ᤗᤠᤶᤍᤡᤰ 33 - LIFOTNT

ᤔᤥᤛᤠ᤺ᤸᤗᤧ ᤆᤥᤃᤢᤒᤠ ᤐᤣᤗᤡᤃᤧᤴ ᤋᤢᤘᤠ

¹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤔᤡᤛᤪᤗᤠᤶᤒᤠ ᤑᤧᤵᤔᤏᤠᤛᤡᤒᤠ ᤁᤴ ᤔᤏᤠᤜᤠ᤹ᤏᤢ ᤂᤧᤏᤧ᤹ ᤂᤧᤴ ᤗᤠᤈᤣ᤹ᤀᤥ ᤐᤣᤃᤧ᤹. ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ‘ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤐᤡᤖᤢᤱᤛᤡᤱ᤹’ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤒᤪᤠᤜᤠᤔ. ᤀᤡᤛᤜᤠᤁ ᤜᤧᤰᤁᤩᤠᤱ ᤕᤠᤁᤢᤒᤧᤴᤏᤢ ᤔᤠᤱᤜᤢᤵ ᤆᤥᤃᤢᤱᤅᤠᤱ ᤘᤕᤠᤱ॥

² ᤀᤠᤱᤃᤠ᤹ ᤂᤡᤏᤡ᤹ ᤋᤃᤡ ᤋᤃᤡ ᤗᤳᤇᤠ ᤔᤠᤱᤗᤠᤀᤡᤱᤒᤠ ᤐᤠᤱᤄᤢᤱ᤹. ᤜᤧᤰᤁᤩᤠᤱ ᤁᤏᤠᤏᤡ. ᤀᤣᤔᤥᤖᤡ. ᤜᤡᤳᤋᤡ. ᤐᤖᤡᤈ᤻ᤈᤡ. ᤜᤡᤒ᤻ᤒᤡ ᤏᤢ ᤕᤒᤢᤛᤡᤜᤠ᤹ ᤏᤠ᤺ᤳᤋᤢᤱᤍᤣᤛᤢᤱᤛᤡᤱ᤹॥

³ ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤂᤧᤴ ᤗᤠᤈᤣ᤹ᤀᤥ ᤐᤣᤃᤧᤶᤔᤧ᤹॥ ᤁᤖ ᤂᤡᤏᤡ᤹ ᤀᤠᤎᤡᤱᤃᤠᤏᤡ ᤁᤧᤈᤥ᤺ᤰᤐᤠ ᤔᤏᤠᤏᤡᤱ. ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤗᤢᤶᤔᤥ ᤔᤧᤒᤣ᤺ᤰᤁᤠᤴ. ᤔᤣ᤺ᤴᤏᤧᤓᤃᤪ ᤗᤠᤶᤔᤥᤛᤠ ᤀᤠᤱᤃᤠ᤹ ᤂᤡᤏᤡ᤹ ᤔᤧᤱᤔᤠ ᤛᤢᤰᤏᤡᤱᤒᤡᤗᤠ॥”

⁴ ᤀᤠᤸᤗ ᤔᤏᤠᤜᤠ᤹ᤖᤧ ᤁᤴ ᤑᤧᤴ ᤀᤡᤱᤄᤱᤅᤡᤴ ᤔᤧᤄᤧᤵᤛᤢ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤢᤰᤂᤣ ᤆᤩᤧ. ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤘᤠ᤺ᤳᤋᤡ ᤛᤠᤔᤠᤜᤠ᤹ ᤔᤧᤴᤘᤠᤖᤢᤴ॥

⁵ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤰᤂᤣ ᤔᤧᤳᤋᤢᤀᤠᤱ ᤘᤕᤧ. “ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹. ‘ᤂᤡᤏᤡ᤹ ᤀᤠᤎᤡᤱᤃᤠᤏᤡ ᤔᤏᤠᤏᤡᤱ॥ ᤀᤠᤱᤃᤠ᤹ ᤔᤡᤰᤆᤡᤖᤠᤵᤐᤠ ᤌᤡᤰᤗᤰ ᤂᤡᤏᤡ᤹ ᤗᤢᤶᤔᤥ ᤋᤠᤀᤠᤏᤧᤓᤃᤪ ᤀᤠᤱᤃᤠ᤹ ᤂᤡᤏᤡ᤹ ᤂᤠᤵᤐᤢᤌᤩ᤺ᤱ ᤔᤧᤱᤏᤡᤱ॥ ᤀᤠᤸᤗ ᤂᤡᤏᤡ᤹ ᤘᤠ᤺ᤳᤋᤡ ᤛᤠᤔᤠᤜᤠ᤹ ᤑᤧᤴᤍᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ᤏᤢ ᤌᤧᤔᤠ ᤆᤥ᤺ᤰᤔᤠ ᤐᤥᤱ᤹. ᤂᤧᤴ ᤐᤠ᤺ᤴᤏᤥ ᤀᤠᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤱ॥’”

⁶ ᤁᤸᤗᤧᤆᤥᤃᤢᤸᤗᤧ ᤜᤥᤖᤣᤒ ᤁᤥ᤺ᤰᤔᤠᤀᤥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤛᤠᤔᤠᤜᤠ᤹ ᤔᤧᤓᤧᤴᤍᤢᤖᤥ॥

ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ

⁷ ᤔᤥᤛᤠᤴ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤗᤠᤶ ᤗᤠ᤺ᤰᤁᤠᤳ ᤏᤠᤏᤠᤰ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤴ ᤆᤥᤃᤢᤖ ᤕᤠᤃᤧ॥ ᤂᤢᤏᤧ᤹ ᤂᤧᤴ “ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ” ᤔᤧᤳᤋᤢ॥ ᤕᤜᤘᤣ ᤍᤠᤱᤒᤠᤴᤏᤢ ᤋᤢᤶᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠ ᤁᤧᤖᤧᤰ ᤔᤏᤠᤜᤠ᤹ ᤛᤠ᤺ᤱᤃᤠᤜᤡᤶ ᤗᤠ᤺ᤰᤁᤠᤳ ᤁᤧᤏᤧᤒᤠ ᤀᤠᤶᤓᤠ ᤂᤧᤴ ᤛᤠ᤺ᤱᤃᤠᤜᤡᤶᤔᤥ ᤔᤧᤒᤣ॥

⁸ ᤀᤠᤸᤗ ᤔᤥᤛᤠᤴ ᤗ᤺ᤴᤍᤧᤀᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤐᤣ. ᤂᤧᤒᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤔᤧᤒᤥᤃᤧᤀᤠᤱ ᤀᤠᤒᤠᤅᤣ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤥ ᤔᤧᤕᤧᤶᤛᤡᤱᤅᤠᤱ ᤔᤥᤛᤠᤴ ᤛᤠ᤺ᤱᤃᤠᤜᤡᤶᤔᤥ ᤔᤧᤸᤗ᤺ᤳᤋᤣ ᤌᤠᤖᤡᤰ ᤀᤠᤶᤓᤠ ᤂᤢᤏᤧ᤹ ᤗᤧᤱ ᤗ᤹ᤖᤡᤰ ᤀᤥᤔᤧᤔᤧᤳᤋᤢᤀᤠᤱ ᤔᤧᤒᤳᤇᤧ॥

⁹ ᤀᤠᤸᤗ ᤔᤥᤛᤠᤴ ᤂᤧᤴ ᤛᤠ᤺ᤱᤃᤠᤜᤡᤶᤔᤥ ᤗᤠᤛᤧ ᤜᤧᤰᤁᤣ᤺ᤸᤗᤧ ᤂᤠ᤹ᤔᤡ᤺ᤵᤐᤠ ᤛᤡᤳᤗᤠᤱᤅᤡᤴ ᤌᤠᤛᤡᤱ ᤕᤧᤀᤠᤱ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤥ ᤋᤰᤐᤧᤳ ᤕᤧᤶᤛᤡᤱ॥ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤴ ᤔᤥᤛᤠ᤺ᤴᤏᤢ ᤐᤠᤖᤧ॥

¹⁰ ᤀᤠᤸᤗ ᤔᤏᤠᤜᤠ᤹ᤖᤧ ᤂᤠ᤹ᤔᤡ᤺ᤵᤐᤠ ᤛᤡᤳᤗᤠᤱᤅᤡᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤥ ᤋᤰᤐᤧᤳ ᤕᤧᤶᤛᤡᤱᤒᤠ ᤔᤧᤏᤡᤛᤢ. ᤂᤧᤓᤧᤸᤗᤧ ᤂᤧᤱᤜᤠ᤹ ᤔᤧᤒᤥᤃᤧᤀᤠᤱ ᤂᤢᤴᤇᤡ᤹ ᤀᤠᤒᤠᤅᤣ ᤀᤠᤒᤠᤅᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤥ ᤔᤠᤱᤛᤧᤘᤠ ᤔᤧᤈᤥᤃᤧ॥

¹¹ ᤁᤶᤓᤗ᤹ᤖᤡᤰ ᤁᤢᤓᤠ ᤆᤢᤶᤍᤣᤱᤏᤢ ᤋᤠ᤹ᤈᤧᤱᤔᤏᤠ ᤐᤠ᤺ᤵᤔᤏᤠᤒᤠ ᤜᤧᤰᤁᤣ ᤕᤜᤘᤣ ᤍᤠᤱᤒᤠᤴ ᤔᤥᤛᤠ᤺ᤴᤏᤢ ᤋᤢᤶᤍᤢᤶᤒᤠ ᤋᤠ᤹ᤈᤧᤰᤂᤧ॥ ᤂᤧᤒᤩᤠᤱ ᤔᤥᤛᤠᤴ ᤏᤢ᤺ᤰᤂᤧᤀᤠᤱ ᤛᤠ᤺ᤱᤃᤠᤜᤡᤶᤔᤥ ᤋᤩᤧ. ᤁᤖ ᤂᤢᤏᤧ᤹ ᤌᤠᤱᤒᤧᤴ ᤁᤢᤓᤠ᤹ᤒᤠᤱ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢᤴ ᤂᤧᤴ ᤛᤠ᤺ᤱᤃᤠᤜᤡᤶᤔᤥᤗᤠᤶ ᤔᤧᤸᤗ᤺ᤴᤏᤣ ᤕᤠᤃᤧᤁᤳᤋᤧᤖᤥ॥

ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤏᤡᤛᤢ

¹² ᤜᤧᤰᤁᤩᤠᤱ ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤴ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ‘ᤁᤴ ᤔᤏᤠᤜᤠ᤹ ᤋᤣ᤹ᤖᤧᤛᤧ᤹ᤀᤠᤱ ᤐᤣᤃᤧ᤹’ ᤁᤧᤔᤧᤳᤋᤠ. ᤁᤖ ᤀᤠᤱᤃᤠ᤹ᤏᤢ ᤛᤥᤖᤡᤰ ᤜᤠ᤺ᤳᤜᤠ᤺ᤳᤇᤡ ᤁᤧᤒᤠᤱᤄᤢᤛᤡ ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤔᤧᤶᤔᤧᤳᤋᤣ ᤁᤧᤃᤳᤋᤠ॥ ᤂᤧᤏᤧ᤹ ᤀᤰᤂᤣ ᤁᤧᤒᤠ᤺ᤳᤋᤢᤀᤠᤱ ᤘᤠ᤹. ‘ᤂᤧᤏᤧ᤹ᤃ ᤀᤠᤱᤃᤠ᤹ ᤁᤧᤔᤡᤱᤗᤠᤶᤒᤠᤀᤣ ᤁᤢᤛᤣ᤺ᤴ ᤏᤡᤏᤧ—ᤜᤧᤰᤁᤩᤠᤱ ᤂᤧᤏᤧ᤹ᤏᤢ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤋᤩᤧᤀᤠᤱ ᤘᤠ᤹॥’

¹³ ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ᤏᤢ ᤁᤧᤏᤡᤱᤘᤠ᤹ ᤋᤩᤧᤀᤠᤱ ᤘᤠ᤹ᤏᤧᤓᤃᤪ. ᤀᤠᤸᤗ ᤀᤠᤍᤠᤱᤒᤠᤖᤧ ᤆᤥ᤺ᤰᤔᤠ ᤁᤧᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤀᤥ᤺ᤴᤎᤠᤰᤋᤠᤱᤅᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤏᤧᤖ ᤜᤴᤏᤠᤱ ᤀᤠᤍᤠᤱᤒᤠᤖᤧ ᤁᤧᤔᤡᤰᤛᤠᤀᤥ ᤀᤠᤱᤃᤠ᤹ᤏᤢ ᤁᤧᤏᤡᤱᤘᤠ᤹ ᤋᤠᤀᤠᤱ ᤐᤳᤗ॥ ᤁᤴ ᤛᤢᤘᤠᤱᤅᤡᤴ ᤀᤠᤍᤠᤱᤒᤠᤖᤧᤴᤏᤣ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤧ᤹॥”

¹⁴ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ᤏᤢ ᤐᤣ᤺ᤰᤁᤠ. ᤂᤧᤒᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤏᤠ᤺ᤶᤛᤡᤱᤔᤠ ᤐᤡᤏᤧ॥”

¹⁵ ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤠ ᤀᤠᤱᤃᤠ᤹ᤏᤢ ᤁᤧᤶᤒᤣ᤺ᤰᤏᤧᤴᤏᤧᤓᤃᤪ ᤀᤠᤏᤡᤃᤣ ᤁᤵᤔᤥᤗᤠᤶᤒᤠ ᤂᤧᤳᤏᤠ ᤕᤠᤵᤔᤡ ᤀᤠᤴᤍᤣ᤹ᤖᤧᤴᤏᤧ᤹॥

¹⁶ ᤀᤠᤍᤠᤱᤒᤠ ᤀᤠᤏᤡᤃᤧᤏᤢ ᤁᤧᤶᤒᤣ᤺ᤰᤏᤧᤸᤗ ᤌᤠᤖᤡᤰ ᤀᤠᤱᤃᤠ᤹ ᤏᤢ ᤀᤠᤍᤠᤱᤒᤠᤖᤧ ᤁᤴ ᤁᤧᤔᤏᤠᤜᤠ᤹ᤀᤥ ᤁᤧᤏᤡᤱᤘᤠ᤹ ᤋᤩᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤀᤠᤰᤂᤣᤗ᤹ᤖᤡᤰ ᤁᤢᤛᤡᤱᤏᤡ᤺ᤵᤔᤠᤒᤣ᥅ ᤘᤣ᤹ ᤌᤧᤔᤠ ᤐᤠ᤺ᤴᤏᤡᤸᤗᤧ ᤀᤠᤱᤃᤠ᤹ ᤏᤢ ᤀᤠᤍᤠᤱᤒᤠᤖᤧ ᤁᤧᤔᤏᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤗᤠᤶ ᤘᤣ᤹ ᤐᤥ᤺ᤰᤂᤡᤃᤧᤒᤣ᥅”

¹⁷ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴᤏᤣ ᤀᤠᤱᤃᤠ᤹ ᤆᤥᤃᤢᤱ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤔᤡᤰᤛᤠᤀᤥ ᤂᤧᤏᤧ᤹ᤏᤢ ᤀᤠᤏᤡᤱᤘᤠ᤹ ᤋᤩᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤁᤧᤔᤡᤱᤗᤠᤶᤒᤠᤀᤣ ᤁᤢᤛᤡᤱ ᤏᤡ᤺ᤳᤏᤧᤀᤠᤱ ᤘᤠ᤹॥”

¹⁸ ᤔᤥᤛᤠ᤺ᤸᤗᤧ ᤔᤧᤳᤋᤢ. “ᤀᤠᤸᤗ ᤀᤠᤱᤃᤠ᤹ ᤀᤠᤍᤠᤱᤒᤠᤖᤧ ᤁᤧᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤎᤠᤰᤋᤠᤱᤅᤧ᤹॥”

¹⁹ ᤂᤢᤏᤧ᤹ ᤐᤠ᤺ᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤁᤧᤒᤣᤛᤠᤱᤅᤣ ᤀᤠᤱᤃᤠ᤹ ᤀᤠᤃᤧᤖᤧᤰ ᤏᤢᤒᤠ ᤐᤠ᤺ᤴᤜᤠ᤹ ᤀᤥ᤺ᤴᤎᤠᤰᤏᤧ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤒᤣᤛᤠᤱᤅᤣ ‘ᤕᤜᤘᤣ ᤍᤠᤱᤒᤠ’ ᤔᤡᤱᤅᤡᤴ ᤀᤢᤘᤠ ᤆᤥᤃᤢᤱ᤹॥ ᤀᤠᤳᤋᤡᤴ ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤔᤠ ᤏᤡᤱᤘᤠ᤹ ᤆᤥᤃᤢᤱ᤹ ᤀᤠᤱᤃᤠ᤹ ᤂᤧᤴ ᤗᤢᤱᤔᤠ᤹ ᤋᤢᤰᤋᤢᤱ᤹॥ ᤀᤠᤳᤋᤡᤴ ᤀᤠᤱᤃᤠ᤹ ᤏᤢᤖᤡᤰ ᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢᤱ᤹. ᤀᤠᤱᤃᤠ᤹ ᤂᤧᤴ ᤏᤢᤖᤡᤰ ᤔᤧᤳᤋᤢᤱ᤹॥”

²⁰ ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢ. “ᤁᤖ ᤀᤠᤱᤃᤠ᤹ ᤀᤠᤏᤠᤖᤠᤴ ᤀᤥᤔᤧᤵᤔᤠ ᤁᤧᤴᤇᤢᤰᤋᤢᤴ. ᤌᤣᤀᤠᤱᤓᤧᤸᤗᤧ ᤀᤠᤏᤠᤖᤠᤴ ᤀᤥᤔᤧᤔᤧᤳᤋᤢᤀᤠᤱ ᤔᤏᤠᤜᤠ᤹ ᤜᤡᤱᤔᤠ ᤔᤧᤴᤇᤢᤰᤏᤧᤴ॥”

²¹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤒᤣᤛᤠᤱ ᤗᤳᤇᤠ ᤋᤧᤴ ᤏᤧ᤹᤺. ᤀᤠᤶᤓᤠ ᤁᤴ ᤕᤠᤰᤐᤣ᤹ᤀᤥ ᤂᤧᤏᤧ᤹ ᤕᤧᤒᤧ᤹॥

²² ᤀᤠᤱᤃᤠ᤹ ᤀᤠᤔᤡᤔᤡᤍᤡᤱᤅᤡᤴ ᤂᤧᤵᤔᤥᤗᤠᤶᤒᤠ ᤐᤥᤱᤅᤠᤱ ᤐᤣ᤺ᤰᤁᤡᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤂᤧᤴ ᤕᤠᤰᤐᤣ᤹ᤀᤥᤒᤠ ᤜᤱᤃᤪᤡᤱᤒᤥ ᤕᤧᤶᤏᤧ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤵᤔᤥᤗᤠᤶ ᤐᤥᤱᤅᤠᤀᤠᤱ ᤔᤧᤴᤏᤢ᤺ᤱ ᤔᤧᤶᤓᤧ᤺ᤶᤏᤣ ᤌᤠᤖᤡᤰ ᤂᤧᤏᤧ᤹ ᤀᤠᤱᤃᤠ᤹ ᤀᤠᤜᤢᤰᤁᤡᤸᤗᤧᤀᤣ ᤋᤧᤵᤏᤧᤓᤴᤏᤧ॥

²³ ᤂᤧᤴ ᤀᤣᤃᤠᤱ ᤀᤠᤱᤃᤠ᤹ ᤀᤠᤜᤢᤰᤁᤡᤴ ᤂᤧᤳᤋᤢᤱ᤹. ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤱᤃᤠ᤹ ᤀᤠᤀᤣ᤺ᤰᤁᤧᤴ ᤁᤧᤏᤡᤛᤢ᤹. ᤁᤖ ᤀᤠᤱᤃᤠ᤹ ᤀᤠᤏᤠᤖᤠ᤺ᤱᤃ ᤁᤧᤴᤏᤡᤛᤢᤴᤗᤥ॥”