ᤀᤧᤛ᤻ᤋᤖ 9 - LIFOTNTᤕᤜᤢᤍᤡᤜᤠ᤹ᤖᤧ ᤏᤡᤱᤔᤡᤜᤠ᤹ ᤔᤧᤔᤧᤰᤂᤢᤛᤡ 1 ᤌᤡᤒᤥᤱᤅᤠᤱ ᤏᤧᤳᤇᤡᤃᤣᤰᤐᤠ ᤗᤠ. ᤀᤡᤃᤪ ᤀᤍᤠᤖ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤛᤢᤶᤛᤡᤃᤣᤰᤐᤠ ᤕᤧᤴᤏᤥ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤁᤧᤵᤔᤠ ᤕᤧᤴᤏᤡᤴ ᤁᤧᤖᤧᤍᤩᤧ॥ ᤀᤠᤶᤓᤠ ᤂᤧᤴ ᤕᤧᤴᤏᤥ ᤕᤜᤢᤍᤡᤜᤠ᤹ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤜᤢᤰᤁᤥ ᤋᤠ᤺ᤵᤔᤠᤛᤡ ᤏᤡᤱᤛᤠᤱ ᤔᤧᤈᤥᤃᤢᤀᤠᤱ ᤘᤕᤧ॥ ᤁᤖ ᤂᤧᤸᤗᤧ ᤁᤢᤗᤧᤰᤘᤠᤀᤥᤃ ᤕᤜᤢᤍᤡᤜᤠ᤹ᤖᤧᤏᤡ ᤂᤢᤴᤇᤡ᤹ ᤏᤡᤱᤔᤡᤜᤠ᤹ ᤕᤢᤰᤔᤠᤛᤡ ᤕᤧᤴ ᤐᤥ᤺ᤰᤂᤧ॥ 2 ᤂᤧᤸᤗᤧ ᤕᤠ᤺ᤴᤍᤡᤰ ᤕᤜᤢᤍᤡᤜᤠ᤹ ᤔᤧᤱᤔᤠᤛᤡ ᤁᤧᤃᤥ᤺ᤵᤐᤠᤜᤠ᤹ ᤑᤵᤔᤠᤛᤡᤖᤧ ᤗᤠᤃᤡ ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᤁᤧᤖᤧᤰ ᤁᤢᤍᤧ᤺ᤱᤃᤵᤐᤥᤒᤠ ᤕᤧᤰᤕᤰᤜᤠ᤹ᤀᤥ ᤕᤜᤢᤍᤡᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤀᤵᤔᤠ ᤔᤧᤴᤇᤢᤰᤋᤢᤛᤡᤴ. ᤌᤣᤀᤠᤱᤓᤧᤸᤗᤧ ᤘᤣ᤹ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤧᤱᤜᤠ᤹ᤏᤢ ᤔᤧᤃᤡᤛᤧᤀᤠᤱ ᤔᤧᤘᤕᤧ॥ 3 ᤂᤧᤱᤜᤠ᤹ ᤔᤥᤷᤍᤁᤤ᤺ᤴᤏᤢ ᤔᤧᤃᤡᤛᤧᤒᤠᤸᤗᤧ ᤆᤥᤃᤢᤸᤗᤧ ᤋᤧᤱᤃᤵ ᤋᤧᤱᤃᤵᤐᤥᤒᤠ ᤁᤧᤖᤧᤰ ᤋᤢᤶᤔᤩᤠᤱᤜᤠᤱᤜᤠ᤹. ᤜᤠᤱᤈᤢᤶᤔᤥᤒᤠ ᤕᤶᤒᤠ ᤛᤢᤜᤠᤱᤃᤧᤶᤒᤠᤜᤠ᤹ ᤏᤢ ᤜᤠᤱᤕᤢᤰᤐᤠᤜᤠ᤹ᤖᤧ ᤕᤜᤢᤍᤡᤜᤠ᤹ ᤔᤧᤓᤠ᤹ᤖᤢᤛᤡ॥ 4 ᤜᤠᤱᤜᤡᤶᤔᤥ ᤔᤥᤷᤍᤁᤤᤴ ᤗᤳᤇᤠ ᤕᤶᤒᤠ ᤁᤢᤎᤧᤃᤣᤰ ᤔᤏᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤸᤗᤛᤠᤱ ᤛᤠ᤹ᤖᤡᤰ ᤔᤢᤰᤛᤠᤶᤛᤠᤒᤠ ᤐᤥ᤺ᤰᤂᤧᤀᤠᤱ ᤂᤢᤏᤧ᤹ ᤁᤢᤔᤡᤱᤛᤥ ᤁᤢᤎᤠᤱᤛᤥᤴ ᤁᤧᤖᤧᤰ ᤋᤧᤱᤃᤵᤜᤠ᤹ᤀᤥ ᤛᤧᤖᤧ॥ 5 ᤁᤶᤓᤗ᤹ᤖᤡᤰ ᤕᤜᤢᤍᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤏᤡᤱᤔᤡᤜᤠ᤹ ᤋᤠᤓᤣ᤺ᤸᤗᤧ ᤑᤠ᤺ᤳᤗᤧ᤺ᤱ ᤔᤧᤔᤧᤳᤋᤢᤛᤡᤀᤠᤱ ᤔᤧᤛᤧᤖᤢᤛᤡ ᤜᤧᤰᤁᤩᤠᤱ ᤔᤧᤔᤧᤰᤂᤢᤛᤡ॥ ᤂᤢᤴᤇᤡ᤹ ᤁᤧᤈᤡ᤺ᤵᤐᤠᤜᤠ᤹ ᤕᤜᤢᤍᤡᤜᤠ᤹ᤖᤧ ᤐᤠ᤺ᤵᤐᤠ᤺ᤳ ᤔᤧᤔᤧᤳᤋᤢᤛᤡ॥ 6 ᤜᤠᤱᤐᤠᤱ ᤛᤢᤛᤏᤀᤥ ᤕᤜᤢᤍᤡᤜᤠ᤹ᤖᤧ ᤁᤡᤵ ᤅᤠᤛᤡ ᤕᤧᤶᤒᤡᤳᤇᤠᤜᤠ᤹ ᤔᤧᤛᤩᤧᤖᤢᤛᤡᤀᤠᤱ ᤔᤧᤔᤧᤰᤂᤢᤛᤡ॥ 7 ᤂᤧᤱᤜᤠ᤹ᤖᤧ ᤐᤷᤛᤴᤍᤠᤋᤠ. ᤍᤸᤑᤥᤏ. ᤀᤛ᤻ᤐᤠᤋᤠ. 8 ᤐᤥᤖᤠᤋᤠ. ᤀᤍᤗᤡᤕᤠ. ᤀᤖᤡᤍᤠᤋᤠ. 9 ᤐᤷᤔᤛᤋᤠ. ᤀᤖᤡᤛᤤ. ᤀᤖᤡᤍᤤ ᤏᤢ ᤒᤤᤈᤠᤋᤠ. 10 ᤜᤶᤔᤠᤍᤠᤋᤠ᤺ᤸᤗᤧ ᤁᤢᤛ᤻ᤛᤠ ᤕᤜᤢᤍᤡᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤔᤡ ᤜᤠᤔᤠᤏᤧᤸᤗᤧ ᤁᤴ ᤁᤧᤖᤧᤰ ᤌᤡᤒᤥᤱ ᤁᤢᤛ᤻ᤛᤠᤜᤠ᤹ᤀᤠᤱ ᤔᤧᤛᤩᤧᤖᤢᤛᤡ॥ ᤁᤖ ᤂᤧᤱᤜᤠ᤹ᤖᤧ ᤆᤡᤃᤰᤘᤠ ᤏᤠᤵᤔᤠ ᤕᤠ᤺ᤶᤒᤰᤁᤥ ᤜᤢᤰᤔᤧᤱᤃᤣ᤺ᤳᤋᤢᤴ॥ 11 ᤜᤠᤒᤠ ᤂᤧᤸᤗᤧ ᤕᤠ᤺ᤴᤍᤡᤰ ᤜᤠᤱᤐᤠᤱ ᤛᤢᤛᤏᤀᤥ ᤔᤧᤛᤩᤧᤖᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤂᤠᤏᤡ᤺ᤳᤋᤡᤴ ᤜᤠᤱᤅᤡᤴ ᤔᤧᤈᤧᤰᤋᤢ॥ 12 ᤜᤠᤱᤅᤡᤸᤗᤧ ᤜᤠᤱᤔᤠ ᤀᤧᤛ᤻ᤋᤖᤧᤴ ᤔᤧᤳᤋᤢ. “ᤜᤠᤱᤐᤠᤱ ᤛᤢᤛᤏᤀᤥ ᤕᤜᤢᤍᤡᤜᤠ᤹ᤖᤧ ᤁᤡᤵ ᤅᤠᤛᤡ ᤔᤏᤠᤜᤠ᤹ ᤏᤢ ᤜᤠᤔᤠᤏᤧᤸᤗᤧ ᤁᤧᤖᤧᤰ ᤌᤡᤒᤥᤱ ᤁᤢᤛ᤻ᤛᤠᤜᤠ᤹ᤀᤠᤱ ᤔᤧᤛᤧᤖᤢᤛᤡᤀᤠᤱ ᤔᤧᤔᤧᤰᤂᤢᤛᤡᤀᤠᤱ ᤘᤠ᤹॥ ᤜᤠᤱᤅᤡᤸᤗᤧ ᤘᤣ᤹ ᤁᤢᤍᤧ᤺ᤱᤃᤵᤜᤠ᤹ᤀᤥ ᤂᤧᤱᤜᤠ᤹ᤖᤧ ᤌᤣᤎᤣ ᤔᤧᤈᤥᤃᤢᤒᤡᤗᤠ᥅ ᤀᤠᤸᤗᤛᤠᤱ ᤐᤠ᤺ᤳᤋᤧ᤹. ᤆᤧᤸᤗᤧᤰᤛᤣ᤹ ᤛᤣᤈᤱᤘᤠᤴ ᤌᤢᤅᤢᤖ ᤜᤠᤱᤅᤡᤸᤗᤧ ᤀᤧᤛ᤻ᤋᤖᤧᤴ ᤕᤠᤶᤔᤥ ᤔᤧᤳᤋᤢ. ‘ᤂᤧᤏᤧ᤹ ᤁᤧᤒᤣᤗᤡᤴ ᤌᤣᤒᤣ᥅ ᤂᤧᤴ ᤁᤧᤄᤥᤛᤢ᤹॥ ᤂᤧᤏᤧ᤹ ᤁᤧᤏᤠ᤺ᤰᤋᤢᤒᤠ ᤐᤠ᤺ᤴᤏᤡᤴ ᤌᤣᤒᤣ᥅ ᤀᤠᤱᤃᤠ᤹ ᤀᤠᤜᤠᤱᤈᤢᤶᤔᤡᤴ ᤁᤢᤓᤪᤧ᤺ᤱ ᤕᤠᤖᤡᤰᤛᤠᤱ ᤀᤠᤱᤃᤠ᤹ ᤂᤧᤴ ᤐᤡᤏᤧᤖᤥ॥’” 13 ᤀᤧᤛ᤻ᤋᤖᤧᤸᤗᤧ ᤂᤢᤏᤧ᤹ ᤏᤢᤃᤵ ᤐᤡᤖᤢ. “ᤜᤠᤱᤅᤡᤸᤗᤧ ᤏᤢᤒᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤏᤧᤓᤃᤪ ᤀᤠᤀᤡᤴᤒᤠ ᤀᤡᤱᤈᤠᤱ ᤁᤢᤀᤡᤛᤡᤰ ᤋᤠ᤺ᤴᤍᤡᤰᤁᤠᤱ ᤀᤠᤶᤓᤠ ᤁᤶᤓᤗ᤹ᤖᤡᤰ ᤛᤢᤛᤏᤀᤥ ᤕᤜᤢᤍᤡᤜᤠ᤹ᤖᤧ ᤆᤥ᤺ᤰᤔᤠ ᤔᤧᤄᤥᤛᤢᤖ ᤑᤠ᤹ᤀᤠᤱ ᤂᤧᤱᤜᤠ᤹ ᤆᤥ᤺ᤰᤔᤠ ᤑᤠ᤺ᤰᤋᤧᤛᤧ᤹ᤀᤥ॥ ᤜᤧᤰᤁᤩᤠᤱ ᤜᤠᤔᤠᤏᤧᤸᤗᤧ ᤂᤧᤴ ᤌᤡᤒᤥᤱ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤔᤏᤠ ᤑᤥ᤺ᤶᤔᤠᤛᤧᤵᤔᤠ ᤛᤡᤱᤅᤥ ᤔᤧᤓᤥᤴᤍᤢᤛᤡᤖᤖᤥ॥” 14 ᤂᤧᤒᤩᤠᤱ ᤜᤧᤰᤁᤣ ᤆᤥ᤺ᤰᤔᤠ ᤜᤠᤱᤅᤡᤸᤗᤧ ᤀᤡᤱᤈᤠᤱ ᤐᤡᤖᤢᤛᤡ॥ ᤛᤢᤛᤏᤀᤥ ᤀᤡᤱᤈᤠᤱ ᤔᤧᤗ᤺ᤳᤋᤢ. ᤜᤧᤰᤁᤩᤠᤱ ᤜᤠᤔᤠᤏᤧᤸᤗᤧ ᤌᤡᤒᤥᤱᤅᤣ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤔᤏᤠ ᤑᤥ᤺ᤶᤔᤠᤛᤧᤵᤔᤠ ᤛᤡᤱᤅᤥ ᤔᤧᤓᤥ᤺ᤴᤍᤢᤛᤡ॥ 15 ᤀᤍᤠᤖ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤕᤧᤴᤏᤥ ᤕᤜᤢᤍᤡᤜᤠ᤹ ᤕᤠᤶᤔᤥ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤛᤢᤛᤏᤀᤥ ᤁᤡᤵ ᤛᤢᤶᤛᤡ ᤔᤏᤠᤜᤠ᤹ ᤔᤧᤛᤩᤧᤖᤢᤛᤡ॥ ᤁᤖ ᤂᤧᤱᤜᤠ᤹ᤖᤧ ᤏᤠᤵᤔᤠᤛᤡ ᤕᤠ᤺ᤶᤒᤰᤁᤥ ᤜᤢᤰᤔᤧᤱᤃᤣ᤺ᤳᤋᤢᤴ॥ 16 ᤀᤠᤶᤓᤠ ᤁᤴ ᤕᤧᤶᤔᤥ ᤜᤠᤱᤅᤡᤸᤗᤧ ᤁᤢᤍᤧ᤺ᤱᤃᤵᤜᤠ᤹ᤀᤥ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤕᤜᤢᤍᤡᤜᤠ᤹ ᤀᤠᤒᤠᤅᤣ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤏᤢ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤗᤠᤶ ᤋᤠᤱᤔᤠᤖᤧ ᤗᤠᤃᤡ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤈᤡ᤺ᤵᤐᤠ ᤏᤢᤒᤥᤱᤅᤠᤱ ᤅᤠᤛᤡ ᤜᤧᤴᤇᤡᤱ ᤔᤏᤠᤜᤠ᤹ ᤔᤧᤛᤩᤧᤖᤢᤛᤡ. ᤁᤖ ᤂᤧᤱᤜᤠ᤹ᤖᤧ ᤏᤠᤵᤔᤠᤛᤡ ᤕᤠ᤺ᤶᤒᤰᤁᤥ ᤜᤢᤰᤔᤧᤱᤃᤣ᤺ᤳᤋᤢᤴ॥ 17 ᤁᤴ ᤀᤍᤠᤖ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤛᤢᤶᤛᤡᤃᤣᤰᤐᤠ ᤕᤧᤴᤏᤥ ᤔᤧᤈᤥᤃᤢ॥ ᤌᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤕᤧᤴᤏᤥ ᤂᤧᤱᤜᤠ᤹ ᤔᤧᤏᤠ᤺ᤶᤛᤡᤱ॥ ᤂᤧᤸᤗᤧ ᤕᤠ᤺ᤴᤍᤡᤰ ᤗᤳᤇᤠ ᤋᤱᤏᤠᤶ ᤏᤢ ᤛᤥᤛᤥᤳᤗᤖᤠᤱ ᤕᤧᤴ ᤔᤧᤍᤥᤛᤢ॥ 18 ᤁᤖ ᤛᤢᤛᤏᤒᤠ ᤕᤜᤢᤍᤡᤜᤠ᤹ᤃ ᤂᤧᤴ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤛᤢᤶᤛᤡᤃᤣᤰᤐᤠ ᤏᤢ ᤌᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤕᤧᤴᤏᤥ ᤌᤡᤰᤜᤢᤵ ᤔᤧᤒᤥ᤺ᤰᤂᤧ ᤜᤧᤰᤁᤩᤠᤱ ᤌᤡᤒᤥᤱᤅᤠᤱ ᤅᤠᤛᤡᤃᤣᤰᤐᤠ ᤕᤧᤴᤏᤥ ᤔᤧᤏᤠ᤺ᤶᤛᤡᤱ. ᤂᤧᤒᤩᤠᤱ ᤂᤧᤴ ᤕᤧᤴᤏᤡᤴ ᤋᤱᤏᤠᤶ ᤋᤥᤔᤠ ᤏᤢ ᤛᤥᤛᤥᤳᤗᤖᤠᤱ ᤆᤥ᤺ᤰᤔᤠ ᤕᤧᤴ ᤏᤡ᤺ᤴᤎᤥ ᤔᤧᤈᤥᤃᤢ॥ 19 ᤁᤸᤗᤧᤆᤥᤃᤢᤸᤗᤧ ᤔᤠ᤺ᤱᤄᤠ ᤔᤠ᤺ᤱᤄᤠᤒᤠ ᤐᤠᤱᤓᤣ᤹ᤜᤠ᤹ᤀᤥ ᤁᤧᤕᤢᤱᤒᤠ ᤐᤠᤱᤓᤣ᤹ᤛᤠᤒᤠ ᤕᤜᤢᤍᤡᤜᤠ᤹ ᤀᤍᤠᤖ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤕᤧᤴᤏᤥ ᤛᤥᤛᤥᤳᤗᤖᤠᤱ ᤏᤢ ᤋᤱᤏᤠᤶ ᤕᤧᤴ ᤔᤧᤍᤥᤛᤢ. ᤜᤧᤰᤁᤩᤠᤱ ᤂᤧᤴ ᤕᤧᤴᤏᤥ ᤂᤧᤱᤜᤠ᤹ ᤂᤢᤴᤇᤡ᤹ ᤗᤢᤶᤔᤥ ᤜᤢᤰᤘᤠᤜᤠ᤹ ᤔᤧᤜᤠᤰᤛᤡᤱᤗᤥ॥ ᤐᤢᤖᤡᤔ ᤋᤱᤏᤠᤶ 20 ᤔᤥᤷᤍᤁᤤ᤺ᤸᤗᤧ ᤁᤴ ᤐᤠ᤺ᤴᤜᤠ᤹ ᤛᤠᤵᤋᤢᤏᤧᤛ᤻ᤛᤢ. ᤜᤧᤰᤁᤩᤠᤱ ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᤁᤧᤖᤧᤰ ᤁᤢᤍᤧ᤺ᤱᤃᤵᤜᤠ᤹ᤀᤥᤒᤠ ᤔᤠ᤺ᤱᤄᤠ ᤏᤢ ᤏᤡ᤺ᤳᤋᤠᤱᤒᤠ ᤁᤧᤖᤧᤰ ᤕᤜᤢᤍᤡᤜᤠ᤹ ᤂᤢᤏᤧ᤹ ᤛᤰᤀᤡᤱᤄᤱ ᤛᤠᤵᤐᤧ᤺ᤵᤋᤠᤜᤠ᤹ ᤛᤠᤵᤋᤢᤀᤠᤱ ᤜᤠᤰᤋᤢᤛᤡ॥ 21 ᤁᤧᤖᤧᤰ ᤑᤠᤖᤛ ᤜᤠᤱᤈᤢᤶᤔᤥ ᤂᤢᤏᤧ᤹ ᤀᤍᤠᤖ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤏᤢ ᤅᤠᤛᤡᤃᤣᤰᤐᤠ ᤕᤧᤴᤏᤥ ᤋᤱᤒᤣ ᤌᤰᤔᤠ ᤛᤥᤛᤥᤳᤗᤖᤠᤱ ᤆᤥ᤺ᤰᤔᤠᤖᤧ ᤗᤠᤃᤡ ᤛᤰᤀᤡᤱᤄᤱ ᤜᤠᤰᤋᤢᤛᤡ॥ 22 ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤴᤏᤥ ᤕᤜᤢᤍᤡᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤗᤠᤶ ᤏᤠ᤺ᤶᤛᤡᤱᤔᤠ ᤔᤧᤄᤥᤛᤢᤒᤠ ᤏᤢ ᤂᤢᤴᤇᤡ᤹ ᤗᤠᤃᤡ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤠᤗᤠᤶ ᤛᤥᤛᤥᤳᤗᤖᤠᤱᤅᤥ ᤜᤧᤰᤁᤩᤠᤱ ᤔᤧᤖᤡᤱ ᤌᤰᤔᤠᤗᤠᤶ ᤛᤛᤠᤱᤛᤪᤥᤳ ᤆᤥ᤺ᤰᤔᤠ ᤗᤠᤀᤥ ᤗᤧᤰᤂᤧᤀᤠᤱ ᤘᤕᤧ॥ ᤂᤧᤱᤜᤠ᤹ᤖᤧ ᤂᤧᤴ ᤕᤧᤴᤜᤠ᤹ ᤋᤱᤏᤠᤶ ᤏᤢ ᤛᤥᤛᤥᤳᤗᤖᤠᤱ ᤆᤥ᤺ᤰᤔᤠ. ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤢᤶᤔᤥ ᤆᤠᤔᤠ ᤁᤢᤈᤠᤜᤠ᤹ ᤜᤢᤰᤘᤠ ᤜᤠᤰᤛᤡᤱᤔᤠ ᤏᤢ ᤕᤠᤱᤃᤧᤛᤠ᤹ᤒᤠᤜᤠ᤹ ᤜᤢᤰᤘᤠ ᤐᤡᤔᤠᤛᤡ ᤕᤧᤴ ᤜᤧᤰᤁᤣ ᤋᤥᤔᤠ ᤐᤥᤱ᤹ ᤑᤠ᤹ᤀᤠᤱ ᤂᤢᤏᤧ᤹ ᤛᤠᤵᤋᤢ॥ 23 ᤁᤸᤗᤧᤆᤥᤃᤢᤸᤗᤧ ᤔᤥᤷᤍᤁᤤ᤺ᤸᤗᤧ ᤛᤠᤵᤋᤢᤒᤠ ᤁᤢᤀᤡᤛᤡᤰ ᤁᤢᤜᤣ᤺ᤰᤛᤡᤱᤔᤠ ᤆᤥᤃᤢᤒᤠ ᤛᤠᤰᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤕᤜᤢᤍᤡᤜᤠ᤹ ᤔᤧᤍᤧᤴᤍᤧ॥ 24 ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤕᤜᤢᤍᤡᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤔᤡ ᤀᤃᤠᤃᤡ ᤜᤶᤔᤍᤠᤋᤠ᤺ᤸᤗᤧ ᤁᤢᤛ᤻ᤛᤠ ᤜᤠᤔᤠᤏᤧᤸᤗᤧ ᤕᤜᤢᤍᤡᤜᤠ᤹ ᤔᤧᤱᤔᤠᤛᤡᤖᤧ ᤗᤠᤃᤡ ᤆᤧᤶᤓᤴ ᤆᤥᤃᤢᤀᤠᤱ ᤁᤢᤓᤠ ᤕᤧᤴᤏᤡᤴ ᤛᤧᤶᤔᤠᤖᤧ ᤗᤠᤃᤡ ᤋ᤹ᤕᤠ᤺ᤴᤛᤥᤴ ᤁᤧᤛᤢᤀᤠᤱ ᤘᤕᤧ॥ ᤂᤧᤴ ᤐᤢᤖ (ᤋ᤹ᤕᤠ᤺ᤴᤛᤥᤴ ᤁᤧᤔᤠ) ᤔᤧᤔᤧᤳᤋᤢᤀᤠᤱ ᤘᤕᤧ॥ 25 ᤁᤖ ᤀᤧᤛ᤻ᤋᤖᤧᤴ ᤜᤠᤱᤅᤡᤸᤗᤧ ᤁᤢᤍᤃᤡ ᤁᤧᤖᤧᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤜᤠᤔᤠᤏᤧᤸᤗᤧ ᤆᤥ᤺ᤰᤔᤠ ᤁᤥ᤺ᤳᤋᤢᤒᤠ ᤂᤧᤴ ᤋᤠᤵᤑᤧ᤺ᤶᤒᤠ ᤆᤧᤶᤓᤴᤏᤡᤴ ᤀᤠᤵᤑᤣᤰ ᤁᤢᤎᤧᤃᤣ᤺ᤰᤐᤥ ᤌᤠᤔᤠᤖᤧ ᤗᤠᤃᤡ ᤂᤢᤏᤧ᤹ ᤏᤢ ᤁᤢᤛ᤻ᤛᤠᤜᤠ᤹ ᤛᤡᤱᤅᤥ ᤑᤥ᤺ᤴᤇᤧ ᤜᤠᤱᤅᤡᤸᤗᤧ ᤛᤠᤵᤔᤏᤠᤒᤠ ᤀᤡᤱᤈᤠᤱ ᤗ᤺ᤳᤋᤢ॥ 26 (ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤁᤴ ᤕᤧᤴᤜᤠ᤹ ᤐᤢᤖᤡᤔ ᤔᤧᤔᤧᤳᤋᤢ. ᤂᤧᤴ ᤐᤢᤖ ᤐᤠ᤺ᤴᤛᤢᤳᤗᤠᤗᤠᤶ ᤋᤩᤧᤒᤠᤖᤥ॥) ᤂᤧᤴ ᤛᤰᤀᤡᤱᤄᤱᤅᤥ ᤛᤠᤵᤋᤧᤒᤠ ᤁᤢᤀᤡᤛᤡᤰ ᤏᤢ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤒᤠ ᤜᤧᤰᤁᤩᤠᤱ ᤏᤡᤱᤘᤠ᤹ ᤔᤧᤄᤥᤛᤢᤒᤠ ᤐᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ. 27 ᤕᤜᤢᤍᤡᤜᤠ᤹ ᤀᤠᤒᤠᤅᤣ ᤏᤢ ᤂᤢᤴᤇᤡ᤹ ᤔᤢ᤹ᤀᤡᤱᤍᤠᤱᤛᤠᤜᤠ᤹ ᤜᤧᤰᤁᤩᤠᤱ ᤂᤢᤴᤇᤡ᤹ᤏᤢ ᤁᤧᤓᤢᤱᤛᤡᤱᤒᤠ ᤁᤧᤖᤧᤰᤗᤧ ᤗᤠᤃᤡ ᤁᤴ ᤏᤡᤕᤠ᤺ᤴᤒᤠ ᤕᤧᤴᤏᤡᤴ ᤋᤱᤒᤣ ᤌᤰᤔᤠ ᤋᤥᤰ ᤁᤧᤒᤥᤱᤒᤠ ᤌᤡᤶ ᤁᤢᤀᤡᤛᤡᤰ ᤏᤢ ᤏᤡ᤺ᤴᤎᤥ ᤁᤧᤒᤥᤱᤒᤠ ᤕᤧᤴᤏᤥ ᤋᤥᤔᤠᤀᤣ ᤐᤥᤱ᤹. 28 ᤜᤧᤰᤁᤩᤠᤱ ᤌᤠ᤺ᤰᤌᤠ᤺ᤰ ᤌᤠᤖᤡᤰ ᤁᤧᤖᤧᤰ ᤜᤡᤶᤛᤕᤱᤜᤠ᤹ᤖᤧ ᤋᤧᤱᤃᤵ ᤌᤰᤔᤠ ᤏᤢ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥ ᤐᤢᤖᤡᤶᤒᤠ ᤕᤧᤴᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤀᤣ ᤐᤥᤱ᤹ ᤜᤧᤰᤁᤩᤠᤱ ᤂᤧᤸᤗᤧ ᤏᤡᤱᤘᤠ᤹ᤛᤥᤰᤁᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤡᤴᤍᤠᤱ ᤛᤠᤕᤥᤒᤥᤖᤠ ᤔᤢ᤹ᤀᤡᤍᤠᤱᤛᤠᤜᤠ᤹ᤀᤥ ᤀᤠᤓᤧᤸᤗᤧᤀᤠᤱ ᤆᤰᤔᤧᤗ᤹ᤏᤧᤸᤗ ᤁᤧᤗ᤹ᤒᤠ ᤂᤧᤱᤜᤠᤖᤧ ᤏᤡ᤺ᤴᤎᤥ ᤔᤧᤈᤥᤃᤢ॥ 29 ᤂᤧᤒᤩᤠᤱ ᤀᤒᤡᤜᤣᤗᤖᤧ ᤁᤢᤛ᤻ᤛᤠ ᤜᤠᤱᤔᤠ ᤀᤧᤛ᤻ᤋᤖᤧᤴ ᤏᤢ ᤕᤜᤢᤍᤡ ᤔᤥᤷᤍᤁᤤ᤺ᤸᤗᤧ ᤁᤧᤖᤧᤰ ᤕᤢᤰᤏᤢ ᤏᤡᤛᤡᤃᤣᤰᤐᤠ ᤛᤰᤀᤡᤱᤄᤱ ᤛᤠᤵᤋᤧᤛᤢᤀᤠᤱ ᤐᤢᤖᤡᤔ ᤋᤱᤏᤠᤶᤔᤡᤴ ᤋᤥᤔᤠᤀᤣ ᤁᤧᤒᤥᤱᤒᤠ ᤁᤢᤒᤢᤱ ᤕᤢᤰᤂᤧᤛᤢ॥ 30 ᤔᤥᤷᤍᤁᤤ᤺ᤸᤗᤧ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤁᤢᤀᤡᤛᤡᤰ ᤐᤢᤖᤡᤶᤒᤠ ᤁᤴ ᤕᤧᤴᤜᤠ᤹ ᤏᤡ᤺ᤴᤎᤥ ᤁᤧᤒᤥᤱᤒᤠ ᤕᤧᤶᤔᤥ ᤋᤥᤔᤠ ᤕᤠ᤺ᤴᤍᤢᤛᤡᤖ ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᥇᥈᥍ ᤁᤢᤍᤧ᤺ᤱᤃᤵᤜᤠ᤹ᤀᤥ ᤛᤏᤠᤖᤢᤱ ᤏᤢ ᤋᤠᤵᤌᤣᤰ ᤕᤠᤶᤎᤣᤰᤐᤠ ᤏᤢᤀᤡᤳᤇᤥ ᤀᤥᤛᤣ᤺ᤴᤎᤠᤱ ᤆᤥ᤺ᤰᤏᤢ ᤁᤧᤖᤧᤰ ᤕᤜᤢᤍᤡᤜᤠ᤹ ᤛᤰᤀᤡᤱᤄᤱ ᤜᤠᤰᤋᤢᤛᤡ॥ 31 ᤀᤠᤰᤂᤣᤗ᤹ᤖᤡᤰ ᤕᤜᤢᤍᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤋ᤺ᤰᤏᤧᤳ ᤕᤢᤱᤔᤠ ᤏᤢ ᤔᤧᤖᤡᤱ ᤌᤰᤔᤠ ᤌᤡᤶᤜᤠ᤹ ᤔᤧᤏᤠ᤺ᤳᤋᤢᤖ ᤔᤧᤘᤕᤧ ᤜᤠᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤂᤧᤱᤜᤠ᤹ ᤏᤢ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤐᤢᤖᤡᤶᤒᤠ ᤕᤧᤴᤜᤠ᤹ ᤔᤧᤍᤥᤛᤢᤖ ᤐᤥᤱ᤹ ᤑᤠ᤹ᤀᤠᤱ ᤔᤥᤷᤍᤁᤤᤴ ᤏᤢ ᤀᤧᤛ᤻ᤋᤖ ᤜᤠᤱᤔᤧᤸᤗᤧ ᤀᤡᤱᤈᤠᤱ ᤐᤡᤖᤧᤛᤢᤛᤡᤀᤠᤱ ᤘᤕᤧ॥ 32 ᤐᤢᤖᤡᤶᤔᤡᤸᤗᤧ ᤗᤠᤃᤡ ᤁᤴ ᤌᤡᤶᤜᤠ᤹ ᤀᤧᤛ᤻ᤋᤖᤧᤸᤗᤧ ᤀᤡᤈᤠᤱᤅᤡᤸᤗᤧ ᤛᤧᤰᤂᤠᤒᤠ ᤏᤡ᤺ᤴᤎᤥ ᤆᤥᤃᤢ. ᤜᤧᤰᤁᤩᤠᤱ ᤂᤧᤴ ᤌᤡᤶᤜᤠ᤹ ᤔᤧᤛᤠᤵᤋᤢᤀᤠᤱ ᤔᤧᤏᤧᤛ᤻ᤛᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.