ᤗᤠᤶᤍᤡᤰ 23 - LIFOTNTᤁᤢᤍᤥ᤺ᤵᤔᤠ ᤂᤠᤛᤧᤴ ᤏᤢ ᤀᤣ᤺ᤰᤐᤀᤣ᤺ᤰ ᤆᤥ᤺ᤰᤔᤠ ᤔᤣ᤺ᤴ 1 “ᤔᤧᤴᤘᤠ᤹ᤔᤏᤠᤒᤠ ᤐᤠᤴ ᤔᤧᤀᤡᤱᤛᤠᤶᤔᤡᤴᤏᤧ᤹ ᤜᤧᤰᤁᤩᤠᤱ ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤴ ᤑᤠ᤹ᤔᤠᤖᤧ ᤗᤠᤃᤡ ᤀᤡᤱᤗᤧᤰᤐᤠ ᤛᤠ᤺ᤰᤂᤡ ᤔᤧᤒᤡᤖᤧᤶᤔᤡᤴᤏᤧ᤹॥ 2 “ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤕᤖᤡᤰ ᤔᤏᤠᤜᤠ᤹ ᤗᤧᤵᤔᤠᤱ ᤔᤧᤒᤳᤇᤧᤶᤔᤡᤴᤏᤧ᤹॥ ᤋᤢ᤺ᤴᤍᤣ᤹ᤀᤥ ᤜᤕᤱ ᤁᤡᤸᤗᤡᤱ ᤐᤡᤛᤠᤱ ᤋᤥ᤺ᤴᤍᤡ ᤔᤧᤒᤡᤖᤧᤶᤔᤡᤴᤏᤧ᤹ᤀᤠᤱ ᤁᤢᤍᤥ᤺ᤵᤔᤠ ᤂᤠᤛᤧᤴᤏᤡᤴ ᤑᤧᤳᤔᤧᤗᤠ᤺ᤴᤍᤧᤶᤔᤡᤴᤏᤧ᤹॥ 3 ᤕᤠᤱᤃᤧᤛᤠ᤹ᤒᤠ ᤑᤠ᤹ᤀᤠᤱ ᤋᤢ᤺ᤴᤍᤣ᤹ᤀᤥ ᤂᤢᤏᤧ᤹ ᤗᤧᤵᤔᤠᤱ ᤔᤧᤒᤳᤇᤧᤶᤔᤡᤴᤏᤧ᤹॥ 4 “ᤂᤡᤏᤡ᤹ ᤏᤡᤱᤔᤡ᤺ᤸᤗᤧ ᤁᤢᤒᤡᤳᤋᤡᤴ ᤀᤡᤃᤪ ᤀᤍᤱᤅᤡᤴ ᤛᤠᤶᤔᤠᤱ ᤐᤣ᤺ᤰᤗ ᤐᤵᤐᤠ ᤁᤧᤏᤡᤛᤢᤶᤏᤧᤓᤃᤪ. ᤂᤧᤴ ᤏᤢ᤺ᤰᤋᤧᤶᤔᤧ᤹ᤀᤠᤱ ᤕᤠᤶᤔᤥ ᤂᤢᤏᤧ᤹ᤀᤥ ᤛᤠᤶᤎᤠᤶᤔᤧ᤹॥ 5 ᤂᤧᤸᤗᤧ ᤁᤢᤀᤍᤱᤅᤡᤴ ᤁᤧᤱᤅᤠᤱ ᤁᤰᤁᤡᤸᤗᤧ ᤛᤡᤃᤠᤱ ᤁᤧᤵᤋᤢ ᤀᤠᤱ ᤏᤧᤒᤠ ᤁᤧᤏᤡᤛᤢᤶᤏᤧᤓᤃᤪ. ᤂᤧᤴ ᤜᤠᤒᤠ ᤔᤧᤗᤧᤖᤧᤶᤔᤡᤴᤏᤧ᤹. ᤁᤖ ᤂᤧᤴ ᤑᤥ᤺ᤰᤂᤧᤶᤔᤧ᤹॥ 6 “ᤕᤠᤱᤃᤧᤛᤠ᤹ᤒᤠᤸᤗᤧ ᤁᤢᤍᤢ᤺ᤴᤍᤣ᤹ᤀᤥ ᤔᤧᤴᤘᤠ᤹ᤔᤏᤠᤒᤠ ᤂᤠᤛᤧᤴ ᤔᤧᤈᤥᤃᤧᤶᤔᤡᤴᤏᤧ᤹॥ 7 ᤘᤣ᤹ᤜᤠ᤹ ᤀᤡᤱᤗᤧᤰ ᤔᤧᤵᤔᤠᤛᤡ ᤐᤠ᤺ᤴᤏᤥᤗᤠᤶ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹॥ ᤑᤧᤴ ᤕᤠ᤺ᤶᤒᤰ ᤔᤧᤴᤈᤥ᤺ᤰᤔᤏᤠᤒᤠ ᤏᤢ ᤁᤢᤍᤥ᤺ᤵᤔᤠ ᤔᤏᤠᤴ ᤛᤡᤔᤧᤸᤗᤧ ᤂᤢᤶᤍᤡᤱ ᤔᤧᤒᤡᤖᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤀᤠᤵᤋᤡᤰᤛᤠᤒᤧᤴ ᤀᤠᤱᤃᤠ᤹ ᤀᤠᤓᤧᤸᤗᤧᤀᤠᤱ ᤁᤢᤍᤥ᤺ᤵᤔᤠ ᤔᤧᤗᤣ᤺ᤳᤋᤠᤴ॥ 8 “ᤛᤫᤠ᤺ᤳᤋᤠᤱ ᤛᤢᤖᤢᤋᤩᤠᤱ ᤔᤧᤈᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤛᤢᤖᤢᤳ ᤕᤠᤱᤅᤡᤸᤗᤧ ᤔᤏᤠᤴ ᤔᤡᤰᤑ᤺ᤶᤒᤠ ᤆᤥᤃᤢ᤹. ᤜᤧᤰᤁᤩᤠᤱ ᤛᤠᤶᤕᤥᤒᤠ ᤐᤠ᤺ᤴᤏᤡᤴ ᤔᤧᤴᤘᤠ᤹ᤔᤏᤠᤒᤠ ᤐᤠ᤺ᤴᤏᤥ ᤗᤧᤰᤂᤢ᤹॥ 9 “ᤘᤣ᤹ ᤗᤠᤈᤣ᤹ᤒᤠ ᤔᤏᤠᤴ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤧᤶᤔᤡᤴᤏᤧ᤹॥ ᤔᤡᤛᤪᤀᤥ ᤂᤡᤏᤡ᤹ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤘᤣ᤹ᤔᤡᤒᤠᤸᤗᤧ ᤁᤢᤏᤡᤱᤘᤠᤴ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥ ᤏᤢᤛᤡᤃᤣᤰᤐᤠ ᤋᤱᤒᤣ ᤏᤢ ᤏᤢᤛᤡᤃᤣᤰᤐᤠ ᤕᤧᤴ 10 “ᤋᤱᤒᤣ ᤋᤢᤰᤛᤡ ᤌᤠᤖᤡᤰ ᤂᤡᤏᤡ᤹ ᤐᤩᤠᤱᤛᤡ ᤀᤡᤰᤋᤠᤵᤐᤥ ᤕᤠ᤹ᤖᤡ᤺ᤶᤒᤠ ᤜᤣ᤹ᤖᤧᤶᤔᤧ᤹ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤒᤵᤐᤠ ᤁᤢᤈᤠᤴ ᤛᤢᤵᤛᤧᤶᤔᤧ᤹॥ 11 ᤁᤖ ᤏᤢᤛᤡᤃᤣᤰᤐᤠ ᤋᤱᤒᤣ ᤁᤧᤳᤋᤡᤸᤗᤧ ᤂᤧᤴ ᤔᤧᤴᤎᤥ᤺ᤱᤅᤣ ᤜᤠᤒᤠ ᤗᤧᤖᤧᤶ ᤏᤧᤛᤧᤶᤔᤧ᤹. ᤜᤧᤰᤁᤩᤠᤱ ᤂᤧᤴᤗᤠᤶ ᤂᤡᤏᤡ᤹ᤀᤥᤒᤠ ᤁᤢᤓᤠ ᤕᤠᤱᤃᤧᤛᤠ᤹ᤒᤠᤜᤠ᤹ᤖᤧ ᤔᤧᤔᤕᤢ ᤔᤧᤈᤖ॥ ᤂᤧᤱᤜᤠ᤹ᤖᤧ ᤔᤧᤏᤴᤇᤢᤒᤠᤴ ᤆᤠᤜᤡ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤔᤧᤈᤖ. ᤂᤡᤏᤡ᤹ ᤀᤠᤒᤠᤅᤣ ᤆᤧᤸᤗᤧᤰᤛᤣ᤹ ᤏᤢ ᤆᤤᤋᤢᤏ ᤀᤡᤰᤋᤠᤜᤠ᤹ᤀᤥᤀᤠᤱ ᤜᤧᤰᤁᤣᤀᤣ ᤆᤥᤃᤧᤶᤔᤧ᤹॥ 12 “ᤋᤢᤰᤛᤡ ᤕᤧᤴ ᤌᤠᤖᤡᤰ ᤕᤠ᤺ᤶᤒᤰ ᤆᤥᤃᤧᤶᤔᤧ᤹. ᤁᤖ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ᤖᤧ ᤏᤢ ᤂᤡᤏᤡ᤹ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤂᤧᤒᤩᤠᤱ ᤐᤡᤳᤌᤰᤛᤠ ᤏᤢ ᤀᤍᤱᤜᤠ᤹ᤖᤧ ᤏᤠ᤺ᤶᤛᤡᤱᤔᤠ ᤔᤧᤄᤥᤛᤢ᤹॥ 13 “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤔᤧᤳᤏᤡᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤵᤛᤧᤶᤔᤧ᤹ᤀᤠᤱ ᤂᤧᤱᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥ ᤘᤣ᤹ ᤔᤠᤱᤜᤠ᤹ ᤐᤣᤗᤡ ᤔᤧᤓᤠᤰᤋᤧᤶᤛᤧᤶᤔᤡᤴᤏᤧ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤅᤠᤱ ᤔᤧᤒᤠ᤺ᤳᤋᤠᤶᤔᤡᤴᤏᤧ᤹ᤀᤥ॥ ᤛᤢᤶᤛᤡ ᤕᤶᤒᤠ ᤋᤱᤏᤠᤶᤜᤠ᤹ ( ᤗᤠ ᥉᥊:᥇᥎-᥈᥌ ; ᤛᤠᤶᤕᤥ ᤀᤡᤱ ᥇᥌:᥇-᥇᥍ ) 14 “ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠᤖᤧ ᤗᤠᤃᤡ ᤋᤱᤒᤣ ᤌᤰᤔᤠ ᤂᤡᤏᤡ᤹ ᤋᤱᤒᤣᤖᤧ ᤛᤢᤶᤛᤡ ᤋᤱᤏᤠᤶᤜᤠ᤹ ᤋᤥᤛᤠᤶᤔᤧ᤹॥ 15 “ᤂᤡᤏᤡ᤹ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤋᤱᤏᤠᤶ ᤋᤥᤛᤧᤶᤔᤧ᤹॥ ᤂᤡᤏᤡ᤹ ᤀᤡᤱᤈᤠᤱ ᤐᤡᤏᤡᤱᤒᤠ ᤜᤧᤰᤁᤣ ᤀᤒᤡᤒ ᤗᤠᤀᤥ ᤋᤥᤔᤠ ᤁᤧᤒᤥᤱᤒᤠ ᤏᤢᤛᤡ ᤕᤧᤴ ᤌᤠᤖᤡᤰ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤆᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤜᤠᤒᤠ ᤂᤧᤴ ᤗᤠᤀᤥ ᤂᤡᤏᤡ᤹ ᤔᤡᤛᤪᤗᤠᤶᤒᤠ ᤁᤧᤗ᤺ᤴᤍᤡ ᤁᤧᤓᤧᤖᤡᤒᤠᤖᤥ॥ “ᤜᤢᤰᤁᤥ ᤌᤣᤀᤠᤱ ᤔᤧᤴᤍᤠ᤺ᤳᤋᤣ ᤀᤠᤱᤃᤠ᤹ ᤀᤠᤍᤃᤡ ᤜᤠ᤺ᤳᤋᤠᤱ ᤀᤥ᤺ᤴᤔᤧᤎᤠᤰᤛᤡᤱᤅᤡᤴᤗ॥ 16 “ᤐᤩᤠᤱᤛᤡᤀᤥ ᤂᤡᤏᤡ᤹ ᤁᤧᤜᤣ᤹ᤖᤢᤶᤒᤠ ᤁᤢᤈᤠ᤺ᤸᤗᤧ ᤋᤃᤡᤒᤠ ᤁᤢᤈᤠ᤹ᤀᤡᤴ ᤋᤥ᤺ᤴᤍᤧᤶᤔᤧ᤹ᤀᤠᤱ ᤆᤠ ᤜᤧᤰᤔᤠ ᤋᤱᤏᤠᤶ ᤋᤥᤛᤧᤶᤔᤧ᤹॥ “ᤋᤱᤒᤣ᤺ᤸᤗᤧ ᤁᤢᤏᤢᤵᤔᤥ ᤂᤡᤏᤡ᤹ ᤐᤩᤠᤱᤛᤡᤀᤥ ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰ ᤁᤧᤈᤥᤃᤢᤶᤒᤠ ᤁᤢᤈᤠᤴ ᤁᤧᤛᤢᤵᤛᤢᤶ. ᤂᤧᤴ ᤕᤧᤶᤔᤥ ᤁᤢᤈᤠ ᤆᤡᤱᤔᤠ ᤋᤱᤏᤠᤶ ᤋᤥᤛᤧᤶᤔᤧ᤹॥ 17 “ᤋᤱᤒᤣ ᤌᤰᤔᤠ ᤁᤴ ᤛᤢᤶᤛᤡ ᤋᤱᤏᤠᤶᤜᤠ᤹ᤀᤥ ᤂᤡᤏᤡ᤹ ᤕᤧᤶᤒᤡᤳᤇᤠ ᤔᤏᤠᤜᤠ᤹ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤳᤇᤧ ᤔᤧᤍᤠᤖ ᤐᤥᤱ᤹॥ 18 “ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤏᤠᤛᤡᤒᤠ ᤌᤰᤛᤠ ᤔᤠᤰᤂᤡ᤹ᤀᤡᤴᤏᤢ ᤛᤥᤖᤡᤰ ᤁᤧᤓᤱᤒᤠ ᤛᤡᤍᤠ᤹ ᤕᤠᤰᤔᤏᤠᤒᤠ ᤂᤖᤧ᤺ᤱ ᤔᤧᤍᤥ᤺ᤴᤍᤧᤶᤔᤡᤴᤏᤧ᤹॥ “ᤁᤴ ᤋᤱᤏᤠᤶᤜᤠ᤹ᤀᤥ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤏᤠᤛᤡᤒᤠ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤛᤥ᤺ᤳᤋᤡᤴ ᤁᤢᤍᤠ᤺ᤴᤍᤡᤰᤔᤠ ᤋᤠᤏᤠᤶ ᤌᤠᤖᤡᤰ ᤕᤠ᤺ᤰᤗ ᤔᤧᤈᤥᤃᤧᤶᤔᤡᤴᤏᤧ᤹॥ 19 “ᤋᤱᤒᤣ ᤌᤰᤔᤠ ᤂᤡᤏᤡ᤹ ᤗᤠᤈᤣ᤹ ᤛᤡᤱᤒᤢᤱᤅᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤁᤧᤍᤢᤶᤒᤠ ᤁᤢᤈᤠᤜᤠ᤹ᤀᤥ ᤏᤢᤒᤠ ᤁᤢᤈᤠᤴ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤋᤠᤖᤧᤶᤔᤧ᤹॥ “ᤔᤧ᤺ᤴᤍᤈᤩᤠ᤺ᤰ ᤛᤠᤴ ᤂᤧᤸᤗᤧ ᤁᤢᤶᤔᤠᤖᤧ ᤁᤢᤏᤢᤀᤥ ᤔᤧᤎᤥ᤺ᤰᤋᤧᤶᤔᤡᤴᤏᤧ᤹ᤀᤥ॥ ᤔᤠᤱᤜᤢᤵᤜᤠ᤹ ᤏᤢ ᤂᤠᤜᤢᤴᤜᤠ᤹ 20 “ᤀᤥᤔᤧᤳᤋᤧᤶᤔᤧ᤹. ᤗᤠᤶᤔᤥ ᤂᤡᤏᤡ᤹ ᤁᤶᤒᤪᤠᤱ ᤔᤧᤵᤔᤠᤖᤧ ᤗᤠᤃᤡ ᤏᤢ ᤀᤠᤱᤃᤠ᤹ ᤕᤠᤖᤡᤵ ᤆᤥᤃᤢᤱᤒᤠ ᤋᤧᤴᤏᤥ ᤂᤡᤏᤡ᤹ ᤁᤧᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤗᤳᤇᤠ ᤔᤠᤱᤗᤠᤀᤡᤱᤒᤠᤎᤡᤰ ᤂᤡᤏᤡ᤹ ᤋᤃᤡ ᤋᤃᤡ ᤐᤠᤱᤄᤢᤱ᤹॥ 21 ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤸᤗᤧ ᤁᤢᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ ᤜᤧᤰᤁᤩᤠᤱ ᤂᤧᤴ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥ ᤂᤧᤴ ᤔᤧᤀᤳᤋᤧᤶᤔᤡᤴᤏᤧ᤹ ᤌᤣᤀᤠᤱᤓᤧᤸᤗᤧ ᤂᤧᤴ ᤀᤠᤱᤃᤠ᤹ᤀᤣ ᤐᤠᤱᤄᤢᤱᤒᤠ ᤜᤧᤰᤁᤩᤠᤱ ᤂᤧᤸᤗᤧ ᤂᤡᤏᤡ᤹ ᤑᤧᤴᤕᤠ᤺ᤶᤒᤰᤁᤥ ᤗᤧᤵᤔᤡ ᤁᤧᤶᤒᤡᤖᤡᤴ᤹॥ 22 ᤂᤧᤸᤗᤧ ᤁᤢᤒᤠ᤺ᤴᤏᤡᤴ ᤂᤡᤏᤡ᤹ ᤁᤧᤄᤧᤵᤛᤢᤶ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤈᤥᤃᤢᤶᤏᤧᤓᤃᤪ. ᤀᤠᤱᤃᤠ᤹ ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤔᤡ ᤐᤥᤱᤅᤠ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤀᤵᤐᤠᤜᤠ᤹ ᤀᤳᤋᤢᤱᤛᤡᤱ᤹॥ 23 ᤀᤠᤱᤃᤠ᤹ ᤀᤠᤔᤠᤱᤗᤠᤀᤡᤱᤒᤠᤴ ᤂᤡᤏᤡ᤹ ᤋᤃᤡ ᤋᤃᤡ ᤐᤣᤰ. ᤜᤧᤰᤁᤩᤠᤱ ᤀᤣᤔᤥᤖᤡ. ᤜᤡᤳᤋᤡ. ᤐᤖᤡᤈ᤻ᤈᤡ. ᤁᤏᤠᤏᤡ. ᤜᤡᤒ᤻ᤒᤡ ᤏᤢ ᤕᤒᤢᤛᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤂᤡᤏᤡ᤹ ᤁᤧᤃᤧᤳᤋᤡ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤔᤠᤛᤢᤱ ᤐᤡᤖᤢᤱᤛᤡᤱ᤹॥ 24 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤧᤶᤛᤡᤶᤔᤡᤴᤏᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤕᤥ ᤛᤠᤰᤌᤡᤶᤜᤠ᤹ ᤔᤧᤀᤡ᤺ᤳᤋᤧᤶ ᤔᤧᤏᤠ᤺ᤳᤋᤧᤶᤔᤡᤴᤏᤧ᤹. ᤁᤖ ᤂᤧᤱᤜᤠ᤹ ᤘᤖᤧᤱᤗᤧᤱ ᤔᤧᤰᤂᤧᤶᤛᤡᤶᤔᤧ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤣᤛᤣ ᤗᤢᤱᤜᤠ᤹ ᤁᤢᤶᤈᤡᤰᤔᤠ ᤆᤥᤃᤧᤶ ᤐᤡᤖᤧᤶᤛᤡᤶᤔᤧ᤹॥ 25 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤀᤠᤒᤠᤅᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤢᤏᤧ᤹ ᤂᤡᤏᤡ᤹ ᤐᤥᤃᤢᤃᤧᤴ ᤆᤠᤔᤠ ᤁᤢᤈᤠ ᤏᤢ ᤆᤫᤠ᤺ᤳᤋᤥ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤌᤠᤛᤢ ᤁᤧᤒᤡᤖᤡ᤹॥ ᤀᤠᤱᤃᤠ᤹ ᤂᤡᤏᤡ᤹ᤗᤢᤶᤔᤥᤗᤠᤶ ᤋᤢᤰᤔᤠ ᤗᤠ᤺ᤰᤔᤠᤜᤠ᤹ ᤂᤧᤳᤋᤢᤱᤍᤣᤛᤢᤱ ᤐᤡᤏᤡᤱ᤹॥ 26 ᤂᤡᤏᤡ᤹ ᤗᤠᤈᤣ᤹ᤀᤥ ᤀᤠᤳᤋᤡᤴ ᤔᤧᤴᤇᤢᤔᤠᤜᤠ᤹ᤀᤠᤱ ᤁᤢᤛ᤻ᤛᤠ ᤁᤧᤗᤧᤶᤔᤠ ᤏᤢ ᤛᤠᤔᤧᤱᤃᤵᤔᤏᤠᤔᤠ ᤔᤧᤶᤒᤥᤱᤏᤧᤴ॥ ᤀᤠᤱᤃᤠ᤹ ᤂᤡᤏᤡ᤹ ᤌᤠ᤺ᤰ ᤆᤠ᤹ᤖ ᤆᤥᤃᤢᤱ ᤐᤡᤏᤡᤱ᤹॥ 27 “ᤂᤡᤏᤡ᤹ ᤁᤧᤀᤵᤐᤠ ᤔᤏᤠᤜᤠ᤹ ᤀᤠᤱᤃᤠ᤹ ᤔᤧᤃᤡᤳᤋᤠᤖ ᤕᤠ᤺ᤴᤍᤢᤱᤛᤡᤱ᤹॥ ᤀᤠᤳᤋᤡᤴᤜᤠ᤹ᤏᤢ ᤂᤡᤏᤡ᤹ ᤌᤱ ᤁᤧᤈᤥᤃᤡ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ᤗᤢᤶᤔᤥ ᤜᤕᤱ ᤁᤡᤸᤗᤡᤱ ᤐᤥᤱᤗ ᤆᤥᤃᤢᤱ᤹. ᤂᤧᤒᤩᤠᤱ ᤂᤡᤏᤡ᤹ ᤁᤧᤖᤧᤰ ᤏᤡᤱᤔᤡᤜᤠ᤹ ᤂᤡᤏᤡ᤹ᤗᤠᤶᤒᤠ ᤔᤧᤄᤧᤳᤇᤡᤱ ᤔᤧᤒᤣ᤺ᤰ॥ 28 ᤂᤡᤏᤡ᤹ ᤏᤡᤱᤔᤡᤜᤠ᤹ ᤀᤠᤱᤃᤠ᤹ ᤕᤱᤔᤠ ᤔᤧᤛᤡᤖ ᤕᤠ᤺ᤴᤍᤢᤱᤛᤡᤱ᤹॥ ᤂᤡᤏᤡ᤹ ᤋᤃᤡ ᤁᤧᤒᤥᤖᤡᤖ ᤁᤧᤒᤣᤃᤡᤸᤗᤧ ᤜᤡᤒ᤻ᤒᤡᤜᤠ᤹. ᤁᤏᤠᤏᤡᤜᤠ᤹. ᤜᤡᤳᤋᤡᤜᤠ᤹ ᤀᤠᤱᤃᤠ᤹ ᤏᤠ᤺ᤳᤋᤢᤱᤛᤡᤱ᤹॥ 29 ᤁᤖ ᤀᤠᤱᤃᤠ᤹ ᤂᤧᤱᤜᤠ᤹ ᤂᤡᤏᤡ᤹ ᤋᤃᤡᤗᤠᤶᤒᤠ ᤋᤱᤒᤣᤎᤡᤰᤗᤧᤛᤠ ᤔᤧᤏᤠ᤺ᤳᤋᤢᤱᤛᤡᤱᤅᤡᤴ. ᤔᤣ᤺ᤴᤏᤧᤓᤃᤪ ᤗᤠᤈᤣᤴ ᤆᤡᤈᤡ ᤂᤰᤂᤰ ᤐᤥᤱ᤹. ᤜᤧᤰᤁᤩᤠᤱ ᤋᤠᤶᤓᤢᤱ ᤌᤰᤛᤠᤜᤠ᤹ ᤂᤡᤏᤡ᤹ ᤗᤠᤃᤡ ᤂᤠᤏᤡ᤺ᤳᤋᤥ ᤕᤖᤡᤰ ᤔᤧᤒᤥᤱ᤹॥ 30 ᤀᤠᤱᤃᤠ᤹ ᤂᤧᤱᤜᤠ᤹ ᤂᤡᤏᤡ᤹ ᤋᤃᤡᤗᤠᤶ ᤕᤠ᤺ᤰᤕᤠ᤺ᤰᤁᤠᤱ ᤏᤠ᤺ᤳᤋᤢᤱᤍᤣᤛᤢᤱᤛᤡᤱ᤹ ᤜᤧᤰᤁᤩᤠᤱ ᤁᤴ ᤗᤠᤈᤣᤴ ᤁᤧᤖᤧᤰ ᤂᤡᤏᤡ᤹ ᤜᤢᤰᤁᤥ ᤔᤧᤴᤎᤠᤀᤣ ᤌᤠᤖᤡᤰ ᤀᤠᤱᤃᤠ᤹ ᤂᤡᤏᤡ᤹ ᤑᤥᤏᤡᤱ᤹॥ 31 “ᤀᤠᤱᤃᤠ᤹ ᤂᤡᤏᤡ᤹ ᤀᤡ᤺ᤴᤍᤥᤴ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤥᤏᤢ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤒᤠ ᤘᤖ᤺ᤱ ᤌᤠᤖᤡᤰ. ᤜᤧᤰᤁᤩᤠᤱ ᤔᤢᤖᤧ᤺ᤰ ᤂᤧᤖᤧ᤺ᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤠᤱ ᤁᤳᤏᤠ ᤕᤢᤑᤪᤣᤋᤡᤛ ᤌᤠᤖᤡᤰᤁᤣ ᤏᤧᤛ᤻ᤛᤢᤱ ᤐᤡᤏᤡᤱ᤹॥ ᤀᤠᤱᤃᤠ᤹ ᤂᤧᤴ ᤗᤠᤈᤣ᤹ᤒᤠ ᤕᤰᤕᤢᤱᤒᤠᤜᤠ᤹ ᤂᤡᤏᤡ᤹ ᤜᤢᤰᤁᤥ ᤌᤠᤛᤢᤱᤛᤡᤱ᤹. ᤂᤧᤒᤩᤠᤱ ᤂᤡᤏᤡ᤹ ᤂᤧᤱᤜᤠ᤹ ᤁᤧᤏᤠ᤺ᤳᤋᤢᤶ ᤁᤧᤍᤣᤛᤢᤶᤛᤡᤶ᤹॥ 32 ᤂᤧᤱᤜᤠ᤹ᤏᤢ ᤀᤡᤃᤪ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ᤏᤢ ᤔᤠᤱᤜᤢᤵ ᤔᤧᤈᤥᤃᤧᤶᤔᤡᤴᤏᤧ᤹॥ 33 ᤂᤧᤴ ᤔᤏᤠᤜᤠ᤹ ᤂᤡᤏᤡ᤹ ᤗᤠᤈᤣ᤹ᤀᤥ ᤕᤢᤱ ᤔᤧᤓᤠ᤺ᤰᤋᤠᤶᤛᤡᤶᤔᤡᤴᤏᤧ᤹. ᤂᤧᤱᤜᤠ᤹ ᤂᤡᤏᤡ᤹ ᤕᤢᤱᤔᤠ ᤁᤧᤓᤠ᤺ᤰᤋᤢᤶᤛᤡᤶᤏᤧᤓᤃᤪ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤗᤠᤕᤥ ᤆᤥ᤺ᤰᤔᤠ ᤁᤧᤶᤒᤠᤱᤄᤡ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ ᤂᤡᤏᤡ᤹ ᤛᤧᤘᤠ ᤁᤧᤔᤧᤳᤋᤢᤶᤛᤡᤏᤧᤓᤃᤪ ᤂᤡᤏᤡ᤹ ᤛᤡᤔᤠ ᤀᤡᤀᤥ ᤁᤧᤎᤩᤧ᤹ᤀᤡᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.