ᤗᤠᤶᤍᤡᤰ 24 - LIFOTNT

ᤔᤠᤱᤜᤢᤵᤐᤥ ᤀᤣ᤺ᤵᤛᤠᤵ ᤔᤧᤕᤢᤰᤋᤢ᤹

¹ ᤕᤠᤶᤔᤥ ᤂᤢᤏᤧ᤹ ᤔᤥᤛᤠᤴ ᤔᤧᤳᤋᤢ. “ᤂᤧᤏᤧ᤹. ᤜᤠᤖᤢᤏ. ᤏᤠᤍᤠᤒ. ᤀᤒᤡᤜᤢ ᤏᤢ ᤛᤠᤶᤕᤥ ᤗᤠᤶᤗᤥᤒᤠᤜᤠ᤹ᤗᤠᤶ ᤏᤢᤒᤥᤱ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤌᤠ᤺ᤱ ᤌᤠᤅᤧᤶᤔᤧ᤹. ᤜᤧᤰᤁᤩᤠᤱ ᤗᤠ᤺ᤳᤗᤠ᤺ᤳᤗᤠᤶᤒᤠ ᤀ᤺ᤰᤂᤢᤶ ᤑᤴᤏᤠᤛᤡᤶᤔᤧ᤹ᤀᤠᤱ ᤀᤠᤱᤃᤠ᤹ ᤔᤠᤱᤛᤧᤘᤠ ᤀᤥᤔᤧᤳᤋᤧ᤹॥

² ᤁᤖ ᤂᤧᤏᤧ᤹ᤖᤰ ᤀᤠᤱᤃᤠ᤹ ᤀᤠᤒᤣᤛᤠᤱ ᤌᤠᤅᤧ᤹. ᤘᤣ᤹ᤜᤠ᤹ ᤀᤠᤱᤃᤠ᤹ ᤀᤠᤒᤣᤛᤠᤱ ᤔᤧᤴᤎᤠᤱᤏᤧᤸᤗ. ᤔᤏᤠᤜᤠ᤹ᤀᤠᤱ ᤂᤧᤏᤧ᤹ᤏᤢ ᤌᤠ᤺ᤱ ᤔᤧᤴᤎᤠᤱᤏᤧᤴᤗ॥”

³ ᤔᤥᤛᤠᤴ ᤐᤣᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤧᤖᤧᤰ ᤁᤢᤀᤡᤱᤈᤠᤱᤜᤠ᤹ ᤏᤢ ᤁᤢᤛᤠᤶᤕᤥ ᤛᤠᤰᤌᤡᤶᤜᤠ᤹ ᤔᤏᤠᤜᤠ᤹ ᤆᤧᤰᤋᤢᤛᤡ॥ ᤔᤏᤠᤜᤠ᤹ᤖᤧ ᤌᤡᤰᤗᤧᤱᤗᤧ ᤏᤥᤃᤵ ᤔᤧᤒᤡᤖᤢ. “ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤏᤡᤃᤣ ᤁᤧᤳᤋᤢᤶᤒᤧ॥”

⁴ ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤖᤧᤰ ᤁᤢᤀᤡᤱᤈᤠᤱᤜᤠ᤹ ᤛᤠᤵᤋᤢ॥ ᤁᤢᤍᤠ᤺ᤴᤍᤡᤰᤔᤠ ᤋᤠᤏᤠᤶᤛᤠ ᤂᤢᤏᤧ᤹ ᤁᤥᤔᤠᤸᤗᤧ ᤁᤢᤒᤢᤱᤀᤥ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤆᤥᤃᤢ ᤜᤧᤰᤁᤩᤠᤱ ᤂᤧᤵᤔᤥ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤅᤥ ᤗᤳᤇᤠ ᤗᤳᤇᤠ ᤌᤡᤒᤥᤱᤅᤠᤱ ᤏᤧᤳᤇᤡ ᤗᤢᤱᤜᤠ᤹ ᤑᤢᤰᤂᤢᤀᤠᤱ ᤛᤡᤳᤗᤠᤱ ᤗᤣ᤺ᤳᤋᤢ॥

⁵ ᤂᤧᤒᤩᤠᤱ ᤂᤢᤏᤧ᤹ ᤌᤠᤱᤒᤧᤴᤜᤠ᤹ ᤐᤠᤱᤄᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤔᤧᤍᤥᤴᤍᤢ ᤜᤧᤰᤁᤩᤠᤱ ᤁᤢᤓᤠ ᤛᤧᤃᤶᤒᤠᤜᤠ᤹ ᤋᤱᤈᤢᤶᤒᤠ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤛᤡ॥

⁶ ᤂᤧᤴ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡᤴ ᤁᤢᤓᤪᤧ᤺ᤱ ᤔᤥᤛᤠ᤺ᤸᤗᤧ ᤂᤵᤐᤩᤠᤀᤥ ᤁᤣ᤺ᤳᤋᤢ ᤜᤧᤰᤁᤩᤠᤱ ᤁᤢᤓᤪᤧ᤺ᤱ ᤛᤠᤔᤠᤰᤂᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤛᤠᤰᤂᤢ॥

⁷ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤜᤠ᤹ ᤛᤠᤵᤔᤏᤠᤒᤠ ᤔᤠᤱᤜᤢᤵ ᤛᤠᤵᤐᤴᤏᤡᤴ ᤕᤠᤱᤛᤡᤱ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤔᤧᤄᤧᤵᤛᤢᤖ ᤏᤡᤖᤢᤀᤠᤱ ᤂᤧᤶᤒᤠᤱᤄᤢᤛᤡ॥ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤠᤏᤡᤃᤣ ᤀᤡ᤺ᤳᤋᤢᤶ ᤏᤠ᤺ᤳᤋᤢᤶᤒᤧᤖᤥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤏᤡᤃᤣ ᤁᤧᤳᤋᤢᤶᤒᤧᤖᤥ॥”

⁸ ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤛᤠᤔᤠᤰᤂᤡᤴ ᤕᤠᤱᤛᤡᤱᤅᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤛᤠᤰᤂᤢ. ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢᤛᤡ. “ᤀᤥᤔᤧᤳᤋᤧᤶᤔᤧ᤹. ᤁᤴ ᤔᤠᤱᤜᤢᤵᤐᤥᤒᤠ ᤔᤠᤰᤂᤡ᤹ᤖᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤒᤠ᤺ᤴᤈᤠ᤺ᤰᤜᤠ᤹ ᤁᤢᤀᤡᤛᤡᤰ ᤂᤡᤏᤡ᤹ᤏᤢ ᤔᤠᤱᤜᤢᤵ ᤆᤥᤃᤢᤀᤠᤱ ᤘᤠ᤹॥”

⁹ ᤂᤧᤴ ᤀᤣᤃᤠᤱ ᤔᤥᤛᤠ. ᤜᤠᤖᤢᤏ. ᤏᤠᤍᤠᤒ. ᤀᤒᤡᤜᤢ ᤏᤢ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ᤀᤥ ᤏᤢᤒᤥᤱ ᤔᤏᤠᤜᤠ᤹ ᤁᤥ᤺ᤰᤔᤠᤀᤥ ᤌᤠ᤺ᤱ ᤔᤧᤒᤣᤀᤠᤱ

¹⁰ ᤂᤧᤱᤜᤠ᤹ᤖᤧ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤏᤡᤛᤢ॥ ᤂᤢᤏᤧ᤹ ᤁᤢᤗᤠᤱᤘᤠᤈᤰᤐᤥ ᤛᤡᤃᤠᤱ ᤔᤠᤱᤗᤢᤱ ᤑᤧᤔᤏᤠᤒᤠ ᤋᤠᤱᤛᤠᤰ ᤜᤧᤰᤋᤱᤒᤠ ᤔᤠᤱᤗᤢᤱ ᤗᤠᤶ ᤏᤧᤛ᤻ᤛᤧ॥

¹¹ ᤁᤖ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹ ᤌᤧᤔᤠᤀᤠᤱ ᤜᤠᤴᤋᤡ ᤔᤧᤈᤥᤃᤢᤴᤛᤡᤴ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤏᤡᤛᤢ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤔᤧᤈ ᤔᤧᤎᤢᤅᤢᤖᤥ॥

ᤛᤡᤏᤤ ᤁᤥ᤺ᤰᤔᤠᤀᤥ ᤔᤥᤛᤠᤴ

¹² ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤠᤱᤃᤠ᤹ ᤘᤠ᤹ᤀᤠᤒᤠ ᤁᤥ᤺ᤰᤔᤠᤀᤥ ᤌᤠ᤺ᤱ ᤌᤠᤅᤧ᤹ᤀᤠᤱ ᤕᤢᤅᤧ᤹॥ ᤂᤧᤏᤧ᤹ ᤂᤧᤱᤜᤠ᤹ ᤜᤢ᤹ᤔᤠᤛᤡᤖᤧ ᤗᤠᤃᤡ ᤀᤠᤱᤃᤠ᤹ ᤛᤠᤵᤋᤢᤱᤒᤠ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤏᤢ ᤀᤡᤱᤈᤠᤱᤜᤠ᤹ ᤁᤧᤒᤵᤐᤠ ᤗᤢᤱᤛᤠᤵᤜᤠ᤹ ᤀᤠᤱᤃᤠ᤹ ᤂᤧᤏᤧ᤹ ᤐᤡᤏᤧ॥”

¹³ ᤂᤧᤒᤩᤠᤱ ᤔᤥᤛᤠᤴ ᤏᤢ ᤂᤢᤏᤧ᤹ ᤁᤢᤓᤠ᤹ᤒᤠᤱ ᤕᤜᤥᤛᤢᤴ ᤕᤠᤖᤡᤵ ᤐᤥ᤺ᤰᤂᤧᤛᤡ ᤜᤧᤰᤁᤩᤠᤱ ᤔᤥᤛᤠ᤺ᤸᤗᤧ ᤛᤣᤛᤣ ᤁᤥ᤺ᤰᤔᤠᤴ ᤗᤡᤱᤔᤠ ᤜᤣ᤺ᤰᤋᤢ॥

¹⁴ ᤔᤥᤛᤠ᤺ᤸᤗᤧ ᤂᤧᤴ ᤗᤠᤶᤗᤥᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤴᤇᤡᤃᤣ ᤔᤧᤴᤏᤢ᤺ᤱ ᤔᤧᤴᤕᤢᤀᤣ ᤌᤠᤖᤡᤰ ᤀᤠᤶᤓᤠ ᤁᤴ ᤛᤠ᤺ᤱᤃᤠᤜᤡᤶᤔᤥ ᤕᤢᤅᤧᤶᤔᤧ᤹ᤀᤠᤱ ᤀᤠᤜᤠᤱᤄᤧᤶᤔᤧ᤹॥ ᤜᤠᤖᤢᤏᤧᤴ ᤏᤢ ᤜᤢᤖᤧᤴ ᤂᤡᤏᤡ᤹ᤏᤢ ᤁᤵᤔᤥ ᤘᤠ᤹ᤛᤡ ᤜᤧᤰᤁᤩᤠᤱ ᤁᤢᤓᤠᤖᤧ ᤁᤢᤓᤠ ᤐᤠᤴ ᤆᤧᤱᤔᤠ ᤐᤠ᤺ᤵᤔᤠ ᤁᤧᤒᤥᤱᤒᤠ ᤘᤠ᤹ᤏᤧᤓᤃᤪ ᤂᤧᤱᤜᤠ᤹ ᤂᤧᤴ ᤏᤧᤵᤑᤢ ᤔᤏᤠᤜᤠ᤹ᤀᤥ ᤐᤣ᤺ᤰᤔᤠ ᤔᤧᤛᤢᤰ॥”

¹⁵ ᤂᤧᤒᤩᤠᤱ ᤔᤥᤛᤠᤴ ᤛᤡᤏᤤ ᤁᤥ᤺ᤰᤔᤠᤀᤥ ᤌᤥ᤺ᤰᤛᤡᤱ ᤜᤧᤰᤁᤩᤠᤱ ᤂᤠ᤹ᤔᤡ᤺ᤳᤋᤡᤸᤗᤧ ᤁᤥ᤺ᤰᤔᤠᤴ ᤛᤡᤍᤧᤵ ᤋᤧᤵᤋᤢ॥

¹⁶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤛᤡᤏᤤ ᤁᤥ᤺ᤰᤔᤠᤀᤥ ᤐᤳᤇᤧ. ᤜᤧᤰᤁᤩᤠᤱ ᤂᤠ᤹ᤔᤡ᤺ᤳᤋᤡᤸᤗᤧ ᤋᤢᤰᤛᤡ ᤕᤧᤴ ᤌᤠᤖᤡᤰ ᤁᤥ᤺ᤰᤔᤠᤴ ᤐᤴᤇᤢᤀᤠᤱ ᤐᤳᤇᤧ॥ ᤏᤢᤛᤡ ᤕᤧᤴᤏᤥ ᤕᤠ᤺ᤴᤍᤡᤰ ᤂᤠ᤹ᤔᤡ᤺ᤳᤋᤡᤸᤗᤧ ᤁᤢᤗᤢᤶᤔᤥᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤐᤠ᤺ᤴᤇᤠ᤺ᤳᤋᤢ॥

¹⁷ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤏᤡᤛᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤁᤥ᤺ᤰᤔᤠᤸᤗᤧ ᤁᤢᤈᤱᤅᤥ ᤀᤠᤔᤧᤱᤔᤧᤱᤒᤠ ᤔᤡᤎᤢᤱ ᤔᤡᤖᤠ᤺ᤰ ᤜᤧᤰᤋᤱᤒᤠ ᤆᤥᤃᤧ॥

¹⁸ ᤂᤧᤒᤩᤠᤱ ᤔᤥᤛᤠᤴ ᤂᤠ᤹ᤔᤡ᤺ᤳᤋᤡᤸᤗᤧ ᤁᤢᤗᤢᤶᤔᤥᤗᤠᤶᤒᤠ ᤐᤥ᤺ᤰᤂᤧᤀᤠᤱ ᤁᤥ᤺ᤰᤔᤠᤀᤥ ᤌᤠ᤺ᤱ ᤌᤥ᤺ᤰᤛᤡᤱ. ᤜᤧᤰᤁᤩᤠᤱ ᤂᤢᤏᤧ᤹ ᤁᤥ᤺ᤰᤔᤠᤀᤥ ᤗᤡᤒᤥᤱ ᤕᤧᤴ ᤏᤢ ᤗᤡᤒᤥᤱ ᤛᤧᤴ ᤌᤠᤖᤡᤰ ᤕᤢᤅᤧᤖᤥ॥