ᤀᤧᤛ᤻ᤋᤖ 4 - LIFOTNT

ᤔᤥᤷᤍᤁᤤ᤺ᤸᤗᤧ ᤀᤧᤛ᤻ᤋᤖᤧᤴ ᤁᤢᤓᤠ᤹ ᤏᤠ᤺ᤰᤋᤢ

¹ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤵᤛᤢᤀᤠᤱ ᤔᤥᤷᤍᤁᤤ᤺ᤸᤗᤧ ᤁᤢᤈᤠᤱᤜᤠ᤹ ᤌᤧ᤺ᤰᤂᤢᤀᤠᤱ ᤛᤠᤃᤡ ᤋᤣᤳ ᤆᤠᤰᤛᤡᤱ ᤜᤧᤰᤁᤩᤠᤱ ᤂᤠᤵᤐᤢ ᤜᤢ᤺ᤳᤇᤡᤱᤅᤠᤱ ᤕᤶᤒᤠ ᤀᤡᤰᤗᤠᤀᤥ ᤔᤧᤖᤡᤱ ᤌᤰᤋᤧᤖ ᤕᤧᤰᤕᤰᤁᤥ ᤐᤣ॥

² ᤂᤢᤏᤧ᤹ ᤜᤠᤱᤜᤡᤶᤔᤥ ᤗᤠ᤺ᤵᤔᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤌᤠᤖᤡᤰᤗᤰ ᤐᤣ. ᤌᤣᤀᤠᤱᤓᤧᤸᤗᤧ ᤛᤠᤃᤡ ᤋᤣᤳ ᤁᤧᤈᤠᤱᤒᤠ ᤀᤠᤳᤋᤡᤴ ᤔᤴᤏᤠ᤺ᤴᤏᤠᤱ ᤕᤶᤒᤠ ᤗᤠᤶᤎᤣ᤺ᤳᤋᤥᤗᤠᤶ ᤐᤥᤱᤔᤠᤀᤠᤱ ᤛᤡᤃᤠᤱ ᤗᤠ᤺ᤵᤔᤠ ᤂᤥᤔᤧᤴᤍᤧᤵᤔᤏᤠᤒᤠ ᤘᤕᤧ॥

³ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤏᤢ ᤁᤢᤓᤠᤱ ᤁᤧᤃᤧᤵᤐᤠ ᤁᤧᤖᤧᤰ ᤋᤧᤱᤃᤵᤜᤠ᤹ᤀᤥ ᤕᤜᤢᤍᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤋ᤺ᤰᤏᤧᤳ ᤕᤢᤱᤔᤠ. ᤜᤠ᤺ᤵᤔᤠ ᤆᤡ᤺ᤱᤔᤠ. ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤠ ᤏᤢ ᤔᤧᤖᤡᤱ ᤌᤰᤔᤠ ᤐᤥ᤺ᤰᤂᤧ॥ ᤂᤧᤱᤜᤠ᤹ᤀᤥ ᤕᤖᤡᤰ ᤔᤏᤠᤜᤠ᤹ᤖᤧ ᤛᤠᤃᤡ ᤋᤣᤳ ᤔᤧᤈᤠᤰᤂᤢᤀᤠᤱ ᤂᤠᤵᤐᤢᤀᤥ ᤔᤧᤏᤧᤛᤡᤱ॥

⁴ ᤀᤠᤸᤗ ᤀᤧᤛ᤻ᤋᤖ ᤜᤠᤱᤔᤧᤸᤗᤧ ᤁᤢᤛᤧᤘᤠᤖᤥᤔᤠᤜᤠ᤹ ᤏᤢ ᤛᤡᤱᤃᤠᤖᤢᤜᤠ᤹ ᤔᤧᤍᤩᤧᤀᤠᤱ ᤁᤴ ᤐᤠ᤺ᤴᤏᤡᤴ ᤂᤢᤏᤧ᤹ ᤔᤧᤔᤧᤳᤋᤢ. ᤂᤧᤒᤩᤠᤱ ᤂᤢᤏᤧ᤹ ᤛᤠ᤹ᤖᤡᤰ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤥ ᤌᤩᤧ॥ ᤛᤠᤃᤡ ᤋᤣ᤺ᤳᤋᤡᤴ ᤑᤧᤴᤍᤢᤀᤠᤱ ᤆᤠᤱ ᤆᤠᤰᤛᤡᤱᤗ ᤑᤠ᤹ᤀᤠᤱ ᤂᤢᤏᤧ᤹ ᤔᤥᤷᤍᤁᤤᤴ ᤆᤠᤱ ᤜᤠᤰᤋᤢᤍᤣᤛᤢ॥ ᤁᤖ ᤂᤢᤏᤧ᤹ ᤂᤧᤴ ᤋᤠ᤺ᤰᤔᤠ ᤔᤧᤍᤧᤴᤍᤧᤴ॥

⁵ ᤂᤧᤒᤩᤠᤱ ᤂᤢᤏᤧ᤹ ᤑᤠ᤹ᤔᤠᤖᤧ ᤗᤠᤃᤡ ᤔᤢᤖᤠᤔᤧᤔᤧᤳᤋᤢᤒᤠ ᤜᤠᤱᤅᤡᤸᤗᤧ ᤁᤢᤛᤡᤱᤃᤠᤖᤢᤜᤠ᤹ᤀᤥᤒᤠ ᤗᤳᤇᤠ ᤜᤋᤠᤰᤁᤧᤴ ᤀᤢ᤺ᤵᤔᤠ ᤋᤠ᤺ᤵᤔᤠ ᤐᤠᤱᤄᤢᤛᤡᤀᤠᤱ ᤔᤥᤷᤍᤁᤤᤴ ᤌᤧᤔᤠ ᤁᤧᤛᤠᤰᤐᤥ ᤌᤩᤧ ᤜᤧᤰᤁᤩᤠᤱ ᤂᤢᤏᤧ᤹ ᤌᤣᤀᤠᤱ ᤜᤧᤰᤁᤣ ᤆᤥᤃᤢᤒᤠ ᤑᤠ᤹ᤀᤠᤱ ᤐᤠᤴ ᤛᤣ᤺ᤴᤍᤥᤔᤠᤖᤧ ᤗᤠᤃᤡ ᤂᤧᤴ ᤔᤷᤍᤁᤤᤀᤥ ᤐᤣ᤺ᤰᤔᤠ ᤀᤡᤱᤈᤠᤱ ᤐᤡᤖᤢᤀᤠᤱ ᤐᤠᤱᤄᤢᤍᤣᤛᤢ॥

⁶ ᤜᤋᤠᤰᤁᤧᤴ ᤜᤠᤱᤜᤡᤶ ᤋᤃᤡ ᤁᤧᤏᤧᤒᤠ ᤕᤧᤰᤕᤰᤁᤥᤒᤠ ᤋᤠᤶᤍᤠᤶᤒᤠ ᤗᤰᤂᤢᤶᤔᤥ ᤔᤥᤷᤍᤁᤤᤴ ᤘᤕᤧᤒᤠᤍᤧᤴᤏᤥ ᤐᤣ॥

⁷ ᤔᤥᤷᤍᤁᤤ᤺ᤸᤗᤧ ᤂᤢᤏᤧ᤹ ᤌᤧᤔᤠ ᤋᤢᤔᤢᤀᤠᤱ ᤘᤠ᤹ ᤂᤧᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤢ ᤜᤠᤔᤠᤏᤧᤸᤗᤧ ᤕᤜᤢᤍᤡᤜᤠ᤹ ᤔᤧᤱᤔᤠᤛᤡᤖᤧ ᤗᤠᤃᤡ ᤆᤠᤜᤠ ᤁᤧᤈᤥ᤺ᤰᤐᤠ ᤕᤠᤱᤅᤡᤴ ᤜᤠᤱ ᤕᤠᤱᤌᤠ᤺ᤱᤅᤥ ᤐᤡᤖᤢᤛᤡᤀᤠᤱ ᤘᤠ᤹ ᤂᤧᤴᤏᤠᤱ ᤜᤋᤠᤰᤁᤧᤴ ᤆᤧᤰᤋᤢ॥

⁸ ᤜᤧᤰᤁᤩᤠᤱ ᤛᤢᤛᤏᤀᤥ ᤕᤜᤢᤍᤡᤜᤠ᤹ ᤔᤧᤱᤔᤠᤛᤡᤖᤧ ᤗᤠᤃᤡ ᤔᤧᤗ᤺ᤳᤋᤢᤒᤠ ᤗᤡᤱᤔᤏᤠᤒᤠ ᤀᤡᤱᤈᤠᤱ ᤛᤰᤁᤡᤴ ᤔᤥᤷᤍᤁᤤ᤺ᤸᤗᤧ ᤜᤋᤠᤰᤁᤧᤴ ᤐᤡᤖᤢᤀᤠᤱ ᤔᤧᤳᤋᤢ. “ᤀᤧᤛ᤻ᤋᤖᤧᤴ ᤀᤥ᤺ᤴᤎᤠᤰᤋᤧ᤹ᤀᤠᤱ ᤆᤧᤰᤋᤧ᤹ ᤜᤧᤰᤁᤩᤠᤱ ᤜᤠᤱᤅᤧᤀᤥ ᤐᤣᤃᤧ᤹ᤀᤠᤱ ᤁᤢᤓᤠ᤹ ᤂᤥᤔᤠ ᤏᤢ ᤀᤠᤵᤑᤣᤰ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤕᤧᤰᤐᤣᤗᤡ ᤑᤠᤰᤋᤧ᤹ ᤑᤠ᤹ᤀᤠᤱ ᤔᤧᤳᤋᤧ᤹॥”

⁹ ᤜᤋᤠᤰᤁᤧᤴ ᤐᤣᤀᤠᤱ ᤔᤥᤷᤍᤁᤤ᤺ᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤀᤧᤛ᤻ᤋᤖᤧᤴ ᤆᤧᤰᤋᤢ॥

¹⁰ ᤜᤧᤰᤁᤩᤠᤱ ᤀᤧᤛ᤻ᤋᤖᤧᤸᤗᤧ ᤕᤠᤶᤔᤥ ᤁᤴ ᤀᤡᤱᤄᤱᤅᤡᤴ ᤔᤧᤳᤋᤢᤀᤠᤱ ᤜᤋᤠᤰᤁᤧᤴ ᤐᤠᤱᤄᤢᤍᤣᤛᤢ.

¹¹ “ᤜᤠᤱᤅᤡᤸᤗᤧ ᤁᤧᤖᤧᤰ ᤁᤢᤕᤢᤰᤛᤠᤒᤠᤜᤠ᤹ ᤏᤢ ᤋᤧᤱᤃᤵᤐᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱᤅᤣ ᤘᤠ᤹. ᤁᤢᤓᤠ ᤕᤧᤶᤒᤡᤳᤇᤠ ᤀᤡᤃᤪ ᤔᤧᤴᤇᤢᤔᤠᤴ ᤜᤠᤱᤅᤡᤸᤗᤧ ᤔᤧᤴᤀᤢ᤺ᤳᤋᤣᤀᤣ ᤜᤠᤱᤅᤡᤸᤗᤧ ᤁᤢᤍᤃᤡ ᤜᤠᤱᤜᤡᤶ ᤛᤡᤃᤠᤱᤒᤠ ᤗᤰᤂᤢᤶᤔᤥ ᤗᤠᤛᤧᤏᤧᤓᤃᤪ ᤂᤧᤴ ᤔᤧᤛᤧᤖᤢ᤹॥ ᤂᤧᤸᤗᤧ ᤗᤠᤃᤡ ᤗᤳᤇᤠᤖᤰ ᤁᤢᤓᤠᤱ ᤘᤠ᤹. ᤜᤠᤱᤅᤡᤸᤗᤧ ᤁᤢᤛᤠᤶᤔᤩᤠᤱ ᤜᤠᤱᤋᤰᤁᤠ᤺ᤳᤋᤡᤴ ᤛᤴᤇᤢᤏᤧᤓᤃᤪᤖᤰ ᤂᤧᤴ ᤜᤡᤱ᤹॥ ᤀᤠᤱᤃᤠ᤹ ᤀᤠᤵᤑᤣᤰᤁᤠᤱ ᤐᤣ᤺ᤰᤔᤠᤖᤧ ᤗᤠᤃᤡ ᤜᤠᤱᤅᤡᤸᤗᤧ ᤔᤧᤴᤀᤢ᤺ᤳᤋᤣ ᤘᤠ᤹ᤀᤠᤒᤠ ᤛᤢᤶᤒᤥᤱ ᤕᤧᤴ ᤁᤧᤖᤧᤔᤠᤖᤧ॥”

¹² ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤀᤧᤛ᤻ᤋᤖᤧᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤜᤠᤋᤠᤰᤁᤧᤸᤗᤧ ᤔᤥᤷᤍᤁᤤᤴ ᤆᤧᤰᤋᤢ॥

¹³ ᤂᤧᤒᤩᤠᤱ ᤂᤢᤏᤧ᤹ ᤜᤠᤒᤠ ᤁᤴ ᤏᤢᤃᤵᤐᤡᤴ ᤀᤧᤛ᤻ᤋᤖᤧᤴ ᤜᤠᤰᤋᤢᤍᤣᤛᤢ—“ᤂᤧᤏᤧ᤹ ᤜᤠᤱᤜᤡᤶᤔᤥ ᤁᤧᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤁᤧᤖᤧᤰ ᤕᤜᤢᤍᤡᤜᤠ᤹ᤀᤥ ᤂᤧᤏᤧ᤹ᤖᤰ ᤁᤧᤜᤡᤱ ᤑᤠ᤹ᤀᤠᤱ ᤂᤧᤏᤧ᤹ ᤔᤧᤀᤡ᤺ᤳᤋᤧᤴᤏᤧ᤹॥

¹⁴ ᤁᤴ ᤕᤧᤶᤔᤥ ᤂᤧᤏᤧ᤹ ᤛᤫᤠ᤺ᤳ ᤔᤧᤶᤒᤠ᤺ᤳᤋᤣ ᤁᤧᤕᤢᤱᤏᤧᤓᤃᤪ ᤕᤜᤢᤍᤡᤜᤠ᤹ᤖᤧ ᤗᤠᤃᤡ ᤁᤢᤓᤠ᤹ ᤏᤢ ᤆᤥ᤺ᤰᤕᤢᤶᤓᤥ ᤘᤣ᤹ᤍᤧᤴᤏᤥ ᤗᤠᤶᤒᤠ ᤋᤠᤖᤥ॥ ᤁᤖ ᤂᤧᤏᤧ᤹ ᤏᤢ ᤁᤧᤶᤒᤠᤖᤧ ᤁᤢᤜᤡᤶᤛᤕᤱᤜᤠ᤹ ᤁᤧᤔᤧᤃᤡ᤹॥ ᤐᤥᤱᤔᤠ ᤛᤢᤰ ᤀᤠᤶᤓᤠ ᤁᤴ ᤕᤧᤶᤔᤡᤸᤗᤧ ᤗᤠᤃᤡᤀᤣ ᤂᤧᤏᤧ᤹ ᤜᤠᤱᤔᤠ ᤁᤧᤒᤥ᤺ᤰᤂᤧᤒᤠᤒᤡ ᤜᤠᤃ᥄”

¹⁵ ᤂᤧᤒᤩᤠᤱ ᤀᤧᤛ᤻ᤋᤖᤧᤸᤗᤧ ᤔᤥᤷᤍᤁᤤᤴ ᤀᤰᤋᤱᤒᤠ ᤀᤡᤱᤄᤱ ᤜᤠᤰᤋᤢᤍᤣᤛᤢ—

¹⁶ “ᤐᤣᤃᤧ᤹ᤀᤠᤱ ᤛᤢᤛᤴᤏᤥ ᤁᤧᤘᤠ᤹ᤒᤠ ᤁᤧᤖᤧᤰ ᤕᤜᤢᤍᤡᤜᤠ᤹ ᤑᤢᤰᤂᤧᤛᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤗᤠᤃᤡ ᤋ᤺ᤰᤏᤧᤳ ᤔᤧᤕᤢᤱᤗ॥ ᤛᤢᤶᤕᤠᤴ ᤏᤢ ᤛᤢᤶᤛᤧᤴ ᤌᤠᤖᤡᤰ ᤔᤧᤈᤧᤶᤔᤡᤴᤏᤧ᤹ ᤔᤧᤎᤢᤅᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤆᤫᤠ᤺ᤳᤋᤠᤱ ᤔᤧᤎᤢᤅᤧᤶᤔᤡᤴᤏᤧ᤹॥ ᤀᤠᤱᤃᤠ᤹ ᤏᤢ ᤀᤠᤱᤃᤠ᤹ ᤀᤠᤛᤧᤘᤠᤖᤥᤔᤠᤜᤠ᤹ᤀᤠᤱ ᤂᤡᤏᤡ᤹ ᤜᤧᤰᤁᤣᤀᤣ ᤋ᤺ᤰᤏᤧᤳ ᤕᤢᤅᤡᤃᤧ॥ ᤂᤧᤴ ᤀᤣᤃᤠᤱ ᤁᤢᤓᤠᤱᤗᤧ ᤁᤢᤍᤰᤗᤧᤱᤘᤠ ᤐᤥᤱᤛᤠᤱ ᤀᤠᤱᤃᤠ᤹ ᤜᤠᤱᤅᤧ᤹ᤀᤥ ᤐᤣ᤺ᤰᤁᤠ॥ ᤀᤠᤱᤃᤠ᤹ ᤛᤡᤔᤠᤀᤣ ᤐᤥᤱᤛᤠᤱ ᤀᤠᤱᤃᤠ᤹ ᤛᤡᤀᤠᤖ॥”

¹⁷ ᤂᤧᤒᤩᤠᤱ ᤔᤥᤷᤍᤁᤤᤴ ᤐᤣᤄᤧᤖᤧ. ᤜᤧᤰᤁᤩᤠᤱ ᤀᤧᤛ᤻ᤋᤖᤧᤸᤗᤧ ᤔᤧᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤆᤥᤃᤢᤖᤥ॥