ᤀᤧᤛ᤻ᤋᤖ 6 - LIFOTNT

ᤜᤠᤱᤅᤡᤸᤗᤧ ᤔᤥᤷᤍᤁᤤᤴ ᤀᤡᤱᤎᤠᤱ ᤐᤡᤖᤢ

¹ ᤂᤧᤴ ᤛᤧᤴᤍᤡᤰ ᤜᤠᤱᤅᤡᤴ ᤁᤢᤔᤡᤰᤁᤣ ᤔᤧᤕᤢᤛᤧᤴ॥ ᤂᤢᤏᤧ᤹ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤥᤒᤠ ᤜᤡᤴᤍᤥᤰ ᤐᤠ᤺ᤴᤜᤠ᤹ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤡᤴ ᤋᤠ᤺ᤵᤔᤠ ᤐᤠᤱᤄᤢᤛᤡᤀᤠᤱ ᤂᤧᤴ ᤜᤠᤱᤅᤡᤴ ᤔᤧᤏᤡᤖᤢ ᤔᤧᤒᤡᤖᤢ॥

² ᤂᤧᤵᤔᤥ ᤗᤠᤶᤎᤣᤳ ᤁᤧᤃᤥᤒᤠ ᤏᤧᤳᤇᤡ ᤛᤢᤜᤠᤱᤕᤢᤰᤐᤠ ᤒᤡᤃ᤻ᤌᤠᤏᤠ ᤏᤢ ᤋᤣᤖᤣᤛᤧᤸᤗᤧ ᤀᤜᤠᤛᤢᤖᤛ ᤜᤠᤱᤅᤡᤴ ᤛᤧᤵᤔᤠ ᤆᤧᤶᤓᤴ ᤆᤥᤃᤧᤛᤢᤒᤠ ᤜᤧᤰᤁᤩᤠᤱ ᤔᤥᤷᤍᤁᤤ᤺ᤸᤗᤧ ᤂᤧᤴ ᤀᤥᤛᤣ᤺ᤴᤎᤠᤱ ᤆᤥᤃᤢᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤠᤵᤋᤧᤀᤠᤱ ᤐᤳᤇᤧ॥

³ ᤂᤧᤒᤩᤠᤱ ᤜᤠᤱᤅᤡᤸᤗᤧ ᤛᤣ᤺ᤴᤍᤥᤛᤢᤛᤡ. “ᤁᤸᤗᤧ ᤗᤠᤃᤡ ᤔᤥᤷᤍᤁᤤ᤺ᤸᤗᤧ ᤀᤠᤰᤋᤱᤒᤠ ᤔᤡᤱᤛᤥ ᤀᤡᤱᤎᤠᤱ ᤀᤡᤃᤪ ᤋᤠᤰᤑᤠ ᤂᤥᤛᤢᤀᤠᤱ ᤘᤕᤧᤒᤣ᥅” ᤂᤧᤵᤔᤥ ᤁᤧᤘᤠ᤹ᤒᤠ ᤜᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤔᤧᤔᤧᤳᤋᤢ. “ᤌᤧᤔᤠᤀᤠᤱ ᤂᤥᤛᤢᤒᤠ ᤜᤥᤵ॥”

⁴ ᤜᤠᤱᤅᤡᤸᤗᤧ ᤛᤣ᤺ᤴᤍᤥᤛᤢᤛᤡ. “ᤂᤧᤴ ᤗᤰᤂᤢᤶᤔᤥ ᤜᤠᤳ ᤘᤠ᤹ᤒᤣ᥅” ᤂᤧᤴ ᤕᤧᤶᤔᤥ ᤜᤠᤔᤠᤏᤧᤴ ᤀᤠᤸᤗᤥ ᤂᤠᤖᤰ ᤂᤢᤏᤧ᤹ ᤕᤠᤖᤡᤵ ᤆᤥᤃᤢᤒᤠ ᤛᤡᤱᤅᤥ ᤔᤥᤷᤍᤁᤤᤴ ᤑᤥ᤺ᤶᤔᤠ ᤑᤠ᤹ᤀᤠᤱ ᤜᤠᤱᤅᤡᤴ ᤐᤣᤗᤡ ᤑᤠᤰᤔᤠᤖᤧ ᤗᤠᤃᤡ ᤜᤠᤱᤜᤡᤶ ᤗᤠᤁᤠᤳᤐᤠ ᤗᤰᤂᤢᤶᤔᤥ ᤁᤧᤖᤧᤍᤩᤧᤀᤠᤱ ᤘᤕᤧ॥

⁵ ᤜᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤏᤢᤃᤵ ᤔᤧᤒᤡᤖᤢ. “ᤜᤠᤔᤠᤏᤧᤴ ᤗᤰᤂᤢᤶᤔᤥ ᤕᤧᤵᤁᤴᤗᤥ॥” ᤜᤠᤱᤅᤡᤸᤗᤧ ᤔᤧᤳᤋᤢᤛᤡ. “ᤂᤢᤏᤧ᤹ ᤁᤳᤏᤠ ᤛᤡᤃᤠᤱ ᤑᤧᤳᤋᤧᤶᤔᤧ᤹॥”

⁶ ᤀᤠᤸᤗ ᤜᤠᤔᤠᤏᤧᤴ ᤛᤡᤃᤠᤱ ᤗᤠᤛᤧ. ᤂᤧᤒᤩᤠᤱ ᤜᤠᤱᤅᤡᤸᤗᤧ ᤂᤢᤏᤧ᤹ ᤛᤣ᤺ᤴᤍᤥᤛᤢ. “ᤜᤠᤱᤅᤡᤸᤗᤧ ᤀᤠᤵᤑᤣᤰ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤏᤡᤱᤘᤠ᤹ ᤆᤥᤃᤢᤒᤠ ᤔᤏᤠᤴ ᤌᤣ ᤔᤧᤵᤔᤠ ᤐᤥᤱᤒᤣ᥅” ᤜᤠᤔᤠᤏᤧᤸᤗᤧ ᤁᤢᤏᤡᤱᤘᤠ᤹ᤀᤥ ᤀᤡ᤺ᤳᤋᤢ. “ᤀᤠᤱᤃᤠ᤹ᤏᤢ᤺ᤸᤗᤧ ᤘᤣ᤹ ᤜᤠᤱᤅᤡᤸᤗᤧ ᤜᤠᤳ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤠ᤹ᤀᤠᤱᤒᤣ᥅”

⁷ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤜᤠᤱᤅᤡᤴ ᤔᤧᤳᤋᤢ. “ᤜᤠᤱᤅᤡᤸᤗᤧ ᤀᤠᤳᤋᤡᤴ ᤔᤏᤠᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤏᤡᤱᤘᤠ᤹ ᤁᤧᤈᤥᤃᤢ᤹.

⁸ ᤜᤠᤱᤅᤡᤸᤗᤧ ᤀᤠᤵᤑᤣᤰ ᤁᤢᤈᤠᤱᤔᤠ ᤆᤠᤱᤅᤡᤴ ᤏᤢ ᤀᤴᤏᤡᤸᤗᤧ ᤁᤢᤎᤧᤃᤣ᤺ᤰᤐᤥ ᤜᤠᤱᤔᤡᤰᤛᤣᤴ ᤔᤧᤓᤳᤇᤢᤒᤠ ᤜᤠᤱᤅᤡᤸᤗᤧ ᤁᤢᤕᤢᤰᤔᤠ ᤀᤴᤏᤡᤴ ᤔᤧᤍᤠᤖᤢᤖ॥

⁹ ᤂᤧᤴ ᤆᤠᤱᤅᤡᤴ ᤏᤢ ᤀᤴᤏᤡᤴ ᤁᤧᤖᤧᤰᤏᤢ᤺ᤸᤗᤧ ᤔᤡᤱᤛᤥ ᤀᤡᤱᤎᤠᤱᤛᤠᤒᤠ ᤜᤠᤱᤅᤡᤸᤗᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤀᤥᤒᤠ ᤔᤏᤠᤎᤡᤰ ᤜᤢᤰᤔᤧᤛᤢᤵᤋᤢᤖ. ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤏᤡᤱᤘᤠ᤹ ᤆᤥᤃᤢᤒᤠ ᤔᤏᤠᤴ ᤂᤧᤱᤜᤠ᤹ᤖᤧ ᤂᤧᤴ ᤆᤠᤱᤅᤡᤴ ᤔᤧᤈᤠᤰᤋᤢᤖ. ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤀᤴᤏᤥ ᤔᤧᤕᤢᤰᤂᤢᤀᤠᤱ ᤕᤧᤰᤕᤰᤁᤥᤒᤠ ᤔᤠᤖᤠᤶᤜᤠ᤹ᤀᤥ ᤂᤧᤱᤜᤠ᤹ ᤔᤧᤒᤣ᤺ᤰᤁᤡᤸᤗᤧ ᤀᤰᤂᤣ ᤔᤧᤗ᤹ᤖ ᤔᤧᤀ᤺ᤰᤗᤖᤥ. ‘ᤜᤠᤱᤅᤡᤸᤗᤧ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤏᤡᤱᤘᤠ᤹ ᤆᤥᤃᤢᤒᤠ ᤔᤏᤠ᤺ᤸᤗᤧ ᤁᤢᤗᤠᤃᤡ ᤌᤣ ᤆᤥ᤺ᤰᤔᤏᤠᤀᤠᤱ ᤘᤠ᤹. ᤂᤧᤴ ᤀᤥᤔᤧᤳᤋᤧᤶᤔᤧ᤹ᤀᤥ॥’”

¹⁰ ᤂᤧᤒᤩᤠᤱ ᤜᤠᤱᤅᤡᤸᤗᤧ ᤜᤠᤔᤠᤏᤧᤴ ᤔᤧᤳᤋᤢ. “ᤜᤠᤖᤠ ᤆᤥᤃᤧ᤹॥ ᤆᤠᤱᤜᤠ᤹ ᤏᤢ ᤀᤴᤏᤡᤴ ᤋᤠᤖᤧ᤹॥ ᤜᤠᤱᤜᤡᤶᤔᤥ ᤗᤠ᤺ᤵᤔᤠ ᤗᤠᤶᤎᤣ᤺ᤵᤐᤥ ᤁᤧᤕᤧᤵᤐᤠ ᤕᤜᤢᤍᤡ ᤔᤥᤷᤍᤁᤤᤴ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤔᤧᤳᤋᤧ᤹॥ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ᤀᤥ ᤀᤠᤳᤋᤡᤴᤏᤠᤱ ᤔᤧᤕᤠ᤺ᤰᤏᤧᤴᤗ॥”

¹¹ ᤁᤸᤗᤧᤆᤥᤃᤢᤸᤗᤧ ᤜᤠᤔᤠᤏᤧᤸᤗᤧ ᤂᤧᤴ ᤆᤠᤱᤅᤡᤴ ᤔᤥᤷᤍᤁᤤᤴ ᤆᤠᤰᤋᤢ. ᤜᤧᤰᤁᤩᤠᤱ ᤀᤴᤏᤥ ᤕᤢᤰᤂᤢᤀᤠᤱ ᤂᤢᤏᤧ᤹ ᤕᤧᤰᤕᤰᤁᤥᤒᤠ ᤔᤠᤖᤠᤶᤜᤠ᤹ᤀᤥ ᤀᤰᤂᤣ ᤗ᤹ᤖᤧᤖ ᤂᤢᤏᤧ᤹ ᤀ᤺ᤰᤋᤧ. “ᤜᤠᤱᤅᤡᤸᤗᤧ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤔᤏᤠᤴ ᤌᤣ ᤔᤧᤵᤔᤠ ᤐᤥᤱ᤹. ᤀᤥᤔᤧᤳᤋᤧᤶᤔᤧ᤹ᤀᤥ॥”

¹² ᤂᤧᤴ ᤀᤣᤃᤠᤱ ᤔᤥᤷᤍᤁᤤᤴ ᤜᤠᤱᤜᤡᤶᤔᤥᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥ ᤏᤢ᤺ᤰᤂᤧᤍᤩᤧ॥ ᤜᤠᤔᤠᤏᤧᤴᤃ ᤁᤢᤎᤧᤃᤣ᤺ᤰᤁᤡᤴ ᤋᤧᤵᤋᤢᤀᤠᤱ ᤁᤢᤏᤡᤱᤘᤠ᤹ ᤗᤥᤖᤧᤖ ᤜᤠᤖᤠᤜᤠᤖᤠ ᤁᤢᤜᤡᤶᤔᤥ ᤐᤣ॥

¹³ ᤂᤧᤸᤗᤧ ᤁᤢᤔᤣᤳ ᤈᤣᤖᤣᤛᤧᤴ ᤏᤢ ᤁᤧᤖᤧᤰ ᤁᤢᤴᤈᤢᤶ ᤁᤢᤴᤍᤣ᤺ᤱᤒᤠᤜᤠ᤹ ᤂᤢᤏᤧ᤹ᤀᤥ ᤐᤥ᤺ᤰᤂᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤧᤰᤋᤢᤛᤡ॥ ᤂᤢᤏᤧ᤹ ᤁᤢᤛᤢᤈᤠᤛᤠᤒᤠᤜᤠ᤹ ᤏᤢ ᤁᤢᤔᤣ᤺ᤳᤋᤡᤸᤗᤧ ᤂᤢᤏᤧ᤹ ᤀᤰᤂᤣ ᤔᤧᤔᤧᤳᤋᤢ. “ᤔᤥᤷᤍᤁᤤ᤺ᤸᤗᤧ ᤁᤢᤍᤃᤡ ᤂᤧᤏᤧ᤹ ᤔᤧᤰᤔᤠ ᤁᤧᤜᤣ᤺ᤰᤋᤧᤀᤠᤱ ᤘᤠ᤹. ᤂᤧᤴ ᤕᤜᤢᤍᤡ ᤛᤢᤘᤠᤱᤏᤧᤓᤃᤪ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤂᤧᤏᤧ᤹ ᤌᤣᤀᤠᤱ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤴ᤹॥ ᤂᤧᤏᤧ᤹ ᤛᤧᤰᤂᤠᤛᤠᤱ ᤁᤧᤔᤧᤰᤗᤥ॥”

¹⁴ ᤂᤧᤱᤜᤠ᤹ ᤜᤠᤔᤠᤏᤧᤴᤏᤢ ᤐᤠᤴ ᤔᤧᤒᤠᤖᤧᤖ ᤔᤧᤒᤳᤇᤧᤸᤗᤧ ᤜᤠᤱᤅᤡᤸᤗᤧ ᤁᤢᤛᤡᤱᤃᤠᤖᤢᤒᤠᤜᤠ᤹ ᤔᤧᤃᤧᤖᤧ ᤔᤧᤍᤩᤧ. ᤜᤧᤰᤁᤩᤠᤱ ᤀᤧᤛ᤻ᤋᤖᤧᤸᤗᤧ ᤕᤠᤖᤡᤵ ᤆᤥᤃᤢᤒᤠ ᤛᤠᤓ᤺ᤱᤈᤠᤀᤥ ᤜᤠᤖᤠ ᤂᤢᤏᤧ᤹ ᤔᤧᤍᤣ᤹ᤖᤢᤀᤠᤱ ᤔᤧᤒᤣᤖᤥ॥