ᤗᤠᤶᤍᤡᤰ 19 - LIFOTNT

ᤀᤡᤛᤪᤠᤀᤡᤗᤡᤜᤠ᤹ ᤛᤡᤏᤤ ᤁᤥ᤺ᤰᤔᤠᤀᤥ ᤔᤧᤃᤧᤳ

¹ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪᤗᤠᤶ ᤔᤧᤗ᤺ᤴᤍᤧᤒᤠ ᤗᤠ ᤛᤢᤶᤛᤡᤀᤥᤒᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤂᤧᤱᤜᤠ᤹ ᤛᤡᤏᤤ ᤁᤥ᤺ᤰᤔᤠᤀᤥᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤧᤱᤜᤠ᤹ ᤔᤧᤃᤧᤖᤧ ᤔᤧᤓᤧᤖᤧ॥

² ᤀᤠᤸᤗ ᤂᤧᤱᤜᤠ᤹ ᤖᤐᤡᤍᤡᤔᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤛᤡᤏᤤᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤔᤧᤃᤧᤖᤧ. ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤁᤥ᤺ᤰᤔᤠᤸᤗᤧ ᤁᤢᤒᤣᤛᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢ॥

³ ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤋᤢᤶᤔᤠᤖᤧ ᤗᤠᤃᤡ ᤔᤥᤛᤠ᤺ᤸᤗᤧ ᤌᤧᤃᤢᤴ ᤌᤠ᤺ᤱ ᤗᤡᤅᤢᤍᤣ᤹ᤖᤢ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤌᤧᤃᤢᤀᤥ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤵᤔᤠᤛᤡ ᤐᤠᤱᤄᤢ—

⁴ ‘ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤔᤡᤛᤪᤡᤜᤠ᤹ ᤀᤠᤰᤂᤣ ᤔᤧᤳᤋᤢᤱᤛᤡᤱ. ᤀᤠᤰᤂᤣᤗ᤹ᤖᤡᤰ ᤀᤠᤱᤃᤠ᤹ ᤂᤡᤏᤡ᤹ ᤁᤰᤁᤑᤡ᤺ᤰᤔᤠᤸᤗᤧ ᤁᤢᤛ᤻ᤛᤠᤜᤠ᤹ ᤁᤢᤗᤠᤵᤐᤥ ᤐᤰᤂᤢᤛᤡᤒᤠ ᤜᤧᤰᤁᤣ ᤂᤡᤏᤡ᤹ ᤐᤱᤏᤡᤱ ᤜᤧᤰᤁᤩᤠᤱ ᤁᤵᤔᤥ ᤀᤠᤱᤃᤠ᤹ᤀᤥ ᤋᤠ᤺ᤳᤏᤡᤱ. ᤂᤧᤴ ᤂᤡᤏᤡ᤹ ᤁᤧᤏᤡᤛᤢᤶᤔᤠᤱ ᤁᤧᤘᤕᤡ᤹॥

⁵ ᤀᤠᤸᤗ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤡᤏᤡ᤹ ᤛᤧᤰᤂᤠᤀᤣ ᤁᤧᤄᤧᤵᤛᤢᤶ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧᤓᤃᤪ. ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤂᤡᤏᤡ᤹ᤃ ᤀᤠᤱᤃᤠ᤹ ᤀᤡᤔᤧᤸᤗᤢᤱᤒᤠ ᤀᤠᤕᤠᤱᤛᤠ ᤁᤢᤴᤎᤣ ᤁᤧᤒᤥ᤺ᤰᤂᤡ᤹॥ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤀᤠᤱᤃᤠ᤹ᤀᤡᤴᤇᤠᤱ

⁶ ᤂᤡᤏᤡ᤹ ᤀᤠᤱᤃᤠ᤹ ᤀᤠᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤠᤱᤈᤢᤶ ᤏᤢ ᤛᤣᤛᤣ ᤛᤢᤘᤠᤱ ᤁᤧᤒᤥ᤺ᤰᤂᤡ᤹॥’ ᤀᤡᤛᤪᤠᤀᤡᤗᤡᤜᤠ᤹ ᤂᤧᤏᤧ᤹ ᤔᤧᤵᤔᤠᤛᤡ ᤁᤧᤒᤥᤱᤒᤠ ᤐᤠ᤺ᤴᤏᤡᤴ ᤜᤠᤒᤠ ᤁᤴᤗᤥ॥”

⁷ ᤔᤥᤛᤠᤴ ᤁᤥ᤺ᤰᤔᤠᤀᤥᤏᤢ ᤕᤥ ᤌᤠᤛᤡᤱ ᤕᤧ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡ ᤗᤠᤶᤗᤥᤒᤠᤜᤠ᤹ ᤑᤢᤰᤂᤢᤛᤡᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤀᤡᤱᤈᤠᤱ ᤐᤡᤖᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤱᤜᤠ᤹ ᤆᤧᤰᤋᤢᤛᤡ॥

⁸ ᤁᤧᤖᤧᤰ ᤔᤏᤠᤜᤠ᤹ᤖᤧ ᤌᤡᤰᤗᤧᤱᤗᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤏᤡᤃᤣ ᤀᤡ᤺ᤳᤋᤢᤶ ᤏᤠ᤺ᤳᤋᤢᤶᤒᤧᤖᤥ॥” ᤂᤧᤒᤩᤠᤱ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤏᤥᤃᤵᤐᤡᤴ ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤴ ᤔᤧᤳᤋᤢ॥

⁹ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤠᤱᤃᤠ᤹ ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤂᤠ᤹ᤔᤡ᤺ᤳᤋᤥᤗᤠᤶ ᤂᤧᤏᤧ᤹ᤀᤥ ᤕᤢᤀᤠ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤐᤠ᤺ᤳᤋᤠᤒᤠᤴ ᤔᤧᤄᤧᤵᤛᤢ᤹ ᤂᤧᤒᤩᤠᤱ ᤀᤠᤸᤗᤀᤠᤱᤎᤥ ᤂᤧᤏᤧ᤹ ᤏᤛᤠᤴ ᤁᤧᤶᤈᤥᤰ॥” ᤔᤏᤠᤜᤠ᤹ᤖᤧ ᤀᤠᤰᤋᤱᤒᤠ ᤏᤥᤃᤵ ᤔᤧᤒᤠ᤺ᤳᤋᤢᤀᤠᤱ ᤔᤧᤘᤕᤧ. ᤂᤧᤴ ᤐᤠ᤺ᤴᤏᤡᤴ ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤴ ᤔᤧᤳᤋᤢ॥

¹⁰ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤠᤱᤃᤠ᤹ ᤔᤠᤱᤛᤧᤘᤠ ᤔᤧᤵᤔᤠᤖᤧ ᤗᤠᤃᤡ ᤀᤠᤀᤡᤴ ᤏᤢ ᤋᤠ᤺ᤴᤍᤡᤰ ᤔᤏᤠᤜᤠ᤹ ᤀᤠᤒᤠᤅᤣ ᤛᤢᤳᤌᤥ ᤔᤧᤈᤥᤰᤛᤡᤱᤗᤥ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤳᤋᤧᤛᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤣ᤺ᤵᤑᤢᤱᤜᤠ᤹ ᤀᤠᤒᤠᤅᤣ ᤔᤧᤜᤵᤋᤢᤖ.

¹¹ ᤜᤧᤰᤁᤩᤠᤱ ᤛᤢᤶᤛᤡᤃᤣᤰᤐᤠ ᤕᤧᤴᤏᤡᤸᤗᤧ ᤗᤠᤃᤡ ᤂᤧᤱᤜᤠ᤹ ᤕᤠᤖᤡᤵ ᤔᤧᤒᤥᤱᤗ. ᤌᤣᤀᤠᤱᤓᤧᤸᤗᤧ ᤛᤢᤶᤛᤡᤃᤣᤰᤐᤠ ᤕᤧᤴᤏᤥ ᤁᤥ᤺ᤰᤔᤠᤀᤥ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤡᤰᤁᤡᤸᤗᤧ ᤏᤡᤛᤢᤖᤀᤣ ᤕᤜᤘᤣ ᤍᤠᤱᤒᤠᤴ ᤕᤢᤖᤥ॥

¹² ᤁᤥ᤺ᤰᤔᤠᤀᤥ ᤁᤧᤖᤧᤰ ᤐᤡᤛᤠᤱ ᤔᤏᤠᤜᤠ᤹ ᤔᤧᤶᤒᤣ᤺ᤰᤏᤧᤴᤗ ᤑᤠ᤹ᤀᤠᤱ ᤗᤳᤇᤠ ᤀᤡ᤺ᤴᤍᤥᤎᤡᤰ ᤏᤧᤛ᤻ᤛᤧ ᤐᤡᤖᤧᤛᤧ᤹. ‘ᤔᤏᤠᤜᤠ᤹ ᤁᤥ᤺ᤰᤔᤠᤀᤥ ᤌᤠ᤺ᤱ ᤔᤧᤒᤣᤃᤧᤶᤔᤡᤴᤏᤧ᤹. ᤂᤧᤸᤗᤧ ᤁᤢᤕᤠᤀᤥᤀᤠᤱ ᤔᤧᤒᤣᤃᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤧᤛᤧ᤹॥ ᤀᤠᤳᤋᤡᤸᤗᤧ ᤁᤥ᤺ᤰᤔᤠᤴ ᤛᤢᤛᤢ ᤂᤧᤴ ᤛᤡᤖᤥ॥

¹³ ᤂᤧᤴ ᤜᤠ᤺ᤳᤗᤧᤀᤠᤱ ᤔᤧᤴᤇᤢᤀᤣ ᤗᤢᤱᤅᤡᤸᤗᤧ ᤗᤧᤵᤋᤧᤶᤔᤧ᤹ ᤀᤡᤃᤪ ᤋᤥ᤺ᤱᤅᤡᤸᤗᤧ ᤀᤠᤒᤠᤶᤔᤧ᤹॥ ᤌᤰᤛᤠ ᤀᤡᤃᤪ ᤔᤏᤠᤛᤠᤱ ᤂᤧᤴ ᤁᤢᤜᤡᤱᤘᤧᤳ ᤐᤥᤱᤔᤠ ᤔᤧᤛᤢᤰᤏᤧᤴ॥’ ᤛᤠᤍᤠᤱᤅᤡᤴ ᤁᤣ᤺ᤶᤒᤠ ᤗᤠᤀᤡ᤺ᤰᤁᤡᤸᤗᤧ ᤔᤏᤠᤜᤠ᤹ ᤁᤥ᤺ᤰᤔᤠᤀᤥ ᤌᤠ᤺ᤱ ᤔᤧᤎᤠᤱᤗ॥”

¹⁴ ᤂᤧᤒᤩᤠᤱ ᤔᤥᤛᤠᤴ ᤁᤥ᤺ᤰᤔᤠᤀᤥᤏᤢ ᤕᤥ ᤌᤠᤛᤡᤱ ᤕᤧ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤵᤔᤠᤖᤧ ᤗᤠᤃᤡ ᤔᤏᤠᤜᤠ᤹ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤠᤱᤜᤠ᤹ ᤘᤠᤔᤧᤜᤵᤋᤢ॥

¹⁵ ᤂᤧᤴ ᤀᤣᤃᤠᤱ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤳᤇᤡᤴᤍᤠ᤺ᤴ ᤌᤠᤖᤡᤰ ᤂᤧᤏᤡ᤹ ᤕᤠᤖᤡᤵ ᤕᤢᤅᤧᤶᤔᤧ᤹ ᤜᤧᤰᤁᤩᤠᤱ ᤂᤧᤴᤏᤢ᤺ᤸᤗᤧ ᤋᤃᤡ ᤔᤧᤴᤇᤢᤔᤠᤜᤠ᤹ᤏᤢ ᤔᤧᤀᤡᤵᤛᤧᤶᤔᤡᤴᤏᤧ᤹॥”

¹⁶ ᤛᤢᤶᤕᤠᤴ ᤁᤧᤖᤧᤸᤗᤧ ᤕᤠ᤺ᤴᤍᤡᤰ ᤋᤠᤏᤠᤶ ᤛᤠ᤺ᤶᤓᤣ ᤗᤧᤰᤋᤧ ᤜᤧᤰᤁᤩᤠᤱ ᤋᤠᤱᤛᤠᤱᤒᤧᤴ ᤂᤧᤖᤧᤱᤄᤢᤖᤢᤱ ᤗ᤹ᤖᤧ. ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤂᤠ᤹ᤔᤡ᤺ᤵᤐᤠᤴ ᤁᤥ᤺ᤰᤔᤠᤀᤥ ᤌᤠ᤺ᤱ ᤑᤴᤇᤡᤱ ᤂᤧᤒᤩᤠᤱ ᤌᤢᤳᤌᤢᤖᤡ᤺ᤵᤐᤠᤴ ᤕᤶᤒᤠ ᤗᤠᤀᤡᤰᤋᤧᤒᤠ ᤂᤧᤶᤍᤧᤳᤋᤧ॥ ᤛᤠ᤺ᤱᤃᤠᤜᤡᤶᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤁᤡᤔᤠᤸᤗᤧ ᤌᤧᤃᤰᤁᤰ ᤔᤧᤕᤰᤂᤧ॥

¹⁷ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤋᤢᤶᤛᤧ ᤗᤠ᤺ᤰᤁᤠᤳ ᤗ᤺ᤳᤋᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤥ᤺ᤰᤔᤠ ᤑᤠᤱᤈᤱᤅᤡᤸᤗᤧ ᤁᤢᤒᤢᤱᤅᤥ ᤔᤧᤕᤧᤶᤛᤡᤱ॥

¹⁸ ᤛᤡᤏᤤ ᤁᤥ᤺ᤰᤔᤠᤴ ᤁᤧᤖᤧᤰ ᤔᤡ᤺ᤰᤂᤥ᤹ᤀᤡᤸᤗᤧ ᤌᤡᤶᤛᤢᤀᤠᤱ ᤐᤳᤇᤧ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤔᤡ᤺ᤸᤗᤧ ᤁᤢᤛᤶᤎᤠᤱ ᤂᤧᤵᤔᤥ ᤌᤠᤛᤡᤱ ᤕᤧᤀᤠᤱ ᤘᤕᤧ॥ ᤔᤡ᤺ᤰᤂᤢᤴ ᤔᤡᤎᤢᤱ ᤔᤡᤖᤠ᤺ᤰᤁᤥᤒᤠ ᤔᤡ᤺ᤰᤂᤢ᤹ ᤁᤢᤀᤡᤛᤡᤰ ᤗ᤺ᤴᤍᤧᤀᤠᤱ ᤐᤳᤇᤧ॥ ᤜᤧᤰᤁᤩᤠᤱ ᤁᤧᤖᤧᤰ ᤁᤥ᤺ᤰᤔᤠ ᤑᤠᤱᤈᤱᤅᤡᤴ ᤌᤢᤖᤢᤵᤗᤢᤵᤏᤠ ᤕᤰᤂᤧ॥

¹⁹ ᤜᤧᤰᤁᤩᤠᤱ ᤌᤢᤳᤌᤢᤖᤡ᤺ᤵᤐᤠᤴ ᤀᤠᤸᤗᤛᤠᤱ ᤆᤠ᤹ᤖᤡᤰ ᤗᤠᤀᤡ᤺ᤰᤔᤠ ᤜᤣ᤺ᤰᤋᤧ॥ ᤔᤥᤛᤠᤴ ᤐᤠᤖᤧ ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤖᤧᤱᤄᤢᤖᤢᤱ ᤁᤧᤗᤧᤰᤐᤠ ᤀᤡᤰᤗᤠᤀᤥ ᤂᤢᤏᤧ᤹ ᤐᤠ᤺ᤴᤇᤠ᤺ᤳᤋᤢ॥

²⁰ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤴ ᤛᤡᤏᤤ ᤁᤥ᤺ᤰᤔᤠᤸᤗᤧ ᤁᤢᤛᤶᤎᤠᤱ ᤌᤠᤛᤡᤱ ᤕᤧ. ᤂᤧᤶᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤁᤥ᤺ᤰᤔᤠᤸᤗᤧ ᤁᤢᤛᤶᤎᤠᤱ ᤌᤥ ᤀᤢ᤺ᤳᤋᤢ. ᤜᤧᤰᤁᤩᤠᤱ ᤔᤥᤛᤠᤴ ᤌᤥ᤺ᤰᤛᤡᤱ ᤐᤣ॥

²¹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤂᤧᤱᤜᤠ᤹ᤖᤧ ᤀᤡ᤺ᤴᤍᤥᤴ ᤔᤧᤃᤠ᤺ᤰᤋᤢᤀᤠᤱ ᤔᤧᤶᤒᤣ᤺ᤰᤏᤧᤸᤗ ᤜᤧᤰᤁᤩᤠᤱ ᤀᤥᤔᤧᤶᤔᤧᤳᤋᤠᤴᤗ ᤑᤠ᤹ᤀᤠᤱ ᤂᤧᤏᤧ᤹ ᤕᤥ ᤌᤠᤛᤡᤱ ᤐᤣᤃᤧ᤹ᤀᤠᤱ ᤂᤧᤱᤜᤠ᤹ ᤔᤧᤳᤋᤧᤛᤧ᤹॥ ᤔᤣ᤺ᤴᤏᤧᤓᤃᤪ ᤂᤧᤱᤜᤠ᤹ ᤕᤖᤡᤰᤋᤱᤒᤠ ᤔᤧᤛᤡᤖᤥ॥

²² ᤀᤠᤱᤃᤠ᤹ ᤀᤠᤒᤣᤛᤠᤱ ᤁᤧᤍᤠᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤀᤠᤱ ᤀᤠᤒᤠᤅᤣ ᤛᤢᤳᤌᤥ ᤔᤧᤈᤥᤰᤛᤡᤱᤗ. ᤔᤣ᤺ᤴᤏᤧᤓᤃᤪ ᤀᤠᤱᤃᤠ᤹ ᤂᤧᤱᤜᤠ᤹ ᤂᤡᤔᤥ ᤔᤧᤰᤂᤢᤱᤛᤡᤱ᤹॥”

²³ ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤴ ᤔᤧᤳᤋᤢ. “ᤔᤏᤠᤜᤠ᤹ ᤛᤡᤏᤤ ᤁᤥ᤺ᤰᤔᤠᤀᤥ ᤌᤠ᤺ᤱ ᤌᤥ᤺ᤰᤛᤡᤱᤔᤠ ᤌᤠᤱᤔᤠ ᤔᤧᤴᤇᤢᤰᤏᤧᤴ. ᤌᤣᤀᤠᤱᤓᤧᤸᤗᤧ ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ‘ᤁᤥ᤺ᤰᤔᤠᤴ ᤁᤒᤪᤡᤱ ᤁᤢᤎᤣ᤺ᤰᤔᤠ ᤑᤳᤇᤧ᤹ᤀᤠᤱ ᤛᤣᤛᤣᤒᤠ ᤆᤥᤰ ᤗ᤹ᤖᤡᤰ ᤗᤠ᤺ᤳᤗᤠ᤺ᤳ ᤆᤥᤃᤧ᤹’ ᤑᤠ᤹ᤀᤠᤱ ᤀᤡᤱᤈᤠᤱ ᤁᤧᤒᤡᤖᤠᤱᤅᤠᤱ ᤘᤕᤧ॥”

²⁴ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤐᤣᤃᤧ᤹. ᤂᤧᤏᤧ᤹ ᤀᤠᤒᤠᤅᤣ ᤕᤥ ᤐᤣᤃᤧ᤹. ᤜᤧᤰᤁᤩᤠᤱ ᤜᤠᤖᤢᤏᤧᤴᤏᤢ ᤛᤥᤖᤡᤰ ᤌᤠ᤺ᤱ ᤌᤥ᤺ᤰᤛᤡᤱ ᤌᤠᤅᤧ᤹॥ ᤁᤖ ᤔᤏᤠᤜᤠ᤹ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤃ ᤀᤠᤱᤃᤠ᤹ᤀᤥ ᤀᤡ᤺ᤴᤍᤥᤴ ᤔᤧᤃᤠ᤺ᤰᤋᤢᤀᤠᤱ ᤔᤧᤴᤎᤠᤱᤏᤧᤴᤗ. ᤔᤣ᤺ᤴᤏᤧᤓᤃᤪ ᤀᤠᤱᤃᤠ᤹ ᤂᤧᤱᤜᤠ᤹ ᤂᤡᤔᤥ ᤔᤧᤰᤂᤢᤱᤛᤡᤱ᤹॥”

²⁵ ᤂᤧᤒᤩᤠᤱ ᤔᤥᤛᤠᤴ ᤕᤥ ᤔᤏᤠᤜᤠ᤹ᤖᤥ ᤌᤠᤛᤡᤱ ᤕᤧ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ ᤆᤧᤰᤋᤢᤛᤡᤖᤥ॥