ᤗᤠᤶᤍᤡᤰ 14 - LIFOTNTᤀᤡᤛᤪᤠᤀᤡᤗᤡᤜᤠ᤹ᤖᤧ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤡᤴ ᤔᤧᤃᤠ᤺ᤰᤋᤢ 1 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤔᤡᤃ᤻ᤍᤥᤗ ᤏᤢ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤡᤸᤗᤧ ᤁᤢᤗᤢᤶᤔᤥ ᤁᤧᤏᤧᤒᤠ ᤐᤡ-ᤜᤜᤡᤖᤥᤋ ᤏᤡ᤺ᤳᤋᤠᤱ ᤕᤠᤱᤔᤧᤎᤥ᤺ᤰᤗ ᤜᤧᤰᤁᤩᤠᤱ ᤘᤖ᤺ᤱᤅᤡᤸᤗᤧ ᤁᤢᤒᤣᤛᤠᤱ ᤒᤠᤗ ᤛᤣᤑᤥᤏ ᤋᤃᤠᤱᤅᤣ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢᤀᤠᤱ ᤔᤧᤕᤢᤱᤗ ᤑᤠ᤹ᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤀᤡᤱᤈᤠᤱ ᤐᤡᤖᤧᤛᤧ᤹॥ 3 ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤀᤠᤶᤓᤠ ᤁᤴ ᤗᤠᤈᤣ᤹ᤀᤥ ᤋᤠᤰᤁᤴᤏᤢ ᤔᤧᤘᤠ᤹ ᤂᤧᤶᤒᤩᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤡᤸᤗᤧ ᤂᤧᤱᤜᤠ᤹ ᤛᤠᤰᤋᤢᤛᤡᤀᤠᤱ ᤔᤧᤘᤠ᤹ ᤑᤠ᤹ᤀᤠᤱ ᤑᤠᤖᤥᤸᤗᤧ ᤏᤡᤱᤘᤠ᤹ ᤀᤡ᤺ᤳᤋᤢ᤹॥ 4 ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤸᤗᤧ ᤁᤢᤏᤡᤱᤘᤠᤴ ᤜᤠᤍᤡᤱ ᤁᤧᤎᤰᤐᤠ ᤆᤥᤃᤢᤱ ᤐᤡᤖᤢᤱ᤹ ᤂᤧᤒᤩᤠᤱ ᤂᤧᤸᤗᤧ ᤂᤧᤱᤜᤠ᤹ ᤏᤠ᤺ᤳᤋᤢᤛᤡ᤹. ᤁᤖ ᤂᤧᤴ ᤏᤢ ᤂᤧᤸᤗᤧ ᤁᤢᤎᤰᤛᤢᤒᤠᤜᤠ᤹ ᤀᤠᤱᤃᤠ᤹ ᤏᤠ᤺ᤴᤍᤢᤱᤛᤡᤱ᤹ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤔᤡᤔᤡᤍᤡᤱ ᤔᤧᤒᤡᤀᤠ॥ ᤂᤧᤒᤩᤠᤱ ᤔᤡᤛᤪᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ᤀᤣ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢ᤹॥” ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤜᤧᤰᤁᤣᤀᤣ ᤔᤧᤈᤥᤃᤢ॥ 5 ᤀᤠᤸᤗ ᤀᤡᤛᤪᤠᤀᤡᤗᤡᤜᤠ᤹ ᤔᤧᤄᤧᤳᤇᤡᤱ ᤁᤧᤗ᤹ᤒᤠ ᤀᤡᤱᤄᤱᤅᤡᤴ ᤔᤡᤛᤪᤡᤜᤠ᤹ᤖᤧ ᤂᤢᤏᤡ᤹ ᤜᤠᤱᤅᤧᤀᤥ ᤁᤧᤖᤧ. ᤂᤧᤒᤩᤠᤱ ᤂᤢᤏᤧ᤹ ᤏᤢ ᤂᤢᤏᤧ᤹ ᤁᤢᤛᤢᤜᤠᤱᤃᤧᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤔᤧᤈᤥᤃᤢᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤠᤏᤡ᤹ ᤌᤧᤔᤠᤏᤡ ᤀᤠᤈᤥᤃᤢᤶᤒᤣ ᤜᤦ᥅ ᤀᤡᤛᤪᤠᤀᤡᤗᤡᤜᤠ᤹ ᤀᤠᤏᤡ᤹ ᤐᤣ᤺ᤰᤔᤠ ᤀᤠᤓᤠ᤺ᤰᤋᤢᤶᤛᤡᤶ ᤜᤧᤰᤁᤩᤠᤱ ᤀᤠᤏᤡ᤹ ᤛᤧᤘᤠᤖᤥᤒᤠ ᤛᤧᤘᤠᤖᤧᤔᤠᤜᤠ᤹ ᤀᤠᤗᤧᤖᤢᤶ ᤀᤠᤍᤣᤛᤢᤶᤛᤡᤶ᥄” 6 ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤀᤴᤗᤠᤎᤠᤴ ᤏᤢ ᤁᤢᤎᤰᤛᤢᤒᤠᤜᤠ᤹ ᤕᤠᤖᤡᤵ ᤆᤥᤃᤢᤛᤡ॥ 7 ᤂᤢᤏᤧ᤹ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᥌᥆᥆ ᤀᤴᤗᤠᤎᤠᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤐᤣᤒᤠᤜᤠ᤹ᤏᤢ ᤛᤥᤛᤥᤖᤡᤰ ᤔᤡᤛᤪᤒᤠ ᤘᤣ᤹ ᤁᤧᤖᤧᤰ ᤀᤴᤗᤠᤎᤠᤜᤠ᤹ ᤕᤠᤱᤛᤡᤱᤅᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤣᤃᤠᤱ ᤌᤠᤛᤡᤱ॥ 8 ᤕᤜᤘᤣ ᤍᤠᤱᤒᤠᤸᤗᤧ ᤜᤠᤱᤅᤡᤴ ᤁᤢᤏᤡᤱᤘᤠ᤹ ᤜᤠᤍᤡᤱ ᤁᤧᤎᤰᤐᤠ ᤆᤥᤃᤢ ᤜᤧᤰᤁᤩᤠᤱ ᤂᤧᤸᤗᤧ ᤌᤱ ᤁᤧᤏᤠ᤺ᤶᤒᤠ ᤜᤧᤰᤁᤣ ᤁᤧᤒᤣ᤺ᤰᤐᤠᤖ ᤁᤧᤒᤵᤐᤠ ᤀᤡᤛᤪᤠᤀᤡᤗᤡᤜᤠ᤹ ᤏᤠ᤺ᤳᤋᤢᤛᤡ॥ 9 ᤂᤧᤒᤩᤠᤱ ᤔᤡᤛᤪᤡᤜᤠ᤹ᤖᤧ. ᤑᤠᤖᤥᤸᤗᤧ ᤁᤧᤖᤧᤰ ᤁᤢᤀᤴ. ᤁᤢᤀᤴᤗᤠᤎᤠ ᤂᤢᤏᤧ᤹ ᤁᤢᤀᤴ ᤁᤧᤗᤥᤱᤒᤠᤜᤠ᤹ ᤏᤢ ᤁᤢᤎᤰᤛᤢᤒᤠᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤏᤠ᤺ᤳᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤡ-ᤜᤜᤡᤖᤥᤋᤖᤧ ᤁᤢᤒᤣᤛᤠᤱ ᤒᤠᤗ ᤛᤣᤑᤥᤏ ᤋᤃᤡ ᤗᤧᤵᤔᤠᤱ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤛᤠ᤺ᤱᤃᤠᤜᤡᤶ ᤔᤧᤗᤣ᤺ᤳᤋᤢᤀᤠᤱ ᤕᤠᤱᤔᤧᤎᤥ᤺ᤰᤋᤧᤒᤠᤍᤧᤴᤏᤥ ᤔᤧᤛᤡ᤹ᤖᤢᤛᤡ॥ 10 ᤔᤡᤛᤪᤒᤠ ᤜᤠᤱᤅᤡᤴ ᤏᤢ ᤌᤰᤛᤢᤒᤠᤜᤠ᤹ ᤂᤢᤴᤇᤡ᤹ ᤗᤧᤵᤔᤠᤱ ᤔᤧᤓᤧᤖᤧᤒᤠ ᤔᤧᤏᤡᤛᤢᤛᤡᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧ ᤜᤧᤰᤁᤩᤠᤱ ᤀᤠᤓᤠ᤹ᤖᤧ᤹ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤔᤧᤓᤠᤰᤋᤢ॥ 11 ᤂᤧᤱᤜᤠ᤹ᤖᤧ ᤔᤥᤛᤠᤴ ᤔᤧᤔᤧᤳᤋᤢ. “ᤌᤣ ᤔᤡᤛᤪ ᤗᤠᤈᤣ᤹ᤀᤥ ᤀᤡᤐᤢᤱ ᤔᤧᤏᤧᤛ᤻ᤛᤧᤴᤒᤡ᥅ ᤌᤣ ᤂᤧᤏᤧ᤹ ᤀᤠᤏᤡᤃᤣ ᤁᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤛᤡᤛᤧ ᤕᤠᤵᤔᤡ ᤁᤧᤓᤧᤳᤋᤧᤒᤠᤒᤡ᥅ ᤔᤡᤛᤪᤗᤠᤶᤒᤠ ᤀᤠᤏᤡᤃᤣ ᤕᤠᤵᤔᤡ ᤁᤧᤗ᤺ᤳᤋᤧ ᤁᤧᤓᤧᤳᤋᤧᤀᤠᤱ ᤀᤠᤸᤗ ᤀᤠᤏᤡᤃᤣ ᤕᤠᤵᤔᤡ ᤌᤣ ᤁᤧᤔᤧᤳᤋᤧᤒᤠᤒᤣ᥅ 12 ᤀᤰᤂᤣᤀᤣ ᤐᤥᤱ᤹ ᤑᤠ᤹ᤀᤠᤱ ᤀᤠᤏᤡᤃᤣ ᤌᤣ ᤔᤡᤛᤪᤀᤥ ᤘᤕᤡᤃᤧᤸᤗᤧᤛᤠ ᤋᤃᤡᤀᤣ ᤐᤠ᤺ᤳᤋᤢᤶᤒᤧᤒᤠ ᤜᤥ᤺ᤵᤋᤧᤒᤡ᥅ ᤀᤠᤏᤡᤃᤣ ᤀᤠᤗᤧᤖᤧ᤹ ᤜᤧᤰᤁᤩᤠᤱ ᤔᤡᤛᤪᤡᤜᤠ᤹ᤖᤧ ᤂᤢᤴᤇᤡ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤀᤣ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤖ ᤑᤠ᤹ᤀᤠᤱ ᤀᤠᤏᤡᤃᤣ ᤂᤧᤏᤧ᤹ ᤋᤃᤡᤀᤣ ᤔᤧᤳᤋᤠᤛᤡᤃᤧᤀᤠᤱ ᤘᤕᤡᤃᤧ॥ ᤁᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤛᤡᤔᤠᤏᤢ᤺ᤸᤗᤧᤃ ᤂᤧᤴ ᤔᤡᤛᤪ ᤗᤠᤈᤣ᤹ᤀᤥ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤐᤥᤱᤔᤠᤀᤠᤱ ᤘᤠ᤹ᤔᤠᤀᤣ ᤏᤢᤒᤠ ᤐᤥ᤺ᤰᤂᤧᤒᤠ ᤘᤕᤧ॥” 13 ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤔᤧᤃᤡᤛᤧᤶᤔᤡᤴᤏᤧ᤹. ᤜᤠᤱᤜᤠᤱ ᤗ᤹ᤖᤧᤶᤔᤧ᤹. ᤜᤧᤰᤁᤩᤠᤱ ᤀᤠᤀᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤋᤠᤱᤃᤧᤛᤧ᤺ᤵᤋᤡᤒᤠᤴ ᤀᤥᤔᤧᤳᤋᤧᤶᤔᤧ᤹॥ ᤂᤡᤏᤡ᤹ ᤀᤠᤀᤡᤴ ᤁᤧᤏᤡᤛᤢᤶᤛᤡᤶᤒᤠ ᤁᤴ ᤔᤡᤛᤪᤡᤜᤠ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤁᤧᤴᤏᤡᤛᤢᤶᤛᤡᤶᤔᤡᤴ᤹॥ 14 ᤕᤜᤘᤣ ᤍᤠᤱᤒᤠᤴ ᤂᤡᤏᤡ᤹ ᤗᤠᤃᤡ ᤋᤧᤴᤎᤱ ᤆᤥᤰ. ᤂᤡᤏᤡ᤹ ᤛᤫᤠ᤺ᤳ ᤕᤢᤅᤧᤶᤔᤧ᤹॥” 15 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤠᤓᤠ᤹ᤖᤧ ᤑᤠ᤹ᤀᤠᤱ ᤂᤡᤏᤡ᤹ ᤀᤠᤱᤃᤠ᤹ ᤌᤣᤀᤠᤱ ᤕᤠᤵᤔᤡ ᤐᤣᤗᤡ ᤁᤧᤓᤠᤰᤋᤡᤒᤠᤒᤣ᥅ ᤔᤏᤠᤜᤠ᤹ ᤋᤃᤡ ᤐᤣᤃᤧᤶᤔᤧ᤹ ᤔᤧᤳᤋᤧᤛᤧ᤹॥ 16 ᤂᤧᤏᤧ᤹ ᤁᤧᤍᤰᤁᤠ᤺ᤳᤋᤡᤴ ᤑᤥ᤺ᤰᤂᤧ᤹ᤀᤠᤱ ᤘᤖ᤺ᤱᤅᤡᤸᤗᤧ ᤁᤢᤛᤶᤎᤠᤱ ᤛᤴᤇᤧ᤹॥ ᤆᤫᤠ᤺ᤳᤋᤡᤴ ᤁᤢᤗᤰ ᤏᤧᤳᤇᤡ ᤐᤥᤱᤅᤠᤱ ᤀᤣ᤹ᤀᤣ ᤛᤧᤴ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤛᤧᤱᤛᤧᤱᤒᤠ ᤂᤠᤶᤒᤠᤱᤅᤥ ᤘᤖ᤺ᤱᤅᤡᤸᤗᤧ ᤁᤢᤗᤢᤶᤔᤥ ᤐᤥᤱᤔᤠᤀᤠᤱ ᤐᤣ᤺ᤰᤔᤠ ᤔᤧᤛᤢᤰ॥ 17 ᤀᤠᤱᤃᤠ᤹ ᤔᤡᤛᤪᤡᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤁᤧᤈᤡ᤺ᤵᤐᤠ ᤆᤥᤃᤢᤱ ᤐᤡᤖᤢᤱᤛᤡᤱᤅᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤋᤃᤡ ᤔᤧᤎᤠᤱ ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤠᤶᤔᤥ ᤜᤠᤱᤅᤡᤴ ᤏᤢ ᤂᤧᤸᤗᤧ ᤁᤢᤎᤰᤛᤢᤒᤠᤜᤠ᤹. ᤀᤴᤗᤠᤜᤠ᤹ ᤏᤢ ᤀᤴ ᤁᤧᤗᤥᤱᤒᤠᤜᤠ᤹ ᤏᤠ᤺ᤴᤍᤢᤱᤛᤡᤱᤅᤠᤱ ᤀᤠᤱᤃᤠ᤹ ᤀᤠᤔᤡᤔᤡᤍᤡᤱᤅᤡᤴ ᤑᤥᤛᤢᤱ᤹॥ 18 ᤀᤠᤸᤗ ᤀᤠᤱᤃᤠ᤹ ᤔᤡᤛᤪᤡᤜᤠ᤹ ᤏᤠ᤺ᤴᤍᤢᤱᤛᤡᤱ᤹. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢ᤹॥” 19 ᤂᤧᤒᤩᤠᤱ ᤀᤡᤛᤪᤠᤀᤡᤗᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤠᤱ ᤋᤃᤠᤱ ᤗᤠᤱᤃᤧᤄᤣ᤺ᤰᤐᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤴ ᤆᤳᤇᤡᤱᤅᤠᤱ ᤂᤢᤴᤇᤡ᤹ ᤀᤣᤃᤠᤱ ᤗᤧᤵᤔᤠᤱ ᤐᤣ. ᤜᤧᤰᤁᤩᤠᤱ ᤂᤠ᤹ᤔᤡᤳ ᤛᤡᤳᤗᤠᤱᤅᤡᤴ ᤋᤃᤡᤗᤠᤶᤒᤠ ᤆᤳᤇᤡᤱᤅᤠᤱ ᤂᤢᤴᤇᤡ᤹ ᤀᤣᤃᤠᤱ ᤗᤧᤵᤔᤠᤱ ᤕᤧᤶᤛᤡᤱ॥ 20 ᤂᤧᤴ ᤔᤡᤛᤪᤒᤠ ᤌᤰᤛᤢᤒᤠᤜᤠ᤹ ᤏᤢ ᤀᤡᤛᤪᤠᤀᤡᤗᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤕᤧᤶᤛᤡᤱ॥ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤂᤠ᤹ᤔᤡ᤺ᤳᤋᤡᤸᤗᤧ ᤔᤡᤛᤪᤡᤜᤠ᤹ ᤗᤧᤵᤔᤠᤱ ᤂᤠᤎᤠᤔᤧᤖ ᤆᤥᤃᤢ ᤁᤖ ᤀᤡᤛᤪᤠᤀᤡᤗᤡᤜᤠ᤹ ᤗᤧᤵᤔᤠᤱ ᤂᤠᤀᤥ᤺ᤳᤋᤧᤖ ᤆᤥᤃᤢ॥ ᤁᤶᤓᤗ᤹ᤖᤡᤰ ᤔᤡᤛᤪᤡᤜᤠ᤹ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤏᤡ᤺ᤳᤋᤠᤱ ᤋᤠᤔᤠ ᤑᤧᤶᤔᤠ ᤔᤧᤴᤇᤢᤰᤋᤧᤴ॥ 21 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤁᤢᤜᤢᤰᤁᤡᤴ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤡᤸᤗᤧ ᤁᤢᤛᤶᤎᤠᤱ ᤛᤴᤇᤢ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤏᤠᤱᤃᤧᤴ ᤐᤡᤛᤠᤱᤗᤠᤶ ᤛᤠ᤹ᤖᤡᤰ ᤕᤶᤒᤠ ᤛᤢᤖᤡᤳ ᤁᤣᤈᤱ ᤜᤢᤛᤧᤖ ᤕᤠ᤺ᤴᤍᤢ. ᤜᤧᤰᤁᤩᤠᤱ ᤘᤖ᤺ᤱᤅᤡᤴ ᤀᤣᤃᤠᤱ ᤏᤢ᤺ᤰᤂᤧᤒᤣᤖ ᤆᤥᤃᤢᤀᤠᤱ ᤆᤫᤠ᤺ᤳᤋᤧᤴ ᤁᤢᤗᤢᤶᤔᤥ ᤛᤧᤴᤇᤡᤱ ᤜᤧᤰᤁᤩᤠᤱ ᤘᤖ᤺ᤱᤅᤡᤴ ᤛᤧᤱᤛᤧᤱᤒᤠ ᤂᤠᤶᤒᤠᤱ ᤐᤥ᤺ᤰᤂᤧ॥ 22 ᤀᤡᤛᤪᤠᤀᤡᤗᤡᤜᤠ᤹ ᤘᤖ᤺ᤱᤅᤡᤸᤗᤧ ᤁᤢᤗᤢᤶᤔᤥᤗᤠᤶᤒᤠ ᤛᤧᤱᤛᤧᤱᤒᤠ ᤂᤠᤶᤒᤠᤱᤅᤥ ᤗᤠᤱᤔᤧᤄᤣᤃᤧᤀᤠᤱ ᤔᤧᤒᤣ. ᤜᤧᤰᤁᤩᤠᤱ ᤆᤢᤰᤘᤠ ᤏᤢ ᤑᤧᤱᤘᤠ ᤗᤧᤵᤔᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤆᤫᤠ᤺ᤳᤋᤡᤴ ᤗᤢᤱᤎᤠᤰ ᤐᤥ᤺ᤰᤂᤧᤀᤠᤱ ᤕᤧᤒᤧ॥ 23 ᤔᤡᤛᤪᤡᤜᤠ᤹. ᤑᤠᤖᤥᤸᤗᤧ ᤁᤢᤀᤴᤜᤠ᤹. ᤂᤢᤏᤧ᤹ ᤁᤢᤀᤴᤗᤠᤎᤠᤜᤠ᤹ ᤏᤢ ᤀᤴᤃᤧᤗᤥᤱᤒᤠᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤏᤠ᤺ᤳᤋᤢᤛᤡᤀᤠᤱ ᤘᤖ᤺ᤱᤅᤥ ᤔᤧᤗᤠᤛᤧ॥ 24 ᤋᤠᤏᤠᤶ ᤂᤠᤀᤥ᤺ᤵᤔᤠᤏᤢ᤺ᤸᤗᤧ ᤋᤃᤡ ᤔᤡ ᤏᤢ ᤂᤠ᤹ᤔᤡᤳ ᤛᤡᤳᤗᤠᤱᤗᤠᤶᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤔᤡᤛᤪᤡ ᤌᤰᤛᤢᤒᤠᤜᤠ᤹ ᤀᤥᤔᤧᤳᤋᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤔᤧᤕᤰᤂᤧ॥ 25 ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤴᤗᤠᤎᤠ ᤁᤠᤵᤗᤥ᤺ᤰᤜᤠ᤹ ᤗᤧᤰᤘᤠᤀᤥ ᤜᤢᤶᤛᤢ ᤐᤡᤖᤢᤛᤡ ᤜᤧᤰᤁᤩᤠᤱ ᤂᤧᤴ ᤁᤠᤵᤗᤥ᤺ᤰᤜᤠ᤹ ᤜᤠᤵᤋᤢ॥ ᤛᤠ᤹ᤖᤡᤰ ᤛᤠᤰᤋᤧᤖ ᤀᤴᤗᤠᤎᤠᤜᤠ᤹ ᤔᤢᤶᤔᤠ ᤜᤣ᤺ᤰᤋᤧ ᤜᤧᤰᤁᤩᤠᤱ ᤔᤡᤛᤪᤡᤜᤠ᤹ ᤀᤰᤂᤣ ᤗ᤹ᤔᤠ ᤔᤧᤜᤣ᤺ᤰᤋᤧ. “ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤕᤜᤘᤣ ᤍᤠᤱᤒᤠᤴ ᤀᤠᤏᤡ᤹ᤏᤢ ᤌᤱ ᤆᤥ᤺ᤰᤗ ᤐᤳ॥ ᤀᤠᤏᤡ᤹ ᤁᤵᤔᤥᤗᤠᤶ ᤗ᤺ᤴᤍᤡ᥄” 26 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤜᤢᤰᤁᤡᤴ ᤘᤖ᤺ᤱᤅᤡᤸᤗᤧ ᤁᤢᤛᤶᤎᤠᤱ ᤛᤴᤇᤧ᤹ ᤜᤧᤰᤁᤩᤠᤱ ᤔᤡᤛᤪᤡᤜᤠ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤴᤗᤠᤎᤠ ᤏᤢ ᤀᤴᤃᤧᤗᤥᤱᤒᤠᤜᤠ᤹ ᤛᤶᤎᤠᤱ ᤂᤧᤴ ᤆᤫᤠ᤺ᤳᤋᤡᤴ ᤕᤠᤶᤔᤥ ᤁᤢᤱ ᤕᤢᤖ॥” 27 ᤔᤥᤛᤠ᤺ᤸᤗᤧ ᤁᤢᤜᤢᤰᤁᤡᤴ ᤘᤖ᤺ᤱᤅᤡᤸᤗᤧ ᤁᤢᤛᤶᤎᤠᤱ ᤛᤴᤇᤢ ᤜᤧᤰᤁᤩᤠᤱ ᤋᤠᤏᤠᤶ ᤂᤠᤀᤥ᤺ᤳᤋᤧᤸᤗᤧ ᤆᤫᤠ᤺ᤳᤋᤡᤴ ᤋᤃᤡᤒᤠ ᤁᤢᤗᤠᤱᤄᤣ᤺ᤰᤔᤠᤍᤧᤴᤏᤥ ᤕᤠᤶᤔᤥ ᤏᤢ᤺ᤰᤂᤧ ᤕᤧ॥ ᤔᤡᤛᤪᤡᤜᤠ᤹ ᤆᤫᤠ᤺ᤳᤋᤥᤗᤠᤶᤒᤠ ᤂᤧᤳᤇᤡᤱᤔᤠ ᤔᤧᤃᤥ᤺ᤳᤋᤧ ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤆᤫᤠ᤺ᤳᤋᤥᤀᤣ ᤗᤠᤵᤑᤢᤛᤢ ᤁᤣ᤺ᤳᤋᤢᤛᤡ॥ 28 ᤆᤫᤠ᤺ᤳᤋᤡᤴ ᤏᤢ᤺ᤰᤂᤧᤀᤠᤱ ᤕᤧ. ᤀᤴᤗᤠᤎᤠᤜᤠ᤹. ᤀᤴᤃᤧᤗᤥᤱᤒᤠᤜᤠ᤹ ᤏᤢ ᤀᤡᤛᤪᤠᤀᤡᤗᤡᤜᤠ᤹ ᤁᤧᤏᤠ᤺ᤵᤐᤠᤖ ᤘᤖ᤺ᤱᤅᤥ ᤁᤧᤗᤠ᤺ᤵᤐᤠ ᤁᤧᤖᤧᤰ ᤔᤡᤛᤪᤡ ᤌᤰᤛᤢᤒᤠᤜᤠ᤹ ᤔᤧᤜᤢᤔᤧ ᤔᤧᤗᤠᤛᤧ ᤗᤳᤇᤠᤀᤠᤱ ᤔᤧᤴᤜᤡᤅᤧᤴ॥ 29 ᤁᤖ ᤀᤡᤛᤪᤠᤀᤡᤗᤡᤜᤠ᤹ᤃ ᤘᤖ᤺ᤱᤅᤡᤸᤗᤧ ᤁᤢᤗᤢᤶᤔᤥᤗᤠᤶ ᤛᤧᤱᤛᤧᤱᤒᤠ ᤂᤠᤶᤒᤠᤱᤅᤥ ᤗᤠᤱᤔᤧᤄᤣᤃᤧᤀᤠᤱ ᤔᤧᤒᤣ॥ ᤆᤫᤠ᤺ᤳᤋᤡᤴ ᤂᤢᤴᤇᤡ᤹ ᤆᤢᤰᤘᤠ ᤏᤢ ᤑᤧᤱᤘᤠ ᤗᤧᤵᤔᤠᤱ ᤗᤢᤱᤎᤠᤰ ᤐᤥ᤺ᤰᤂᤧ॥ 30 ᤂᤧᤴ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤋᤠᤱᤛᤧ᤺ᤵᤋᤢᤛᤡ॥ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤡᤸᤗᤧ ᤁᤢᤕᤠ ᤁᤢᤗᤧ᤺ᤶ ᤔᤡᤛᤪᤡᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤏᤧᤛ᤻ᤛᤧᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤏᤡᤛᤢ॥ 31 ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤐᤕᤶ ᤕᤶᤒᤠ ᤁᤢᤔᤢᤰᤛᤠᤶᤔᤡᤸᤗᤧ ᤔᤡᤛᤪᤡᤜᤠ᤹ ᤏᤠ᤺ᤴᤍᤢᤛᤡᤒᤠ ᤔᤧᤏᤡᤛᤢᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤕᤜᤘᤣ ᤍᤠᤱᤒᤠᤴᤏᤢ ᤔᤧᤃᤡᤛᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤏᤢ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠ ᤔᤥᤛᤠᤴ ᤏᤠᤔᤧᤛᤠ᤹ᤖᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.