ᤂᤠᤜᤢᤴᤛᤠᤒᤠ 7 - LIFOTNTᤛᤡᤰᤁᤢᤶᤍᤡᤱ ᤏᤡᤱᤘᤠ᤹ 1 ᤏᤢᤒᤠ ᤔᤡᤱᤅᤡᤱᤃ ᤁᤢᤏᤠᤶᤃᤧᤏᤢ᤹ᤒᤠ ᤑᤢᤱᤏᤠᤶᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤏᤢᤒᤠᤖᤥ॥ ᤛᤡᤔᤠ ᤕᤧᤴᤏᤡᤴ ᤛᤠᤘᤠ᤺ᤴᤇᤡᤱᤔᤏᤠᤒᤠ ᤕᤧᤴᤏᤡᤴᤏᤢ᤺ᤸᤗᤧᤀᤠᤱ ᤆᤠ᤹ᤖᤡᤰ ᤐᤏᤢᤏᤢᤒᤠᤖᤥ॥ 2 ᤛᤠᤓ᤺ᤱᤈᤠ ᤁᤧᤛᤧᤒᤠ ᤜᤡᤶᤔᤥ ᤐᤣ᤺ᤰᤔᤠᤏᤢ᤺ᤸᤗᤧ ᤔᤧᤖᤡᤱ ᤁᤧᤎᤰᤐᤠ ᤜᤡᤶᤔᤥ ᤐᤣ᤺ᤰᤔᤠ ᤏᤢᤒᤠᤖᤥ ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤁᤧᤖᤧᤰ ᤛᤡᤔᤧᤸᤗᤧ ᤀᤠᤜᤠᤱᤗ ᤀᤠᤘᤠ᤹ᤖᤥ ᤁᤴ ᤐᤠ᤺ᤴᤏᤡᤴ ᤁᤧᤜᤡᤱᤒᤠᤜᤠ᤹ᤖᤧ ᤏᤡᤱᤘᤠ᤹ᤀᤥ ᤁᤵᤔᤠ ᤐᤥᤱᤗᤥ॥ 3 ᤀᤣ᤺ᤵᤔᤠᤏᤢ᤺ᤸᤗᤧ ᤏᤡᤱᤘᤠ ᤋᤢᤰᤂᤣ ᤆᤠᤔᤠ ᤏᤢᤒᤠᤖᤥ— ᤂᤧᤸᤗᤧ ᤏᤠᤖᤠᤱᤃ ᤔᤠᤰᤗ᤹ᤒᤡᤗᤠ ᤁᤖ ᤂᤠᤛᤡᤱᤃᤧᤏᤡ᤺ᤵᤐᤠ ᤀᤠᤈᤥ᤺ᤰᤗᤥ॥ 4 ᤀᤠᤓᤧᤸᤗᤧᤛᤠᤱ ᤏᤡᤱᤘᤠ᤹ ᤋᤠᤔᤠ ᤐᤠ᤺ᤴᤗᤰ ᤁᤧᤀᤡ᤺ᤵᤐᤠ ᤔᤏᤠᤴ ᤀᤍᤱᤗᤥ॥ ᤛᤡᤰᤁᤢᤶᤏᤡᤒᤠ ᤔᤏᤠ᤺ᤸᤗᤧ ᤛᤡᤔᤧᤴᤗᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ ᤀᤡ᤺ᤳᤋᤢᤖᤥ॥ 5 ᤀᤍᤱ ᤔᤏᤠᤜᤠ᤹ᤖᤧ ᤛᤠᤶᤔᤧᤔᤧᤳᤋᤢᤒᤠ ᤛᤠᤶᤗᤥᤴ ᤆᤶᤔᤠᤏᤢ᤺ᤸᤗᤧ ᤛᤡᤰᤁᤢᤶᤏᤡᤒᤠ ᤔᤏᤠ᤺ᤸᤗᤧ ᤀᤠᤓᤧ᤺ᤰᤐᤠᤴ ᤂᤧᤶᤔᤠ ᤏᤢᤒᤠᤖᤥ॥ 6 ᤀᤍᤱᤅᤡᤸᤗᤧ ᤁᤢᤀᤣ᤺ᤵᤔᤠᤴ ᤔᤡᤀᤥ ᤋᤡᤱᤅᤡᤴ ᤑᤧᤰᤐᤠ ᤜᤧᤰᤁᤣᤖᤥ. ᤂᤧᤸᤗᤧ ᤌᤣᤀᤠᤱ ᤁᤢᤒᤣ ᤜᤥᤵᤗᤥ॥ 7 ᤁᤢᤳᤆᤠ᤹ᤀᤣ ᤛᤠᤰᤁᤧᤸᤗᤧᤰ ᤐᤠ᤺ᤴᤏᤧᤸᤗᤧ ᤛᤡᤰᤁᤢᤶᤏᤡᤒᤠ ᤔᤏᤠᤴ ᤁᤧᤏᤠᤱᤒᤠ ᤆᤥᤃᤢᤖᤥ. ᤜᤧᤰᤁᤩᤠᤱ ᤛᤢᤖᤢᤳ ᤕᤠᤱᤅᤧᤸᤗᤧ ᤛᤡᤰᤗᤢᤱᤔᤧᤴ ᤑᤧᤳᤗᤠ᤺ᤴᤍᤢᤖᤥ॥ 8 ᤁᤢᤜᤣ᤺ᤰᤛᤡᤱᤔᤠᤏᤢ᤺ᤸᤗᤧ ᤁᤢᤏᤢᤵᤔᤠ ᤐᤠ᤺ᤴᤏᤧᤴ ᤏᤢᤒᤠᤖᤥ॥ ᤀᤠᤱᤍᤡᤱ ᤗ᤹ᤔᤠᤏᤢ᤺ᤸᤗᤧ ᤏᤠᤛᤡᤌ᤺ᤵᤔᤧᤴ ᤏᤢᤒᤠᤖᤥ॥ 9 ᤂᤡᤶᤔᤥ ᤁᤧᤛᤠᤰᤁᤧᤴᤏᤡᤴ ᤀᤥᤛᤣ᤺ᤴᤎᤠᤱ ᤔᤧᤈᤥᤃᤧᤴᤏᤧ᤹ᤀᤥ॥ ᤛᤡᤰᤁᤢᤔᤠ ᤐᤠ᤺ᤴᤏᤡᤴ ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ ᤋᤣ᤺ᤱᤗᤥ॥ 10 “ᤀᤢᤴᤇᤣ᤺ᤶᤒᤠ ᤕᤧᤴᤜᤠ᤹ ᤀᤠᤸᤗᤥᤒᤠ ᤕᤧᤴᤜᤠ᤹ᤏᤢ᤺ᤸᤗᤧᤀᤠᤱ ᤌᤣᤀᤠᤱ ᤏᤢᤒᤠ ᤘᤕᤧ᥅” ᤑᤠ᤹ᤀᤠᤱ ᤛᤣ᤺ᤴᤔᤧᤍᤥᤛᤧᤴᤏᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤂᤧᤱᤃ ᤛᤡᤰᤁᤢᤶᤏᤡᤒᤠ ᤛᤣ᤺ᤴᤗᤠᤵ ᤔᤣ᤺ᤴᤗᤥ॥ 11 ᤁᤢᤜᤡᤱᤘᤧᤳ ᤔᤏᤠᤴ ᤛᤡᤰᤁᤢᤶᤏᤡᤒᤠ ᤐᤥᤱᤔᤠ ᤐᤥᤱᤗᤥ॥ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤂᤥ᤺ᤶᤏᤠ ᤕᤢ᤺ᤵᤔᤏᤠᤒᤠ ᤕᤠᤱᤛᤠᤁᤢᤴᤎᤣ ᤕᤠᤖᤡᤰᤁᤣ ᤏᤢᤒᤠᤖᤥ॥ 12 ᤕᤠᤱᤛᤠᤁᤢᤴᤎᤣ᤺ᤸᤗᤧ ᤁᤶᤒᤪᤠᤱ ᤀᤠᤔᤧᤳᤗᤥ. ᤛᤡᤰᤁᤢᤶᤍᤡᤱ ᤏᤡᤱᤘᤠ᤺ᤸᤗᤧ ᤂᤧᤏᤧ᤹ ᤁᤧᤜᤡᤱᤔᤧᤴ ᤁᤶᤒᤪᤠᤱ ᤔᤧᤳᤋᤢᤖᤥ. ᤁᤖ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤕᤠᤱᤛᤠᤁᤢᤴᤎᤣᤏᤢ᤺ᤸᤗᤧ ᤏᤢᤒᤠᤖᤥ॥ 13 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤥ ᤏᤡᤱᤘᤠ᤹ ᤐᤡᤖᤧ᤹ᤀᤥ॥ ᤂᤢᤏᤧ᤹ ᤐᤧᤃᤧᤰ ᤆᤥᤃᤢᤒᤠ ᤐᤠ᤺ᤴᤏᤡᤴ ᤀᤠᤳᤋᤡᤸᤗᤧ ᤋᤥ᤺ᤴᤍᤥᤶᤒᤠ ᤆᤥ᤺ᤰᤔᤠ ᤛᤢᤰᤋᤢᤒᤣ᥅ 14 ᤁᤧᤒᤠ᤺ᤴᤜᤠ᤹ ᤏᤢᤒᤠ ᤐᤥᤱᤅᤡᤸᤗᤧ ᤁᤧᤏᤡᤱᤘᤠ᤹ ᤋᤠᤛᤧ᤹ᤀᤥ ᤁᤖ ᤁᤧᤒᤠ᤺ᤴᤜᤠ᤹ ᤋᤠᤵᤑᤧ᤺ᤶᤒᤠ ᤋᤠᤒᤠ ᤕᤧᤴᤏᤥ ᤏᤡᤱᤘᤠ᤹ᤛᤢᤶᤔᤥ ᤕᤢᤰᤂᤧ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤏᤧᤵᤔᤠᤱ ᤕᤧᤴᤜᤠ᤹ ᤆᤥᤃᤢᤀᤠᤱ ᤘᤠ᤹ᤖᤥ॥ ᤕᤠᤶᤔᤥ ᤋᤠ᤺ᤴᤍᤡ ᤌᤣ ᤐᤥᤱᤅᤡ. ᤂᤧᤴ ᤀᤠᤳᤋᤡᤸᤗᤧᤀᤠᤱ ᤔᤧᤏᤡᤛᤢᤴᤗᤥ॥ 15 ᤀᤠᤱᤃᤠ᤹ ᤀᤠᤜᤡᤱᤔᤧᤴ ᤜᤏᤧ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ ᤁᤖ ᤁᤴ ᤜᤡᤱᤔᤴᤏᤥᤀᤣ ᤀᤠᤱᤃᤠ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤡᤛᤢᤱᤗᤥ॥ ᤛᤠᤶᤕᤥᤒᤠ ᤔᤏᤠᤴ ᤏᤢᤒᤠ ᤆᤥ᤺ᤰᤛᤠᤱ ᤛᤡᤖᤥ. ᤋᤠᤰᤁᤧᤓᤧ᤹ᤒᤠ ᤆᤥ᤺ᤰᤛᤠᤱ ᤋᤠᤰᤁᤧᤓᤧ᤹ᤒᤠ ᤔᤏᤠᤴ ᤜᤡᤱᤅᤠᤱ ᤘᤠ᤹ᤖᤥ॥ 16 ᤂᤧᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤛᤠ᤹ᤖᤡᤰ ᤛᤠᤶᤕᤥᤒᤠ ᤀᤡᤃᤪ ᤛᤡᤰᤁᤢᤶᤏᤡᤒᤠ ᤔᤧᤒᤥ᤺ᤰᤂᤧᤴᤏᤧ᤹ᤀᤥ. ᤂᤧᤏᤧ᤹ ᤀᤠᤒᤠᤅᤣ ᤌᤣᤀᤠᤱ ᤁᤧᤛᤧᤳᤇᤡᤱᤒᤠᤒᤣ᥅ 17 ᤁᤖ ᤛᤠ᤹ᤖᤡᤰ ᤋᤠᤰᤁᤧᤓᤧ᤹ᤒᤠ ᤀᤡᤃᤪ ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠ ᤔᤧᤒᤥ᤺ᤰᤂᤧᤴᤏᤧ᤹ᤀᤥ ᤌᤣᤀᤠᤱ ᤁᤧᤕᤧᤶ ᤔᤧᤴᤍᤠᤀᤣ ᤂᤧᤏᤧ᤹ ᤁᤧᤛᤡᤒᤠᤒᤣ᥅ 18 ᤌᤡᤰᤁᤧᤴ ᤋᤧᤶᤛᤧ ᤕᤢᤰᤂᤧ᤹ ᤜᤧᤰᤁᤩᤠᤱ ᤘᤣ᤹ᤀᤡᤴ ᤔᤧᤸᤗᤧᤳᤋᤧ᤹ᤀᤥ ᤏᤧᤵᤔᤠᤱ ᤐᤠ᤺ᤴᤜᤠ᤹ ᤏᤢᤒᤠ ᤆᤥᤰᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤧᤃᤡᤒᤠ ᤔᤏᤠᤴ ᤁᤧᤖᤧᤰ ᤔᤢᤀᤡᤱᤒᤠ ᤐᤠ᤺ᤴᤜᤠ᤹ᤏᤢ ᤗᤠ᤺ᤳᤗᤠᤳ ᤘᤠ᤹ᤖᤥ॥ 19 ᤛᤡᤰᤁᤢᤶᤍᤡᤱ ᤏᤡᤱᤘᤠ᤺ᤸᤗᤧ ᤛᤡᤰᤁᤢᤶᤛᤠᤒᤠ ᤔᤏᤠᤴ ᤕᤧᤰᤕᤰᤁᤥᤒᤠ ᤌᤡᤒᤥᤱ ᤛᤢᤜᤠᤱᤕᤢᤰᤐᤠᤜᤠ᤹ᤏᤢ᤺ᤸᤗᤧ ᤔᤢᤰᤛᤠᤶᤒᤠ ᤆᤥᤃᤢᤖᤥ॥ 20 ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤏᤢᤒᤠ ᤁᤧᤈᤥ᤺ᤰᤐᤠ ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤐᤠᤴ ᤔᤧᤴᤈᤥ᤺ᤰᤔᤏᤠᤒᤠ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤰᤋᤱᤒᤠ ᤛᤠᤶᤕᤥᤒᤠ ᤔᤏᤠ ᤀᤠᤳᤋᤡᤴᤏᤠᤱ ᤜᤥᤵᤗᤥ॥ 21 ᤔᤏᤠ᤺ᤸᤗᤧ ᤐᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤏᤥ ᤏᤡᤱᤘᤠ᤹ ᤔᤧᤒᤡᤖᤧᤴᤏᤧ᤹ᤀᤥ. ᤔᤣ᤺ᤴᤏᤧᤑᤃᤪ ᤀᤠᤒᤠᤅᤣ ᤁᤧᤛᤧᤘᤠᤖᤥᤒᤠᤸᤗᤧ ᤂᤧᤏᤧ᤹ ᤁᤧᤈᤠ᤺ᤳᤌᤡ ᤋᤣᤛᤢᤒᤠ ᤁᤧᤄᤧᤵᤛᤢᤖᤥ॥ 22 ᤁᤢᤆ᤻ᤆᤠ᤹ᤀᤡᤸᤗᤧ ᤕᤖᤡᤰᤗᤧᤱ ᤂᤧᤏᤧ᤹ ᤘᤣ᤹ᤜᤠ᤹ᤖᤧ ᤂᤢᤏᤡ᤹ ᤆᤠ᤺ᤳᤌᤡ ᤁᤧᤍᤣᤛᤢᤀᤠᤱ ᤘᤠ᤹ᤖᤥ ᤂᤧᤴ ᤂᤧᤏᤧ᤹ᤀᤠᤱ ᤁᤧᤏᤡᤱᤘᤠ᤹ ᤕᤠᤰᤗᤥ॥ 23 ᤀᤠᤱᤃᤠ᤹ ᤛᤡᤰᤁᤢᤶᤍᤡᤱ ᤀᤠᤏᤡᤱᤘᤠ᤺ᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤛᤠ᤹ᤖᤢᤱᤗᤥ. ᤀᤠᤱᤃᤠ᤹ ᤛᤡᤰᤁᤢᤶᤏᤡᤒᤠ ᤐᤥᤱᤔᤠ ᤁᤢᤈᤧᤰ ᤏᤡ᤺ᤴᤎᤥ ᤆᤥᤃᤢᤱ ᤁᤖ ᤂᤧᤴ ᤀᤠᤗᤠᤃᤡ ᤆᤠ᤹ᤖᤡᤰ ᤛᤠᤰᤋᤧᤖᤥ॥ 24 ᤂᤧᤴ ᤛᤠ᤹ᤖᤡᤰ ᤁᤢᤒᤣ ᤁᤧᤕᤠᤰᤐᤠ ᤏᤢ ᤁᤢᤛᤡᤱ ᤏᤡ᤺ᤵᤔᤠ ᤛᤠ᤹ᤖᤡᤰ ᤁᤧᤛᤠᤰᤐᤠ ᤆᤥᤰᤗᤥ॥ ᤛᤡᤰᤁᤢᤶᤏᤡᤱᤘᤠᤴ ᤌᤧᤔᤠᤒᤣ. ᤂᤧᤴ ᤀᤠᤳᤋᤡᤸᤗᤧ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤋᤢᤒᤣ᥅ 25 ᤁᤖ ᤀᤠᤱᤃᤠ᤹ ᤏᤧᤜᤡᤏᤡᤱᤘᤠ᤹ ᤏᤢ ᤛᤡᤰᤁᤢᤶᤏᤡᤱᤘᤠ᤹ᤀᤥ ᤏᤡᤱᤘᤠ᤹ ᤐᤡᤖᤢᤱᤗᤥ॥ ᤀᤠᤱᤃᤠ᤹ ᤛᤡᤰᤁᤢᤶ ᤏᤡᤱᤘᤠ᤹ ᤏᤢ ᤁᤧᤖᤧᤰ ᤀᤠᤛᤣ᤺ᤴᤍᤥᤜᤠ᤹ᤖᤧ ᤁᤢᤏᤥᤃᤵ ᤂᤥᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ ᤜᤧᤰᤁᤩᤠᤱ ᤀᤡᤱᤗᤧᤰᤁᤡᤴ ᤁᤢᤛᤡᤱ ᤏᤡ᤺ᤵᤔᤠ ᤀᤠᤰᤂᤧᤴ ᤛᤠ᤹ᤖᤡᤰ ᤋᤠᤰᤁᤧᤓᤧ᤹ᤒᤠ ᤏᤢ ᤀᤍᤱᤅᤡᤴ ᤁᤧᤏᤠᤱᤒᤠᤖᤧᤇ ᤑᤠ᤹ᤀᤠᤱ ᤏᤡ᤺ᤴᤎᤥ ᤆᤥᤃᤢᤱᤗᤥ॥ 26 ᤛᤡᤔᤧᤴᤏᤢ᤺ᤸᤗᤧ ᤀᤠᤖᤛᤠᤱ ᤁᤧᤀᤠ᤺ᤵᤐᤠ ᤐᤠ᤺ᤴᤏᤡᤴᤏᤠᤱ ᤀᤠᤱᤃᤠ᤹ ᤁᤥ᤺ᤶᤓᤥ ᤆᤥᤃᤢᤱᤗᤥ— ᤔᤡ᤺ᤶᤈᤡᤀᤥ ᤀᤠᤎᤠᤎᤠᤔᤠ ᤔᤧᤴᤇᤢᤔᤠᤴᤃ ᤀᤡᤈᤥ ᤜᤧᤰᤋᤱᤔᤠᤖᤥ. ᤂᤧᤸᤗᤧ ᤁᤢᤔᤡ᤺ᤶᤈᤡᤸᤗᤧ ᤂᤧᤏᤧ᤹ ᤀᤡᤀᤥ ᤁᤧᤎᤠᤒᤠ ᤜᤧᤰᤁᤣ ᤁᤧᤎᤠᤖᤥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤢᤰᤁᤡᤸᤗᤧ ᤑᤧᤴᤌᤰᤁᤪᤱᤅᤡᤸᤗᤧ ᤀᤡᤃᤧᤄᤣ᤺ᤱᤒᤠ ᤜᤧᤰᤁᤣ ᤁᤧᤄᤣ᤺ᤱᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤡᤱᤘᤠ᤹ ᤁᤧᤍᤠᤒᤠ ᤔᤏᤠᤴ ᤂᤧᤴ ᤀᤡᤄᤣ᤺ᤱᤅᤥᤗᤠᤶᤒᤠ ᤋᤠᤱᤗᤥ ᤁᤖ ᤗᤠᤕᤥ ᤁᤧᤈᤥ᤺ᤰᤐᤠᤴ ᤂᤧᤸᤗᤧ ᤁᤢᤜᤢᤰᤁᤥ ᤌᤠᤖᤥ॥ 27 ᤂᤠᤜᤢᤴᤛᤠᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— ᤀᤥᤘᤠ. ᤀᤠᤱᤃᤠ᤹ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧᤴ ᤏᤥᤃᤵ ᤁᤥ᤺ᤳᤋᤢᤱᤗᤥ ᤜᤧᤰᤁᤩᤠᤱ ᤔᤡᤔᤡᤛᤠᤰᤁᤠᤱ ᤂᤧᤴ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥ 28 ᤀᤠᤸᤗᤛᤠᤱ ᤀᤠᤱᤃᤠ᤹ ᤏᤥᤃᤵᤐᤡᤴ ᤁᤥ᤺ᤳᤋᤢᤱᤗᤥ ᤁᤖ ᤌᤣᤀᤠᤱ ᤔᤧᤱᤄᤥᤒᤠᤴᤗᤥ॥ ᤀᤠᤱᤃᤠ᤹ ᤜᤧᤴᤇᤡᤱ ᤕᤧᤶᤒᤡᤳᤇᤠᤜᤠ᤹ᤀᤥ ᤀᤡᤱᤎᤠᤱ ᤐᤡᤔᤠ ᤁᤧᤗᤠ᤹ᤒᤠ ᤗᤳᤇᤠᤖᤰ ᤂᤥᤛᤢᤱᤗᤥ ᤁᤖ ᤔᤧᤴᤇᤢᤔᤠᤜᤠ᤹ᤀᤥᤃ ᤌᤡᤰᤁᤠᤱ ᤔᤧᤱᤄᤥᤒᤠᤴᤗᤥ॥ 29 ᤀᤠᤱᤃᤠ᤹ ᤁᤴ ᤐᤠ᤺ᤴᤏᤡᤴᤗᤰ ᤜᤢ᤹ᤛᤡᤱᤅᤠᤖᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤁᤢᤍᤥ᤺ᤵᤔᤠ ᤏᤠᤘᤠᤃᤧᤴ ᤆᤀᤡ᤺ᤳ ᤀᤠᤈᤥᤃᤧᤖᤥ ᤁᤖ ᤀᤠᤏᤡ᤹ ᤀᤠᤒᤠᤅᤣ ᤁᤧᤛᤠᤰᤐᤠ ᤀᤠᤈᤥ᤺ᤰᤛᤡᤱᤅᤠᤱ ᤀᤠᤘᤠ᤹ᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.