ᤗᤠᤶᤍᤡᤰ 12 - LIFOTNTᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶ 1 ᤔᤡᤛᤪ ᤗᤠᤈᤣ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤀᤰᤂᤣ ᤔᤧᤳᤋᤢᤛᤡ. 2 “ᤁᤴ ᤗᤠ᤺ᤴ ᤂᤡᤏᤡ᤹ ᤗᤠᤃᤡ ᤋᤱᤒᤣ᤺ᤸᤗᤧ ᤁᤢᤜᤣ᤺ᤰᤛᤡᤱᤔᤠ ᤗᤠ ᤐᤥᤱ᤹॥ 3 ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹. ‘ᤁᤴ ᤗᤠᤀᤥᤒᤠ ᤌᤡᤒᤥᤱ ᤕᤧᤴᤏᤥ ᤀᤡᤛᤪᤠᤀᤡᤗᤒᤠ ᤁᤧᤖᤧᤰᤗᤧ ᤀᤠᤒᤠᤅᤣ ᤀᤠᤒᤠᤅᤣ ᤂᤡᤏᤡ᤹ ᤜᤡᤶᤛᤕᤱᤗᤧ ᤗᤠᤃᤡ ᤗᤳᤇᤠ ᤔᤧᤸᤗᤢᤰᤛᤠ᤺ᤳ ᤀᤡᤃᤪ ᤔᤧ᤺ᤴᤍᤠᤈᤩᤠ᤺ᤰ ᤌᤡᤰ ᤋᤠᤖᤧᤶᤔᤧ᤹ᤀᤠᤱ ᤛᤧᤖᤧᤶ ᤆᤩᤧᤶᤔᤧ᤹॥ 4 ᤁᤢᤓᤠᤖᤧ ᤂᤢᤴᤇᤡ᤹ ᤜᤡᤶᤛᤕᤱᤅᤥ ᤆᤒᤧ᤺ᤳᤇᤡᤰᤗᤰ ᤔᤏᤠ ᤔᤧᤘᤠ᤹ᤀᤠᤱ ᤔᤧ᤺ᤴᤍᤠᤈᤩᤠ᤺ᤰ ᤌᤡᤰ ᤆᤠᤔᤠ ᤔᤠ᤺ᤶᤔᤠ ᤔᤧᤴᤇᤢᤰᤋᤢᤴᤏᤧᤓᤃᤪ ᤂᤢᤴᤇᤡ᤹ ᤁᤧᤖᤧᤰ ᤀᤠᤰᤂᤩᤠᤖᤡᤰ ᤁᤧᤈᤠᤒᤠ ᤔᤧᤘᤠ᤹ ᤜᤧᤰᤁᤩᤠᤱ ᤁᤧᤖᤧᤰᤗᤧ ᤀᤠᤰᤂᤧᤴ ᤆᤠᤔᤠ ᤔᤧᤛᤢᤰᤋᤢ᤹. ᤂᤢᤴᤇᤡ᤹ ᤔᤧᤏᤡ᤺ᤳᤇᤡᤱᤅᤠᤱ ᤜᤡᤶᤛᤕᤱᤅᤡᤸᤗᤧ ᤁᤢᤜᤡᤶᤒᤣᤛᤠᤱᤒᤠᤴᤏᤢ ᤂᤧᤴ ᤔᤧ᤺ᤴᤍᤠᤈᤩᤠ᤺ᤰᤁᤡᤴ ᤔᤧᤓ᤺ᤰᤂᤢ ᤔᤧᤈᤛᤠᤱ ᤐᤥᤱ᤹॥ 5 ᤔᤧᤸᤗᤢᤰᤛᤠ᤺ᤳ ᤀᤡᤃᤪ ᤁᤢᤶᤒᤠᤒᤠ ᤔᤧ᤺ᤴᤍᤠᤈᤩᤠ᤺ᤰ ᤌᤣᤛᤠᤱ ᤐᤥᤱ᤹. ᤁᤖ ᤂᤧᤴ ᤋᤱᤒᤣ ᤌᤡᤰ ᤁᤧᤃᤧᤵᤐᤠ ᤏᤢ ᤕᤠᤱᤄᤣ᤺ᤰ ᤔᤧᤶᤒᤵᤔᤏᤠᤒᤠ ᤐᤥᤱᤔᤠ ᤐᤥᤱ᤹॥ 6 ᤂᤡᤏᤡ᤹ ᤂᤧᤴ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤗᤡᤛᤡ ᤕᤧᤴ ᤌᤠᤖᤡᤰ ᤁᤳᤋᤧᤶᤔᤧ᤹. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ᤖᤧ ᤕᤢ᤺ᤴᤇᤡᤰ ᤂᤧᤴ ᤔᤧᤛᤧᤖᤢᤖ॥ 7 ᤂᤧᤒᤩᤠᤱ ᤀᤠᤳᤋᤡᤴ ᤀᤠᤳᤋᤡᤴ ᤜᤡᤶᤔᤥ ᤂᤧᤴ ᤔᤧᤸᤗᤢᤰᤛᤠ᤺ᤳ ᤀᤡᤃᤪ ᤔᤧ᤺ᤴᤍᤠᤈᤩᤠ᤺ᤰ ᤛᤠᤴ ᤔᤧᤈ. ᤂᤧᤴ ᤜᤡᤶᤔᤥᤒᤠ ᤗᤠᤶᤎᤣᤳ ᤛᤶᤎᤠᤱ ᤏᤢ ᤗᤠᤶᤎᤣᤳ ᤛᤡᤳᤗᤠᤱᤜᤠ᤹ᤀᤥ ᤂᤧᤴ ᤛᤠᤔᤠᤰᤂᤡ᤹ᤀᤡᤴ ᤔᤢᤜᤢ᤺ᤳᤋᤢᤖ॥ 8 ᤂᤧᤱᤜᤠ᤹ᤖᤧ ᤜᤠᤒᤠ ᤂᤧᤴ ᤛᤧᤴᤍᤡᤰ ᤂᤧᤴ ᤛᤠᤴ ᤔᤧᤀᤥ᤹ᤖᤢᤀᤠᤱ ᤁᤧᤓᤱᤒᤠ ᤛᤡᤍᤠ᤹ ᤔᤧᤶᤓ᤺ᤴᤏᤣᤒᤠ ᤂᤖᤧ᤺ᤱᤅᤡᤴᤏᤢ ᤔᤧᤈᤖ॥ ᤁᤧᤄᤡ᤺ᤰᤐᤠ ᤏᤢᤎᤡ᤺ᤴᤏᤢ ᤂᤧᤱᤜᤠ᤹ᤖᤧ ᤂᤧᤴ ᤔᤧᤈᤖ॥ 9 ᤂᤧᤴ ᤛᤠᤴ ᤁᤢᤔᤠᤱᤘᤠ ᤀᤡᤃᤪ ᤆᤫᤠ᤺ᤳᤋᤥ ᤜᤠᤱᤘᤠ ᤔᤧᤗᤰᤋᤧᤶᤔᤡᤴᤏᤧ᤹ᤀᤠᤱ ᤔᤧᤈᤧᤶᤔᤡᤴᤏᤧ᤹ ᤁᤖ ᤁᤢᤎᤧᤃᤣ᤺ᤰᤁᤡᤴ ᤁᤢᤓᤢᤶᤒᤠ. ᤁᤢᤜᤡᤍᤢᤳ ᤁᤢᤎᤧᤃᤠᤱᤔᤠᤏᤢ ᤛᤥᤖᤡᤰ ᤔᤡᤀᤥ ᤀᤥ᤹ᤖᤧᤶᤔᤧ᤹ᤀᤠᤱ ᤆᤠᤶᤔᤧ᤹॥ 10 ᤛᤠ᤺ᤸᤗᤧ ᤁᤢᤗᤰᤜᤠ᤹ ᤋᤠᤏᤠᤶ ᤌᤠᤖᤡᤰ ᤁᤢᤎᤣᤌᤡᤰᤁᤠᤱ ᤔᤧᤏᤴᤇᤧᤶ ᤔᤧᤕᤢᤰᤂᤧᤶᤔᤡᤴᤏᤧ᤹. ᤁᤖ ᤁᤢᤓᤠ ᤏᤖᤧᤏᤧᤓᤃᤪ ᤔᤡᤀᤥ ᤂᤧᤴ ᤀᤥ᤹ᤖᤧᤶ ᤋᤣᤛᤧᤶᤔᤧ᤹॥ 11 ᤂᤡᤏᤡ᤹ ᤂᤧᤴ ᤜᤠᤖᤠᤜᤠᤖᤠ ᤆᤧᤶᤔᤧ᤹ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤗᤠᤱᤅᤥ ᤗᤠᤱᤛᤢ᤺ᤵ ᤆᤠᤱᤔᤠ ᤜᤧᤰᤁᤩᤠᤱ ᤜᤢᤰᤁᤥ ᤋᤰᤁᤠᤳ ᤕᤠᤱᤛᤡᤱᤔᤠᤀᤠᤱ ᤗᤠᤶᤍᤡᤰ ᤆᤥ᤺ᤰᤔᤠᤖᤧ ᤗᤠᤃᤡ ᤑ᤹ᤀᤡ ᤕᤢᤶᤔᤠᤀᤠᤱ ᤕᤢᤱᤔᤠ ᤐᤥᤱ᤹॥ ᤁᤴ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴ ᤕᤜᤘᤣ ᤍᤠᤱᤒᤧᤸᤗᤧᤴᤗᤥ॥ 12 “‘ᤂᤧᤴ ᤛᤧᤴᤍᤡᤰ ᤀᤠᤱᤃᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤐᤥᤱᤅᤠᤀᤠᤱ ᤐᤣ᤺ᤰᤁᤠ ᤜᤧᤰᤁᤩᤠᤱ ᤔᤡᤛᤪᤀᤥ ᤁᤧᤘᤠ᤹ᤒᤠ ᤁᤧᤖᤧᤰ ᤋᤢᤶᤒᤠ ᤛᤠᤜᤠ᤹ ᤏᤢ ᤐᤡᤳ ᤌᤰᤛᤠᤜᤠ᤹ᤖᤧ ᤋᤃᤡ ᤔᤧᤎᤠᤵᤋᤢᤛᤡᤒᤠ ᤐᤡᤳᤛᤠᤳᤜᤠ᤹ ᤀᤠᤱᤃᤠ᤹ ᤛᤩᤧᤖᤢᤱᤛᤡᤱ᤹ ᤜᤧᤰᤁᤩᤠᤱ ᤔᤡᤛᤪᤒᤠ ᤁᤧᤖᤧᤰ ᤔᤠᤱᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ 13 ᤂᤡᤏᤡ᤹ ᤁᤧᤕᤢᤅᤡᤒᤠ ᤜᤡᤶᤜᤠ᤹ᤀᤥ ᤗᤠᤶᤎᤣᤳ ᤛᤡᤳᤗᤠᤱᤅᤥ ᤜᤢ᤺ᤵᤔᤏᤠᤀᤠᤱ ᤁᤧᤒᤵᤐᤠ ᤂᤧᤴ ᤔᤠᤰᤂᤡᤴ ᤔᤡᤰᤛᤣ᤺ᤴ ᤐᤥᤱ᤹॥ ᤂᤧᤴ ᤔᤠᤰᤂᤡᤴ ᤀᤠᤱᤃᤠ᤹ ᤏᤡᤛᤢᤱᤅᤠᤱ ᤀᤠᤱᤃᤠ᤹ ᤂᤡᤏᤡ᤹ ᤁᤠ᤺ᤰᤏᤡᤱ ᤌᤠᤏᤡᤱ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤡᤛᤪᤡᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤒᤠ ᤀᤠᤳᤋᤡᤴ ᤔᤡᤱᤍᤣ᤹ᤀᤡᤸᤗᤧᤀᤠᤱ ᤂᤡᤏᤡ᤹ ᤁᤧᤴᤇᤢᤛᤡᤴ॥ 14 “‘ᤂᤧᤴ ᤕᤧᤴᤏᤥ ᤂᤡᤏᤡ᤹ ᤗᤳᤇᤠ ᤛᤠᤶᤕᤥᤒᤠ ᤋᤱᤏᤠᤶ ᤌᤡᤰ ᤁᤧᤍᤥᤛᤢᤶ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤌᤧᤔᤠ ᤆᤥᤃᤢᤱᤅᤠᤱ ᤘᤕᤧ ᤂᤧᤴ ᤋᤱᤏᤠᤶᤔᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤛᤢᤶ ᤋᤠᤖᤢ ᤁᤧᤒᤡᤖᤡ᤹॥ ᤂᤧᤴ ᤋᤱᤏᤠᤶᤔᤡᤴ ᤛᤍᤠᤍᤡᤱᤗᤧ ᤗᤠᤃᤡ ᤁᤧᤍᤠᤒᤠ ᤕᤧᤴᤜᤠ᤹ᤀᤥ ᤋᤥᤛᤧᤶᤔᤧ᤹॥’” ᤛᤡᤍᤠ᤹ ᤔᤧᤶᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶ 15 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. “ᤏᤢᤛᤡ ᤕᤧᤴ ᤌᤠᤖᤡᤰ ᤂᤡᤏᤡ᤹ ᤛᤡᤍᤠ᤹ ᤔᤧᤶᤓ᤺ᤴᤏᤣᤒᤠ ᤂᤖᤧ᤺ᤱ ᤆᤧᤶᤔᤧ᤹॥ ᤌᤡᤰᤛᤡᤃᤣᤰᤐᤠ ᤕᤧᤴᤏᤥᤀᤣ ᤂᤡᤏᤡ᤹ ᤜᤡᤶᤔᤥ ᤁᤧᤃᤳᤋᤢᤶᤒᤠ ᤁᤧᤖᤧᤰ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤀᤡᤴ ᤗ᤺ᤳᤋᤧᤶ ᤋᤣᤛᤧᤶᤔᤧ᤹ ᤌᤣᤀᤠᤱᤓᤧᤸᤗᤧ ᤁᤢᤓᤠᤖᤧ ᤂᤧᤴ ᤏᤢᤛᤡ ᤕᤧᤴ ᤌᤠᤖᤡᤰ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ ᤕᤠᤰᤔᤏᤠᤒᤠ ᤂᤖᤧ᤺ᤱᤅᤡᤴ ᤔᤧᤈᤏᤧᤓᤃᤪ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤖ॥ 16 ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤂᤡᤏᤡ᤹ ᤗᤳᤇᤠ ᤛᤣᤛᤣ ᤆᤢᤶᤗᤢᤱ ᤆᤥᤃᤧᤶᤔᤧ᤹. ᤏᤢᤛᤡ ᤕᤧᤴ ᤁᤧᤳᤋᤡᤸᤗᤧ ᤘᤣ᤹ᤎᤡᤰ ᤆᤥᤃᤧᤶᤔᤧ᤹॥ ᤂᤧᤴ ᤕᤧᤴᤏᤥ ᤀᤠᤳᤋᤡᤴ ᤐᤖᤡᤰᤐᤠᤀᤠᤱ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹. ᤁᤢᤈᤠ ᤌᤥ᤺ᤰᤔᤠᤀᤠᤱᤎᤥ ᤘᤣ᤹ ᤌᤧᤔᤠᤀᤠᤱ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹॥ 17 “ᤂᤡᤏᤡ᤹ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶ ᤋᤥᤛᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤀᤠᤶᤓᤠ ᤁᤴ ᤕᤧᤴᤏᤥ ᤂᤡᤏᤡ᤹ ᤛᤢᤘᤠᤱᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶᤒᤠ ᤗ᤺ᤳᤋᤢᤱ ᤑᤧᤳᤋᤢᤱᤛᤡᤱ॥ ᤁᤧᤍᤠᤒᤠ ᤕᤧᤴᤏᤥ ᤛᤍᤠᤍᤡᤱᤗᤧ ᤗᤠᤃᤡ ᤂᤡᤏᤡ᤹ ᤌᤠ᤺ᤰᤌᤠ᤺ᤰᤁᤥ ᤁᤴ ᤋᤱᤏᤠᤶᤔᤡᤴ ᤋᤥᤔᤠ ᤐᤥᤱ᤹॥ 18 ᤌᤡᤰᤛᤡᤃᤣᤰᤐᤠ ᤗᤠ ᤌᤡᤒᤥᤱᤅᤠᤱ ᤗᤡᤛᤡ ᤕᤧᤴ ᤕᤢ᤺ᤴᤇᤡᤰᤁᤠᤱᤎᤥ ᤏᤡᤒᤥᤱᤅᤠᤱ ᤏᤡᤛᤡᤃᤣᤰᤐᤠ ᤕᤧᤴ ᤕᤢ᤺ᤴᤇᤡᤰ ᤌᤠᤖᤡᤰ ᤂᤡᤏᤡ᤹ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤔᤏᤠᤒᤠ ᤂᤖᤧ᤺ᤱ ᤆᤧᤶᤔᤧ᤹॥ 19 ᤏᤢᤛᤡ ᤕᤧᤴ ᤌᤠᤖᤡᤰ ᤂᤡᤏᤡ᤹ ᤜᤡᤶᤔᤥ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ ᤌᤣᤀᤠᤱ ᤜᤥ᤺ᤵᤗ॥ ᤁᤢᤓᤠᤖᤧ ᤁᤴ ᤕᤧᤳᤏᤠᤶᤔᤥ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ ᤁᤧᤕᤠᤰᤐᤠ ᤁᤢᤈᤠ ᤔᤧᤈᤏᤧᤓᤃᤪ ᤂᤧᤴ ᤘᤣ᤹ ᤗᤠᤈᤣ᤹ᤒᤠ ᤐᤥᤱᤛᤠᤱ. ᤀᤡᤃᤪ ᤀᤠᤵᤑᤣᤰ ᤗᤠᤈᤣ᤹ᤒᤠ ᤐᤥᤱᤛᤠᤱ. ᤀᤡᤛᤪᤠᤀᤡᤗᤒᤠ ᤛᤱᤈᤢᤶᤓᤥᤗᤠᤶ ᤂᤧᤴ ᤔᤧᤗ᤺ᤳᤋᤢ ᤔᤧᤍᤣᤛᤢᤖ॥ 20 ᤁᤴ ᤕᤧᤴᤜᤠ᤹ᤀᤥ ᤂᤡᤏᤡ᤹ ᤁᤧᤓᤱᤒᤠ ᤛᤡᤍᤠ᤹ ᤁᤧᤕᤠᤰᤐᤠ ᤌᤧᤔᤠᤀᤠᤱ ᤔᤧᤈᤧᤶᤔᤡᤴᤏᤧ᤹॥ ᤂᤡᤏᤡ᤹ ᤀᤠᤳᤋᤡ ᤁᤧᤕᤢᤅᤡᤛᤠᤱ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤆᤧᤶᤔᤧ᤹ ᤏᤢᤛᤡ ᤕᤧᤴ ᤌᤠᤖᤡᤰ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤡᤏᤡ᤹ ᤜᤡᤶᤔᤥ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ ᤂᤥᤔᤧᤍᤧᤳᤏᤧᤴᤗ॥” ᤁᤠ᤺ᤰᤔᤠᤀᤠᤱ ᤗᤧᤵᤔᤏᤠᤒᤠ ᤋᤱᤏᤠᤶ 21 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤧᤖᤧᤰ ᤜᤡᤶᤛᤕᤱᤗᤧ ᤗᤳᤇᤠ ᤗᤳᤇᤠ ᤔᤧᤸᤗᤢᤰᤛᤠ᤺ᤳ ᤛᤣᤃᤧᤶᤔᤧ᤹ᤀᤠᤱ ᤛᤧᤖᤧᤶᤔᤧ᤹ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤜᤡᤶᤛᤕᤱᤜᤠ᤹ᤖᤧ ᤁᤠ᤺ᤰᤔᤠᤀᤠᤱ ᤗᤧᤵᤔᤏᤠᤒᤠ ᤋᤱᤏᤠᤶ ᤋᤥᤔᤠ ᤔᤧᤛᤢᤰᤋᤢᤖ॥ 22 ᤜᤡᤛᤐ ᤕᤠ᤺ᤴᤏᤡᤸᤗᤧ ᤗᤳᤇᤠ ᤆᤢᤰᤛᤠ ᤁᤢᤒᤥᤖᤠᤰ ᤌᤡᤰ ᤋᤠᤖᤧᤶᤔᤧ᤹. ᤔᤧ᤺ᤴᤍᤛᤠ᤺ᤳᤋᤡᤸᤗᤧ ᤁᤢᤔᤠᤰᤂᤡ᤹ ᤕᤠᤱᤔᤠ ᤂᤵᤐᤩᤠᤀᤥ ᤂᤧᤴ ᤜᤢᤶᤛᤠᤶᤔᤧ᤹ ᤜᤧᤰᤁᤩᤠᤱ ᤂᤡᤏᤡ᤹ ᤜᤡᤶᤔᤥᤒᤠ ᤗᤠᤶᤎᤣᤳ ᤛᤡᤳᤗᤠᤱᤜᤠ᤹ ᤏᤢ ᤗᤠᤶᤎᤣ᤺ᤳᤋᤥ ᤌᤠ᤺ᤱ ᤔᤠᤰᤂᤡᤴ ᤜᤢ᤺ᤳᤋᤧᤶᤔᤧ᤹॥ ᤋᤠᤏᤠᤶ ᤂᤠᤀᤥ᤺ᤳ ᤌᤠᤖᤡᤰ ᤜᤠ᤺ᤳᤋᤠᤱ ᤜᤡᤶᤔᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤴᤏᤧᤴᤗ॥ 23 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤔᤡᤛᤪᤡᤜᤠ᤹ᤖᤧ ᤂᤢᤏᤡ᤹ ᤛᤧᤳᤇᤧ ᤗᤠᤈᤣ᤹ᤗᤠᤶ ᤐᤥᤱᤅᤠᤱ ᤐᤣ᤺ᤰᤁᤡᤸᤗᤧ ᤂᤧᤴ ᤕᤧᤶᤔᤥ ᤂᤢᤏᤧ᤹ ᤂᤡᤏᤡ᤹ ᤗᤠᤶᤎᤣ᤺ᤵᤐᤥᤒᤠ ᤛᤡᤳᤗᤠᤱᤜᤠ᤹ᤀᤥ ᤏᤢ ᤗᤠᤶᤎᤣ᤺ᤳᤋᤥ ᤌᤠ᤺ᤱ ᤔᤠᤰᤂᤡᤴ ᤏᤡᤛᤢᤀᤠᤱ ᤀᤠᤛᤧᤳᤛᤧᤵᤐᤠ ᤔᤠᤱᤗᤠᤀᤡᤱᤒᤠᤴ ᤂᤡᤏᤡ᤹ ᤜᤡᤶᤔᤡᤴ ᤁᤠ᤺ᤰᤔᤠᤀᤠᤱ ᤂᤡᤏᤡ᤹ ᤗᤧᤵᤔᤠ ᤐᤠᤱᤄᤢ᤹॥ 24 “ᤂᤡᤏᤡ᤹ ᤏᤢ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤁᤴ ᤌᤡᤶᤔᤡᤴ ᤛᤍᤠᤍᤡᤱᤗᤧ ᤗᤠᤃᤡ ᤁᤧᤍᤥᤛᤢᤶᤗ ᤐᤥᤱ᤹॥ 25 ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤐᤡᤔᤠᤏᤡᤱ ᤑᤠ᤹ᤀᤠᤱ ᤔᤠᤱᤜᤢᤵ ᤆᤥᤃᤢᤒᤠ ᤗᤠᤈᤣ᤹ᤀᤥ ᤁᤧᤗᤠᤛᤡ ᤁᤧᤈᤢᤖᤡᤀᤠᤱᤛᤠᤱ ᤁᤴ ᤌᤡᤶᤔᤡᤴ ᤂᤡᤏᤡ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤗ ᤐᤥᤱ᤹॥ 26 ᤀᤠᤸᤗ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤁᤴ ᤋᤱᤏᤠᤶᤔᤡᤸᤗᤧ ᤁᤢᤒᤣᤴ ᤌᤧᤔᤠᤒᤣ ᤑᤠ᤹ᤀᤠᤱ ᤛᤣ᤺ᤴᤁᤧᤶᤍᤥᤛᤡ᤹. 27 ᤂᤧᤒᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤠᤶᤛᤡᤶᤔᤧ᤹. ‘ᤁᤴ ᤕᤜᤘᤣ ᤍᤠᤱᤒᤧᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤏᤠᤀᤠᤱ ᤋᤥ᤺ᤶᤔᤏᤠᤒᤠ ᤁᤠ᤺ᤰᤔᤠᤀᤠᤱ ᤗᤧᤵᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤱᤏᤠᤶᤗᤥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤔᤡᤛᤪᤀᤥ ᤁᤧᤏᤧᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤜᤠ᤹ ᤁᤠ᤺ᤰᤋᤢᤀᤠᤱ ᤐᤣ᤺ᤸᤗᤧ ᤂᤢᤏᤧ᤹ ᤔᤡᤛᤪᤡᤜᤠ᤹ ᤛᤩᤧᤖᤢᤛᤡ ᤁᤖᤛᤠᤱ ᤀᤠᤏᤡ᤹ ᤀᤡᤛᤪᤠᤀᤡᤗᤡᤜᤠ᤹ ᤀᤠᤍᤠᤱᤄᤧᤀᤠᤱ ᤘᤕᤧ॥’” ᤂᤧᤒᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤌᤢᤱᤒᤥᤜᤈ᤹ ᤔᤧᤕᤢᤱᤛᤡᤱᤅᤠᤱ ᤕᤜᤘᤣ ᤍᤠᤱᤒᤠᤴ ᤔᤠᤱᤛᤧᤘᤠ ᤔᤧᤔᤧᤳᤋᤢ॥ 28 ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤳᤋᤢᤛᤡᤒᤠ ᤜᤧᤰᤁᤣ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤈᤥᤃᤢᤖᤥ॥ ᤋᤢᤶᤒᤠ ᤛᤠᤜᤠ᤹ ᤔᤧᤛᤩᤧ 29 ᤜᤧᤰᤁᤩᤠᤱ ᤛᤧᤴᤍᤡᤰ ᤛᤧᤳᤗᤢᤶᤓᤰᤋᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤔᤡᤛᤪᤒᤠ ᤁᤧᤖᤧᤰ ᤋᤢᤶᤒᤠ ᤛᤠᤜᤠ᤹ ᤛᤩᤧᤖᤢᤛᤡ. ᤜᤠᤱᤕᤢᤰᤏᤠᤀᤥ ᤗᤰᤂᤥᤒᤠ ᤁᤧᤒᤥᤱᤒᤠ ᤜᤠᤱᤛᤠᤀᤠᤱᤎᤥ ᤗᤢᤶᤒᤠ᤺ᤳᤋᤥ ᤔᤧᤛᤠᤰᤋᤢᤛᤡᤒᤠ ᤐᤢᤱᤗᤠᤎᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤋᤢᤶᤒᤠ ᤛᤠᤜᤠ᤹ ᤛᤩᤧᤖᤢᤛᤡ॥ ᤐᤡᤳ ᤌᤰᤛᤠᤜᤠ᤹ᤖᤧ ᤋᤃᤡ ᤔᤧᤎᤠᤵᤋᤢᤛᤡᤒᤠ ᤐᤡᤳᤛᤠᤳᤜᤠ᤹ᤀᤠᤱ ᤔᤧᤛᤩᤧ॥ 30 ᤂᤧᤴ ᤛᤧᤴᤍᤡᤰ ᤑᤠᤖᤥᤴ. ᤂᤢᤏᤧ᤹ ᤁᤢᤛᤢᤜᤠᤱᤃᤧᤶᤒᤠᤜᤠ᤹ ᤏᤢ ᤘᤣ᤹ ᤁᤧᤖᤧᤰ ᤔᤡᤛᤪᤒᤠ ᤔᤏᤠᤜᤠ᤹ ᤔᤧᤛᤥᤖᤧ ᤔᤧᤗ᤺ᤴᤍᤧ॥ ᤔᤡᤛᤪ ᤗᤠᤈᤣ᤹ᤀᤥ ᤕᤶᤒᤠ ᤀᤡᤰᤗᤠᤀᤥ ᤔᤧᤜᤠᤒᤧ ᤔᤧᤓᤡ᤺ᤰᤋᤧ ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤋᤢᤶᤒᤠ ᤛᤠ ᤔᤧᤴᤇ᤻ᤕᤧᤏᤧᤶᤒᤠ ᤜᤡᤶᤔᤣ ᤜᤥ᤺ᤵᤋᤧ॥ 31 ᤂᤧᤴ ᤛᤧᤴᤍᤡᤰ ᤑᤠᤖᤥᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤂᤢᤴᤇᤡ᤹ ᤀᤢ᤺ᤳᤇᤧ ᤐᤠᤱᤄᤢᤛᤡᤀᤠᤱ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤏᤢ ᤂᤡᤏᤡ᤹ ᤀᤡᤛᤪᤠᤀᤡᤗᤡᤜᤠ᤹ ᤗ᤺ᤴᤍᤧᤶᤔᤧ᤹ᤀᤠᤱ ᤐᤣᤃᤧᤶᤔᤧ᤹॥ ᤀᤠᤱᤃᤠ᤹ ᤀᤠᤗᤠᤈᤣᤴ ᤗᤧᤖᤧᤶᤔᤧ᤹ᤀᤠᤱ ᤐᤣᤃᤧᤶᤔᤧ᤹ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠ ᤜᤧᤰᤁᤣ ᤂᤡᤏᤡ᤹ ᤕᤜᤘᤣ ᤍᤠᤱᤒᤧᤴ ᤔᤠᤱᤛᤧᤘᤠ ᤔᤧᤳᤋᤧᤶᤔᤧ᤹॥ 32 ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠ ᤜᤧᤰᤁᤣ ᤂᤡᤏᤡ᤹ ᤔᤧᤸᤗᤢᤰ ᤔᤧ᤺ᤴᤍᤠ ᤏᤢ ᤐᤡᤳᤌᤰᤛᤠᤜᤠ᤹ ᤋᤣ᤹ᤖᤧᤶᤛᤡᤶᤔᤧ᤹ᤀᤠᤱ ᤐᤣᤃᤧᤶᤔᤧ᤹॥ ᤁᤖ ᤂᤡᤏᤡ᤹ ᤁᤧᤒᤣᤃᤡᤸᤗᤧ ᤀᤠᤱᤃᤠ᤹ᤀᤠᤱ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤀᤠᤒᤡᤖᤧᤶᤔᤧ᤹॥” 33 ᤔᤡᤛᤪᤡᤜᤠ᤹ᤖᤧᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤜᤠᤖᤠᤘᤖᤠ ᤗᤠᤈᤣᤴ ᤗᤧᤵᤔᤠᤀᤠᤱ ᤐᤣ᤺ᤰᤔᤠ ᤔᤧᤕᤠ᤺ᤴᤍᤢᤛᤡ॥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤂᤡᤏᤡ᤹ ᤁᤧᤶᤒᤣᤃᤡᤴᤏᤧᤓᤃᤪ ᤀᤠᤏᤡᤃᤣ ᤁᤧᤖᤧᤰ ᤛᤩᤧ᤹ᤀᤡᤃᤧ॥” 34 ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤔᤧᤛ᤹ᤖᤢ ᤔᤧᤕᤢᤰᤂᤢᤒᤠ ᤑᤣ᤹ᤖᤢᤶᤔᤡᤴ ᤁᤧᤓᤱᤒᤠ ᤛᤡᤍᤠ᤹ ᤕᤠᤰᤔᤠᤏᤢ᤺ᤸᤗᤧ ᤋᤃᤡ ᤔᤧᤓᤥ᤺ᤰᤂᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤣ᤹ᤖᤢᤶ ᤛ᤹ᤔᤠ ᤑᤢᤈᤡᤰᤜᤠ᤹ ᤋᤣ᤺ᤵᤑᤢᤱᤜᤠ᤹ᤀᤥ ᤔᤧᤛᤢᤅᤢᤀᤠᤱ ᤑᤰᤋᤠᤱᤅᤥ ᤔᤧᤕᤢᤰᤂᤢ॥ 35 ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤥᤛᤠ᤺ᤸᤗᤧ ᤔᤧᤳᤋᤢᤛᤡᤒᤠ ᤜᤧᤰᤁᤣ ᤔᤧᤈᤥᤃᤢᤀᤠᤱ ᤘᤕᤧ. ᤂᤧᤱᤜᤠ᤹ᤖᤧ ᤔᤡᤛᤪᤡᤜᤠ᤹ᤗᤠᤶᤒᤠ ᤛᤠᤶᤔᤩᤠᤱ ᤕᤢᤵᤐᤠ ᤘᤠ᤺ᤳᤋᤡ ᤛᤠᤔᤠᤜᤠ᤹ ᤏᤢ ᤋᤣ᤺ᤵᤑᤢᤱᤜᤠ᤹ ᤔᤧᤏᤠ᤺ᤰᤋᤢᤛᤡ॥ 36 ᤕᤜᤘᤣ ᤍᤠᤱᤒᤧᤸᤗᤧ ᤔᤡᤛᤪᤡᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤏᤢᤖᤡᤰ ᤔᤧᤔᤧᤳᤋᤢᤛᤡᤖ ᤆᤥᤃᤢ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤏᤠ᤺ᤰᤋᤢᤒᤠ ᤐᤠ᤺ᤴᤜᤠ᤹ ᤔᤡᤛᤪᤜᤠ᤹ᤖᤧ ᤁᤧᤖᤧᤰ ᤔᤧᤒᤡᤖᤢᤛᤡᤖ ᤆᤥᤃᤢ॥ ᤁᤶᤓᤗ᤹ᤖᤡᤰ ᤔᤡᤛᤪᤡᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤍᤣ᤹ᤖᤢᤀᤠᤱ ᤔᤧᤒᤣᤖᤥ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤡᤛᤪ ᤗᤠᤈᤣᤴ ᤔᤧᤗᤧᤖᤢ 37 ᤀᤡᤛᤪᤠᤀᤡᤗᤡᤜᤠ᤹ ᤖᤠᤔᤛᤣᤛᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤛᤢᤰᤁᤥᤋ ᤔᤧᤒᤣ॥ ᤗᤠᤅᤧᤴᤇᤡᤱ ᤋᤢᤰᤛᤡᤃ ᥌.᥆᥆.᥆᥆᥆ ᤕᤧᤶᤒᤡᤳᤇᤠᤖᤰ ᤔᤧᤘᤕᤧ ᤜᤧᤰᤁᤩᤠᤱ ᤔᤧᤴᤇᤢᤔᤠ ᤏᤢ ᤜᤡᤴᤈᤠ᤹ᤒᤡᤳᤇᤠ᤹ᤀᤠᤱ ᤔᤧᤘᤕᤧ॥ 38 ᤂᤧᤴᤏᤢ᤺ᤸᤗᤧ ᤘᤣ᤹ ᤕᤖᤡᤰ ᤀᤡᤛᤪᤠᤀᤡᤗᤡ ᤔᤣ᤺ᤶᤒᤠ ᤔᤏᤠᤜᤠ᤹ ᤏᤢ ᤕᤖᤡᤰ ᤔᤧᤸᤗᤢᤰ ᤔᤧ᤺ᤴᤍᤠ ᤜᤧᤰᤁᤩᤠᤱ ᤐᤡᤳᤜᤠ᤹ᤀᤠᤱ ᤂᤢᤴᤇᤡ᤹ᤏᤢ ᤔᤧᤒᤣ॥ 39 ᤔᤡᤛᤪᤗᤠᤶᤒᤠ ᤔᤧᤓᤧᤳᤋᤢᤀᤠᤱ ᤔᤧᤓᤧᤖᤧᤒᤠ ᤔᤧᤛ᤹ᤖᤢᤒᤠ ᤑᤣ᤹ᤖᤢᤶᤔᤡᤴ ᤂᤧᤱᤜᤠ᤹ᤖᤧ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤔᤧᤗᤧ᤺ᤰᤂᤢ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤡᤛᤪ ᤗᤠᤈᤣᤴ ᤂᤡᤔᤥ ᤔᤧᤗᤧᤖᤢᤀᤠᤱ ᤔᤧᤘᤕᤧ ᤂᤧᤒᤩᤠᤱ ᤋ᤺ᤰ ᤌᤥ᤺ᤰᤔᤠ ᤏᤢ ᤁᤧᤓᤱᤒᤠ ᤛᤡᤍᤠ᤹ ᤕᤠᤰᤔᤏᤠᤒᤠ ᤂᤖᤧ᤺ᤱ ᤗᤧ᤺ᤱᤔᤠᤀᤠᤱ ᤔᤧᤱᤄᤥᤛᤢᤴ॥ 40 ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪ ᤗᤠᤈᤣ᤹ᤀᤥ ᤔᤧᤕᤢᤅᤧᤒᤠ ᥊᥉᥆ ᤋᤱᤒᤣ ᤁᤧᤖᤧᤀᤠᤱ ᤘᤕᤧ॥ 41 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ᤀᤥᤒᤠ ᤁᤧᤖᤧᤰ ᤛᤢᤘᤠᤱᤜᤠ᤹ ᥊᥉᥆ ᤋᤱᤒᤣ ᤁᤧᤖᤧᤸᤗᤧ ᤕᤠ᤺ᤴᤍᤡᤰᤁᤣ ᤔᤡᤛᤪ ᤗᤠᤈᤣ᤹ᤗᤠᤶ ᤔᤧᤗ᤺ᤴᤍᤧ॥ 42 ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤔᤡᤛᤪᤗᤠᤶ ᤗ᤺ᤵᤔᤠ ᤑᤧᤵᤔᤠᤛᤡᤖᤧ ᤗᤠᤃᤡ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤁᤶᤒᤪᤠᤱ ᤔᤧᤳᤋᤢᤛᤡ॥ ᤂᤧᤴ ᤛᤧᤴᤍᤡᤰᤁᤡᤱᤃ ᤛᤍᤠᤍᤡᤱᤗᤧ ᤗᤠᤃᤡ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤶᤔᤏᤠᤒᤠ ᤛᤧᤴᤍᤡᤰᤗᤥ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤛᤧᤴᤍᤡᤰ ᤆᤠᤱᤈᤠᤱ ᤕᤢᤱᤔᤠᤀᤠᤱ ᤀᤠᤓᤧᤸᤗᤧᤛᤠᤱ ᤕᤜᤘᤣ ᤍᤠᤱᤒᤧᤴ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤖ ᤐᤥᤱᤗᤥ॥ ᤁᤠ᤺ᤰᤔᤠᤀᤠᤱ ᤗᤧᤵᤔᤏᤠᤒᤠ ᤋᤱᤏᤠᤶ ᤋᤥᤔᤠ ᤌᤡᤶᤜᤠ᤹ 43 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤳᤋᤢᤛᤡ. “ᤁᤠ᤺ᤰᤔᤠᤀᤠᤱ ᤗᤧᤵᤔᤏᤠᤒᤠ ᤋᤱᤏᤠᤶ ᤋᤥᤔᤠ ᤌᤡᤶᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ— “ᤁᤢᤓᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠ᤺ᤸᤗᤧ ᤁᤠ᤺ᤰᤔᤠᤀᤠᤱ ᤗᤧᤵᤔᤏᤠᤒᤠ ᤋᤱᤏᤠᤶᤒᤠ ᤁᤢᤈᤠᤴ ᤔᤧᤈᤏᤧᤴᤗ. 44 ᤁᤖ ᤂᤡᤏᤡ᤹ ᤁᤧᤍᤠᤖᤢᤶᤒᤠ ᤕᤥ᤺ᤰᤁᤡᤴ ᤂᤡᤏᤡ᤹ ᤜᤷᤍᤥ ᤁᤧᤜᤧᤃᤢᤶ ᤁᤧᤒᤡᤖᤢᤶᤔᤠᤱ ᤘᤠ᤹ᤏᤧᤓᤃᤪ ᤂᤧᤸᤗᤧ ᤆᤖᤖᤥ॥ 45 ᤏᤠᤶᤕᤠᤰ ᤁᤧᤍᤠ᤺ᤰᤐᤠᤀᤠᤱ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤏᤢ ᤁᤢᤓᤠ ᤕᤧᤴᤗᤧ ᤗᤠᤃᤡ ᤕᤠᤱᤃᤧᤎᤥ᤺ᤰᤐᤠ ᤔᤏᤠᤜᤠ᤹ᤖᤧ ᤂᤧᤴ ᤔᤧᤴᤈᤏᤧᤸᤗ॥ 46 “ᤀᤠᤳᤋᤡᤴ ᤜᤡᤶᤔᤥ ᤆᤠᤔᤠ ᤁᤢᤈᤠ ᤔᤧᤎᤥ᤺ᤰᤋᤢᤀᤠᤱ ᤕᤢᤱ. ᤂᤧᤴ ᤀᤠᤶᤓᤠ ᤂᤧᤵᤔᤥ ᤆᤠᤔᤠ ᤔᤠ᤺ᤶᤔᤠ ᤐᤥᤱ᤹॥ ᤜᤡᤶᤔᤥᤗᤠᤶ ᤂᤧᤴ ᤗᤠ᤺ᤰᤁᤠᤳ ᤔᤧᤗ᤺ᤳᤋᤠᤶᤔᤡᤴᤏᤧ᤹॥ ᤂᤧᤴ ᤛᤧᤵᤔᤏᤠᤒᤠ ᤌᤰᤛᤠ᤺ᤸᤗᤧ ᤁᤢᤗᤢᤱᤛᤡᤴ ᤀᤧᤱᤔᤠ ᤔᤧᤏᤢ᤹ᤏᤧᤴ॥ 47 ᤁᤧᤖᤧᤰ ᤀᤡᤛᤪᤠᤀᤡᤗᤡ ᤛᤱᤈᤢᤶᤓᤥᤜᤠ᤹ᤖᤧ ᤁᤴ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴ ᤋᤥᤔᤠᤀᤣ ᤐᤥᤱ᤹॥ 48 “ᤁᤖ ᤜᤷᤍᤥ ᤔᤧᤴᤜᤧᤰᤁᤣ ᤁᤧᤘᤠ᤹ᤒᤠ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤂᤧᤴ ᤆᤠᤔᤠ ᤔᤧᤏᤢ᤹ᤏᤧᤴ॥ ᤂᤡᤏᤡ᤹ᤗᤢᤶᤔᤥ ᤁᤧᤕᤢᤱᤒᤠ ᤁᤢᤓᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤁᤠ᤺ᤰᤔᤠᤀᤠᤱ ᤗᤧᤵᤔᤏᤠᤒᤠ ᤋᤱᤏᤠᤶᤔᤡᤴ ᤋᤥᤔᤠᤀᤠᤱ ᤕᤜᤘᤣ ᤍᤠᤱᤒᤧᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤏᤡᤱᤘᤠ᤹ ᤔᤧᤈᤥᤃᤢᤏᤧᤓᤃᤪ ᤋᤃᤡ ᤂᤡᤏᤡ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤔᤩᤛᤱᤅᤥᤒᤠ ᤕᤧᤶᤒᤡᤳᤇᤠᤜᤠ᤹ ᤜᤷᤍᤥ ᤜᤧᤃᤧᤶ ᤐᤡᤖᤧᤶᤛᤡᤶᤔᤧ᤹॥ ᤂᤧᤴ ᤀᤣᤃᤠᤱ ᤂᤧᤴ ᤕᤧᤶᤒᤡᤳᤇᤠᤴ ᤀᤠᤒᤠᤅᤣ ᤗᤠᤈᤣ᤹ᤀᤥ ᤛᤠᤃᤧᤘᤠ᤺ᤴᤇᤡᤱᤒᤠ ᤀᤡᤛᤪᤠᤀᤡᤗᤡ ᤗᤣ᤺ᤳᤋᤧᤶᤔᤧ᤹ ᤜᤧᤰᤁᤩᤠᤱ ᤋᤱᤏᤠᤶ ᤋᤥᤔᤠ ᤐᤠᤱᤄᤧᤶᤔᤧ᤹॥ 49 ᤀᤠᤒᤠᤅᤣ ᤗᤠᤈᤣ᤹ᤀᤥ ᤛᤠᤃᤧᤘᤠ᤺ᤴᤇᤡᤱᤒᤠ ᤀᤡᤛᤪᤠᤀᤡᤗᤡᤜᤠ᤹ ᤏᤢ ᤂᤡᤏᤡ᤹ᤗᤢᤶᤔᤥ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤗᤳᤇᤠ ᤐᤖᤡᤰᤐᤠ ᤌᤡᤶ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥᤱ᤹॥” 50 ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤡᤱᤈᤠᤱᤅᤡᤴ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤳᤋᤢᤛᤡᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤔᤧᤈᤥᤃᤢ॥ 51 ᤀᤠᤶᤓᤠ ᤂᤧᤸᤗᤧ ᤕᤠ᤺ᤴᤍᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤛᤢᤘᤠᤱᤜᤠ᤹ ᤔᤡᤛᤪᤗᤠᤶᤒᤠ ᤗ᤺ᤳᤋᤢ ᤑᤧᤳᤋᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.