ᤗᤠᤶᤍᤡᤰ 28 - LIFOTNTᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤆᤠᤱ 1 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤁᤧᤶᤓᤢ᤹ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠ ᤏᤠᤍᤠᤒ. ᤀᤒᤡᤜᤢ. ᤀᤣᤗᤠᤈᤠᤖ ᤏᤢ ᤀᤡᤋᤠᤔᤠᤖᤧᤴ ᤀᤠᤱᤃᤠ᤹ᤀᤥ ᤀᤢ᤺ᤳᤋᤧ ᤋᤠᤖᤧᤛᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤖ॥ 2 ᤔᤡᤱᤛᤥ ᤌᤠᤱᤛᤥ ᤏᤢ ᤂᤧᤶᤛᤡᤱᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤧᤶᤓᤢ᤹ ᤜᤠᤖᤢᤏᤧᤸᤗᤧ ᤁᤢᤗᤠᤃᤡ ᤛᤣᤛᤣ ᤆᤠᤱᤜᤠ᤹ ᤋᤕᤧ᤹॥ 3 ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤀᤠᤰᤂᤩᤠᤖᤡᤰ ᤔᤧᤘᤠ᤹ ᤀᤠᤱᤃᤠ᤹ ᤂᤧᤱᤜᤠ᤹ ᤀᤰᤋᤱᤒᤠ ᤐᤠ᤺ᤴᤏᤥ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤖᤧ ᤁᤢᤎᤡᤶ ᤆᤥᤃᤢᤱᤛᤡᤱᤅᤠᤱ ᤔᤧᤘᤠ᤹. ᤂᤧᤱᤜᤠ᤹ᤖᤧ ᤜᤠᤖᤢᤏᤧᤴ ᤁᤴ ᤕᤠ᤺ᤶᤒᤰᤁᤥ ᤕᤢᤰᤋᤡᤱ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤁᤢᤈᤠᤱᤅᤡᤴ ᤕᤠᤖᤡᤵ ᤔᤧᤈᤥᤃᤢᤖ ᤑᤠ᤹ᤀᤠᤱ ᤂᤧᤏᤧ᤹ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ᤜᤧᤰᤁᤩᤠᤱ ᤂᤧᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠᤀᤥ ᤀᤠᤱᤃᤠ᤹ ᤀᤠᤗᤠᤃᤡ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥᤃᤢᤖ॥ 4 ᤂᤧᤱᤜᤠ᤹ᤖᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤆᤠᤱᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ—ᤛᤠ᤺ᤱᤒᤣ ᤛᤧ᤺ᤵᤆᤠᤱ. ᤀᤣᤐᤥᤍ. ᤗᤃᤣ᤺ᤵ. ᤌᤠᤰᤔᤏᤠᤒᤠ ᤋᤠᤃᤠᤘᤠ. ᤑᤧᤋᤠ ᤏᤢ ᤑ᤹ᤀᤡ॥ ᤆᤥ᤺ᤰᤔᤠᤖᤧ ᤗᤠᤃᤡ ᤆᤒᤣᤃᤢᤜᤠ᤹ ᤔᤧᤳᤋᤧᤛᤧ᤹॥ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤶᤓᤢ᤹ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠᤀᤥ ᤀᤠᤱᤃᤠ᤹ ᤀᤠᤗᤠᤃᤡ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤛᤧ ᤛᤣᤛᤣ ᤆᤠᤱᤜᤠ᤹ ᤋᤕᤧ᤹॥ 5 ᤂᤧᤱᤜᤠ᤹ᤖᤧ ᤛᤠᤶᤔᤩᤠᤱ. ᤜᤧᤰᤁᤩᤠᤱ ᤜᤡ᤺ᤰᤁᤱᤁᤱᤒᤠ. ᤐᤠᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤂᤡ ᤏᤢ ᤆᤢᤴᤈᤢᤶᤒᤠ ᤏᤤᤏᤠᤛᤢᤳ ᤆᤡᤖᤡᤰ ᤀᤥᤃᤵ ᤔᤧᤈᤥᤃᤢᤖ॥ ᤀᤣᤐᤥᤍ 6 “ᤂᤧᤱᤜᤠ᤹ᤖᤧ ᤀᤣᤐᤥᤍᤧᤴ ᤛᤠᤶᤔᤩᤠᤱᤅᤡᤸᤗᤧᤴ ᤔᤧᤈᤥᤃᤢᤖ. ᤜᤧᤰᤁᤩᤠᤱ ᤜᤡ᤺ᤰᤕᤱᤕᤱᤒᤠ. ᤐᤠᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤆᤠ᤺ᤶᤔᤏᤠᤒᤠ ᤂᤡ ᤏᤢ ᤆᤢᤴᤈᤢᤶᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧ ᤂᤢᤴᤇᤡ᤹ ᤜᤢᤰᤘᤠᤏᤢ᤹ᤖ ᤔᤧᤈᤥᤃᤢᤖ॥ 7 ᤀᤣᤐᤥᤍᤧᤴ ᤀᤡᤓᤢᤵᤔᤠᤖᤧ ᤗᤠᤃᤡ ᤑᤰᤋᤠᤱᤅᤥ ᤏᤧᤵᤔᤠᤱ ᤁᤢᤕᤠᤀᤥ ᤁᤢᤀᤡᤓᤢᤵᤔᤠᤜᤠ᤹ ᤏᤧᤳᤇᤡ ᤐᤳᤗ॥ 8 ᤂᤧᤸᤗᤧ ᤁᤢᤛᤶᤎᤠᤱ ᤁᤧᤒᤵᤐᤠ ᤛᤠ᤹ᤖᤡᤰ ᤏᤢᤖᤡᤰ ᤑᤔᤏᤠᤒᤠ ᤕᤢᤶᤔᤠ ᤑ᤹ᤀᤡ᤺ᤴ ᤀᤣᤐᤥᤍᤧᤸᤗᤧ ᤜᤠᤒᤠ ᤂᤧᤴ ᤁᤢᤄᤧᤸᤗᤧᤰᤁᤡᤸᤗᤧᤴ ᤏᤢ ᤜᤠᤒᤠ ᤜᤧᤰᤋᤱᤒᤠᤀᤣ ᤕᤠ᤺ᤶᤒᤰ ᤁᤧᤒᤥᤱᤒᤠ ᤛᤠᤶᤔᤩᤠᤱᤅᤡᤸᤗᤧᤴ ᤏᤢ ᤜᤡᤕ᤺ᤰᤕᤱᤕᤱᤒᤠ. ᤐᤠᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤂᤡ ᤏᤢ ᤆᤢᤴᤈᤢᤶᤒᤠ ᤗ᤹ᤖᤡᤰ ᤑᤔᤏᤠᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤐᤥᤱᤗ॥ 9 “ᤂᤧᤏᤧ᤹ ᤏᤧᤳᤇᤡ ᤀᤏᤡᤰᤛ ᤔᤠᤱᤗᤢᤱᤜᤠ᤹ ᤕᤠᤱᤛᤡᤱᤅᤧ᤹ᤀᤠᤱ ᤂᤧᤵᤔᤥ ᤀᤡᤛᤪᤠᤀᤡᤗᤖᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤜᤠ᤹ ᤗᤰᤋᤧ᤹॥ 10 ᤂᤧᤱᤜᤠ᤹ ᤛᤠᤔᤧᤘᤠ᤺ᤴᤇᤡᤱᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤀᤥᤒᤠ ᤋᤢᤰᤛᤡᤖᤧ ᤂᤢᤴᤇᤡ᤹ ᤔᤡᤱᤜᤠ᤹ ᤗᤳᤇᤠ ᤔᤠᤱᤗᤢᤱᤅᤥ ᤜᤧᤰᤁᤩᤠᤱ ᤘᤣ᤹ ᤋᤢᤰᤛᤡᤖᤧ ᤂᤢᤴᤇᤡ᤹ ᤔᤡᤱᤜᤠ᤹ ᤘᤣ᤹ᤛᤔᤠ ᤔᤠᤱᤗᤢᤱᤅᤥ ᤗᤰᤋᤧ᤹॥ 11 ᤔᤠᤱᤗᤢᤱ ᤁᤧᤗᤰᤐᤠ ᤆᤒᤣᤃᤢ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤗᤰᤋᤢ. ᤜᤧᤰᤁᤣᤗ᤹ᤖᤡᤰᤁᤣ ᤂᤧᤴ ᤏᤧᤵᤔᤠᤱ ᤔᤠᤱᤗᤢᤱᤜᤠ᤹ᤀᤥ ᤀᤡᤛᤪᤠᤀᤡᤗᤒᤠ ᤕᤧᤶᤒᤡᤳᤇᤠ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤜᤠ᤹ ᤗᤰᤋᤧ᤹॥ ᤂᤧᤒᤩᤠᤱ ᤂᤧᤏᤧ᤹ ᤏᤢᤒᤠ ᤛᤠᤶᤔᤩᤠᤱ ᤁᤢᤕᤢᤱᤔᤠᤍᤧᤴᤏᤥ ᤂᤧᤴ ᤔᤠᤱᤗᤢᤱᤜᤠ᤹ ᤑᤶᤔᤠ ᤐᤠᤱᤄᤧᤛᤧ᤹॥ 12 ᤂᤧᤴ ᤏᤧᤵᤔᤠᤱ ᤔᤠᤱᤗᤢᤱᤜᤠ᤹ ᤀᤣᤐᤥᤍᤒᤠ ᤑᤰᤋᤠᤱ ᤑᤰᤋᤠᤱᤅᤥ ᤀᤡᤛᤪᤠᤀᤡᤗᤒᤠ ᤕᤧᤶᤒᤡᤳᤇᤠ ᤛᤠᤜᤠ᤹ᤖᤧ ᤗᤠᤃᤡ ᤏᤡᤱᤘᤠ᤹ᤛᤥᤰ ᤔᤠᤱᤗᤢᤱ ᤐᤥᤱᤔᤠᤖᤧ ᤗᤠᤃᤡ ᤑᤳᤇᤧ᤹. ᤜᤧᤰᤁᤩᤠᤱ ᤜᤠᤖᤢᤏᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤅᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤀᤠᤒᤠᤅᤣ ᤑᤰᤋᤠᤱᤅᤥ ᤏᤡᤱᤘᤠ᤹ᤛᤥᤰᤗᤧ ᤗᤠᤃᤡ ᤐᤰᤂᤢᤖ ᤐᤥᤱ᤹॥ 13 ᤜᤧᤰᤁᤩᤠᤱ ᤂᤧᤏᤧ᤹ ᤏᤢᤒᤠ ᤛᤠᤶᤔᤩᤠᤱ ᤁᤢᤕᤢᤱᤔᤠᤍᤧᤴ ᤑᤳᤇᤧ᤹॥ 14 ᤀᤡᤍᤠᤰ ᤜᤧᤰᤁᤣ ᤔᤠ᤺ᤵᤔᤏᤠᤒᤠ ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ ᤏᤧᤳᤇᤡ ᤛᤠᤶᤔᤩᤠᤱ ᤛᤡᤰᤁᤪᤡ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤴ ᤔᤠ᤺ᤵᤔᤏᤠᤒᤠ ᤛᤠᤶᤔᤩᤠᤱ ᤛᤡᤰᤁᤪᤡ᤺ᤴ ᤂᤧᤴ ᤏᤢᤒᤠ ᤛᤠᤶᤔᤩᤠᤱ ᤁᤢᤕᤢᤱᤔᤠᤍᤧᤴᤏᤥ ᤘᤣ᤹ᤖᤧ᤹ᤀᤥ॥ ᤛᤠ᤺ᤱᤒᤣ ᤛᤧ᤺ᤵᤆᤠᤱ ( ᤗᤠ ᥉᥏:᥎-᥈᥇ ) 15 “ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥ᤺ᤰᤔᤠᤖᤧ ᤗᤠᤃᤡ ᤛᤠ᤺ᤱᤒᤣ ᤛᤧ᤺ᤵᤆᤠᤱᤅᤡᤴ ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤁᤧᤗᤧᤒᤠ ᤆᤥᤒᤣᤃᤢᤗᤠᤶ ᤆᤥᤃᤧ᤹. ᤀᤣᤐᤥᤍᤧᤴ ᤆᤥ᤺ᤰᤔᤏᤠᤒᤠ ᤁᤢᤀᤡᤛᤡ᤺ᤰᤁᤣ ᤂᤧᤴᤏᤠᤱ ᤛᤠᤶᤔᤩᤠᤱ ᤏᤢ ᤜᤡ᤺ᤰᤕᤱᤕᤱᤒᤠ. ᤐᤖᤠᤴᤗᤠ ᤜᤧ᤺ᤳᤋᤠᤱᤒᤠ ᤆᤠ᤺ᤶᤔᤏᤠᤒᤠ ᤂᤡ ᤜᤧᤰᤁᤩᤠᤱ ᤆᤢᤴᤈᤢᤴ ᤗ᤹ᤖᤡᤰ ᤑᤔᤏᤠᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤐᤥᤱᤗ॥ 16 ᤂᤧᤴ ᤁᤢᤍᤱᤒᤠ ᤁᤢᤗᤠᤶᤋᤡ ᤏᤢ ᤁᤢᤓᤧᤖᤧ ᤁᤧᤒᤵᤐᤠ ᤗᤡᤛᤡ ᤁᤢᤛᤢᤰᤐᤠ ᤆᤥᤃᤧ᤹ᤀᤠᤱ ᤁᤢᤗᤢᤶᤔᤥ ᤑᤠᤰᤋᤧ᤹॥ ᤂᤧᤸᤗᤧ ᤁᤢᤗᤠᤶᤋᤡ᤺ᤴ ᤐᤡᤳᤋᤠ ᤌᤡᤰ ᤏᤢ ᤁᤢᤓᤧᤖᤧ᤺ᤴᤏᤠᤱ ᤐᤡᤳᤋᤠ ᤌᤡᤰᤐᤠᤀᤣ ᤐᤥᤱᤗ॥ 17 ᤂᤧᤒᤩᤠᤱ ᤂᤧᤏᤧ᤹ ᤂᤧ᤹ᤕᤥ ᤁᤢᤍᤡ᤺ᤰᤗᤠ ᤗᤡᤛᤡ ᤀᤡᤔᤧᤸᤗᤢᤱᤒᤠ ᤔᤢᤎᤡᤱᤜᤠ᤹ ᤋᤡ᤺ᤰᤂᤧ᤹. ᤌᤡᤰᤛᤡᤃᤣᤰᤐᤠ ᤁᤢᤍᤡ᤺ᤰᤗᤠ᤺ᤴ ᤜᤧ᤺ᤋᤩᤱᤕᤱᤒᤠ ᤔᤢᤎᤡᤱᤗᤢᤱ. ᤜᤡ᤺ᤰᤕᤱᤕᤱᤒᤠ ᤔᤢᤎᤡᤱᤗᤢᤱ ᤏᤢ ᤀᤶᤍᤠᤱᤒᤠ ᤔᤢᤎᤡᤱᤗᤢᤱ ᤐᤥᤱᤗ॥ 18 ᤏᤡᤛᤡᤃᤣᤰᤐᤠ ᤁᤢᤍᤡ᤺ᤰᤗᤠᤀᤥ ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤔᤢᤎᤡᤱᤗᤢᤱ. ᤁᤢᤓᤡᤱᤗᤠ ᤔᤢᤎᤡᤱᤗᤢᤱ ᤏᤢ ᤗᤣ᤺ᤳᤋᤠᤱᤒᤠ ᤔᤢᤎᤡᤱᤗᤢᤱᤗᤧᤴ. 19 ᤛᤢᤶᤛᤡᤃᤣᤰᤐᤠ ᤁᤢᤍᤡ᤺ᤰᤗᤠᤀᤥ ᤔᤠᤰᤁᤢᤶ ᤁᤧᤗ᤹ᤒᤠ ᤁᤢᤜᤧ᤺ᤳᤗᤠ ᤔᤢᤎᤡᤱᤗᤢᤱ. ᤘᤖᤧᤱᤗᤧᤱᤒᤠ ᤁᤢᤜᤡ᤺ᤰᤗᤠ ᤁᤢᤜᤧ᤺ᤳᤗᤠ ᤔᤢᤎᤡᤱᤗᤢᤱ ᤏᤢ ᤐᤠᤖᤠᤴᤗᤠ ᤆᤠ᤺ᤶᤒᤠ ᤔᤢᤎᤡᤱᤗᤢᤱᤗᤧᤴ. 20 ᤗᤡᤛᤡᤃᤣᤰᤐᤠ ᤁᤢᤍᤡ᤺ᤰᤗᤠᤀᤥ. ᤏᤢᤎᤡ ᤆᤠ᤺ᤶᤒᤠ ᤔᤢᤎᤡᤱᤗᤢᤱ. ᤀᤏᤡᤰᤛ ᤔᤢᤎᤡᤱᤗᤢᤱ ᤏᤢ ᤀᤶᤀᤶ ᤁᤧᤗ᤹ᤒᤠ ᤔᤢᤎᤡᤱᤗᤢᤱᤗᤧᤴ ᤐᤥᤱᤗ॥ ᤁᤴᤜᤠ᤹ ᤁᤧᤖᤧᤰ ᤛᤠᤶᤔᤩᤠᤱ ᤁᤢᤈᤰᤔᤥ ᤔᤧᤈᤰᤋᤢᤖ ᤕᤠ᤺ᤴᤍᤧᤛᤧ᤹॥ 21 ᤂᤧᤴ ᤔᤢᤎᤡᤱᤗᤢᤱᤜᤠ᤹ ᤀᤡᤛᤪᤠᤀᤡᤗᤒᤠ ᤕᤧᤶᤒᤡᤳᤇᤠ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤜᤠ᤹ ᤁᤢᤀᤡᤛᤡᤰ ᤌᤡᤒᤥᤱᤅᤠᤱ ᤏᤧᤳᤇᤡ ᤐᤥᤱᤗ॥ ᤁᤧᤖᤧᤰ ᤗᤰᤔᤏᤠᤀᤠᤱ ᤁᤧᤒᤵᤐᤠ ᤁᤢᤀᤡᤛᤡᤰ ᤌᤡᤒᤥᤱᤅᤠᤱ ᤏᤧᤳᤇᤡ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤗᤳᤇᤠ ᤗᤢᤱᤅᤥ ᤌᤠ᤺ᤰᤌᤰᤔᤠᤒᤠ ᤗᤳᤇᤠ ᤔᤡᤱ ᤐᤳᤗ ᤐᤥᤱ᤹॥ 22 “ᤛᤠ᤺ᤱᤒᤣ ᤛᤧ᤺ᤵᤆᤠᤱᤗᤧ ᤗᤠᤃᤡ ᤀᤡᤍᤠᤰ ᤜᤧᤰᤁᤣ ᤔᤠ᤺ᤵᤔᤏᤠᤒᤠ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱ ᤛᤡᤁᤪᤡᤜᤠ᤹ ᤆᤥᤃᤧ᤹॥ 23 ᤂᤧᤏᤧ᤹ ᤂᤧᤸᤗᤧ ᤗᤠᤃᤡ ᤛᤠᤶᤔᤩᤠᤱ ᤁᤢᤴᤍᤢᤸᤗᤥ ᤏᤧᤳᤇᤡ ᤆᤥᤃᤧ᤹ᤀᤠᤱ ᤛᤠ᤺ᤱᤒᤣ ᤛᤣ᤺ᤵᤆᤠᤱᤅᤡᤸᤗᤧ ᤌᤠ᤺ᤱ ᤗᤧᤵᤔᤠᤱᤒᤠ ᤏᤧᤵᤔᤠᤱ ᤁᤢᤛᤢᤰᤐᤥ ᤑᤳᤇᤧ᤹॥ 24 ᤂᤧᤴ ᤛᤠᤶᤔᤩᤠᤱ ᤛᤡᤰᤁᤪᤡᤜᤠ᤹ ᤛᤠ᤺ᤱᤒᤣ ᤛᤣ᤺ᤵᤆᤠᤱᤅᤡᤸᤗᤧ ᤁᤢᤕᤠᤀᤥ ᤁᤧᤒᤵᤐᤠ ᤂᤧᤴ ᤁᤢᤴᤍᤢᤸᤗᤥᤜᤠ᤹ᤀᤥ ᤑᤳᤇᤧ᤹॥ 25 ᤏᤧᤵᤔᤠᤱ ᤛᤡᤰᤁᤪᤡ᤺ᤸᤗᤧ ᤘᤣ᤹ ᤏᤧᤳᤇᤡ ᤁᤢᤕᤠᤜᤠ᤹ ᤂᤧᤴ ᤏᤧᤵᤔᤠᤱ ᤁᤢᤕᤢᤱᤔᤠᤍᤧᤴᤏᤥ ᤆᤰᤋᤧ᤹ᤀᤠᤱ ᤀᤣᤐᤥᤍᤒᤠ ᤑᤰᤋᤠᤱᤅᤥᤏᤢ ᤕᤥ ᤐᤧᤷᤜᤣ᤺ᤰ ᤁᤧᤎᤠᤒᤠ ᤑ᤹ᤀᤡ᤺ᤴᤏᤢ ᤂᤧᤴ ᤋᤃᤠᤱ ᤗᤧᤵᤔᤠᤱ ᤋᤢᤶᤛᤧ᤹॥ 26 ᤕᤠᤶᤔᤥ ᤛᤠᤶᤔᤩᤠᤱ ᤁᤢᤴᤍᤢᤸᤗᤥ ᤏᤧᤳᤇᤡ ᤆᤥᤃᤧ᤹ᤀᤠᤱ ᤛᤠ᤺ᤱᤒᤣ ᤛᤧ᤺ᤵᤆᤠᤱᤅᤥ ᤕᤥᤛᤔᤠ ᤘᤣ᤹ ᤏᤧᤵᤔᤠᤱ ᤁᤢᤛᤢᤰᤐᤥ ᤀᤣᤐᤥᤍ ᤗᤧᤵᤔᤠᤱ ᤛᤡᤃᤠᤱ ᤐᤡᤛᤠᤱ ᤁᤢᤒᤣᤀᤥ ᤋᤢᤶᤛᤧ᤹॥ 27 ᤛᤠᤶᤔᤩᤠᤱᤅᤡᤸᤗᤧᤴ ᤀᤠᤸᤗᤛᤠᤱ ᤁᤢᤴᤍᤢᤸᤗᤥ ᤏᤧᤳᤇᤡ ᤆᤥᤃᤧ᤹ᤀᤠᤱ ᤀᤣᤐᤥᤍᤧᤸᤗᤧ ᤋᤃᤡ ᤗᤧᤵᤔᤠᤱ ᤏᤧᤵᤔᤠᤱ ᤑᤰᤋᤠᤱᤅᤥᤒᤠ ᤐᤧᤷᤜᤣ᤺ᤰ ᤁᤧᤎᤠᤒᤠ ᤑ᤹ᤀᤡ᤺ᤸᤗᤧ ᤁᤢᤛᤡᤃᤠᤱᤗᤠᤶ ᤏᤢ ᤀᤣᤐᤥᤍᤒᤠ ᤕᤢᤶᤔᤏᤠᤒᤠ ᤑ᤹ᤀᤡ᤺ᤴᤏᤢ ᤋᤢᤶᤛᤧ᤹॥ 28 ᤛᤠ᤺ᤱᤒᤣ ᤛᤧ᤺ᤵᤈᤠᤱᤅᤡᤱᤃ ᤂᤧᤵᤔᤥᤒᤠ ᤁᤢᤴᤍᤥᤸᤗᤥᤜᤠ᤹ᤗᤠᤶ ᤀᤣᤐᤥᤍᤀᤥᤒᤠ ᤁᤢᤴᤍᤥᤸᤗᤥᤜᤠ᤹ᤀᤥ ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤁᤢᤏᤠᤶᤔᤡᤸᤗᤧ ᤁᤧᤱᤅᤥ ᤕᤢᤶᤔᤏᤠᤒᤠ ᤑ᤹ᤀᤡᤀᤥ ᤂᤣ᤺ᤰᤂᤧ᤹. ᤜᤧᤰᤁᤣᤗ᤹ᤖᤡᤰ ᤀᤣᤐᤥᤍᤀᤥᤗᤠᤶ ᤂᤧᤴ ᤘᤠ᤺ᤱᤛ᤺ᤰᤛ᤺ᤰᤐᤠ ᤔᤧᤒᤥᤱᤏᤧᤴ॥ 29 “ᤀᤠᤸᤗ ᤜᤠᤖᤢᤏᤧᤴ ᤛᤣᤛᤣᤒᤠᤍᤧᤴᤏᤥ ᤗᤠ᤺ᤳᤋᤡᤸᤗᤧ ᤂᤢᤏᤧ᤹ ᤁᤢᤗᤢᤱᤔᤠ᤹ ᤛᤶᤎᤠᤱ ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥ᤺ᤰᤔᤠᤖᤧ ᤗᤠᤃᤡ ᤛᤠ᤺ᤱᤒᤣ ᤛᤧ᤺ᤵᤆᤠᤱᤅᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤆᤰᤔᤧᤸᤗ᤹ᤔᤏᤠᤒᤠ ᤏᤡᤱᤘᤠ᤹ᤛᤥᤰᤗᤧ ᤗᤠᤃᤡ ᤀᤡᤛᤪᤠᤀᤡᤗᤖᤧ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤜᤠ᤹ ᤐᤰᤂᤢᤖ॥ 30 ᤂᤧᤏᤧ᤹ ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥ᤺ᤰᤔᤠᤖᤧ ᤗᤠᤃᤡ ᤛᤠ᤺ᤱᤒᤣ ᤛᤧ᤺ᤵᤆᤠᤱᤅᤥ ᤀᤢᤖᤡᤔ ᤏᤢ ᤋᤢᤶᤔᤡᤔ ᤑᤳᤇᤧ᤹. ᤜᤧᤰᤁᤣᤗ᤹ᤖᤡᤰ ᤜᤠᤖᤢᤏᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤐᤣ᤺ᤰᤌᤰᤔᤠ ᤂᤧᤱᤜᤠ᤹ ᤂᤢᤏᤧ᤹ ᤁᤢᤗᤢᤱᤔᤠ᤹ᤀᤥ ᤂᤧᤴ ᤘᤠ᤹ᤖ॥ ᤁᤶᤓᤗ᤹ᤖᤡᤰ ᤜᤠᤖᤢᤏᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤠᤛᤧᤴ ᤆᤥ᤺ᤰᤔᤠ ᤆᤡᤃᤰᤘᤠᤜᤠ᤹ ᤂᤢᤏᤧ᤹ ᤁᤢᤏᤡᤱᤘᤠ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤆᤰᤔᤧᤸᤗ᤹ᤀᤣ ᤐᤰᤂᤢ ᤁᤳᤋᤢᤖᤖᤥ॥ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤘᤣ᤹ ᤆᤠᤱᤜᤠ᤹ ( ᤗᤠ ᥉᥏:᥈᥈-᥉᥇ ) 31 “ᤂᤧᤏᤧ᤹ ᤀᤣᤐᤥᤍᤖᤧ ᤁᤢᤛᤡᤱᤃᤠᤱᤒᤠ ᤁᤧᤖᤧᤰ ᤗᤃᤣ᤺ᤵᤐᤡᤴ ᤜᤡ᤺ᤰᤕᤱᤕᤱᤒᤠ ᤆᤡᤖᤡᤰᤁᤡᤸᤗᤧᤴ ᤆᤥᤃᤧ᤹॥ 32 ᤂᤧᤸᤗᤧ ᤁᤢᤗᤢᤶᤔᤥ ᤌᤧᤃᤣᤰ ᤗᤡ᤺ᤱᤔᤠᤖᤧ ᤗᤠᤃᤡ ᤁᤢᤜᤱᤎᤡᤰ ᤑᤳᤇᤧ᤹. ᤜᤧᤰᤁᤩᤠᤱ ᤔᤧᤍᤧ᤺ᤱᤏᤧᤸᤗ ᤑᤠ᤹ᤀᤠᤱ ᤁᤢᤜᤱᤅᤡᤸᤗᤧ ᤁᤢᤶᤒᤪᤠ᤺ᤴ ᤁᤧᤎᤢᤶᤒᤠ ᤆᤥ᤺ᤰᤔᤠᤖᤧ ᤗᤠᤃᤡ ᤁᤧᤖᤧᤰ ᤑᤔᤏᤠᤒᤠ ᤁᤢᤕᤠ ᤆᤥᤃᤧ᤹॥ 33 ᤂᤧᤸᤗᤧ ᤁᤢᤛᤡᤃᤠᤱᤒᤠ ᤁᤢᤕᤠᤀᤥ ᤜᤡ᤺ᤰᤕᤱᤕᤱᤒᤠ. ᤐᤠᤖᤠᤴᤗᤠ ᤏᤢ ᤜᤧ᤺ᤳᤋᤠᤱᤒᤠ ᤂᤡ᤺ᤸᤗᤧ ᤑᤢ᤹ᤗᤧᤛᤣ᤹ ᤁᤢᤓᤢᤱᤜᤠ᤹ ᤗᤰᤋᤧᤀᤠᤱ ᤑᤳᤇᤧ᤹ ᤜᤧᤰᤁᤩᤠᤱ ᤁᤢᤗᤢᤶᤔᤥ ᤁᤢᤗᤢᤶᤔᤥ ᤛᤠᤶᤔᤩᤠᤱ ᤐ᤺ᤱᤃᤣ᤹ᤜᤠ᤹ ᤑᤥ᤺ᤴᤍᤧ᤹॥ 34 ᤗᤳᤇᤠ ᤛᤠᤶᤔᤩᤠᤱ ᤐ᤺ᤱᤃᤣ᤹ ᤏᤢ ᤕᤠᤶᤔᤥ ᤗᤳᤇᤠ ᤑᤢ᤹ᤗᤧᤛᤣ᤹ ᤆᤢᤰᤗ ᤗᤃᤣ᤺ᤳᤋᤡᤸᤗᤧ ᤁᤒᤪᤡᤱ ᤐᤡᤛᤠᤱ ᤐᤳᤗ॥ 35 ᤜᤠᤖᤢᤏᤧᤸᤗᤧ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥᤃᤢᤸᤗᤧ ᤂᤧᤴ ᤆᤠᤰᤂᤢᤖ॥ ᤛᤣᤛᤣᤒᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤜᤠᤖᤢᤏᤧᤴ ᤛᤡᤃᤠᤱ ᤗᤠ᤺ᤳ ᤜᤧᤰᤁᤩᤠᤱ ᤗᤠ᤺ᤰᤁᤠᤳ ᤗ᤺ᤴᤏᤡᤸᤗᤧ ᤂᤢᤏᤧ᤹ ᤁᤢᤀᤡᤰᤗᤠᤴ ᤂᤧᤶᤍᤧᤳᤗ ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤛᤡᤏᤧᤴᤗ॥ 36 “ᤂᤧᤏᤧ᤹ ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ ᤑᤧᤔᤏᤠᤒᤠ ᤗᤧᤵᤐᤧᤵᤐᤠ ᤌᤡᤰ ᤆᤥᤃᤧ᤹ᤀᤠᤱ ᤂᤧᤵᤔᤥ ᤛᤫᤠᤃᤣ᤺ᤵᤐᤡᤸᤗᤧ ᤁᤢᤕᤥᤰ ᤗᤰᤔᤏᤠᤒᤠ ᤜᤧᤰᤁᤣ ᤁᤴ ᤐᤠ᤺ᤴᤏᤡᤴ ‘ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤛᤣᤛᤣ ᤋᤥ᤺ᤶᤔᤏᤠᤒᤠ’ ᤑᤠ᤹ᤀᤠᤱ ᤗᤰᤋᤧ᤹॥ 37 ᤜᤡ᤺ᤰᤕᤱᤕᤱᤒᤠ ᤁᤢᤏᤠᤶᤔᤡᤸᤗᤧ ᤑᤧᤋᤠᤀᤥ ᤂᤧᤴ ᤀᤡᤄᤣ᤺ᤰᤂᤧ᤹. ᤜᤧᤰᤁᤩᤠᤱ ᤂᤧᤴ ᤑᤧᤋᤠᤴ ᤋᤃᤠᤱ ᤐᤳᤗ॥ 38 ᤜᤠᤖᤢᤏᤧᤸᤗᤧ ᤁᤢᤍᤫᤠᤒᤥ ᤂᤧᤴ ᤐᤳᤗ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤣᤛᤣ ᤜᤢᤰᤘᤠᤕᤠᤱ ᤆᤩᤠ ᤔᤧᤍᤥᤴᤍᤢ᤹. ᤂᤧᤴ ᤛᤣᤛᤣ ᤆᤡᤃᤰᤘᤠᤜᤠ᤹ᤖᤧ ᤀᤠᤵᤋᤡᤰᤁᤡᤴ ᤜᤠᤖᤢᤏᤧᤸᤗᤧ ᤋᤠ᤺ᤰᤋᤢᤖ॥ ᤂᤧᤴ ᤆᤰᤔᤧᤸᤗ᤹ᤀᤣ ᤂᤧᤸᤗᤧ ᤁᤢᤍᤫᤠᤒᤥᤀᤣ ᤐᤳᤁᤴ॥ ᤁᤶᤓᤗ᤹ᤖᤡᤰ ᤂᤧᤴ ᤜᤢᤰᤘᤠ ᤕᤠᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤋᤠ᤺ᤰᤔᤠ ᤛᤢᤶᤒᤶᤎᤥᤒᤠ ᤐᤥᤱᤗ॥ 39 “ᤗᤃᤣ᤺ᤵᤐᤡᤴ ᤆᤢᤴᤈᤢᤶᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤆᤥᤃᤧ᤹ ᤜᤧᤰᤁᤩᤠᤱ ᤑᤧᤋᤠ᤺ᤴᤏᤠᤱ ᤆᤢᤴᤈᤢᤶᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤆᤥᤃᤧ᤹॥ ᤁᤢᤓᤢᤱ ᤗᤰᤔᤏᤠᤒᤠ ᤑ᤹ᤀᤡᤀᤠᤱ ᤆᤥᤃᤧ᤹॥ 40 “ᤂᤧᤏᤧ᤹ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤗᤃᤣ᤺ᤵ. ᤑ᤹ᤀᤡ ᤏᤢ ᤐᤠᤃᤖᤡᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤛᤥ ᤀᤡᤱᤎᤠᤱ ᤏᤢ ᤂᤧᤶᤛᤡᤱᤔᤠᤖᤧ ᤗᤠᤃᤡ ᤆᤥᤃᤧ᤹॥ 41 ᤂᤧᤴ ᤆᤠᤱᤘᤠ᤺ᤴᤜᤠ᤹ ᤂᤧᤏᤧ᤹ ᤁᤧᤶᤓᤢ᤹ ᤏᤢ ᤁᤢᤛ᤻ᤛᤠᤜᤠ᤹ ᤆᤠᤰᤋᤧᤛᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤠᤱᤌᤥ᤺ᤰᤏᤠ ᤐᤡᤖᤧᤛᤧ᤹ᤀᤠᤱ ᤕᤢᤰᤋᤡᤱ ᤆᤥᤃᤧᤛᤧ᤹॥ ᤂᤧᤱᤜᤠ᤹ ᤛᤣᤛᤣ ᤆᤥᤃᤧᤛᤧ᤹. ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠᤀᤥ ᤀᤠᤱᤃᤠ᤹ ᤀᤠᤗᤠᤃᤡ ᤔᤠᤱᤛᤧᤘᤠ ᤕᤠ᤺ᤶᤒᤰ ᤔᤧᤈᤥᤃᤢᤖ॥ 42 “ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤎᤰᤁᤡᤴ ᤋᤧᤵᤔᤠᤖᤧ ᤗᤠᤃᤡ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤛᤡᤃᤠᤱ ᤆᤠᤱᤔᤠ ᤋ᤹ᤖᤧᤛᤧ᤹॥ ᤂᤧᤴ ᤆᤠᤱᤜᤠ᤹ ᤛᤠᤵᤐᤥ᤺ᤰᤁᤥᤏᤢ ᤕᤥ ᤗᤠᤱᤛᤧᤒᤱᤒᤥ ᤌᤧᤶᤒᤠ ᤁᤧᤳᤗ॥ 43 ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤔᤧᤗᤠ᤺ᤳᤋᤡᤸᤗᤧ ᤀᤡᤃᤪ ᤛᤣᤛᤣᤍᤧᤴᤏᤥ ᤔᤠᤱᤛᤧᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤔᤧᤍᤠ᤺ᤸᤗᤧ ᤂᤧᤴ ᤆᤠᤱᤜᤠ᤹ ᤔᤧᤈᤠᤰᤂᤢᤖ. ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤀᤠᤵᤋᤡᤰᤛᤠᤒᤠ ᤔᤧᤶᤒᤥᤱᤏᤧᤴᤏᤠᤱ ᤔᤧᤴᤇᤡᤏᤧᤴᤗ॥ “ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧᤴ ᤑᤠ᤹ᤀᤠᤱ ᤁᤴ ᤀᤠᤵᤑᤠᤸᤗᤧᤛᤠᤱ ᤛᤍᤠᤍᤡᤱᤗᤧ ᤗᤠᤃᤡ ᤗᤳᤇᤠ ᤛᤠᤶᤕᤥᤛᤠᤰᤌᤡᤶ ᤐᤥᤱᤗᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.