ᤂᤠᤜᤢᤴᤛᤠᤒᤠ 6 - LIFOTNT

¹ ᤀᤠᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤐᤠ᤺ᤴᤎᤡᤰ ᤏᤡᤛᤢᤱᤅᤠᤱ ᤘᤠ᤹. ᤂᤧᤸᤗᤧ ᤔᤏᤠᤜᤠ᤹ ᤆᤠ᤹ᤖᤡᤰ ᤕᤢᤰᤋᤢᤛᤡᤀᤠᤱ ᤔᤧᤘᤠ᤹॥

² ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤓᤠ ᤔᤏᤠᤎᤡᤰ ᤕᤠᤱᤛᤠᤁᤢᤴᤎᤣ. ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢ᤹. ᤀᤠ. ᤂᤢᤏᤧ᤹ ᤆᤠᤜᤠᤒ᤻ ᤁᤧᤈᤥ᤺ᤰᤐᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤡᤖᤢ᤹ ᤁᤖ ᤂᤧᤴ ᤐᤠ᤺ᤴᤜᤠ᤹ ᤂᤢᤏᤧ᤹ ᤀᤥᤃᤠᤵ ᤆᤥ᤺ᤰᤔᤠᤖᤧ ᤗᤠᤃᤡ ᤔᤧᤒᤡᤖᤢᤴᤗᤥ॥ ᤂᤢᤏᤧ᤹ ᤁᤢᤗᤧᤰᤘᤠᤀᤥ ᤁᤢᤓᤠ ᤗᤳᤇᤠ ᤗᤠᤶᤍᤡ᤺ᤵᤐᤠᤱᤎᤡᤰᤗᤧ ᤂᤧᤴ ᤀᤥᤃᤠᤵ ᤆᤥᤃᤢ᤹॥ ᤂᤧᤴ ᤜᤏᤧ ᤌᤣᤏᤠᤎᤣᤖᤰᤗᤥ. ᤜᤧᤰᤁᤩᤠᤱ ᤂᤧᤱᤃ ᤏᤡᤱᤘᤠ᤹ ᤁᤧᤍᤢᤰᤐᤠ ᤐᤠ᤺ᤴᤗᤥ॥

³ ᤁᤢᤓᤠ ᤔᤏᤠᤎᤡᤰᤗᤧ ᤁᤡᤵᤌᤡᤰ ᤁᤢᤛ᤻ᤛᤠᤜᤠ᤹ ᤔᤧᤘᤠ᤹ᤒᤡᤗᤠ. ᤂᤢᤏᤧ᤹ ᤁᤢᤎᤠ᤺ᤰ ᤁᤣ᤺ᤶᤒᤠ ᤆᤥ᤺ᤰᤐᤡᤗᤠ ᤁᤖ ᤀᤠᤰᤂᤩᤠᤖᤡᤰ ᤁᤢᤎᤠ᤺ᤰ ᤁᤣ᤺ᤶᤒᤠ ᤐᤥᤱᤛᤠᤱ ᤁᤢᤏᤡᤱᤘᤠ᤹ ᤔᤧᤍᤧᤏᤧᤴ ᤜᤧᤰᤁᤩᤠᤱ ᤛᤡ᤺ᤸᤗᤧ ᤂᤢᤏᤧ᤹ ᤏᤢᤖᤡᤰᤁᤠᤱ ᤆᤣᤗᤢᤵ ᤂ᤺ᤱᤗᤢᤵ ᤔᤧᤵᤔᤠ ᤕᤠ᤺ᤶᤒᤰ ᤔᤧᤒᤥ᤺ᤰᤂᤧᤴᤏᤣ ᤑᤃᤪ ᤁᤢᤛᤡᤘᤧᤳ ᤛᤠᤃᤧᤘᤠ᤺ᤴᤇᤡᤱᤒᤠ ᤀᤅᤧ᤺ᤰᤘᤠᤴ ᤂᤢᤏᤧ᤹ᤏᤢ᤺ᤸᤗᤧ ᤏᤢᤒᤠᤖᤥ॥

⁴ ᤂᤧᤴ ᤁᤢᤛᤡᤘᤧᤳ ᤛᤠᤃᤧᤘᤠ᤺ᤴᤇᤡᤱᤒᤠ ᤀᤅᤧ᤺ᤰᤘᤠᤴ ᤌᤣᤀᤠᤱ ᤀᤡᤴᤎᤠ ᤔᤧᤒᤥ᤺ᤰᤂᤧᤴ. ᤂᤧᤴ ᤂᤠᤔᤠᤰᤔᤥ ᤔᤠᤒᤣ᤺ᤰ ᤜᤧᤰᤁᤩᤠᤱ ᤂᤧᤵᤔᤥ ᤂᤧᤴ ᤏᤡᤱᤘᤠ᤹ ᤑᤣ᤺ᤴᤗᤥ॥

⁵ ᤂᤧᤸᤗᤧ ᤗᤧᤴᤍᤡᤰᤐᤠ ᤂᤠᤀᤥ᤺ᤵᤔᤠᤴ ᤀᤠᤵᤑᤠᤸᤗᤧᤀᤠᤱ ᤔᤧᤏᤡᤛᤢᤴ ᤀᤡᤃᤪ ᤜᤡᤱᤔᤴ ᤌᤧᤔᤠᤒᤣ ᤑᤠ᤹ᤀᤠᤱ ᤀᤠᤓᤧᤸᤗᤧᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴ ᤁᤖ ᤌᤣ ᤔᤣ᤺ᤴᤇᤠᤱ ᤂᤧᤸᤗᤧ ᤏᤠ᤺ᤶᤛᤡᤱᤔᤠᤃ ᤂᤥᤛᤢᤀᤠᤱ ᤘᤠ᤹॥

⁶ ᤜᤧᤴᤇᤡᤱ ᤏᤧᤳᤇᤡ ᤋᤱᤒᤣ ᤌᤠᤖᤡᤰ ᤁᤢᤎᤠ᤺ᤰ ᤁᤧᤈᤠ᤹ᤒᤠᤀᤠᤱ ᤜᤡᤱᤔᤴᤒᤠ ᤛᤢᤰᤂᤣᤘᤠᤀᤥ ᤘᤠ᤹ᤔᤠ ᤔᤧᤱᤄᤥᤶᤏᤠᤒᤠ ᤔᤏᤠ᤺ᤴᤏᤢ᤺ᤸᤗᤧ ᤂᤧᤴ ᤀᤅᤧ᤺ᤰᤘᤠ᤺ᤸᤗᤧᤃ ᤏᤠ᤺ᤶᤛᤡᤱᤔᤠ ᤂᤥᤛᤢᤀᤠᤱ ᤘᤠ᤹॥ ᤁᤢᤏᤢᤵᤔᤥ. ᤂᤧᤱᤜᤠ᤹ ᤏᤧᤵᤔᤠᤱ ᤗᤳᤇᤠᤍᤧᤴᤏᤥ ᤁᤧᤳᤇᤡ॥

⁷ ᤔᤏᤠ᤺ᤸᤗᤧ ᤁᤧᤖᤧᤰ ᤕᤠ᤺ᤶᤒᤢᤍᤡᤰᤁᤡᤴ ᤛᤠᤵᤐᤥᤰ ᤂᤠ᤺ᤵᤔᤠᤖᤧ ᤗᤠᤃᤡᤖᤰ ᤆᤥᤃᤢ᤹ᤖᤥ ᤁᤖ ᤂᤢᤏᤧ᤹ ᤁᤢᤛᤠᤵᤐᤥ᤺ᤰᤁᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤄᤠᤏᤧᤴᤗᤥ॥

⁸ ᤁᤴ ᤀᤡ᤺ᤵᤔᤧᤸᤗᤧ ᤀᤠᤰᤂᤣᤗ᤹ᤖᤡᤰ ᤗᤳᤇᤠ ᤛᤡᤰᤁᤢᤶᤏᤡᤒᤠ ᤔᤏᤠᤴ ᤗᤳᤇᤠ ᤀᤍᤱ ᤔᤏᤠ᤺ᤴᤏᤢ᤺ᤸᤗᤧ ᤏᤢᤒᤠ ᤐᤥ᤺ᤰᤂᤧᤃ᥅ ᤕᤠᤱᤃᤧᤛᤠ᤹ᤒᤠ ᤔᤏᤠ᤺ᤸᤗᤧ ᤀᤠᤰᤂᤣᤀᤠᤱᤛᤠᤱ ᤜᤡᤱᤔᤠ ᤗᤧᤛᤢ ᤜᤧᤰᤁᤣᤛᤠᤱ ᤂᤧᤴ ᤁᤢᤗᤠᤃᤡ ᤌᤧᤔᤠ ᤀᤡᤴᤎᤠ ᤐᤥᤱᤅᤠᤱᤃ᥅

⁹ ᤂᤧᤱᤃ ᤜᤏᤧ ᤌᤣᤏᤠᤎᤣᤖᤰ. ᤛᤠᤶᤔᤡ᤺ᤳ ᤁᤣᤈᤱᤅᤡᤴ ᤏᤠ᤺ᤵᤔᤏᤠᤒᤠ ᤜᤧᤰᤁᤣᤖᤰᤗᤥ॥ ᤀᤠᤒᤠᤅᤣᤏᤢ ᤌᤣ ᤘᤠ᤹. ᤂᤧᤵᤔᤥᤀᤣ ᤏᤡᤱᤘᤠ᤹ ᤋᤠᤔᤠ ᤐᤥᤱᤗᤥ ᤁᤢᤓᤠ ᤘᤣ᤹ ᤐᤠ᤺ᤴᤏᤡᤴ ᤂᤥᤔᤠ ᤏᤡᤱᤘᤠ᤹ ᤆᤥ᤺ᤰᤔᤠᤏᤢ᤺ᤸᤗᤧ ᤂᤧᤴ ᤏᤢᤒᤠᤖᤥ॥

¹⁰ ᤜᤧᤴ ᤐᤠ᤺ᤴᤜᤠ᤹ ᤐᤥᤱ᤹. ᤂᤧᤴ ᤋᤃᤡᤗᤠᤶᤒᤠᤀᤣ ᤏᤡ᤺ᤴᤎᤥ ᤐᤥᤱ ᤆᤢ᤺ᤳᤋᤠᤱ ᤘᤠᤖᤥ ᤜᤧᤰᤁᤩᤠᤱ ᤀᤠᤏᤡ᤹ ᤁᤴ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤔᤠᤱ ᤀᤠᤘᤠ᤹ᤖᤥ ᤔᤏᤠᤴ ᤀᤠᤵᤑᤣᤰᤏᤢ᤺ᤸᤗᤧ ᤁᤧᤎᤢᤶᤒᤧᤴᤏᤢ ᤌᤣᤀᤠᤱ ᤐᤠ᤺ᤴᤎᤰᤔᤠ ᤔᤧᤛᤢᤰᤏᤧᤴᤗᤥ॥

¹¹ ᤂᤧᤸᤗᤧ ᤀᤠᤰᤂᤩᤠᤖᤡᤰ ᤁᤣ᤺ᤸᤗᤡᤰ ᤐᤠ᤺ᤴᤎᤱ ᤆᤥᤃᤢ᤹. ᤂᤧᤶᤔᤩᤠᤰᤁᤣ ᤕᤖᤡᤰ ᤂᤧᤴ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤐᤥᤱᤗᤥ ᤂᤢᤏᤧ᤹ ᤁᤢᤗᤠᤃᤡ ᤂᤧᤸᤗᤧ ᤌᤧᤔᤠᤀᤠᤱ ᤔᤧᤈᤰᤋᤢᤴᤗᤥ॥

¹² ᤜᤧᤰᤁᤣ᤺ᤸᤗᤧ ᤛᤠᤶᤔᤡ᤺ᤰᤂᤢᤱᤒᤠ ᤜᤧᤰᤁᤣ ᤁᤧᤔᤠᤒᤠᤀᤠᤱ ᤁᤧᤒᤣ᤺ᤰᤐᤠ ᤜᤡᤱᤔᤴᤏᤥ. ᤔᤏᤠ᤺ᤸᤗᤧ ᤋᤠᤱᤛᤠ ᤏᤢ ᤌᤣᤏᤠᤎᤣᤒᤠ ᤁᤢᤜᤡᤱᤔᤴᤏᤥ ᤂᤢᤏᤧ᤹ ᤁᤢᤗᤠᤃᤡ ᤏᤢᤒᤠ ᤐᤠᤴ ᤜᤧᤴ ᤘᤠ᤹. ᤂᤧᤴ ᤜᤠ᤺ᤳᤗᤧ ᤏᤡᤛᤢᤒᤣ᥅ ᤂᤧᤴ ᤛᤡᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤌᤣ ᤐᤥᤱ᤹. ᤂᤧᤴ ᤜᤠ᤺ᤳᤗᤧ ᤋᤃᤡᤛᤠ ᤏᤡᤔᤠ ᤛᤢᤰᤋᤢᤒᤣ᥅