᤛᤠᤜᤠ᤹ᤀᤥᤒᤠ ᤁᤢᤓᤠ ᤂᤡᤏᤡ᤹ ᤕᤧᤶᤒᤡᤳᤇᤠ ᤛᤠᤜᤠ᤹ᤖᤧ ᤗᤠᤃᤡ ᤁᤧᤍᤠᤖᤢᤶᤛᤡᤶᤒᤡᤗᤠ. ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠᤛᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ ᤔᤧᤍᤡᤶᤍᤢ ᤔᤧᤏᤠ᤺ᤳᤋᤢᤛᤡᤀᤠᤱ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡᤒᤡᤗᤠ ᤜᤧᤰᤁᤩᤠᤱ ᤕᤠ᤺ᤶᤒᤥ᤺ᤵᤔᤠ ᤕᤠ᤺ᤶᤒᤰ ᤜᤧᤰᤋᤱᤒᤠ ᤔᤧᤈᤥᤃᤢᤀᤠᤱ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤕᤧᤶᤒᤡᤳᤇᤠ ᤛᤠᤜᤠ᤹ᤀᤠᤱ ᤜᤠᤒᤠ ᤂᤧᤴ ᤆᤥ᤺ᤰᤔᤠ ᤔᤧᤒᤠᤱᤄᤢᤛᤡ᤹॥ 17 “ᤂᤡᤏᤡ᤹ ᤀᤠᤒᤠᤅᤣ ᤗᤠᤃᤡ ᤏᤠᤘᤠᤀᤡᤳᤗᤠᤜᤠ᤹ ᤔᤧᤈᤥᤃᤧᤶᤛᤡᤶᤔᤡᤴᤏᤧ᤹॥ 18 “ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶ ᤋᤥᤛᤧᤶᤔᤧ᤹॥ ᤀᤠᤱᤃᤠ᤹ ᤀᤡᤱᤈᤠᤱ ᤐᤡᤏᤡᤱᤒᤠ ᤁᤢᤀᤡᤛᤡᤰ ᤀᤒᤡᤒ ᤗᤠᤀᤥ ᤋᤥᤔᤠ ᤁᤧᤒᤥᤱᤒᤠ ᤕᤧᤶᤔᤥ ᤏᤢᤛᤡ ᤕᤧᤴ ᤌᤠᤖᤡᤰ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤆᤧᤶᤔᤧ᤹ᤖ ᤘᤕᤧᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤀᤒᤡᤒ ᤗᤠᤀᤥ ᤔᤡᤛᤪ ᤗᤠᤈᤣ᤹ᤗᤠᤶᤒᤠ ᤂᤡᤏᤡ᤹ ᤁᤧᤗ᤺ᤴᤍᤡ ᤁᤧᤓᤧᤖᤡᤀᤠᤱ ᤘᤕᤧ॥ 19 “ᤛᤠᤵᤐᤥ᤺ᤰᤁᤥᤗᤠᤶ ᤋᤃᤡ ᤁᤧᤗ᤺ᤶᤒᤠ ᤁᤧᤖᤧᤰ ᤀᤠᤱᤃᤠ᤹ᤀᤡᤴ ᤔᤧᤒᤥᤱ᤹॥ ᤂᤡᤏᤡ᤹ ᤌᤰᤛᤠᤜᤠ᤹ᤖᤧ ᤔᤧᤎᤠᤵᤋᤢᤛᤡᤒᤠ ᤁᤢᤶᤒᤠᤒᤠ. ᤐᤡᤳᤌᤰᤛᤠᤜᤠ᤹ ᤏᤢ ᤔᤧᤸᤗᤢᤰ ᤔᤧ᤺ᤴᤍᤠᤰᤜᤠ᤹ᤖᤧ ᤋᤃᤡ ᤔᤧᤎᤠᤵᤋᤢᤛᤡᤒᤠᤜᤠ᤹ ᤂᤰᤐᤧᤳ ᤀᤠᤱᤃᤠ᤹ᤀᤡᤴ ᤔᤧᤒᤥᤱ᤹॥ 20 ᤀᤍᤱᤔᤠ᤺ᤸᤗᤧ ᤋᤃᤡ ᤌᤠᤵᤋᤢᤒᤠ ᤀᤍᤱᤛᤠ᤺ᤳᤋᤡᤴ ᤔᤧᤸᤗᤢᤰᤛᤠ᤺ᤳᤋᤡᤸᤗᤧ ᤗᤧᤰᤋᤧᤶᤔᤧ᤹ᤀᤠᤱ ᤛᤧᤴᤍᤧᤶᤔᤧ᤹॥ ᤂᤧᤴ ᤁᤧᤸᤗᤧᤰᤋᤢᤶᤔᤡᤴᤏᤧᤓᤃᤪ ᤂᤧᤸᤗᤧ ᤁᤢᤛᤡᤳᤗᤠ᤺ᤴ ᤀᤧᤰᤂᤧᤶ ᤐᤡᤖᤧᤶᤔᤧ᤹॥ ᤂᤡᤏᤡ᤹ ᤋᤢᤶᤒᤠ ᤛᤠᤜᤠ᤹ ᤁᤧᤖᤧᤰ ᤌᤧᤔᤠᤀᤡ ᤐᤡᤖᤧᤶᤛᤡᤶᤔᤧ᤹ᤀᤠᤱ ᤛᤧᤴᤍᤧᤶᤛᤡᤶᤔᤧ᤹॥ “ᤀᤠᤱᤃᤠ᤹ ᤀᤠᤍᤃᤡ ᤀᤠᤳᤋᤡᤴᤜᤠ᤹ᤀᤠᤱ ᤌᤧᤔᤠᤀᤠᤱ ᤔᤣ᤺ᤴᤏᤣ ᤀᤥ᤺ᤴᤔᤧᤴᤎᤠᤰᤛᤡᤱᤅᤡᤴᤗ॥ 21 “ᤋᤢᤰᤛᤡ ᤕᤧᤴ ᤌᤠᤖᤡᤰ ᤀᤠᤒᤠᤅᤣ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ᤖ ᤘᤕᤧᤶᤔᤧ᤹. ᤁᤖ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤏᤠ᤺ᤶᤔᤠᤛᤡᤶᤔᤧ᤹॥ ᤁᤧᤰᤆᤢ ᤌᤥ᤺ᤱᤔᤠ ᤏᤢ ᤆᤠᤛᤢᤶᤔᤠ ᤕᤧᤶᤔᤥᤀᤠᤱ ᤏᤠ᤺ᤶᤔᤠᤛᤡᤶᤔᤧ᤹॥ 22 “ᤕᤧᤳᤏᤠᤶᤜᤠ᤹ᤀᤥᤒᤠ ᤋᤱᤏᤠᤶᤜᤠ᤹ ᤋᤃᤡ ᤁᤧᤍᤢᤶᤒᤠ ᤔᤠᤛᤡ᤺ᤴᤏᤢ ᤂᤡᤏᤡ᤹ ᤋᤥᤛᤧᤶᤔᤧ᤹. ᤜᤧᤰᤁᤩᤠᤱ ᤋᤱᤒᤣᤀᤥᤒᤠ ᤁᤢᤏᤢᤵᤔᤥ ᤁᤢᤈᤠ ᤆᤡᤱᤔᤠ ᤋᤱᤏᤠᤶᤔᤠᤱ ᤋᤥᤛᤧᤶᤔᤧ᤹॥ 23 “ᤁᤴ ᤛᤢᤶᤛᤡ ᤋᤱᤏᤠᤶᤜᤠ᤹ᤀᤥ ᤋᤱᤒᤣᤖᤧ ᤛᤢᤶᤛᤡᤗᤧᤱ ᤂᤡᤏᤡ᤹ ᤁᤧᤖᤧᤰ ᤕᤧᤶᤒᤡᤳᤇᤠᤜᤠ᤹ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤀᤥᤛᤣ᤺ᤴᤔᤧᤎᤠᤰᤛᤡᤱᤗ॥ 24 ᤀᤠᤱᤃᤠ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤡᤏᤡ᤹ ᤋᤃᤡᤗᤠᤶᤒᤠ ᤗ᤺ᤳᤋᤢᤱᤍᤣᤛᤢᤱᤛᤡᤱ᤹. ᤜᤧᤰᤁᤩᤠᤱ ᤂᤡᤏᤡ᤹ ᤀᤡ᤺ᤴᤍᤥᤴ ᤑᤥᤛᤢᤱ ᤐᤡᤏᤡᤱ᤹॥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤋᤱᤒᤣᤖᤧ ᤛᤢᤶᤗᤧᤱ ᤀᤥᤛᤣ᤺ᤴᤃᤧᤎᤠᤰᤁᤠᤛᤡᤸᤗᤧ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤡᤏᤡ᤹ ᤗᤠᤈᤣ᤹ ᤛᤡᤱᤒᤢᤱᤜᤠ᤹ᤀᤥ ᤔᤡᤰ ᤔᤧᤱᤃᤣ᤺ᤳᤋᤢᤴ᤹॥ 25 “ᤀᤠᤱᤃᤠ᤹ᤀᤥ ᤁᤧᤍᤥ᤺ᤴᤍᤢᤶᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤔᤠᤰᤂᤡᤴ ᤁᤧᤓᤱᤒᤠ ᤛᤡᤍᤠ᤹ ᤕᤠᤰᤔᤏᤠᤒᤠ ᤂᤖᤧ᤺ᤱᤅᤡᤴᤏᤢ ᤔᤧᤍᤥ᤺ᤴᤍᤧᤶᤔᤡᤴᤏᤧ᤹. ᤜᤧᤰᤁᤩᤠᤱ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶᤔᤥ ᤛᤡᤍᤢᤱᤈᤓᤠ ᤋᤥ᤺ᤶᤔᤏᤠᤒᤠ ᤌᤰᤛᤠ᤺ᤸᤗᤧ ᤁᤢᤓᤠ ᤌᤣᤀᤠᤱ ᤋᤠᤏᤠᤶ ᤌᤠᤖᤡᤰ ᤔᤧᤃᤳᤋᤧᤶᤔᤡᤴᤏᤧ᤹॥ 26 “ᤂᤡᤏᤡ᤹ ᤗᤠᤈᤣ᤹ ᤛᤡᤱᤒᤢᤱᤅᤥᤒᤠ ᤋᤃᤡ ᤁᤧᤍᤢᤶᤒᤠ ᤁᤢᤈᤠᤜᤠ᤹ᤀᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤁᤢᤈᤠ᤹ᤀᤡ ᤁᤢᤈᤠᤴ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤋᤠᤖᤧᤶᤔᤧ᤹॥ “ᤔᤧ᤺ᤴᤍᤈᤩᤠ᤺ᤰ ᤛᤠᤴ ᤂᤧᤸᤗᤧ ᤁᤢᤶᤔᤠᤖᤧ ᤁᤢᤏᤢᤀᤥ ᤔᤧᤎᤥ᤺ᤰᤋᤧᤶᤔᤡᤴᤏᤧ᤹ᤀᤥ॥” 27 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤁᤴ ᤐᤠ᤺ᤴᤜᤠ᤹ ᤛᤠᤵᤋᤧ᤹. ᤌᤣᤀᤠᤱᤓᤧᤸᤗᤧ ᤁᤴ ᤐᤠ᤺ᤴᤜᤠ᤹ ᤁᤢᤀᤡᤛᤡᤰ ᤂᤧᤏᤧ᤹ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤔᤠᤱᤜᤢᤵ ᤆᤥᤃᤢᤱᤅᤠᤱ ᤘᤠ᤹॥” 28 ᤔᤥᤛᤠᤴ ᤂᤧᤵᤔᤥ ᤗᤡᤒᤥᤱ ᤕᤧᤴ ᤌᤠᤖᤡᤰ ᤏᤢ ᤗᤡᤒᤥᤱ ᤛᤧᤴᤍᤡᤰ ᤌᤧᤶᤒᤠ ᤘᤕᤧ॥ ᤂᤢᤏᤧ᤹ ᤂᤖᤧ᤺ᤱᤅᤠᤱ ᤔᤧᤈᤏᤧᤴ ᤜᤧᤰᤁᤩᤠᤱ ᤆᤫᤠ᤺ᤳᤋᤠᤱ ᤔᤧᤎᤢᤅᤢᤴ॥ ᤂᤢᤏᤧ᤹ ᤂᤧᤴ ᤛᤠᤵᤗᤢᤱᤜᤠ᤹ᤀᤥ ᤂᤧᤴ ᤔᤠᤱᤜᤢᤵᤐᤥᤒᤠ ᤐᤠ᤺ᤴᤈᤠ᤺ᤰᤁᤡᤴ ᤂᤧᤴ ᤌᤡᤒᤥᤱ ᤀᤡᤱᤈᤠᤱᤜᤠ᤹ ᤛᤠᤵᤋᤢᤖᤥ॥ ᤔᤥᤛᤠᤴ ᤛᤡᤏᤤ ᤁᤥ᤺ᤰᤔᤠᤀᤥᤗᤠᤶ ᤌᤠᤛᤡᤱ ᤕᤢ᤹᤺ 29 ᤀᤠᤸᤗ ᤔᤥᤛᤠᤴ ᤋᤥ᤺ᤴᤍᤡᤗᤧᤴ ᤂᤧᤴ ᤏᤧᤳᤇᤡ ᤛᤠᤵᤗᤢᤱᤜᤠ᤹ ᤁᤢᤜᤢᤰᤁᤥ ᤕᤠᤱᤛᤡᤱ ᤜᤧᤰᤁᤩᤠᤱ ᤛᤡᤏᤤ ᤁᤥ᤺ᤰᤔᤠᤀᤥᤗᤠᤶ ᤌᤠᤛᤡᤱ ᤕᤧ. ᤂᤧᤒᤩᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤐᤠᤖᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤏᤠᤖᤠᤴ ᤛᤧᤍᤡᤱᤍᤡᤱ ᤀᤥ᤺ᤳᤗ ᤐᤳ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤔᤥᤛᤠ᤺ᤸᤗᤧ ᤏᤡᤱᤘᤠ᤹ ᤔᤧᤄᤥᤛᤢᤴ॥ 30 ᤀᤠᤸᤗ ᤜᤠᤖᤢᤏᤧᤴ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤥᤛᤠᤴ ᤔᤧᤏᤡᤛᤢ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤏᤠᤖᤠᤴ ᤛᤧᤍᤡᤱᤍᤡᤱ ᤀᤥ᤺ᤳᤋᤧᤒᤠ ᤔᤧᤏᤡᤛᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤒᤣᤛᤠᤱ ᤋᤠᤔᤠ ᤂᤧᤱᤜᤠ᤹ ᤔᤧᤃᤡᤛᤧ॥ 31 ᤁᤖ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤀᤢ᤺ᤳᤋᤢᤛᤡ. ᤜᤧᤰᤁᤩᤠᤱ ᤛᤱᤈᤢᤶᤓᤥᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ᤏᤢ ᤛᤥᤛᤥᤖᤡᤰ ᤜᤠᤖᤢᤏᤧᤴ ᤔᤥᤛᤠᤴ ᤗᤧᤵᤔᤠᤱ ᤔᤧᤏᤢ᤺ᤰᤂᤧ ᤔᤧᤍᤩᤧ. ᤂᤧᤒᤩᤠᤱ ᤔᤥᤛᤠᤴ ᤂᤧᤱᤜᤠ᤹ᤏᤢ ᤐᤠᤖᤧ॥ 32 ᤂᤧᤴ ᤀᤣᤃᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤀᤠᤱ ᤏᤡ᤺ᤳᤋᤠᤱ ᤔᤧᤍᤩᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤛᤡᤏᤤ ᤁᤥ᤺ᤰᤔᤠᤀᤥ ᤔᤧᤳᤋᤢᤒᤠ ᤁᤧᤖᤧᤰ ᤀᤡᤱᤈᤠᤱ ᤐᤠ᤺ᤴᤜᤠ᤹ ᤂᤢᤏᤧ᤹ ᤂᤧᤱᤜᤠ᤹ ᤆᤧᤰᤋᤢᤛᤡ॥ 33 ᤀᤠᤸᤗ ᤔᤥᤛᤠᤴ ᤂᤧᤱᤜᤠ᤹ᤏᤢ ᤐᤠᤖᤧ ᤆᤢᤖᤧ. ᤂᤧᤒᤩᤠᤱ ᤂᤧᤸᤗᤧ ᤂᤢᤏᤧ᤹ ᤁᤢᤏᤠᤖᤠᤴ ᤐ᤺ᤳᤌᤠᤱ ᤌᤡᤰᤗᤧ ᤋᤧᤵᤋᤢ॥ 34 ᤁᤖ ᤀᤠᤸᤗ ᤔᤥᤛᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤢᤏᤧ᤹ᤏᤢ ᤐᤠ᤺ᤳᤇᤧ ᤐᤣ᤺ᤸᤗᤧ ᤗᤠ᤺ᤰᤁᤠᤳ ᤔᤧᤸᤗ᤺ᤴᤏᤣ ᤌᤠᤖᤡᤰ ᤂᤢᤏᤧ᤹ ᤂᤧᤴ ᤐ᤺ᤳᤌᤠᤱᤅᤡᤴ ᤜᤴᤍᤢᤍᤣᤛᤢ॥ ᤂᤢᤏᤧ᤹ ᤂᤧᤵᤛᤢᤒᤠ ᤀᤡᤱᤈᤠᤱᤅᤡᤴ ᤂᤢᤏᤧ᤹ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤆᤧᤰᤋᤢᤛᤡ॥ 35 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤥᤛᤠ᤺ᤸᤗᤧ ᤁᤢᤏᤠᤖᤠᤴ ᤀᤥ᤺ᤳᤋᤧᤒᤠ ᤔᤧᤏᤡᤛᤢ॥ ᤂᤧᤒᤩᤠᤱ ᤔᤥᤛᤠᤴ ᤕᤜᤘᤣ ᤍᤠᤱᤒᤧᤴᤏᤢ ᤐᤠ᤺ᤵᤔᤠᤖᤧ ᤗᤠᤃᤡ ᤛᤡᤃᤠᤱ ᤔᤧᤸᤗ᤺ᤳᤋᤣ ᤌᤠᤖᤡᤰ ᤂᤧᤴ ᤐ᤺ᤳᤌᤠᤱᤅᤡᤴ ᤂᤢᤏᤧ᤹ ᤁᤢᤏᤠᤖᤠᤀᤥ ᤕᤠᤶᤔᤥ ᤋᤧᤵᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.