ᤗᤠᤶᤍᤡᤰ 15 - LIFOTNTᤔᤥᤛᤠ᤺ᤸᤗᤧ ᤁᤢᤛᤠᤶᤗᤥ 1 ᤂᤧᤒᤩᤠᤱ ᤔᤥᤛᤠᤴ ᤏᤢ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤔᤧᤓᤥᤛᤢᤖ ᤛᤠᤶᤔᤧᤗᤥᤖᤧᤖᤥ— “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤢᤱᤗ ᤛᤠᤶᤗᤥᤀᤠᤖᤥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤔᤡᤱᤛᤥ ᤌᤠ᤺ᤱᤛᤥᤏᤢ ᤌᤱ ᤏᤠ᤺ᤴᤍᤢᤀᤠᤱ ᤘᤠ᤹ᤖᤥ. ᤂᤢᤏᤧ᤹ ᤀᤴᤜᤠ᤹ ᤏᤢ ᤀᤴᤃᤧᤕᤢᤰᤐᤠᤜᤠ᤹ ᤛᤥᤖᤡᤰ ᤘᤖ᤺ᤱᤅᤥ ᤗᤠᤵᤑᤢᤛᤢ ᤁᤣ᤺ᤳᤋᤢᤛᤡᤀᤠᤱ ᤘᤠ᤹ᤖᤥ॥ 2 “ᤕᤜᤘᤣ ᤍᤠᤱᤒᤠ ᤔᤢᤰᤛᤠᤶᤍᤠᤱᤒᤧᤸᤗᤧ ᤀᤠᤱᤃᤠ᤹ ᤏᤠᤱᤅᤠ ᤌᤣ᤺ᤰᤁᤠᤖᤥ. ᤂᤢᤏᤧ᤹ᤀᤣ ᤀᤠᤱᤃᤠ᤹ ᤋᤠᤱᤛᤧ᤺ᤵᤐᤠᤖᤥ॥ ᤂᤢᤏᤧ᤹ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤗᤥ. ᤀᤠᤱᤃᤠ᤹ ᤂᤢᤏᤧ᤹ ᤁᤢᤏᤠᤖᤠ ᤑᤥᤛᤢᤱᤗᤥ. ᤂᤢᤏᤧ᤹ ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤗᤥ ᤀᤠᤱᤃᤠ᤹ ᤛᤠᤶᤗᤥ ᤛᤠᤶᤔᤧᤳᤋᤢᤱᤅᤠᤱ ᤁᤢᤏᤠᤖᤠ ᤑᤥᤛᤢᤱᤗᤥ॥ 3 ᤕᤜᤘᤣ ᤍᤠᤱᤒᤠᤱᤃ ᤌᤱ ᤁᤧᤎᤰᤐᤠᤖᤥ. ᤂᤢᤏᤧ᤹ ᤁᤢᤔᤡᤱᤃ ᤕᤜᤘᤣ ᤍᤠᤱᤒᤠᤖᤥ॥ 4 ᤑᤠᤖᤥᤸᤗᤧ ᤁᤢᤎᤰᤛᤢᤒᤠᤜᤠ᤹ ᤏᤢ ᤁᤢᤀᤴᤗᤠᤎᤠᤜᤠ᤹ ᤂᤢᤏᤧ᤹ ᤘᤖ᤺ᤱᤅᤥ ᤗᤠᤵᤑᤢᤛᤢᤛᤡᤖᤥ. ᤑᤠᤖᤥᤸᤗᤧ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤌᤥᤎᤥᤰᤐᤠ ᤁᤢᤛᤢᤜᤠᤱᤃᤧᤶᤒᤠᤜᤠ᤹ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤥ ᤔᤧᤜᤢᤔᤧᤖᤥ॥ 5 ᤁᤢᤍᤡ᤺ᤶᤒᤣ ᤁᤣ᤺ᤶᤒᤠ ᤘᤖ᤺ᤱᤅᤡᤸᤗᤧ ᤂᤧᤱᤜᤠ᤹ ᤜᤢᤶᤛᤢ ᤍᤣᤛᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤢᤱ ᤜᤧᤰᤁᤣ ᤘᤖ᤺ᤱᤛᤡᤃᤠᤱ ᤔᤧᤏᤡᤒᤧ ᤔᤧᤗᤠᤛᤧᤖᤥ॥ 6 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤈᤢᤰᤘᤠ ᤜᤢᤰᤁᤥ ᤁᤡᤵᤔᤠ ᤁᤧᤄᤢᤒᤠ ᤔᤢᤰᤛᤠᤶ ᤕᤠᤃᤧᤖᤥ. ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤈᤢᤰᤘᤠ ᤜᤢᤰᤁᤡᤸᤗᤧ ᤏᤡᤱᤔᤡᤜᤠ᤹ ᤛᤩᤠᤰ ᤛᤩᤠᤰ ᤁᤧᤓᤢ᤹ᤖᤢᤛᤡᤖᤥ॥ 7 “ᤀᤠᤍᤠᤱᤒᤠᤖᤧ ᤁᤧᤍᤰᤗᤧᤱᤘᤠᤀᤥ ᤁᤧᤒᤥᤰᤐᤠᤜᤠ᤹. ᤀᤠᤍᤠᤱᤒᤠᤖᤧ ᤌᤥᤎᤥᤒᤠ ᤁᤧᤜᤠᤱᤘᤠ ᤁᤧᤔᤠᤱᤘᤠ᤺ᤸᤗᤧ ᤂᤧᤱᤜᤠ᤹ ᤕᤥ ᤁᤧᤎᤠᤛᤢᤛᤡᤖᤥ॥ ᤔᤡ ᤜᤧᤰᤁᤣ ᤁᤧᤍᤡ᤺ᤵᤐᤠ ᤁᤧᤛᤡᤰ ᤐᤥ᤺ᤰᤔᤠᤴ ᤀᤥ᤺ᤴᤃᤧᤎᤠᤰᤋᤢᤛᤡᤖᤥ. ᤂᤧᤸᤗᤧ ᤂᤧᤱᤜᤠ᤹ ᤕᤠ᤹ᤗᤠᤱ ᤁᤢᤀᤡᤛᤡᤰ ᤂᤠᤵᤐᤢᤌᤩ᤺ᤱ ᤆᤥᤃᤢᤛᤡᤖᤥ॥ 8 ᤂᤧᤏᤧ᤹ ᤁᤧᤛᤰᤔᤠ᤺ᤸᤗᤧ ᤘᤖ᤺ᤱᤅᤡᤴ ᤁᤧᤔᤢ᤺ᤳᤋᤢᤖᤥ. ᤜᤧᤰᤁᤩᤠᤱ ᤆᤫᤠ᤺ᤳᤋᤡᤴ ᤗᤢ᤺ᤵᤐᤧᤳ ᤗᤢᤶᤛᤡᤱᤗᤥ. ᤜᤧᤰᤁᤩᤠᤱ ᤂᤧᤴ ᤘᤀᤡᤰᤗᤠᤴ ᤗᤢᤱᤎᤠᤰ ᤜᤧᤰᤋᤱᤒᤠ ᤐᤥ᤺ᤰᤂᤧᤀᤠᤱ ᤕᤧᤶᤛᤡᤱᤗᤥ. ᤁᤢᤍᤡᤶᤒᤣ ᤁᤣ᤺ᤶᤒᤠ ᤆᤫᤠ᤺ᤳᤋᤡᤴ ᤘᤖ᤺ᤱᤅᤡᤸᤗᤧ ᤁᤢᤗᤢᤶᤔᤥ ᤋᤠᤰᤋᤢᤖᤥ॥ 9 ᤏᤡᤱᤔᤡ᤺ᤸᤗᤧ ᤐᤠ᤺ᤳᤋᤢ. ‘ᤀᤠᤱᤃᤠ᤹ ᤂᤧᤱᤜᤠ᤹ ᤏᤠ᤺ᤳᤋᤢᤱᤛᤡᤱᤗᤥ. ᤂᤧᤱᤜᤠ᤹ ᤏᤠᤵᤋᤢᤱᤛᤡᤱᤒᤠ ᤛᤠᤔᤠᤜᤠ᤹ ᤑ᤺ᤰᤂᤢᤱᤗᤥ॥ ᤀᤠᤱᤃᤠ᤹ ᤂᤧᤱᤜᤠ᤹ ᤀᤠᤒᤠ᤺ᤵᤐᤠᤳ ᤔᤧᤳᤋᤢᤛᤡᤱᤗᤥ ᤀᤠᤱᤃᤠ᤹ ᤀᤠᤍᤠᤓᤣᤴ ᤋᤖᤵ ᤑᤡ᤺ᤰᤂᤢᤱᤗᤥ. ᤜᤧᤰᤁᤩᤠᤱ ᤀᤠᤜᤢᤰᤁᤡᤸᤗᤧ ᤂᤧᤱᤜᤠ᤹ ᤔᤧᤰᤂᤢᤱᤛᤡᤱᤗᤥ॥’ 10 ᤁᤖ ᤕᤜᤘᤣ ᤍᤠᤱᤒᤣ. ᤂᤧᤏᤧ᤹ ᤁᤧᤛᤰᤔᤠ᤺ᤸᤗᤧ ᤁᤧᤔᤢ᤺ᤳᤋᤢᤖᤥ. ᤜᤧᤰᤁᤩᤠᤱ ᤔᤡᤛᤪᤡᤜᤠ᤹ ᤘᤖ᤺ᤱᤅᤥ ᤔᤧᤜᤢᤔᤧ ᤔᤧᤗᤠᤛᤧᤖᤥ. ᤁᤡᤵᤔᤠ ᤐᤄᤢᤃᤧᤄᤢᤒᤠ ᤆᤫᤠ᤺ᤳᤋᤥ ᤂᤧᤱᤜᤠ᤹ ᤔᤠᤰᤗᤢᤶᤒᤠ ᤜᤧᤰᤁᤣ ᤔᤧᤏᤡᤒᤧ ᤔᤧᤗᤠᤛᤧᤖᤥ॥ 11 ᤕᤜᤘᤣ ᤍᤠᤱᤒᤠᤀᤣ. ᤔᤠᤱᤜᤠ᤹ᤀᤥ ᤂᤧᤏᤧ᤹ ᤜᤧᤰᤋᤱᤒᤠ ᤜᤠᤳ ᤘᤠ᤹ᤒᤣ᥅ ᤛᤣᤛᤣ ᤛᤠᤱᤛᤠᤱᤅᤥ ᤂᤧᤏᤧ᤹ ᤜᤧᤰᤋᤱᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤜᤠᤳ ᤘᤠ᤹ᤒᤣ᥅ ᤜᤠ᤺ᤳᤗᤧ ᤂᤧᤏᤧ᤹ ᤜᤧᤰᤁᤣ ᤏᤡᤱᤘᤠ᤹ᤖᤧ ᤔᤧᤴᤎᤠᤵᤔᤏᤠᤒᤠ ᤏᤢ ᤔᤢᤰᤛᤠᤶᤛᤠᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤢᤰᤋᤢᤒᤣ᥅ 12 “ᤂᤧᤏᤧ᤹ ᤁᤧᤈᤢᤰᤘᤠ ᤜᤢᤰᤁᤡᤴ ᤁᤧᤛᤴᤇᤢᤖᤥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤀᤠᤏᤡᤃᤣ ᤏᤡᤱᤔᤡᤜᤠ᤹ ᤗᤖᤢᤍᤣᤛᤢᤛᤡᤖᤥ॥ 13 ᤔᤠᤱᤜᤢᤵ ᤁᤧᤈᤥᤃᤢᤒᤠ ᤐᤠ᤺ᤴᤏᤥ ᤀᤠᤍᤠᤱᤒᤠ ᤏᤛᤠ᤺ᤴᤛᤠᤒᤠ ᤁᤧᤈᤥ᤺ᤰᤗᤥ. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤛᤧ᤺ᤵᤋᤢᤛᤡᤒᤠ ᤁᤧᤔᤏᤠᤜᤠ᤹ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤖᤥ. ᤀᤠᤍᤠᤱᤒᤠᤖᤧ ᤁᤧᤔᤢᤰᤛᤠᤶᤔᤡᤸᤗᤧ ᤂᤧᤱᤜᤠ᤹ ᤁᤧᤛᤣᤛᤣ ᤕᤢᤱᤔᤠᤍᤧᤴᤏᤥ ᤗᤠᤶᤃᤧᤗᤥᤛᤢᤛᤡᤖᤥ॥ 14 ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤔᤧᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤡᤔᤠᤸᤗᤧ ᤌᤧᤃᤰᤁᤰ ᤔᤧᤕᤱᤗᤥ. ᤐᤗᤡᤛ᤻ᤋ ᤗᤠᤈᤣ᤹ᤒᤠ ᤔᤏᤠᤜᤠ᤹ ᤕᤱᤔᤠ ᤁᤧᤖᤧᤀᤠᤱ ᤘᤠ᤹ᤖᤥ॥ 15 ᤀᤣᤍᤥᤔᤒᤠ ᤗᤠᤶᤗᤥᤒᤠᤜᤠ᤹ ᤛᤠ᤹ᤖᤡᤰ ᤂᤢᤴᤇᤡ᤹ ᤕᤱᤔᤠ ᤁᤧᤖᤧᤀᤠᤱ ᤘᤠ᤹ᤖᤥ. ᤔᤥᤀᤠᤒᤒᤠ ᤁᤧᤎᤢᤶᤒᤠ ᤔᤏᤠᤜᤠ᤹ ᤆᤡᤖᤡᤶᤗᤡᤶᤏᤠ ᤔᤧᤕᤱᤗ ᤔᤧᤘᤠ᤹ᤖᤥ. ᤁᤏᤠᤏᤒᤠ ᤕᤰᤕᤢᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤰᤔᤠ ᤐᤢ᤹ᤖᤧᤀᤠᤱ ᤘᤠ᤹ᤖᤥ॥ 16 ᤂᤧᤱᤜᤠ᤹ ᤁᤡᤔᤠ ᤏᤢ ᤕᤱᤔᤠ ᤁᤧᤵᤔᤠᤸᤗᤧ ᤛᤢ᤺ᤵᤋᤢᤛᤡᤀᤠᤱ ᤘᤠ᤹ᤖᤥ॥ ᤕᤜᤘᤣ ᤍᤠᤱᤒᤠᤀᤣ᥄ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤔᤢᤰᤛᤠᤶᤔᤡᤴ ᤔᤧᤏᤡᤛᤢᤖᤥ. ᤂᤧᤏᤧ᤹ ᤕᤥ᤺ᤰᤗᤠᤶ ᤁᤧᤛᤧᤴᤍᤢ ᤁᤧᤓᤧᤳᤋᤢᤛᤡᤒᤠ ᤁᤧᤔᤏᤠᤜᤠ᤹. ᤗᤠᤱᤔᤧᤄᤣ᤺ᤰᤁᤠᤱ ᤏᤠᤎᤠ᤺ᤶᤒᤡ ᤔᤧᤒᤣ᤺ᤰᤁᤡᤸᤗᤧ ᤏᤡᤱᤔᤡᤜᤠ᤹ ᤁᤡᤔᤠᤸᤗᤧ ᤆᤡᤖᤡᤶᤗᤡᤶᤏᤠ ᤔᤧᤕᤱᤅᤠᤱ ᤔᤧᤶᤒᤠ᤺ᤳᤋᤣ ᤔᤧᤕᤧᤵᤗᤥ॥ 17 ᤂᤧᤏᤧ᤹ ᤂᤧᤱᤜᤠ᤹ ᤁᤧᤓᤧᤳᤋᤢᤛᤡᤀᤠᤱ ᤁᤧᤃᤥ᤺ᤰᤔᤠᤀᤥ ᤁᤧᤕᤢᤰᤂᤢᤛᤡᤖᤥ. ᤂᤧᤏᤧ᤹ ᤀᤠᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤋᤧᤴᤏᤡᤴ. ᤁᤧᤕᤢᤱᤔᤠᤍᤧᤴ ᤆᤥ᤺ᤰᤔᤠᤖᤧ ᤗᤠᤃᤡ ᤁᤧᤛᤣᤃᤢᤀᤠᤱ ᤏᤧᤖᤥ. ᤂᤧᤴ ᤛᤣᤛᤣᤍᤧᤴᤏᤡᤴ. ᤀᤠᤒᤠᤅᤣ ᤁᤧᤜᤢᤰᤁᤡᤸᤗᤧ ᤁᤧᤈᤥᤃᤢᤀᤠᤱ ᤏᤧᤖᤥ॥ 18 “ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤜᤠᤱ ᤁᤧᤒᤥᤱᤗᤥ॥” ᤔᤡᤖᤡᤕᤔᤖᤧ ᤁᤢᤛᤠᤶᤗᤥ 19 ᤀᤡᤛᤪᤠᤀᤡᤗᤡᤜᤠ᤹ ᤘᤖ᤺ᤱᤅᤡᤸᤗᤧ ᤁᤢᤗᤢᤶᤔᤥ ᤂᤠᤶᤒᤠᤱᤅᤥ ᤗᤠᤱᤔᤧᤄᤣᤃᤧᤀᤠᤱ ᤔᤧᤒᤣ॥ ᤁᤖ ᤑᤠᤖᤥᤸᤗᤧ ᤁᤢᤀᤴᤗᤠᤎᤠᤜᤠ᤹ ᤏᤢ ᤁᤢᤀᤴ ᤁᤧᤕᤢᤰᤐᤠᤜᤠ᤹ ᤘᤖ᤺ᤱᤅᤥ ᤔᤧᤗᤠᤛᤧᤸᤗᤧ. ᤕᤜᤘᤣ ᤍᤠᤱᤒᤧᤸᤗᤧ ᤆᤫᤠ᤺ᤳᤋᤡᤴ ᤕᤠᤱᤕᤥ ᤐᤠᤱᤄᤢᤕᤢᤛᤢ ᤜᤧᤰᤁᤩᤠᤱ ᤂᤧᤱᤜᤠ᤹ ᤆᤫᤠ᤺ᤳᤋᤥ ᤔᤧᤜᤢᤔᤧ॥ 20 ᤜᤠᤖᤢᤏᤧᤸᤗᤧ ᤁᤢᤴᤏᤧ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤔᤠ ᤔᤡᤖᤡᤕᤶᤔᤡᤴ ᤜᤢᤰᤁᤥ ᤂᤡᤳᤆᤡᤱ ᤂᤡᤳᤆᤡᤱ ᤁᤧᤗ᤹ᤒᤠ ᤔᤢᤰᤗᤠ᤺ᤴ ᤕᤠᤱᤛᤡᤱ ᤜᤧᤰᤁᤩᤠᤱ ᤁᤧᤖᤧᤰ ᤔᤧᤴᤇᤢᤔᤠᤜᤠ᤹ ᤔᤧᤗᤠ᤺ᤰᤂᤧᤖ ᤂᤡᤳᤆᤡᤱ ᤂᤡᤳᤆᤡᤱ ᤁᤧᤗ᤹ᤒᤠ ᤔᤢᤰᤗᤠ᤺ᤴ ᤔᤧᤔᤢᤰᤂᤢᤖ. ᤂᤧᤸᤗᤧ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤔᤧᤎᤠᤛᤡᤱ॥ 21 ᤔᤡᤖᤡᤕᤶᤔᤡᤴ ᤀᤰᤂᤣᤗ᤹ᤖᤡᤰ ᤛᤠᤶᤗᤥᤖᤧᤖᤥ— “ᤕᤜᤘᤣ ᤍᤠᤱᤒᤠᤴ ᤁᤢᤏᤠᤖᤠ ᤑᤥᤛᤧᤶᤔᤧᤖ ᤛᤠᤶᤗᤥᤖᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤔᤡᤔᤡᤍᤡᤱᤃᤧᤴ ᤌᤱ ᤏᤠ᤺ᤴᤍᤢᤀᤠᤱ ᤘᤠ᤹ᤖᤥ. ᤂᤢᤏᤧ᤹ ᤀᤴᤜᤠ᤹ ᤀᤴᤃᤧᤕᤢᤰᤐᤠᤜᤠ᤹ᤏᤢ ᤛᤥᤖᤡᤰ ᤘᤖ᤺ᤱᤅᤥ ᤗᤠᤵᤑᤢᤛᤢ ᤕᤠᤰᤋᤢᤛᤡᤖᤥ॥” ᤛᤠᤰᤂᤡ᤺ᤰ ᤁᤧᤄᤡ᤺ᤰᤐᤠ ᤆᤫᤠ᤺ᤳ 22 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤥᤗᤠᤶ ᤛᤢᤖ ᤔᤧᤵᤔᤏᤠᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤗᤧᤵᤔᤠᤱ ᤗᤠᤶᤗᤥᤛᤢ ᤋᤣ᤹ᤖᤢᤛᤡ॥ ᤛᤢᤶᤕᤠᤴ ᤌᤠᤖᤡᤰ ᤂᤧᤱᤜᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤡᤸᤗᤧ ᤁᤢᤗᤢᤶᤔᤥᤗᤠᤶ ᤔᤧᤒᤣ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤌᤢᤱᤔᤠ ᤆᤫᤠ᤺ᤳ ᤔᤧᤱᤄᤥᤛᤢᤴ॥ 23 ᤂᤧᤒᤩᤠᤱ ᤂᤧᤱᤜᤠ᤹ ᤔᤠᤖᤠ ᤔᤧᤵᤔᤏᤠᤒᤠᤍᤧᤴᤏᤥ ᤔᤧᤃᤧᤖᤧ ᤁᤖ ᤂᤧᤵᤔᤥᤒᤠ ᤆᤫᤠ᤺ᤳᤋᤡᤴ ᤛᤠᤰᤂᤡ᤺ᤰ ᤂᤡ᤺ᤰᤋᤧᤀᤠᤱ ᤜᤠ᤺ᤳᤗᤧᤀᤠᤱ ᤌᤢᤱᤔᤠ ᤔᤧᤴᤇᤢᤰᤋᤢᤴ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤋᤧᤴᤏᤡᤴ ᤔᤠᤖᤠ ᤔᤡᤱ ᤔᤧᤘᤠ᤺ᤳᤋᤢ॥ 24 ᤂᤧᤒᤩᤠᤱ ᤔᤏᤠᤜᤠ᤹ ᤔᤥᤛᤠᤴ ᤗᤧᤵᤔᤠᤱ ᤔᤧᤜᤡᤛᤡᤱᤅᤠᤱ ᤔᤏᤧᤎᤡᤰᤔᤠ ᤔᤧᤜᤣ᤺ᤰᤋᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤠᤸᤗ ᤀᤠᤏᤡᤃᤣ ᤌᤣ᤺ᤴ ᤌᤢᤅᤢᤶᤒᤧᤒᤠᤒᤣ᥅” 25 ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤴ ᤁᤢᤗᤢᤱᤔᤠ᤹ ᤁᤢᤛᤥ᤺ᤶᤔᤠᤗᤠᤶᤔᤣ ᤐᤣᤗᤡ ᤑᤠᤰᤋᤢ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤗᤳᤇᤠ ᤛᤡᤱᤓᤧᤸᤗᤧᤰ ᤌᤡᤰ ᤀᤥ᤺ᤴᤎᤠᤰᤋᤢ॥ ᤔᤥᤛᤠ᤺ᤸᤗᤧ ᤂᤧᤴ ᤛᤡᤱᤓᤧᤸᤗᤧᤰᤁᤡᤴ ᤆᤫᤠ᤺ᤳᤋᤥ ᤗᤠᤵᤑᤢᤛᤢ ᤁᤣ᤺ᤳᤋᤢ ᤂᤧᤒᤩᤠᤱ ᤆᤫᤠ᤺ᤳᤋᤡᤴ ᤌᤢᤱᤔᤠ ᤁᤧᤏᤢ᤹ᤒᤠ ᤐᤥ᤺ᤰᤂᤧ॥ ᤀᤠᤶᤓᤠ ᤂᤧᤴ ᤋᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤛᤠ᤹ᤔᤠᤖᤧ ᤗᤠᤃᤡ ᤁᤴ ᤌᤡᤶᤔᤡᤴ ᤏᤢ ᤀᤡᤱᤈᤠᤱᤅᤡᤴ ᤐᤡᤖᤢᤛᤡ॥ 26 ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤀᤠᤒᤠᤅᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤕᤧᤰᤕᤧᤰᤁᤠᤱ ᤁᤧᤄᤧᤵᤛᤢᤶ. ᤂᤢᤏᤧ᤹ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤁᤢᤍᤥ᤺ᤵᤔᤠ ᤆᤥᤰ ᤂᤧᤴ ᤁᤧᤈᤥᤃᤢᤶ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤡᤱᤈᤠᤱᤜᤠ᤹ ᤏᤡᤱᤘᤠ᤹ ᤁᤧᤒᤡᤖᤢᤶ. ᤂᤧᤒᤩᤠᤱ ᤂᤢᤏᤧ᤹ ᤁᤢᤎᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤍᤧᤴᤍᤡᤏᤧᤓᤃᤪ. ᤀᤠᤱᤃᤠ᤹ ᤔᤡᤛᤪᤡᤜᤠ᤹ᤖᤧ ᤂᤢᤏᤡ᤹ ᤛᤶᤎᤠᤱ ᤋᤠᤖᤢᤱᤒᤠ ᤋᤢᤰᤔᤠ ᤗᤠ᤺ᤰᤔᤠᤜᤠ᤹ ᤂᤡᤏᤡ᤹ ᤛᤶᤎᤠᤱ ᤗᤳᤇᤠᤀᤠᤱ ᤔᤧᤍᤠ᤺ᤳᤋᤠᤴ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤧᤘᤣ᤺ᤶᤒᤠ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠᤖᤥ॥” 27 ᤁᤢᤍᤠ᤺ᤴᤍᤡᤰᤔᤠ ᤂᤧᤱᤜᤠ᤹ ᤀᤣᤗᤡᤶᤔᤥ ᤔᤧᤃᤧᤖᤧ. ᤂᤧᤵᤔᤥ ᤌᤡᤒᤥᤱᤅᤠᤱ ᤏᤧᤳᤇᤡ ᤆᤫᤠ᤺ᤳ ᤘᤠᤒᤢᤴᤍᤠᤰᤜᤠ᤹ ᤏᤧᤛ᤻ᤛᤧ ᤜᤧᤰᤁᤩᤠᤱ ᤏᤢᤒᤥᤱ ᤂᤧᤒᤰᤛᤡᤱᤅᤡᤸᤗᤧ ᤁᤢᤒᤢᤱᤜᤠ᤹ ᤕᤢᤅᤧ॥ ᤜᤠᤒᤠ ᤂᤧᤴ ᤆᤫᤠ᤺ᤳᤜᤠ᤹ᤖᤧ ᤁᤢᤒᤣᤛᤠᤱ ᤂᤧᤱᤜᤠ᤹ᤖᤧ ᤛᤠ᤺ᤱᤃᤠᤜᤡᤶ ᤔᤧᤄᤡᤱᤄᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.