ᤗᤠᤶᤍᤡᤰ 2 - LIFOTNT

ᤔᤥᤛᤠ᤺ᤸᤗᤧ ᤁᤢᤛᤠᤘᤠ᤺ᤴᤇᤡᤱᤔᤠ

¹ ᤜᤠᤒᤠ ᤂᤧᤴ ᤕᤧᤶᤔᤥ ᤗᤳᤇᤠ ᤗᤧᤒᤡ ᤌᤠ᤺ᤰᤁᤥᤒᤠ ᤔᤏᤠᤎᤡᤰᤗᤧ ᤂᤢᤏᤧ᤹ ᤀᤠᤒᤠᤅᤣ ᤗᤧᤒᤡ ᤁᤢᤎᤠ᤺ᤰᤁᤥᤒᤠ ᤔᤧᤴᤇᤢᤔᤠᤎᤡᤰ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤳᤋᤢ॥

² ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤀᤠᤱ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤗᤳᤇᤠ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ॥ ᤀᤅᤧ᤺ᤰᤘᤠᤴ ᤛᤠ᤹ᤖᤡᤰ ᤗᤖᤡᤰᤗᤡᤰᤐᤠ ᤆᤥᤃᤧᤒᤠ ᤏᤡᤛᤢᤀᤠᤱ ᤂᤢᤏᤧ᤹ ᤗᤠ ᤛᤢᤶᤛᤡ ᤌᤠᤖᤡᤰ ᤆᤡᤰᤂᤢ ᤁᤳᤋᤢ॥

³ ᤀᤅᤧ᤺ᤰᤘᤠᤴ ᤀᤠᤸᤗᤛᤠᤱ ᤀᤡᤖᤡᤰ ᤆᤡᤱᤔᤠ ᤁᤵᤔᤠ ᤔᤧᤛᤢᤰᤋᤢᤴᤏᤠᤱ ᤛᤠᤖᤠ᤺ᤸᤗᤧ ᤑᤔᤏᤠᤒᤠ ᤐᤰᤘᤠᤎᤡᤰ ᤕᤠᤱᤛᤡᤱ ᤜᤧᤰᤁᤩᤠᤱ ᤂᤡᤵᤏᤠ᤺ᤰ ᤂᤡᤵᤏᤠ᤺ᤰ ᤁᤧᤗ᤹ᤒᤠ ᤏᤢ ᤀᤗᤁᤠᤳᤋᤪᤠ᤺ᤸᤗᤧ ᤗᤧᤅᤢᤀᤠᤱ ᤆᤫᤠ᤺ᤳ ᤔᤧᤸᤗᤠ᤺ᤵᤔᤏᤠᤒᤠ ᤆᤥᤃᤢ॥ ᤀᤅᤧ᤺ᤰᤘᤠᤴ ᤐᤰᤘᤠᤀᤥ ᤕᤠᤰᤋᤢᤀᤠᤱ ᤏᤡᤗ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤣ᤺ᤶᤒ ᤁᤣ᤺ᤶᤒᤠ ᤛᤠᤖᤠ ᤁᤧᤕᤢᤱᤒᤠᤍᤧᤴᤏᤡᤸᤗᤧ ᤁᤢᤗᤢᤶᤔᤥ ᤏᤧᤛ᤻ᤛᤢᤎ॥

⁴ ᤀᤅᤧ᤺ᤰᤘᤠ᤺ᤸᤗᤧ ᤁᤢᤴᤏᤧ᤹ᤀᤡᤴ ᤔᤡᤛᤠᤰ ᤔᤠ᤺ᤱᤄᤠ ᤕᤧᤶᤛᤡᤱ ᤜᤧᤰᤁᤩᤠᤱ ᤌᤧᤔᤠ ᤗ᤹ᤀᤡ ᤑᤠ᤹ᤀᤠᤱ ᤜᤠᤒᤠ ᤀᤥᤔᤧᤳᤋᤢᤀᤠᤱ ᤕᤧᤒᤧ॥

⁵ ᤀᤠᤶᤓᤠ ᤁᤴ ᤕᤧᤶᤔᤥ ᤜᤠᤱᤅᤡᤸᤗᤧ ᤁᤢᤛ᤻ᤛᤠᤴ ᤏᤡᤗ ᤘᤜ᤺ᤱᤅᤥ ᤘᤠᤖᤢᤶᤛᤡᤱᤛᤧ ᤕᤧ॥ ᤂᤢᤏᤧ᤹ ᤁᤢᤛᤧᤘᤠᤖᤥᤔᤠᤜᤠ᤹ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤗᤠᤱᤔᤧᤄᤣᤃᤧᤀᤠᤱ ᤔᤧᤘᤕᤧ॥ ᤜᤰᤆᤄᤳ ᤜᤠᤱᤛᤠᤔᤠᤸᤗᤧ ᤛᤠᤖᤠ᤺ᤸᤗᤧ ᤁᤢᤗᤢᤶᤔᤥᤒᤠ ᤐᤰᤘᤠᤴ ᤏᤡᤛᤢᤀᤠᤱ ᤗᤳᤇᤠ ᤛᤧᤘᤠᤖᤥᤔᤠᤎᤡᤰ ᤂᤧᤴ ᤁᤢᤗᤠᤛᤧ ᤐᤠᤱᤄᤢ॥

⁶ ᤜᤠᤱᤛᤠᤔᤠᤸᤗᤧ ᤐᤰᤘᤠᤴ ᤜᤴᤍᤢᤸᤗᤧ ᤀᤅᤧ᤺ᤰᤘᤠᤴ ᤏᤡᤛᤢ॥ ᤀᤅᤧ᤺ᤰᤘᤠᤴ ᤜᤠᤒᤧᤖ ᤕᤠᤃᤧ ᤜᤧᤰᤁᤩᤠᤱ ᤜᤠᤱᤛᤠᤔᤠᤸᤗᤧ ᤂᤧᤴ ᤀᤅᤧ᤺ᤰᤘᤠᤴ ᤁᤢᤗᤢᤱᤔᤠ᤹ ᤋᤢᤃᤧ॥ ᤂᤢᤏᤧ᤹ ᤐᤠ᤺ᤳᤋᤢ. “ᤁᤱᤃ ᤗᤳᤇᤠ ᤜᤡᤒᤪᤢ ᤀᤅᤧ᤺ᤰᤘᤠᤖᤥ॥”

⁷ ᤂᤧᤒᤩᤠᤱ ᤂᤧᤴ ᤀᤅᤧ᤺ᤰᤘᤠ᤺ᤸᤗᤧ ᤁᤢᤴᤏᤧ᤹ᤖᤧ ᤑᤠᤖᤥᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤴ ᤔᤧᤳᤋᤢ. “ᤌᤣ ᤀᤠᤱᤃᤠ᤹ ᤐᤣ᤺ᤰᤁᤠᤀᤠᤱ ᤜᤡᤒᤪᤢ ᤔᤧᤴᤇᤢᤔᤠᤜᤠ᤹ᤀᤥ ᤀᤅᤧ᤺ᤰᤘᤠᤴ ᤏᤢᤎᤢᤰᤔᤠᤖᤧ ᤗᤠᤃᤡ ᤁᤢᤓᤠ ᤔᤧᤴᤇᤢᤔᤠᤎᤡᤰ ᤂᤧᤏᤧ᤹ ᤁᤧᤗᤠᤃᤡ ᤀᤢ᤺ᤳᤋᤢᤱ ᤐᤡᤏᤧᤒᤡ᥅”

⁸ ᤂᤧᤒᤩᤠᤱ ᤑᤠᤖᤥᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤺ᤸᤗᤧ ᤂᤧᤴ ᤔᤧᤳᤋᤢ. “ᤐᤥᤱ᤹. ᤐᤣᤃᤧ᤹॥” ᤜᤧᤰᤁᤩᤠᤱ ᤂᤧᤴ ᤆᤢᤰᤔᤧᤴ ᤐᤣᤀᤠᤱ ᤀᤅᤧ᤺ᤰᤘᤠ᤺ᤸᤗᤧ ᤁᤢᤶᤔᤠ᤺ᤴᤏᤣ ᤀᤢ᤺ᤳᤋᤢ ᤋᤠᤖᤢ॥

⁹ ᤜᤧᤰᤁᤩᤠᤱ ᤑᤠᤖᤥᤸᤗᤧ ᤁᤢᤛ᤻ᤛᤠ᤺ᤸᤗᤧ ᤂᤧᤴ ᤔᤧᤳᤋᤢ. “ᤁᤴ ᤀᤅᤧ᤺ᤰᤘᤠᤴ ᤋᤣᤖᤧ᤹ᤀᤠᤱ ᤀᤠᤱᤃᤠ᤹ ᤀᤠᤗᤠᤃᤡ ᤏᤢᤎᤢᤰᤋᤧ᤹ ᤜᤧᤰᤁᤩᤠᤱ ᤜᤡᤱᤛᤣ᤹ ᤁᤢᤶᤛᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤠᤶᤕᤠᤰ ᤐᤡᤏᤧ॥” ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤀᤅᤧ᤺ᤰᤘᤠᤴ ᤋᤣ᤹ᤖᤢ. ᤜᤧᤰᤁᤩᤠᤱ ᤂᤧᤴ ᤏᤢᤎᤢᤰᤋᤢ॥

¹⁰ ᤕᤠᤱᤛᤡ ᤀᤅᤧ᤺ᤰᤘᤠᤴ ᤕᤶᤒᤠ ᤐᤥ᤺ᤰᤂᤧᤀᤠᤱ ᤂᤧᤸᤗᤧ ᤑᤠᤖᤥᤸᤗᤧ ᤁᤢᤛ᤻ᤛᤠᤀᤥ ᤋᤠᤖᤢ. ᤜᤧᤰᤁᤩᤠᤱ ᤂᤧᤴ ᤂᤢᤏᤧ᤹ ᤁᤢᤛ᤻ᤛᤠ ᤆᤥᤃᤢ॥ ᤂᤧᤸᤗᤧ ᤂᤢᤏᤧ᤹ ᤔᤥᤛᤠ ᤔᤡᤱ ᤘᤠ᤺ᤳᤋᤢ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤐᤠ᤺ᤳᤋᤢ. “ᤀᤠᤱᤃᤠ᤹ ᤁᤴ ᤆᤫᤠ᤺ᤳᤋᤥᤗᤠᤶ ᤗ᤺ᤳᤋᤢᤱᤒᤠᤖᤥ॥”

ᤔᤥᤛᤠᤴ ᤔᤡᤍᤩᤠᤏ ᤗᤠᤈᤣ᤹ ᤂᤧᤳᤇᤡᤱᤅᤠᤱ ᤐᤣᤰ

¹¹ ᤀᤠᤸᤗ ᤔᤥᤛᤠᤴ ᤕᤶᤒᤠ ᤐᤥ᤺ᤰᤂᤧ ᤂᤧᤒᤩᤠᤱ ᤂᤧᤴ ᤂᤢᤏᤧ᤹ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ᤖᤥ ᤐᤣ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤛᤠᤰᤋᤧᤖ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤒᤠᤱᤄᤢᤛᤡᤒᤠ ᤏᤡᤛᤢ॥ ᤂᤢᤏᤧ᤹ ᤀᤠᤒᤠᤅᤣ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ᤀᤥ ᤗᤳᤇᤠ ᤜᤡᤒᤪᤢᤎᤡᤰ ᤔᤡᤛᤪᤡᤎᤡᤰᤗᤧ ᤜᤡᤵᤋᤢᤖ ᤕᤠᤃᤧᤒᤠ ᤏᤡᤛᤢ॥

¹² ᤔᤥᤛᤠᤴ ᤁᤧᤖᤧᤰ ᤐᤡᤛᤠᤱ ᤁᤒᤪᤡᤱ ᤀᤥᤔᤕᤧ. ᤂᤢᤏᤧ᤹ ᤜᤠ᤺ᤳᤗᤧᤀᤠᤱ ᤏᤡᤛᤢᤒᤠ ᤜᤥ᤺ᤵᤋᤧ॥ ᤂᤧᤴ ᤔᤡᤛᤪᤡ᤺ᤴ ᤛᤩᤧᤖᤢᤀᤠᤱ ᤂᤧᤸᤗᤧ ᤁᤢᤈᤣᤴ ᤕᤧ᤺ᤱᤄᤠᤀᤥ ᤗᤢᤵᤋᤢ॥

¹³ ᤁᤢᤍᤠ᤺ᤴᤍᤡᤰᤔᤠ ᤂᤢᤏᤧ᤹ ᤐᤣ᤺ᤸᤗᤧ ᤜᤡᤒᤪᤢ ᤏᤧᤳᤇᤡ ᤀᤠᤒᤠᤅᤣ ᤜᤡᤵᤏᤧᤳᤇᤡᤖ ᤕᤠᤃᤧᤛᤡᤒᤠ ᤂᤢᤏᤧ᤹ ᤏᤡᤛᤢᤛᤡ॥ ᤂᤧᤸᤗᤧ ᤁᤢ᤹ᤀᤡᤃᤧᤓᤧᤶᤒᤧᤴ ᤔᤧᤳᤋᤢ. “ᤂᤧᤏᤧ᤹ ᤀᤠᤵᤑᤣᤰ ᤁᤧᤔᤏᤠ ᤜᤡᤒᤪᤢᤴ ᤌᤣᤀᤠᤱ ᤁᤧᤜᤡᤵᤋᤢᤒᤠ᥅”

¹⁴ ᤂᤧᤴ ᤔᤧᤏᤠ᤺ᤸᤗᤧ ᤔᤧᤳᤋᤢ. “ᤜᤠ᤺ᤳᤗᤧ ᤂᤧᤏᤧ᤹ ᤀᤠᤏᤡᤃᤣ ᤜᤠᤱᤕᤢᤰᤐᤠ ᤏᤢ ᤂᤠᤛᤧᤴᤗᤥ᤺ᤶᤒᤠ ᤁᤧᤈᤥᤃᤧ᥅ ᤂᤧᤴ ᤔᤡᤛᤪᤡ᤺ᤴ ᤜᤧᤰᤁᤣ ᤀᤠᤱᤃᤠ᤹ᤀᤠᤱ ᤁᤧᤛᤧᤳᤋᤠᤒᤠᤒᤡ᥅” ᤔᤥᤛᤠᤴ ᤁᤡᤛᤧᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱ. “ᤀᤠᤱᤃᤠ᤹ ᤆᤥᤃᤢᤱᤒᤠᤴ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤧᤳᤇ॥”

¹⁵ ᤁᤴ ᤐᤠ᤺ᤴᤏᤡᤴ ᤑᤠᤖᤥᤸᤗᤧᤀᤠᤱ ᤏᤡᤱᤘᤠ᤹ ᤂᤥᤛᤢ ᤜᤧᤰᤁᤩᤠᤱ ᤂᤢᤏᤧ᤹ ᤔᤥᤛᤠᤴ ᤛᤧᤵᤔᤠ ᤏᤡᤱᤘᤠ᤹ ᤆᤥᤃᤢ॥ ᤂᤧᤒᤩᤠᤱ ᤔᤥᤛᤠᤴ ᤑᤠᤖᤥ᤺ᤴᤗᤠᤶ ᤂᤧᤳᤇᤡᤱ ᤐᤣᤀᤠᤱ ᤔᤡᤍᤩᤠᤏ ᤗᤠᤈᤣ᤹ᤀᤥ ᤕᤢᤱᤔᤠ ᤜᤣ᤺ᤰᤋᤧ॥ ᤌᤡᤰᤕᤠᤴ ᤔᤥᤛᤠᤴ ᤗᤳᤇᤠ ᤘᤃᤧᤱ ᤌᤡᤰᤗᤧ ᤁᤢᤕᤠᤀᤥ ᤕᤢᤱᤛᤡᤱᤅᤠᤱ ᤕᤢᤅᤧ॥

¹⁶ ᤔᤡᤍᤩᤠᤏᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤡᤋᤪᤥ᤺ᤸᤗᤧ ᤏᤢᤛᤡ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ ᤂᤧᤵᤔᤥ ᤆᤫᤠ᤺ᤳ ᤑᤠ᤺ᤳᤇᤧ ᤔᤧᤍᤩᤧ. ᤜᤧᤰᤁᤩᤠᤱ ᤂᤢᤴᤇᤡ᤹ ᤐᤠ᤺ᤸᤗᤧ ᤁᤢᤔᤧᤸᤗᤢᤰ ᤁᤢᤔᤧ᤺ᤴᤍᤠᤜᤠ᤹ ᤆᤫᤠ᤺ᤳ ᤌᤢᤱᤔᤠᤛᤡᤖᤧ ᤗᤠᤃᤡ ᤘᤠᤄᤥ᤺ᤱᤜᤠ᤹ ᤆᤫᤠ᤺ᤳᤋᤡᤸᤗᤧ ᤌᤡᤶᤔᤠ ᤔᤧᤜᤣ᤺ᤰᤋᤢ॥

¹⁷ ᤁᤖ ᤁᤢᤓᤠ ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤕᤡᤋᤪᤥ᤺ᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ ᤔᤧᤏᤠ᤺ᤳᤋᤢᤔᤧᤍᤣᤛᤢᤛᤡ॥ ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤂᤧᤴ ᤔᤧᤴᤇ᤻ᤕᤠ ᤆᤢᤰᤔᤠᤜᤠ᤹ ᤏᤠᤅᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ ᤆᤫᤠ᤺ᤳ ᤌᤢᤱᤄᤢᤛᤡ॥

¹⁸ ᤂᤧᤱᤜᤠ᤹ ᤜᤡᤶᤔᤥ ᤔᤧᤏᤢ᤺ᤰᤂᤧ ᤔᤧᤍᤩᤧ᤺ᤸᤗᤧ ᤂᤢᤏᤡ᤹ ᤐᤠ᤺ᤸᤗᤧ ᤛᤣ᤺ᤴᤍᤥᤛᤢᤛᤡ. “ᤀᤠᤀᤡᤴ ᤂᤡᤏᤡ᤹ ᤁᤶᤓᤩᤠᤖᤡᤰ ᤜᤠᤖᤠ ᤀᤠᤰᤂᤣᤀᤠᤱ ᤁᤧᤍᤩᤧ᤹ᤀᤡ᥅”

¹⁹ ᤂᤧᤴ ᤔᤧᤴᤇ᤻ᤕᤠ ᤆᤢᤰᤔᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤗᤳᤇᤠ ᤔᤡᤛᤪᤒᤠ ᤔᤏᤠᤎᤡᤰᤗᤧ ᤔᤧᤸᤗᤢᤰᤁᤶᤒᤠᤜᤠ᤹ᤗᤠᤶ ᤀᤠᤏᤡᤃᤣ ᤛᤧ᤺ᤵᤋᤡᤃᤧ॥ ᤂᤧᤴᤏᤢ᤺ᤸᤗᤧ ᤘᤣ᤹ ᤂᤧᤸᤗᤧ ᤀᤠᤏᤡᤃᤣ ᤗᤠᤃᤡ ᤆᤫᤠ᤺ᤳ ᤑᤠ᤺ᤳᤋᤢᤀᤠᤱ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ᤀᤠᤱ ᤆᤫᤠ᤺ᤳ ᤌᤢᤱᤄᤢᤛᤡ॥”

²⁰ ᤂᤢᤴᤇᤡ᤹ ᤐᤠ᤺ᤸᤗᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤢᤏᤧ᤹ ᤀᤠᤳᤋᤡ ᤘᤠ᤹᥅ ᤂᤡᤏᤡ᤹ ᤌᤣᤀᤠᤱ ᤂᤧᤴ ᤔᤏᤠᤴ ᤂᤧᤵᤔᤥᤀᤣ ᤁᤧᤗᤧᤖᤢᤶᤔᤠᤱ ᤂᤡᤏᤡ᤹ᤖᤰ ᤁᤧᤍᤩᤧ᤹ᤀᤡᤒᤠ᥅ ᤐᤣᤃᤧᤶᤔᤧ᤹. ᤂᤢᤏᤧ᤹ ᤀᤠᤏᤡ᤹ᤏᤢ ᤁᤢᤈᤠ ᤆᤠᤛᤧ ᤀᤢ᤺ᤳᤋᤠᤶ ᤋᤠᤖᤧᤶᤔᤧ᤹॥”

²¹ ᤂᤧᤒᤩᤠᤱ ᤔᤥᤛᤠᤴ ᤂᤧᤴ ᤔᤏᤠᤜᤠ᤹ᤏᤢ ᤕᤢᤱᤔᤠᤖᤧ ᤗᤠᤃᤡ ᤋᤧᤴᤍᤧ॥ ᤕᤡᤋᤪᤥ᤺ᤸᤗᤧ ᤂᤢᤏᤧ᤹ ᤁᤢᤛ᤻ᤛᤠ ᤛᤡᤐᤥᤖᤠ᤺ᤴ ᤔᤥᤛᤠ᤺ᤴᤏᤢ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤳᤋᤢ॥

²² ᤛᤡᤵᤐᤥᤖᤠ᤺ᤸᤗᤧ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ. ᤜᤧᤰᤁᤩᤠᤱ ᤔᤥᤛᤠ᤺ᤸᤗᤧ ᤂᤧᤴ ᤃᤣᤷᤛᤥᤔ ᤔᤡᤱ ᤘᤠ᤺ᤳᤋᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤐᤠ᤺ᤳᤋᤢ. “ᤀᤠᤱᤃᤠ᤹ ᤘᤣ᤹ ᤗᤠᤈᤣ᤹ᤀᤥ ᤘᤧᤵᤔᤡᤒᤠ ᤐᤥ᤺ᤰᤂᤠᤱᤅᤠᤱ ᤕᤢᤱᤅᤠ॥”

²³ ᤕᤖᤡᤰ ᤋᤱᤒᤣ ᤕᤠᤱᤛᤡ ᤔᤡᤛᤪᤒᤠ ᤜᤠᤱᤅᤡᤴ ᤛᤩᤧ ᤁᤖ ᤀᤡᤛᤪᤠᤀᤡᤗᤡᤜᤠ᤹ ᤕᤥᤰ ᤕᤠ᤺ᤶᤒᤰᤁᤥ ᤔᤧᤕᤢ᤺ᤳᤋᤢᤛᤡᤀᤠᤱ ᤀᤠᤸᤗᤛᤠᤱ ᤂᤢᤴᤇᤡ᤹ ᤛᤰᤔᤠ ᤐᤢ᤹ᤖᤧᤀᤠᤱ ᤔᤧᤕᤠᤃᤧ ᤜᤧᤰᤁᤩᤠᤱ ᤁᤢᤓᤠ᤹ᤖᤧ ᤗᤠᤃᤡ ᤐᤣᤗᤡ ᤑᤠᤰᤔᤠ ᤔᤧᤜᤣ᤺ᤰᤋᤧ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤗᤡᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤁᤧᤖᤧ॥

²⁴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤔᤧᤕᤠᤖᤧᤒᤠᤴ ᤂᤧᤵᤛᤢ ᤜᤧᤰᤁᤩᤠᤱ ᤂᤢᤏᤧ᤹ ᤀᤒᤪᤠᤜᤠᤔ. ᤀᤡᤛᤜᤠᤁ ᤜᤧᤰᤁᤩᤠᤱ ᤕᤠᤁᤢᤒᤧᤴᤏᤢ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤏᤡᤱᤘᤠ᤹ ᤀᤡ᤺ᤳᤋᤢ॥

²⁵ ᤁᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤀᤥᤔᤧᤳᤋᤢᤛᤡ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤏᤡᤱᤘᤠ᤹ ᤀᤡ᤺ᤳᤋᤢᤛᤡᤖᤥ॥