ᤗᤠᤶᤍᤡᤰ 26 - LIFOTNTᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣ ᤛᤠ᤺ᤱᤃᤠᤜᤡᤶ ( ᤗᤠ ᥉᥌:᥎-᥉᥎ ) 1 “ᤂᤧᤏᤧ᤹ ᤌᤡᤒᤥᤱ ᤑᤥ᤺ᤴᤍᤠ ᤁᤧᤒᤵᤐᤠ ᤛᤣᤛᤣᤍᤧᤴ ᤌᤡᤰ ᤆᤥᤃᤧ᤹॥ ᤂᤧᤴ ᤑᤥ᤺ᤴᤍᤠᤜᤠ᤹ ᤆᤢᤴᤈᤢᤴ ᤗ᤹ᤖᤡᤰ ᤑᤔᤏᤠᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤏᤢ ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ. ᤐᤠᤖᤠᤴᤗᤠ ᤜᤧᤰᤁᤩᤠᤱ ᤜᤧ᤺ᤳᤋᤠᤱᤒᤠ ᤆᤠ᤺ᤶᤔᤏᤠᤒᤠ ᤛᤧᤔᤢᤖᤡᤰᤁᤧᤸᤗᤧᤴ ᤐᤥᤱᤗ ᤐᤥᤱ᤹॥ ᤂᤧᤱᤜᤠ᤹ᤀᤥ ᤁᤧᤗᤧᤒᤠ ᤆᤥᤒᤣᤃᤢᤒᤠᤜᤠ᤹ᤖᤧ ᤕᤠ᤺ᤶᤒᤰ ᤔᤧᤈᤥᤃᤢᤒᤠ ᤁᤖᤢᤒᤜᤠ᤹ᤀᤠᤱ ᤂᤧᤏᤧ᤹ ᤆᤥᤃᤧ॥ 2 ᤁᤧᤖᤧᤰ ᤑᤥ᤺ᤴᤍᤠᤜᤠ᤹ᤖᤧ ᤁᤢᤗᤠᤶᤋᤡᤴ ᤏᤡᤒᤥᤱᤅᤠᤱ ᤕᤧᤳᤇᤡ ᤜᤢᤰᤛᤡᤰ ᤏᤢ ᤁᤢᤓᤧᤖᤧᤴ ᤜᤢᤰᤛᤡᤰ ᤗᤡᤛᤡ ᤁᤧᤒᤵᤐᤠ ᤐᤥᤱᤗ॥ ᤁᤧᤖᤧᤰ ᤑᤥ᤺ᤴᤍᤠᤜᤠ᤹ ᤗᤳᤇᤠ ᤐᤖᤡᤰᤗᤧ ᤁᤢᤛᤡ᤺ᤰᤔᤠ ᤁᤧᤒᤵᤐᤠ ᤐᤥᤱᤗ॥ 3 ᤅᤠᤛᤡ ᤑᤥ᤺ᤴᤍᤠᤜᤠ᤹ ᤛᤥᤖᤡᤰ ᤆᤰᤋᤧ᤹. ᤜᤧᤰᤁᤩᤠᤱ ᤘᤣ᤹ ᤅᤠᤛᤡᤜᤠ᤹ᤀᤠᤱ ᤜᤧᤰᤁᤣᤗ᤹ᤖᤡᤰᤁᤣ ᤆᤰᤋᤧ᤹॥ 4 ᤌᤡᤰᤛᤡᤃᤣᤰᤐᤠ ᤆᤰᤔᤏᤠᤒᤠᤸᤗᤧ ᤁᤢᤗᤰᤁᤡᤸᤗᤧ ᤌᤡᤰᤛᤔᤠ ᤑᤥ᤺ᤴᤍᤠ᤺ᤸᤗᤧ ᤁᤢᤕᤠᤀᤥ ᤜᤡ᤺ᤰᤕᤱᤕᤱᤒᤠ ᤁᤢᤘᤣ᤹ᤔᤠ ᤆᤥᤃᤧ᤹॥ ᤏᤡᤛᤡᤃᤣᤰᤐᤠ ᤆᤰᤔᤏᤠᤒᤧᤸᤗᤧ ᤁᤢᤗᤰᤁᤡᤴ ᤌᤡᤰᤛᤔᤠ ᤑᤥ᤺ᤴᤍᤠ᤺ᤸᤗᤧ ᤁᤢᤕᤠᤀᤥᤀᤠᤱ ᤜᤧᤰᤋᤱᤒᤠᤀᤣ ᤆᤥᤃᤧ॥ 5 ᤗᤳᤇᤠ ᤑᤥ᤺ᤴᤍᤠᤀᤥ ᤅᤠᤒᤥᤱ ᤀᤡᤛᤪᤢᤵᤐᤠ ᤑᤳᤇᤧ᤹. ᤜᤧᤰᤁᤩᤠᤱ ᤏᤡᤛᤡᤃᤣᤰᤐᤠ ᤆᤰᤔᤏᤠᤒᤠ ᤁᤢᤗᤰᤁᤡᤸᤗᤧ ᤏᤠᤜᤠᤱ ᤗᤧᤵᤔᤠᤱᤒᤠ ᤑᤥ᤺ᤴᤍᤠᤀᤥ ᤅᤠᤒᤥᤱ ᤀᤡᤛᤪᤢᤵᤐᤠ ᤑᤳᤇᤧ᤹॥ ᤂᤧᤴ ᤀᤡᤛᤪᤢᤵᤐᤠᤜᤠ᤹ ᤏᤠ ᤏᤢ ᤁᤳᤏᤠ ᤋᤢᤶᤍᤢᤶᤒᤠ ᤐᤳᤗ ᤐᤥᤱ᤹॥ 6 ᤂᤧᤒᤩᤠᤱ ᤅᤠᤒᤥᤱ ᤛᤠᤶᤔᤩᤠᤱ ᤂᤧ᤺ᤰᤆᤢᤖᤡᤜᤠ᤹ ᤆᤥᤃᤧ᤹ᤀᤠᤱ ᤑᤥ᤺ᤴᤍᤠᤜᤠ᤹ ᤌᤡᤰᤏᤢ ᤘᤣ᤹ᤀᤡᤴ ᤂᤧ᤺ᤰᤆᤢᤖᤡᤜᤠ᤹ᤖᤧ ᤋᤢᤶᤛᤧ᤹. ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤴ ᤗᤳᤇᤠ ᤐᤥᤱ᤹॥ 7 “ᤛᤣᤛᤣᤍᤧᤴᤏᤡᤸᤗᤧ ᤁᤢᤛᤶᤎᤠᤱ ᤂᤠᤵᤔᤠᤖᤧ ᤗᤠᤃᤡ ᤔᤧ᤺ᤴᤍᤠᤰ ᤔᤢᤖᤡᤰᤁᤡᤸᤗᤧᤴ ᤑᤥ᤺ᤴᤍᤠᤜᤠ᤹ ᤆᤥᤃᤧ᤹॥ ᤂᤧᤏᤧ᤹ ᤁᤧᤖᤧᤰᤗᤧ ᤌᤡᤒᤥᤱᤅᤠᤱ ᤌᤡᤰ ᤑᤥ᤺ᤴᤍᤠᤜᤠ᤹ ᤆᤥᤃᤧ᤹॥ 8 ᤑᤥ᤺ᤴᤍᤠ ᤌᤰᤔᤠ ᤛᤢᤶᤒᤥᤱ ᤜᤢᤰᤛᤡᤰ ᤁᤢᤗᤠᤶᤋᤡ ᤏᤢ ᤁᤢᤓᤧᤖᤧᤴ ᤜᤢᤰᤛᤡᤰ ᤗᤡᤛᤡᤒᤠ ᤐᤥᤱᤗ ᤐᤥᤱ᤹॥ ᤌᤡᤒᤥᤱᤅᤠᤱ ᤌᤡᤰ ᤑᤥ᤺ᤴᤍᤠᤜᤠ᤹ᤖᤧᤴ ᤗᤳᤇᤠ ᤐᤖᤡᤰᤐᤠ ᤁᤢᤛᤡ᤺ᤰᤔᤠ ᤐᤳᤗ ᤐᤥᤱ᤹॥ 9 ᤅᤠᤛᤡ ᤁᤢᤄᤧᤸᤗᤧᤰ ᤑᤥ᤺ᤴᤍᤠᤜᤠ᤹ ᤛᤥᤛᤥᤖᤡᤰ ᤏᤢ ᤋᤢᤰᤛᤡ ᤑᤥ᤺ᤴᤍᤠᤜᤠ᤹ ᤛᤥᤛᤥᤖᤡᤰ ᤋᤢᤶᤛᤧ᤹॥ ᤋᤢᤰᤛᤡᤃᤣᤰᤐᤠ ᤑᤥ᤺ᤴᤍᤠᤴ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤍᤃᤡ ᤏᤡᤗᤧᤱ ᤑᤠᤰᤋᤧ᤹॥ 10 ᤌᤡᤰᤛᤡᤃᤣᤰᤐᤠ ᤆᤰᤔᤏᤠᤒᤧᤸᤗᤧ ᤁᤢᤗᤰᤁᤡᤸᤗᤧ ᤏᤠᤛᤔᤠ ᤑᤥ᤺ᤴᤍᤠ᤺ᤸᤗᤧ ᤁᤢᤕᤠᤀᤥ ᤅᤠᤒᤥᤱ ᤁᤢᤛ᤺ᤶᤔᤠ ᤆᤥᤃᤧ᤹. ᤜᤧᤰᤁᤩᤠᤱ ᤘᤣ᤹ ᤆᤰᤔᤏᤠᤒᤧᤸᤗᤧ ᤁᤢᤗᤰᤁᤥᤒᤠ ᤏᤠᤛᤔᤠ ᤑᤥ᤺ᤴᤍᤠ᤺ᤸᤗᤧ ᤁᤢᤕᤠᤀᤥᤀᤠᤱ ᤅᤠᤒᤥᤱ ᤁᤢᤛ᤺ᤶᤔᤠᤜᤠ᤹ ᤑᤳᤇᤧ᤹॥ 11 ᤂᤧᤒᤩᤠᤱ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤄᤠᤵᤔᤠᤴ ᤗᤳᤇᤠ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤠᤛᤠ᤺ᤸᤗᤧᤴ ᤅᤠᤒᤥᤱ ᤂᤧ᤺ᤰᤆᤢᤖᤡᤜᤠ᤹ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤴ ᤂᤧ᤺ᤰᤆᤢᤖᤡᤴ ᤁᤢᤛ᤺ᤶᤔᤠᤜᤠ᤹ᤀᤥ ᤑᤳᤇᤧ᤹॥ 12 ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤄᤠᤵᤔᤠᤜᤠ᤹ᤀᤥᤒᤠ ᤁᤧᤏᤶᤒᤠ ᤗᤰ ᤂᤧᤴ ᤁᤢᤓᤪᤧ᤺ᤱ ᤑᤥ᤺ᤴᤍᤠᤴ ᤛᤣᤛᤣᤍᤧᤴᤏᤡᤸᤗᤧ ᤁᤢᤀᤣᤃᤠᤱ ᤗᤧᤵᤔᤠᤱ ᤑᤥ᤺ᤴᤇᤡᤱᤅᤠᤱ ᤐᤳᤗ॥ 13 ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤄᤠᤵᤔᤠᤜᤠ᤹ᤀᤥᤒᤠ ᤁᤧᤏᤶᤒᤠᤴ ᤜᤢᤰᤛᤡᤰᤌᤡᤰ ᤁᤳᤏᤠᤜᤠᤱ ᤗᤧᤵᤔᤠᤱ ᤏᤢ ᤜᤢᤰᤛᤡᤰ ᤌᤡᤰ ᤏᤠᤜᤠᤱ ᤗᤧᤵᤔᤠᤱ ᤛᤠ᤺ᤱᤃᤠᤜᤡᤶᤔᤡᤴ ᤋᤧᤵᤔᤠᤖᤧ ᤗᤠᤃᤡ ᤂᤧᤸᤗᤧ ᤏᤧᤵᤔᤠᤱ ᤁᤢᤕᤠᤀᤥ ᤑᤥ᤺ᤴᤇᤡᤱᤅᤠᤱ ᤐᤳᤗ॥ 14 “ᤁᤢᤜᤧ᤺ᤳᤗᤠ ᤆᤠ᤺ᤶᤔᤏᤠᤒᤠ ᤔᤧᤸᤗᤢᤰ ᤜᤥᤖᤡᤰᤐᤠᤸᤗᤧ ᤂᤠᤶᤒᤢᤴ ᤂᤠᤵᤔᤠᤖᤧ ᤗᤠᤃᤡ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤄᤠᤵᤔᤠ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤶᤎᤠᤱ ᤋᤧᤵᤔᤠᤖᤧ ᤗᤠᤃᤡ ᤘᤖ᤺ᤱ ᤐᤡᤳᤋᤡᤸᤗᤧ ᤁᤢᤜᤥᤖᤡᤰᤁᤡᤸᤗᤧ ᤘᤣ᤹ ᤂᤠᤶᤒᤢ ᤆᤥᤃᤧ᤹॥ 15 “ᤛᤣᤛᤣ ᤛᤠ᤺ᤱᤃᤠᤜᤡᤶᤔᤸᤗᤧ ᤗᤠᤃᤡ ᤒᤒᤢᤗ ᤛᤡᤱᤅᤡᤸᤗᤧᤴ ᤛᤡᤱᤓᤧᤸᤗᤧᤰᤜᤠ᤹ ᤋᤰᤐᤧᤳ ᤋᤰᤐᤧᤵᤐᤠ ᤆᤥᤃᤧ᤹॥ 16 ᤛᤡᤱᤓᤧᤸᤗᤧᤰ ᤌᤰᤔᤠ ᤌᤡᤒᤥᤱ ᤜᤢᤰᤛᤡᤰ ᤁᤢᤗᤠᤶᤋᤡ ᤏᤢ ᤁᤢᤓᤧᤖᤧᤴ ᤜᤢᤰᤛᤡᤰ ᤌᤡᤰᤁᤠᤱ ᤁᤢᤓᤪᤧ᤺ᤱᤒᤠ ᤐᤥᤱᤗ॥ 17 ᤛᤡᤱᤓᤧᤸᤗᤧᤰ ᤌᤰᤔᤠ ᤏᤧᤳᤇᤡ ᤏᤧᤳᤇᤡ ᤆᤶᤒᤧᤳ ᤁᤧᤗ᤺ᤶᤒᤠ ᤐᤧᤶᤒᤧᤴ ᤐᤳᤗ ᤐᤥᤱ᤹॥ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤁᤧᤖᤧᤰ ᤛᤡᤱᤓᤧᤸᤗᤧᤰᤜᤠ᤹ ᤂᤧᤏᤧ᤹ ᤁᤶᤓᤗ᤹ᤖᤡᤰᤁᤣ ᤆᤥᤃᤧ᤹॥ 18 ᤛᤣᤛᤣ ᤛᤠ᤺ᤱᤃᤠᤜᤡᤶ ᤗᤠᤱᤃᤧᤳ ᤐᤡᤛᤠᤱᤒᤠ ᤁᤢᤗᤰᤁᤡᤸᤗᤧ ᤗᤠᤃᤡ ᤏᤡᤒᤥᤱ ᤛᤡᤱᤓᤧᤸᤗᤧᤰᤜᤠ᤹ ᤆᤥᤃᤧ᤹॥ 19 ᤂᤧᤴ ᤏᤡᤒᤥᤱᤅᤣ ᤛᤡᤱᤓᤧᤸᤗᤧᤰᤜᤠ᤹ᤖᤧ ᤁᤢᤛᤡᤃᤠᤱ ᤗᤧᤵᤔᤠᤱ ᤕᤢᤵᤐᤠ᤺ᤸᤗᤧᤴ ᤗᤡᤒᤥᤱ ᤁᤢᤕᤢᤰᤏᤠᤜᤠ᤹ ᤆᤥᤃᤧ᤹. ᤏᤧᤳᤇᤡ ᤁᤢᤕᤢᤰᤏᤠᤜᤠ᤹ ᤛᤡᤱᤓᤧᤸᤗᤧᤰ ᤌᤡᤰᤗᤧ ᤔᤢᤜᤠᤱ ᤗᤧᤵᤔᤠᤱ ᤆᤶᤒᤧᤳ ᤁᤧᤗ᤺ᤶᤒᤠ ᤆᤥᤃᤧ᤹॥ 20 ᤛᤣᤛᤣ ᤛᤠ᤺ᤱᤃᤠᤜᤡᤶ ᤌᤡᤰᤏᤠᤜᤠᤱ ᤗᤧᤵᤔᤠᤱ. ᤀᤡᤃᤪ ᤌᤠᤱᤃᤧᤳ ᤐᤡᤛᤠᤱᤗᤧ ᤗᤠᤃᤡ ᤏᤡᤒᤥᤱ ᤛᤡᤱᤓᤧᤸᤗᤧᤰ. 21 ᤜᤧᤰᤁᤩᤠᤱ ᤂᤧᤸᤗᤧᤴ ᤗᤡᤒᤥᤱ ᤁᤢᤕᤢᤰᤏᤠᤍᤧᤴᤜᤠ᤹ ᤕᤢᤵᤐᤠ᤺ᤸᤗᤧᤴ ᤆᤥᤃᤧ᤹. ᤗᤳᤇᤠ ᤛᤡᤱᤓᤧᤸᤗᤧᤰ ᤔᤢᤜᤠᤱ ᤏᤧᤳᤇᤡ ᤁᤢᤕᤢᤰᤏᤠᤍᤧᤴᤜᤠ᤹ ᤆᤥᤃᤧ᤹॥ 22 ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤀᤣᤃᤠᤱᤒᤠ ᤁᤢᤗᤰ. ᤀᤡᤃᤪ ᤏᤠᤶᤎᤠ ᤗᤧᤵᤛᤠᤱᤒᤠ ᤁᤢᤗᤰᤁᤡᤸᤗᤧ ᤗᤠᤃᤡ ᤋᤢᤰᤛᤡ ᤛᤡᤱᤓᤧᤸᤗᤧᤰᤜᤠ᤹ ᤆᤥᤃᤧ᤹॥ 23 ᤏᤠᤛᤔᤠ ᤁᤢᤏᤢᤵᤔᤠ ᤁᤢᤛᤢᤰᤐᤠᤜᤠ᤹ᤖᤧ ᤗᤠᤃᤡ ᤂᤧᤏᤧ᤹ ᤏᤧᤳᤇᤡ ᤛᤡᤱᤓᤧᤸᤗᤧᤰᤜᤠ᤹ ᤆᤥ᤹ᤃᤧ॥ 24 ᤂᤧᤱᤜᤠ᤹ ᤔᤢᤜᤠᤱᤏᤢ ᤌᤠ᤺ᤱ ᤌᤠᤖᤡᤰ ᤁᤢᤒ᤺ᤳ ᤁᤢᤒ᤺ᤳ ᤂᤠᤵᤛᤡᤱᤗ ᤐᤥᤱᤔᤠ ᤐᤥᤱ᤹. ᤜᤧᤰᤁᤩᤠᤱ ᤁᤶᤓᤗ᤹ᤖᤡᤰ ᤂᤧᤱᤜᤠ᤹ ᤗᤳᤇᤠ ᤁᤢᤴᤍᤢᤸᤗᤥᤀᤥ ᤋᤢᤶᤗ ᤐᤥᤱ᤹॥ ᤂᤧᤴ ᤏᤧᤵᤔᤠᤱ ᤛᤡᤱᤓᤧᤸᤗᤧᤰᤜᤠ᤹ ᤀᤰᤋᤱᤒᤠᤀᤣ ᤐᤥᤱᤗ॥ 25 ᤂᤧᤵᤔᤥ ᤕᤧᤳᤇᤡ ᤛᤡᤱᤓᤧᤸᤗᤧᤰᤜᤠ᤹ ᤐᤳᤗ. ᤜᤧᤰᤁᤩᤠᤱ ᤂᤧᤸᤗᤧ ᤗᤠᤃᤡ ᤕᤢᤵᤐᤠ᤺ᤸᤗᤧᤴ ᤌᤡᤒᤥᤱᤅᤠᤱ ᤋᤢᤰᤛᤡ ᤁᤢᤕᤢᤰᤏᤠᤍᤧᤴᤜᤠ᤹ ᤐᤥᤱᤗ॥ ᤗᤳᤇᤠ ᤛᤡᤱᤓᤧᤸᤗᤧᤰ ᤔᤢᤜᤠᤱ ᤏᤧᤳᤇᤡ ᤁᤢᤕᤢᤰᤏᤠᤍᤧᤴ ᤕᤢᤱᤗ ᤐᤥᤱ᤹॥ 26 “ᤂᤧᤏᤧ᤹ ᤒᤒᤢᤗ ᤛᤡᤱᤅᤡᤸᤗᤧᤴ ᤐᤧᤖᤧᤶ ᤁᤢᤛᤠᤰᤔᤠ ᤛᤡᤱᤜᤠ᤹ ᤆᤥᤃᤧ᤹—ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤌᤡᤰᤏᤠᤜᤠᤱ ᤗᤧᤵᤔᤠᤱᤒᤠ ᤛᤡᤱᤓᤧᤸᤗᤧᤰᤜᤠ᤹ᤖᤧ ᤗᤠᤃᤡ ᤅᤠᤛᤡ ᤐᤧᤖᤧᤶ ᤁᤢᤛᤠᤰᤔᤠ ᤛᤡᤱ. 27 ᤜᤧᤰᤁᤩᤠᤱ ᤘᤣ᤹ ᤗᤧᤵᤔᤠᤱᤒᤠ ᤛᤡᤱᤓᤧᤸᤗᤧᤰᤜᤠ᤹ᤖᤧ ᤗᤠᤃᤡ ᤅᤠᤛᤡ ᤐᤧᤖᤧᤶ ᤁᤢᤛᤠᤰᤔᤠ ᤛᤡᤱ. ᤂᤧᤒᤩᤠᤱ ᤏᤠᤶᤎᤠ ᤐᤡᤛᤠᤱ ᤁᤢᤀᤣᤃᤠᤱᤒᤠ ᤁᤢᤗᤰᤁᤥᤒᤠ ᤛᤡᤱᤓᤧᤸᤗᤧᤰᤜᤠ᤹ᤖᤧ ᤗᤠᤃᤡ ᤅᤠᤛᤡ ᤁᤢᤛᤠᤰᤔᤠ ᤐᤧᤖᤧᤶᤛᤡᤱ ᤐᤥᤱ᤹॥ 28 ᤛᤡᤱᤓᤧᤸᤗᤧᤰᤜᤠ᤹ᤖᤧ ᤁᤢᤗᤢᤶᤔᤥ ᤁᤧᤕᤠᤰᤐᤠ ᤐᤧᤖᤧᤶ ᤛᤡᤱᤅᤡᤴ ᤌᤡᤰ ᤁᤢᤕᤠᤀᤥᤗᤠᤶ ᤘᤣ᤹ᤛᤔᤠ ᤁᤢᤕᤠᤀᤥ ᤌᤠᤖᤡᤰ ᤂᤠᤖᤠᤰ ᤕᤠᤰᤗ ᤐᤥᤱ᤹॥ 29 ᤛᤡᤱᤓᤧᤸᤗᤧᤰᤜᤠ᤹ ᤁᤧᤖᤧᤰ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤧ᤹॥ ᤐᤧᤖᤧᤶᤛᤡᤱ ᤁᤢᤛᤠᤰᤔᤠᤜᤠ᤹ ᤋᤧᤶᤔᤠᤖᤧ ᤗᤠᤃᤡ ᤛᤠᤶᤔᤩᤠᤱ ᤁᤢᤴᤍᤥᤸᤗᤥᤜᤠ᤹ ᤆᤥᤃᤧ᤹॥ ᤐᤧᤖᤧᤶᤛᤡᤱ ᤁᤢᤛᤠᤰᤔᤠᤜᤠ᤹ᤀᤠᤱ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤧ᤹॥ 30 “ᤂᤧᤏᤧ᤹ ᤁᤥ᤺ᤰᤔᤠᤀᤥ ᤀᤥ᤺ᤴᤎᤠᤰᤏᤧᤒᤠ ᤁᤢᤒᤡ ᤁᤢᤀᤡᤛᤡᤰ ᤛᤣᤛᤣ ᤛᤠ᤺ᤱᤃᤠᤜᤡᤶ ᤆᤥᤃᤧ᤹ᤀᤠᤱ ᤑᤥ᤺ᤰᤂᤧ᤹॥ 31 “ᤜᤧᤰᤁᤩᤠᤱ ᤜᤡ᤺ᤰᤕᤱᤕᤱᤒᤠ. ᤐᤠᤖᤠᤴᤗᤠ. ᤜᤧ᤺ᤳᤋᤠᤱᤒᤠ ᤂᤡ ᤏᤢ ᤆᤢᤴᤈᤢᤶᤒᤠ ᤑ᤺ᤔᤏᤠᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤗᤳᤇᤠ ᤁᤢᤎᤣ᤺ᤰᤔᤠ ᤑᤥ᤺ᤴᤍᤠ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤵᤔᤥ ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤁᤧᤗᤧᤒᤠ ᤆᤥᤒᤣᤃᤢ᤺ᤸᤗᤧ ᤆᤥᤃᤢᤒᤠ ᤁᤖᤢᤒᤜᤠ᤹ ᤁᤧᤒᤵᤐᤠ ᤐᤥᤱᤗ॥ 32 ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤔᤏᤠᤒᤠ ᤒᤒᤢᤗ ᤛᤡᤱᤅᤡᤸᤗᤧᤴ ᤗᤡᤛᤡ ᤛᤡᤳᤗᤠᤱᤜᤠ᤹ᤀᤥ ᤛᤠᤶᤔᤩᤠᤱ ᤂᤧ᤺ᤰᤆᤢᤖᤡᤜᤠ᤹ᤖᤧ ᤂᤧᤴ ᤂᤡᤱᤄᤧ᤹॥ ᤂᤧᤴ ᤗᤡᤛᤡ ᤛᤡᤳᤗᤠᤱᤜᤠ᤹ ᤗᤡᤛᤡ ᤕᤢᤵᤐᤠ ᤁᤢᤕᤢᤰᤏᤠᤍᤧᤴ ᤛᤶᤎᤠᤱ ᤐᤥᤱᤗ॥ 33 ᤂᤧᤏᤧ᤹ ᤂᤧᤴ ᤁᤢᤎᤣ᤺ᤰᤔᤠ ᤑᤥ᤺ᤴᤍᤠᤴ ᤂᤧ᤺ᤰᤆᤢᤖᤡᤜᤠ᤹ᤗᤠᤶ ᤑᤥ᤺ᤴᤍᤧ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤀᤣᤃᤠᤱ ᤔᤠᤱᤜᤢᤵ ᤛᤠᤵᤗᤢᤱ ᤁᤧᤕᤠᤰᤐᤠ ᤛᤴᤍᤥᤰᤁᤡᤴ ᤕᤢᤰᤂᤧ᤹॥ ᤑᤥ᤺ᤴᤍᤠ᤺ᤸᤗᤧ ᤂᤡᤏᤡ᤹ ᤗᤠᤃᤡ ᤛᤣᤛᤣᤒᤠᤍᤧᤴᤏᤡᤴ ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴᤏᤥᤗᤠᤶ ᤗᤠ᤺ᤳᤗᤠ᤺ᤳ ᤛᤧᤴᤍᤢ॥ 34 ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴᤏᤥ ᤔᤠᤱᤜᤢᤵ ᤛᤠᤵᤗᤢᤱ ᤁᤧᤕᤠᤰᤐᤠ ᤛᤴᤍᤥᤰ ᤛᤶᤎᤠᤱ ᤁᤢᤍᤧᤵᤑᤣᤴ ᤑᤳᤇᤧ᤹॥ 35 ᤑᤥ᤺ᤴᤍᤠ᤺ᤸᤗᤧ ᤗᤠ᤺ᤰᤁᤠᤳ ᤗᤧᤵᤔᤠᤱ ᤛᤣᤛᤣ ᤛᤠ᤺ᤱᤃᤠᤜᤡᤶ ᤌᤥ ᤗᤧᤵᤔᤠᤱ ᤆᤵᤋᤧᤴᤏᤧᤴ ᤕᤢᤰᤂᤧ᤹. ᤜᤧᤰᤁᤩᤠᤱ ᤛᤣᤛᤣ ᤛᤠ᤺ᤱᤃᤠᤜᤡᤶ ᤕᤥ ᤗᤧᤵᤔᤠᤱ ᤆᤵᤋᤧᤴᤏᤧᤸᤗᤧ ᤁᤢᤍᤃᤡ ᤛᤣᤔᤡ ᤕᤢᤱᤍᤧᤴᤏᤡᤴ ᤕᤢᤰᤂᤧ᤹॥ 36 “ᤛᤠ᤺ᤱᤃᤠᤜᤡᤶ ᤗᤠᤶᤎᤣ᤺ᤳᤋᤡᤸᤗᤧ ᤗᤠᤃᤡ ᤂᤧᤏᤧ᤹ ᤜᤡ᤺ᤰᤕᤱᤕᤱᤒᤠ. ᤐᤠᤖᤠᤴᤗᤠ ᤜᤧᤰᤁᤩᤠᤱ ᤜᤧ᤺ᤳᤋᤠᤱᤒᤠ ᤂᤡ ᤏᤢ ᤆᤢᤴᤈᤢᤴ ᤗ᤹ᤖᤡᤰ ᤌᤠᤰᤔᤏᤠᤒᤠ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ. ᤁᤢᤓᤢᤱ ᤗᤰᤔᤏᤠ ᤕᤠ᤺ᤶᤒᤰ ᤁᤧᤒᤥᤱᤒᤠ ᤑᤥ᤺ᤴᤍᤠ ᤌᤡᤰ ᤆᤥᤃᤧ᤹॥ 37 ᤂᤧᤴ ᤑᤥ᤺ᤴᤍᤠ᤺ᤸᤗᤧ ᤗᤠᤃᤡ ᤒᤒᤢᤗ ᤛᤡᤱᤅᤡᤸᤗᤧᤴ ᤅᤠᤛᤡ ᤛᤡᤳᤗᤠᤱᤜᤠ᤹ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤧ᤹॥ ᤂᤧᤵᤔᤥᤒᤠ ᤂᤧ᤺ᤰᤆᤢᤖᤡᤜᤠ᤹ ᤛᤠᤶᤔᤩᤠᤱᤅᤡᤸᤗᤧᤴ ᤐᤥᤱᤗ. ᤂᤶᤓᤩᤠᤱ ᤂᤧᤸᤗᤧ ᤗᤠᤃᤡ ᤅᤠᤛᤡ ᤁᤠᤛᤠ᤺ᤸᤗᤧᤴ ᤕᤢᤱᤍᤧᤴᤜᤠ᤹ ᤆᤥᤃᤧ᤹ᤀᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.