ᤗᤠᤶᤍᤡᤰ 21 - LIFOTNT1 “ᤀᤠᤸᤗ ᤀᤠᤱᤃᤠ᤹ ᤜᤡᤒᤪᤢᤜᤠ᤹ ᤐᤡᤖᤢᤱᤛᤡᤱᤒᤠ ᤌᤡᤶᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ॥ ᤜᤡᤒᤪᤢ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ 2 “ᤀᤠᤸᤗ ᤂᤡᤏᤡ᤹ ᤗᤳᤇᤠ ᤜᤡᤒᤪᤢ ᤕᤥᤰ ᤁᤧᤀᤡᤅᤢᤶᤔᤡᤸᤗᤧ ᤂᤧᤸᤗᤧ ᤋᤱᤒᤣ ᤋᤢᤰᤛᤡ ᤌᤠᤖᤡᤰ ᤂᤡᤏᤡ᤹ ᤕᤠ᤺ᤶᤒᤰ ᤆᤥᤃᤢ ᤁᤧᤒᤡᤖᤡ᤹॥ ᤋᤱᤒᤣ ᤏᤢᤛᤡ ᤋᤥ᤹ᤖᤢᤸᤗᤧ ᤂᤧᤴ ᤜᤠᤒᤠ ᤗᤧᤖᤧᤶᤍᤣᤛᤧᤶᤔᤧ᤹॥ 3 ᤂᤧᤴ ᤕᤥᤰ ᤐᤥ᤺ᤰᤂᤧᤀᤠᤱ ᤋᤩᤧᤒᤠ ᤕᤧᤶᤔᤥ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤋᤩᤧᤀᤠᤱ ᤘᤕᤧᤏᤧᤓᤃᤪ ᤂᤧᤴ ᤐᤣ᤺ᤰᤁᤡᤸᤗᤧᤀᤠᤱ ᤂᤧᤸᤗᤧ ᤁᤢᤔᤣ᤺ᤳᤋᤡᤴ ᤔᤧᤴᤍᤣ᤹ᤀᤣ ᤀᤧᤰᤗᤣ᤺ᤰ ᤐᤣ᤺ᤰᤗ. ᤁᤖ ᤂᤧᤴ ᤔᤣ᤺ᤰᤂᤡᤶ ᤆᤥᤃᤧᤀᤠᤱ ᤋᤩᤧᤀᤠᤱ ᤘᤕᤧᤏᤧᤓᤃᤪ ᤂᤧᤸᤗᤧ ᤁᤢᤔᤣ᤺ᤳᤋᤡᤴ ᤋᤣ᤹ᤖᤢᤀᤠᤱ ᤐᤣ᤺ᤰᤗ॥ 4 ᤁᤢᤴᤍᤠᤱᤒᤧᤸᤗᤧ ᤂᤧᤴ ᤔᤣ᤺ᤳ ᤐᤡᤖᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛ᤻ᤛᤠᤁᤢᤀᤣ ᤔᤧᤘᤕᤧᤏᤧᤓᤃᤪ ᤂᤧᤴ ᤁᤢᤔᤣᤳ ᤁᤢᤛ᤻ᤛᤠᤜᤠ᤹ ᤁᤢᤱᤍᤠᤱᤒᤧᤸᤗᤧᤴ ᤔᤧᤒᤥᤱ᤹. ᤜᤧᤰᤁᤩᤠᤱ ᤂᤧᤴᤗᤰ ᤀᤣ᤺ᤰ ᤐᤣ᤺ᤰᤗ॥ 5 “ᤁᤖ ᤂᤧᤴ ᤕᤥ᤺ᤃ᤻ᤒᤠ᤺ᤸᤗᤧ ᤂᤢᤏᤧ᤹ ᤁᤢᤴᤍᤠᤱᤒᤠᤴ. ᤁᤢᤔᤣᤳ ᤁᤢᤛ᤻ᤛᤠᤜᤠ᤹ ᤁᤢᤗᤢᤱᤔᤠ᤹ ᤔᤧᤍᤢᤰᤁᤠᤱ ᤛᤧᤔᤠ ᤔᤧᤍᤧᤴᤏᤧᤓᤃᤪ. 6 ᤁᤢᤴᤍᤠᤱᤒᤧᤸᤗᤧ ᤂᤧᤴ ᤔᤠᤱᤛᤧᤘᤠ ᤆᤥ᤺ᤰᤔᤠᤍᤧᤴᤏᤥ ᤋᤣ᤹ᤖᤢᤀᤠᤱ ᤐᤣ᤺ᤰᤗ ᤜᤧᤰᤁᤩᤠᤱ ᤂᤧᤵᤔᤥ ᤗᤠᤶᤎᤣ᤺ᤵᤐᤥ ᤀᤡᤃᤪ ᤗᤠᤶᤎᤣᤳ ᤛᤡᤳᤗᤠᤱᤅᤥ ᤕᤧᤵᤛᤢᤀᤠᤱ ᤂᤧᤸᤗᤧ ᤁᤢᤏᤧᤰᤂᤥᤴ ᤋᤠᤰᤁᤫᤠ᤺ᤸᤗᤧ ᤕᤳᤋᤢ ᤐᤡᤖᤢᤖ॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤁᤢᤜᤡᤱᤜᤡᤱ ᤕᤥᤰ ᤐᤥᤱᤅᤠᤱ ᤘᤠ᤹॥ 7 “ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤴ ᤕᤥ᤺ᤃ᤻ᤔᤠ ᤆᤥᤃᤢᤀᤠᤱ ᤛᤱᤄᤢᤍᤣᤛᤢᤏᤧᤓᤃᤪ ᤂᤧᤴ ᤔᤧᤴᤇ᤻ᤕᤠᤴ ᤕᤥ᤺ᤃ᤻ᤒᤠᤜᤠ᤹ ᤜᤧᤰᤁᤣ ᤆᤥ᤺ᤰᤕᤢᤶᤓᤥ ᤐᤥᤱᤔᤠᤀᤠᤱ ᤐᤣ᤺ᤰᤔᤠ ᤔᤧᤄᤥᤏᤧᤴ॥ 8 ᤀᤠᤳᤋᤡᤸᤗᤧ ᤂᤧᤴ ᤔᤣ᤺ᤳ ᤆᤥ᤺ᤰᤔᤠᤖᤧ ᤗᤠᤃᤡ ᤀᤡᤅᤢᤀᤠᤱ ᤘᤕᤧ ᤜᤧᤰᤁᤩᤠᤱ ᤀᤠᤸᤗ ᤂᤧᤸᤗᤧ ᤔᤣ᤺ᤳ ᤆᤥ᤺ᤰᤔᤠᤀᤠᤱ ᤁᤵᤔᤠ ᤁᤢᤛᤡᤖᤠ᤹ ᤔᤧᤎᤠᤱᤏᤧᤴᤏᤧᤓᤃᤪ ᤂᤧᤴ ᤔᤧᤴᤇ᤻ᤕᤠᤴ ᤜᤠᤒᤠ ᤁᤢᤶᤒᤠᤖᤧᤀᤥ ᤕᤠᤱᤏᤠ ᤛᤱᤄᤢᤍᤣᤛᤢᤖ॥ ᤂᤧᤸᤗᤧ ᤁᤢᤴᤍᤠᤱᤒᤧᤸᤗᤧ ᤂᤧᤴ ᤘᤣ᤹ ᤗᤠᤈᤣ᤹ᤒᤠ ᤀᤠᤳᤋᤡᤸᤗᤧ ᤁᤢᤜᤢᤰᤁᤥᤀᤠᤱ ᤛᤱᤔᤠᤍᤣᤔᤠ ᤔᤧᤄᤥᤛᤢᤴ᤹ ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤂᤧᤴ ᤕᤥ᤺ᤃ᤻ᤔᤧᤴᤏᤢ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤑᤣ᤺ᤴᤍᤢᤀᤠᤱ ᤘᤠ᤹॥ 9 ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠ᤺ᤸᤗᤧ ᤗᤠᤃᤡ ᤕᤥ᤺ᤃ᤻ᤔᤠ ᤀᤡᤅᤢᤀᤠᤱ ᤘᤠ᤹. ᤂᤧᤴ ᤁᤢᤛ᤻ᤛᤠ ᤔᤧᤴᤇᤢᤔᤠ ᤜᤧᤰᤁᤣᤀᤣ ᤏᤢᤖᤡᤰ ᤔᤧᤳᤋᤢᤖ॥ 10 ᤁᤢᤓᤠ ᤔᤏᤠᤎᤡᤰᤗᤧ ᤘᤣ᤹ ᤔᤣ᤺ᤳ ᤋᤠᤖᤢᤏᤧᤓᤃᤪ ᤂᤧᤸᤗᤧ ᤋᤃᤡᤔᤠ ᤁᤢᤔᤣ᤺ᤳᤋᤡᤴ ᤆᤠᤔᤠ ᤌᤢᤱᤔᤠ. ᤆᤠᤱ ᤏᤢ ᤋᤃᤡᤒᤠ ᤜᤧᤰᤁᤣᤀᤣ ᤔᤣ᤺ᤳᤋᤡᤸᤗᤧ ᤁᤢᤄᤥᤔᤠ ᤕᤢᤰᤁᤡᤴ ᤐᤡᤖᤢᤖ॥ 11 ᤂᤧᤴ ᤔᤏᤠ᤺ᤸᤗᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤁᤴ ᤕᤠ᤺ᤶᤒᤰᤜᤠ᤹ ᤔᤧᤃᤧᤳᤋᤢᤴᤏᤧᤓᤃᤪ ᤂᤧᤸᤗᤧ ᤕᤠᤱᤎᤡᤰᤁᤠᤱ ᤔᤧᤴᤍᤠ᤺ᤰᤁᤣ ᤋᤃᤡᤔᤠ ᤁᤢᤔᤣ᤺ᤳᤋᤡᤴ ᤆᤥ᤺ᤰᤕᤢᤶᤓᤥ ᤆᤥᤃᤢᤀᤠᤱ ᤗᤧᤖᤢᤍᤣᤛᤢᤖᤖᤥ॥ ᤀᤠᤃᤠ᤺ᤴᤏᤧᤸᤗᤧᤒᤠ ᤌᤡᤶᤜᤠ᤹ 12 “ᤜᤠ᤺ᤳᤗᤧ ᤔᤏᤠᤴ ᤛᤡᤖ ᤜᤡᤵᤋᤢᤛᤩᤧᤖᤢ᤹ ᤂᤧᤴᤏᤠᤱ ᤛᤡᤖᤀᤣ ᤜᤡᤵᤔᤠ ᤛᤧᤵᤔᤠ ᤐᤥᤱ᤹॥ 13 ᤁᤖ ᤁᤢᤓᤠ ᤔᤏᤠ᤺ᤸᤗᤧ ᤂᤧᤴ ᤏᤡᤏᤡᤒᤠ ᤆᤥᤃᤢᤒᤠ ᤜᤥ᤺ᤵᤋᤧ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤧᤰᤁᤣ ᤆᤥ᤺ᤰᤔᤠ ᤐᤠᤱᤄᤢᤒᤠᤏᤧᤓᤃᤪ. ᤂᤧᤴ ᤂᤧᤳᤇᤡᤱᤔᤠ ᤐᤣ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤗᤳᤇᤠ ᤋᤧᤴᤎᤡᤰ ᤏᤡ᤺ᤴᤎᤥ ᤆᤥᤃᤢᤱ ᤐᤡᤖᤢᤱ᤹॥ 14 ᤁᤖ ᤀᤠᤳᤋᤡᤸᤗᤧ ᤁᤢᤛᤡᤰ ᤐᤥᤰ ᤜᤧᤰᤁᤩᤠᤱ ᤛᤧᤵᤔᤠᤀᤣ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤣ᤹ ᤔᤏᤠᤴ ᤛᤩᤧᤖᤢ᤹. ᤂᤧᤒᤩᤠᤱ ᤂᤢᤏᤧ᤹ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ᤀᤥ ᤗᤧᤳᤋᤡ ᤔᤧᤍᤥᤴᤍᤢᤒᤠᤍᤧᤴᤏᤥᤀᤣ ᤋᤩᤧᤀᤠᤱ ᤘᤠ᤹ᤛᤠᤱ ᤂᤧᤴ ᤗᤧᤵᤔᤠ ᤔᤧᤏᤢ᤹ᤏᤧᤴ. ᤂᤧᤴ ᤛᤧᤵᤔᤠᤀᤣ ᤐᤥᤱ᤹॥ 15 “ᤀᤠᤳᤋᤡᤸᤗᤧ ᤀᤠᤒᤠᤅᤣ ᤁᤢᤶᤒᤠ ᤀᤡᤃᤪ ᤁᤢᤶᤔᤠ ᤜᤡᤵᤋᤢ᤹. ᤂᤧᤴ ᤛᤧᤵᤔᤠᤀᤣ ᤐᤥᤱ᤹॥ 16 “ᤀᤠᤳᤋᤡᤸᤗᤧ ᤁᤢᤓᤠ ᤌᤡᤰ ᤕᤥᤰ ᤆᤥᤃᤢᤀᤠᤱ ᤛᤱᤛᤧ ᤀᤡᤃᤪ ᤕᤢᤱᤛᤧ ᤔᤧᤴᤍᤧᤴᤏᤣ ᤛᤠᤰᤁᤧᤸᤗᤧᤰ ᤋᤣ᤹ᤖᤢᤏᤧᤓᤃᤪ ᤂᤧᤴ ᤁᤧᤍᤣ᤹ᤒᤧᤴ ᤛᤧᤵᤔᤠᤀᤣ ᤐᤥᤱ᤹॥ 17 “ᤀᤠᤳᤋᤡᤸᤗᤧ ᤀᤠᤒᤠᤅᤣ ᤁᤢᤶᤒᤠ ᤀᤡᤃᤪ ᤁᤢᤶᤔᤠ ᤔᤠᤱᤍᤣ ᤛᤠᤱᤃᤪᤠ ᤔᤧᤳᤋᤢ. ᤂᤧᤴ ᤛᤧᤵᤔᤠᤀᤣ ᤐᤥᤱ᤹॥ 18-19 “ᤔᤏᤠᤜᤠ᤹ ᤔᤧᤄᤣ ᤔᤧᤎᤰᤁᤡᤸᤗᤧ ᤌᤡᤰᤗᤧ ᤘᤣ᤹ᤀᤡᤴ ᤗᤢᤱᤅᤡᤸᤗᤧ ᤗᤧᤵᤋᤢ᤹ ᤀᤡᤃᤪ ᤜᤢᤰᤐᤢᤳᤋᤧᤸᤗᤧ ᤜᤡᤵᤋᤢ ᤁᤖ ᤂᤧᤴ ᤔᤧᤛᤩᤧᤖᤢᤴ ᤜᤧᤰᤁᤩᤠᤱ ᤋᤧ᤺ᤶᤓᤢᤰ ᤁᤧᤈᤠᤒᤠ ᤔᤏᤠᤴ ᤏᤧᤳᤏᤠᤀᤥ ᤏᤧᤛᤡᤱ ᤜᤧᤰᤁᤩᤠᤱ ᤋᤠ᤺ᤴᤍᤡ ᤐᤥ᤺ᤰᤁᤠᤱ ᤋᤰᤁᤠᤳ ᤋᤰᤛᤡᤱᤗ ᤘᤠ᤹ᤔᤠ ᤁᤧᤛᤢᤰᤐᤠ ᤐᤥᤱᤏᤧᤓᤃᤪ ᤁᤧᤜᤡᤵᤐᤠ ᤔᤏᤠᤴ ᤛᤠᤶᤒᤠᤴ ᤔᤧᤎᤠᤏᤧᤴ॥ ᤁᤖ ᤂᤧᤴ ᤏᤧᤳᤏᤠᤀᤥ ᤏᤧᤛᤡᤱᤅᤡᤸᤗᤧ ᤁᤧᤗᤠ᤺ᤵᤐᤠ ᤕᤠᤱᤅᤡᤴ ᤐᤡᤖᤢᤖ ᤜᤧᤰᤁᤩᤠᤱ ᤂᤧᤴ ᤔᤧᤴᤘᤣ᤺ᤳᤋᤣ ᤌᤠᤖᤡᤰ ᤂᤧᤸᤗᤧ ᤛᤡᤍᤠ᤹ ᤐᤠᤱᤍᤠ ᤔᤧᤳᤋᤢᤖ॥ 20 “ᤀᤠᤳᤋᤡᤴ ᤔᤏᤠ᤺ᤸᤗᤧ ᤀᤠᤒᤠᤅᤣ ᤁᤢᤕᤥ᤺ᤃ᤻ᤒᤠᤴ ᤀᤡᤃᤪ ᤁᤢᤕᤥ᤺ᤃ᤻ᤔᤠᤴ ᤋᤰᤁᤠ᤺ᤳᤋᤡᤸᤗᤧ ᤜᤡᤵᤋᤢᤸᤗᤧ ᤜᤡᤵᤋᤢᤒᤠᤍᤧᤴᤏᤥᤀᤣ ᤛᤩᤧᤏᤧᤓᤃᤪ ᤂᤧᤴ ᤔᤏᤠᤴ ᤂᤢᤶᤍᤡᤱ ᤐᤡᤔᤠᤀᤣ ᤐᤥᤱ᤹॥ 21 ᤁᤖ ᤂᤧᤴ ᤕᤥ᤺ᤃ᤻ᤒᤠᤴ ᤀᤡᤃᤪ ᤕᤥ᤺ᤃ᤻ᤔᤠᤴ ᤌᤡᤰᤕᤠᤴ ᤀᤡᤃᤪ ᤏᤡᤕᤠᤴ ᤌᤠᤖᤡᤰ ᤔᤧᤛᤩᤧᤏᤧᤴ ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱᤗᤰ ᤛᤩᤧᤏᤧᤓᤃᤪ ᤂᤧᤴ ᤂᤢᤶᤍᤡᤱᤅᤥ ᤔᤧᤎᤠᤏᤧᤴ॥ ᤂᤧᤸᤗᤧ ᤁᤧᤛᤡᤒᤠ ᤁᤢᤕᤥ᤺ᤃ᤻ᤒᤧᤴᤏᤣ ᤂᤢᤏᤧ᤹ ᤁᤢᤗᤠᤃᤡ ᤂᤢᤶᤍᤡᤱ ᤐᤥᤱ᤹॥ 22 “ᤔᤏᤠᤜᤠ᤹ ᤔᤧᤄᤣ᤺ᤸᤗᤧ ᤁᤢᤓᤠ ᤔᤧᤴᤇᤢᤰᤔᤠ ᤁᤧᤘᤠ᤹ᤔᤠ ᤔᤧᤴᤇᤢᤔᤠᤴ ᤁᤠ᤺ᤴ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛ᤻ᤛᤠᤗᤧᤶ ᤁᤖ ᤔᤧᤴᤇᤢᤔᤠᤴ ᤘᤣ᤹ ᤌᤣᤀᤠᤱ ᤔᤧᤗ᤹ᤏᤧᤴᤏᤧᤓᤃᤪ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤕᤧᤶᤒᤠ᤺ᤸᤗᤧ ᤏᤠ᤺ᤰᤋᤢᤒᤠ ᤕᤠᤖᤡᤰ ᤂᤠᤛᤧᤴᤗᤥ᤺ᤶᤒᤠᤸᤗᤧ ᤐᤠ᤺ᤳᤋᤢᤒᤠ ᤛᤠᤶᤒᤠ᤺ᤴᤏᤡᤴ ᤂᤧᤴ ᤁᤧᤄᤠ᤺ᤶᤒᤠ ᤔᤏᤠ᤺ᤸᤗᤧ ᤜᤢᤱᤔᤠ ᤐᤥᤱ᤹॥ 23 ᤁᤖ ᤂᤧᤴ ᤔᤧᤴᤇᤢᤔᤠᤴ ᤁᤠ᤺ᤴᤍᤧᤏᤧᤓᤃᤪ ᤛᤰᤔᤠ᤺ᤸᤗᤧ ᤁᤢᤗᤧᤰᤘᤠ ᤛᤰᤔᤠ. 24 ᤔᤡᤰᤁᤡᤸᤗᤧ ᤁᤢᤗᤧᤰᤘᤠ ᤔᤡᤰ. ᤜᤠᤒᤥ᤹ᤒᤠᤸᤗᤧ ᤁᤢᤗᤧᤰᤘᤠ ᤜᤠᤒᤥ᤹ᤒᤠ. ᤜᤢᤰᤁᤡᤸᤗᤧ ᤁᤢᤗᤧᤰᤘᤠ ᤜᤢᤰ. ᤗᤠᤱᤅᤡᤸᤗᤧ ᤁᤢᤗᤧᤰᤘᤠ ᤗᤠᤱ. 25 ᤔᤡᤃᤧᤍᤡᤰᤐᤠ ᤕᤠᤱᤄᤣ᤺ᤰᤁᤡᤸᤗᤧ ᤁᤢᤗᤧᤰᤘᤠ ᤔᤡᤃᤧᤍᤡᤰᤐᤠ ᤕᤠᤱᤄᤣ᤺ᤰ. ᤁᤧᤃᤠ᤺ᤶᤒᤠᤸᤗᤧ ᤁᤢᤗᤧᤰᤘᤠ ᤁᤧᤃᤠ᤺ᤶᤒᤠ ᤏᤢ ᤕᤠᤱᤄᤣ᤺ᤰᤁᤡᤸᤗᤧ ᤁᤢᤗᤧᤰᤘᤠ ᤕᤠᤱᤄᤣ᤺ᤰᤁᤣ ᤂᤢᤶᤍᤡᤱ ᤋᤢᤔᤢᤖ ᤐᤥᤱ᤹॥ 26 “ᤁᤢᤓᤠ ᤔᤏᤠ᤺ᤸᤗᤧ ᤂᤢᤏᤧ᤹ ᤁᤢᤕᤥ᤺ᤃ᤻ᤒᤠᤴ ᤀᤡᤃᤪ ᤁᤢᤕᤥ᤺ᤃ᤻ᤔᤠᤴ ᤁᤢᤔᤡᤰᤁᤥ ᤜᤡᤵᤋᤢᤀᤠᤱ ᤁᤢᤔᤡᤰᤁᤡᤴ ᤑᤧᤰᤏᤧᤓᤃᤪ ᤂᤧᤸᤗᤧ ᤔᤡᤰᤁᤡᤸᤗᤧ ᤁᤢᤗᤧᤰᤘᤠ ᤂᤧᤴ ᤕᤥᤃ᤻ᤒᤠ ᤀᤡᤃᤪ ᤕᤥ᤺ᤃ᤻ᤔᤠᤴ ᤀᤠᤶᤓᤠ ᤗᤧᤖᤢᤍᤣᤛᤢᤖ ᤐᤥᤱ᤹॥ 27 ᤂᤧᤸᤗᤧ ᤕᤥᤃ᤻ᤒᤠ ᤀᤡᤃᤪ ᤕᤥ᤺ᤃ᤻ᤔᤠᤸᤗᤧ ᤁᤢᤜᤠᤒᤥ᤹ᤒᤠᤴ ᤗᤢ᤺ᤰᤂᤢ ᤐᤡᤖᤢᤏᤧᤓᤃᤪ ᤜᤠᤒᤥ᤹ᤒᤠᤸᤗᤧ ᤁᤢᤗᤧᤰᤘᤠ ᤂᤧᤴ ᤜᤠᤒᤠ ᤗᤧᤖᤢᤍᤣᤛᤢᤖᤖᤥ॥ ᤁᤢᤴᤍᤠᤱᤒᤠᤜᤠ᤹ᤖᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤗᤰᤐᤧᤴ 28 “ᤀᤠᤎᤥ᤺ᤱᤎᤥ᤺ᤱᤒᤠ ᤐᤡᤳᤋᤧᤸᤗᤧ ᤁᤢᤓᤠ ᤕᤧᤶᤒᤡᤳᤇᤠ ᤀᤡᤃᤪ ᤔᤧᤴᤇᤢᤔᤠᤴ ᤁᤢᤍᤠᤱᤅᤡᤸᤗᤧ ᤌᤥ᤺ᤰᤂᤢ ᤛᤩᤧᤖᤢᤏᤧᤓᤃᤪ. ᤂᤧᤴ ᤀᤠᤎᤥ᤺ᤱᤎᤥ᤺ᤱᤒᤠ ᤐᤡᤳᤋᤧᤴ ᤗᤢᤱᤅᤡᤸᤗᤧ ᤗᤧᤵᤋᤧᤶ ᤛᤧᤖᤧᤶᤔᤧ᤹. ᤜᤧᤰᤁᤩᤠᤱ ᤂᤧᤴ ᤔᤧᤈᤧᤶᤔᤡᤴᤏᤧ᤹. ᤁᤖ ᤐᤡᤳᤋᤧᤸᤗᤧ ᤁᤢᤴᤍᤠᤱᤒᤧᤴ ᤛᤠᤶᤒᤠᤴ ᤔᤧᤎᤠᤏᤧᤴ॥ 29 ᤁᤖ ᤛᤧᤃᤶᤒᤧᤸᤗᤧ ᤋᤃᤡ ᤔᤏᤠ ᤌᤥ᤺ᤰᤂᤢᤛᤡ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤴᤍᤠᤱᤒᤧᤴ ᤂᤧᤴ ᤐᤠ᤺ᤴᤏᤡᤴ ᤔᤧᤔᤧᤳᤋᤢᤛᤠᤱ ᤛᤧᤃᤶᤒᤠᤴ ᤔᤧᤄᤣ᤺ᤰᤂᤢᤴ ᤔᤧᤕᤧᤵᤛᤢᤴ ᤂᤧᤒᤩᤠᤱ ᤂᤧᤴ ᤛᤧᤃᤶᤒᤠᤸᤗᤧ ᤁᤢᤍᤠᤱᤅᤡᤸᤗᤧ ᤌᤥ᤺ᤰᤂᤢ ᤛᤩᤧᤖᤢᤏᤧᤓᤃᤪ ᤗᤢᤱᤅᤡᤸᤗᤧ ᤂᤧᤴ ᤗᤧᤵᤋᤧᤶ ᤛᤩᤧᤖᤧᤶᤔᤧ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤴᤍᤠᤱᤒᤧᤴᤏᤠᤱ ᤛᤩᤧᤖᤧᤶᤔᤧ᤹॥ 30 ᤁᤖ ᤂᤧᤴ ᤁᤢᤴᤍᤠᤱᤒᤧᤸᤗᤧ ᤜᤡᤱᤔᤠᤖᤧ ᤗᤠᤃᤡ ᤛᤠᤶᤒᤠᤴ ᤁᤢ᤺ᤵᤔᤏᤠᤒᤠ ᤕᤠᤱᤅᤡᤴ ᤜᤢᤅᤢᤏᤧᤓᤃᤪ ᤂᤧᤴ ᤏᤠ᤺ᤰᤔᤏᤠᤒᤠ ᤕᤠᤖᤡᤰ ᤁᤧᤳᤗ ᤜᤢᤅᤢᤖ ᤐᤥᤱ᤹॥ 31 ᤁᤢᤶᤒᤠᤒᤠ ᤐᤡᤳᤋᤧᤸᤗᤧ ᤁᤢᤓᤠᤖᤧ ᤂᤢᤴᤇᤡ᤹ ᤛᤠ ᤕᤧᤶᤒᤡᤳᤇᤠ ᤀᤡᤃᤪ ᤛᤠ ᤔᤧᤴᤇᤢᤔᤠ ᤌᤥ᤺ᤰᤂᤢ ᤛᤩᤧᤖᤢᤛᤡᤸᤗᤧ ᤜᤠᤒᤠ ᤁᤴ ᤌᤡᤶᤔᤡᤴ ᤁᤢᤀᤡᤛᤡᤰ ᤛᤠᤶᤒᤠᤴ ᤁᤢ᤺ᤳᤋᤧᤶᤛᤡᤶᤔᤧ᤹॥ 32 ᤁᤢᤶᤒᤠᤒᤠ ᤐᤡᤳᤋᤧᤸᤗᤧ ᤁᤢᤓᤠ ᤕᤥᤃ᤻ᤒᤠ ᤀᤡᤃᤪ ᤕᤥ᤺ᤃ᤻ᤔᤠᤴ ᤛᤩᤧᤖᤢᤀᤠᤱ ᤘᤠ᤹ᤏᤧᤓᤃᤪ. ᤐᤡᤳᤋᤧᤸᤗᤧ ᤁᤢᤴᤍᤠᤱᤒᤧᤸᤗᤧ ᤂᤧᤴ ᤁᤧᤛᤡᤒᤠᤸᤗᤧ ᤁᤢᤴᤍᤠᤱᤒᤠᤴ ᤛᤢᤶᤒᤥᤱ ᤕᤢᤵᤐᤠ ᤕᤠᤱᤀᤡᤳᤇᤣ᤹ ᤐᤡᤖᤢᤖ. ᤜᤧᤰᤁᤩᤠᤱ ᤂᤧᤴ ᤁᤢᤶᤒᤠᤒᤠ ᤐᤡᤳᤋᤧᤴ ᤆᤠᤜᤡ ᤗᤢᤱᤅᤡᤸᤗᤧ ᤗᤧᤵᤋᤧᤶ ᤛᤩᤧᤖᤧᤶᤔᤧ᤹॥ 33 “ᤁᤢᤓᤠ ᤔᤏᤠᤖᤧ ᤗᤢᤶᤒᤠ᤺ᤳᤋᤡᤸᤗᤧ ᤁᤢᤍᤧᤵᤔᤠᤴ ᤜᤴᤍᤢᤍᤣᤛᤢ ᤀᤡᤃᤪ ᤗᤢᤶᤒᤠᤳ ᤋᤕᤢᤀᤠᤱ ᤔᤧᤍᤧᤵᤋᤢᤴ ᤜᤧᤰᤁᤩᤠᤱ ᤛᤧᤃᤶᤒᤠ ᤀᤡᤃᤪ ᤀᤍᤱᤅᤡᤴ ᤗᤢᤶᤒᤠ᤺ᤳᤋᤥ ᤔᤰᤌᤩᤧ ᤗᤠᤛᤧᤏᤧᤓᤃᤪ 34 ᤂᤧᤴ ᤔᤏᤠ᤺ᤸᤗᤧ ᤂᤧᤴ ᤛᤧᤃᤶᤒᤠ ᤀᤡᤃᤪ ᤀᤍᤱᤅᤡᤸᤗᤧ ᤁᤢᤔᤧᤴ ᤜᤢᤅᤢᤖ ᤐᤥᤱ᤹॥ ᤌᤰᤛᤠ᤺ᤸᤗᤧ ᤁᤢᤴᤍᤠᤱᤒᤠᤴ ᤁᤢᤔᤧᤴ ᤐᤡᤖᤢᤀᤠᤱ ᤁᤧᤛᤡᤒᤠ ᤌᤰᤛᤠᤴ ᤗᤢᤶᤒᤠᤳ ᤁᤧᤍᤒᤠᤸᤗᤧ ᤗᤠᤖᤢᤖ॥ 35 “ᤗᤳᤇᤠ ᤌᤰᤛᤠᤍᤠᤱᤒᤠᤸᤗᤧ ᤁᤢᤛᤧᤃᤶᤒᤠᤸᤗᤧ ᤘᤣ᤹ᤀᤡᤸᤗᤧ ᤁᤢᤛᤧᤃᤶᤒᤠᤴ ᤛᤩᤧᤖᤢᤏᤧᤓᤃᤪ ᤂᤧᤴ ᤏᤧᤵᤔᤈᤠᤱ ᤌᤰᤛᤠᤍᤠᤱᤒᤠᤜᤠ᤹ ᤋᤱᤏᤧᤇᤡᤀᤠᤱ ᤂᤧᤴ ᤁᤢᤜᤡᤱᤘᤧᤳ ᤛᤧᤃᤶᤒᤠᤴ ᤛᤱᤛᤢᤖ ᤜᤧᤰᤁᤩᤠᤱ ᤂᤥᤛᤢᤒᤠ ᤁᤢᤔᤧᤴᤏᤡᤴ ᤂᤢᤴᤇᤡ᤹ ᤑ᤺ᤱᤛᤢᤖ॥ ᤁᤧᤛᤡᤒᤠ ᤌᤰᤛᤠ ᤛᤠ᤺ᤴᤏᤠᤱ ᤂᤢᤴᤇᤡ᤹ ᤗᤢᤶᤔᤥ ᤑ᤺ᤱᤛᤢᤖ॥ 36 ᤁᤖ ᤛᤧᤃᤶᤒᤠᤴ ᤀᤠᤎᤥ᤺ᤱᤎᤥ᤺ᤱᤒᤠ ᤘᤕᤧ ᤑᤠ᤹ᤀᤠᤱ ᤁᤢᤴᤍᤠᤱᤒᤧᤸᤗᤧ ᤏᤡᤱᤘᤠ᤹ ᤁᤳᤋᤢ ᤜᤧᤰᤁᤣᤛᤠᤱ ᤂᤧᤸᤗᤧ ᤔᤧᤄᤣ᤺ᤰᤛᤢᤴ ᤔᤧᤕᤧᤵᤛᤢᤴᤏᤧᤓᤃᤪ ᤂᤧᤴ ᤌᤰᤛᤠᤍᤠᤱᤒᤧᤸᤗᤧ ᤁᤧᤛᤡᤒᤠ ᤌᤰᤛᤠ᤺ᤸᤗᤧ ᤁᤢᤴᤍᤠᤱᤒᤠᤴ ᤁᤢᤜᤡᤱᤘᤧᤳ ᤛᤧᤃᤶᤒᤠᤎᤡᤰ ᤐᤡᤖᤢᤖ ᤐᤥᤱ᤹ ᤜᤧᤰᤁᤩᤠᤱ ᤁᤧᤛᤡᤒᤠ ᤛᤧᤃᤶᤒᤠᤴ ᤂᤧᤸᤗᤧ ᤋᤣ᤹ᤔᤠ ᤛᤢᤰᤋᤢᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.