ᤗᤠᤶᤍᤡᤰ 17 - LIFOTNT

ᤕᤠᤰᤐᤣ᤹ᤀᤥᤒᤠ ᤆᤫᤠ᤺ᤳ

¹ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤛᤱᤈᤢᤶᤓᤥᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤁᤢᤀᤡᤛᤡᤰ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤛᤡᤏᤗᤠᤶᤒᤠ ᤘᤣ᤹ ᤘᤣ᤹ ᤋᤧᤴᤜᤠ᤹ᤀᤥ ᤔᤧᤈᤳᤇᤡᤱᤗ ᤔᤧᤈᤳᤇᤡᤱᤗ ᤗᤠᤱᤔᤧᤄᤣᤃᤧᤀᤠᤱ ᤖᤐᤡᤍᤡᤔ ᤔᤧᤃᤧᤖᤧ ᤔᤧᤓᤧᤖᤧ॥ ᤂᤧᤵᤔᤥ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶ ᤔᤧᤄᤡᤱᤄᤢ. ᤁᤖ ᤂᤧᤵᤔᤥ ᤔᤏᤠᤜᤠ᤹ᤖᤧ ᤗᤠᤃᤡ ᤌᤢᤱᤔᤠ ᤆᤫᤠ᤺ᤳ ᤜᤥ᤺ᤵᤋᤧ॥

² ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤂᤧᤔᤠ᤹ ᤔᤧᤈᤥᤃᤧᤀᤠᤱ ᤔᤥᤛᤠᤴ ᤐᤠᤴ ᤔᤧᤔᤧᤳᤋᤢ. “ᤀᤠᤏᤡᤃᤣ ᤌᤢᤱᤔᤠ ᤆᤫᤠ᤺ᤳ ᤀᤠᤒᤡᤖᤧ᤹॥” ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤌᤣᤀᤠᤱ ᤔᤏᤧᤃᤧᤎᤡᤰᤋᤡᤒᤠᤒᤣ᥅ ᤂᤡᤏᤡ᤹ ᤌᤣᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤘᤠ᤹ ᤁᤧᤛᤠ᤹ᤖᤢᤶᤒᤠᤒᤣ᥅”

³ ᤁᤖ ᤔᤏᤠᤜᤠ᤹ ᤛᤠ᤹ᤖᤡᤰᤁᤣ ᤂᤢᤴᤇᤡ᤹ ᤘᤠᤔᤡᤛᤧ ᤜᤧᤰᤁᤩᤠᤱ ᤀᤰᤂᤣ ᤔᤧᤗ᤹ᤖᤧᤀᤠᤱ ᤔᤥᤛᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤏᤧᤔᤧᤎᤡᤰᤋᤧ. “ᤂᤧᤏᤧ᤹ ᤀᤠᤏᤡᤃᤣ. ᤀᤠᤏᤡᤃᤣ ᤛᤠᤜᤠ᤹ ᤏᤢ ᤀᤠᤏᤡᤃᤣ ᤌᤰᤛᤠᤜᤠ᤹ ᤘᤠᤔᤡ᤺ᤰᤔᤠᤸᤗᤧ ᤛᤧᤵᤔᤠᤖᤧ ᤗᤠᤃᤡ ᤌᤣᤀᤠᤱ ᤔᤡᤛᤪ ᤗᤠᤈᤣ᤹ᤗᤠᤶ ᤕᤠᤵᤔᤡ ᤁᤧᤓᤧᤳᤋᤧᤒᤠᤒᤣ᥅”

⁴ ᤔᤥᤛᤠ᤺ᤸᤗᤧ ᤁᤢᤛᤡᤰᤗᤢᤱᤔᤥᤗᤠᤶ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢᤀᤠᤱ ᤔᤧᤳᤋᤢ. “ᤀᤠᤱᤃᤠ᤹ ᤁᤴ ᤔᤏᤠᤜᤠ᤹ ᤌᤣ ᤔᤧᤳᤋᤢᤱᤛᤡᤱᤒᤠᤒᤣ᥅ ᤁᤴᤜᤠ᤹ᤖᤧ ᤀᤠᤱᤃᤠ᤹ ᤗᤢᤱᤅᤡᤸᤗᤧ ᤂᤠ ᤗᤧᤵᤔᤠ ᤔᤧᤀᤡ᤺ᤳᤋᤠᤖᤥ॥”

⁵ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹ᤀᤥ ᤁᤢᤓᤠ ᤂᤧᤏᤧ᤹ᤏᤢ ᤛᤥᤖᤡᤰ ᤋᤣ᤹ᤖᤧᤛᤧ᤹ᤀᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤐᤣᤃᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤏᤡᤗ ᤘᤜ᤺ᤱᤅᤡᤴ ᤁᤧᤜᤡᤵᤋᤢᤒᤠ ᤋᤰᤁᤠ᤺ᤳᤋᤡᤴᤏᤠᤱ ᤁᤧᤜᤢᤰᤁᤥ ᤋᤣ᤹ᤖᤧᤀᤠᤱ ᤐᤣᤃᤧ᤹॥

⁶ ᤀᤠᤱᤃᤠ᤹ ᤜᤥᤖᤣᤒ ᤁᤥ᤺ᤰᤔᤠᤀᤥ ᤗᤳᤇᤠ ᤕᤠᤰᤐᤣ᤹ ᤌᤡᤰᤗᤧ ᤁᤢᤍᤃᤡ ᤁᤧᤒᤣᤛᤠᤱ ᤕᤧᤵᤐᤠ॥ ᤂᤧᤴ ᤕᤠᤰᤐᤣ᤺ᤴ ᤂᤧᤏᤧ᤹ ᤜᤡᤵᤋᤧ᤹ ᤜᤧᤰᤁᤩᤠᤱ ᤂᤧᤵᤔᤥᤏᤢ ᤔᤏᤠᤜᤠ᤹ᤖᤧ ᤗᤠᤃᤡ ᤌᤢᤱᤔᤠ ᤆᤫᤠ᤺ᤳ ᤗ᤺ᤴ॥” ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤜᤧᤰᤁᤣᤀᤣ ᤆᤥᤃᤢ॥

⁷ “ᤕᤜᤘᤣ ᤍᤠᤱᤒᤠᤴ ᤀᤠᤏᤡ᤹ ᤗᤢᤶᤔᤥ ᤘᤠ᤹ᤒᤡ ᤔᤣ᤺ᤶᤒᤡ” ᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ ᤂᤧᤈᤧᤰ ᤔᤧᤈᤥᤃᤧ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴ ᤁᤢᤏᤡᤱᤘᤠ᤹ ᤔᤧᤛᤠ᤹ᤖᤢᤒᤠᤸᤗᤧ ᤆᤥᤃᤢᤸᤗᤧ ᤔᤥᤛᤠ᤺ᤸᤗᤧ ᤂᤧᤴ ᤋᤧᤴᤏᤡᤴ ᤔᤛ᤻ᤛᤠ ᤏᤢ ᤔᤣᤖᤡᤒᤠ ᤔᤡᤱ ᤘᤠ᤺ᤳᤋᤢᤖᤥ॥

ᤀᤔᤠᤗᤧᤁᤡᤜᤠ᤹ᤏᤢ ᤌᤱ ᤐᤥ᤺ᤰᤂᤧ

⁸ ᤀᤔᤠᤗᤧᤁᤡᤜᤠ᤹ ᤔᤧᤍᤩᤧᤀᤠᤱ ᤖᤐᤡᤍᤡᤶᤔᤥ ᤀᤡᤛᤪᤠᤀᤡᤗᤡᤜᤠ᤹ ᤔᤧᤓᤳᤋᤢᤛᤡ॥

⁹ ᤔᤥᤛᤠ᤺ᤸᤗᤧ ᤕᤜᤥᤛᤢᤴ ᤔᤧᤳᤋᤢ. “ᤀᤠᤏᤡ᤹ ᤗᤠᤃᤡ ᤔᤏᤠᤜᤠ᤹ ᤛᤣᤃᤧᤛᤧ᤹ᤀᤠᤱ ᤀᤔᤠᤗᤧᤁᤡᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤐᤣᤃᤧ᤹॥ ᤋᤠ᤺ᤴᤍᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤁᤠ᤺ᤳᤋᤡᤴ ᤀᤠᤜᤢᤰᤁᤥ ᤕᤠᤱᤛᤡᤱᤅᤠᤀᤠᤱ ᤁᤥ᤺ᤰᤔᤠᤸᤗᤧ ᤁᤢᤛᤶᤎᤠᤱ ᤀᤠᤱᤃᤠ᤹ ᤕᤧᤵᤐᤠ॥”

¹⁰ ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤔᤧᤳᤋᤢᤒᤠ ᤁᤢᤀᤡᤛᤡᤰ ᤕᤜᤥᤛᤢ᤺ᤸᤗᤧ ᤆᤥᤃᤢ. ᤜᤧᤰᤁᤩᤠᤱ ᤀᤔᤠᤗᤧᤁᤡᤜᤠ᤹ᤏᤢ ᤌᤱ ᤆᤥ᤺ᤰᤔᤠ ᤜᤣ᤺ᤰᤋᤧ॥ ᤔᤥᤛᤠ. ᤜᤠᤖᤢᤏ ᤏᤢ ᤜᤢᤖᤧᤴ ᤁᤥ᤺ᤰᤔᤠᤀᤥ ᤌᤥ ᤔᤧᤒᤣ॥

¹¹ ᤔᤥᤛᤥ᤺ᤸᤗᤧ ᤁᤢᤜᤢᤰᤁᤡᤴ ᤌᤥ ᤑᤥ᤺ᤰᤂᤢ ᤑᤳᤇᤢᤖ ᤌᤠᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤏᤠ᤺ᤴᤍᤢᤛᤡ॥ ᤁᤖ ᤂᤢᤏᤧ᤹ ᤁᤢᤜᤢᤰᤁᤡᤴ ᤕᤥ ᤌᤠᤛᤢᤸᤗᤧ ᤀᤔᤠᤗᤧᤁᤡᤜᤠ᤹ᤖᤧ ᤔᤧᤏᤠ᤺ᤴᤍᤢᤛᤡ॥

¹² ᤀᤠᤸᤗ ᤔᤥᤛᤠ᤺ᤸᤗᤧ ᤁᤢᤜᤢᤰᤁᤡᤴ ᤏᤠᤛᤧᤸᤗᤧ ᤂᤧᤱᤜᤠ᤹ᤖᤧ ᤗᤢᤱᤎᤡᤰ ᤔᤧᤍᤠᤖᤢᤀᤠᤱ ᤂᤢᤏᤧ᤹ ᤁᤢᤛᤡᤃᤠᤱ ᤔᤧᤏᤧᤛ᤻ᤛᤢ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤸᤗᤧ ᤁᤢᤛᤶᤎᤠᤱ ᤕᤢᤱᤛᤡᤱ॥ ᤜᤠᤖᤢᤏᤧᤴ ᤏᤢ ᤜᤢᤖᤧᤸᤗᤧ ᤏᤠᤜᤠᤱ ᤏᤢ ᤁᤳᤏᤠᤜᤠᤱ ᤂᤢᤏᤧ᤹ ᤁᤢᤜᤢᤰᤁᤡᤴ ᤋᤰᤋᤧ ᤑᤳᤇᤧᤛᤢ॥ ᤁᤶᤓᤗ᤹ᤖᤡᤰ ᤏᤠᤶ ᤔᤧᤴᤎᤠᤀᤣ ᤌᤠᤖᤡᤰ ᤂᤢᤏᤧ᤹ ᤁᤢᤜᤢᤰᤁᤡᤴ ᤌᤎᤵ ᤔᤧᤸᤗ᤹ᤀᤣ ᤐᤳᤇᤧ॥

¹³ ᤀᤰᤂᤣᤗ᤹ᤖᤡᤰ ᤕᤜᤥᤛᤢ᤺ᤸᤗᤧ ᤀᤔᤠᤗᤧᤁᤡ ᤌᤰᤛᤢᤒᤠᤜᤠ᤹ ᤋᤠᤓᤣ᤺ᤸᤗᤧ ᤗᤧ᤺ᤰᤂᤢᤛᤡ॥

¹⁴ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ᤛᤥᤰᤗᤧ ᤗᤠᤃᤡ ᤛᤠᤵᤗᤠᤌ᤺ᤱᤔᤥ ᤛᤠᤵᤋᤧ᤹. ᤜᤧᤰᤁᤩᤠᤱ ᤕᤜᤥᤛᤢᤴ ᤔᤧᤳᤋᤧ᤹. ᤌᤣᤀᤠᤱᤓᤧᤸᤗᤧ ᤋᤠᤱᤛᤠᤱᤒᤠᤸᤗᤧ ᤁᤢᤛᤡᤃᤠᤱ ᤀᤠᤱᤃᤠ᤹ ᤀᤔᤠᤗᤧᤁᤡᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤘᤖᤧᤱᤗᤧᤱ ᤔᤠᤛᤢᤱ ᤐᤡᤖᤢᤱᤛᤡᤱ᤹॥”

¹⁵ ᤔᤥᤛᤠ᤺ᤸᤗᤧ ᤂᤧᤵᤔᤥ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤆᤥᤃᤢ ᤜᤧᤰᤁᤩᤠᤱ “ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ ᤀᤠᤏᤡᤛᤠ” ᤑᤠ᤹ᤀᤠᤱ ᤔᤡᤱ ᤘᤠ᤺ᤳᤋᤢ॥

¹⁶ ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤛᤠᤴ ᤌᤠ᤺ᤱ ᤑᤥ᤺ᤰᤂᤧᤶᤔᤧ᤹॥ ᤕᤜᤘᤣ ᤍᤠᤱᤒᤠᤴ ᤛᤍᤠᤍᤡᤱ ᤀᤠᤵᤑᤠᤸᤗᤧᤛᤠᤱ ᤀᤔᤠᤗᤧᤁᤡᤜᤠ᤹ᤏᤢ ᤋᤧᤴᤎᤱ ᤆᤥᤰᤗᤥ᥄”