ᤀᤧᤛ᤻ᤋᤖ 3 - LIFOTNT

ᤜᤠᤔᤠᤏᤖᤧ ᤕᤜᤢᤍᤡᤜᤠ᤹ ᤔᤧᤱᤔᤠᤛᤡ ᤁᤢᤈᤧᤶᤓᤴ

¹ ᤂᤧᤴ ᤀᤣᤃᤠᤱ ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᤀᤃᤠᤃᤡ ᤜᤶᤔᤍᤠᤋᤠ᤺ᤸᤗᤧ ᤁᤢᤛ᤻ᤛᤠ ᤜᤠᤔᤠᤏᤖᤧ ᤁᤢᤍᤠᤰᤑᤠᤴ ᤑᤥᤛᤢ ᤐᤡᤖᤢ ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤖᤧᤰ ᤁᤢᤴᤈᤢᤶ ᤁᤢᤴᤍᤣ᤺ᤱᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤏᤢ᤺ᤸᤗᤧ ᤕᤶᤒᤠ ᤕᤢᤰᤏᤠ ᤐᤡᤖᤢᤀᤠᤱ ᤛᤠ᤹ᤖᤡᤰ ᤌᤥᤎᤥᤰᤐᤠ ᤋᤠᤰᤑᤠᤀᤥ ᤕᤢᤰᤂᤢ॥

² ᤁᤸᤗᤧᤆᤥᤃᤢᤸᤗᤧ ᤜᤠᤱᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤥ ᤁᤧᤘᤠ᤹ᤒᤠ ᤁᤧᤖᤧᤰ ᤕᤢᤰᤛᤠᤒᤠᤜᤠ᤹ᤖᤧ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤌᤢᤱᤒᤥ᤹ᤜᤈ᤹ ᤔᤧᤕᤢᤱᤛᤡᤱᤗ ᤛᤠᤒᤴ ᤔᤧᤓᤴᤇᤡᤱᤅᤠᤱ ᤜᤠᤔᤠᤏᤧᤴ ᤛᤧᤘᤠ ᤔᤧᤔᤧᤳᤋᤢᤖ ᤔᤧᤘᤕᤧ॥ ᤁᤖ ᤔᤥᤷᤍᤁᤤ᤺ᤸᤗᤧ ᤁᤶᤓᤗ᤹ᤖᤡᤰ ᤌᤢᤱᤒᤥ᤹ ᤜᤒᤳ ᤕᤢᤱᤛᤡᤱᤅᤠᤱ ᤂᤧᤴ ᤛᤧᤘᤠ ᤔᤧᤔᤧᤳᤋᤢᤴ॥

³ ᤌᤡᤰᤗᤧᤱ ᤜᤠᤱᤜᤡᤶ ᤗᤠᤶᤎᤣ᤺ᤵᤐᤥ ᤕᤢᤰᤛᤠᤒᤠᤜᤠ᤹ᤖᤧ ᤔᤥᤷᤍᤁᤤᤴ ᤔᤧᤔᤧᤳᤋᤢ. “ᤂᤧᤏᤧ᤹ ᤌᤣᤀᤠᤱ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤁᤧᤓᤣ᤺ᤴᤍᤢᤒᤠᤒᤣ᥅”

⁴ ᤂᤧᤱᤜᤠ᤹ᤖᤧ ᤌᤡᤰᤕᤠ᤺ᤴᤎᤰ ᤂᤢᤏᤧ᤹ ᤜᤠᤒᤠ ᤂᤧᤴ ᤐᤠ᤺ᤴᤏᤡᤴ ᤔᤧᤔᤧᤳᤋᤢ. ᤁᤖ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤴ॥ ᤔᤥᤷᤍᤁᤤ᤺ᤸᤗᤧ ᤕᤜᤢᤍᤡᤀᤠ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤜᤠᤔᤠᤏᤧᤸᤗᤧ ᤏᤠᤛᤡᤌ᤺ᤳᤋᤢᤒᤡ ᤔᤧᤎ᤺ᤳᤋᤢᤶᤒᤡ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤵᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤜᤠᤔᤠᤏᤧᤴ ᤔᤧᤈᤧᤰᤋᤢ॥

⁵ ᤔᤥᤷᤍᤁᤤᤴ ᤌᤢᤱᤒᤥ᤹ᤜᤈ᤹ ᤕᤢᤱᤛᤡᤱᤅᤠᤱ ᤂᤢᤏᤧ᤹ ᤛᤧᤘᤠ ᤔᤧᤔᤧᤳᤋᤢᤶᤒᤠ ᤐᤠ᤺ᤴᤏᤡᤴ ᤜᤠᤔᤠᤏᤧᤸᤗᤧ ᤏᤡᤱᤘᤠ᤹ ᤂᤥᤛᤢᤀᤠᤱ ᤂᤢᤏᤧ᤹ ᤀᤠᤳᤋᤠᤋᤠᤴᤏᤣ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧ॥

⁶ ᤜᤠᤔᤠᤏᤖᤧ ᤔᤥᤷᤍᤁᤤ᤺ᤸᤗᤧ ᤁᤢᤛᤢᤘᤠᤱᤜᤠ᤹ ᤜᤠ᤺ᤳᤇᤡᤖᤧᤳᤇ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤂᤢᤏᤧ᤹ ᤔᤥᤷᤍᤁᤤ᤺ᤸᤗᤰ ᤛᤧᤵᤔᤠ ᤏᤡᤱᤘᤠ᤹ ᤔᤧᤈᤥᤃᤢᤴ. ᤁᤖ ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᤁᤧᤖᤧᤰ ᤁᤢᤜᤠᤱᤈᤢᤶᤔᤥᤒᤠ ᤁᤠᤰ ᤕᤜᤢᤍᤡᤜᤠ᤹. ᤔᤥᤷᤍᤁᤤ᤺ᤸᤗᤧ ᤁᤢᤔᤏᤠ ᤕᤜᤢᤍᤡᤜᤠ᤹ ᤔᤧᤱᤔᤠᤛᤡ ᤗᤠᤶᤀᤥᤔᤧᤵᤔᤠ ᤜᤣ᤺ᤰᤋᤢ॥

⁷ ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤒᤥᤱᤅᤠᤱ ᤕᤧᤳᤇᤡᤃᤣᤰᤐᤠ ᤋᤱᤒᤣ ᤌᤡᤰᤛᤡᤃᤣᤰᤐᤠ ᤗᤠ. ᤀᤡᤃᤪ ᤏᤡᤛᤠᤏ ᤗᤠᤀᤥ. ᤆᤧᤶᤓᤴᤏᤡᤴ ᤁᤧᤵᤔᤠᤖᤧ ᤗᤠᤃᤡ ᤕᤧᤴ ᤏᤢ ᤗᤠ ᤏᤡ᤺ᤴᤎᤥ ᤆᤥ᤺ᤰᤛᤧ ᤂᤧᤱᤜᤠ᤹ᤖᤧ ᤋ᤹ᤕᤠ᤺ᤴᤛᤥᤴ ᤔᤧᤃᤧᤛᤢ॥ ᤂᤧᤴ ᤋ᤹ᤕᤠ᤺ᤴᤛᤥᤴᤏᤡᤴ “ᤐᤢᤖ” ᤔᤧᤔᤧᤳᤋᤢ॥ ᤋ᤹ᤕᤠ᤺ᤴᤛᤥᤴᤏᤡᤴ ᤌᤡᤒᤥᤱᤅᤠᤱ ᤏᤧᤳᤇᤡᤃᤣᤰᤐᤠ ᤗᤠ. ᤀᤡᤃᤪ ᤀᤍᤠᤖ ᤗᤠᤀᤥ ᤌᤩᤧ॥

⁸ ᤂᤧᤒᤩᤠᤱ ᤜᤠᤔᤠᤏᤧᤸᤗᤧ ᤀᤜᤠᤛᤢᤖᤛ ᤜᤠᤱᤅᤡᤴ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤜᤠᤱᤈᤢᤶᤔᤥᤒᤠ ᤁᤧᤖᤧᤰ ᤋᤧᤱᤃᤵᤜᤠ᤹ᤀᤥ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤗᤳᤇᤠ ᤛᤢᤘᤠᤱᤛᤔᤠ ᤔᤏᤠ ᤔᤧᤛᤧᤖᤧᤀᤠᤱ ᤔᤧᤕᤢᤱ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤰᤌᤡᤶᤜᤠ᤹ ᤘᤣ᤹ ᤁᤧᤖᤧᤰ ᤛᤢᤘᤠᤱᤜᤠ᤹ᤏᤢ᤺ᤸᤗᤧ ᤔᤧᤴᤍᤱᤔᤏᤠᤒᤠ ᤆᤥᤰ॥ ᤂᤧᤱᤜᤠ᤹ᤖᤧ ᤀᤠᤍᤠᤱᤒᤠᤖᤧ ᤁᤧᤄᤠᤛᤧᤴ ᤁᤢᤓᤠᤱᤜᤠ᤹ ᤔᤧᤴᤀᤡ᤺ᤳᤋᤢᤴ ᤔᤧᤏᤠ᤺ᤳᤋᤢᤴ᤹. ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤏᤢᤖᤡᤰ ᤁᤧᤔᤧᤳᤋᤢᤛᤡᤸᤗᤧ ᤌᤣᤀᤠᤱ ᤁᤧᤴᤕᤥ᤹ᤏᤧᤴ॥

⁹ ᤜᤠᤱᤅᤡᤸᤗᤧ ᤏᤢᤒᤠ ᤁᤧᤀᤡ᤺ᤳᤋᤢᤏᤧᤓᤃᤪ ᤂᤧᤱᤜᤠ᤹ ᤔᤧᤱᤔᤠᤛᤡᤖᤧ ᤗᤠᤃᤡ ᤗᤳᤇᤠ ᤛᤠᤵᤔᤏᤠᤒᤠ ᤀᤡᤱᤈᤠᤱ ᤗ᤺ᤳᤋᤧ᤹॥ ᤀᤠᤱᤃᤠ᤹ ᤌᤡᤒᤥᤱ ᤜᤧᤴᤇᤡᤱ ᤛᤢᤰᤘᤠ ᤕᤢᤵᤐᤠ ᤁᤧᤛᤢᤜᤠᤱᤕᤢᤰᤐᤠᤜᤠ᤹ ᤐᤡᤖᤢᤱᤛᤡᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤕᤢᤵᤐᤠᤴ ᤜᤠᤱᤌᤠ᤺ᤱᤅᤥ ᤔᤧᤕᤢᤰᤂᤢ᤹॥”

¹⁰ ᤂᤧᤒᤩᤠᤱ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤛᤫᤠᤃᤣ᤺ᤵ ᤀᤣ᤺ᤵᤛᤠᤵᤐᤡᤴ ᤁᤢᤜᤢᤰᤆᤥ᤺ᤰᤁᤥᤗᤠᤶ ᤑᤧᤴᤍᤢᤀᤠᤱ ᤕᤜᤢᤍᤡᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤔᤡ ᤀᤠᤃᤠᤃᤡ ᤜᤶᤔᤠᤍᤠᤋᤠ᤺ᤸᤗᤧ ᤁᤢᤛ᤻ᤛᤠ ᤜᤠᤔᤠᤏᤧᤴ ᤐᤡᤖᤢ॥

¹¹ ᤜᤠᤱᤅᤡᤸᤗᤧ ᤜᤠᤔᤠᤏᤧᤴ ᤔᤧᤳᤋᤢ. “ᤂᤧᤴ ᤕᤢᤵᤐᤠᤴ ᤏᤢ ᤂᤧᤴ ᤔᤏᤠᤜᤠ᤹ ᤂᤧᤏᤧ᤹ᤀᤡᤴᤏᤣ ᤔᤧᤒᤥᤱ᤹. ᤂᤧᤏᤧ᤹ ᤁᤧᤏᤡᤱᤘᤠ᤹ ᤐᤠ᤺ᤳᤐᤠ᤺ᤳ ᤂᤧᤱᤜᤠ᤹ ᤔᤧᤳᤋᤧᤛᤧ᤹॥”

¹² ᤂᤧᤒᤩᤠᤱ ᤌᤡᤰᤛᤡᤃᤣᤰᤐᤠ ᤗᤠ ᤌᤡᤒᤥᤱᤅᤠᤱ ᤛᤢᤶᤛᤡᤃᤣᤰᤐᤠ ᤕᤧᤴᤏᤥ ᤜᤠᤔᤠᤏᤧᤸᤗᤧ ᤜᤠᤱᤅᤡᤸᤗᤧ ᤁᤢᤛᤠᤵᤗᤠ ᤁᤧᤛᤠᤵᤐᤠᤜᤠ᤹ ᤀᤢ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤜᤠᤔᤠᤏᤧᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤋᤧᤱᤃᤵ ᤌᤰᤔᤠ ᤀᤠᤶᤓᤠ ᤂᤧᤵᤔᤥᤒᤠ ᤛᤰᤛᤰ ᤏᤢ ᤛᤢᤘᤠᤱ ᤌᤰᤔᤠ ᤂᤢᤴᤇᤡ᤹ ᤀᤠᤒᤠᤅᤣ ᤐᤠ᤺ᤴᤍᤠᤱᤅᤥ ᤔᤧᤛᤠᤵᤋᤢᤀᤠᤱ ᤜᤠᤱᤅᤡᤸᤗᤧ ᤁᤢᤜᤠᤱᤈᤢᤶᤔᤥᤒᤠ ᤕᤶᤒᤠ ᤛᤢᤜᤠᤱᤃᤧᤶᤒᤠᤜᤠ᤹. ᤘᤣ᤹ ᤘᤣ᤹ ᤋᤣ᤺ᤱᤃᤵᤐᤥᤒᤠ ᤆᤢᤰᤛᤠ ᤜᤠᤱᤜᤠ᤹ ᤏᤢ ᤘᤣ᤹ ᤘᤣ᤹ ᤛᤢᤘᤠᤱᤒᤠ ᤋᤢᤶᤔᤩᤠᤱᤜᤠᤱᤜᤠ᤹ ᤀᤡᤱᤈᤠᤱ ᤔᤧᤜᤠᤰᤋᤢᤛᤡ—ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᤁᤢᤔᤡᤱᤅᤥ ᤂᤧᤴ ᤔᤧᤛᤠᤵᤋᤢ. ᤜᤧᤰᤁᤩᤠᤱ ᤔᤧᤓᤠᤰᤋᤢᤀᤠᤱ ᤜᤠᤱᤅᤡᤸᤗᤧ ᤁᤢᤀᤣ᤺ᤵᤛᤠᤵᤐᤡᤴ ᤂᤧᤵᤔᤥ ᤔᤧᤕᤢᤰᤋᤢᤀᤠᤱ ᤐᤳᤇᤧ॥

¹³ ᤁᤶᤓᤗ᤹ᤖᤡᤰ ᤀᤍᤠᤖ ᤔᤧᤵᤔᤏᤠᤒᤠ ᤌᤡᤒᤥᤱᤅᤠᤱ ᤏᤧᤳᤇᤡᤃᤣᤰᤐᤠ ᤗᤠ ᤌᤡᤒᤥᤱᤅᤠᤱ ᤛᤢᤶᤛᤡᤃᤣᤰᤐᤠ ᤕᤧᤴᤏᤥ ᤁᤧᤖᤧᤰ ᤕᤜᤢᤍᤡᤜᤠ᤹. ᤌᤠᤱᤒᤧᤴ. ᤁᤠᤵᤐᤥᤒᤠ. ᤔᤧᤴᤇᤢᤔᤠ ᤏᤢ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ ᤂᤰᤐᤧᤳ ᤌᤡᤰᤕᤠ᤺ᤴᤗᤧ ᤛᤧᤵᤔᤠᤛᤡ ᤜᤧᤰᤁᤩᤠᤱ ᤘᤖᤧᤱᤗᤧᤱ ᤂᤢᤴᤇᤡ᤹ ᤔᤡᤱᤅᤣ ᤔᤠᤔᤠ ᤐᤡᤔᤠᤛᤡ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤏᤠᤵᤔᤠᤛᤡ ᤀᤡᤱᤈᤠᤱ ᤜᤠᤱᤈᤢᤶᤔᤥᤒᤠ ᤁᤧᤖᤧᤰ ᤋᤧᤱᤃᤵᤜᤠ᤹ᤀᤥ ᤜᤠᤱ ᤀᤡᤱᤛᤠᤒᤠᤜᤠ᤹ ᤔᤧᤒᤠᤱᤄᤢ ᤔᤧᤍᤣᤛᤢᤛᤡ॥

¹⁴ ᤂᤧᤴ ᤕᤧᤴᤏᤡᤸᤗᤧ ᤗᤠᤃᤡ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ ᤑᤠ᤹ᤀᤠᤱ ᤂᤧᤴ ᤛᤠᤵᤔᤏᤠᤒᤠ ᤀᤡᤱᤈᤠᤱᤅᤡᤴ ᤗᤳᤇᤠ ᤗᤡᤱᤔᤏᤠᤒᤠ ᤀᤡᤱᤈᤠᤱ ᤀᤡᤛᤡ᤺ᤰ ᤁᤧᤖᤧᤰ ᤋᤧᤱᤃᤵᤐᤥ ᤀᤢᤘᤠ ᤆᤥ᤺ᤰᤔᤠᤀᤠᤱ ᤁᤠᤰ ᤔᤏᤠ ᤛᤢᤘᤠᤱᤜᤠ᤹ ᤀᤡᤱᤄᤱ ᤐᤡᤔᤠᤛᤡ ᤁᤧᤒᤥᤱᤒᤠ ᤘᤕᤧ॥

¹⁵ ᤜᤠᤱᤅᤡᤸᤗᤧ ᤁᤢᤀᤡᤈᤠ᤺ᤱᤅᤥ ᤂᤧᤴ ᤜᤠᤱ ᤀᤡᤱᤛᤠᤒᤠᤜᤠ᤹ ᤛᤠ᤹ᤖᤡᤰ ᤜᤠᤖᤠᤀᤣ ᤀᤠᤸᤗᤥᤖᤧ ᤀᤠᤸᤗᤥ ᤔᤧᤒᤣ॥ ᤂᤧᤴ ᤀᤡᤱᤈᤠᤱᤅᤡᤴ ᤜᤠᤱᤐᤠᤱ ᤛᤢᤛᤏᤀᤥᤀᤠᤱ ᤀᤡᤱᤔᤧᤓᤥᤛᤢ॥ ᤜᤠᤱᤅᤡᤴ ᤏᤢ ᤜᤠᤔᤠᤏᤧᤴ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤌᤢᤱᤛᤧ ᤕᤢᤱᤏᤧᤛᤡ. ᤁᤖ ᤛᤢᤛᤏ ᤕᤧᤰᤕᤰᤁᤥ ᤜᤕᤱ ᤁᤡᤸᤗᤡᤱ ᤐᤥ᤺ᤰᤂᤧᤖᤥ॥