ᤗᤠᤶᤍᤡᤰ 30 - LIFOTNTᤛᤢᤰᤐᤠ ᤜᤠ᤺ᤶᤔᤠᤍᤧᤴ 1 “ᤂᤧᤏᤧ᤹ ᤛᤢᤰᤐᤠ ᤜᤠ᤺ᤶᤔᤠᤖᤧ ᤗᤠᤃᤡ ᤒᤒᤢᤗ ᤛᤡᤱᤅᤡᤸᤗᤧᤴ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤆᤥᤃᤧ᤹॥ 2 ᤂᤧᤸᤗᤧ ᤁᤢᤗᤠᤶᤋᤡ᤺ᤴ ᤜᤢᤰᤛᤡᤰᤌᤡᤰ ᤏᤢ ᤂᤧᤸᤗᤧ ᤁᤢᤓᤧᤖᤧᤴ ᤜᤢᤰᤛᤡᤰᤌᤡᤰ ᤐᤥᤱᤗ॥ ᤂᤧᤴ ᤗᤡᤛᤡ ᤁᤢᤛᤢᤰᤐᤠ ᤁᤧᤒᤵᤐᤠ ᤐᤥᤱᤔᤠ ᤐᤥᤱ᤹. ᤜᤧᤰᤁᤩᤠᤱ ᤁᤢᤗᤡᤱᤃᤧᤴᤏᤡᤴ ᤜᤢᤰᤛᤡᤰ ᤏᤧᤳᤇᤡ ᤁᤧᤒᤵᤐᤠ ᤐᤥᤱᤔᤠ ᤐᤥᤱ᤹॥ ᤂᤧᤸᤗᤧ ᤁᤢᤍᤠᤱᤜᤠ᤹ ᤜᤠᤒᤠ ᤂᤧᤴ ᤗᤳᤇᤠ ᤛᤡᤱᤅᤡᤸᤗᤧ ᤁᤢᤀᤠ᤺ᤳᤋᤥᤒᤠ ᤛᤡᤱᤅᤡᤸᤗᤧᤴ ᤐᤥᤱᤗ॥ 3 ᤂᤧᤸᤗᤧ ᤌᤠ᤺ᤱ ᤗᤧᤵᤔᤠᤱᤒᤠᤴ ᤏᤢ ᤗᤡᤛᤡ ᤐᤡᤛᤠᤱᤒᤠ ᤁᤢᤕᤠᤶᤗᤧᤱᤒᤠᤜᤠ᤹ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤁᤢᤍᤠᤱᤜᤠ᤹ᤀᤠᤱ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤧ᤹. ᤂᤧᤒᤩᤠᤱ ᤂᤧᤸᤗᤧ ᤗᤠᤃᤡ ᤁᤒᤪᤡᤱ ᤐᤡᤛᤠᤱ ᤛᤠᤶᤔᤩᤠᤱ ᤁᤢᤃ᤺ᤱᤃᤩᤠ ᤌᤡᤰ ᤆᤥᤃᤧ᤹॥ 4 ᤂᤧᤴ ᤁᤢᤃ᤺ᤱᤃᤩᤠ᤺ᤸᤗᤧ ᤁᤢᤛᤡᤃᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤏᤧᤵᤔᤠᤱ ᤁᤢᤕᤠᤶᤗᤧᤱᤒᤥ ᤏᤧᤳᤇᤡ ᤛᤠᤶᤔᤩᤠᤱ ᤁᤢᤴᤍᤢᤸᤗᤥ ᤆᤥᤃᤧ᤹ ᤜᤧᤰᤁᤩᤠᤱ ᤂᤧᤴ ᤏᤧᤵᤔᤠᤱ ᤗᤧᤵᤔᤠᤱ ᤑᤳᤇᤧ᤹. ᤂᤧᤒᤩᤠᤱ ᤂᤧᤴ ᤁᤢᤴᤍᤢᤸᤗᤥᤜᤠ᤹ ᤁᤢᤒᤱᤔᤠ ᤋᤰᤗᤠᤱᤜᤠ᤹ᤖᤧ ᤗᤠᤃᤡ ᤁᤢᤗᤡ᤺ᤱᤔᤠᤍᤧᤴ ᤐᤥᤱᤗ॥ 5 ᤋᤰᤗᤠᤱᤜᤠ᤹ ᤒᤒᤢᤗ ᤛᤡᤱᤅᤡᤸᤗᤧᤴ ᤆᤥᤃᤧ᤹ᤀᤠᤱ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤧ᤹॥ 6 ᤁᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤍᤃᤠᤱ ᤗᤧᤵᤔᤠᤱ ᤁᤧᤒᤵᤐᤠ ᤑᤥ᤺ᤴᤍᤠ᤺ᤸᤗᤧ ᤁᤢᤍᤃᤠᤱ ᤗᤠ᤺ᤰᤁᤠᤳ ᤕᤢᤰᤂᤧ᤹॥ ᤋᤥ᤺ᤴᤍᤡ ᤐᤡᤔᤠ ᤛᤠᤵᤗᤢᤱ ᤁᤧᤕᤠᤰᤐᤠ ᤁᤢᤍᤧᤵᤑᤣ᤺ᤸᤗᤧ ᤁᤢᤛᤶᤎᤠᤱ ᤕᤢᤰᤂᤧ᤹. ᤂᤧᤵᤔᤥ ᤀᤠᤱᤃᤠ᤹ ᤂᤧᤏᤧ᤹ ᤋᤢᤶᤏᤧ॥ 7 “ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤜᤠᤖᤢᤏᤧᤸᤗᤧ ᤋᤠᤏᤠᤶ ᤌᤵᤔᤣ ᤛᤣᤔᤡᤜᤠ᤹ ᤋᤥ᤺ᤰᤋᤢᤸᤗᤧ ᤁᤢᤏᤠᤶᤃᤧᤏᤢ᤹ᤒᤠ ᤔᤠᤖᤢᤰ ᤛᤢᤰᤐᤠ ᤜᤠ᤺ᤴᤍᤢᤖ ᤐᤥᤱ᤹॥ 8 ᤕᤠᤶᤔᤥ ᤕᤢ᤺ᤴᤇᤡᤰ ᤜᤠᤖᤢᤏᤖᤧ ᤛᤣᤔᤡ ᤜᤠ᤺ᤴᤍᤢᤸᤗᤧ ᤂᤧᤴ ᤛᤢᤰᤐᤠᤴ ᤜᤠ᤺ᤴᤍᤢᤖ॥ ᤁᤶᤓᤗ᤹ᤖᤡᤰ ᤁᤧᤍᤠᤒᤠ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤴ ᤆᤰᤔᤧᤸᤗ᤹ᤀᤣ ᤁᤧᤜᤠ᤹ᤒᤠᤀᤠᤱ ᤁᤧᤕᤢᤱᤒᤠ ᤛᤢᤰᤐᤠ ᤐᤥᤱ᤹॥ 9 ᤂᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤂᤧᤏᤧ᤹ ᤘᤣ᤹ ᤐᤖᤡᤰᤐᤠ ᤛᤢᤰᤐᤠ. ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ. ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤔᤧᤍᤥ᤺ᤴᤍᤧᤴᤏᤧ᤹. ᤜᤧᤰᤁᤩᤠᤱ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠᤀᤠᤱ ᤔᤧᤍᤥ᤺ᤴᤍᤧᤴᤏᤧ᤹॥ 10 ᤋᤱᤒᤣᤖᤧ ᤌᤡᤰᤗᤧᤱ ᤜᤠᤖᤢᤏᤧᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤔᤠᤰᤂᤡᤴ ᤂᤧᤵᤔᤥᤒᤠ ᤁᤢᤍᤠᤱᤜᤠ᤹ᤀᤥ ᤜᤢ᤺ᤳᤋᤢ᤹ ᤜᤧᤰᤁᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤛᤢᤳᤌᤥ ᤆᤥ᤺ᤰᤔᤠ ᤌᤡᤶ ᤆᤥᤃᤢᤀᤠᤱ ᤛᤣᤛᤣ ᤛᤠᤛᤠᤱ ᤆᤥᤃᤢᤖ॥ ᤁᤧᤍᤠᤒᤠ ᤕᤧᤶᤔᤥ ᤛᤍᤠᤍᤡᤱᤗᤧ ᤗᤠᤃᤡ ᤋᤱᤒᤣ ᤌᤰᤔᤠ ᤀᤰᤂᤣ ᤆᤥ᤺ᤰᤔᤠ ᤐᤥᤱ᤹॥ ᤁᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤁᤧᤖᤧᤰ ᤛᤣᤛᤣᤛᤠᤱᤛᤠᤱ ᤐᤥᤱᤔᤠ ᤐᤥᤱ᤹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤶᤔᤠ ᤐᤥᤱᤗᤥ॥” ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠ ᤕᤠᤱ 11 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 12 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤕᤠᤶᤏᤠ᤺ᤳᤏᤡ᤺ᤳ ᤁᤧᤈᤥᤃᤢᤛᤡᤸᤗᤧ ᤂᤧᤱᤜᤠ᤹ᤀᤥᤒᤠ ᤁᤧᤖᤧᤰ ᤌᤡᤰᤌᤡᤰᤗᤧ ᤀᤠᤒᤠᤅᤣ ᤂᤢᤴᤇᤡ᤹ ᤕᤠᤶᤛᤠᤶᤔᤡᤴ ᤛᤧ᤺ᤵᤔᤠᤖᤧ ᤗᤠᤃᤡ ᤁᤶᤓᤗ᤹ᤖᤡᤰ ᤁᤢᤔᤧᤸᤗᤢᤱ ᤔᤧᤜᤢᤅᤢᤖ ᤐᤥᤱ᤹. ᤜᤧᤰᤁᤩᤠᤱ ᤂᤠᤏᤡ᤺ᤳ ᤔᤧᤈᤥᤃᤢᤛᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤌᤧᤔᤠᤀᤠᤱ ᤔᤠᤱᤍᤢᤰᤔᤠ ᤔᤧᤍᤠᤏᤧᤴ॥ 13 ᤀᤠᤰᤂᤩᤠᤖᤡᤰ ᤂᤠᤏᤡ᤺ᤳ ᤔᤧᤈᤥᤃᤢᤛᤡ ᤂᤧᤱᤜᤠ᤹ᤖᤧ ᤛᤣᤛᤣᤍᤧᤴᤏᤡᤸᤗᤧ ᤗᤠᤃᤡ ᤜᤢᤱᤔᤠ ᤁᤧᤒᤥᤱᤒᤠ ᤛᤣᤁᤣᤗᤖᤧ ᤁᤢᤓᤪᤧ᤺ᤱ ᤛᤣᤁᤣᤗ ᤜᤢᤱᤔᤠ ᤐᤥᤱ᤹॥ ᤗᤳᤇᤠ ᤛᤣᤁᤣᤗᤗᤧᤴ ᤏᤡᤒᤥᤱ ᤃᤣᤖᤠ ᤕᤥᤖᤥ॥ ᤁᤶᤓᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤶᤔᤠ ᤁᤧᤒᤥᤱᤒᤠ ᤛᤡᤍᤢᤱᤈᤓᤠᤴ ᤁᤢᤓᤪᤧ᤺ᤱ ᤛᤣᤁᤣᤗᤒᤠ ᤐᤥᤱᤗ॥ 14 ᤂᤠᤏᤡ᤺ᤳ ᤔᤧᤈᤥᤃᤢᤛᤡᤸᤗᤧ ᤋᤱᤒᤣ ᤏᤡᤒᤥᤱ ᤁᤧᤃᤧᤵᤐᤠ ᤏᤢ ᤂᤧᤴᤏᤢ᤺ᤸᤗᤧ ᤕᤖᤡᤰ ᤋᤱᤒᤣ ᤁᤧᤃᤧᤵᤐᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤀᤥ ᤜᤢᤰᤘᤠ ᤔᤧᤗ᤺ᤳᤋᤢᤖ ᤐᤥᤱ᤹॥ 15 ᤀᤠᤸᤗ ᤂᤡᤏᤡ᤹ ᤜᤡᤱᤔᤧᤴ ᤀᤠᤵᤋᤡᤰᤗᤠᤶ ᤛᤢᤳᤌᤥ ᤆᤥ᤺ᤰᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤏᤢ ᤕᤜᤘᤣ ᤍᤠᤱᤒᤠᤀᤥ ᤁᤢᤍᤥ᤺ᤵᤔᤠ ᤐᤥᤱᤔᤠᤖᤧ ᤗᤠᤃᤡ ᤂᤢᤏᤧ᤹ᤀᤥ ᤛᤡᤍᤢᤱᤈᤓᤠ ᤁᤧᤍᤥ᤺ᤴᤍᤢᤶᤔᤡᤸᤗᤧ ᤕᤠᤱᤛᤠᤁᤢᤴᤎᤣᤛᤠᤒᤧᤸᤗᤧ ᤜᤢᤱᤔᤠ ᤁᤧᤒᤥᤱᤒᤠᤏᤢ᤺ᤸᤗᤧ ᤕᤖᤡᤰ ᤔᤧᤍᤥᤴᤍᤢᤴᤗ ᤜᤧᤰᤁᤩᤠᤱ ᤕᤠᤱᤃᤧᤛᤠ᤹ᤒᤧᤸᤗᤧ ᤂᤧᤴᤏᤢ᤺ᤸᤗᤧ ᤛᤢ᤺ᤸᤗᤡᤰ ᤔᤧᤍᤥᤴᤍᤢᤴᤗ॥ 16 ᤀᤡᤛᤪᤠᤀᤡᤗᤡᤜᤠ᤹ᤗᤠᤶ ᤏᤠᤍᤱ ᤆᤥ᤺ᤰᤔᤠ ᤕᤠᤱᤅᤡᤴ ᤋᤠ᤺ᤰᤋᤧ᤹ᤀᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤔᤠᤱᤛᤧᤘᤠ ᤕᤠ᤺ᤶᤒᤰᤗᤧ ᤗᤠᤃᤡ ᤀᤥᤃᤠᤵ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤴ ᤜᤡᤱᤔᤧᤸᤗᤧ ᤗᤠᤃᤡ ᤀᤠᤵᤋᤡᤰᤗᤠᤶ ᤛᤢᤳᤌᤥ ᤆᤥ᤺ᤰᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤏᤡᤱᤘᤠ᤹ᤛᤥᤰ ᤐᤥᤱᤗᤖᤥ॥” ᤘᤠᤜᤵᤛᤡᤱᤔᤠ ᤇᤧ᤺ᤱᤃᤩᤠ 17 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 18 “ᤘᤠᤜᤵᤛᤡᤱᤔᤠᤖᤧ ᤗᤠᤃᤡ ᤗᤳᤇᤠ ᤁᤠᤛᤠ ᤇᤧᤱᤃᤩᤠ ᤌᤃᤧ᤹॥ ᤂᤧᤸᤗᤧ ᤁᤢᤗᤠᤱᤜᤠ᤹ᤀᤠᤱ ᤁᤠᤛᤠ᤺ᤸᤗᤧᤴ ᤆᤥᤃᤧ᤹॥ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤡᤴ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤗᤢᤶᤔᤥ ᤂᤧᤴ ᤕᤢᤰᤂᤧ᤹ ᤜᤧᤰᤁᤩᤠᤱ ᤂᤧᤵᤔᤥ ᤆᤫᤠ᤺ᤳ ᤁᤣ᤺ᤳᤋᤧ᤹॥ 19 ᤂᤧᤴ ᤆᤫᤠ᤺ᤳᤋᤡᤸᤗᤧ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤱ ᤜᤢᤰᤜᤠ᤹ ᤘᤠᤔᤧᤜᤵᤋᤢᤖ॥ 20 ᤀᤠᤸᤗ ᤂᤧᤱᤜᤠ᤹ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤔᤧᤗᤠ᤺ᤳᤋᤡᤸᤗᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤠᤱᤛᤧᤘᤠ ᤆᤥ᤺ᤰᤛᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤗᤠᤶᤒᤠ ᤋᤥ᤺ᤶᤔᤠ ᤁᤧᤒᤥᤱᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤔᤡᤎᤡᤱᤛᤧ ᤔᤧᤍᤠᤖᤥ. 21 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤜᤠᤒᤠ ᤁᤴ ᤆᤫᤠ᤺ᤳᤋᤡᤸᤗᤧ ᤂᤢᤴᤇᤡ᤹ ᤗᤠᤱᤜᤢᤰ ᤘᤠᤔᤧᤜᤵᤋᤢᤖ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤴᤇᤡᤏᤧᤴᤗ॥ ᤁᤴ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤗᤠᤃᤡ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤛᤍᤠᤍᤡᤱᤒᤠ ᤌᤡᤶ ᤐᤥᤱᤗᤖᤥ॥” ᤔᤠᤱᤌᤥ᤺ᤰᤏᤠ ᤐᤡᤔᤠ ᤏᤡ᤺ᤱᤃᤣ᤹ 22 ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 23 “ᤂᤧᤏᤧ᤹ ᤏᤢ᤺ᤒ᤻ᤏᤢᤒᤠ ᤔᤠᤖᤢᤰ. ᤀᤡᤃᤪ ᥋᥆᥆ ᤛᤣᤁᤣᤗ ᤁᤢᤘᤠ ᤔᤢᤷᤖ ᤏᤢ ᤂᤧᤸᤗᤧ ᤁᤢᤓᤪᤧ᤺ᤱ. ᤀᤡᤃᤪ ᥈᥋᥆ ᤛᤣᤁᤣᤗ ᤛᤡᤴᤁᤠᤀᤢᤗᤡ᤺ᤸᤗᤧ ᤁᤢᤓᤧᤰᤘᤠ. ᤜᤧᤰᤁᤩᤠᤱ ᥈᥋᥆ ᤛᤣᤁᤣᤗ ᤁᤢᤏᤠᤶᤃᤧᤏᤢ᤹ᤒᤠ ᤗᤢᤵᤗᤠ᤺ᤰ. 24 ᤂᤶᤓᤩᤠᤱ ᥋᥆᥆ ᤛᤣᤁᤣᤗ ᤏᤠᤶᤛᤡᤱ—ᤁᤴ ᤁᤧᤖᤧᤰᤗᤧ ᤁᤢᤎᤠᤱᤔᤠᤴ ᤛᤣᤛᤣᤍᤧᤴᤏᤥᤒᤠ ᤁᤢᤎᤠᤱᤔᤠ ᤁᤢᤀᤡᤛᤡᤰ ᤐᤥᤱᤗ—ᤜᤧᤰᤁᤩᤠᤱ ᤜᤡᤴ ᤌᤡᤰ ᤆᤤᤋᤢᤏ ᤏᤡ᤺ᤱᤃᤣ᤹ ᤋᤣ᤹ᤖᤧ᤹॥ 25 ᤜᤧᤰᤁᤩᤠᤱ ᤔᤠᤱᤌᤥ᤺ᤰᤏᤠ ᤐᤡᤔᤠᤛᤡ ᤛᤣᤛᤣ ᤏᤡ᤺ᤱᤃᤣ᤹ ᤆᤥᤃᤧ᤹. ᤁᤢᤏᤠᤶᤃᤧᤏᤢ᤹ᤒᤠ ᤔᤠᤖᤢᤰ ᤁᤧᤈᤥ᤺ᤰᤐᤠᤸᤗᤧ ᤁᤢᤀᤡᤛᤡᤰ ᤆᤥᤃᤧ᤹॥ ᤔᤠᤱᤌᤥ᤺ᤰᤏᤠ ᤐᤡᤔᤠᤛᤡᤖᤧ ᤗᤠᤃᤡ ᤂᤧᤴ ᤛᤣᤛᤣ ᤏᤡ᤺ᤱᤃᤣ᤹ ᤐᤥᤱᤗ॥ 26 ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤡᤴ ᤏᤢ ᤔᤠᤱᤜᤢᤵ ᤛᤠᤵᤗᤢᤱ ᤁᤧᤕᤠᤰᤐᤠ ᤛᤴᤍᤥᤰᤁᤡᤴ. 27 ᤜᤧᤰᤁᤩᤠᤱ ᤆᤵᤋᤧᤴ. ᤂᤧᤵᤔᤥᤒᤠ ᤁᤧᤖᤧᤰ ᤛᤠᤔᤠᤜᤠ᤹ᤏᤢ ᤛᤥᤖᤡᤰ. ᤂᤧᤒᤩᤠᤱ ᤛᤣᤔᤡᤕᤢᤱᤍᤧᤴ. ᤂᤧᤵᤔᤥᤒᤠ ᤁᤧᤖᤧᤰ ᤛᤠᤔᤠᤜᤠ᤹ᤏᤢ ᤛᤥᤖᤡᤰ. ᤜᤧᤰᤁᤩᤠᤱ ᤛᤢᤰᤐᤠ ᤜᤠ᤺ᤶᤔᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ. 28 ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ. ᤂᤧᤵᤔᤥᤒᤠ ᤁᤧᤖᤧᤰ ᤛᤠᤔᤠᤜᤠ᤹. ᤜᤧᤰᤁᤩᤠᤱ ᤘᤠᤜᤵᤛᤡᤱᤔᤠ ᤇᤧ᤺ᤱᤃᤩᤠ. ᤂᤧᤸᤗᤧ ᤁᤢᤗᤠᤱᤜᤠ᤹ᤏᤢ ᤛᤥᤖᤡᤰ. ᤀᤠᤶᤓᤠ ᤂᤧᤸᤗᤧ ᤔᤠᤱᤌᤥ᤺ᤰᤏᤠ ᤐᤡᤖᤧᤛᤧ᤹॥ 29 ᤁᤶᤓᤗ᤹ᤖᤡᤰ ᤁᤴᤜᤠ᤹ ᤛᤢᤳᤌᤥ ᤆᤥᤃᤧᤛᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤛᤣᤛᤣᤒᤠ ᤐᤥᤱᤗ॥ ᤀᤠᤳᤋᤡᤴ ᤆᤡᤃᤰᤘᤠ᤺ᤸᤗᤧ ᤂᤧᤱᤜᤠ᤹ ᤛᤢᤛᤢᤛᤡ ᤂᤧᤴ ᤛᤣᤛᤣ ᤐᤥᤱ᤹॥ 30 “ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤔᤠᤱᤌᤥ᤺ᤰᤏᤠ ᤐᤡᤖᤧᤛᤧ᤹ᤀᤠᤱ ᤂᤧᤱᤜᤠ᤹ ᤛᤣᤛᤣᤛᤠᤱᤛᤠᤱ ᤆᤥᤃᤧᤛᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠᤀᤥ ᤀᤠᤱᤃᤠ᤹ ᤀᤠᤗᤠᤃᤡ ᤔᤠᤱᤛᤧᤘᤠ ᤕᤠ᤺ᤶᤒᤰ ᤔᤧᤈᤥᤃᤢᤖ॥ 31 ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹. ‘ᤂᤧᤴ ᤂᤡᤏᤡ᤹ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤔᤠᤱᤌᤥ᤺ᤰᤏᤠ ᤆᤥ᤺ᤰᤔᤠ ᤏᤡ᤺ᤱᤃᤣᤴ ᤀᤠᤱᤃᤠ᤹ ᤀᤠᤗᤠᤃᤡ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤐᤥᤱᤗ॥’ 32 ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤎᤰᤁᤥᤀᤠᤱ ᤂᤧᤴ ᤔᤧᤴᤜᤢᤰᤂᤢᤴᤗ. ᤜᤧᤰᤁᤩᤠᤱ ᤀᤠᤶᤓᤠ ᤂᤧᤴ ᤁᤢᤘᤠᤜᤠ᤹ ᤔᤧᤓ᤺ᤴᤍᤧᤴᤏᤧ᤹ᤀᤠᤱ ᤜᤠᤒᤠ ᤜᤧᤰᤋᤱᤒᤠ ᤁᤢᤘᤠ ᤔᤧᤈᤥᤃᤧᤴᤏᤧ᤹॥ ᤂᤧᤴ ᤛᤢᤳᤌᤥ ᤆᤥᤰ. ᤜᤧᤰᤁᤩᤠᤱ ᤂᤡᤏᤡ᤹ ᤂᤧᤴ ᤛᤢᤳᤌᤥ ᤗᤣ᤺ᤳᤋᤧᤶᤔᤧ᤹॥ 33 ᤀᤠᤳᤋᤡᤸᤗᤧ ᤑ᤺ᤴᤍᤢᤀᤠᤱ ᤂᤧᤴ ᤜᤧᤰᤋᤱᤒᤠ ᤑᤢᤱᤏᤠᤶ ᤆᤥᤃᤢ᤹. ᤜᤧᤰᤁᤩᤠᤱ ᤂᤧᤴᤗᤠᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤏᤢ᤺ᤸᤗᤧ ᤘᤣ᤹ ᤔᤏᤠ᤺ᤸᤗᤧ ᤁᤢᤎᤰᤁᤥ ᤜᤢᤰᤂᤢ᤹. ᤂᤧᤴ ᤀᤠᤒᤠᤅᤣ ᤁᤢᤔᤏᤠᤜᤠ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤖᤖᤥ॥” ᤁᤢᤏᤠᤶᤃᤧᤏᤢ᤹ᤒᤠ ᤛᤢᤰᤐᤠ 34 ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤁᤢᤏᤠᤶᤃᤧᤏᤢ᤹ᤒᤠ ᤔᤠᤖᤢᤰ—ᤀᤠ᤺ᤱᤄᤡᤰᤘᤠ. ᤛᤣᤂᤗᤣᤋ ᤏᤢ ᤏᤠᤱ ᤜᤧᤰᤋᤱᤒᤠ ᤁᤢᤍᤢ᤺ᤰᤘᤠ—ᤁᤢᤓᤖᤠ ᤀᤡᤛᤣ᤺ᤱᤒᤠ ᤛᤢᤰᤐᤠ ᤁᤢᤎᤠᤱᤔᤥ ᤁᤢᤍᤱᤒᤠ ᤕᤠᤱᤛᤡᤱᤅᤧ᤹. 35 ᤜᤧᤰᤁᤩᤠᤱ ᤂᤧᤸᤗᤧ ᤁᤢᤏᤠᤶᤃᤧᤏᤢ᤹ᤒᤠ. ᤑ᤺ᤶᤔᤏᤠᤒᤠ ᤛᤢᤰᤐᤠ ᤑᤢᤱᤏᤠᤶ ᤁᤧᤈᤥ᤺ᤰᤐᤠᤸᤗᤧ ᤜᤧᤰᤁᤣᤀᤣ ᤆᤥᤃᤧ᤹॥ ᤂᤧᤴ ᤕᤢᤶ ᤑᤢᤵᤔᤏᤠ ᤀᤡᤛᤣ᤺ᤱᤒᤠ ᤏᤢ ᤛᤢᤳᤌᤥ ᤐᤥᤱᤔᤠ ᤐᤥᤱ᤹॥ 36 ᤂᤧ᤹ᤕᤥᤗᤠᤶ ᤁᤢᤓᤠ ᤌᤃᤧ᤹ᤀᤠᤱ ᤆᤢᤴᤈᤢᤶᤒᤠ ᤑᤣ᤹ᤖᤢᤶ ᤆᤥᤃᤧ᤹. ᤜᤧᤰᤁᤩᤠᤱ ᤀᤠᤈᤧ᤺ᤳᤇᤡᤰ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤋᤢᤶᤔᤠ ᤁᤧᤒᤥᤱᤒᤠ ᤛᤠ᤺ᤱᤃᤠᤜᤡᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥᤰ ᤋᤃᤠᤱ ᤛᤠᤰᤂᤧ᤹॥ ᤂᤧᤴ ᤂᤡᤏᤡ᤹ ᤗᤠᤃᤡ ᤛᤠ᤹ᤖᤡᤰ ᤛᤣᤛᤣᤒᤠ ᤐᤥᤱᤗ॥ 37 ᤂᤧᤴ ᤑᤢᤵᤔᤏᤠᤒᤠ ᤁᤢᤀᤡᤛᤡᤰ ᤂᤧᤴ ᤛᤢᤰᤐᤠᤴ ᤂᤡᤏᤡ᤹ ᤀᤠᤒᤠᤅᤣ ᤗᤠᤃᤡ ᤔᤧᤈᤥᤃᤧᤶᤔᤡᤴᤏᤧ᤹॥ ᤂᤧᤴ ᤂᤧᤏᤧ᤹ ᤁᤧᤔᤡᤰᤛᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤣᤛᤣ ᤐᤥᤱᤗ॥ 38 ᤀᤠᤳᤋᤡᤸᤗᤧ ᤂᤧᤴ ᤁᤢᤏᤠᤶᤃᤧᤏᤢ᤹ᤒᤠ ᤂᤧᤵᤛᤢᤀᤠᤱ ᤂᤧᤴ ᤜᤧᤰᤋᤱᤒᤠᤀᤣ ᤁᤢᤓᤠ ᤛᤢᤰᤐᤠ ᤆᤥᤃᤢᤏᤧᤓᤃᤪ ᤂᤧᤴ ᤂᤢᤏᤧ᤹ ᤁᤢᤔᤏᤠᤜᤠ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤖᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.