ᤀᤧᤛ᤻ᤋᤖ 2 - LIFOTNTᤀᤧᤛ᤻ᤋᤖᤧᤴ ᤜᤠᤱᤔᤠ ᤐᤥᤱ᤹ 1 ᤀᤠᤸᤗ ᤕᤠᤱᤛᤡ ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᤁᤢᤛᤡᤰ ᤐᤥ᤺ᤰᤔᤧᤴ ᤆᤡ᤺ᤰᤋᤢ ᤂᤧᤒᤩᤠᤱ ᤂᤢᤏᤧ᤹ ᤘᤛ᤻ᤋᤡ ᤜᤠᤱᤔᤧᤴ ᤏᤢ ᤂᤧᤸᤗᤧ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤗ᤺ᤳᤋᤢᤒᤠ ᤀᤡᤈᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤢᤏᤡᤱᤘᤠ᤹ ᤛᤢᤶᤗ᤹ᤖᤧ॥ 2 ᤁᤸᤗᤧᤆᤥᤃᤢᤸᤗᤧ ᤜᤠᤱᤅᤡᤸᤗᤧ ᤁᤢᤏᤡ᤺ᤳᤋᤠᤱᤒᤠ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤔᤧᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤗᤠᤃᤡ ᤏᤢᤔᤠ ᤏᤢᤔᤠ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤜᤠ᤹ ᤔᤧᤃᤥ᤺ᤳᤋᤢᤛᤡᤖ॥ 3 ᤜᤠᤱᤅᤡᤸᤗᤧ ᤁᤧᤜᤠᤱᤈᤢᤶᤔᤥᤒᤠ ᤁᤧᤖᤧᤰ ᤋᤧᤱᤃᤵᤜᤠ᤹ᤀᤥᤒᤠ ᤌᤥᤎᤥᤰᤐᤠ ᤛᤢᤜᤠᤱᤕᤢᤰᤐᤠᤜᤠ᤹ ᤁᤧᤖᤧᤰ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤜᤠ᤹ ᤜᤠᤱᤐᤠᤱ ᤛᤢᤛᤏᤒᤠ ᤔᤧᤴᤇᤢᤔᤠ ᤕᤢᤱᤔᤠ ᤜᤡᤶᤔᤥ ᤋᤠ᤺ᤵᤔᤠᤛᤡᤖᤧ ᤗᤠᤃᤡ ᤕᤢᤰᤋᤡᤱ ᤆᤥᤃᤧᤛᤧ᤹॥ ᤂᤧᤱᤜᤠ᤹ᤖᤧ ᤀᤠᤍᤠᤱᤒᤠ ᤐᤕᤶ ᤜᤠᤱᤅᤡᤸᤗᤧ ᤔᤧᤴᤇᤢᤔᤠ ᤁᤧᤔᤏᤠᤜᤠ᤹ ᤀᤥᤃᤧᤔᤧᤵᤐᤠ ᤛᤡᤱᤃᤠᤖᤢ ᤜᤣᤃᤣᤴ ᤕᤠ᤺ᤶᤒᤰ ᤆᤥ᤺ᤰᤔᤠ ᤗᤰᤐᤧᤴ ᤔᤧᤒᤡᤖᤢᤖ॥ ᤜᤢ᤺ᤳᤇᤡᤱᤔᤠ ᤆᤥ᤺ᤰᤛᤡᤱᤔᤠ ᤐᤠ᤺ᤴᤜᤠ᤹ ᤂᤧᤱᤜᤠ᤹ ᤔᤧᤒᤡᤖᤢᤛᤡᤖ॥ 4 ᤀᤠᤳᤋᤡᤴ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤴ ᤐᤕᤶ ᤜᤠᤱᤅᤡᤸᤗᤧ ᤛᤠ᤹ᤖᤡᤰ ᤁᤧᤛᤡᤖᤠ᤹ᤌᤠᤱ. ᤜᤠᤒᤠ ᤂᤧᤴᤏᤣ ᤘᤛ᤻ᤋᤡ᤺ᤸᤗᤧ ᤁᤢᤗᤧᤰᤘᤠᤀᤥ ᤜᤠᤱᤔᤠ ᤆᤥᤃᤧ᤹॥” ᤁᤴ ᤛᤢᤈᤠᤴ ᤜᤠᤱᤅᤡᤸᤗᤧ ᤁᤢᤛᤡᤖᤠ᤹ᤌᤠᤅᤧ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤁᤢᤀᤡᤛᤡᤰ ᤆᤥᤃᤢ॥ 5 ᤜᤠᤱᤐᤠᤱ ᤛᤢᤛᤴᤏᤥ ᤗᤳᤇᤠ ᤔᤥᤷᤍᤁᤤ ᤔᤡᤱ ᤁᤧᤘᤠ᤺ᤵᤐᤠ ᤕᤜᤢᤍᤡᤎᤡᤰ ᤘᤕᤧ॥ ᤂᤢᤏᤧ᤹ ᤕᤠᤀᤡᤖᤖᤧ ᤁᤢᤛ᤻ᤛᤠ. ᤛᤡᤔᤡᤖᤧ ᤁᤢᤶᤔᤧᤴᤇᤠ᤹ ᤏᤢ ᤁᤡᤛᤖᤧ ᤁᤢᤈᤰᤔᤧᤴᤇᤠ᤹ ᤒᤣᤏᤩᤠᤔᤡᤏ ᤌᤠ᤺ᤰᤁᤥᤒᤠ ᤘᤕᤧ. ᤂᤧᤴ ᤁᤡᤛᤧᤴ ᤆᤤᤲ 6 ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤸᤗᤧ ᤕᤖᤢᤛᤗᤧᤔᤗᤠᤶ ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤏᤧᤴᤏᤢ ᤛᤥᤖᤡᤰ ᤋᤧᤶᤛᤢᤍᤣ᤹ᤖᤢᤛᤡᤒᤠᤜᤠ᤹ᤀᤥ ᤌᤡᤰᤐᤠ ᤘᤕᤧ॥ 7 ᤔᤥᤷᤍᤁᤤ᤺ᤸᤗᤧ ᤀᤠᤵᤑᤣᤰ ᤁᤢᤶᤓᤅᤠᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤜᤍᤛ᤻ᤛᤠ. ᤀᤡᤃᤪ ᤀᤧᤛ᤻ᤋᤖᤧᤴ ᤛᤧᤛᤡ᤺ᤱᤔᤠ ᤆᤥᤃᤢᤀᤠᤱ ᤘᤕᤧ॥ ᤀᤧᤛ᤻ᤋᤖᤖᤧ ᤁᤢᤶᤒᤠ ᤁᤢᤶᤔᤠ ᤔᤧᤜᤥ᤺ᤵᤋᤧ॥ ᤂᤢᤏᤧ᤹ ᤏᤢᤔᤠᤛᤢᤰᤔᤠ ᤏᤢ ᤏᤠᤖᤢᤶᤓᤢᤱ ᤁᤧᤃᤢᤔᤠ ᤆᤥᤃᤧ॥ ᤂᤢᤏᤧ᤹ ᤁᤢᤶᤒᤠ ᤁᤢᤶᤔᤠ ᤔᤠᤏᤧᤛᤡᤀᤠᤱ ᤀᤣᤃᤠᤱ ᤔᤥᤷᤍᤁᤤ᤺ᤸᤗᤧ ᤂᤢᤏᤧ᤹ ᤜᤡᤱᤄᤢᤀᤠᤱ ᤘᤕᤧ॥ 8 ᤀᤠᤸᤗ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤏᤢ ᤁᤢᤀᤡᤱᤈᤠᤱᤅᤡᤴ ᤀᤡᤱᤓᤴ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤜᤣᤃᤣ᤺ᤸᤗᤧ ᤁᤢᤗᤰᤐᤧᤴᤏᤥ ᤐᤡᤔᤠᤖᤧ ᤗᤠᤃᤡ ᤕᤖᤡᤰ ᤔᤧᤴᤇ᤻ᤕᤠᤜᤠ᤹ ᤜᤠᤱᤐᤠᤱ ᤛᤢᤛᤏᤀᤥ ᤔᤧᤍᤠᤖᤢᤛᤡ. ᤂᤧᤒᤩᤠᤱ ᤀᤧᤛ᤻ᤋᤖᤖᤧᤴᤏᤠᤱ ᤔᤧᤴᤇᤢᤔᤠᤜᤠ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤜᤣᤃᤣ᤺ᤸᤗᤧ ᤁᤢᤗᤰᤐᤧᤴᤏᤥ ᤐᤡᤔᤠᤖᤧ ᤗᤠᤃᤡ ᤜᤠᤱᤜᤡᤶᤔᤥ ᤔᤧᤍᤣ᤹ᤖᤢ॥ 9 ᤂᤢᤏᤧ᤹ ᤏᤡᤛᤢᤀᤠᤱ ᤂᤧᤴ ᤛᤡᤱᤃᤠᤖᤢᤴ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤩᤧ. ᤜᤧᤰᤁᤩᤠᤱ ᤀᤧᤛ᤻ᤋᤖᤧᤸᤗᤧ ᤂᤢᤏᤧ᤹ᤗᤠᤶ ᤗᤢᤱᤔᤠ᤹ ᤋᤢᤰᤔᤠᤴ ᤂᤥᤛᤢ॥ ᤂᤧᤸᤗᤧ ᤂᤡᤔᤥ ᤀᤧᤛ᤻ᤋᤖᤧᤴ ᤜᤢ᤺ᤳᤇᤡᤱᤔᤠ ᤆᤥ᤺ᤰᤛᤡᤱᤔᤠ ᤐᤠ᤺ᤴᤜᤠ᤹ ᤏᤢ ᤏᤢᤒᤠ ᤐᤖᤡᤰᤐᤠ ᤆᤠᤔᤠ ᤁᤢᤈᤠ ᤗᤰᤜᤠ᤹ ᤋᤠᤖᤢ ᤐᤡᤖᤢ॥ ᤜᤠᤱᤅᤡᤸᤗᤧ ᤁᤢᤜᤡᤶᤔᤥᤗᤠᤶ ᤔᤧᤛᤣᤃᤢᤛᤡᤔᤠ ᤏᤢᤛᤡ ᤔᤧᤴᤇᤢᤔᤠ ᤛᤧᤘᤠᤖᤥᤔᤠᤜᤠ᤹ᤀᤠᤱ ᤂᤧᤸᤗᤧ ᤔᤢᤖᤠ ᤔᤧᤳᤋᤢᤛᤡ॥ ᤔᤧᤴᤇᤢᤔᤠᤜᤠ᤹ ᤕᤢᤱᤔᤠ ᤜᤡᤶᤔᤥ ᤀᤧᤛ᤻ᤋᤖᤧᤴ ᤏᤢ ᤂᤢᤏᤧ᤹ ᤁᤧᤓᤠ᤹ᤔᤠ ᤛᤧᤘᤠᤖᤥᤔᤠᤜᤠ᤹ ᤏᤢᤒᤠᤍᤧᤴᤏᤥ ᤔᤧᤈᤳᤋᤢᤛᤡ॥ 10 ᤀᤧᤛ᤻ᤋᤖᤧᤸᤗᤧ ᤂᤢᤏᤧ᤹ ᤁᤢᤜᤡᤶᤛᤕᤱ ᤏᤢ ᤁᤢᤛᤢᤘᤠᤱᤗᤧ ᤕᤠ᤺ᤶᤒᤣᤀᤥ ᤜᤠ᤺ᤳᤋᤠᤱ ᤔᤧᤳᤋᤢᤛᤡᤒᤠ ᤜᤥ᤺ᤵᤋᤧ. ᤌᤣᤀᤠᤱᤓᤧᤸᤗᤧ ᤔᤥᤷᤍᤁᤤ᤺ᤸᤗᤧ ᤂᤢᤏᤧ᤹ ᤔᤠ᤹ᤛᤡᤱᤔᤠ ᤐᤠᤱᤄᤢᤀᤠᤱ ᤘᤕᤧ॥ 11 ᤀᤧᤛ᤻ᤋᤖᤖᤧ ᤁᤢᤗᤠᤃᤡ ᤌᤣ ᤐᤥᤱᤗ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤵᤔᤠᤖᤧ ᤗᤠᤃᤡ ᤌᤡᤰᤕᤠ᤺ᤴᤎᤰ ᤔᤥᤷᤍᤁᤤᤴ ᤔᤧᤴᤇᤢᤔᤠ ᤕᤢᤱᤔᤠ ᤜᤡᤶ ᤗᤰᤂᤢᤶᤔᤥᤗᤠᤶ ᤐᤥ᤺ᤰᤂᤧᤖ ᤗᤠᤱᤄᤣᤃᤧᤀᤠᤱ ᤘᤕᤧ॥ 12 ᤗᤠ ᤋᤢᤰᤛᤡ ᤔᤠᤖᤢᤰ ᤏᤡ᤺ᤱᤃᤣ᤹ ᤜᤢ᤺ᤵᤔᤠᤛᤡ ᤏᤢ ᤗᤠ ᤋᤢᤰᤛᤡ ᤑᤢᤱᤏᤠᤶ ᤜᤢ᤺ᤵᤔᤠᤛᤡ ᤜᤧᤰᤁᤩᤠᤱ ᤆᤥ᤺ᤰᤛᤡᤱᤔᤠ ᤐᤠ᤺ᤵᤳᤇᤡᤱᤔᤠ ᤘᤠ᤺ᤳᤋᤡ ᤛᤠᤔᤠᤜᤠ᤹ᤖᤧ ᤆᤥ᤺ᤰᤔᤠᤛᤡᤀᤠᤱ ᤔᤧᤴᤇᤢᤔᤠᤜᤠ᤹ ᤕᤠᤖᤡᤵ ᤐᤥᤱᤔᤠᤖᤧ ᤗᤠᤃᤡ ᤏᤡ᤺ᤴᤎᤥ ᤁᤧᤒᤥᤱᤒᤠ ᤕᤧᤶᤔᤡᤴ ᤌᤡᤒᤥᤱᤅᤠᤱ ᤏᤧᤳᤇᤡ ᤗᤠ ᤘᤕᤧ॥ ᤕᤧᤶ ᤁᤧᤳᤋᤠᤱ ᤀᤣᤃᤠᤱ ᤁᤧᤖᤧᤰ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤜᤠ᤹ ᤀᤜᤠᤛᤢᤖᤛ ᤜᤠᤱᤅᤧᤀᤥ ᤐᤠ᤺ᤸᤗᤥᤒᤠ ᤐᤣ᤺ᤰᤔᤠ ᤕᤧᤶ ᤔᤧᤄᤥᤛᤢᤒᤠ ᤘᤕᤧ॥ 13 ᤌᤡᤰᤌᤡᤰ ᤗ᤹ᤖᤡᤰ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤴ ᤜᤡᤶᤔᤥᤗᤠᤶ ᤜᤠᤱᤜᤡᤶᤔᤥ ᤐᤣ᤺ᤰᤁᤡᤸᤗᤧ ᤏᤠ᤺ᤰᤋᤢᤒᤠ ᤌᤣᤛᤠᤱ ᤂᤢᤏᤧ᤹ ᤋᤣ᤹ᤔᤠ ᤔᤧᤓᤠ᤺ᤰᤋᤢᤀᤠᤱ ᤘᤕᤧ॥ 14 ᤂᤢᤏᤧ᤹ ᤕᤢ᤺ᤴᤇᤡᤰ ᤜᤠᤱᤅᤡᤸᤗᤧ ᤁᤢᤜᤡᤶᤔᤥ ᤐᤣ᤺ᤰᤔᤠ ᤁᤧᤒᤥᤱᤒᤠ ᤘᤕᤧ ᤜᤧᤰᤁᤩᤠᤱ ᤆᤰᤔᤣ᤺ᤳᤜᤠ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤜᤠᤱᤅᤡᤸᤗᤧ ᤁᤢᤛᤡᤱᤃᤠᤖᤢ ᤛᤠᤛ᤻ᤃᤈᤖᤧ ᤁᤢᤕᤢᤰᤁᤥ ᤘᤠ᤹ᤔᤠᤖᤧ ᤗᤠᤃᤡ ᤔᤧᤴᤇᤢᤔᤠ ᤕᤢᤱᤔᤠ ᤜᤡᤶᤔᤥᤒᤠ ᤘᤣ᤹ ᤗᤰᤁᤥ ᤏᤢ᤺ᤱᤔᤠ ᤐᤣ᤺ᤰᤔᤠ ᤁᤧᤒᤥᤱᤒᤠ ᤘᤕᤧ॥ ᤜᤠᤱᤅᤡᤴ ᤁᤢᤏᤡᤱᤘᤠ᤹ ᤋᤠᤀᤠᤱ ᤂᤧᤴ ᤁᤢᤔᤡᤱᤅᤥᤗᤠᤶ ᤔᤧᤴᤀᤢ᤺ᤳᤋᤣ ᤌᤠᤖᤡᤰ ᤂᤢᤏᤧ᤹ ᤕᤠᤶᤔᤥ ᤜᤠᤱᤅᤧᤀᤥ ᤐᤣ᤺ᤰᤔᤠ ᤔᤧᤱᤄᤥ᤺ᤶᤏᤠ ᤘᤕᤧ॥ 15 ᤀᤠᤸᤗ ᤔᤥᤷᤍᤁᤤ᤺ᤸᤗᤧ ᤛᤠ ᤆᤥᤃᤢᤔᤠ. ᤂᤢᤏᤧ᤹ ᤁᤢᤶᤓᤅᤠ ᤀᤒᤡᤜᤣᤗᤖᤧ ᤁᤢᤛ᤻ᤛᤠ ᤀᤧᤛ᤻ᤋᤖᤧᤴ ᤜᤠᤱᤅᤧᤀᤥ ᤐᤣ᤺ᤰᤔᤠ ᤁᤢᤕᤧᤶ ᤋᤩᤧ. ᤂᤧᤒᤩᤠᤱ ᤔᤧᤴᤇᤢᤔᤠᤜᤠ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤗᤰᤐᤧᤴᤛᤠᤒᤠ ᤜᤠᤱᤅᤡᤸᤗᤧ ᤁᤢᤛᤡᤱᤃᤠᤖᤢ ᤜᤣᤃᤣ᤺ᤸᤗᤧ ᤔᤧᤳᤋᤢᤒᤠ ᤐᤠ᤺ᤴᤜᤠ᤹ᤏᤢ᤺ᤸᤗᤧ ᤘᤣ᤹ ᤀᤧᤛ᤻ᤋᤖᤖᤧ ᤌᤣᤀᤠᤱ ᤔᤧᤏᤠ᤺ᤰᤋᤢᤴ॥ ᤀᤧᤛ᤻ᤋᤖᤧᤴ ᤁᤧᤏᤡᤒᤠ ᤁᤧᤖᤧᤰᤗᤧ ᤂᤢᤏᤧ᤹ ᤂᤢᤴᤇᤡ᤹ ᤛᤡᤖᤠ᤹ᤌᤠᤅᤧ॥ 16 ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤢᤛᤡᤃᤣᤰᤐᤠ ᤋᤱᤒᤣ ᤌᤡᤒᤥᤱᤃᤣᤰᤐᤠ ᤗᤠ. ᤀᤡᤃᤪ ᤋᤣᤒᤣᤋ ᤗᤠᤀᤥ ᤀᤧᤛ᤻ᤋᤖᤧᤴ ᤜᤠᤱᤜᤡᤶᤔᤥ ᤀᤜᤠᤛᤢᤖᤛ ᤜᤠᤱᤅᤧ᤹ᤀᤥ ᤔᤧᤍᤣ᤹ᤖᤢᤀᤠᤱ ᤔᤧᤒᤣ॥ 17 ᤜᤠᤱᤅᤡᤸᤗᤧ ᤘᤣ᤹ ᤁᤧᤖᤧᤰ ᤔᤧᤴᤇᤢᤔᤠᤜᤠ᤹ᤏᤢ᤺ᤸᤗᤧ ᤀᤧᤛ᤻ᤋᤖᤧᤴ ᤏᤠᤏᤢ᤹ᤖᤢ॥ ᤜᤧᤰᤁᤩᤠᤱ ᤘᤣ᤹ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤜᤠ᤹ᤏᤢ᤺ᤸᤗᤧ ᤂᤢᤏᤧ᤹ ᤜᤠᤱᤅᤥᤗᤠᤶ ᤗᤢᤱᤔᤠ᤹ ᤋᤢᤰᤔᤠ ᤏᤢ ᤗᤢᤱᤃᤢᤶ ᤂᤥᤛᤢ॥ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤎᤧᤃᤣ᤺ᤰᤁᤥ ᤜᤠᤱᤔᤠ ᤋᤡᤆ ᤂᤢ᤺ᤰᤋᤢ. ᤜᤧᤰᤁᤩᤠᤱ ᤘᤛ᤻ᤋᤡ᤺ᤸᤗᤧ ᤁᤢᤗᤧᤰᤘᤠᤀᤥ ᤂᤢᤏᤧ᤹ ᤁᤢᤗᤠᤃᤡ ᤜᤠᤱᤔᤠ ᤆᤥᤃᤢ॥ 18 ᤂᤧᤴ ᤀᤣᤃᤠᤱ ᤜᤠᤱᤅᤡᤸᤗᤧ ᤁᤧᤖᤧᤰ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤁᤢᤕᤢᤰᤛᤠᤒᤠᤜᤠ᤹ ᤀᤧᤛ᤻ᤋᤖᤖᤧ ᤁᤢᤔᤡᤱᤛᤥᤀᤥ ᤗᤳᤇᤠ ᤕᤶᤒᤠ ᤛᤠᤓ᤺ᤱᤈᤠ ᤆᤠ᤺ᤳᤋᤢᤛᤡ॥ ᤂᤢᤏᤧ᤹ ᤋᤧᤱᤃᤵ ᤋᤧᤱᤃᤵᤜᤠ᤹ᤀᤥ ᤏᤠ᤺ᤶᤛᤡᤱᤔᤠ ᤕᤧᤴ ᤀᤢᤘᤠ ᤆᤥᤃᤢᤀᤠᤱ ᤜᤠᤱᤅᤡᤸᤗᤧ ᤐᤡᤔᤠᤛᤡ ᤁᤧᤒᤥᤱᤒᤠ ᤜᤠᤱᤛᤧᤶ ᤔᤡᤰᤋᤥ᤺ᤰᤜᤠ᤹ ᤐᤡᤖᤢᤛᤡ॥ 19 ᤏᤡᤛᤡᤃᤣᤰᤐᤠᤗᤧᤱ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤜᤠ᤹ ᤔᤧᤓᤢᤰᤂᤢᤛᤡᤸᤗᤧ ᤔᤥᤷᤍᤁᤤᤴ ᤜᤠᤱᤅᤡᤸᤗᤧ ᤁᤢᤜᤡᤶᤔᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤕᤧᤒᤧ॥ 20 ᤔᤥᤷᤍᤁᤤ᤺ᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤀᤧᤛ᤻ᤋᤖᤖᤧ ᤁᤢᤜᤡᤶᤛᤕᤱ ᤏᤢ ᤁᤢᤛᤢᤘᤠᤱᤒᤠ ᤐᤠ᤺ᤴᤏᤡᤴ ᤔᤠ᤹ᤖᤢᤀᤠᤱ ᤘᤕᤧ॥ ᤔᤥᤷᤍᤁᤤᤀᤥ ᤘᤕᤧᤸᤗᤧ ᤂᤧᤸᤗᤧ ᤀᤡᤱᤈᤠᤱ ᤐᤡᤖᤢᤒᤠ ᤜᤧᤰᤁᤣᤀᤣ ᤀᤧᤛ᤻ᤋᤖᤖᤧ ᤆᤥᤃᤢᤖᤥ॥ ᤔᤥᤷᤍᤁᤤ᤺ᤸᤗᤧ ᤜᤠᤱᤅᤡᤴ ᤛᤧ᤺ᤵᤋᤢ 21 ᤌᤡᤰᤕᤠᤴ ᤔᤥᤷᤍᤁᤤᤴ ᤜᤠᤱᤜᤡᤶᤔᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤘᤕᤧᤒᤠ ᤕᤧᤶᤔᤥ ᤜᤠᤱᤅᤡᤸᤗᤧ ᤁᤢᤗᤠᤶᤎᤣ᤺ᤳᤋᤥ ᤁᤧᤗᤧᤰᤛᤡᤱᤒᤠᤖ ᤁᤧᤕᤧᤵᤐᤠ ᤛᤢᤜᤠᤱᤕᤢᤰᤐᤠ ᤏᤧᤳᤇᤡ. ᤒᤡᤃ᤻ᤏᤠᤌᤠ ᤏᤢ ᤋᤣᤖᤣᤛᤧᤴ ᤂᤢᤴᤇᤡ᤹ ᤕᤠ᤺ᤰᤗᤧ᤹ᤖᤧᤀᤠᤱ ᤀᤜᤠᤛᤢᤖᤛ ᤜᤠᤱᤅᤡᤴ ᤛᤧᤵᤔᤠ ᤆᤧᤶᤓᤴ ᤆᤥᤃᤧᤛᤢ॥ 22 ᤁᤴ ᤐᤠ᤺ᤴᤏᤡᤴ ᤔᤥᤷᤍᤁᤤ᤺ᤸᤗᤧ ᤏᤡᤱᤘᤠ᤹ ᤂᤥᤛᤢᤀᤠᤱ ᤜᤠᤱᤔᤠ ᤀᤧᤛ᤻ᤋᤖᤧᤴ ᤆᤧᤰᤋᤢ॥ ᤀᤧᤛ᤻ᤋᤖᤖᤧ ᤔᤥᤷᤍᤁᤤ᤺ᤸᤗᤧ ᤁᤢᤔᤡᤱᤅᤡᤴ ᤐᤠ᤺ᤳᤋᤢᤀᤠᤱ ᤂᤧᤴ ᤐᤠ᤺ᤴᤏᤡᤴ ᤜᤠᤱᤅᤡᤴ ᤆᤧᤰᤋᤢ॥ 23 ᤁᤴ ᤐᤠ᤺ᤴᤏᤡᤴ ᤛᤠ᤹ᤔᤠ ᤏᤢ ᤁᤢᤛᤡᤱ ᤏᤡ᤺ᤵᤔᤠ ᤕᤠ᤺ᤶᤒᤰ ᤐᤥ᤺ᤰᤂᤧᤀᤠᤱ ᤛᤧᤰᤂᤠ ᤐᤥ᤺ᤰᤂᤧᤒᤠ ᤏᤡ᤺ᤴᤎᤥ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤂᤧᤴ ᤏᤧᤵᤑᤢ ᤔᤏᤠᤜᤠ᤹ ᤛᤡᤱᤅᤥ ᤔᤧᤓᤥᤴᤍᤢ ᤔᤧᤛᤧᤖᤢᤛᤡᤖ ᤕᤠ᤺ᤴᤍᤢᤛᤡ॥ ᤁᤴ ᤐᤠ᤺ᤴᤜᤠ᤹ ᤜᤠᤱᤅᤡᤸᤗᤧ ᤁᤢᤍᤃᤡ ᤛᤠᤵᤔᤢ᤺ᤴᤎᤢᤶᤔᤥ ᤔᤧᤛᤠᤵᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.