ᤀᤧᤛ᤻ᤋᤖ 7 - LIFOTNT

ᤜᤠᤔᤠᤏᤧᤴ ᤔᤧᤓᤥᤴᤍᤢ

¹ ᤂᤧᤒᤩᤠᤱ ᤜᤠᤱᤅᤡᤴ ᤏᤢ ᤜᤠᤔᤠᤏᤧᤴ ᤛᤠᤓ᤺ᤱᤈᤠ ᤆᤠᤛᤧ ᤜᤠᤱᤔᤠ ᤀᤧᤛ᤻ᤋᤖᤖᤧᤀᤥ ᤐᤣᤛᤧᤳᤇᤡ॥

² ᤂᤧᤸᤗᤧ ᤕᤠ᤺ᤴᤍᤡᤰᤁᤠᤱ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤌᤢᤱᤏᤢ ᤜᤠᤱᤅᤡᤸᤗᤧ ᤜᤠᤱᤔᤧᤴ ᤕᤠᤶᤔᤥ ᤛᤣ᤺ᤴᤍᤥᤛᤢ. “ᤜᤠᤱᤔᤠ ᤀᤧᤛ᤻ᤋᤖᤖᤧ. ᤆᤧᤸᤗᤧᤰᤛᤣ᤹ ᤛᤣᤈᤱᤘᤠᤴ ᤌᤢᤅᤢᤖ ᤜᤠᤱᤅᤡᤸᤗᤧ ᤀᤧᤛ᤻ᤋᤖᤧᤴ ᤕᤠᤶᤔᤥ ᤔᤧᤳᤋᤢ. ‘ᤂᤧᤏᤧ᤹ ᤁᤧᤒᤣᤗᤡᤴ ᤌᤣᤒᤣ᥅ ᤂᤧᤴ ᤁᤧᤄᤥᤛᤢ᤹॥ ᤂᤧᤏᤧ᤹ ᤁᤧᤏᤠ᤺ᤰᤋᤢᤒᤠ ᤐᤠ᤺ᤴᤏᤡᤴ ᤌᤣᤒᤣ᥅ ᤀᤠᤱᤃᤠ᤹ ᤀᤠᤜᤠᤱᤈᤢᤶᤔᤡᤴ ᤁᤢᤓᤪᤧ᤺ᤱ ᤕᤠᤖᤡᤰᤛᤠᤱ ᤀᤠᤱᤃᤠ᤹ ᤂᤧᤴ ᤐᤡᤏᤧᤖᤥ॥’”

³ ᤂᤧᤒᤩᤠᤱ ᤜᤠᤱᤔᤠ ᤀᤧᤛ᤻ᤋᤖᤧᤸᤗᤧ ᤏᤢᤃᤵ ᤐᤡᤖᤢ. “ᤜᤠᤱᤅᤡᤸᤗᤧ ᤀᤠᤱᤃᤠ᤹ ᤁᤧᤛᤡᤖᤠ᤹ ᤁᤧᤎᤠᤅᤠᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤜᤠᤱᤅᤣ. ᤜᤠᤱᤅᤡᤸᤗᤧ ᤏᤢᤒᤠ ᤁᤧᤀᤡ᤺ᤳᤋᤢᤏᤧᤓᤃᤪ ᤀᤠᤱᤃᤠ᤹ ᤀᤠᤜᤡᤱᤔᤧᤴ ᤛᤧ᤺ᤵᤋᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧ॥ ᤀᤠᤱᤃᤠ᤹ ᤀᤠᤛᤢᤘᤠᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤱᤔᤧᤴ ᤋᤠᤱᤄᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧ॥

⁴ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤏᤢ ᤀᤠᤱᤃᤠ᤹ ᤀᤠᤛᤢᤘᤠᤱᤜᤠ᤹ ᤔᤧᤱᤔᤠᤖᤧ ᤗᤠᤃᤡ. ᤛᤧᤵᤔᤠᤖᤧ ᤗᤠᤃᤡ ᤏᤢ ᤘᤖᤧᤱᤗᤧᤱ ᤔᤡᤱᤅᤣ ᤔᤠᤔᤠ ᤐᤡᤔᤠᤖᤧ ᤗᤠᤃᤡ ᤔᤧᤛᤱᤄᤡᤃᤧᤀᤠᤱ ᤘᤕᤡᤃᤧ॥ ᤀᤠᤏᤡᤃᤣ. ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠ ᤁᤧᤖᤧᤰ ᤕᤥᤰ ᤐᤥᤱᤔᤠᤖᤧ ᤗᤠᤃᤡᤖᤰ ᤔᤧᤛᤱᤄᤡᤃᤧᤒᤠ ᤐᤠᤴ ᤘᤕᤧᤸᤗᤧᤃ ᤀᤠᤱᤃᤠ᤹ ᤛᤫᤠ᤺ᤳ ᤔᤧᤶᤒᤠ᤺ᤳᤋᤣ ᤘᤕᤠᤱᤒᤠ ᤘᤕᤧ॥ ᤌᤣᤀᤠᤱᤓᤧᤸᤗᤧ ᤂᤧᤶᤔᤩᤠᤰᤗᤰ ᤐᤠ᤺ᤴᤏᤡᤸᤗᤧᤃ ᤐᤕᤶ ᤜᤠᤱᤅᤡᤴ ᤋᤢᤰᤂᤣ ᤆᤠ᤺ᤵᤔᤠ ᤔᤧᤗᤠ᤹ᤖᤢᤶᤒᤠ ᤘᤕᤧ॥”

⁵ ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᤀᤧᤛ᤻ᤋᤖ ᤜᤠᤱᤔᤠᤴ ᤛᤣ᤺ᤴᤗᤠᤵᤋᤢ. “ᤀᤰᤋᤱᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤀᤠ᤺ᤴᤇᤡᤱᤒᤠ ᤔᤏᤠᤴ ᤜᤠ᤺ᤵᤐᤣ᥅ ᤂᤧᤴ ᤀᤠᤳᤋᤡ ᤘᤠ᤹᥅”

⁶ ᤀᤧᤛ᤻ᤋᤖᤧᤸᤗᤧ ᤔᤧᤳᤋᤢ. “ᤀᤠᤏᤡᤃᤣ ᤁᤧᤀᤵᤐᤠ ᤏᤢ ᤏᤡᤱᤔᤡᤴ ᤜᤠᤒᤠ ᤁᤴ ᤁᤢ᤹ᤀᤡᤃᤧᤓᤧᤶᤒᤠ ᤜᤠᤔᤠᤏᤧᤴᤗᤥ᥄” ᤂᤧᤒᤩᤠᤱ ᤜᤠᤱᤅᤡᤴ ᤏᤢ ᤜᤠᤱᤔᤠᤸᤗᤧ ᤂᤢᤴᤇᤡ᤹ ᤋᤃᤡ ᤜᤠᤔᤠᤏᤧᤴ ᤁᤢᤕᤱᤔᤠ ᤁᤧᤖᤧ॥

⁷ ᤂᤧᤒᤩᤠᤱ ᤜᤠᤱᤅᤡᤴ ᤁᤢᤛᤠᤰᤁᤧᤴᤏᤡᤸᤗᤧ ᤌᤣᤀᤠᤱ ᤔᤧᤏᤡᤛᤢᤴᤏᤠᤱ ᤐᤥᤃᤧ. ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤛᤣᤈᤱᤘᤠᤴ ᤌᤢᤱᤔᤠ ᤗᤧᤖᤢᤀᤠᤱ ᤜᤠᤱᤜᤡᤶᤔᤥᤒᤠ ᤑᤢᤱᤀᤡᤰᤁᤥ ᤐᤣ॥ ᤁᤖ ᤜᤠᤔᤠᤏᤧᤸᤗᤧ ᤂᤢᤏᤧ᤹ ᤁᤢᤜᤡᤱᤔᤧᤴ ᤛᤧ᤺ᤵᤔᤠ ᤑᤠ᤹ᤀᤠᤱ ᤜᤠᤱᤔᤧᤴ ᤐᤣᤗᤡ ᤑᤠᤰᤔᤠᤖᤧ ᤗᤠᤃᤡ ᤕᤢᤅᤧᤒᤠᤍᤧᤴᤏᤥᤀᤣ ᤜᤠᤒᤠ ᤕᤢᤱᤛᤡᤱᤅᤠᤱ ᤕᤢᤅᤧ॥ ᤌᤣᤀᤠᤱᤓᤧᤸᤗᤧ ᤜᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤀᤥ ᤂᤠᤵᤐᤢᤌᤩ᤺ᤱ ᤔᤧᤱᤔᤠᤖᤧ ᤗᤠᤃᤡ ᤏᤡ᤺ᤴᤎᤥ ᤆᤥᤃᤢᤛᤢᤖᤢᤀᤠᤱ ᤘᤠ᤹ ᤑᤠ᤹ᤀᤠᤱ ᤜᤠᤔᤠᤏᤧᤸᤗᤧ ᤁᤢᤛᤡᤱᤏᤡ᤺ᤳᤋᤢ॥

⁸ ᤜᤠᤱᤅᤡᤴ ᤑᤢᤱᤀᤡᤰᤁᤥᤗᤠᤶ ᤁᤢᤈᤠ ᤆᤠᤔᤠ ᤕᤠᤰᤑᤠᤱᤅᤥ ᤑᤢᤖᤢᤳ ᤏᤢ᤺ᤰᤂᤧᤍᤩᤧᤒᤠ ᤕᤧᤶᤔᤥᤀᤣ ᤜᤠᤔᤠᤏᤧᤴᤃ ᤀᤧᤛ᤻ᤋᤖᤧᤴ ᤏᤠ᤺ᤶᤛᤡᤱᤅᤠᤱ ᤕᤢᤅᤧᤒᤠ ᤕᤢᤰᤏᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤛᤠᤒᤴ ᤑᤴᤇᤡᤱᤅᤠᤱ ᤐᤳᤇᤧ॥ ᤂᤧᤒᤩᤠᤱ ᤜᤠᤱᤅᤡᤴ ᤀ᤺ᤰᤋᤧ. “ᤌᤣ ᤜᤠᤱᤔᤧᤴ ᤁ᤹ᤕᤥ ᤀᤠᤱᤃᤠ᤹ᤏᤢ ᤘᤠ᤹ᤖ ᤀᤠᤜᤡᤶᤔᤥᤀᤣ ᤁᤸᤗᤧ ᤔᤣ᤺ᤳ ᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢᤒᤠᤒᤡ᥅” ᤜᤠᤱᤅᤡᤸᤗᤧ ᤁᤢᤶᤒᤪᤠᤀᤥᤗᤠᤶ ᤁᤴ ᤐᤠ᤺ᤴᤏᤡᤴ ᤗ᤺ᤴᤍᤧᤏᤢᤔᤧ᤺ᤴᤏᤣ ᤂᤧᤱᤜᤠ᤹ᤖᤧ ᤜᤠᤔᤠᤏᤧᤸᤗᤧ ᤁᤏᤠᤏ ᤔᤧᤍᤧᤵᤋᤢ॥

⁹ ᤂᤧᤒᤩᤠᤱ ᤜᤠᤱᤅᤡᤸᤗᤧ ᤁᤢᤍᤃᤡ ᤁᤧᤘᤠ᤹ᤒᤠ ᤛᤡᤱᤃᤠᤖᤢᤜᤠ᤹ᤀᤥ ᤌᤡᤰᤐᤠ ᤜᤷᤒᤥᤏᤠ᤺ᤸᤗᤧ ᤐᤠ᤺ᤳᤋᤢ. “ᤜᤠᤱᤅᤡᤴ ᤋᤠᤱᤃᤧᤛᤧ᤺ᤵᤐᤠ ᤔᤥᤷᤍᤁᤤᤴ ᤑᤥ᤺ᤶᤔᤠᤖᤧ ᤗᤠᤃᤡ ᤜᤠᤔᤠᤏᤧᤸᤗᤧ ᤂᤢᤏᤧ᤹ ᤀᤠᤵᤑᤣᤰ ᤁᤢᤜᤡᤶᤔᤥ ᤏᤡᤒᤥᤱᤅᤠᤱ ᤅᤠᤛᤡ ᤔᤡᤋᤖ ᤁᤢᤗᤡᤱᤃᤧᤴ ᤁᤣ᤺ᤶᤒᤠ ᤛᤡᤱᤎᤡᤰ ᤆᤥᤃᤢᤀᤠᤱ ᤕᤢᤱ᥄” ᤜᤠᤱᤅᤡᤸᤗᤧ ᤔᤧᤳᤋᤢᤛᤡ. “ᤀᤠᤶᤓᤠ ᤂᤧᤵᤔᤥᤀᤣ ᤜᤠᤔᤠᤏᤧᤴ ᤑᤥ᤺ᤴᤍᤧᤶᤔᤧ᤹᥄”

¹⁰ ᤂᤧᤒᤩᤠᤱ ᤔᤥᤷᤍᤁᤤ᤺ᤸᤗᤧ ᤁᤢᤗᤠᤃᤡ ᤜᤠᤔᤠᤏᤧᤸᤗᤧ ᤀᤠᤵᤑᤣᤰ ᤕᤠᤖᤡᤵ ᤆᤥᤃᤢᤒᤠ ᤛᤡᤱᤅᤥ ᤂᤢᤏᤧ᤹ ᤔᤧᤓᤥᤴᤍᤢ॥ ᤂᤧᤴ ᤀᤣᤃᤠᤱ ᤜᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤴ ᤆᤡ᤺ᤰᤋᤢᤖᤥ॥