ᤗᤠᤶᤍᤡᤰ 29 - LIFOTNTᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤋᤥ᤺ᤶᤔᤠᤛᤡ ᤌᤡᤶ 1 “ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠᤀᤥ ᤀᤠᤱᤃᤠ᤹ ᤀᤠᤗᤠᤃᤡ ᤔᤠᤱᤛᤧᤘᤠ ᤕᤠ᤺ᤶᤒᤰ ᤔᤧᤈᤥᤃᤢᤖ ᤑᤠ᤹ᤀᤠᤱ ᤂᤧᤱᤜᤠ᤹ ᤛᤣᤛᤣ ᤆᤥ᤺ᤰᤔᤠᤛᤡ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤁᤡᤴ ᤀᤠᤶᤓᤠ ᤁᤴᤗᤥ—ᤗᤳᤇᤠ ᤐᤡᤳᤛᤠᤳ ᤏᤢ ᤏᤧᤳᤇᤡ ᤘᤖᤡᤰᤗᤡᤰᤐᤠ ᤔᤧᤸᤗᤢᤰᤜᤠ᤹ ᤋᤠᤖᤧᤛᤧ᤹ᤀᤠᤱ ᤋᤩᤧ᤹. 2 ᤜᤧᤰᤁᤩᤠᤱ ᤂᤖᤧ᤺ᤱ. ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤆᤠᤖ᤺ᤵᤐᤠ. ᤏᤡ᤺ᤱᤃᤣ᤹ ᤜᤢ᤺ᤵᤔᤏᤠᤒᤠ ᤐᤠ᤹ᤐᤠ᤺ᤶᤒᤠ ᤗᤥ᤺ᤳᤋᤥ. ᤂᤧᤱᤜᤠ᤹ ᤁᤧᤖᤧᤰ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤆᤢᤴᤈᤢᤶᤒᤠ ᤔᤠᤛᤡ ᤑᤣ᤹ᤖᤢᤶᤔᤡᤸᤗᤧᤴ ᤆᤥᤃᤧ᤹॥ 3 ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤰᤘᤠᤀᤥ ᤁᤣ᤺ᤳᤋᤧ᤹ᤀᤠᤱ ᤂᤧᤴ ᤐᤰᤘᤠ᤺ᤴ. ᤛᤧᤃᤶᤒᤠ ᤐᤡᤳᤋᤧᤴ ᤏᤢ ᤂᤧᤴ ᤏᤧᤵᤔᤠᤱ ᤔᤧᤸᤗᤢᤰᤜᤠ᤹ ᤋᤠᤖᤧᤛᤧ᤹॥ 4 ᤂᤧᤴ ᤀᤣᤃᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤒᤣᤛᤠᤱ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤋᤠᤖᤧᤛᤧ᤹ᤀᤠᤱ ᤂᤧᤱᤜᤠ᤹ ᤆᤫᤠ᤺ᤳᤋᤡᤸᤗᤧ ᤘᤠᤖᤢ᤺ᤵᤛᤧᤛᤧ᤹॥ 5 ᤂᤧᤴ ᤆᤠᤱᤜᤠ᤹ ᤋᤠᤖᤧ᤹ᤀᤠᤱ ᤜᤠᤖᤢᤏᤧᤴ ᤗᤃᤣ᤺ᤵ. ᤀᤣᤐᤥᤍᤧᤸᤗᤧ ᤁᤢᤛᤡᤃᤠᤱᤒᤠ ᤆᤠᤱ. ᤀᤣᤐᤥᤍ ᤏᤢ ᤛᤠ᤺ᤱᤒᤣ ᤛᤧ᤺ᤵᤆᤠᤱ ᤆᤠᤰᤋᤧ᤹ᤀᤠᤱ ᤏᤢᤖᤡᤰᤁᤠᤱ ᤑᤔᤏᤠᤒᤠ ᤕᤢᤶᤔᤠ ᤑ᤹ᤀᤡ᤺ᤴ ᤂᤧᤸᤗᤧ ᤁᤢᤛᤶᤎᤠᤱ ᤂᤣ᤺ᤰᤂᤧ ᤐᤡᤖᤧ᤹॥ 6 ᤂᤢᤏᤧ᤹ ᤁᤢᤎᤧᤃᤣ᤺ᤰᤐᤥ ᤂᤧᤴ ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ ᤗᤧᤵᤐᤧᤵᤐᤠ ᤑᤧᤋᤠᤴ ᤂᤢ᤺ᤰᤋᤧ᤹. ᤑᤧᤋᤠ᤺ᤸᤗᤧ ᤁᤢᤛᤶᤎᤠᤱ ᤛᤣᤛᤣ ᤋᤡᤆ᤺ᤴ ᤑᤳᤇᤧ ᤐᤡᤖᤧ᤹॥ 7 ᤂᤧᤴ ᤀᤣᤃᤠᤱ ᤔᤠᤱᤌᤥ᤺ᤰᤏᤠ ᤐᤡᤔᤠ ᤏᤡ᤺ᤱᤃᤣᤴ ᤕᤠᤱᤛᤡᤱᤅᤧ᤹ᤀᤠᤱ ᤂᤧᤸᤗᤧ ᤁᤢᤎᤧᤃᤣ᤺ᤰᤐᤥ ᤗᤧ᤺ᤰᤋᤧ᤹ᤀᤠᤱ ᤔᤠᤱᤌᤥ᤺ᤰᤏᤠ ᤐᤡᤖᤧ᤹॥ 8 ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤋᤠᤖᤧᤛᤧ᤹ᤀᤠᤱ ᤂᤧᤱᤜᤠ᤹ ᤗᤃᤣ᤺ᤵ ᤋᤣᤳ ᤆᤠᤰᤋᤧᤛᤧ᤹. 9 ᤜᤶᤓᤩᤠᤱ ᤂᤧᤱᤜᤠᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤐᤥ ᤑᤧᤋᤠ ᤂᤣ᤺ᤰᤂᤧ ᤐᤡᤖᤧᤛᤧ᤹॥ ᤂᤧᤒᤩᤠᤱ ᤜᤠᤖᤢᤏᤧᤴ ᤏᤢ ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤑ᤹ᤀᤡ ᤕᤢᤵᤋᤧᤛᤧ᤹॥ ᤛᤍᤠᤍᤡᤱ ᤁᤧᤘᤠ᤹ᤒᤠ ᤛᤠᤰᤌᤡᤰᤗᤠᤶ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠ ᤔᤧᤄᤥᤛᤢ᤹॥ ᤁᤶᤓᤗ᤹ᤖᤡᤰ ᤂᤧᤏᤧ᤹ ᤜᤠᤖᤢᤏᤧᤴ ᤏᤢ ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤠ᤺ᤶᤒᤰᤁᤥ ᤕᤢᤰᤋᤡᤱ ᤆᤥᤃᤧᤛᤧ᤹॥ 10 “ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤍᤃᤠᤱ ᤂᤧᤴ ᤛᤧᤃᤶᤒᤠ ᤐᤡᤳᤋᤧᤴ ᤋᤠᤖᤧ᤹. ᤜᤧᤰᤁᤩᤠᤱ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤛᤧᤃᤶᤒᤠ ᤐᤡᤳᤋᤧᤸᤗᤧ ᤁᤢᤎᤧᤃᤣ᤺ᤰᤐᤥ ᤂᤢᤴᤇᤡ᤹ ᤜᤢᤰᤜᤠ᤹ ᤔᤧᤏᤧᤛ᤻ᤛᤢᤖ॥ 11 ᤂᤧᤴ ᤛᤧᤃᤶᤒᤠ ᤐᤡᤳᤋᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤍᤃᤡ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤆᤥᤃᤧ᤹॥ 12 ᤛᤧᤃᤶᤒᤠ ᤐᤡᤳᤋᤡᤸᤗᤧ ᤁᤢᤓᤠ ᤁᤢᤔᤠᤰᤂᤡ᤹ᤈᤡ ᤕᤠᤱᤛᤡᤱᤅᤧ᤹ᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤍᤠᤱᤜᤠ᤹ᤀᤥ ᤂᤧᤏᤧ᤹ ᤁᤧᤜᤢᤰᤆᤥ᤺ᤸᤗᤧ ᤜᤢ᤺ᤳᤋᤧ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤧᤏᤶᤒᤠ ᤁᤢᤔᤠᤰᤂᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤢᤱᤅᤥ ᤜᤢᤰᤂᤧ᤹॥ 13 ᤜᤧᤰᤁᤩᤠᤱ ᤂᤧᤏᤧ᤹ ᤁᤢᤜᤡᤍᤢᤳ ᤁᤢᤎᤧᤃᤠᤱ ᤁᤧᤍᤧᤵᤐᤠ ᤁᤢᤛᤥ᤺ᤳᤜᤠ᤹ ᤏᤢ ᤁᤢᤗᤢᤱᤔᤠ᤹ᤀᤥᤒᤠ ᤛᤠᤴ ᤜᤧᤰᤁᤩᤠᤱ ᤏᤧᤵᤔᤠᤱ ᤁᤢᤗᤧᤶᤓᤣ᤺ᤶᤔᤠᤜᤠ᤹ ᤏᤢ ᤂᤧᤸᤗᤧ ᤁᤢᤛᤶᤔᤥᤒᤠ ᤁᤢᤛᤥ᤺ᤳᤋᤡᤴ ᤕᤠᤱᤛᤡᤱᤅᤧ᤹ᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤧᤍᤣᤛᤧ᤹॥ 14 ᤁᤖ ᤛᤧᤃᤶᤒᤠ ᤐᤡᤳᤇᤠᤴ ᤏᤢ ᤂᤧᤸᤗᤧ ᤁᤢᤜᤥᤖᤡᤰᤐᤠᤴ ᤜᤧᤰᤁᤩᤠᤱ ᤁᤢᤜᤡᤍᤢᤳ ᤁᤢᤎᤧᤃᤠᤱᤜᤠ᤹ ᤛᤠ᤺ᤱᤃᤠᤜᤡᤶᤔᤥᤗᤠᤶ ᤗᤠ᤺ᤰᤁᤠᤳ ᤔᤡᤀᤥ ᤔᤡᤎᤡᤰᤂᤧᤍᤣᤛᤧ᤹॥ ᤂᤧᤱᤃ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤥ॥ 15 “ᤕᤠᤶᤔᤥ ᤗᤳᤇᤠ ᤌᤢ᤺ᤶᤒᤠ ᤌᤡᤰ ᤕᤠᤱᤛᤡᤱᤅᤧ᤹. ᤜᤧᤰᤁᤩᤠᤱ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤌᤢ᤺ᤶᤒᤠ᤺ᤸᤗᤧ ᤁᤢᤎᤧᤃᤣ᤺ᤰᤐᤥ ᤂᤢᤴᤇᤡ᤹ ᤜᤢᤰᤜᤠ᤹ ᤔᤧᤏᤧᤛ᤻ᤛᤢᤖ॥ 16 ᤌᤢ᤺ᤶᤒᤠ᤺ᤴ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤆᤥᤃᤧ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤠᤰᤂᤡᤴ ᤕᤠᤱᤛᤡᤱᤅᤧ᤹ᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤁᤒᤪᤡᤱ ᤛᤠᤰᤂᤧ᤹॥ 17 ᤂᤧᤴ ᤌᤢ᤺ᤶᤒᤠ᤺ᤴ ᤁᤢᤈᤰᤋᤠ ᤁᤢᤗᤧᤶᤍᤠ ᤂᤰᤋᤧ᤹ᤀᤠᤱ ᤂᤧᤸᤗᤧ ᤁᤢᤜᤡᤍᤢᤳ ᤁᤢᤎᤧᤃᤠᤱᤅᤡᤴ ᤏᤢ ᤁᤢᤗᤠᤱᤜᤠ᤹ ᤘᤠᤜᤵᤋᤧ᤹ ᤂᤧᤒᤩᤠᤱ ᤂᤧᤸᤗᤧ ᤁᤢᤈᤰᤋᤠ ᤁᤢᤗᤧᤶᤍᤠᤜᤠ᤹ ᤏᤢ ᤁᤢᤎᤧᤃᤣ᤺ᤰᤁᤡᤴᤏᤢᤀᤣ ᤛᤥᤖᤡᤰ ᤏᤧᤛ᤻ᤛᤧ᤹॥ 18 ᤂᤧᤴ ᤌᤢ᤺ᤶᤒᤠ᤺ᤴ ᤁᤧᤖᤧᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤧ᤹॥ ᤂᤧᤱᤃ ᤔᤡᤗᤠᤶᤒᤠ ᤋᤥ᤺ᤶᤔᤏᤠᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤏᤢ ᤁᤢᤏᤠᤶ ᤁᤧᤏᤢ᤹ᤒᤠ ᤛᤡᤍᤢᤱᤈᤓᤠᤖᤥ॥ 19 “ᤂᤧᤏᤧ᤹ ᤘᤣ᤹ ᤔᤧᤸᤗᤢᤰᤌᤡᤰ ᤕᤠᤱᤛᤡᤱᤅᤧ᤹. ᤜᤧᤰᤁᤩᤠᤱ ᤜᤠᤖᤢᤏᤧᤴ ᤏᤢ ᤁᤢᤛ᤻ᤛᤠᤜᤠ᤹ᤖᤧ ᤔᤧᤸᤗᤢᤰᤁᤡᤸᤗᤧ ᤁᤢᤎᤧᤃᤣᤰ ᤛᤶᤎᤠᤱ ᤂᤢᤴᤇᤡ᤹ ᤜᤢᤰᤜᤠ᤹ ᤔᤧᤏᤧᤛ᤻ᤛᤢᤖ॥ 20 ᤂᤧᤒᤩᤠᤱ ᤔᤧᤸᤗᤢᤰᤁᤡᤴ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤆᤥᤃᤧ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤓᤠ ᤁᤢᤔᤠᤰᤂᤡ᤹ᤈᤡ ᤕᤠᤱᤛᤡᤱᤅᤧ᤹ᤀᤠᤱ ᤜᤠᤖᤢᤏᤧᤸᤗᤧ ᤁᤢᤈᤢᤰᤘᤠ ᤁᤢᤴᤓᤠᤰᤁᤥ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤆᤢᤰᤘᤠ ᤏᤧᤓᤠᤰ ᤂᤡᤀᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤢᤰᤘᤠ ᤜᤢᤰᤁᤥᤒᤠ ᤜᤢᤰᤔᤠᤀᤥ ᤏᤢ ᤆᤢᤰᤘᤠ ᤗᤠᤱᤅᤥᤒᤠ ᤗᤠᤱᤔᤠᤀᤥ ᤜᤢ᤺ᤳᤋᤧ ᤐᤡᤖᤧᤛᤧ᤹॥ ᤂᤧᤴ ᤀᤣᤃᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤕᤠᤶᤗᤧᤱᤒᤧᤴ ᤛᤠᤔᤠᤰᤂᤡᤸᤗᤧ ᤗᤧ᤺ᤰᤋᤧ᤹॥ 21 ᤜᤧᤰᤁᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤁᤧᤕᤢᤱᤒᤠ ᤛᤠᤔᤠᤰᤂᤡᤴ ᤏᤢ ᤔᤠᤱᤌᤥ᤺ᤰᤏᤠ ᤐᤡᤔᤠ ᤏᤡ᤺ᤱᤃᤣ᤹ᤀᤥᤗᤠᤶ ᤀᤠᤈᤧ᤺ᤳᤇᤡᤰ ᤕᤠᤱᤛᤡᤱᤅᤧ᤹ᤀᤠᤱ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤈᤠᤱᤜᤠ᤹ᤀᤥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤏᤢ ᤂᤢᤴᤇᤡ᤹ ᤆᤠᤱᤜᤠ᤹ᤖᤧ ᤁᤢᤛᤶᤎᤠᤱ ᤛᤠᤰᤂᤧ᤹॥ ᤁᤶᤓᤗ᤹ᤖᤡᤰ ᤂᤢᤏᤧ᤹. ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤏᤢ ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤆᤠᤱᤜᤠ᤹ᤀᤠᤱ ᤛᤣᤛᤣᤛᤠᤱᤛᤠᤱ ᤐᤥᤱ᤹॥ 22 “ᤂᤧᤏᤧ᤹ ᤂᤧᤴ ᤌᤢᤶᤒᤠ᤺ᤸᤗᤧ ᤁᤢᤛᤥ᤺ᤳᤋᤡᤴ ᤏᤢ ᤁᤢᤔᤡᤀᤥᤒᤠ ᤁᤢᤛᤥ᤺ᤳᤋᤧᤴ ᤜᤧᤰᤁᤩᤠᤱ ᤁᤢᤜᤡᤍᤢᤳ ᤁᤢᤎᤧᤃᤠᤱ ᤁᤧᤍᤧᤵᤐᤠ ᤁᤢᤛᤥᤳ ᤐ᤺ᤳᤌᤠᤱᤅᤡᤴ ᤏᤢ ᤁᤢᤗᤢᤱᤔᤠ᤹ᤀᤥᤒᤠ ᤛᤠᤴ ᤂᤧᤒᤩᤠᤱ ᤁᤢᤛᤥ᤺ᤳᤋᤡᤴᤏᤢ ᤛᤥᤖᤡᤰᤐᤠ ᤁᤢᤗᤧᤶᤓᤣ᤺ᤵᤔᤠᤴ ᤏᤢ ᤁᤢᤈᤢᤰᤘᤠ ᤗᤧᤵᤔᤠᤱᤒᤠ ᤁᤢᤗᤠᤱᤓᤧᤸᤗᤧᤰᤔᤠᤴ ᤕᤠᤱᤛᤡᤱᤅᤧ᤹॥ (ᤂᤧᤴ ᤕᤢᤰᤋᤡᤱ ᤆᤥ᤺ᤰᤔᤧᤸᤗᤧ ᤀᤥᤃᤵᤗᤧ ᤗᤠᤃᤡ ᤋᤥ᤺ᤶᤔᤏᤠᤒᤠ ᤌᤢ᤺ᤶᤒᤠᤖᤥ॥) 23 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤁᤧᤕᤢᤱᤒᤠ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤁᤧᤕᤠᤰᤐᤠ ᤏᤠ᤹ᤀᤡᤔᤥᤗᤠᤶ ᤗᤳᤇᤠ ᤂᤖᤧ᤺ᤱ ᤜᤧᤰᤁᤩᤠᤱ ᤏᤡ᤺ᤱᤃᤣ᤹ᤀᤥ ᤗᤧ᤺ᤱᤔᤏᤠᤒᤠ ᤗᤳᤇᤠ ᤆᤠᤖ᤺ᤵᤐᤠ ᤏᤢ ᤏᤡ᤺ᤱᤃᤣ᤹ ᤔᤣ᤺ᤴᤏᤣᤒᤠ ᤂᤖᤧ᤺ᤱᤎᤡᤰ ᤕᤠᤱᤛᤡᤱᤅᤧ᤹ᤀᤠᤱ 24 ᤂᤧᤱᤜᤠ᤹ ᤁᤧᤖᤧᤰ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤏᤧᤛ᤻ᤛᤧ ᤐᤡᤖᤧᤛᤧ᤹॥ ᤂᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤌᤠ᤺ᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤐᤰᤂᤧᤶᤔᤧ᤹॥ 25 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤂᤧᤱᤜᤠ᤹ ᤋᤠ᤺ᤰᤋᤧ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤁᤢᤏᤠᤶᤏᤢ᤹ᤔᤠᤖᤧ ᤗᤠᤃᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ᤺ᤴᤏᤢ ᤛᤥᤖᤡᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤧᤍᤣᤛᤧ᤹॥ ᤁᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤗᤠᤶᤒᤠ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤖᤥ॥ 26 ᤜᤧᤰᤁᤩᤠᤱ ᤜᤠᤖᤢᤏᤧᤸᤗᤧ ᤋᤥ᤺ᤴᤍᤢᤒᤠ ᤌᤢ᤺ᤶᤒᤠ᤺ᤸᤗᤧ ᤁᤢᤛᤱᤒᤵᤔᤧᤴ ᤕᤠᤱᤛᤡᤱᤅᤧ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤌᤠ᤺ᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤐᤰᤂᤧ᤹॥ ᤂᤧᤴ ᤂᤧᤏᤧ᤹ ᤁᤧᤗᤰ ᤐᤥᤱ᤹॥ 27 “ᤋᤥ᤺ᤶᤔᤏᤠᤒᤠ ᤌᤢ᤺ᤶᤒᤠᤗᤠᤶ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁᤧᤒᤥᤱᤒᤠ ᤌᤠ᤺ᤱ ᤐᤱᤔᤏᤠᤒᤠ ᤁᤢᤛᤱᤒᤵᤔᤧᤴ ᤏᤢ ᤋᤥ᤺ᤶᤔᤏᤠᤒᤠ ᤁᤢᤗᤠᤱᤓᤧᤸᤗᤧᤰᤔᤠᤴ ᤛᤣᤛᤣᤛᤠᤱᤛᤠᤱ ᤆᤥᤃᤧ᤹ ᤜᤧᤰᤁᤩᤠᤱ ᤂᤧᤴ ᤂᤧᤱᤜᤠ᤹ᤖᤧᤴ ᤐᤥᤱ᤹॥ 28 ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤗᤠᤃᤡ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤠᤓᤧᤸᤗᤧᤛᤠᤱ ᤗ᤺ᤵᤔᤠ ᤁᤧᤒᤥᤱᤒᤠ ᤗᤰᤁᤡᤴ ᤜᤠᤒᤠ ᤁᤴᤗᤥ. ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ᤗᤠᤶ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤶᤔᤠ ᤁᤧᤒᤥᤱᤒᤠ ᤗᤰᤁᤡᤴ ᤀᤠᤶᤓᤠ ᤂᤧᤴᤗᤥ॥ 29 “ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤔᤠᤱᤌᤥ᤺ᤰᤏᤠ ᤔᤧᤒᤥᤱᤅᤠᤱ ᤕᤢᤰᤋᤡᤱ ᤔᤧᤈᤥᤃᤢᤛᤡᤸᤗᤧ ᤜᤠᤖᤢᤏᤧᤸᤗᤧ ᤛᤣᤛᤣ ᤁᤢᤈᤠᤱᤜᤠ᤹ ᤂᤢᤏᤧ᤹ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤐᤥᤱᤗ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤆᤠᤱᤜᤠ᤹ ᤔᤧᤈᤠᤰᤂᤢᤖ॥ 30 ᤜᤠᤖᤢᤏᤧᤸᤗᤧ ᤁᤢᤗᤧᤰᤘᤠᤀᤥ ᤏᤡᤱᤘᤠ᤹ᤑᤢᤛᤠᤶᤒᤠ ᤁᤧᤒᤥᤱᤒᤠ ᤁᤢᤛ᤻ᤛᤠᤴ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤛᤣᤛᤣᤒᤠᤍᤧᤴᤏᤥ ᤔᤠᤱᤛᤧᤘᤠ ᤆᤥ᤺ᤰᤛᤧ ᤋᤠ᤺ᤸᤗᤧ. ᤏᤢᤛᤡ ᤕᤧᤴ ᤌᤠᤖᤡᤰ ᤂᤧᤸᤗᤧ ᤂᤧᤴ ᤆᤠᤱᤅᤡᤴ ᤆᤠᤰᤂᤢᤖ॥ 31 “ᤕᤢᤰᤋᤡᤱ ᤆᤥ᤺ᤰᤔᤧᤸᤗᤧ ᤀᤥᤃᤵ ᤆᤥ᤺ᤰᤔᤠᤖᤧ ᤗᤠᤃᤡ ᤋᤥ᤺ᤶᤔᤏᤠᤒᤠ ᤌᤢ᤺ᤶᤒᤠ᤺ᤴ ᤕᤠᤱᤛᤡᤱᤅᤧ᤹ ᤜᤧᤰᤁᤩᤠᤱ ᤂᤧᤴ ᤛᤠᤴ ᤗᤳᤇᤠ ᤆᤰᤂᤥᤒᤠᤍᤧᤴᤏᤥ ᤌᤥ᤺ᤰᤋᤧ᤹॥ 32 ᤂᤧᤴ ᤀᤣᤃᤠᤱ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠᤖᤧ ᤂᤧᤴ ᤌᤢ᤺ᤶᤒᤠ ᤛᤠᤴ ᤏᤢ ᤏᤠ᤹ᤀᤡᤔᤠᤀᤥ ᤁᤧᤕᤠᤰᤐᤠ ᤂᤖᤧ᤺ᤱᤅᤡᤴ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠ᤺ᤵᤔᤠᤍᤧᤴᤏᤥ ᤔᤧᤈᤖ॥ 33 ᤂᤧᤱᤜᤠ᤹ ᤕᤢᤰᤋᤡᤱ ᤏᤢ ᤛᤣᤛᤣ ᤆᤥ᤺ᤰᤔᤠᤛᤡᤖᤧ ᤗᤠᤃᤡ ᤀᤠᤳᤋᤡᤴ ᤀᤠᤳᤋᤡᤴ ᤁᤢᤈᤠᤜᤠ᤹ᤗᤠᤶ ᤗᤧᤵᤔᤡ ᤔᤧᤏᤠ᤺ᤰᤋᤢᤀᤠᤱ ᤔᤧᤘᤕᤧ. ᤂᤧᤴ ᤁᤢᤈᤠᤴ ᤂᤧᤱᤜᤠ᤹ᤖᤧ ᤔᤧᤈᤖ॥ ᤁᤖ ᤁᤢᤓᤠ ᤘᤣ᤹ ᤔᤏᤠᤜᤠ᤹ᤖᤧ ᤂᤧᤴ ᤔᤧᤴᤈᤏᤧᤴᤗ. ᤌᤣᤀᤠᤱᤓᤧᤸᤗᤧ ᤂᤧᤴ ᤁᤢᤈᤠᤜᤠ᤹ ᤛᤣᤛᤣᤒᤠ ᤆᤥᤰ॥ 34 ᤋᤥ᤺ᤶᤔᤏᤠᤒᤠ ᤌᤢ᤺ᤶᤒᤠ ᤛᤠᤴ ᤀᤡᤃᤪ ᤂᤖᤧ᤺ᤱᤜᤠ᤹ ᤁᤢᤓᤠ ᤋᤠᤏᤠᤶ ᤌᤠᤖᤡᤰ ᤏᤴᤏᤧᤓᤃᤪ ᤂᤧᤴ ᤁᤧᤏᤶᤒᤠ ᤗᤰᤁᤡᤴ ᤔᤡᤀᤥ ᤔᤡᤎᤡᤰᤂᤧᤍᤣᤛᤧ᤹॥ ᤂᤧᤴ ᤆᤠᤔᤠ ᤔᤧᤏᤢ᤹ᤏᤧᤴ. ᤌᤣᤀᤠᤱᤓᤧᤸᤗᤧ ᤂᤧᤴ ᤛᤣᤛᤣᤒᤠ ᤆᤥᤰ॥ 35 “ᤂᤧᤏᤧ᤹ ᤀᤠᤱᤃᤠ᤹ ᤐᤡᤏᤧᤒᤠ ᤁᤧᤖᤧᤰ ᤀᤡᤱᤈᤠᤱᤜᤠ᤹ ᤁᤢᤀᤡᤛᤡᤰ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤗᤠᤃᤡ ᤆᤥᤃᤧ᤹॥ ᤏᤢᤛᤡ ᤕᤧᤴ ᤌᤠᤖᤡᤰᤗᤧ ᤂᤧᤱᤜᤠ᤹ ᤕᤢᤰᤋᤡᤱ ᤆᤥᤃᤧᤛᤧ᤹॥ 36 ᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤛᤧᤃᤶᤒᤠ ᤐᤡᤳᤋᤧᤴ ᤂᤧᤏᤧ᤹ ᤌᤡᤰᤕᤠ᤺ᤴᤎᤰᤔᤠ ᤋᤥ᤺ᤴᤍᤧ᤹॥ ᤂᤧᤒᤩᤠᤱ ᤆᤤᤋᤢᤏ ᤏᤡ᤺ᤱᤃᤣᤸᤗᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤔᤠᤱᤌᤥ᤺ᤰᤏᤠ ᤆᤥᤃᤧ᤹ᤀᤠᤱ ᤛᤢᤳᤌᤥ ᤆᤥᤃᤧ᤹॥ 37 ᤏᤢᤛᤡ ᤕᤧᤴ ᤌᤠᤖᤡᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴᤗᤧ ᤗᤠᤃᤡ ᤂᤧᤏᤧ᤹ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠ ᤕᤠ᤺ᤶᤒᤰ ᤆᤥᤃᤧ᤹ᤖ ᤐᤳᤇᤧ᤹. ᤜᤧᤰᤁᤩᤠᤱ ᤂᤧᤴ ᤛᤣᤛᤣ ᤆᤥᤃᤧ᤹॥ ᤀᤰᤂᤣᤗ᤹ᤖᤡᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤛᤠ᤹ᤖᤡᤰ ᤛᤣᤛᤣ ᤐᤥᤱ᤹॥ ᤌᤧᤔᤠ ᤌᤧᤔᤠᤜᤠ᤹ᤖᤧ ᤂᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤔᤧᤛᤢᤛᤢ ᤂᤧᤱᤜᤠ᤹ ᤛᤣᤛᤣ ᤔᤧᤒᤥᤱᤗᤥ॥ ᤌᤡᤰᤕᤠ᤺ᤴᤎᤰ ᤋᤥ᤺ᤶᤔᤠ ᤁᤧᤒᤥᤱᤒᤠ ᤛᤡᤍᤢᤱᤈᤓᤠ ( ᤂᤠᤏᤡ᤺ᤳ ᥈᥎:᥇-᥎ ) 38 “ᤀᤠᤸᤗ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤂᤧᤏᤧ᤹ ᤌᤡᤰᤕᤠ᤺ᤴᤎᤰ ᤋᤥ᤺ᤶᤔᤠ ᤁᤧᤒᤥᤱᤒᤠ ᤐᤠ᤺ᤴᤏᤡᤴ ᤜᤠᤒᤠ ᤁᤴᤗᤥ—ᤋᤱᤒᤣ ᤌᤡᤰ ᤁᤧᤃᤧᤵᤐᤠ ᤌᤢ᤺ᤶᤒᤠ ᤏᤧᤳᤇᤡ॥ 39 ᤗᤳᤇᤠ ᤌᤢ᤺ᤶᤒᤠ ᤋᤠᤏᤠᤶ ᤋᤥ᤺ᤴᤍᤧ᤹ ᤜᤧᤰᤁᤩᤠᤱ ᤗᤳᤇᤠ ᤘᤣ᤹ᤀᤡᤴ ᤕᤢ᤺ᤴᤇᤡᤰ ᤋᤥ᤺ᤴᤍᤧ᤹॥ 40 ᤌᤡᤰᤛᤡᤃᤣᤰᤐᤠ ᤌᤢ᤺ᤶᤒᤠ᤺ᤴᤏᤢ ᤛᤥᤖᤡᤰ ᤕᤢᤔᤏᤠᤒᤠ ᤔᤠᤏᤠ ᤗᤡᤛᤡ ᤆᤤᤋᤢᤏ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤔᤠᤏᤠ ᤏᤧᤳᤇᤡ ᤑᤣ᤹ᤖᤢᤶ. ᤜᤧᤰᤁᤩᤠᤱ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤗᤡᤋᤖ ᤌᤡᤰ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤋᤥ᤺ᤴᤍᤧ᤹॥ 41 ᤘᤣ᤹ ᤌᤢ᤺ᤶᤒᤠᤴ ᤕᤢ᤺ᤴᤇᤡᤰ ᤋᤥ᤺ᤴᤍᤧ᤹. ᤜᤧᤰᤁᤩᤠᤱ ᤂᤧᤴᤏᤢ ᤛᤥᤖᤡᤰ ᤋᤠᤏᤠᤶ ᤁᤧᤍᤥ᤺ᤴᤍᤢᤒᤠᤴ ᤜᤧᤰᤁᤣ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤏᤢ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠ ᤐᤥᤱᤗ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤗᤠᤶ ᤋᤥ᤺ᤶᤔᤏᤠᤒᤠ ᤂᤧᤴ ᤁᤢᤏᤠᤶ ᤁᤧᤏᤢ᤹ᤒᤠ ᤛᤡᤍᤢᤱᤈᤓᤠ ᤐᤥᤱ᤹॥ 42 ᤂᤡᤏᤡ᤹ ᤌᤠ᤺ᤰᤌᤠ᤺ᤰᤗᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠ᤺ᤵᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤂᤧᤴ ᤌᤡᤰᤕᤠ᤺ᤴᤎᤰᤐᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤐᤥᤱ᤹॥ ᤜᤠᤒᤠ ᤂᤧᤴ ᤋᤧᤴᤏᤥ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤐᤠ᤺ᤵᤔᤠᤖᤧ ᤗᤠᤃᤡ ᤂᤧᤏᤧ᤹ ᤋᤢᤶᤏᤧ᤹॥ 43 ᤀᤡᤛᤪᤠᤀᤡᤗᤡᤜᤠ᤹ᤏᤢ ᤀᤠᤱᤃᤠ᤹ ᤜᤠᤒᤠ ᤂᤧᤶᤔᤥᤀᤣ ᤋᤢᤶᤔᤠ ᤕᤠ᤺ᤶᤒᤰ ᤆᤥᤃᤢᤱ᤹. ᤜᤧᤰᤁᤩᤠᤱ ᤂᤧᤴ ᤛᤠ᤺ᤱᤃᤠᤜᤡᤶᤔᤡᤴ ᤀᤠᤱᤃᤠ᤹ ᤀᤠᤔᤡᤔᤡᤍᤡᤱᤅᤡᤸᤗᤧ ᤛᤣᤛᤣ ᤐᤥᤱ᤹॥ 44 “ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤡᤴ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤀᤠᤱᤃᤠ᤹ ᤛᤣᤛᤣ ᤆᤥᤃᤢᤱ᤹॥ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤀᤠᤱ ᤀᤠᤱᤃᤠ᤹ ᤀᤠᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠᤀᤥ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤛᤣᤛᤣ ᤆᤥᤃᤢᤱᤛᤡᤱ᤹॥ 45 ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤕᤠᤱᤎᤥ᤺ᤰᤁᤠ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠ॥ 46 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤘᤠ᤹ᤔᤠ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤡᤛᤪᤗᤠᤶ ᤁᤧᤗ᤺ᤵᤐᤠ ᤁᤧᤓᤧᤵᤐᤠᤴ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.