ᤀᤧᤛ᤻ᤋᤖ 5 - LIFOTNT

ᤀᤧᤛ᤻ᤋᤖᤧᤸᤗᤧ ᤜᤠᤱᤅᤡᤴ ᤀᤢ᤺ᤳᤋᤢ

¹ ᤛᤢᤶᤛᤡᤃᤣᤰᤐᤠ ᤕᤧᤴᤏᤥ ᤀᤧᤛ᤻ᤋᤖᤧᤸᤗᤧ ᤂᤢᤏᤧ᤹ ᤁᤢᤜᤠᤱᤔᤠ ᤆᤠᤱᤜᤠ᤹ ᤆᤠᤰᤛᤡᤱ ᤜᤧᤰᤁᤩᤠᤱ ᤐᤣᤀᤠᤱ ᤜᤠᤱᤜᤡᤶ ᤛᤡᤃᤠᤱᤒᤠ ᤗᤰᤂᤢᤶᤔᤥ ᤜᤠᤱ ᤕᤠᤰᤑᤠᤱ ᤋᤃᤡ ᤕᤧᤶᤛᤡᤱᤅᤠᤱ ᤕᤧᤒᤧᤃᤖᤧ॥ ᤜᤠᤱᤅᤡᤴ ᤜᤠᤱᤕᤢᤰᤏᤠᤀᤥ ᤕᤢᤅᤧᤀᤠᤱ ᤕᤶᤒᤠ ᤗᤠᤶᤎᤣᤳ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤕᤢᤅᤧ॥

² ᤀᤠᤸᤗ ᤜᤠᤱᤅᤡᤸᤗᤧ ᤀᤧᤛ᤻ᤋᤖ ᤜᤠᤱᤔᤠᤴ ᤗᤰᤂᤢᤶᤔᤥ ᤕᤧᤒᤧᤃᤖᤧᤒᤠ ᤏᤡᤛᤢ. ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤗ᤹ᤖᤧ᤹ᤀᤠᤱ ᤂᤢᤏᤧ᤹ ᤁᤢᤜᤢᤰᤁᤥ ᤁᤳᤋᤢᤒᤠ ᤛᤩᤠᤶᤔᤠᤱ ᤜᤠᤱᤋᤰᤁᤠ᤺ᤳᤋᤡᤴ ᤀᤧᤛ᤻ᤋᤖᤧᤴ ᤗᤧᤵᤔᤠᤱ ᤛᤴᤇᤢ॥ ᤂᤶᤓᤩᤠᤱ ᤂᤢᤏᤧ᤹ ᤋᤃᤡ ᤑᤧᤖᤧᤀᤠᤱ ᤜᤠᤱ ᤋᤰᤁᤠ᤺ᤳᤋᤡᤸᤗᤧ ᤁᤢᤛᤶᤔᤡᤴ ᤛᤢᤛᤢ॥

³ ᤜᤠᤱᤅᤡᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤜᤠᤱᤔᤠ ᤀᤧᤛ᤻ᤋᤖᤧ. ᤂᤧᤏᤧ᤹ ᤌᤧᤔᤠ ᤆᤠᤜᤠ ᤁᤧᤈᤥ᤺ᤰᤐᤣ᥅ ᤂᤧᤏᤧ᤹ ᤌᤣᤛᤠᤱ ᤏᤠ᤺ᤰᤋᤧ᤹. ᤀᤠᤱᤃᤠ᤹ ᤀᤠᤜᤠᤱᤈᤢᤶᤔᤡᤴ ᤁᤢᤓᤪᤧ᤺ᤱᤛᤠᤱ ᤂᤧᤏᤧ᤹ ᤐᤡᤏᤧ॥”

⁴ ᤀᤧᤛ᤻ᤋᤖᤧᤸᤗᤧ ᤔᤧᤳᤋᤢ. “ᤜᤠᤱᤅᤣ. ᤏᤢᤒᤠ ᤁᤧᤀᤡ᤺ᤳᤋᤢᤏᤧᤓᤃᤪ ᤜᤠᤱᤅᤡᤸᤗᤧ ᤁᤧᤗᤠᤃᤡ ᤀᤠᤱᤃᤠ᤹ ᤕᤠᤖᤡᤵ ᤆᤥᤃᤢᤱᤒᤠ ᤛᤠᤓ᤺ᤱᤈᤠᤀᤥ ᤀᤠᤀᤡᤴ ᤜᤠᤔᤠᤏᤧᤴᤏᤢ ᤛᤥᤖᤡᤰ ᤋᤩᤧᤳᤇᤧ᤹ᤀᤥ॥”

⁵ ᤀᤧᤛ᤻ᤋᤖᤧᤸᤗᤧ ᤁᤢᤒᤣᤗᤡᤴ ᤁᤧᤵᤔᤠ ᤐᤡᤔᤠᤖᤧ ᤗᤠᤃᤡ ᤜᤠᤱᤅᤡᤸᤗᤧ ᤜᤠᤔᤠᤏᤧᤴ ᤜᤠᤖᤠ ᤀᤢ᤺ᤵᤔᤠ ᤋᤠ᤺ᤵᤔᤠ ᤀᤡᤱᤈᤠᤱ ᤐᤡᤖᤢᤛᤡ॥ ᤂᤧᤒᤩᤠᤱ ᤀᤧᤛ᤻ᤋᤖᤧᤸᤗᤧ ᤕᤠᤖᤡᤵ ᤆᤥᤃᤢᤒᤠ ᤁᤢᤛᤠᤓ᤺ᤱᤈᤠᤀᤥ ᤜᤠᤱᤅᤡᤴ ᤏᤢ ᤜᤠᤔᤠᤏᤧᤴ ᤐᤣᤛᤧᤳᤇᤡ॥

⁶ ᤆᤧᤸᤗᤧᤰᤛᤣ᤹ ᤛᤣᤈᤱᤘᤠᤴ ᤌᤢᤅᤢᤖ ᤜᤠᤱᤅᤡᤸᤗᤧ ᤀᤧᤛ᤻ᤋᤖᤧᤴ ᤕᤠᤶᤔᤥ ᤔᤧᤳᤋᤢ. “ᤂᤧᤏᤧ᤹ ᤁᤧᤒᤣᤗᤡᤴ ᤌᤣᤒᤣ᥅ ᤂᤧᤴ ᤁᤧᤄᤥᤛᤢ᤹॥ ᤂᤧᤏᤧ᤹ ᤁᤧᤏᤠ᤺ᤰᤋᤢᤒᤠ ᤐᤠ᤺ᤴᤏᤡᤴ ᤌᤣᤒᤣ᥅ ᤀᤠᤱᤃᤠ᤹ ᤀᤠᤜᤠᤱᤈᤢᤶᤔᤡᤴ ᤁᤢᤓᤪᤧ᤺ᤱ ᤕᤠᤖᤡᤰᤛᤠᤱ ᤀᤠᤱᤃᤠ᤹ ᤂᤧᤴ ᤐᤡᤏᤧᤖᤥ॥”

⁷ ᤏᤢᤃᤵᤐᤥ ᤀᤧᤛ᤻ᤋᤖᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤕᤧᤰᤐᤣᤗᤡ ᤏᤢ ᤀᤠᤒᤣᤗᤡ ᤜᤠᤒᤠ ᤁᤴ ᤘᤠ᤹ᤖᤥ—

⁸ ᤜᤠᤱᤅᤡᤸᤗᤧ ᤀᤠᤱᤃᤠ᤹ ᤁᤧᤛᤡᤖᤠ᤹ ᤁᤧᤎᤠᤱᤅᤠᤀᤠᤱ ᤀᤠᤱᤃᤠ᤹ ᤏᤠ᤺ᤰᤋᤢᤱᤒᤠ ᤐᤠ᤺ᤴᤏᤡᤴ ᤁᤧᤒᤡᤀᤠ ᤜᤧᤰᤁᤩᤠᤱ ᤀᤠᤱᤃᤠ᤹ ᤋᤥ᤺ᤴᤍᤢᤱᤒᤠ ᤀᤠᤒᤣᤗᤡᤴ ᤁᤧᤵᤔᤠ ᤐᤡᤔᤠ ᤜᤠᤱᤅᤡᤸᤗᤧ ᤏᤢᤒᤠ ᤁᤧᤀᤡ᤺ᤳᤋᤢᤏᤧᤓᤃᤪ ᤏᤧᤵᤔᤠᤱᤗᤧ ᤗᤠᤃᤡ ᤕᤠᤖᤡᤵ ᤆᤥᤃᤢᤱᤒᤠ ᤛᤠᤓ᤺ᤱᤈᤠᤀᤥ ᤜᤠᤱᤅᤡᤴ ᤏᤢ ᤜᤠᤔᤠᤏᤧᤴ ᤋᤠ᤺ᤴᤍᤡᤰᤁᤠᤱ ᤋᤩᤧᤛᤧ᤹॥ ᤋᤠ᤺ᤴᤍᤡᤰ ᤜᤠᤱᤅᤡᤴ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤔᤧᤳᤏᤧᤖᤥ॥”

ᤜᤠᤔᤠᤏᤧᤸᤗᤧ ᤔᤥᤷᤍᤁᤤᤴ ᤛᤧᤵᤔᤠ ᤆᤧᤶᤓᤴ ᤆᤥᤃᤢ᤹

⁹ ᤂᤧᤸᤗᤧ ᤕᤠ᤺ᤴᤍᤡᤰ ᤜᤠᤔᤠᤏᤧᤴ ᤛ᤺ᤳᤋᤧᤖ ᤁᤢᤏᤡᤱᤘᤠ᤹ᤀᤥ ᤁᤢᤛᤡᤰᤛᤔᤧᤖ ᤐᤣ॥ ᤁᤖ ᤀᤠᤸᤗ ᤂᤢᤏᤧ᤹ ᤔᤥᤷᤍᤁᤤᤴ ᤜᤠᤱᤜᤡᤶᤔᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤕᤢᤅᤧᤒᤠ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤃᤡ ᤔᤧᤕᤧᤒᤧᤶᤒᤠ ᤏᤢ ᤔᤧᤃᤡᤛᤧᤶᤒᤠ ᤏᤡᤛᤢᤀᤠᤱ ᤂᤢᤏᤧ᤹ ᤀᤠᤳᤋᤠᤋᤠᤴᤏᤣ ᤛᤠ᤹ᤖᤡᤰ ᤁᤢᤛᤠᤰᤁᤧᤴ ᤐᤥᤃᤧ॥

¹⁰ ᤁᤖ ᤂᤢᤏᤧ᤹ ᤀᤠᤵᤑᤣᤰ ᤛᤫᤠ᤺ᤳ ᤜᤡᤶᤔᤥ ᤐᤣ॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤁᤢᤈᤢᤶ ᤁᤢᤍᤣᤱᤜᤠ᤹ ᤏᤢ ᤁᤢᤔᤣᤳ ᤈᤣᤖᤣᤛᤧᤴ ᤀᤢ᤺ᤵᤔᤠ ᤋᤠ᤺ᤵᤔᤠ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤕᤠᤱᤛᤠᤁᤢᤴᤎᤣ ᤏᤢ ᤕᤖᤡᤰ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤁᤧᤘᤠ᤹ᤒᤠ

¹¹ ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤂᤢᤏᤧ᤹ ᤕᤶᤒᤠ ᤋᤠᤰᤑᤠ ᤐᤡᤖᤢᤒᤠ ᤏᤢ ᤘᤣ᤹ ᤛᤢᤜᤠᤱᤕᤢᤰᤐᤠᤜᤠ᤹ ᤜᤧᤰᤁᤩᤠᤱ ᤕᤢᤰᤛᤠᤒᤠᤜᤠ᤹ᤀᤥ ᤂᤢᤏᤧ᤹ ᤕᤶᤒᤠ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤒᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ ᤆᤧᤰᤋᤢᤛᤡ॥

¹² ᤜᤠᤔᤠᤏᤧᤸᤗᤧ ᤕᤥ᤹ᤖᤢᤖ ᤐᤠ᤺ᤳᤋᤢ. “ᤜᤧᤰᤁᤩᤠᤱ ᤂᤧᤶᤔᤩᤠᤰᤗᤰ ᤔᤣ᤺ᤴ. ᤁᤖ ᤀᤧᤛ᤻ᤋᤖ ᤜᤠᤱᤔᤧᤸᤗᤧ ᤕᤠᤖᤡᤵ ᤆᤥᤃᤢᤒᤠ ᤛᤠᤓ᤺ᤱᤈᤠᤀᤥ ᤜᤠᤱᤅᤡᤴᤏᤢ ᤛᤥᤖᤡᤰ ᤋᤠᤔᤠᤖᤧ ᤗᤠᤃᤡ ᤜᤠᤱᤔᤧᤸᤗᤧ ᤀᤠᤱᤃᤠ᤹ᤖᤰ ᤀᤢ᤺ᤳᤋᤠᤱ॥ ᤂᤶᤓᤩᤠᤱ ᤜᤠᤱᤅᤡᤴᤏᤢ ᤛᤥᤖᤡᤰ ᤋᤠᤔᤠᤖᤧ ᤗᤠᤃᤡ ᤋᤠ᤺ᤴᤍᤡᤰᤁᤠᤱ ᤀᤠᤱᤃᤠ᤹ ᤀᤢ᤺ᤳᤋᤠᤱᤅᤠᤱ ᤘᤠ᤹॥

¹³ ᤜᤧᤰᤁᤣᤛᤠᤱ ᤂᤧᤴ ᤕᤜᤢᤍᤡ ᤔᤥᤷᤍᤁᤤᤴ ᤜᤠᤱᤜᤡᤶᤔᤥᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥ ᤕᤢᤱᤒᤠ ᤏᤡᤛᤢᤱᤅᤡᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤣ ᤔᤧᤍᤠᤏᤧᤴ॥”

¹⁴ ᤂᤧᤒᤩᤠᤱ ᤂᤢᤏᤧ᤹ ᤁᤢᤔᤣᤳ ᤈᤣᤖᤣᤛᤧᤴ ᤏᤢ ᤁᤧᤖᤧᤰ ᤁᤢᤴᤈᤢᤶ ᤁᤢᤴᤍᤣᤱᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤏᤡᤒᤥᤱᤅᤠᤱ ᤅᤠᤛᤡ ᤔᤡᤋᤖ ᤁᤣ᤺ᤶᤒᤠ ᤛᤡᤱᤎᤡᤰ ᤜᤠᤰᤋᤧ᤹. ᤂᤧᤵᤔᤥ ᤔᤥᤷᤍᤁᤤᤴ ᤑᤥ᤺ᤶᤔᤠ ᤛᤧᤵᤔᤠᤖᤧ ᤗᤠᤃᤡ ᤋᤠ᤺ᤴᤍᤡᤰ ᤋᤠᤏᤠᤶ ᤜᤠᤱᤅᤡᤴ ᤐᤣᤗᤡ ᤑᤠᤰᤋᤧ᤹॥ ᤂᤧᤴ ᤀᤣᤃᤠᤱ ᤂᤧᤏᤧ᤹ ᤛ᤺ᤳᤋᤧ᤹ᤖ ᤜᤠᤱᤅᤡᤴᤏᤢ ᤛᤥᤖᤡᤰ ᤛᤠᤓ᤺ᤱᤈᤠᤀᤥ ᤐᤣᤃᤧ᤹॥” ᤜᤠᤔᤠᤏᤧᤸᤗᤧ ᤁᤴ ᤐᤠ᤺ᤴᤏᤡᤴ ᤛᤠ᤹ᤖᤡᤰ ᤁᤢᤛᤡᤖᤠ᤹ᤌᤠᤅᤧ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤛᤡᤱᤅᤡᤴ ᤕᤠᤖᤡᤵ ᤆᤥ᤺ᤰᤔᤠ ᤐᤠᤱᤄᤢᤛᤡᤖᤥ॥