ᤗᤠᤶᤍᤡᤰ 13 - LIFOTNTᤋᤢᤶᤒᤠ ᤛᤠᤜᤠ᤹ ᤔᤧᤍᤥᤴᤍᤢᤛᤡ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤋᤃᤡ ᤛᤠᤃᤧᤘᤠ᤺ᤴᤇᤡᤱᤒᤠ ᤁᤧᤖᤧᤰ ᤀᤅᤧ᤺ᤰᤘᤠᤜᤠ᤹ ᤏᤢ ᤐᤡᤳ ᤌᤰᤛᤠᤜᤠ᤹ᤖᤧ ᤔᤧᤎᤠᤵᤋᤢᤛᤡᤒᤠ ᤐᤡᤳᤛᤠᤳᤜᤠ᤹ ᤀᤠᤱᤃᤠ᤹ᤀᤥ ᤋᤥ᤺ᤴᤍᤧᤶᤛᤡᤶᤔᤧ᤹ ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤋᤢᤶᤒᤠ ᤛᤠᤜᤠ᤹ ᤏᤢ ᤐᤡᤳ ᤌᤰᤛᤠᤜᤠ᤹ᤖᤧ ᤔᤧᤎᤠᤵᤋᤢᤛᤡᤒᤠ ᤌᤡᤰᤛᤡᤃᤣᤰᤐᤠ ᤐᤡᤳᤛᤠᤳᤜᤠ᤹ ᤀᤠᤱᤃᤠ᤹ᤀᤧᤴᤇᤡᤖᤥ॥” ᤁᤠ᤺ᤰᤔᤠᤀᤠᤱ ᤗᤧᤵᤔᤏᤠᤒᤠ ᤋᤱᤏᤠᤶ 3 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤒᤠ ᤔᤡᤛᤪ ᤗᤠᤈᤣᤴ ᤁᤧᤗᤧᤖᤢᤶᤔᤠᤱ ᤁᤧᤓᤧᤖᤡᤒᤠ ᤁᤴ ᤕᤧᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹॥ ᤁᤸᤗᤧ ᤕᤠ᤺ᤴᤍᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤐᤕᤶ ᤕᤶᤒᤠ ᤁᤢᤔᤢᤰᤛᤠᤶᤔᤡᤸᤗᤧ ᤂᤡᤏᤡ᤹ ᤁᤧᤗ᤺ᤳᤋᤡ ᤁᤧᤓᤧᤳᤋᤡ॥ ᤁᤸᤗᤧ ᤕᤠ᤺ᤴᤍᤡᤰ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱᤖᤰ ᤂᤡᤏᤡ᤹ ᤆᤧᤶᤔᤧ᤹॥ 4 ᤀᤒᤡᤒ ᤔᤧᤵᤔᤏᤠ ᤗᤠᤀᤥᤒᤠ ᤀᤠᤀᤡᤴᤗᤧ ᤕᤠ᤺ᤴᤍᤡᤰ ᤂᤡᤏᤡ᤹ ᤔᤡᤛᤪ ᤗᤠᤈᤣᤴ ᤁᤧᤗᤧᤖᤢᤶᤔᤠᤱ ᤁᤧᤒᤡᤃᤡᤖ ᤁᤧᤒᤳᤇᤡ᤹॥ 5 ᤕᤜᤘᤣ ᤍᤠᤱᤒᤧᤸᤗᤧ ᤁᤏᤠᤏᤡ. ᤜᤡᤳᤋᤡ. ᤀᤣᤔᤥᤖᤡ ᤏᤢ ᤕᤒᤢᤛᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ ᤐᤡᤔᤠᤛᤡ ᤔᤠᤱᤜᤢᤵ ᤆᤥᤃᤢᤀᤠᤱ ᤘᤠ᤹॥ ᤀᤠᤸᤗ ᤂᤢᤏᤧ᤹ ᤂᤡᤏᤡ᤹ ᤂᤧᤴ ᤕᤠᤱᤛᤠᤁᤢᤴᤎᤣᤒᤠ ᤏᤢ ᤆᤠ ᤁᤧᤏᤢ᤹ᤒᤠ ᤗᤠᤈᤣ᤹ᤀᤥ ᤁᤧᤃᤧᤳᤋᤡ᤹. ᤂᤧᤒᤩᤠᤱ ᤂᤡᤏᤡ᤹ ᤋᤱᤒᤣ ᤌᤰᤔᤠ ᤌᤡᤰᤛᤡᤃᤣᤰᤐᤠ ᤗᤠᤀᤥ ᤁᤴ ᤋᤱᤏᤠᤶᤔᤡᤴ ᤋᤥᤛᤧᤶᤔᤧ᤹॥ 6 ᤏᤢᤛᤡ ᤕᤧᤴ ᤌᤠᤖᤡᤰ ᤂᤡᤏᤡ᤹ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤆᤧᤶᤔᤧ᤹ ᤏᤢᤛᤡ ᤕᤧᤴ ᤁᤧᤳᤋᤡᤸᤗᤧ ᤕᤠ᤺ᤴᤍᤡᤰ ᤕᤜᤘᤣ ᤍᤠᤱᤒᤧᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤧᤶᤔᤧ᤹ᤖ ᤁᤴ ᤋᤱᤏᤠᤶᤔᤡᤴ ᤋᤥᤛᤧᤶᤔᤧ᤹॥ 7 ᤂᤧᤴ ᤏᤢᤛᤡ ᤕᤧᤴ ᤌᤠᤖᤡᤰ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤔᤏᤠᤒᤠ ᤂᤖᤧ᤺ᤱᤖᤰ ᤆᤠᤶᤔᤧ᤹. ᤂᤡᤏᤡ᤹ ᤗᤠᤈᤣ᤹ᤀᤥᤒᤠ ᤀᤡ᤺ᤴᤍᤥᤜᤠ᤹ᤀᤥ ᤁᤧᤓᤱᤒᤠ ᤛᤡᤍᤠ᤹ ᤁᤧᤕᤠᤰᤐᤠ ᤐᤠᤴ ᤏᤢ ᤁᤧᤓᤱᤒᤠ ᤛᤡᤍᤠ᤹ ᤌᤧᤔᤠᤀᤠᤱ ᤏᤡᤎᤠ᤺ᤵᤔᤠ ᤔᤧᤏᤢ᤹ᤏᤧᤴ॥ 8 ᤂᤧᤸᤗᤧ ᤕᤠ᤺ᤴᤍᤡᤰ ᤂᤡᤏᤡ᤹ ᤛᤠᤜᤠ᤹ ᤀᤰᤂᤣᤗ᤹ᤖᤡᤰ ᤆᤧᤰᤋᤧᤶᤛᤡᤶᤔᤧ᤹. ‘ᤀᤠᤱᤃᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤗ᤺ᤴᤍᤠᤱ ᤑᤧᤖᤠᤱᤅᤡᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤠᤗᤠᤃᤡ ᤌᤣ ᤆᤥᤃᤢᤀᤠᤱ ᤘᤕᤧ. ᤀᤠᤶᤓᤠ ᤂᤧᤸᤗᤧ ᤗᤠᤃᤡ ᤀᤠᤱᤃᤠ᤹ ᤁᤴ ᤆᤥᤃᤢᤱᤒᤠᤖᤥ॥’ 9 ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤔᤢᤰᤛᤠᤶᤒᤠ ᤁᤢᤜᤢᤰᤁᤡᤸᤗᤧ ᤔᤡᤛᤪ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤁᤧᤗ᤺ᤳᤋᤡ ᤁᤧᤓᤧᤳᤋᤡᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤋᤥ᤺ᤶᤔᤏᤠᤒᤠ ᤋᤱᤏᤠᤶᤔᤡᤴ ᤂᤡᤏᤡ᤹ ᤏᤡᤱᤘᤠ᤹ᤛᤢᤶ ᤁᤧᤔᤧᤵᤐᤠ ᤐᤥᤱᤗ ᤑᤠ᤹ᤀᤠᤱ ᤂᤢᤏᤧ᤹ ᤁᤧᤖᤧᤰ ᤁᤢᤎᤡᤶᤜᤠ᤹ ᤂᤡᤏᤡ᤹ ᤔᤢᤖᤠᤀᤥ ᤋᤠᤔᤠᤀᤠᤱ ᤐᤵᤔᤠᤖᤧ ᤗᤠᤃᤡ ᤁᤴ ᤂᤡᤏᤡ᤹ ᤗᤠᤃᤡ ᤗᤳᤇᤠ ᤔᤡᤰᤛᤣᤴ ᤜᤢᤰᤁᤥ ᤏᤢ ᤋᤫᤠᤒᤥ ᤐᤳᤗ॥ 10 ᤋᤱᤒᤣ ᤌᤰᤔᤠ ᤁᤢᤍᤥᤰ ᤁᤧᤒᤥᤱᤒᤠ ᤕᤧᤶᤔᤥ ᤂᤡᤏᤡ᤹ ᤁᤴ ᤋᤱᤏᤠᤶᤔᤡᤴ ᤋᤥᤛᤧᤶᤔᤧ᤹ᤀᤥ॥ ᤋᤃᤡ ᤛᤠᤃᤧᤘᤠ᤺ᤴᤇᤡᤱᤒᤠᤜᤠ᤹ 11 “ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤁᤏᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤁᤧᤃᤧᤳᤋᤡ᤹॥ ᤂᤢᤏᤧ᤹ ᤂᤧᤴ ᤗᤠᤈᤣᤴ ᤂᤡᤏᤡ᤹ ᤏᤢ ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ ᤐᤡᤔᤠᤛᤡ ᤔᤠᤱᤜᤢᤵ ᤆᤥᤃᤢᤀᤠᤱ ᤘᤠ᤹॥ ᤀᤠᤸᤗ ᤂᤧᤴ ᤗᤠᤈᤣᤴ ᤂᤡᤏᤡ᤹ ᤁᤧᤄᤥᤛᤢᤶ᤹. 12 ᤂᤧᤒᤩᤠᤱ ᤂᤡᤏᤡ᤹ ᤀᤠᤒᤠᤅᤣ ᤀᤠᤒᤠᤅᤣ ᤋᤢᤶᤒᤠ ᤛᤠᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤁᤧᤍᤥ᤺ᤶᤍᤢᤶᤛᤡᤶᤗ ᤐᤥᤱ᤹॥ ᤂᤡᤏᤡ᤹ ᤌᤰᤛᤠᤜᤠ᤹ᤖᤧ ᤔᤧᤎᤠᤵᤋᤢᤛᤡᤒᤠ ᤋᤃᤡᤒᤠ ᤁᤢᤶᤒᤠᤒᤠ ᤌᤰᤛᤠ ᤆᤩᤠ᤺ᤰᤜᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧᤴᤏᤣ ᤔᤧᤒᤥᤱ᤹॥ 13 ᤁᤖ ᤀᤍᤱᤅᤡᤸᤗᤧ ᤋᤃᤡᤒᤠ ᤁᤢᤛ᤻ᤛᤠ ᤀᤍᤱᤈᤩᤠ᤺ᤰᤁᤡᤴ ᤔᤧ᤺ᤴᤍᤛᤠ᤺ᤳᤋᤡᤸᤗᤧ ᤌᤧ᤹ᤔᤠ ᤐᤥᤱ᤹॥ ᤀᤍᤱᤅᤡᤴ ᤂᤧᤏᤡ᤹ ᤌᤧ᤹ᤔᤠ ᤏᤡᤱᤘᤠ᤹ ᤜᤥᤵᤏᤧᤓᤃᤪ ᤂᤧᤸᤗᤧ ᤁᤢᤏᤡᤃᤡ᤺ᤱᤔᤠᤴ ᤀᤧᤰᤂᤧᤶ ᤐᤡᤖᤧᤶᤔᤧ᤹॥ ᤂᤡᤏᤡ᤹ ᤀᤠᤒᤠᤅᤣ ᤀᤠᤒᤠᤅᤣ ᤋᤢᤶᤒᤠ ᤛᤠᤜᤠ᤹ ᤁᤢᤔᤧᤸᤗᤢᤱ ᤜᤢᤱᤔᤠᤀᤠᤱ ᤌᤧ᤹ᤔᤠᤛᤡ ᤐᤥᤱ᤹॥ 14 “ᤋᤠ᤺ᤴᤍᤡ ᤁᤧᤍᤠᤒᤠ ᤕᤧᤶᤔᤥ ᤂᤡᤏᤡ᤹ ᤛᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤌᤣᤀᤠᤱ ᤀᤰᤂᤣ ᤁᤧᤈᤥᤃᤢᤶᤒᤠᤒᤣ ᤑᤠ᤹ᤀᤠᤱ ᤛᤧ᤺ᤴᤁᤧᤶᤍᤥᤛᤡᤏᤧᤓᤃᤪ ᤂᤡᤏᤡ᤹ ᤀᤰᤂᤣ ᤔᤧᤳᤋᤧᤶᤛᤡᤶᤔᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡᤃᤣ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤒᤠ ᤔᤡᤛᤪ ᤗᤠᤈᤣ᤹ᤗᤠᤶᤒᤠ ᤂᤢᤏᤧ᤹ ᤔᤢᤰᤛᤠᤶᤛᤠᤒᤠ ᤁᤢᤜᤢᤰᤁᤡᤸᤗᤧ ᤗ᤺ᤳᤋᤡᤃᤧ ᤑᤧᤳᤋᤡᤃᤧ॥ 15 ᤑᤠᤖᤥᤴ ᤜᤠᤍᤡᤱ ᤁᤧᤎᤰᤐᤠ ᤐᤥ᤺ᤰᤂᤧᤀᤠᤱ ᤀᤠᤏᤡᤃᤣ ᤔᤧᤗᤧᤖᤡᤃᤧᤴᤏᤡᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤔᤡᤛᤪᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤒᤠ ᤛᤠᤜᤠ᤹ ᤏᤢ ᤌᤰᤛᤠᤜᤠ᤹ᤖᤧ ᤋᤃᤡ ᤔᤧᤎᤠᤵᤋᤢᤛᤡᤒᤠ ᤁᤢᤶᤒᤠᤒᤠ ᤌᤰᤛᤠᤜᤠ᤹ ᤔᤧᤰᤂᤢᤛᤡ॥ ᤁᤸᤗᤧᤆᤥᤃᤢᤸᤗᤧ ᤀᤠᤏᤡᤃᤣ ᤌᤰᤛᤠᤜᤠ᤹ᤖᤧ ᤋᤃᤡ ᤔᤧᤎᤠᤵᤋᤢᤛᤡᤒᤠ ᤁᤢᤶᤒᤠᤒᤠ ᤌᤰᤛᤠ ᤛᤠ᤺ᤳᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤀᤠᤏᤡᤃᤣ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤆᤥᤃᤢᤶᤛᤡᤶᤒᤧᤀᤠᤱ ᤋᤥ᤺ᤴᤍᤢᤶᤛᤡᤶᤒᤧ. ᤁᤖ ᤋᤢᤶᤒᤠ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤢᤴᤇᤡ᤹ ᤗᤧᤰᤘᤠᤀᤥ ᤁᤢᤓᤠ ᤌᤧᤔᤠᤀᤡ ᤋᤥ᤺ᤴᤋᤢᤶᤒᤣᤀᤠᤱ ᤌᤧ᤹ᤖᤢᤶᤛᤡᤶᤒᤧ॥’ 16 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤢᤰᤛᤠᤶᤛᤠᤒᤠ ᤜᤢᤰᤁᤡᤸᤗᤧ ᤔᤡᤛᤪ ᤗᤠᤈᤣ᤹ᤗᤠᤶ ᤀᤠᤏᤡ᤹ ᤀᤠᤗ᤺ᤳᤋᤧ ᤀᤠᤓᤧᤳᤋᤧᤒᤠ ᤑᤠ᤹ᤀᤠᤱ ᤂᤡᤏᤡ᤹ ᤗᤠᤃᤡ ᤜᤢᤰᤁᤥ ᤁᤧᤒᤵᤐᤠ ᤗᤳᤇᤠ ᤔᤡᤰᤛᤣᤴ ᤏᤢ ᤋᤫᤠᤒᤥ ᤁᤧᤒᤵᤐᤠ ᤔᤡᤰᤛᤣᤴ ᤐᤥᤱᤗᤥ॥” ᤂᤠ᤹ᤔᤡᤳ ᤏᤢ ᤔᤡᤎᤢᤱ ᤔᤡᤖᤠ᤺ᤰ ᤛᤡᤳᤗᤠᤱ 17 ᤑᤠᤖᤥᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤗᤧᤖᤢᤛᤡᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤗᤠᤶ ᤔᤧᤍᤣ᤹ᤖᤢᤛᤡᤴ॥ ᤜᤧᤰᤁᤣᤃ ᤂᤧᤴ ᤗᤠᤶᤔᤡᤴ ᤁᤧᤖᤧᤰᤏᤢ᤺ᤸᤗᤧ ᤋᤠᤱᤒᤠ ᤆᤥᤃᤧ ᤜᤶᤓᤛᤠᤱ ᤂᤢᤏᤧ᤹ ᤜᤧᤰᤁᤣ ᤔᤧᤈᤥᤃᤢᤴ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤐᤠ᤺ᤳᤋᤢ. “ᤁᤴ ᤔᤏᤠᤜᤠ᤹ᤖᤧ ᤗᤠᤶᤔᤥ ᤌᤱ ᤆᤥ᤺ᤰᤔᤠ ᤁᤧᤒᤥᤱᤒᤠᤖᤧᤳᤇ ᤗ᤹ᤖᤡᤰ ᤂᤢᤴᤇᤡ᤹ ᤏᤡᤱᤘᤠ᤹ ᤔᤧᤏᤢ᤺ᤰᤋᤢᤀᤠᤱ ᤔᤡᤛᤪ ᤗᤠᤈᤣ᤹ᤀᤥ ᤏᤢ᤺ᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢᤒᤠ ᤀᤠᤱᤃᤠ᤹ ᤀᤥᤔᤧᤵᤔᤠ ᤀᤠᤏᤡᤱᤘᤠ᤹ ᤜᤥᤵ॥” 18 ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤗᤠᤶᤒᤠ ᤜᤧ᤺ᤳᤋᤠᤱᤒᤠ ᤘᤖ᤺ᤱ ᤗᤧᤵᤔᤠᤱ ᤋᤣ᤹ᤖᤢᤛᤡ॥ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪᤗᤠᤶ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠ ᤔᤧᤕᤠᤱᤛᤡᤱᤅᤠᤱ ᤔᤧᤗ᤺ᤴᤍᤧ ᤔᤧᤎᤠᤅᤧ॥ 19 ᤔᤥᤛᤠ᤺ᤸᤗᤧ ᤕᤢᤛᤢᤑᤖᤧ ᤁᤢᤕᤧᤵ ᤁᤢᤗᤢᤱᤛᤡᤜᤠ᤹ ᤂᤢᤏᤧ᤹ᤏᤢ ᤛᤥᤖᤡᤰ ᤋᤣ᤹ᤖᤢ ᤌᤣᤀᤠᤱᤓᤧᤸᤗᤧ ᤕᤢᤛᤢᤑᤖᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤜᤧᤰᤁᤣ ᤔᤧᤈᤥᤃᤢᤖ ᤑᤠ᤹ᤀᤠᤱ ᤂᤧᤱᤜᤠ᤹ᤏᤢ ᤔᤠᤱᤜᤢᤵ ᤆᤥᤃᤢᤀᤠᤱ ᤘᤕᤧ॥ ᤕᤥᤛᤣᤑᤖᤧ ᤔᤧᤳᤋᤢᤛᤡᤀᤠᤱ ᤘᤕᤧ. “ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤆᤥ᤺ᤰᤕᤢᤶᤓᤥ ᤁᤧᤒᤡᤖᤡᤸᤗᤧ. ᤀᤠᤱᤃᤠ᤹ ᤀᤠᤕᤧᤵ ᤀᤠᤗᤢᤱᤛᤡᤜᤠ᤹ᤀᤠᤱ ᤂᤡᤏᤡ᤹ ᤁᤴ ᤋᤧᤴᤏᤥᤗᤠᤶ ᤁᤧᤍᤣ᤹ᤖᤢᤶᤗ ᤐᤥᤱ᤹॥” 20 ᤀᤡᤛᤪᤠᤀᤡᤗᤡᤜᤠ᤹ ᤛᤢᤰᤁᤥᤋᤗᤠᤶᤒᤠ ᤗᤠᤱᤔᤧᤄᤣᤃᤧ ᤔᤧᤒᤣ ᤜᤧᤰᤁᤩᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤡᤸᤗᤧ ᤁᤢᤕᤠᤀᤥ ᤀᤣᤌᤠᤔ ᤔᤧᤵᤔᤏᤠᤒᤠᤍᤧᤴᤏᤥ ᤛᤠ᤺ᤱᤃᤠᤜᤡᤶ ᤔᤧᤄᤡᤱᤄᤢ॥ 21 ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤧᤴᤍᤡᤰ ᤗᤧᤴᤍᤡᤰ ᤗᤠᤱᤄᤣ᤺ᤰᤔᤠ ᤔᤧᤛᤢᤰᤗ ᤑᤠ᤹ᤀᤠᤱ ᤂᤧᤱᤜᤠ᤹ ᤗᤠᤶ ᤀᤥ᤺ᤴᤎᤠᤰᤔᤠᤛᤡᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤴ ᤗᤧᤴᤍᤡᤰ ᤂᤠ᤹ᤔᤡᤳ ᤛᤡᤳᤗᤠᤱᤅᤥ ᤏᤢ ᤛᤧᤴᤍᤡᤰ ᤔᤡ ᤛᤡᤳᤗᤠᤱᤅᤥ ᤐᤥ᤺ᤰᤂᤧᤀᤠᤱ ᤂᤢᤴᤇᤡ᤹ ᤋᤃᤡ ᤋᤃᤡ ᤐᤣ॥ 22 ᤀᤠᤓᤧᤸᤗᤧᤛᤠᤱ ᤗᤧᤴᤍᤡᤰ ᤂᤠ᤹ᤔᤡᤳ ᤛᤡᤳᤗᤠᤱ ᤏᤢ ᤛᤧᤴᤍᤡᤰ ᤁᤧᤍᤡ᤺ᤵᤐᤠ ᤔᤡᤎᤢᤱᤍᤡᤱ ᤔᤡᤖᤠ᤺ᤰᤁᤡᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤋᤃᤡ ᤌᤠᤛᤡᤱ ᤐᤣᤖ ᤘᤕᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.