ᤗᤠᤶᤍᤡᤰ 16 - LIFOTNTᤔᤴᤏ ᤏᤢ ᤔᤢ᤺ᤳᤗᤢᤱᤃᤣ᤹ 1 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤛᤢᤘᤠᤱᤜᤠ᤹ ᤀᤣᤗᤡᤔᤗᤠᤶ ᤗᤠᤱᤔᤧᤄᤣᤃᤧ॥ ᤂᤧᤱᤜᤠ᤹ᤖᤧ ᤔᤡᤛᤪ ᤗᤠᤈᤣᤴ ᤔᤧᤗᤧᤖᤢᤀᤠᤱ ᤀᤣᤃᤠᤱ ᤏᤡᤛᤡᤃᤣᤰᤐᤠ ᤗᤠ ᤌᤡᤒᤥᤱᤅᤠᤱ ᤅᤠᤛᤡᤃᤣᤰᤐᤠ ᤕᤧᤴ ᤁᤧᤖᤧᤸᤗᤧ ᤕᤠ᤺ᤴᤍᤡᤰ ᤂᤧᤱᤜᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤛᤡᤏ ᤔᤧᤃᤧᤖᤧ ᤔᤧᤓᤧᤖᤧ॥ ᤛᤡᤏ ᤔᤧᤵᤔᤏᤠᤒᤠ ᤋᤧᤴᤏᤡᤴ ᤀᤣᤗᤡᤔ ᤏᤢ ᤛᤡᤏᤤ᤺ᤸᤗᤧ ᤁᤢᤗᤢᤶᤔᤥ ᤏᤧ᤹᤺॥ 2 ᤂᤧᤒᤩᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ ᤔᤏᤧᤔᤧᤎᤡᤰᤋᤧᤀᤠᤱ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤐᤠᤴ ᤔᤧᤔᤧᤳᤋᤢᤛᤡ॥ 3 ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤔᤧᤳᤋᤢᤛᤡ. “ᤔᤡᤛᤪᤒᤠ ᤛᤠ ᤌᤥ᤺ᤰᤔᤠ ᤂᤵᤐᤩᤠᤜᤠ᤹ ᤁᤒᤪᤡᤱ ᤕᤢᤅᤡᤃᤧᤀᤠᤱ ᤀᤠᤏᤡᤃᤣ ᤁᤢᤈᤠ ᤏᤢ ᤛᤠ ᤆᤠᤶᤒᤧᤒᤠ ᤘᤕᤧᤔᤧᤴ॥ ᤜᤠᤒᤠ ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤥᤗᤠᤶ ᤛᤩᤧ᤹ᤀᤡᤃᤧᤸᤗᤧ ᤏᤢᤒᤠ ᤐᤥ᤺ᤰᤂᤧᤔᤧᤴ॥ ᤁᤖ ᤀᤠᤏᤡᤃᤣ ᤁᤴ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ ᤛᤠᤰᤁᤧᤸᤗᤧ ᤛᤡᤔᤠᤖᤧ ᤗᤠᤃᤡ ᤁᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤕᤠᤵᤔᤡ ᤁᤧᤓᤧᤳᤋᤡᤀᤠᤱ ᤁᤧᤘᤕᤡ॥” 4 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤠᤸᤗ ᤀᤠᤱᤃᤠ᤹ ᤂᤡᤏᤡ᤹ ᤁᤧᤖᤧᤰᤗᤧ ᤗᤠᤃᤡ ᤋᤠᤱᤛᤠᤱᤒᤥᤗᤠᤶ ᤆᤠᤔᤠ ᤁᤢᤈᤠ ᤌᤠᤛᤢᤱ ᤐᤡᤏᤡᤱ᤹॥ ᤔᤏᤠᤜᤠ᤹ ᤌᤡᤰᤕᤠ᤺ᤴᤎᤰ ᤔᤧᤒᤣ᤺ᤰᤁᤠᤱ ᤂᤧᤴ ᤕᤧᤴᤏᤡᤸᤗᤧ ᤂᤢᤴᤇᤡ᤹ ᤗᤠᤃᤡ ᤁᤧᤕᤥᤒᤠ ᤁᤢᤈᤠ ᤔᤧᤓᤢᤰᤂᤢᤖ ᤐᤥᤱ᤹॥ ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤒᤡ ᤔᤣ᤺ᤶᤒᤡ ᤂᤧᤴ ᤀᤥᤔᤧᤳᤋᤢᤱ ᤛᤠ᤹ᤖᤢᤱ᤹॥ 5 ᤋᤢᤰᤛᤡᤃᤣᤰᤐᤠ ᤕᤧᤴᤏᤥ ᤂᤧᤱᤜᤠ᤹ᤖᤧ ᤀᤠᤰᤂᤩᤠᤖᤡᤰ ᤔᤧᤓᤢᤰᤂᤢ ᤂᤧᤴ ᤂᤧᤱᤜᤠ᤹ᤖᤧ ᤕᤠᤖᤡᤵ ᤔᤧᤈᤥᤃᤢ ᤔᤧᤕᤢᤰᤂᤢᤖ. ᤜᤧᤰᤁᤩᤠᤱ ᤂᤧᤴ ᤘᤣ᤹ ᤕᤧᤴᤏᤢ᤺ᤸᤗᤧ ᤏᤡᤗᤧᤱ ᤕᤠᤖᤡᤰ ᤕᤖᤡᤰ ᤐᤥᤱᤅᤠᤱ ᤕᤢᤱᤗ॥” 6 ᤁᤸᤗᤧᤆᤥᤃᤢᤸᤗᤧ ᤔᤥᤛᤠ ᤏᤢ ᤜᤠᤖᤢᤏᤧᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧᤀᤣ ᤔᤡᤛᤪᤗᤠᤶᤒᤠ ᤂᤡᤏᤡ᤹ ᤁᤧᤗ᤺ᤳᤋᤡ ᤁᤧᤓᤧᤳᤋᤡᤒᤠ ᤑᤠ᤹ᤀᤠᤱ ᤀᤠᤰᤂᤥ ᤕᤢ᤺ᤴᤇᤡᤰ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥ 7 ᤕᤜᤘᤣ ᤍᤠᤱᤒᤧᤴ ᤀᤠᤏᤡ᤹ ᤗᤢᤶᤔᤥ ᤕᤧᤒᤠ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤵᤔᤠᤖᤧ ᤗᤠᤃᤡ ᤋᤠ᤺ᤴᤍᤡᤰ ᤋᤠᤏᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤕᤶᤒᤠ ᤁᤢᤔᤢᤰᤛᤠᤶᤔᤡᤴ ᤂᤡᤏᤡ᤹ ᤁᤧᤏᤡᤛᤢᤶ᤹॥ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤔᤏᤧᤃᤧᤎᤡᤰᤋᤡᤒᤠᤴ ᤂᤢᤏᤧ᤹ ᤂᤧᤵᤛᤢᤀᤠᤱ ᤘᤠ᤹॥ ᤀᤠᤴᤇᤡᤃᤣ ᤜᤠ᤺ᤳᤇᤡᤃᤧᤀᤠᤱ ᤂᤡᤏᤡ᤹ ᤀᤠᤴᤇᤡᤃᤣ ᤋᤰᤗᤧᤱᤘᤠᤀᤥ ᤔᤏᤧᤃᤧᤎᤡᤰᤋᤡᤒᤠᤒᤣ॥” 8 ᤂᤧᤴ ᤀᤣᤃᤠᤱ ᤕᤠᤶᤔᤥ ᤔᤥᤛᤠ᤺ᤸᤗᤧ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧᤀᤣ ᤂᤡᤏᤡ᤹ ᤕᤢ᤺ᤴᤇᤡᤰ ᤛᤠ ᤏᤢ ᤋᤠᤏᤠᤶ ᤂᤡᤏᤡ᤹ ᤆᤠᤜᤠ ᤁᤧᤈᤥᤃᤡᤒᤠ ᤕᤠᤖᤡᤰ ᤂᤖᤧ᤺ᤱ ᤁᤧᤒᤡᤖᤡ᤹ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤛᤠ᤹ᤖᤡᤰ ᤔᤏᤧᤃᤧᤎᤡᤰᤋᤡ. ᤂᤧᤴ ᤂᤢᤏᤧ᤹ ᤂᤧᤵᤛᤢᤀᤠᤱ ᤘᤠ᤹॥ ᤀᤠᤴᤇᤡᤃᤣ ᤋᤰᤗᤧᤱᤘᤠᤀᤥ ᤂᤡᤏᤡ᤹ ᤔᤏᤧᤃᤧᤎᤡᤰᤋᤡᤸᤗᤧ ᤛᤧᤰᤂᤠ᤺ᤸᤗᤧ ᤂᤡᤏᤡ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤏᤧᤃᤧᤎᤡᤰᤋᤡᤒᤠ ᤐᤥᤱ᤹॥” 9 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤜᤠᤖᤢᤏᤧᤴ ᤔᤧᤳᤋᤢ. “ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ ᤔᤧᤳᤋᤧᤛᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤣᤛᤠᤱ ᤋᤩᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤔᤏᤧᤃᤧᤎᤡᤰᤋᤡᤒᤠᤴ ᤂᤢᤏᤧ᤹ ᤂᤧᤵᤛᤢᤀᤠᤱ ᤘᤠ᤹॥’” 10 ᤜᤠᤖᤢᤏᤧᤴ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ᤏᤢ ᤐᤠᤖᤧᤖ ᤐᤳᤇᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤖᤠᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤗᤧᤵᤔᤠᤱ ᤔᤧᤜᤡᤛᤢ ᤜᤧᤰᤁᤩᤠᤱ ᤜᤰᤆᤄᤳ ᤕᤜᤘᤣ ᤍᤠᤱᤒᤧᤸᤗᤧ ᤛᤧᤍᤡᤱᤍᤡᤱ ᤁᤧᤀᤥ᤺ᤵᤐᤠ ᤁᤢᤔᤡᤔᤡᤍᤡᤱᤅᤡᤴ ᤂᤠ᤹ᤔᤡ᤺ᤳᤋᤥ ᤏᤡᤎᤠᤒᤧ॥ 11 ᤕᤜᤘᤣ ᤍᤠᤱᤒᤠᤸᤗᤧ ᤔᤥᤛᤠᤴ ᤔᤧᤳᤋᤢ. 12 “ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤏᤧᤔᤧᤎᤡᤰᤋᤧᤒᤠᤴ ᤂᤧᤵᤛᤢᤱ. ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤕᤢ᤺ᤴᤇᤡᤰ ᤆᤠᤔᤠᤖᤧ ᤗᤠᤃᤡ ᤛᤠ ᤁᤧᤈᤠᤶ᤹. ᤜᤧᤰᤁᤩᤠᤱ ᤋᤠᤏᤠᤶ ᤂᤖᤧ᤺ᤱᤅᤡᤸᤗᤧ ᤁᤧᤄᤠᤛᤡ᤹॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶ᤹॥’” 13 ᤂᤧᤒᤩᤠᤱ ᤕᤢ᤺ᤴᤎᤥ ᤔᤢ᤺ᤳᤗᤢᤱᤃᤣ᤹ ᤐᤢᤜᤠ᤹ ᤜᤢᤖᤢᤖᤢ ᤔᤧᤍᤩᤧᤀᤠᤱ ᤛᤠ᤺ᤱᤃᤠᤜᤡᤶᤜᤠ᤹ ᤛᤎᤧᤰ ᤔᤧᤎᤡᤶᤛᤢ. ᤜᤧᤰᤁᤩᤠᤱ ᤋᤠᤏᤠᤶ ᤛᤠ᤺ᤱᤃᤠᤜᤡᤶᤜᤠ᤹ ᤁᤧᤖᤧᤰ ᤐᤡᤛᤠᤱ ᤜᤡ᤺ᤰᤘᤠ ᤌᤠᤛᤢᤀᤠᤱ ᤏᤧᤛ᤻ᤛᤧ॥ 14 ᤛᤣ᤺ᤰᤘᤠᤴ ᤜᤣᤖᤧᤀᤠᤱ ᤀᤣᤃᤠᤱ ᤂᤧᤵᤔᤥ ᤆᤢᤈᤢᤰᤛᤠ ᤁᤢᤃᤠᤰᤔᤠ ᤜᤧᤰᤋᤱᤒᤠ ᤁᤢᤈᤠ ᤏᤧᤛ᤻ᤛᤧᤒᤠ ᤔᤧᤏᤡᤛᤢ॥ ᤂᤧᤴ ᤛᤣ᤺ᤰᤘᤠ ᤜᤧᤰᤋᤱᤒᤠ ᤆᤥᤃᤧ॥ 15 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤴ ᤔᤧᤏᤡᤛᤢᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤢᤶᤔᤥ ᤀᤰᤂᤣᤗ᤹ᤖᤡᤰ ᤛᤣ᤺ᤴᤔᤧᤍᤥᤛᤡᤱ. “ᤁᤴ ᤌᤧᤔᤠᤏᤡᤒᤣ᥅” ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤆᤠᤔᤠ ᤁᤧᤒᤡᤖᤡᤒᤠ ᤁᤢᤈᤠᤴ ᤜᤠᤒᤠ ᤁᤴᤇᤒᤠ॥ 16 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. ‘ᤁ᤹ᤕᤥᤏᤢ ᤁᤧᤖᤧᤰ ᤔᤏᤠ ᤌᤵᤔᤣ ᤁᤧᤈᤠᤶᤒᤠ ᤕᤠᤖᤡᤰᤗᤰ ᤑᤢᤰᤂᤧᤶᤔᤧ᤹॥ ᤂᤡᤏᤡ᤹ ᤀᤠᤒᤠᤅᤣ ᤀᤠᤒᤠᤅᤣ ᤛᤠ᤺ᤱᤃᤠᤜᤡᤶᤔᤥ ᤁᤧᤕᤠᤰᤐᤠ ᤁᤧᤖᤧᤰ ᤔᤏᤠ ᤌᤰᤔᤠ ᤀᤥᤔᤖ ᤌᤡᤰᤌᤡᤰ ᤑᤢᤰᤂᤧᤶᤔᤧ᤹॥’” 17 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤜᤧᤰᤁᤣᤀᤣ ᤔᤧᤈᤥᤃᤢ॥ ᤁᤢᤓᤠᤖᤧ ᤕᤖᤡᤰ ᤏᤢ ᤁᤢᤓᤠᤖᤧ ᤛᤢ᤺ᤸᤗᤡᤰ ᤔᤧᤓᤢᤰᤂᤢ॥ 18 ᤂᤧᤱᤜᤠ᤹ᤖᤧ ᤔᤧᤓᤢᤰᤂᤢᤒᤠᤴ ᤀᤥᤔᤖᤀᤥ ᤔᤧᤛᤡ᤺ᤰᤋᤢᤸᤗᤧ ᤕᤖᤡᤰ ᤁᤧᤓᤢᤱᤒᤠᤜᤠ᤹ᤖᤧᤴ ᤕᤖᤡᤰ ᤏᤢ ᤛᤢ᤺ᤸᤗᤡᤰ ᤁᤧᤓᤢᤱᤒᤠᤜᤠ᤹ᤖᤧᤴ ᤛᤢ᤺ᤸᤗᤡᤰ ᤔᤧᤒᤥ᤺ᤰᤂᤧᤴ॥ ᤁᤧᤖᤧᤰᤗᤧ ᤂᤢᤴᤇᤡ᤹ ᤆᤠᤜᤠ ᤔᤧᤈᤥᤃᤧᤒᤠ ᤕᤠᤖᤡᤰᤗᤰ ᤔᤧᤓᤢᤰᤂᤢ॥ 19 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤧᤴ ᤋᤠ᤺ᤴᤍᤡᤰᤗᤧ ᤗᤠᤃᤡ ᤋᤠᤏᤠᤶ ᤌᤠᤖᤡᤰ ᤔᤧᤏᤴᤇᤧᤶ ᤔᤧᤕᤢᤰᤂᤧᤶᤔᤡᤴᤏᤧ᤹॥” 20 ᤁᤖ ᤂᤧᤱᤜᤠ᤹ᤀᤥ ᤁᤢᤓᤠᤖᤧ ᤔᤥᤛᤠ᤺ᤸᤗᤧ ᤁᤢᤒᤠ᤺ᤴᤏᤡᤴ ᤔᤧᤱᤄᤧᤵᤛᤢᤴ. ᤂᤧᤱᤜᤠ᤹ᤖᤧ ᤂᤧᤴ ᤁᤢᤓᤠ ᤋᤠᤏᤠᤶ ᤌᤠᤖᤡᤰ ᤔᤧᤏᤴᤇᤢ ᤔᤧᤕᤢᤰᤂᤢ॥ ᤁᤖ ᤁᤢᤍᤠ᤺ᤴᤍᤡᤰᤔᤠ ᤋᤠᤏᤠᤶ ᤂᤧᤵᤔᤥ ᤑᤣ᤹ᤒᤠᤳ ᤌᤩᤧᤀᤠᤱ ᤏᤠᤶᤛᤢᤔᤠ ᤜᤣ᤺ᤰᤋᤧᤀᤠᤱ ᤕᤢᤅᤧ॥ ᤔᤥᤛᤠᤴ ᤂᤧᤱᤜᤠ᤹ᤏᤢ ᤁᤢᤛᤡᤰ ᤐᤥᤃᤧ॥ 21 ᤁᤶᤓᤗ᤹ᤖᤡᤰ ᤋᤠᤏᤠᤶ ᤌᤵᤔᤣ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤆᤠᤜᤠ ᤁᤧᤈᤥ᤺ᤰᤐᤠ ᤕᤠᤖᤡᤰ ᤔᤧᤓᤢᤰᤂᤢ. ᤜᤧᤰᤁᤩᤠᤱ ᤏᤠᤶᤛᤧ᤺ᤰᤔᤠ ᤜᤣ᤺ᤰᤋᤧᤀᤠᤱ ᤂᤠᤶᤒᤠᤱᤅᤥ ᤁᤧᤏᤧᤒᤠ ᤁᤧᤕᤠ᤺ᤰᤐᤠᤜᤠ᤹ ᤁᤧᤖᤧᤰ ᤕᤥ᤺ᤴᤍᤧᤒᤣ॥ 22 ᤋᤢᤰᤛᤡᤃᤣᤰᤐᤠ ᤕᤧᤴᤏᤥ ᤂᤧᤱᤜᤠ᤹ᤖᤧ ᤁᤧᤖᤧᤰᤗᤧ ᤗᤠᤃᤡ ᤋᤃᤡᤒᤠ ᤕᤧᤴᤜᤠ᤹ᤀᤥ ᤔᤧᤓᤢᤰᤂᤢᤒᤠᤏᤢ᤺ᤸᤗᤧ ᤏᤡᤗᤧᤱ ᤕᤠᤖᤡᤰ ᤕᤖᤡᤰ ᤀᤥᤔᤖ ᤏᤧᤳᤏᤧᤳᤇᤡ ᤔᤧᤓᤢᤰᤂᤢ. ᤜᤧᤰᤁᤩᤠᤱ ᤛᤱᤈᤢᤶᤓᤥᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤔᤧᤍᤩᤧᤀᤠᤱ ᤂᤧᤴ ᤐᤠ᤺ᤴᤏᤡᤴ ᤔᤥᤛᤠᤴ ᤔᤧᤈᤧᤰᤋᤢ॥ 23 ᤂᤧᤒᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤐᤠ᤺ᤴᤏᤡᤴ ᤜᤠᤒᤠ ᤁᤴᤗᤥ—‘ᤋᤠ᤺ᤴᤍᤡᤰᤁ ᤏᤠ᤺ᤶᤛᤡᤱᤔᤠ ᤕᤧᤴᤗᤥ. ᤂᤧᤱᤃ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤛᤣᤛᤣ ᤛᤒᤠᤌᤖᤥ॥ ᤌᤥ᤺ᤰᤔᤠ ᤁᤧᤒᤥᤱᤒᤠ ᤏᤢ ᤌᤧᤶᤔᤠ ᤁᤧᤒᤥᤱᤒᤠ ᤁᤢᤈᤠᤜᤠ᤹ ᤀᤠᤀᤡᤴᤇᤠ ᤌᤥ᤺ᤰᤋᤧᤶᤔᤧ᤹ ᤌᤧᤴᤍᤧᤶᤔᤧ᤹॥ ᤁᤧᤈᤠᤶᤔᤠᤱ ᤁᤧᤏᤶᤒᤠ ᤌᤥ᤺ᤰᤔᤏᤠᤒᤠ ᤁᤢᤈᤠᤴ ᤋᤠ᤺ᤴᤍᤡᤰᤗᤧ ᤗᤠᤃᤡ ᤛᤧᤴᤍᤠᤶ ᤕᤢᤰᤂᤧᤶᤔᤧ᤹॥’” 24 ᤔᤥᤛᤠ᤺ᤸᤗᤧ ᤔᤧᤳᤋᤢᤛᤡᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤁᤧᤏᤶᤒᤠ ᤁᤢᤈᤠᤴ ᤁᤢᤍᤠ᤺ᤴᤍᤡᤰᤔᤠ ᤌᤧᤶᤔᤠ ᤔᤧᤕᤢᤰᤂᤢ॥ ᤂᤧᤴ ᤏᤠᤶᤔᤧᤛᤢᤛᤧᤴ ᤜᤧᤰᤁᤩᤠᤱ ᤂᤧᤵᤔᤥ ᤑᤣ᤹ᤒᤠᤳ ᤔᤧᤎᤩᤧᤏᤧᤴ॥ 25 ᤔᤥᤛᤠ᤺ᤸᤗᤧ ᤔᤧᤳᤋᤢᤛᤡ. “ᤀᤠᤀᤡᤴ ᤂᤧᤴ ᤆᤧᤶᤔᤧ᤹ ᤌᤣᤀᤠᤱᤓᤧᤸᤗᤧ ᤀᤠᤀᤡᤴᤒᤠ ᤕᤧᤴᤏᤡᤱᤃ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤶᤔᤏᤠᤒᤠ ᤏᤠ᤺ᤶᤛᤡᤱᤔᤠ ᤕᤧᤴᤗᤥ॥ ᤂᤡᤏᤡ᤹ ᤁᤧᤕᤢᤅᤡᤒᤠᤍᤧᤴ ᤗᤠ᤺ᤰᤁᤠᤳ ᤀᤠᤀᤡᤴ ᤌᤧᤔᤠᤀᤠᤱ ᤁᤢᤈᤠ ᤁᤧᤱᤄᤥᤛᤢᤶᤔᤡᤴ᤹॥ 26 ᤂᤡᤏᤡ᤹ ᤋᤢᤰᤛᤡ ᤕᤧᤴ ᤌᤠᤖᤡᤰ ᤆᤠᤔᤠ ᤁᤢᤈᤠ ᤑᤢᤰᤂᤧᤶᤔᤧ᤹ ᤁᤖ ᤏᤢᤛᤡᤃᤣᤰᤐᤠ ᤕᤧᤴ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤂᤡᤏᤡ᤹ ᤌᤣᤀᤠᤱ ᤁᤧᤱᤄᤥᤛᤢᤶᤔᤡᤴ᤹॥” 27 ᤜᤧᤰᤁᤣᤛᤠᤱ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤁᤢᤓᤠ ᤔᤏᤠ ᤁᤢᤈᤠ ᤑᤢᤱᤛᤧ ᤗᤠ᤺ᤰᤁᤠᤳ ᤔᤧᤒᤣ. ᤁᤖ ᤂᤧᤱᤜᤠ᤹ᤖᤧ ᤌᤧᤔᤠᤀᤠᤱ ᤔᤧᤱᤄᤥᤛᤢᤴ॥ 28 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤂᤡᤏᤡ᤹ ᤀᤠᤵᤑᤠᤸᤗᤧ ᤌᤠᤖᤡᤰ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤏᤢ ᤀᤠᤎᤡᤶᤜᤠ᤹ ᤂᤧᤶᤔᤠ ᤁᤧᤴᤍᤧᤴᤍᤡᤶᤒᤠᤒᤣ᥅ 29 ᤏᤡᤱᤘᤠ᤹ ᤜᤧᤳᤋᤠᤛᤡᤶᤔᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤛᤒᤠᤌ ᤁᤧᤒᤡᤖᤡᤀᤠᤱ ᤘᤠ᤹॥ ᤁᤸᤗᤧ ᤆᤥᤃᤢᤸᤗᤧᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤗᤠᤃᤡ ᤋᤢᤰᤛᤡᤃᤣᤰᤐᤠ ᤕᤧᤴᤏᤥ ᤏᤡᤕᤠᤴ ᤁᤧᤕᤥᤒᤠ ᤆᤠᤔᤠ ᤁᤢᤈᤠ ᤁᤧᤒᤡᤖᤡ᤹॥ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤂᤡᤏᤡ᤹ ᤀᤠᤳᤋᤡ ᤀᤠᤳᤋᤡ ᤁᤧᤘᤕᤡ᤹ ᤜᤠᤒᤠ ᤂᤧᤵᤔᤥᤀᤣ ᤕᤢᤅᤧᤶᤔᤧ᤹. ᤀᤠᤳᤋᤡᤴ ᤔᤏᤠ᤺ᤴᤏᤠᤱ ᤁᤢᤛᤠ᤺ᤱᤃᤠᤜᤡᤶᤔᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤴᤏᤧᤴᤗ॥” 30 ᤁᤸᤗᤧᤆᤥᤃᤢᤸᤗᤧ ᤔᤏᤠᤜᤠ᤹ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤕᤠ᤺ᤶᤒᤰ ᤔᤧᤴᤈᤥᤃᤧᤴ॥ 31 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤴ ᤁᤢᤈᤠ᤺ᤸᤗᤧ ᤁᤢᤔᤡᤱ “ᤔᤴᤏ” ᤔᤧᤔᤧᤳᤋᤢ॥ ᤂᤧᤴ ᤛ᤺ᤵᤑᤠ᤺ᤸᤗᤧ ᤁᤢᤛᤣ᤹ ᤜᤧᤰᤋᤱᤒᤠ ᤑᤍᤠᤱᤒᤠ ᤆᤥᤃᤧ ᤜᤧᤰᤁᤩᤠᤱ ᤛᤰᤘᤠᤄᤢ᤺ᤴᤏᤢ ᤛ᤹ᤔᤏᤠᤒᤠ ᤜᤧᤰᤁᤣ ᤐᤠ᤹ᤒᤠ᤺ᤶᤒᤠ ᤆᤢᤰᤛᤠ ᤂᤖᤧ᤺ᤱ ᤁᤢᤛᤡᤱ ᤁᤢᤈᤠᤃᤧᤏᤢ᤹ᤒᤠ ᤆᤥᤃᤧ॥ 32 ᤔᤥᤛᤠ᤺ᤸᤗᤧ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠᤸᤗᤧ ᤀᤰᤋᤱᤒᤠ ᤀᤡᤱᤈᤠᤱ ᤆᤥᤃᤢᤀᤠᤱ ᤘᤠ᤹—‘ᤔᤡᤛᤪᤗᤠᤶ ᤀᤠᤱᤃᤠ᤹ ᤂᤡᤏᤡ᤹ ᤗ᤺ᤳᤏᤡᤱ ᤑᤧᤳᤏᤡᤱᤅᤡᤸᤗᤧ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤀᤠᤰᤋᤱᤒᤠ ᤁᤢᤈᤠ ᤆᤠ᤺ᤳᤏᤡᤱᤅᤠᤱ ᤘᤕᤧ. ᤂᤧᤴ ᤁᤢᤈᤠᤴ ᤋᤠ᤺ᤴᤍᤡ ᤁᤧᤍᤠᤒᤠ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤔᤧᤏᤡᤛᤢᤖ ᤑᤠ᤹ᤀᤠᤱ ᤂᤧᤴ ᤔᤴᤏ᤺ᤴ ᤀᤥᤔᤣᤖ ᤌᤡᤰ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤁᤳᤋᤧᤶᤔᤧ᤹॥’” 33 ᤔᤥᤛᤠ᤺ᤸᤗᤧ ᤜᤠᤖᤢᤏᤧᤴ ᤔᤧᤳᤋᤢ. “ᤗᤳᤇᤠ ᤁᤢᤕᤠᤱᤔᤠ ᤌᤡᤰ ᤋᤣ᤹ᤖᤧᤀᤠᤱ ᤂᤧᤵᤔᤥ ᤀᤥᤔᤖ ᤌᤡᤰ ᤔᤴᤏ ᤌᤧᤰᤋᤧ᤹. ᤜᤧᤰᤁᤩᤠᤱ ᤂᤧᤴ ᤋᤠ᤺ᤴᤍᤡᤒᤠ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤕᤢᤰᤂᤧ᤹॥” 34 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢᤒᤠ ᤁᤢᤀᤡᤛᤡᤰ ᤜᤠᤖᤢᤏᤧᤸᤗᤧ ᤂᤧᤴ ᤁᤢᤕᤠᤱᤔᤠᤴ ᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤍᤃᤠᤱ ᤂᤧᤴ ᤔᤧᤔᤧᤰᤏᤧᤸᤗ ᤑᤠ᤹ᤀᤠᤱ ᤕᤢᤰᤂᤢ॥ 35 ᤔᤏᤠ ᤔᤧᤕᤢᤅᤧᤒᤠ ᤗᤠᤈᤣ᤹ᤀᤥ ᤔᤧᤱᤃᤧᤳᤋᤣ ᤌᤠᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤗᤡᤒᤥᤱ ᤋᤱᤒᤣ ᤌᤧᤶᤒᤠ ᤔᤴᤏ᤺ᤴ ᤔᤧᤈᤥᤀᤠᤱ ᤔᤧᤘᤕᤧ॥ ᤁᤏᤠᤏ ᤗᤠᤈᤣ᤹ᤒᤠ ᤀᤡ᤺ᤴᤍᤥᤀᤥ ᤔᤧᤱᤃᤧᤳᤋᤣ ᤌᤠᤖᤡᤰ ᤂᤧᤱᤜᤠ᤹ᤖᤧ ᤂᤧᤴ ᤔᤴᤏ᤺ᤴ ᤔᤧᤈᤖ ᤔᤧᤘᤕᤧ॥ 36 (ᤀᤥᤔᤖ ᤌᤡᤰᤁᤧᤴ ᤁᤢᤗᤰ ᤌᤡᤒᤥᤱ ᤀᤣᤑᤠᤖᤧ ᤁᤢᤗᤰ ᤌᤡᤰᤗᤥ॥) |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.