ᤀᤧᤛ᤻ᤋᤖ 8 - LIFOTNT

ᤜᤠᤱᤅᤡᤸᤗᤧ ᤕᤜᤢᤍᤡᤜᤠ᤹ ᤋᤠᤱᤛᤧ᤺ᤵᤔᤠᤛᤡ ᤁᤢᤀᤡᤱᤈᤠᤱ

¹ ᤜᤠᤒᤠ ᤂᤧᤸᤗᤧ ᤕᤠ᤺ᤴᤍᤡᤰ ᤕᤜᤢᤍᤡᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤔᤡ ᤜᤠᤔᤠᤏᤧᤸᤗᤧ ᤁᤢᤜᤡᤶ ᤁᤢᤎᤠ᤺ᤱᤜᤠ᤹ ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᤜᤠᤱᤔᤠ ᤀᤧᤛ᤻ᤋᤖᤧᤴ ᤐᤡᤖᤢ॥ ᤜᤧᤰᤁᤩᤠᤱ ᤔᤥᤷᤍᤁᤤᤴ ᤂᤢᤏᤧ᤹ ᤀᤠᤵᤑᤣᤰ ᤀᤠᤃᤠ᤹ᤀᤡ ᤌᤠᤵ ᤑᤠ᤹ᤀᤠᤱ ᤀᤧᤛ᤻ᤋᤖᤧᤸᤗᤧ ᤜᤠᤱᤅᤡᤴ ᤔᤧᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤔᤥᤷᤍᤁᤤᤴ ᤜᤠᤱᤅᤡᤸᤗᤧ ᤁᤢᤍᤃᤡ ᤋᤩᤧ॥

² ᤂᤶᤓᤩᤠᤱ ᤜᤠᤱᤅᤡᤸᤗᤧ ᤜᤠᤔᤠᤏᤧᤴ ᤗᤠᤶᤒᤠ ᤋᤠ᤺ᤰᤋᤢᤒᤠ ᤀᤣ᤺ᤵᤛᤠᤵ ᤁᤢᤛᤫᤠᤃᤣ᤺ᤵᤐᤡᤴ ᤑᤧᤴᤍᤢᤀᤠᤱ ᤔᤡᤰᤋᤥᤰ ᤁᤢᤀᤡᤛᤡᤰ ᤔᤥᤷᤍᤁᤤᤴ ᤐᤡᤖᤢ॥ ᤀᤧᤛ᤻ᤋᤖᤧᤸᤗᤧ ᤜᤠᤔᤠᤏᤧᤸᤗᤧ ᤁᤢᤜᤡᤶ ᤁᤢᤎᤠ᤺ᤱᤜᤠ᤹ ᤔᤥᤷᤍᤁᤤᤴ ᤜᤢᤰᤛᤢᤵᤋᤢ॥

³ ᤕᤠᤶᤔᤥ ᤀᤧᤛ᤻ᤋᤖᤧᤴ ᤜᤠᤒᤧᤖ ᤜᤠᤱᤅᤡᤸᤗᤧ ᤁᤢᤗᤠᤱᤈᤰᤐᤥ ᤑᤴᤇᤡᤱᤅᤠᤱ ᤀᤃᤠᤃᤡ ᤜᤠᤔᤠᤏᤧᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤆᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤆᤧᤶᤓᤴᤏᤡᤴ ᤂᤧᤳᤋᤧ ᤀᤠᤒᤡᤖᤧ᤹ ᤑᤠ᤹ᤀᤠᤱ ᤜᤠᤱᤅᤡᤴ ᤐᤣᤗᤡ ᤑᤠᤰᤋᤢ॥

⁴ ᤜᤠᤱᤅᤡᤸᤗᤧ ᤀᤧᤛ᤻ᤋᤖᤧᤴ ᤗᤧᤵᤔᤠᤱ ᤛᤠᤶᤔᤩᤠᤱ ᤁᤢᤜᤠᤱ ᤋᤰᤁᤠ᤺ᤳᤋᤡᤴ ᤛᤴᤇᤢ ᤜᤧᤰᤁᤩᤠᤱ ᤂᤢᤏᤧ᤹ ᤐᤥᤃᤧᤀᤠᤱ ᤜᤠᤱᤅᤡᤸᤗᤧ ᤁᤢᤍᤃᤡ ᤕᤧᤶᤛᤡᤱᤅᤠᤱ ᤕᤧᤒᤧ॥

⁵ ᤀᤧᤛ᤻ᤋᤖᤧᤸᤗᤧ ᤔᤧᤳᤋᤢ. “ᤜᤠᤱᤅᤡᤸᤗᤧ ᤏᤢᤒᤠ ᤁᤧᤀᤡ᤺ᤳᤋᤢᤏᤧᤓᤃᤪ. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤗᤢᤱᤔᤠ᤹ ᤁᤧᤍᤢᤰᤁᤠᤏᤧᤓᤃᤪ. ᤜᤠᤱᤅᤡᤸᤗᤧ ᤁᤧᤘᤠ᤹ᤒᤠ ᤁᤧᤀᤡ᤺ᤳᤋᤢ. ᤜᤧᤰᤁᤩᤠᤱ ᤀᤠᤍᤠᤱᤒᤠ ᤁᤧᤍᤧᤴᤏᤧᤓᤃᤪ ᤀᤃᤠᤃᤡ ᤜᤶᤔᤍᤠᤋᤠ᤺ᤸᤗᤧ ᤁᤢᤛ᤻ᤛᤠ ᤜᤠᤔᤠᤏᤧᤸᤗᤧ ᤜᤠᤱᤅᤡᤸᤗᤧ ᤁᤧᤖᤧᤰ ᤁᤧᤍᤧ᤺ᤱᤃᤵᤜᤠ᤹ᤀᤥᤒᤠ ᤕᤜᤢᤍᤡᤜᤠ᤹ ᤔᤧᤱᤔᤠᤛᤡᤖᤧ ᤗᤠᤃᤡ ᤏᤡᤱᤛᤣᤰ ᤆᤥᤃᤢᤀᤠᤱ ᤛᤠᤵᤋᤢᤒᤠ ᤛᤰᤀᤡᤱᤄᤱ ᤛᤠᤵᤐᤣ᤺ᤳᤋᤠᤜᤠ᤹ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤆᤥ᤺ᤰᤔᤠᤖᤧ ᤗᤠᤃᤡ ᤗᤳᤇᤠ ᤛᤠᤵᤔᤏᤠᤒᤠ ᤜᤠᤱᤀᤡᤱᤈᤠᤱ ᤌᤡᤰ ᤜᤠᤅᤧᤍᤣᤛᤧ᤹ᤀᤥ॥

⁶ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤛᤢᤘᤠᤱ ᤀᤠᤶᤓᤢ᤹ ᤀᤠᤴᤛᤠ᤹ᤜᤠ᤹ᤀᤥ ᤁᤧᤍᤠᤒᤠ ᤕᤧᤳᤋᤢᤰᤂᤣᤴ ᤀᤠᤰᤂᤣᤗ᤹ᤖᤡᤰ ᤏᤠᤛᤡᤌ᤺ᤵᤔᤠ ᤛᤢᤰᤋᤢᤱᤒᤣ᥅ ᤀᤡᤃᤪ ᤀᤠᤱᤃᤠ᤹ ᤀᤠᤜᤡᤶᤛᤕᤱᤜᤠ᤹ ᤔᤧᤔᤧᤰᤂᤢᤛᤡᤒᤠᤴ ᤀᤠᤱᤃᤠ᤹ ᤀᤠᤰᤂᤣᤀᤠᤱ ᤌᤖᤢᤱᤒᤣ᥅”

⁷ ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᤜᤠᤱᤔᤠ ᤀᤧᤛ᤻ᤋᤖᤧᤴ ᤏᤢ ᤕᤜᤢᤍᤡ ᤔᤥᤷᤍᤁᤤᤴ ᤔᤧᤳᤋᤢᤛᤡ. “ᤜᤠᤔᤠᤏᤧᤸᤗᤧ ᤕᤜᤢᤍᤡᤜᤠ᤹ ᤔᤧᤱᤔᤠ ᤁᤥ᤺ᤳᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤂᤢᤏᤧ᤹ ᤁᤢᤕᤠᤱᤛᤠ ᤁᤢᤴᤎᤣᤜᤠ᤹ ᤀᤧᤛ᤻ᤋᤖᤧᤴ ᤐᤡᤖᤢᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤔᤏᤠ ᤑᤥ᤺ᤶᤔᤠᤛᤧᤵᤔᤠ ᤛᤡᤱᤅᤥ ᤔᤧᤓᤥᤴᤍᤢ॥

⁸ ᤀᤠᤸᤗ ᤕᤜᤢᤍᤡᤜᤠ᤹ᤖᤧ ᤗᤠᤃᤡ ᤏᤢᤒᤠ ᤆᤩᤠ ᤁᤧᤀᤡ᤺ᤳᤇᤢᤒᤠ ᤘᤣ᤹ ᤜᤠᤱᤀᤡᤱᤈᤠᤱ ᤌᤡᤰ ᤀᤠᤱᤃᤠ᤹ ᤀᤠᤔᤡᤱᤅᤥ ᤛᤠᤵᤋᤧᤛᤧ᤹॥ ᤂᤧᤵᤔᤥ ᤜᤠᤱ ᤀᤣ᤺ᤵᤛᤠᤵ ᤀᤣ᤺ᤵᤋᤧᤛᤧ᤹. ᤌᤣᤀᤠᤱᤓᤧᤸᤗᤧ ᤜᤠᤱᤅᤡᤸᤗᤧ ᤁᤢᤔᤡᤱᤅᤥ ᤛᤠᤵᤔᤏᤠᤒᤠ ᤜᤠᤱ ᤀᤣ᤺ᤵᤛᤠᤵ ᤀᤣ᤺ᤵᤔᤏᤠᤀᤠᤱ ᤛᤠᤵᤔᤏᤠᤒᤠ ᤛᤠᤵᤗᤠᤴ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤆᤥ᤺ᤰᤔᤠ ᤛᤢᤰᤔᤧᤍᤧᤏᤧᤴ॥”

⁹ ᤂᤧᤴ ᤀᤣᤃᤠᤱ ᤛᤢᤶᤛᤡᤃᤣᤰᤐᤠ ᤗᤠ. ᤀᤡᤃᤪ ᤛᤡᤘᤠᤏ ᤗᤠᤀᤥᤒᤠ ᤏᤡᤒᤥᤱᤅᤠᤱ ᤛᤢᤶᤛᤡᤃᤣᤰᤐᤠ ᤕᤧᤴᤏᤥ ᤜᤠᤱᤅᤡᤸᤗᤧ ᤁᤢᤛᤢᤜᤠᤱᤔᤡᤒᤠᤜᤠ᤹ ᤔᤧᤀᤢ᤺ᤳᤋᤢᤛᤡ॥ ᤔᤥᤷᤍᤁᤤ᤺ᤸᤗᤧ ᤕᤜᤢᤍᤡᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤁᤢᤀᤡᤛᤡᤰ ᤓᤠᤖᤋ ᤗᤠᤈᤣ᤹ᤀᤠᤱ ᤁᤳᤏᤠ ᤀᤡᤌᤡᤕᤥᤐᤡᤕᤠ ᤗᤠᤈᤣ᤹ ᤌᤠᤖᤡᤰᤐᤠ ᥇᥈᥍ ᤋᤧᤱᤃᤵᤜᤠ᤹ᤀᤥᤒᤠ ᤕᤶᤒᤠ ᤛᤢᤜᤠᤱᤃᤧᤶᤒᤠᤜᤠ᤹. ᤆᤢᤰᤛᤠ ᤜᤠᤱᤜᤠ᤹ ᤏᤢ ᤋᤢᤶᤔᤩᤠᤱᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤋᤧᤱᤃᤵ ᤌᤰᤔᤠᤒᤠ ᤀᤠᤵᤑᤣᤰ ᤀᤠᤵᤑᤣᤰ ᤂᤢᤴᤇᤡ᤹ ᤛᤰᤛᤰ ᤁᤢᤀᤡᤛᤡᤰ ᤏᤢ ᤛᤢᤘᤠᤱ ᤌᤰᤔᤠᤒᤠ ᤂᤢᤴᤇᤡ᤹ ᤀᤠᤵᤑᤣᤰ ᤐᤠ᤺ᤴᤍᤠᤱᤜᤠ᤹ᤀᤥ ᤜᤧᤰᤁᤩᤠᤱ ᤕᤜᤢᤍᤡᤜᤠ᤹ᤖᤧ ᤗᤠᤃᤡᤀᤠᤱ ᤂᤢᤴᤇᤡ᤹ ᤀᤠᤵᤑᤣᤰ ᤛᤰᤛᤰ ᤏᤢ ᤐᤠ᤺ᤴᤍᤠᤱᤅᤥ ᤗᤳᤇᤠ ᤛᤠᤵᤔᤏᤠᤒᤠ ᤜᤠᤱᤀᤡᤱᤈᤠᤱ ᤔᤧᤗ᤺ᤳᤋᤢ॥

¹⁰ ᤔᤥᤷᤍᤁᤤ᤺ᤸᤗᤧ ᤂᤧᤴ ᤀᤡᤱᤈᤠᤱᤅᤡᤴ ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᤁᤢᤔᤡᤱᤅᤥ ᤛᤠᤵᤋᤢᤀᤠᤱ ᤂᤧᤵᤔᤥ ᤜᤠᤱ ᤀᤣ᤺ᤵᤛᤠᤵ ᤀᤣ᤺ᤵᤋᤢ॥ ᤂᤧᤴ ᤀᤡᤱᤈᤠᤱᤅᤡᤴ ᤜᤠᤱᤅᤡᤸᤗᤧ ᤁᤢᤀᤴ ᤕᤧᤵᤏᤠᤀᤥᤒᤠ ᤁᤧᤈᤠᤵᤐᤠ ᤀᤴᤃᤧᤗᤥᤱᤒᤠ ᤀᤡᤱᤛᤠᤒᤠᤜᤠ᤹ᤗᤠᤶ ᤜᤠᤅᤢᤍᤣᤛᤢ॥

¹¹ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥ ᤕᤜᤢᤍᤡᤜᤠ᤹ ᤌᤡᤰᤜᤢᤵ ᤐᤥᤱᤔᤠᤀᤠᤱ ᤋᤠᤱᤛᤧ᤺ᤵᤛᤡᤱᤔᤠ ᤜᤠᤱᤅᤡᤸᤗᤧ ᤀᤡᤱᤈᤠᤱ ᤐᤡᤖᤢᤛᤡ॥ ᤀᤠᤳᤋᤡᤴ ᤛᤢᤘᤠᤱ ᤀᤡᤃᤪ ᤋᤧᤱᤃᤵᤐᤥᤒᤠ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠᤖᤧ ᤁᤠᤵᤋᤢᤛᤡᤒᤠᤜᤠ᤹ᤖᤧ ᤕᤜᤢᤍᤡ ᤕᤧᤶᤒᤡᤳᤇᤠ. ᤔᤧᤴᤇᤢᤔᤠᤜᤠ᤹ ᤏᤢ ᤀᤅᤧ᤺ᤰᤘᤠ ᤛᤠᤜᤠ᤹ ᤔᤧᤓᤳᤋᤢᤛᤡ᤹. ᤂᤧᤱᤜᤠ᤹ ᤛᤧᤵᤔᤠᤛᤡ. ᤆᤧᤵᤔᤠ ᤛᤧᤵᤔᤠᤛᤡ. ᤘᤖᤧᤱᤗᤧᤱ ᤔᤧᤱᤔᤠᤛᤡ ᤏᤢ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤏᤠᤵᤔᤠᤛᤡ ᤔᤧᤓᤠ᤺ᤰᤋᤢᤛᤡ॥

¹² ᤜᤧᤰᤁᤣ ᤆᤥ᤺ᤰᤔᤠ ᤔᤧᤓᤠ᤺ᤰᤋᤢᤛᤡᤒᤧᤴ ᤁᤧᤖᤧᤰ ᤋᤧᤱᤃᤵᤐᤥ ᤌᤡᤰᤕᤠᤴ. ᤀᤡᤃᤪ ᤌᤡᤒᤥᤱᤅᤠᤱ ᤏᤡᤛᤡᤃᤣᤰᤐᤠ ᤗᤠᤀᤥ ᤁᤡᤃᤪ ᤀᤍᤠᤖ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤛᤢᤶᤛᤡᤃᤣᤰᤐᤠ ᤕᤧᤴᤏᤥᤖᤰ ᤘᤕᤧ॥

¹³ ᤁᤴ ᤀᤡᤱᤈᤠᤱ ᤛᤰᤁᤡᤴ ᤗᤡᤱᤔᤏᤠᤒᤠ ᤗᤳᤇᤠ ᤛᤠᤵᤗᤠᤎᤡᤰ ᤁᤧᤖᤧᤰ ᤋᤧᤱᤃᤵᤐᤥ ᤁᤢᤓᤠᤱ ᤁᤢᤀᤡᤛᤡᤰ ᤗ᤺ᤵᤔᤠ ᤏᤢ ᤁᤧᤖᤧᤰ ᤔᤏᤠᤛᤢᤶ ᤌᤰᤔᤠ ᤀᤡᤱᤄᤱ ᤛᤧᤔᤠ ᤁᤧᤒᤥᤱᤒᤠ ᤐᤥ᤺ᤰᤂᤧ॥ ᤕᤜᤢᤍᤡᤜᤠ᤹ ᤂᤧᤴ ᤕᤧᤴᤏᤥ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤀᤥ ᤁᤢᤗᤧᤰᤘᤠ ᤏᤢ᤺ᤰᤔᤠᤖᤧ ᤗᤠᤃᤡ ᤕᤠᤖᤡᤵ ᤔᤧᤒᤥᤱᤗ ᤑᤠ᤹ᤀᤠᤱ ᤁᤴ ᤀᤡᤱᤈᤠᤱ ᤛᤰᤁᤡᤴ ᤔᤧᤗ᤺ᤳᤋᤢᤀᤠᤱ ᤘᤕᤧ॥

¹⁴ ᤜᤠᤱᤅᤡᤸᤗᤧ ᤁᤢᤀᤴᤜᤠ᤹ ᤗᤥᤱᤔᤠᤛᤡᤀᤠᤱ ᤛᤧᤔᤠᤀᤣ ᤁᤧᤒᤥᤱᤒᤠ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤜᤠᤖᤠ ᤋᤣ᤹ᤔᤠᤖᤧ ᤗᤠᤃᤡ ᤂᤧᤴ ᤀᤡᤱᤛᤠᤒᤠᤜᤠ᤹ ᤔᤧᤒᤠᤱᤄᤢ ᤔᤧᤍᤣᤛᤢᤛᤡ॥ ᤁᤴ ᤀᤡᤱᤈᤠᤱᤅᤡᤴ ᤜᤠᤱᤐᤠᤱ ᤛᤢᤛᤏᤀᤥᤀᤠᤱ ᤔᤧᤗ᤺ᤳᤋᤢ॥

¹⁵ ᤂᤧᤒᤩᤠᤱ ᤔᤥᤷᤍᤁᤤᤴ ᤜᤡ᤺ᤰᤕᤱᤕᤱᤒᤠ ᤏᤢ ᤑᤍᤠᤱᤒᤠ ᤜᤠᤱᤍᤣᤳ ᤆᤠᤰᤛᤡᤱᤅᤠᤱ ᤕᤶᤒᤠ ᤛᤠᤶᤔᤩᤠᤱ ᤋᤡᤆ ᤂᤢ᤺ᤰᤛᤡᤱ ᤜᤧᤰᤁᤩᤠᤱ ᤆᤢᤴᤈᤢᤶᤒᤠ ᤏᤤᤏᤠᤛᤢᤳ ᤆᤠᤱ ᤆᤠᤰᤛᤡᤱᤅᤠᤱ ᤜᤠᤱᤅᤡᤸᤗᤧ ᤁᤢᤍᤃᤡᤗᤠᤶ ᤗ᤺ᤴᤍᤧ॥ ᤂᤶᤓᤩᤠᤱ ᤁᤧᤖᤧᤰ ᤛᤢᤛᤏ ᤕᤧᤰᤕᤰᤁᤥ ᤔᤧᤛ᤺ᤳᤋᤧᤀᤠᤱ ᤛᤥᤛᤥᤳᤗᤖᤠᤱ ᤔᤧᤈᤥᤃᤧ॥

¹⁶ ᤕᤜᤢᤍᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡᤃ ᤂᤧᤴ ᤕᤧᤴᤏᤡᤴ ᤏᤡᤱᤘᤠ᤹ ᤋᤠᤔᤠ ᤏᤢ ᤛ᤺ᤵᤔᤠ. ᤜᤠᤱᤜᤠᤱ ᤗ᤹ᤔᤠ ᤏᤢ ᤔᤡᤱᤛᤥ ᤀᤡᤱᤎᤠᤱᤒᤠ ᤕᤧᤴ ᤐᤥ᤺ᤰᤂᤧ॥

¹⁷ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤁᤧᤃᤧᤵᤐᤠ. ᤁᤧᤖᤧᤰ ᤋᤧᤱᤃᤵ ᤏᤢ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥ ᤕᤜᤢᤍᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤏᤡᤱᤘᤠ᤹ ᤋᤠᤔᤠ ᤏᤢ ᤛᤡᤰᤛᤶᤔᤠ. ᤛᤠᤓ᤺ᤱᤈᤠ ᤆᤠᤔᤠ ᤏᤢ ᤛᤥᤛᤥᤳᤗᤖᤠᤱ ᤆᤥ᤺ᤰᤔᤠ ᤕᤧᤴ ᤐᤥ᤺ᤰᤂᤧ॥ ᤜᤧᤰᤁᤩᤠᤱ ᤘᤣ᤹ ᤛᤢᤘᤠᤱᤒᤠ ᤕᤖᤡᤰ ᤔᤏᤠᤜᤠ᤹ ᤕᤜᤢᤍᤡ ᤔᤧᤒᤥ᤺ᤰᤂᤧ. ᤌᤣᤀᤠᤱᤓᤧᤸᤗᤧ ᤕᤜᤢᤍᤡᤜᤠ᤹ᤏᤢ ᤂᤧᤱᤜᤠ᤹ ᤔᤧᤃᤡᤛᤧᤖᤥ॥