ᤀᤧᤛ᤻ᤋᤖ 1 - LIFOTNTᤜᤠᤱᤔᤠ ᤘᤛ᤻ᤋᤡᤴ ᤁᤢᤕᤢᤰᤏᤠᤗᤠᤶᤒᤠ ᤗᤴ 1 ᤁ᤹ᤕᤥ ᤐᤥᤎᤰ ᤐᤥ᤺ᤰᤂᤧᤀᤠᤱ ᤁᤧᤒᤵᤐᤠ ᤐᤠ᤺ᤴᤜᤠ᤹ ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᤁᤢᤕᤧᤶᤔᤥ ᤐᤥ᤺ᤰᤂᤧᤀᤠᤱ ᤘᤕᤧ॥ ᤓᤠᤖᤋ ᤗᤠᤈᤣ᤹ᤗᤠᤶᤔᤠᤱ ᤁᤳᤏᤠ ᤁᤢᤛ ᤗᤠᤈᤣ᤹ ᤌᤠᤖᤡᤰ ᥇᥈᥍ ᤋᤧᤱᤃᤵᤜᤠ᤹ᤀᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠ ᤜᤠᤒᤠ ᤂᤧᤴ ᤀᤜᤠᤛᤢᤖᤛᤧᤴ ᤘᤕᤧ॥ 2 ᤂᤧᤴ ᤕᤧᤶᤔᤥ ᤂᤢᤏᤧ᤹ ᤁᤢᤜᤠᤱᤐᤠᤱ ᤛᤢᤛᤴᤏᤥ ᤁᤧᤕᤢᤱᤒᤠ ᤁᤢᤜᤠᤱᤕᤢᤰᤏᤠᤀᤥᤗᤠᤶ ᤕᤢᤰ ᤆᤥᤃᤢᤀᤠᤱ ᤘᤕᤧ॥ 3 ᤂᤢᤏᤧ᤹ ᤜᤠᤱᤕᤢᤰ ᤆᤥᤃᤢᤒᤠ ᤛᤢᤶᤛᤡᤃᤣᤰᤐᤠ ᤋᤱᤒᤣᤀᤥ ᤂᤢᤏᤧ᤹ ᤁᤧᤖᤧᤰ ᤁᤢᤍᤢᤶᤔᤩᤠᤱᤜᤠ᤹ ᤏᤢ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤗᤳᤇᤠ ᤕᤶᤒᤠ ᤛᤠᤓ᤺ᤱᤈᤠ ᤆᤠ᤺ᤳᤋᤢᤛᤡ॥ ᤑᤠᤖᤛᤡ ᤏᤢ ᤔᤠᤍᤡ ᤗᤠᤈᤣ᤹ᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹. ᤔᤡᤱᤛᤥᤍᤠᤱᤒᤠᤜᤠ᤹ ᤜᤧᤰᤁᤩᤠᤱ ᤋᤧᤱᤃᤵ ᤋᤧᤱᤃᤵᤐᤥᤒᤠ ᤋᤢᤶᤔᤩᤠᤱᤜᤠᤱᤜᤠ᤹ ᤂᤢᤏᤧ᤹ ᤁᤢᤍᤃᤡ ᤔᤧᤈᤢᤵᤛᤧᤀᤠᤱ ᤔᤧᤘᤕᤧ॥ 4 ᤂᤢᤏᤧ᤹ ᥇᥎᥆ ᤕᤧᤴ ᤌᤠᤖᤡᤰ ᤂᤢᤏᤧ᤹ ᤁᤢᤜᤠᤱᤈᤢᤶᤔᤥᤒᤠ ᤁᤢᤕᤶᤔᤠ ᤁᤢᤃᤣ᤺ᤶᤔᤥᤒᤠ ᤕᤠᤱᤛᤠᤁᤢᤴᤎᤣ ᤀᤥᤛᤣ᤺ᤴᤎᤠᤱ ᤆᤥᤃᤢ ᤜᤧᤰᤁᤩᤠᤱ ᤁᤧᤖᤧᤰ ᤁᤢᤜᤠᤱᤘᤠ ᤁᤢᤔᤠᤱᤘᤠ ᤏᤢ ᤁᤢᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤎᤠᤱ ᤆᤥᤃᤢ॥ 5 ᤂᤧᤴ ᤕᤧᤴᤜᤠ᤹ ᤔᤠᤖᤧᤀᤠᤱ ᤀᤣᤃᤠᤱ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤜᤠᤱᤐᤠᤱ ᤛᤢᤛᤏᤒᤠ ᤕᤶᤒᤠ ᤏᤢ ᤆᤢᤰᤐᤠ ᤁᤧᤖᤧᤰ ᤔᤏᤠᤜᤠ᤹ ᤛᤠᤓ᤺ᤱᤈᤠ ᤆᤠ᤺ᤳᤋᤢᤛᤡ॥ ᤂᤧᤴ ᤛᤠᤓ᤺ᤱᤈᤠᤴ ᤜᤠᤱᤅᤡᤸᤗᤧ ᤁᤢᤜᤠᤱᤜᤡᤶᤔᤥᤒᤠ ᤑᤢᤱᤀᤡᤰᤁᤥ ᤏᤢᤛᤡ ᤕᤧᤴ ᤌᤠᤖᤡᤰ ᤔᤢᤰᤋᤧᤀᤠᤱ ᤏᤧᤛ᤻ᤛᤧ॥ 6 ᤂᤧᤴ ᤑᤢᤱᤀᤡᤰᤁᤥ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤁᤢᤓᤖᤠ ᤏᤢ ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤑᤥ᤺ᤴᤍᤠᤜᤠ᤹ ᤔᤧᤓᤥ᤺ᤴᤍᤢᤀᤠᤱ ᤔᤧᤄᤣ᤺ᤰᤂᤢᤀᤠᤱ ᤐᤳᤇᤧ. ᤂᤧᤱᤜᤠ᤹ ᤑᤍᤠᤱᤒᤠ ᤏᤢ ᤐᤖᤠᤴᤗᤠ ᤆᤠ᤺ᤶᤒᤠ ᤀᤡᤍᤠ᤺ᤰᤜᤠ᤹ᤖᤧ ᤘᤖᤧᤱᤗᤧᤱᤒᤠ ᤗᤢᤱ ᤛᤡᤳᤗᤠᤱᤜᤠ᤹ᤀᤥ ᤁᤧᤒᤵᤐᤠ ᤕᤢᤵᤐᤠ ᤐᤠ᤺ᤱᤃᤡᤜᤠ᤹ᤏᤢ ᤀᤡᤔᤧᤄᤣ᤺ᤰᤂᤢᤀᤠᤱ ᤐᤳᤇᤧ॥ ᤂᤧᤵᤔᤥ ᤁᤢᤓᤢᤱ ᤗᤰᤔᤏᤠᤒᤠ ᤁᤢᤜᤧ᤺ᤳᤗᤠ. ᤁᤢᤓᤖᤠ. ᤔᤠᤰᤋᤠᤱᤒᤠ ᤗᤢᤱ ᤏᤢ ᤘᤣ᤹ ᤁᤢᤔᤧᤴ ᤁᤧᤄᤡ᤺ᤰᤐᤠ ᤗᤢᤱᤜᤠ᤹ᤖᤧ ᤔᤧᤗᤥ᤺ᤳᤋᤢᤒᤠ ᤂᤠᤶᤒᤠᤱ ᤛᤶᤎᤠᤱ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤕᤢᤰᤏᤠᤍᤧᤴᤜᤠ᤹ ᤔᤧᤕᤢᤰᤂᤢᤀᤠᤱ ᤕᤢᤅᤧ॥ 7 ᤌᤡᤰ ᤏᤢ ᤘᤣ᤹ ᤔᤧᤴᤍᤱᤔᤏᤠᤒᤠ ᤀᤣ᤺ᤰᤛᤔᤠ ᤐᤖᤡᤰᤐᤠ ᤛᤠᤶᤔᤩᤠᤱ ᤆᤸᤗᤠᤱᤏᤠ ᤂᤥᤷᤕᤠᤜᤠ᤹ᤀᤥ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤔᤧᤜᤠ᤺ᤳᤋᤢᤛᤡ॥ ᤜᤠᤱᤅᤡᤸᤗᤧ ᤐᤡᤖᤢᤛᤡᤒᤠ ᤆᤧᤸᤗᤧᤰᤛᤣ᤹ ᤛᤣᤈᤱᤘᤠᤴ ᤜᤠᤱᤅᤡᤸᤗᤧ ᤁᤢᤏᤢ᤹ᤔᤠ ᤁᤢᤍᤠᤔᤠᤀᤥᤗᤠᤶ ᤘᤧᤳᤋᤧᤛᤖᤧ ᤘᤕᤧ॥ 8 ᤂᤧᤵᤔᤥ ᤜᤠ᤺ᤳᤋᤠᤱ ᤁᤢᤛᤡᤖᤠ᤹ ᤔᤧᤴᤎᤠᤱᤅᤣ ᤌᤢᤱᤒᤠᤱᤔᤠ ᤌᤡᤶ ᤜᤥ᤺ᤵᤋᤧ॥ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤖᤠ᤹ᤌᤠᤱᤔᤠ ᤏᤢ ᤔᤧᤴᤎᤠᤱᤔᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤵᤔᤠ ᤐᤥᤱ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤌᤢᤱᤎᤢᤱ ᤐᤡᤔᤠᤛᤡ ᤐᤥᤱ ᤑᤠ᤹ᤀᤠᤱ ᤜᤠᤱᤅᤡᤸᤗᤧ ᤛᤣᤈ᤺ᤱᤘᤠ ᤁᤧᤜᤠᤒᤠ ᤁᤧᤖᤧᤰ ᤛᤧᤘᤠᤖᤥᤒᤠᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡᤀᤠᤱ ᤘᤕᤧ॥ 9 ᤜᤠᤒᤠ ᤂᤧᤴ ᤕᤧᤶᤔᤥ ᤜᤠᤱᤔᤠ ᤘᤛ᤻ᤋᤡ᤺ᤸᤗᤧᤀᤠᤱ ᤀᤜᤠᤛᤢᤖᤛ ᤜᤠᤱᤅᤡᤸᤗᤧᤀᤣ ᤁᤢᤜᤠᤱᤜᤡᤶᤔᤥ ᤔᤧᤴᤇᤢᤔᤠᤜᤠ᤹ ᤗᤳᤇᤠ ᤕᤶᤒᤠ ᤛᤠᤓ᤺ᤱᤈᤠ ᤐᤡᤖᤢᤛᤡ॥ 10 ᤏᤢᤛᤡᤃᤣᤰᤐᤠ ᤕᤧᤴᤏᤥ ᤀᤠᤸᤗ ᤜᤠᤱᤅᤡᤸᤗᤧ ᤆᤧᤸᤗᤧᤰᤛᤣ᤹ ᤛᤣᤈᤱᤘᤠᤴ ᤌᤢᤅᤢᤀᤠᤱ ᤁᤢᤈᤠ᤺ᤳᤆᤠ᤺ᤵᤐᤠ ᤗ᤺ᤴᤍᤧᤀᤠᤱ ᤕᤠᤃᤧ. ᤂᤧᤒᤩᤠᤱ ᤂᤢᤏᤧ᤹ ᤁᤢᤜᤡᤶᤔᤥ ᤋᤱᤔᤠ ᤜᤡᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤏᤢᤛᤡ ᤛᤡᤱᤃᤠᤖᤢ ᤛᤧᤘᤠᤖᤥᤒᤠᤜᤠ᤹. ᤔᤜᤢᤔᤠᤏ. ᤒᤡᤈ᤻ᤌᤠ. ᤜᤷᤒᤥᤏᤠ. ᤒᤡᤃ᤻ᤋᤠ. ᤀᤒᤃᤌᤠ. ᤈᤣᤌᤣᤖ ᤏᤢ ᤁᤷᤁᤠᤛᤧᤴ. 11 ᤔᤏᤠᤜᤠ᤹ ᤏᤢ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤘᤛ᤻ᤋᤡ ᤜᤠᤱᤔᤧᤸᤗᤧ ᤁᤢᤄᤧᤶᤛᤡᤱᤔᤠᤴ ᤀᤥᤛᤣ᤺ᤴᤎᤠᤱ ᤆᤥ᤺ᤰᤔᤠᤖᤧ ᤗᤠᤃᤡ ᤜᤠᤱ ᤋᤡᤆ᤺ᤴ ᤂᤢ᤺ᤰᤋᤧᤶᤔᤧ᤹ᤀᤠᤱ ᤋᤠᤖᤧᤶᤔᤧ᤹ ᤑᤠ᤹ᤀᤠᤱ ᤔᤢᤖᤠ ᤔᤧᤳᤋᤢᤛᤡ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤏᤢᤔᤠ ᤆᤥᤃᤧ॥ 12 ᤁᤖ ᤂᤧᤴ ᤛᤡᤱᤃᤠᤖᤢᤜᤠ᤹ᤗᤠᤶ ᤔᤧᤔᤧᤳᤋᤢᤒᤠ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤂᤧᤶᤔᤠᤀᤠᤱ ᤋᤠᤔᤠ ᤜᤠᤱᤔᤠ ᤘᤛ᤻ᤋᤡᤴ ᤔᤧᤍᤧᤴᤍᤧᤴ॥ ᤁᤸᤗᤧᤆᤥᤃᤢᤸᤗᤧ ᤜᤠᤱᤅᤡᤴ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧᤀᤠᤱ ᤁᤢᤛᤠᤰᤁᤧᤴᤏᤡᤸᤗᤧ ᤔᤡ ᤐᤥ᤺ᤰᤂᤧ॥ 13 ᤜᤠᤱᤅᤡᤸᤗᤧ ᤀᤰᤋᤱᤒᤠ ᤕᤧᤵᤗᤧᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤜᤠᤱ ᤛᤠᤰᤌᤡᤶ ᤁᤢᤀᤡᤛᤡᤰ ᤁᤢᤓᤠᤱ ᤏᤢ ᤂᤠᤛᤧᤴ ᤁᤧᤗᤧᤒᤠ ᤁᤧᤏᤡᤒᤠ ᤜᤧᤰᤁᤩᤠᤱ ᤛᤡᤰᤁᤢᤶᤏᤡᤒᤠ ᤛᤢᤈᤠᤛᤠᤒᤠᤜᤠ᤹ ᤛᤢᤈᤠ ᤏᤠ᤺ᤰᤋᤢᤛᤡ॥ ᤀᤠᤸᤗ ᤀᤠᤰᤂᤣ ᤆᤥ᤺ᤰᤔᤠ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤔᤧᤗᤧᤛᤢᤀᤠᤱ ᤘᤕᤧ॥ 14 ᤂᤧᤱᤜᤠ᤹ ᤀᤠᤸᤗᤥᤒᤠ ᤕᤠᤰᤏᤠᤶ ᤘᤕᤠᤶ ᤁᤢᤛᤡᤱ ᤁᤧᤏᤡ᤺ᤵᤐᤠ ᤑᤠᤖᤛ ᤏᤢ ᤔᤠᤍᤡᤒᤠ ᤏᤢᤛᤡ ᤛᤢᤜᤠᤱᤕᤢᤰᤐᤠ ᤁᤷᤛᤣᤏᤠ. ᤛᤣᤌᤠᤖ. ᤀᤍ᤻ᤔᤠᤌᤠ. ᤋᤷᤛᤡᤛ. ᤔᤣᤖᤣᤛ. ᤔᤷᤛᤣᤏᤠ ᤏᤢ ᤔᤔᤢᤁᤠᤏ ᤔᤧᤘᤕᤧ॥ ᤂᤧᤱᤜᤠ᤹ ᤜᤠᤱᤅᤡᤸᤗᤧ ᤁᤢᤏᤡ᤺ᤳᤋᤠᤱᤒᤠ ᤔᤧᤘᤕᤧ॥ ᤂᤧᤱᤜᤠ᤹ ᤜᤠᤱᤅᤡᤸᤗᤧ ᤁᤢᤍᤃᤡ ᤗᤠ᤺ᤵᤔᤠ ᤋᤠᤔᤠ ᤕᤢᤰ ᤁᤧᤃᤵᤐᤠ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤜᤠᤱᤈᤢᤶᤔᤥ ᤌᤥᤎᤥᤰᤐᤠ ᤕᤢᤰᤏᤠ ᤔᤧᤄᤥᤛᤢᤀᤠᤱ ᤘᤕᤧ॥ 15 ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤡᤱᤃᤠᤖᤢᤜᤠ᤹ᤗᤠᤶ ᤐᤡᤔᤏᤠᤒᤠ ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤂᤧᤶᤔᤠ ᤔᤧᤍᤧᤴᤍᤧᤶᤒᤠᤸᤗᤧ ᤆᤥᤃᤢᤸᤗᤧ ᤜᤠᤱᤔᤠ ᤘᤛ᤻ᤋᤡᤴ ᤀᤠᤰᤂᤣ ᤔᤧᤵᤔᤠ ᤐᤥᤱᤒᤣ᥅ ᤁᤢᤓᤠᤱᤅᤡᤸᤗᤧ ᤌᤧᤔᤠ ᤐᤠ᤺ᤳᤋᤢᤒᤣ᥅” 16 ᤂᤧᤒᤩᤠᤱ ᤔᤔᤢᤁᤠᤏᤧᤸᤗᤧ ᤜᤠᤱᤅᤡᤴ ᤏᤢ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤁᤴ ᤏᤢᤃᤵᤐᤡᤴ ᤐᤡᤖᤢᤛᤡ. “ᤜᤠᤱᤔᤠ ᤘᤛ᤻ᤋᤡ᤺ᤸᤗᤧ ᤜᤠᤱᤅᤡᤴᤗᤰ ᤔᤣ᤺ᤴᤍᤢᤰ ᤁᤖ ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᤁᤧᤖᤧᤰ ᤁᤢᤍᤧ᤺ᤱᤃᤵᤐᤥᤒᤠ ᤁᤠᤰ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤔᤏᤠᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤛᤡ॥ 17 ᤜᤠᤱᤔᤧᤸᤗᤧ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤴ ᤁᤧᤖᤧᤰ ᤔᤧᤴᤇᤢᤔᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹. ᤜᤧᤰᤁᤩᤠᤱ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤒᤠᤜᤠ᤹ ᤏᤠᤔᤧᤴᤇᤠ᤹ᤖᤢᤛᤡᤴ॥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. ‘ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᤜᤠᤱᤔᤠ ᤘᤛ᤻ᤋᤡᤴ ᤁᤢᤒᤣᤛᤠᤱ ᤋᤠ᤺ᤵᤔᤠ ᤀᤡᤱᤈᤠᤱ ᤐᤡᤖᤢᤛᤡᤀᤠᤱ ᤘᤕᤧ. ᤁᤖ ᤂᤢᤏᤧ᤹ ᤔᤧᤍᤩᤧᤏᤧᤴ॥’ 18 ᤜᤠᤱᤔᤠᤸᤗᤧ ᤁᤢᤛᤢᤳᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤧᤄᤧᤶᤔᤠ ᤑᤠᤖᤛ ᤏᤢ ᤔᤠᤍᤡᤒᤠ ᤕᤶᤒᤠ ᤜᤡᤶᤛᤕᤱᤜᤠ᤹ᤀᤥᤒᤠ ᤔᤧᤴᤇᤢᤔᤠᤜᤠ᤹ᤖᤧ ᤜᤠᤱᤅᤡᤸᤗᤧ ᤁᤧᤖᤧᤰ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤀᤠᤀᤡᤴᤒᤠ ᤕᤧᤴᤏᤥ ᤁᤴ ᤐᤠ᤺ᤴᤏᤡᤴ ᤔᤧᤔᤧᤳᤋᤢᤛᤡ᤹. ᤜᤧᤰᤁᤩᤠᤱ ᤁᤸᤗᤧᤆᤥᤃᤢᤸᤗᤧ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤏᤢ ᤛᤡᤰᤐᤥ᤺ᤰᤔᤧᤴ ᤐᤥᤖᤥ॥ 19 “ᤜᤠᤱᤅᤡᤸᤗᤧ ᤏᤢᤒᤠ ᤁᤧᤀᤡ᤺ᤳᤋᤢᤏᤧᤓᤃᤪ. ‘ᤘᤛ᤻ᤋᤡᤴ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤀᤜᤠᤛᤢᤖᤛ ᤜᤠᤱᤅᤡᤸᤗᤧ ᤁᤢᤍᤃᤡ ᤀᤥ᤺ᤴᤎᤠᤰᤛᤡᤱᤔᤠ ᤔᤧᤄᤥᤏᤧᤴᤗ’ ᤑᤠ᤹ᤀᤠᤱ ᤀᤠᤍᤠᤱᤒᤠᤖᤧ ᤗᤳᤇᤠ ᤜᤠᤱᤀᤡᤱᤈᤠᤱ ᤗ᤺ᤳᤋᤧ᤹ ᤜᤧᤰᤁᤩᤠᤱ ᤂᤧᤴ ᤑᤠᤖᤛᤡ ᤏᤢ ᤔᤠᤍᤡᤜᤠ᤹ᤖᤧ ᤂᤢᤴᤇᤡ᤹ ᤁᤢᤓᤠᤱᤌᤡᤶᤔᤥ ᤀᤠᤓᤧᤸᤗᤧᤀᤠᤱ ᤔᤧᤸᤗᤧᤱᤔᤏᤠ ᤐᤥᤱᤗ ᤛᤠᤵᤋᤧ᤹॥ ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤘᤛ᤻ᤋᤡ᤺ᤸᤗᤧ ᤁᤢᤗᤧᤰᤘᤠᤀᤥ ᤂᤢᤏᤧ᤹ᤏᤢ᤺ᤸᤗᤧ ᤀᤠᤸᤗᤛᤠᤱ ᤛᤢᤶᤒᤥᤎᤠᤛᤠᤔᤠ ᤔᤧᤴᤇᤢᤔᤠᤴ ᤜᤠᤱᤔᤧᤸᤗᤧ ᤁᤢᤕᤢᤰᤏᤠᤴ ᤐᤡᤖᤢᤖ॥ 20 ᤁᤶᤓᤗ᤹ᤖᤡᤰ ᤀᤠᤸᤗ ᤁᤴ ᤜᤠᤱ ᤀᤡᤱᤈᤠᤱᤅᤡᤴ ᤜᤠᤱᤈᤢᤶᤔᤥᤒᤠ ᤁᤧᤖᤧᤰ ᤐᤡᤛᤠᤱ ᤔᤧᤄᤧᤵᤛᤢ᤹. ᤂᤧᤒᤩᤠᤱ ᤕᤶᤒᤠ ᤏᤢ ᤆᤢᤰᤐᤠ ᤁᤧᤖᤧᤰ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤒᤠᤜᤠ᤹ ᤀᤡᤱᤎᤠᤱ ᤔᤧᤒᤡᤖᤢᤛᤡ᤹॥” 21 ᤔᤔᤢᤁᤠᤏᤖᤧ ᤁᤢᤛᤢᤈᤠᤴ ᤛᤢᤜᤠᤱᤕᤢᤰᤐᤠ ᤁᤧᤖᤧᤰᤗᤧ ᤏᤢᤒᤠ ᤔᤧᤗᤣ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤋᤥ᤺ᤴᤍᤢᤒᤠ ᤛᤢᤈᤠᤴ ᤜᤠᤱᤅᤡᤴ ᤆᤥ᤺ᤰᤔᤠ ᤋᤧᤴᤍᤧ॥ 22 ᤂᤧᤒᤩᤠᤱ ᤁᤧᤖᤧᤰ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤜᤡᤶᤛᤕᤱᤅᤥ ᤕᤢᤰ ᤔᤧᤈᤥᤃᤢᤖ ᤑᤠ᤹ᤀᤠᤱ ᤜᤠᤱᤈᤢᤶᤔᤥᤒᤠ ᤁᤠᤰ ᤐᤡᤛᤠᤱᤒᤠ ᤋᤧᤱᤃᤵ ᤌᤰᤔᤠ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤛᤰᤛᤰ ᤁᤢᤀᤡᤛᤡᤰ ᤏᤢ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤐᤠ᤺ᤴᤍᤠᤱᤅᤥ ᤛᤰᤀᤡᤱᤄᤱ ᤛᤠᤵᤐᤣ᤺ᤳᤋᤠᤜᤠ᤹ ᤔᤧᤜᤠᤰᤋᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.