ᤗᤠᤶᤍᤡᤰ 32 - LIFOTNTᤛᤠᤶᤔᤩᤠᤱ ᤐᤡᤳᤛᤠᤳ 1 ᤀᤠᤸᤗ ᤔᤏᤠᤜᤠ᤹ᤖᤧ ᤔᤥᤛᤠᤴ ᤁᤥ᤺ᤰᤔᤠᤀᤥᤗᤠᤶᤒᤠ ᤌᤠᤛᤡᤱᤔᤠ ᤕᤢᤔᤠ ᤛᤢᤛᤧᤒᤠ ᤔᤧᤏᤡᤛᤢ. ᤂᤧᤒᤩᤠᤱ ᤂᤧᤱᤜᤠ᤹ ᤜᤠᤖᤢᤏ ᤘᤕᤧᤒᤠᤍᤧᤴᤏᤥ ᤔᤧᤈᤢᤵᤛᤧᤀᤠᤱ ᤂᤢᤏᤧ᤹ ᤀᤰᤂᤣ ᤔᤧᤵᤔᤠ ᤔᤧᤜᤣ᤺ᤰᤋᤢ. “ᤐᤥᤃᤧ᤹. ᤜᤧᤰᤁᤩᤠᤱ ᤀᤠᤏᤡᤃᤣ ᤋᤃᤡ ᤋᤃᤡ ᤐᤣ᤺ᤰᤔᤠᤖᤧ ᤗᤠᤃᤡ ᤔᤠᤱᤜᤠ᤹ ᤆᤥᤃᤧᤛᤧ᤹. ᤌᤣᤀᤠᤱᤓᤧᤸᤗᤧ ᤔᤡᤛᤪᤗᤠᤶ ᤀᤠᤏᤡᤃᤣ ᤕᤠᤵᤔᤡ ᤁᤧᤗ᤺ᤵᤐᤠ ᤁᤧᤓᤧᤵᤐᤠ ᤔᤏᤠ ᤔᤥᤛᤠᤴ ᤌᤧᤔᤠ ᤐᤥ᤺ᤰᤂᤧᤀᤡ ᤀᤠᤏᤡᤃᤣ ᤌᤣᤀᤠᤱ ᤔᤧᤏᤡᤛᤢᤶᤒᤧᤴ॥” 2 ᤜᤠᤖᤢᤏᤧᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤔᤣ᤺ᤳᤜᤠ᤹ ᤏᤢ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤏᤧᤰᤂᤥ᤹ᤀᤥ ᤔᤧᤘᤠᤖᤢᤒᤠ ᤁᤢᤴᤍᤢᤸᤗᤥᤜᤠ᤹ ᤑᤧᤴᤍᤧᤶᤔᤧ᤹ᤀᤠᤱ ᤁᤵᤔᤥ ᤋᤠᤖᤧᤶᤔᤧ᤹॥” 3 ᤂᤧᤒᤩᤠᤱ ᤂᤧᤴ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤧᤰᤂᤥ᤹ᤀᤥ ᤁᤧᤒᤵᤐᤠ ᤁᤢᤴᤍᤢᤸᤗᤥᤜᤠ᤹ ᤔᤧᤓᤧᤴᤍᤢᤀᤠᤱ ᤜᤠᤖᤢᤏᤧᤴ ᤔᤧᤒᤡᤖᤢ॥ 4 ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤋᤠ᤺ᤰᤋᤢᤀᤠᤱ ᤕᤥ᤺ᤴᤍᤢ ᤜᤧᤰᤁᤩᤠᤱ ᤛᤠᤷᤍᤠᤶᤔᤡᤸᤗᤧ ᤕᤳᤋᤢᤀᤠᤱ ᤗᤳᤇᤠ ᤐᤡᤳᤛᤠᤳ ᤜᤧᤰᤋᤱᤒᤠ ᤏᤠᤘᤠᤀᤡᤳᤗᤠ ᤆᤥᤃᤢ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤡᤛᤪᤠᤀᤡᤗᤡᤛᤣ. ᤔᤡᤛᤪᤗᤠᤶᤒᤠ ᤂᤡᤏᤡ᤹ ᤁᤧᤗ᤺ᤵᤐᤠ ᤁᤧᤓᤧᤵᤐᤠ ᤂᤡᤏᤡ᤹ ᤔᤠᤱᤅᤡᤴ ᤁᤴᤏᤣᤖᤥ॥” 5 ᤁᤴ ᤏᤡᤛᤢᤀᤠᤱ ᤜᤠᤖᤢᤏᤧᤸᤗᤧ ᤐᤡᤳᤛᤠᤳᤋᤡᤸᤗᤧ ᤁᤢᤍᤃᤠᤱ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤆᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤀᤠᤱ ᤀᤡᤱᤓᤴ ᤆᤥᤃᤢ. “ᤋᤠ᤺ᤴᤍᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤗᤳᤇᤠ ᤋᤱᤏᤠᤶ ᤐᤥᤱ᤹॥” 6 ᤁᤢᤍᤠ᤺ᤴᤍᤡᤰᤔᤠ ᤔᤏᤠᤜᤠ᤹ ᤋᤠᤏᤠᤶᤛᤠ ᤔᤧᤒᤥᤃᤧᤀᤠᤱ ᤌᤰᤛᤠᤜᤠ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤏᤢ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤔᤧᤍᤥᤴᤍᤢᤛᤡ. ᤂᤧᤱᤜᤠ᤹ ᤁᤢᤈᤠ ᤆᤠᤔᤠᤖᤧ ᤗᤠᤃᤡ ᤔᤧᤕᤢᤱᤛᤡᤱ. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤛᤥᤛᤥᤳᤗᤖᤠᤱ ᤆᤥ᤺ᤰᤔᤠ ᤔᤧᤜᤣ᤺ᤰᤋᤧ॥ 7 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤕᤥ ᤌᤠᤛᤡᤱᤅᤧ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤔᤡᤛᤪᤗᤠᤶ ᤁᤧᤗ᤺ᤳᤋᤢ ᤁᤧᤓᤧᤳᤋᤢᤛᤡᤒᤠ ᤂᤧᤏᤧ᤹ ᤁᤧᤔᤏᤠᤜᤠ᤹ ᤂᤢᤴᤇᤡ᤹ ᤀᤠᤒᤠᤅᤣ ᤗᤠᤕᤥ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢᤀᤠᤱ ᤛᤠ᤹ᤖᤡᤰ ᤑᤧᤳᤔᤧᤗᤠ᤹ᤖᤧ ᤔᤧᤛᤩᤧᤀᤠᤱ ᤔᤧᤕᤠᤰ॥ 8 ᤀᤠᤱᤃᤠ᤹ ᤂᤧᤱᤜᤠ᤹ ᤀᤠᤳᤋᤡᤴ ᤗᤠᤶᤔᤥ ᤗᤠᤱᤄᤣ᤺ᤰᤔᤠ ᤀᤡᤱᤈᤠᤱ ᤐᤡᤖᤢᤱᤛᤡᤱᤅᤠᤱ ᤘᤕᤧ. ᤂᤧᤱᤜᤠ᤹ᤖᤧ ᤂᤧᤴ ᤗᤠᤶᤔᤡᤴ ᤛᤠ᤹ᤖᤡᤰ ᤜᤠᤖᤠ ᤔᤧᤗᤧᤖᤢᤀᤠᤱ ᤌᤡᤰᤏᤠᤜᤠᤱ ᤔᤧᤒᤣᤀᤠᤱ ᤔᤧᤘᤠ᤹॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤛᤠᤶᤔᤩᤠᤱᤅᤡᤴ ᤔᤧᤕᤥᤴᤍᤢᤀᤠᤱ ᤐᤡᤳᤛᤠᤳᤋᤡᤸᤗᤧ ᤁᤢᤈᤀᤡ᤺ᤳᤋᤥ ᤏᤠᤘᤠᤀᤡᤳᤗᤠ ᤔᤧᤎᤃᤢ ᤜᤧᤰᤁᤩᤠᤱ ᤂᤧᤴ ᤔᤠᤱᤛᤧᤘᤠ ᤔᤧᤔᤧᤳᤋᤢᤀᤠᤱ ᤔᤧᤘᤠ. ᤂᤧᤒᤩᤠᤱ ᤂᤧᤸᤗᤧᤀᤣ ᤁᤢᤗᤠᤃᤡ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢᤀᤠᤱ ᤔᤧᤘᤠ᤹. ‘ᤀᤡᤛᤪᤠᤀᤡᤗᤡᤛᤣ. ᤔᤡᤛᤪᤗᤠᤶ ᤂᤡᤏᤡ᤹ ᤁᤧᤗ᤺ᤵᤐᤠ ᤁᤧᤓᤧᤵᤐᤠ ᤂᤡᤏᤡ᤹ ᤔᤠᤱᤅᤡᤴ ᤀᤠᤶᤓᤠ ᤁᤴᤗᤥ॥’” 9 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤠᤱᤃᤠ᤹ ᤁᤴ ᤔᤏᤠᤜᤠ᤹ ᤏᤡᤛᤢᤱᤛᤡᤱ॥ ᤁᤴᤜᤠ᤹ᤃ ᤀᤠᤎᤡᤱᤃᤠᤏᤡ ᤔᤏᤠᤛᤡᤖᤧᤳᤇ॥ 10 ᤀᤠᤸᤗ ᤀᤠᤱᤃᤠ᤹ ᤔᤧᤎᤣ᤺ᤰᤋᤠᤱᤅᤡᤴᤏᤧ᤹. ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤴ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤆᤢᤰᤗ॥ ᤀᤠᤱᤃᤠ᤹ ᤁᤴᤜᤠ᤹ ᤂᤠᤵᤐᤢᤌᤩ᤺ᤱ ᤋᤣᤛᤢᤱᤛᤡᤱ᤹॥ ᤂᤶᤓᤩᤠᤱ ᤂᤧᤏᤧ᤹ ᤗᤠᤶᤒᤠᤀᤣ ᤗᤳᤇᤠ ᤕᤶᤒᤠ ᤔᤧᤴᤇᤠᤶ ᤛᤢᤘᤠᤱ ᤆᤥᤃᤢᤱᤛᤡᤱ᤹॥” 11 ᤁᤖ ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤠ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤑᤠᤰᤋᤢᤀᤠᤱ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤕᤶᤒᤠ ᤁᤧᤔᤢᤰᤛᤠᤶ ᤏᤢ ᤔᤢᤰᤛᤠᤶᤛᤠᤒᤠ ᤁᤧᤜᤢᤰᤁᤡᤸᤗᤧ ᤔᤡᤛᤪᤗᤠᤶ ᤁᤧᤗ᤺ᤳᤋᤢ ᤁᤧᤓᤧᤳᤋᤢᤛᤡᤒᤠ ᤁᤧᤔᤏᤠᤜᤠ᤹ᤏᤢ ᤂᤧᤏᤧ᤹ ᤌᤣᤀᤠᤱ ᤁᤶᤔᤩᤠᤰ ᤛᤠ᤹ᤖᤡᤰ ᤁᤧᤛᤠᤰᤁᤧᤴᤏᤡᤸᤗᤧ ᤔᤡ ᤁᤧᤒᤥᤱᤒᤠᤒᤣ᥅ 12 ᤔᤡᤛᤪᤒᤠ ᤔᤏᤠᤜᤠ᤹ᤖᤧ ᤌᤣᤀᤠᤱ ᤀᤰᤂᤣ ᤐᤠ᤺ᤵᤔᤠ ᤗᤠᤶ ᤔᤧᤄᤥᤛᤢᤖ ᤐᤥᤱᤒᤠᤒᤣ᥅ ‘ᤋᤠᤵᤑᤧ᤺ᤶᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤁᤥ᤺ᤰᤔᤠᤜᤠ᤹ᤀᤥ ᤂᤧᤱᤜᤠ᤹ ᤛᤧᤳᤇᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤔᤧᤱᤛᤧ ᤂᤢᤏᤧ᤹ ᤂᤧᤱᤜᤠ᤹ ᤋᤣ᤹ᤖᤢᤛᤡ॥’ ᤀᤠᤍᤠᤱᤒᤠᤖᤧ ᤛᤠ᤹ᤖᤡᤰ ᤁᤧᤛᤡᤰ ᤐᤥ᤺ᤰᤔᤠᤴ ᤆᤡ᤺ᤰᤋᤢᤖ ᤆᤥᤃᤧ᤹. ᤂᤧᤒᤩᤠᤱ ᤀᤠᤒᤠᤅᤣ ᤁᤧᤔᤏᤠᤜᤠ᤹ ᤜᤠᤴᤋᤡ ᤆᤥ᤺ᤰᤔᤠᤛᤡᤗᤠᤶ ᤂᤧᤏᤧ᤹ ᤁᤧᤏᤡᤱᤘᤠᤴ ᤏᤢ᤺ᤰᤋᤧ᤹॥ 13 ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤛᤧ᤹ᤀᤥ. ᤂᤧᤱᤜᤠ᤹ᤏᤢ ᤀᤠᤍᤠᤱᤒᤠᤖᤧ ᤀᤠᤒᤠᤅᤣ ᤁᤧᤔᤡᤱᤅᤥ ᤔᤠᤱᤜᤢᤵ ᤁᤧᤈᤥᤃᤢ ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤀᤰᤂᤣ ᤁᤧᤒᤠ᤺ᤳᤋᤢᤀᤠᤱ ᤘᤕᤧ. ‘ᤀᤠᤱᤃᤠ᤹ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤋᤠᤱᤛᤠᤱᤒᤥᤒᤠ ᤂᤣ᤺ᤶᤛᤡᤰᤐᤠᤜᤠ᤹ ᤁᤢᤀᤡᤛᤡᤰ ᤕᤖᤡᤰ ᤆᤥᤃᤢᤱᤛᤡᤱ᤹॥ ᤀᤠᤱᤃᤠ᤹ ᤔᤠᤱᤜᤢᤵ ᤆᤥᤃᤢᤱᤒᤠ ᤁᤴ ᤁᤧᤖᤧᤰ ᤗᤠᤈᤣᤴ ᤂᤡᤏᤡ᤹ ᤌᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ ᤐᤡᤖᤢᤱᤛᤡᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤓᤧᤸᤗᤧ ᤀᤠᤓᤧᤸᤗᤧ ᤌᤠᤖᤡᤰᤛᤠᤱ ᤂᤧᤴ ᤗᤠᤈᤣ᤺ᤸᤗᤧ ᤗᤠᤃᤡ ᤗᤰᤁᤧᤄᤥᤒᤠ ᤔᤧᤒᤥᤱ᤹॥’” 14 ᤂᤧᤒᤩᤠᤱ ᤂᤢᤏᤧ᤹ ᤀᤠᤒᤠᤅᤣ ᤁᤢᤔᤏᤠᤜᤠ᤹ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤜᤧᤰᤁᤣ ᤜᤠᤴᤋᤡ ᤆᤥ᤺ᤰᤔᤠᤛᤡᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤘᤠ᤹ ᤏᤢ᤺ᤰᤋᤢ॥ 15 ᤜᤧᤰᤁᤩᤠᤱ ᤔᤥᤛᤠᤴ ᤏᤢ᤺ᤰᤂᤧᤀᤠᤱ ᤀᤡᤱᤈᤠᤱᤜᤠ᤹ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤏᤧᤵᤔᤠᤱ ᤛᤠᤵᤗᤢᤱᤜᤠ᤹ ᤂᤢᤏᤧ᤹ ᤁᤢᤜᤢᤰᤁᤥ ᤕᤠᤱᤛᤡᤱᤅᤠᤱ ᤁᤥ᤺ᤰᤔᤠᤀᤥᤗᤠᤶ ᤌᤠᤛᤡᤱ ᤕᤧ॥ ᤂᤧᤴ ᤛᤠᤵᤗᤢᤱᤜᤠ᤹ᤀᤥ ᤋᤃᤠᤱ ᤏᤢ ᤀᤣᤃᤠᤱ ᤏᤧᤵᤔᤠᤱ ᤗᤧᤵᤔᤠᤱ ᤛᤠᤵᤔᤏᤠᤒᤠ ᤐᤳᤇᤧ॥ 16 ᤂᤧᤴ ᤛᤠᤵᤗᤢᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰ ᤘᤕᤧ॥ ᤂᤧᤴ ᤛᤠᤵᤗᤢᤱᤅᤥ ᤁᤧᤒᤵᤐᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤰᤋᤢᤀᤠᤱ ᤛᤠᤵᤋᤢᤀᤠᤱ ᤐᤳᤇᤧ॥ 17 ᤕᤜᤥᤛᤢ᤺ᤸᤗᤧ ᤔᤏᤠᤜᤠ᤹ ᤔᤧᤓᤡ᤺ᤰᤋᤧᤒᤠ ᤂᤧᤵᤛᤢᤀᤠᤱ ᤔᤥᤛᤠᤴ ᤔᤧᤳᤋᤢ. “ᤛᤠ᤺ᤱᤃᤠᤜᤡᤶᤔᤥᤃ ᤋᤧᤱᤎᤱᤅᤥᤒᤠ ᤜᤕᤱ ᤁᤡᤸᤗᤡᤱ ᤜᤧᤰᤋᤱᤒᤠ ᤀᤡᤰᤗᤠᤏᤡ ᤂᤧᤶᤍᤧᤳᤗ ᤐᤳ॥” 18 ᤔᤥᤛᤠ᤺ᤸᤗᤧ ᤔᤧᤳᤋᤢ. “ᤁᤴ ᤀᤡᤰᤗᤠᤴ ᤁᤧᤏᤠ᤺ᤶᤒᤠᤜᤠ᤹ᤖᤧᤴᤏᤠᤱ ᤔᤣ᤺ᤴᤗᤥ. ᤜᤠᤖᤡ ᤁᤧᤍᤠᤒᤠᤜᤠ᤹ᤖᤧᤴᤏᤠᤱ ᤔᤣ᤺ᤴᤗᤥ. ᤁᤖ ᤀᤠᤱᤃᤠ᤹ᤃ ᤛᤠᤶᤃᤧᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤰᤗᤠᤴ ᤂᤧᤵᤛᤢᤱᤗ ᤐᤳᤋᤠᤖᤥ॥” 19 ᤛᤠ᤺ᤱᤃᤠᤜᤡᤶᤔᤥ ᤁᤧᤖᤧ ᤋᤩᤧᤀᤠᤱ ᤐᤳᤇᤧᤖ ᤔᤥᤛᤠ᤺ᤸᤗᤧ ᤐᤡᤳᤛᤠ᤺ᤳᤋᤡᤴ ᤏᤢ ᤔᤏᤠᤜᤠ᤹ ᤔᤧᤗᤠ᤺ᤰᤂᤧᤖ ᤔᤧᤕᤠᤃᤧᤒᤠ ᤏᤡᤛᤢᤛᤡ॥ ᤔᤥᤛᤠᤴ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤛᤠᤵᤗᤢᤱᤜᤠ᤹ ᤂᤢᤏᤧ᤹ ᤀᤠᤒᤠᤅᤣ ᤁᤢᤜᤢᤰᤁᤡᤸᤗᤧ ᤁᤥ᤺ᤰᤔᤠᤸᤗᤧ ᤁᤢᤒᤢᤱᤔᤥ ᤗᤠᤵᤑᤣᤛᤢᤀᤠᤱ ᤑᤕ᤺ᤵ ᤕ᤺ᤵᤛᤢᤍᤣᤛᤢ॥ 20 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤧᤴ ᤐᤡᤳᤛᤠᤳᤋᤡᤴ ᤋᤣ᤹ᤖᤢᤀᤠᤱ ᤂᤢᤏᤧ᤹ ᤔᤡᤀᤥ ᤔᤡᤎᤡᤰᤂᤢᤍᤣᤛᤢ. ᤜᤧᤰᤁᤩᤠᤱ ᤂᤧᤴ ᤕ᤺ᤵᤛᤢᤀᤠᤱ ᤁᤢᤶᤈᤡᤰᤔᤠ ᤆᤥᤃᤢᤀᤠᤱ ᤆᤫᤠ᤺ᤳᤋᤥ ᤛᤧᤛᤢᤁᤣ᤺ᤳᤋᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤂᤧᤴ ᤌᤢᤱᤔᤠ ᤐᤠᤱᤄᤢᤛᤡ॥ 21 ᤂᤧᤴ ᤀᤣᤃᤠᤱ ᤔᤥᤛᤠ᤺ᤸᤗᤧ ᤜᤠᤖᤢᤏᤧᤴ ᤔᤧᤳᤋᤢ. “ᤁᤴ ᤔᤏᤠᤜᤠ᤹ᤖᤧ ᤀᤠᤍᤠᤱᤒᤠ ᤌᤧᤔᤠ ᤁᤧᤶᤔᤧᤳᤋᤧᤀᤠᤱ ᤀᤠᤍᤠᤱᤒᤠᤖᤧ ᤁᤴᤜᤠ᤹ ᤁᤶᤔᤩᤠᤰ ᤕᤶᤒᤠ ᤗᤠᤕᤥᤀᤥ ᤁᤧᤎᤠᤛᤢᤛᤡᤒᤣ᥅” 22 ᤜᤠᤖᤢᤏᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ᤏᤢ ᤀᤠᤍᤠᤱᤒᤠᤖᤧ ᤁᤧᤕᤠ᤺ᤰ ᤔᤧᤗᤧ᤹ᤖᤧᤴᤏᤧ᤹॥ ᤀᤠᤍᤠᤱᤒᤠᤖᤧᤃ ᤁᤴ ᤔᤏᤠᤜᤠ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤛᤡᤀᤠᤱᤅᤣ ᤁᤧᤘᤠ᤹॥ ᤁᤴᤜᤠ᤹ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤐᤠᤴ ᤗᤧᤵᤔᤠᤱ ᤔᤧᤗᤠᤛᤧᤀᤠᤱ ᤔᤧᤘᤠ᤹॥ 23 ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤰᤂᤣ ᤔᤧᤔᤧᤳᤋᤠᤱ. ‘ᤀᤠᤏᤡᤃᤣ ᤗᤠᤃᤡ ᤀᤠᤏᤡᤃᤣ ᤋᤃᤡᤋᤃᤡ ᤁᤧᤒᤣ᤺ᤰᤐᤠ ᤔᤠᤱᤜᤠ᤹ ᤆᤥᤃᤧᤛᤧ᤹. ᤌᤣᤀᤠᤱᤓᤧᤸᤗᤧ ᤔᤡᤛᤪᤗᤠᤶ ᤀᤠᤏᤡᤃᤣ ᤕᤠᤵᤔᤡ ᤁᤧᤗ᤺ᤵᤐᤠ ᤁᤧᤓᤧᤵᤐᤠ ᤔᤏᤠ ᤔᤥᤛᤠᤴ ᤌᤧᤔᤠ ᤐᤥ᤺ᤰᤂᤧᤀᤡ ᤀᤠᤏᤡᤃᤣ ᤔᤧᤏᤡᤛᤢᤶᤒᤧᤴ॥’ 24 ᤂᤧᤒᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤳᤋᤢᤱᤛᤡᤱ. ‘ᤀᤠᤳᤋᤡᤴ ᤀᤠᤳᤋᤡᤴᤜᤠ᤹ᤖᤧ ᤛᤠᤶᤔᤩᤠᤱ ᤘᤠ᤺ᤳᤋᤡᤜᤠ᤹ ᤁᤧᤃᤳᤋᤢᤶ. ᤂᤧᤴ ᤘᤠ᤺ᤳᤋᤡᤜᤠ᤹ ᤑᤧᤴᤍᤧᤶᤔᤧ᤹ᤀᤠᤱ ᤀᤠᤱᤃᤠ᤹ᤀᤥ ᤋᤠᤖᤧᤶᤔᤧ᤹॥’ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤛᤠᤶᤔᤩᤠᤱ ᤔᤧᤒᤡᤖᤠᤱ॥ ᤀᤠᤱᤃᤠ᤹ ᤔᤡᤀᤥ ᤁᤣ᤺ᤳᤋᤢᤱ. ᤜᤧᤰᤁᤩᤠᤱ ᤂᤧᤴ ᤐᤡᤳᤛᤠᤳᤋᤡᤴ ᤗ᤺ᤴᤍᤧ᥄” 25 ᤔᤥᤛᤠ᤺ᤸᤗᤧ ᤔᤏᤠᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ ᤐᤠ᤺ᤳᤐᤠ᤺ᤳ ᤁᤧᤈᤥ᤺ᤰᤐᤠ ᤔᤧᤒᤥ᤺ᤰᤂᤧ ᤔᤧᤈᤢᤖᤧᤒᤠ ᤏᤡᤛᤢᤛᤡ. ᤌᤣᤀᤠᤱᤓᤧᤸᤗᤧ ᤜᤠᤖᤢᤏᤧᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ ᤐᤠ᤺ᤳᤐᤠ᤺ᤳ ᤁᤧᤈᤥ᤺ᤰᤐᤠ ᤔᤧᤒᤥ᤺ᤰᤂᤧᤖ ᤕᤠ᤺ᤴᤍᤢᤛᤡᤀᤠᤱ ᤘᤕᤧ. ᤂᤧᤱᤜᤠ᤹ ᤂᤢᤏᤡ᤹ ᤀᤠᤒᤠᤅᤣ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤀᤣ ᤀᤣ᤺ᤳᤗᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤕᤧ॥ 26 ᤂᤧᤒᤩᤠᤱ ᤔᤥᤛᤠᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤥ ᤕᤧᤶᤛᤡᤱᤅᤠᤱ ᤐᤠ᤺ᤳᤋᤢ. “ᤀᤠᤳᤋᤡᤴ ᤀᤠᤳᤋᤡᤴᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤔᤧᤘᤠ᤹. ᤂᤧᤱᤜᤠ᤹ ᤀᤠᤱᤃᤠ᤹ᤀᤥ ᤁᤳᤏᤠ ᤔᤧᤓᤧᤴᤗ᥄” ᤜᤧᤰᤁᤩᤠᤱ ᤗᤧᤒᤡ᤺ᤸᤗᤧ ᤁᤧᤖᤧᤰ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤂᤢᤏᤧ᤹ᤀᤥ ᤔᤧᤓᤧᤖᤧᤀᤠᤱ ᤔᤧᤈᤢᤵᤛᤧ॥ 27 ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤂᤡᤏᤡ᤹ ᤁᤧᤖᤧᤰᤗᤧ ᤀᤠᤒᤠᤅᤣ ᤋᤠᤓᤣᤜᤠ᤹ ᤜᤣ᤹ᤀᤠᤛᤡᤶᤔᤧ᤹ ᤜᤧᤰᤁᤩᤠᤱ ᤛᤠ᤺ᤱᤃᤠᤜᤡᤶᤔᤥᤒᤠ ᤁᤳᤏᤠᤛᤔᤠ ᤁᤢᤕᤠᤀᤥᤏᤢ ᤏᤠᤛᤔᤠ ᤁᤢᤕᤠᤀᤥᤒᤠ ᤗᤠᤶᤎᤣ᤺ᤳᤋᤥ ᤐᤣᤃᤧᤶᤔᤧ᤹ᤀᤠᤱ ᤁᤧᤖᤧᤰᤗᤧ ᤀᤠᤒᤠᤅᤣ ᤑᤢ᤹ᤏᤢᤛᤠ᤹ ᤜᤧᤰᤁᤩᤠᤱ ᤆᤢᤶᤍᤣᤱ ᤏᤢ ᤀᤠᤒᤠᤅᤣ ᤜᤡᤶᤒᤣᤛᤠᤱᤒᤠᤜᤠ᤹ ᤛᤧᤖᤧᤶᤛᤡᤶᤔᤧ᤹॥’” 28 ᤂᤧᤒᤩᤠᤱ ᤗᤧᤒᤡ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤔᤥᤛᤠ᤺ᤸᤗᤧ ᤔᤧᤳᤋᤢᤛᤡᤒᤠ ᤁᤢᤀᤡᤛᤡᤰ ᤔᤧᤈᤥᤃᤢ॥ ᤂᤧᤸᤗᤧ ᤕᤠ᤺ᤴᤍᤡᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᥉.᥆᥆᥆ ᤕᤠᤖᤡᤰ ᤕᤧᤶᤒᤡᤳᤇᤠᤜᤠ᤹ ᤔᤧᤛᤧᤖᤢᤛᤡ॥ 29 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤔᤧᤳᤋᤢᤛᤡ. “ᤀᤠᤀᤡᤴ ᤂᤡᤏᤡ᤹ ᤀᤠᤒᤠᤅᤣ ᤛᤠᤜᤠ᤹ ᤏᤢ ᤑᤢ᤹ᤏᤢᤛᤠᤜᤠ᤹ ᤔᤧᤱᤔᤏᤠᤛᤡ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤂᤡᤏᤡ᤹ ᤗᤠ᤺ᤳᤗᤠ᤺ᤳ ᤛᤧᤶᤔᤏᤠᤏᤡᤱᤅᤠᤱ ᤁᤧᤘᤕᤡ॥ ᤀᤠᤀᤡᤴ ᤂᤢᤏᤧ᤹ ᤂᤡᤏᤡ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤡᤀᤠᤱ ᤘᤠ᤹॥” 30 ᤁᤢᤍᤠ᤺ᤴᤍᤡᤰᤔᤠ ᤔᤥᤛᤠ᤺ᤸᤗᤧ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤕᤶᤒᤠ ᤗᤠᤕᤥ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ॥ ᤁᤖ ᤀᤠᤸᤗ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤥ ᤌᤥ᤺ᤰᤛᤡᤱᤅᤠᤀᤠᤱ ᤐᤣ᤺ᤰᤁᤠ॥ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤏᤠᤍᤱ ᤆᤥ᤺ᤰᤛᤧ ᤂᤡᤏᤡ᤹ ᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤐᤡᤔᤠ ᤛᤢᤰᤋᤢᤱᤒᤡ ᤜᤠᤃ॥” 31 ᤜᤧᤰᤁᤩᤠᤱ ᤔᤥᤛᤠᤴ ᤕᤜᤘᤣ ᤍᤠᤱᤒᤠᤀᤥ ᤏᤢ᤺ᤰᤂᤧ ᤐᤣᤀᤠᤱ ᤀᤰᤂᤣ ᤔᤧᤳᤋᤢ. “ᤆᤡ᤺ᤳᤋᤧᤛᤩᤧᤖᤥ᥄ ᤁᤴ ᤔᤏᤠᤜᤠ᤹ᤖᤧ ᤀᤠᤰᤋᤱᤒᤠ ᤕᤶᤒᤠ ᤗᤠᤕᤥᤏᤡ ᤔᤧᤈᤥᤃᤢᤀᤠᤱ ᤔᤧᤘᤠ᤹ᤒᤣ᥄ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤛᤠᤶᤔᤩᤠᤱᤗᤠᤶ ᤔᤠᤱ ᤔᤧᤈᤥᤃᤢᤀᤠᤱ ᤘᤠ᤹॥ 32 ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤗᤠᤕᤥᤗᤠᤶ ᤗᤧᤵᤔᤡ ᤐᤡᤖᤧᤛᤧ᤹ᤀᤥ—ᤔᤣ᤺ᤴᤏᤧᤓᤃᤪ. ᤂᤧᤏᤧ᤹ ᤁᤧᤛᤠᤵᤋᤢᤒᤠ ᤛᤠᤵᤐᤴᤏᤥᤗᤠᤶᤒᤠ ᤀᤠᤱᤃᤠ᤹ ᤀᤠᤔᤡᤱ ᤀᤠᤕᤥ᤺ᤰᤁᤣ ᤔᤠᤛᤠᤱ ᤐᤡᤖᤠᤱᤅᤧ᤹ᤀᤥ॥” 33 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤠᤳᤋᤡᤸᤗᤧ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤀᤠᤱ ᤘᤠ᤹. ᤂᤧᤴᤏᤣ ᤀᤠᤱᤃᤠ᤹ ᤀᤠᤛᤠᤵᤐᤴᤏᤥ ᤁᤢᤔᤡᤱ ᤔᤠᤛᤢᤱ ᤐᤡᤖᤢᤱ᤹॥ 34 ᤀᤠᤸᤗ ᤂᤧᤏᤧ᤹ ᤐᤣᤃᤧ᤹. ᤀᤠᤱᤃᤠ᤹ ᤂᤧᤏᤧ᤹ ᤔᤧᤳᤏᤧᤒᤠ ᤋᤧᤴᤏᤥ ᤔᤏᤠᤜᤠ᤹ ᤗᤠᤶᤗᤥᤛᤧ ᤋᤣ᤹ᤖᤧᤛᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤀᤡᤱᤄᤱᤛᤠᤒᤧᤴ ᤂᤧᤏᤧ᤹ ᤁᤧᤍᤃᤡ ᤁᤧᤍᤃᤡ ᤐᤣᤰ. ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡ ᤕᤧᤶ ᤋᤠᤀᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤸᤗᤧ ᤁᤢᤗᤧᤰᤘᤠ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹॥” 35 ᤜᤧᤰᤁᤩᤠᤱ ᤜᤠᤖᤢᤏᤧᤸᤗᤧ ᤆᤥᤃᤢᤒᤠ ᤐᤡᤳᤛᤠᤳᤋᤡᤴ ᤂᤧᤱᤜᤠ᤹ᤖᤧ ᤛᤧᤘᤠ ᤔᤧᤔᤧᤳᤋᤢᤒᤧᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤔᤏᤠᤜᤠ᤹ ᤔᤠᤱᤍᤢᤰᤔᤠᤸᤗᤧ ᤛᤩᤧᤖᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.