ᤗᤠᤶᤍᤡᤰ 18 - LIFOTNTᤕᤡᤋᤪᤥ᤺ᤸᤗᤧ ᤔᤥᤛᤠᤴ ᤋᤢᤔᤢ᤹ 1 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤥᤛᤠᤴ ᤏᤢ ᤂᤢᤏᤧ᤹ ᤀᤠᤒᤠᤅᤣ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤗᤠᤃᤡ ᤆᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹. ᤜᤧᤰᤁᤩᤠᤱ ᤀᤠᤰᤂᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪᤗᤠᤶᤒᤠ ᤗ᤺ᤳᤋᤢ ᤑᤧᤳᤋᤢᤛᤡᤀᤠᤱ ᤘᤕᤧ. ᤂᤧᤴ ᤐᤠ᤺ᤴᤏᤡᤴ ᤔᤡᤍᤩᤠ᤺ᤴᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤔᤥᤛᤠ᤺ᤸᤗᤧ ᤁᤢᤴᤏᤢ᤺ᤵᤐᤠ ᤕᤡᤋᤪᤥ᤺ᤸᤗᤧ ᤂᤧᤵᤛᤢ॥ 2 ᤔᤥᤛᤠ᤺ᤸᤗᤧ ᤁᤢᤔᤣᤳ ᤛᤡᤵᤐᤥᤖᤠ᤺ᤴ ᤁᤢᤶᤒᤠᤖᤧ ᤁᤢᤜᤡᤶᤔᤥ ᤐᤠᤱᤄᤢᤍᤣᤛᤢ. ᤜᤧᤰᤁᤩᤠᤱ ᤁᤢᤓᤠ ᤕᤧᤶ ᤀᤣᤃᤠᤱ ᤁᤢᤴᤏᤢ᤺ᤵᤐᤠ ᤕᤡᤋᤪᤥ᤺ᤸᤗᤧ ᤛᤡᤵᤐᤥᤖᤠ᤺ᤴ 3 ᤜᤧᤰᤁᤩᤠᤱ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤧᤳᤇᤡ ᤃᤣᤷᤛᤥᤔ ᤏᤢ ᤀᤣᤗᤡᤀᤣᤈᤖᤧᤴ ᤋᤠᤖᤢᤛᤡᤀᤠᤱ ᤕᤡᤋᤪᤥ᤺ᤴ ᤔᤥᤛᤠᤀᤥ ᤋᤩᤧ॥ ᤔᤥᤛᤠ᤺ᤸᤗᤧ ᤁᤢᤛ᤻ᤛᤠᤎᤡᤰᤗᤧ ᤁᤢᤔᤡᤱ ᤃᤣᤷᤛᤥᤔ ᤔᤡᤱ ᤘᤠ᤺ᤳᤋᤢᤀᤠᤱ ᤘᤕᤧ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤐᤠ᤺ᤳᤋᤢ. “ᤀᤠᤱᤃᤠ᤹ ᤘᤣ᤹ ᤗᤠᤈᤣ᤹ᤀᤥ ᤘᤧᤵᤔᤡᤒᤠ ᤐᤥ᤺ᤰᤂᤠᤱᤅᤠᤱ ᤕᤢᤅᤠᤱ॥” 4 ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤹ ᤁᤢᤛ᤻ᤛᤠ᤺ᤸᤗᤧ ᤁᤢᤔᤡᤱ ᤀᤣᤗᤡᤀᤣᤈᤖ ᤔᤡᤱ ᤘᤠ᤺ᤳᤋᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤐᤠ᤺ᤳᤋᤢ. “ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤠ᤹ᤖᤠᤱ ᤜᤧᤰᤁᤩᤠᤱ ᤑᤠᤖᤥᤸᤗᤧ ᤁᤢᤍᤠᤓᤣᤀᤥ ᤌᤠᤔᤠᤗᤠᤶ ᤋᤠᤱᤛᤧ᤺ᤵᤋᤠᤱ॥” 5 ᤔᤥᤛᤠ᤺ᤸᤗᤧ ᤛᤠ᤺ᤱᤃᤠᤜᤡᤶ ᤆᤥᤃᤢᤀᤠᤱ ᤕᤢᤅᤧᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤛᤣᤛᤣ ᤁᤥ᤺ᤰᤔᤠᤸᤗᤧ ᤁᤢᤒᤣᤛᤠᤱ ᤕᤡᤋᤪᤥ᤺ᤸᤗᤧ ᤔᤥᤛᤠ᤺ᤸᤗᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤧᤵᤑᤢᤜᤠ᤹ ᤏᤢ ᤁᤢᤔᤣ᤺ᤳᤋᤧᤴ ᤑᤧᤳᤋᤢᤛᤡᤀᤠᤱ ᤑᤧᤖᤧ॥ 6 ᤕᤡᤋᤪᤥ᤺ᤸᤗᤧ ᤔᤥᤛᤠᤴ ᤀᤰᤋᤱᤒᤠ ᤀᤡᤱᤄᤱ ᤜᤠᤰᤋᤢᤀᤠᤱ ᤘᤕᤧ. “ᤀᤠᤱᤃᤠ᤹ ᤂᤧᤏᤧ᤹ ᤁᤧᤴᤏᤢ᤺ᤵᤐᤧᤴ ᤂᤧᤏᤧ᤹ ᤁᤧᤔᤣ᤺ᤳ ᤛᤡᤵᤐᤥᤖᤠ᤺ᤴ ᤏᤢ ᤏᤧᤵᤑᤢ ᤁᤧᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤑᤧᤳᤋᤢᤱᤛᤡᤱᤅᤠᤱ ᤂᤧᤏᤧ᤹ᤀᤥ ᤑᤧᤴᤏᤠᤖ ᤐᤳᤋᤠ॥” 7 ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤢᤍᤢᤶᤛᤧ ᤔᤥᤛᤠᤴ ᤗ᤺ᤴᤍᤧ. ᤜᤧᤰᤁᤩᤠᤱ ᤂᤢᤏᤧ᤹ ᤋᤢᤔᤢᤀᤠᤱ ᤛᤧᤘᤠ ᤔᤧᤳᤋᤢᤖ ᤆᤢᤵ ᤔᤧᤳᤋᤢ॥ ᤂᤧᤱᤜᤠ᤹ ᤂᤢᤴᤇᤡ᤹ ᤗᤢᤶᤔᤥ ᤀᤠᤰᤂᤣ ᤁᤧᤗ᤹ᤖᤡ ᤁᤧᤏᤢᤖᤡ ᤁᤧᤍᤠᤛᤡᤒᤡ ᤑᤠ᤹ᤀᤠᤱ ᤛᤣ᤺ᤴᤔᤧᤍᤥᤛᤡᤱ ᤜᤧᤰᤁᤩᤠᤱ ᤔᤥᤛᤠ᤺ᤸᤗᤧ ᤁᤢᤛᤠ᤺ᤱᤃᤠᤜᤡᤶᤔᤥ ᤔᤧᤗᤠᤛᤧ॥ 8 ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤑᤠᤖᤥᤴ ᤏᤢ ᤔᤡᤛᤪᤡᤜᤠ᤹ ᤀᤠᤰᤂᤣ ᤔᤧᤳᤋᤢᤛᤡ. ᤜᤧᤰᤁᤩᤠᤱ ᤗᤠᤶᤔᤥ ᤂᤧᤱᤜᤠ᤹ᤖᤧ ᤀᤠᤰᤋᤱᤒᤠ ᤋᤢᤰᤂᤣ ᤗᤠᤰᤂᤣ ᤔᤧᤍᤢᤔᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤀᤠᤰᤂᤣᤗ᤹ᤖᤡᤰ ᤛᤧ᤺ᤵᤋᤢᤛᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤔᤥᤛᤠ᤺ᤸᤗᤧ ᤁᤢᤴᤏᤢ᤺ᤵᤐᤠᤴ ᤆᤧᤰᤋᤢ॥ 9 ᤔᤡᤛᤪᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤀᤡᤛᤪᤠᤀᤡᤗᤡᤜᤠ᤹ ᤛᤧᤴᤍᤢᤛᤡᤀᤠᤱ ᤑᤧᤳᤋᤢᤛᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤆᤥᤃᤢᤒᤠ ᤁᤧᤖᤧᤰ ᤏᤢᤒᤠ ᤐᤠ᤺ᤴᤜᤠ᤹ᤖᤧ ᤆᤥᤃᤢᤸᤗᤧ ᤕᤡᤋᤪᤥ᤺ᤴ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤩᤧ॥ 10 ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢ. “ᤔᤡᤛᤪᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤏᤢ ᤑᤠᤖᤥᤸᤗᤧ ᤁᤢᤜᤢᤰᤁᤥᤗᤠᤶ ᤆᤥ᤺ᤰᤕᤢᤶᤓᤥ ᤀᤠᤒᤡᤒᤡᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤐᤥᤖᤖᤥ॥ 11 ᤀᤠᤸᤗ ᤕᤜᤘᤣ ᤍᤠᤱᤒᤧᤴ ᤘᤣ᤹ ᤁᤧᤖᤧᤰ ᤔᤠᤱ ᤛᤠᤶᤔᤠᤱᤜᤠ᤹ᤏᤢ᤺ᤸᤗᤧᤀᤠᤱ ᤐᤕᤶ ᤕᤶᤒᤠ ᤆᤥ᤺ᤰᤗᤧᤳᤇ ᤑᤠ᤹ᤀᤠᤱ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤗᤥ. ᤌᤣᤀᤠᤱᤓᤧᤸᤗᤧ ᤔᤡᤛᤪᤡᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤛᤡᤀᤠᤱ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤛᤡᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤋᤠᤱᤛᤧ᤺ᤵᤋᤢᤛᤡ॥” 12 ᤂᤧᤴ ᤀᤣᤃᤠᤱ ᤔᤥᤛᤠ᤺ᤸᤗᤧ ᤁᤢᤴᤏᤢ᤺ᤵᤐᤠ ᤕᤡᤋᤪᤥ᤺ᤸᤗᤧ ᤕᤜᤘᤣ ᤍᤠᤱᤒᤠᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤏᤢ ᤘᤣ᤹ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤍᤢ॥ ᤜᤧᤰᤁᤩᤠᤱ ᤜᤠᤖᤢᤏᤧᤴ ᤏᤢ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤔᤥᤛᤠ᤺ᤸᤗᤧ ᤁᤢᤴᤏᤢ᤺ᤵᤐᤠ ᤕᤡᤋᤪᤥ᤺ᤴᤏᤢ ᤛᤥᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤛᤣᤛᤣ ᤁᤢᤈᤠ ᤆᤠᤛᤧ ᤔᤧᤍᤩᤧᤖᤥ॥ ᤂᤠᤛᤧᤴᤗᤥ᤺ᤶᤒᤠᤜᤠ᤹ ᤛᤣ᤺ᤰᤕᤢᤰ ᤔᤧᤈᤥᤃᤢᤛᤡ ( ᤛᤠᤶᤕᤥ ᤀᤡᤱ ᥇:᥏-᥇᥎ ) 13 ᤁᤢᤍᤠ᤺ᤴᤍᤡᤰᤔᤠ ᤔᤥᤛᤠ᤺ᤸᤗᤧ ᤁᤧᤄᤣᤒᤠ ᤔᤏᤠᤜᤠ᤹ ᤋᤱᤔᤠᤛᤡᤖᤧ ᤂᤠᤛᤧᤴ ᤗᤥ᤺ᤶᤔᤠ ᤕᤠ᤺ᤶᤒᤰ ᤆᤥᤃᤢ ᤜᤧᤰᤁᤩᤠᤱ ᤋᤠᤏᤠᤶᤔᤠᤱᤎᤥ ᤕᤢ᤺ᤴᤇᤡᤰ ᤌᤠᤖᤡᤰᤁᤣ ᤂᤢᤏᤧ᤹ ᤂᤧᤴ ᤕᤠ᤺ᤶᤒᤰᤁᤥ ᤕᤠᤃᤧ॥ 14 ᤔᤏᤠᤜᤠ᤹ᤖᤧ ᤗᤠᤃᤡ ᤔᤥᤛᤠ᤺ᤸᤗᤧ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤔᤥᤛᤠ᤺ᤸᤗᤧ ᤁᤢᤴᤏᤢ᤺ᤵᤐᤧᤸᤗᤧ ᤏᤡᤛᤢᤀᤠᤱ ᤂᤧᤴ ᤛᤣ᤺ᤴᤍᤥᤛᤢ. “ᤔᤏᤠᤜᤠ᤹ᤖᤧ ᤗᤠᤃᤡ ᤂᤧᤏᤧ᤹ ᤁᤧᤈᤥᤃᤢᤒᤠ ᤁᤴ ᤕᤠ᤺ᤶᤒᤰᤁᤡᤴ ᤌᤧᤔᤠᤒᤣ᥅ ᤌᤣᤀᤠᤱ ᤂᤧᤏᤧ᤹ᤖᤰ ᤂᤠᤛᤧᤴ ᤗᤥ᤺ᤴᤇᤧ ᤀᤣ᤺ᤰ ᤁᤧᤕᤢᤱᤒᤠ. ᤜᤧᤰᤁᤩᤠᤱ ᤁᤴ ᤁᤧᤖᤧᤰ ᤔᤏᤠᤜᤠ᤹ ᤋᤠᤏᤠᤶᤔᤠᤱᤎᤥ ᤕᤢ᤺ᤴᤇᤡᤰ ᤌᤠᤖᤡᤰ ᤂᤧᤏᤧ᤹ ᤁᤧᤃᤒᤪᤡᤱ ᤜᤠᤒᤠ ᤔᤧᤕᤧᤵᤐᤡᤱᤃ᥅” 15 ᤔᤥᤛᤠ᤺ᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤀᤰᤂᤣᤀᤣ ᤆᤥ᤺ᤰᤔᤠ ᤐᤥᤱ᤹ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ ᤀᤠᤱᤃᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤛᤡᤱᤏᤡ᤺ᤳᤇᤧ ᤔᤧᤍᤠ᤹᤺॥ 16 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤔᤧᤴᤍᤱᤔᤠ ᤐᤠᤴ ᤘᤠ᤹ᤏᤧᤓᤃᤪ ᤂᤧᤱᤜᤠ᤹ ᤀᤠᤱᤃᤠ᤹ᤀᤥ ᤔᤧᤍᤠ᤹᤺. ᤜᤧᤰᤁᤩᤠᤱ ᤁᤢᤓᤠ ᤔᤏᤠ ᤏᤢ ᤂᤢᤏᤧ᤹ ᤁᤢᤶᤓᤢ᤹ ᤁᤢᤴᤛᤠ᤹ᤗᤢᤶᤔᤥ ᤀᤠᤱᤃᤠ᤹ ᤂᤠᤛᤧᤴ ᤗᤥ᤺ᤴᤍᤢᤱ ᤐᤡᤖᤢᤱᤛᤡᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤎᤡᤶᤜᤠ᤹ ᤆᤧᤰᤋᤢᤱᤛᤡᤱ᤹॥” 17 ᤂᤧᤒᤩᤠᤱ ᤕᤡᤋᤪᤥ᤺ᤸᤗᤧ ᤔᤧᤳᤋᤢ. “ᤁᤴ ᤕᤠ᤺ᤶᤒᤰᤁᤡᤴ ᤂᤧᤏᤧ᤹ ᤗᤠ᤹ᤖᤢ ᤂᤧᤶᤍᤢᤖ ᤔᤧᤴᤈᤥ᤺ᤰᤁᤣ ᤁᤧᤘᤠ᤹॥ 18 ᤂᤧᤏᤧ᤹ ᤏᤢ ᤂᤧᤏᤧ᤹ᤀᤥ ᤁᤧᤍᤠᤒᤠ ᤁᤧᤖᤧᤰ ᤔᤏᤠᤜᤠ᤹ ᤁᤧᤏᤠᤛᤡ॥ ᤌᤣᤀᤠᤱᤓᤧᤸᤗᤧ ᤁᤴ ᤕᤠ᤺ᤶᤒᤰᤁᤡᤴ ᤂᤧᤏᤧ᤹ ᤁᤧᤗᤠᤃᤡ ᤛᤠ᤹ᤖᤡᤰ ᤁᤧᤈᤠ᤹ᤒᤠ ᤆᤥᤰ॥ ᤁᤴ ᤕᤠ᤺ᤶᤒᤰᤁᤡᤴ ᤂᤧᤏᤧ᤹ᤖᤰ ᤀᤣ᤺ᤰ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤴ᤹॥ 19 ᤀᤠᤱᤃᤠ᤹ ᤂᤧᤏᤧ᤹ ᤁᤧᤗᤠᤃᤡ ᤏᤢᤒᤠ ᤛᤢᤈᤠ ᤐᤡᤏᤧᤖ ᤐᤳᤋᤠ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤧ᤹ ᤗᤧᤵᤔᤠᤱ ᤘᤠ᤹ᤖ॥ ᤂᤧᤏᤧ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤱᤄᤱᤛᤠᤒᤠ ᤁᤧᤒᤥᤱᤅᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤂᤣᤔᤠ ᤌᤰᤔᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤋᤠᤖᤧ᤹॥ 20 ᤂᤧᤏᤧ᤹ ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤎᤡᤶᤜᤠ᤹ ᤜᤢ᤹ᤔᤠᤛᤡ ᤐᤥᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤰᤂᤣᤗ᤹ᤖᤡᤰ ᤜᤡᤱᤔᤠ ᤐᤥᤱ᤹ ᤂᤧᤒᤩᤠᤱ ᤌᤣ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤥᤱ᤹. ᤂᤧᤴ ᤐᤠ᤺ᤴᤏᤡᤴ ᤂᤧᤱᤜᤠ᤹ ᤜᤢ᤹ᤖᤧᤛᤧ᤹॥ 21 ᤁᤖ ᤁᤧᤖᤧᤰ ᤔᤏᤠᤜᤠ᤹ᤀᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤧᤃᤡᤒᤠ. ᤛᤢᤶᤒᤥᤎᤠᤛᤠᤒᤠ ᤕᤧᤶᤒᤡᤳᤇᤠᤜᤠ᤹ ᤛᤣᤃᤧᤛᤧ᤹॥ ᤂᤧᤱᤜᤠ᤹ ᤔᤧᤴᤘᤠ᤹ᤔᤏᤠᤒᤠ ᤐᤠ᤺ᤴᤜᤠ᤹ᤗᤠᤶ ᤕᤠᤱᤌᤰᤔᤠ ᤁᤧᤈᤡ᤺ᤵᤐᤠ ᤁᤢᤍᤥ᤺ᤵᤔᤠ ᤔᤏᤠ ᤔᤧᤒᤥᤱᤗ॥ ᤂᤧᤱᤜᤠ᤹ ᤜᤧᤴᤇᤡᤱ ᤜᤧᤴᤇᤡᤱ. ᤁᤡᤵᤌᤡᤰ ᤁᤡᤵᤌᤡᤰ. ᤅᤠᤒᤥᤱ ᤅᤠᤒᤥᤱ ᤏᤢ ᤌᤡᤒᤥᤱ ᤌᤡᤒᤥᤱ ᤔᤏᤠᤜᤠ᤹ᤖᤧ ᤗᤠᤃᤡ ᤗᤠᤶᤗᤥᤒᤠ ᤆᤥᤃᤧᤛᤧ᤹॥ 22 ᤂᤧᤱᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤠᤛᤧᤴᤗᤥ᤺ᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤖ॥ ᤂᤧᤱᤜᤠ᤹ᤖᤧ ᤁᤧᤖᤧᤰ ᤁᤧᤛᤠᤰᤐᤠ ᤋᤢ᤺ᤴᤍᤣ᤹ ᤐᤠ᤺ᤴᤜᤠ᤹ ᤂᤧᤏᤧ᤹ᤀᤥ ᤋᤠ᤺ᤵᤔᤠ ᤔᤧᤛᤢᤰᤋᤢ᤹. ᤁᤖ ᤆᤢᤰᤐᤠ ᤋᤠᤱᤒᤠ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤋᤱᤔᤠ ᤔᤧᤛᤢᤰᤋᤢ᤹॥ ᤜᤧᤰᤁᤣ ᤁᤧᤈᤥᤃᤢᤸᤗᤧ ᤂᤧᤏᤧ᤹ ᤁᤧᤗᤠᤃᤡ ᤕᤠ᤺ᤶᤒᤰ ᤆᤥ᤺ᤰᤔᤠ ᤀᤢᤛᤢᤖᤢ ᤐᤥᤱ᤹ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤀᤠᤱ ᤂᤧᤏᤧ᤹ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤶᤓᤠ᤹॥ 23 ᤂᤧᤏᤧ᤹ ᤁᤴ ᤕᤠ᤺ᤶᤒᤰᤁᤡᤴ ᤁᤧᤈᤥᤃᤢ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤀᤠᤶᤓᤠ ᤁᤴ ᤀᤡᤱᤈᤠᤱᤅᤡᤴ ᤁᤧᤒᤡᤏᤧᤓᤃᤪ. ᤂᤧᤏᤧ᤹ ᤁᤧᤴᤏᤠᤏᤧᤴ. ᤜᤧᤰᤁᤩᤠᤱ ᤁᤴ ᤔᤏᤠᤜᤠ᤹ᤀᤠᤱ ᤂᤢᤴᤇᤡ᤹ ᤏᤡᤱᤘᤠ᤹ ᤋᤠᤀᤠᤱ ᤀᤠᤒᤠᤅᤣ ᤜᤡᤶᤜᤡᤶ ᤔᤧᤒᤣ᤺ᤰ॥” 24 ᤔᤥᤛᤠ᤺ᤸᤗᤧ ᤂᤢᤏᤧ᤹ ᤁᤢᤴᤏᤢ᤺ᤵᤐᤧᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤢ. ᤜᤧᤰᤁᤩᤠᤱ ᤂᤧᤸᤗᤧ ᤐᤠ᤺ᤳᤋᤢᤒᤠ ᤜᤧᤰᤁᤣ ᤁᤧᤖᤧᤰ ᤆᤥᤃᤢ॥ 25 ᤔᤥᤛᤠ᤺ᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤗᤠᤶ ᤛᤢᤶᤒᤥᤎᤠᤛᤠᤒᤠ ᤔᤏᤠᤜᤠ᤹ ᤛᤣᤃᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤧᤴᤇᤡᤱ ᤜᤧᤴᤇᤡᤱᤗᤧ ᤗᤠᤃᤡ ᤗᤠᤶᤗᤥᤒᤠ. ᤁᤡᤵᤌᤡᤰ ᤁᤡᤵᤌᤡᤰᤗᤧ ᤗᤠᤃᤡ ᤗᤠᤶᤗᤥᤒᤠ. ᤅᤠᤒᤥᤱ ᤅᤠᤒᤥᤱᤗᤧ ᤗᤠᤃᤡ ᤗᤠᤶᤗᤥᤒᤠ ᤏᤢ ᤌᤡᤒᤥᤱ ᤌᤡᤒᤥᤱᤗᤧ ᤗᤠᤃᤡ ᤗᤠᤶᤗᤥᤒᤠ ᤆᤥᤃᤢᤛᤡ॥ 26 ᤂᤧᤱᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤔᤏᤠᤜᤠ᤹ ᤂᤠᤛᤧᤴᤗᤥ᤺ᤶᤒᤠ ᤜᤧᤰᤁᤣ ᤔᤧᤓᤠ᤹ᤖᤢᤛᤡ॥ ᤁᤧᤛᤠᤰᤐᤠ ᤔᤧᤴᤍᤱᤔᤏᤠᤒᤠ ᤐᤠ᤺ᤴᤜᤠ᤹ ᤆᤠᤜᤡ ᤂᤧᤱᤜᤠ᤹ᤖᤧ ᤔᤥᤛᤠᤀᤥ ᤔᤧᤍᤠᤖᤢ. ᤁᤖ ᤁᤧᤖᤧᤰ ᤆᤢᤰᤐᤠ ᤋᤠᤱᤒᤠ ᤂᤣᤔᤠ ᤌᤰᤔᤠ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤔᤧᤍᤱᤄᤢ ᤔᤧᤒᤡᤖᤢᤛᤡ॥ 27 ᤂᤧᤴ ᤀᤣᤃᤠᤱ ᤔᤥᤛᤠ᤺ᤸᤗᤧ ᤕᤡᤋᤪᤥ᤺ᤴ ᤗᤠᤶᤔᤧᤳᤋᤢᤍᤣᤛᤢ ᤜᤧᤰᤁᤩᤠᤱ ᤕᤡᤋᤪᤥ᤺ᤴ ᤁᤢᤗᤠᤈᤣ᤹ᤀᤥ ᤏᤢ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.