ᤂᤠᤜᤢᤴᤛᤠᤒᤠ 12 - LIFOTNT

¹ ᤂᤧᤸᤗᤧᤆᤥᤃᤢᤸᤗᤧ. “ᤜᤡᤱᤔᤴᤏᤥ ᤀᤠᤱᤃᤠ᤹ ᤌᤣᤀᤠᤱ ᤛ᤺ᤵᤔᤠ ᤐᤠᤴ ᤜᤥᤵᤗᤥ” ᤐᤠ᤺ᤵᤔᤠ ᤁᤧᤒᤥᤱᤒᤠ ᤋᤠᤵᤑᤧ᤺ᤶᤒᤠ ᤕᤧᤴ ᤏᤢ ᤋᤱᤒᤣᤜᤠ᤹ ᤂᤧᤏᤡ᤹ ᤜᤡᤱᤔᤴᤏᤥ ᤋᤠᤔᤠᤏᤢ᤺ᤸᤗᤧ ᤋᤃᤡᤀᤣ ᤌᤠᤱᤒᤧᤴ ᤁᤧᤘᤕᤡᤖᤀᤣ ᤂᤧᤏᤡ᤹ ᤏᤠᤘᤠᤃᤧᤴ ᤆᤀᤡ᤺ᤳᤍᤠᤱᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥

² ᤁᤢᤓᤠ ᤕᤧᤴᤏᤥ ᤏᤠᤶ. ᤗᤠᤒᤠ ᤏᤢ ᤂᤣ᤺ᤶᤛᤡᤰᤐᤠ ᤀᤥ᤺ᤳᤋᤡ᤺ᤴ ᤂᤧᤏᤧ᤹ ᤂᤠᤔᤠᤰᤐᤠ ᤁᤧᤏᤡᤛᤢᤖᤥ ᤜᤧᤰᤁᤩᤠᤱ ᤐᤠᤱᤃᤧᤴᤍᤡᤱ ᤘᤜᤡᤳ ᤁᤧᤍᤠ᤺ᤵᤐᤠ ᤂᤠ᤹ᤔᤡ᤺ᤵᤐᤠᤴ ᤏᤢ᤺ᤱᤔᤠ ᤋᤠᤔᤠᤏᤢ᤺ᤸᤗᤧ ᤋᤃᤡ ᤂᤢᤏᤧ᤹ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ॥

³ ᤂᤧᤏᤧ᤹ ᤁᤧᤗᤠᤱᤜᤠ᤹. ᤁᤧᤜᤡᤶ ᤁᤶᤒᤪᤠᤱ ᤁᤧᤔᤧᤵᤐᤠᤜᤠ᤹ ᤌᤧᤃᤰᤁᤰᤏᤠ ᤕᤱᤔᤠ ᤜᤣ᤺ᤰᤔᤠᤏᤢ᤺ᤸᤗᤧ ᤋᤃᤡ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤎᤢᤶᤒᤠ ᤁᤧᤎᤰᤛᤢᤒᤠᤜᤠ᤹ ᤀ᤺ᤰᤂᤢᤶ ᤑᤴᤇᤡᤱᤔᤠᤏᤢ᤺ᤸᤗᤧ ᤋᤃᤡ ᤂᤢᤏᤧ᤹ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ॥ ᤂᤧᤏᤧ᤹ ᤁᤧᤜᤠᤒᤥ᤹ᤒᤠᤜᤠ᤹ ᤗᤢ᤺ᤰᤔᤠ ᤏᤢ ᤆᤩᤈᤡ ᤁᤧᤏᤶᤒᤠ ᤁᤧᤛᤧᤘᤠᤖᤥᤒᤠᤜᤠ᤹ᤖᤧ ᤁᤢᤈᤠ ᤕᤢ᤺ᤵᤔᤠ ᤏᤠ᤹ᤔᤠᤏᤢ᤺ᤸᤗᤧ ᤋᤃᤡ ᤂᤢᤏᤧ᤹ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ᤂᤧᤒᤩᤠᤱ ᤐᤣᤎᤠ᤺ᤵᤜᤠ᤹ᤀᤥᤗᤠᤶ ᤀᤥᤃᤧᤔᤔᤠᤖ ᤁᤧᤕᤢᤱᤔᤠ ᤔᤧᤴᤇᤢᤔᤠᤜᤠ᤹ ᤁᤧᤔᤡᤰᤁᤡᤸᤗᤧ ᤏᤢᤖᤡᤰᤁᤠᤱ ᤏᤡᤔᤠ ᤔᤧᤴᤇᤢᤰᤔᤏᤠᤒᤠ ᤐᤥᤱᤔᤠᤏᤢ᤺ᤸᤗᤧ ᤋᤃᤡ ᤂᤢᤏᤧ᤹ ᤀᤡ᤺ᤳᤋᤧᤀᤥ॥

⁴ ᤂᤧᤏᤧ᤹ ᤁᤧᤏᤧᤓᤠᤰᤁᤧᤸᤗᤧ ᤏᤢᤖᤡᤰ ᤏᤠᤔᤧᤄᤧᤵᤛᤢᤴᤗᤥ. ᤛᤠᤶᤗᤥ ᤛᤠᤶᤔᤧᤵᤔᤏᤠᤒᤠ ᤀᤡᤰᤗᤠᤴ ᤀᤡᤃᤪ ᤗᤢᤱᤛᤢᤶ ᤗᤠᤀᤡᤰᤐᤠᤴ ᤂᤧᤶᤔᤠ ᤁᤧᤴᤇᤢᤰᤋᤢᤴᤗᤥ ᤁᤖ ᤐᤢ᤺ᤴ ᤛᤠᤶᤗᤥᤛᤠᤱ ᤂᤧᤏᤧ᤹ ᤔᤡᤰᤕᤢᤔᤥᤗᤠᤶ ᤁᤧᤛᤥᤖᤥ॥

⁵ ᤆᤴᤈᤶᤒᤠᤍᤧᤴᤏᤥᤗᤠᤶ ᤂᤧᤏᤧ᤹ ᤁᤧᤕᤠ᤺ᤱᤗᤥ ᤜᤧᤰᤁᤩᤠᤱ ᤗᤠᤶᤔᤥ ᤗᤠᤱᤃᤧᤄᤣ᤺ᤰᤁᤡᤸᤗᤧ ᤂᤧᤏᤧ᤹ ᤁᤧᤃᤡᤖᤥ॥ ᤂᤈᤱᤛᤣ᤹ᤀᤡᤴ ᤑᤧᤰᤐᤠ ᤜᤧᤰᤁᤣ ᤁᤢᤎᤧᤃᤣᤰᤐᤠᤴ ᤑᤢᤳᤋᤪᤡ᤺ᤱᤃᤩᤠᤖᤡᤰ ᤑᤢᤳᤗᤥ. ᤂᤧᤏᤧ᤹ ᤗᤠᤱᤄᤣ᤺ᤰᤔᤠ ᤁᤧᤜᤰᤛᤢᤸᤗᤧ. ᤐᤩᤠ᤺ᤵᤐᤧᤴ ᤜᤧᤰᤁᤣ ᤔᤛ᤻ᤛᤢᤀᤠᤱ ᤂᤧᤏᤧ᤹ ᤀᤠᤑᤣᤰ ᤐᤧ᤺ᤱᤃᤠᤰ ᤐᤧ᤺ᤱᤃᤠᤰ ᤁᤧᤀᤢ᤺ᤱᤛᤡᤱᤗᤥ ᤂᤧᤒᤩᤠᤱ ᤌᤣᤀᤠᤱ ᤆᤥ᤺ᤰᤔᤠ ᤁᤧᤛᤡᤖᤠ᤹ ᤔᤧᤎᤠᤱᤏᤧᤸᤗᤥ॥ ᤁᤢᤏᤢᤵᤔᤥᤒᤠ ᤛᤍᤠᤍᤡᤱᤒᤠ ᤁᤧᤜᤡᤶ ᤗᤧᤵᤔᤠᤱ ᤁᤧᤒᤣ᤺ᤰᤗ ᤁᤧᤒᤳᤗᤥ ᤜᤧᤰᤁᤩᤠᤱ ᤔᤠᤖᤠᤶᤔᤧᤴ ᤔᤧᤖᤡᤱ ᤔᤧᤎᤰᤐᤠ ᤔᤏᤠᤜᤠ᤹ᤖᤧ ᤔᤧᤎᤡᤶᤛᤢᤖᤥ॥

⁶ ᤕᤢᤵᤐᤠ ᤛᤡᤰᤁᤪᤡ᤺ᤴ ᤛᤩᤠᤰ ᤘᤕᤠᤰ ᤐᤢ᤹ᤖᤥ. ᤛᤠᤶᤔᤩᤠᤱ ᤂᤥᤷᤕᤠᤴ ᤜᤧᤳᤗᤥ. ᤘᤠᤃᤧᤱᤅᤥᤒᤠ ᤀᤡᤍᤠ᤺ᤰᤁᤡᤴ ᤛᤩᤠᤰ ᤐᤢ᤹ᤖᤥ ᤜᤧᤰᤁᤩᤠᤱ ᤁᤢ᤺ᤴᤍᤠ᤺ᤴ ᤐᤰᤁᤪᤧ᤹ ᤜᤧᤳᤗᤥ॥

⁷ ᤀᤠᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴ ᤂᤠᤶᤔᤥᤀᤣ ᤏᤢ᤺ᤱᤒᤣ᤺ᤰᤗᤥ ᤜᤧᤰᤁᤩᤠᤱ ᤜᤡᤱᤔᤴᤒᤠ ᤛᤠ᤺ᤱᤃᤢᤃᤧᤴ ᤛᤰᤔᤠᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤢ᤺ᤱ ᤐᤣ᤺ᤰᤗᤥ. ᤂᤧᤱᤃ ᤂᤢᤏᤧ᤹ ᤀᤠᤏᤡ᤹ ᤀᤠᤒᤡᤖᤧᤀᤠᤱ ᤘᤕᤧᤖᤥ॥

⁸ ᤌᤣᤏᤠᤎᤣ ᤜᤏᤧᤖᤰᤗᤥ. ᤌᤣᤏᤠᤎᤣ ᤜᤏᤧᤖᤰᤗᤥ. ᤁᤧᤖᤧᤰ ᤜᤏᤧᤖᤰᤗᤥ ᤑᤠ᤹ᤀᤠᤱ ᤂᤠᤜᤢᤴᤛᤠᤒᤠᤸᤗᤧ ᤐᤠ᤺ᤳᤋᤢᤖᤥ॥

ᤁᤢᤏᤢᤵᤔᤠ ᤐᤠᤴ

⁹ ᤁᤖ ᤂᤠᤜᤢᤴᤛᤠᤒᤠᤴ ᤛᤡᤰᤁᤢᤶᤏᤡᤒᤠ ᤘᤕᤧ ᤜᤧᤰᤁᤩᤠᤱ ᤂᤢᤏᤧ᤹ ᤗᤧᤛᤢᤒᤠ ᤐᤠ᤺ᤴᤏᤡᤴ ᤔᤏᤠᤜᤠ᤹ ᤜᤢ᤹ᤖᤢᤛᤡ॥ ᤂᤢᤏᤧ᤹ ᤕᤖᤡᤰ ᤂᤠᤜᤢᤴᤜᤠ᤹ ᤏᤢᤖᤡᤰᤁᤠᤱ ᤛᤠᤵᤋᤢ. ᤁᤥ᤺ᤳᤋᤢ. ᤜᤧᤰᤁᤩᤠᤱ ᤏᤢᤖᤡᤰᤁᤠᤱ ᤐᤧᤴᤇᤢᤑᤳᤇᤢ॥

¹⁰ ᤂᤠᤜᤢᤴᤛᤠᤒᤧᤸᤗᤧ ᤛᤧᤰᤂᤠᤒᤠ ᤐᤠ᤺ᤴᤜᤠ᤹ ᤂᤥᤔᤠ ᤋᤶᤛᤡᤱ ᤆᤥᤃᤢ॥ ᤂᤧᤸᤗᤧ ᤌᤣ ᤛᤠᤵᤋᤢ. ᤂᤧᤴ ᤛᤧᤰᤂᤠ ᤘᤕᤧ॥

¹¹ ᤛᤡᤰᤁᤢᤶᤛᤠᤒᤠ ᤔᤏᤠ᤺ᤸᤗᤧ ᤁᤢᤒᤠ᤺ᤴᤜᤠ᤹ ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤔᤧᤃᤳᤋᤢᤒᤠ ᤔᤧᤸᤗᤢᤰᤗᤠᤶ ᤀᤥᤛᤣ᤺ᤴᤎᤠᤰᤔᤠ ᤜᤠᤛᤶᤛᤶᤒᤠ ᤋᤰᤁᤠᤳ ᤜᤧᤰᤁᤣ ᤗ᤹ ᤜᤧᤰᤁᤩᤠᤱ ᤑᤢᤱᤔᤏᤠᤒᤠ ᤂᤠᤜᤢᤴᤜᤠ᤹ᤃ ᤁᤧᤎᤢᤶᤒᤠ ᤆᤥ᤺ᤰᤔᤏᤠᤀᤠᤱ ᤌᤧᤵᤔᤏᤠᤒᤠ ᤑᤧᤴᤋᤡᤱ ᤜᤧᤰᤁᤣ ᤗ᤹॥ ᤗᤳᤌᤡᤰᤗᤰ ᤔᤧᤸᤗᤢᤰᤁᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤀᤠᤏᤡ᤹ ᤀᤠᤒᤡᤖᤧᤒᤠᤖᤥ॥

¹² ᤀᤠᤛ᤻ᤛᤠᤀᤣ. ᤀᤠᤸᤗᤛᤠᤱ ᤁᤢᤓᤠ ᤛᤠᤶᤍᤡᤱᤜᤠ᤹ ᤐᤡᤏᤧᤖᤥ॥ ᤛᤠᤵᤐᤴ ᤛᤠᤵᤔᤠᤸᤗᤧ ᤁᤢᤏᤢᤵᤔᤠ ᤜᤥᤵ ᤜᤧᤰᤁᤩᤠᤱ ᤕᤖᤡᤰ ᤛᤠᤵᤗᤠ ᤏᤡ᤺ᤵᤔᤠᤖᤧ ᤏᤠᤛᤡᤃᤧᤴ ᤌᤰᤁᤡᤴ ᤏᤠᤖᤥ॥

¹³ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤄᤧᤵᤛᤢ. ᤀᤠᤸᤗ ᤗᤳᤇᤠ ᤐᤠ᤺ᤴᤗᤰ ᤐᤠ᤺ᤵᤔᤠ ᤘᤠ᤹ᤖᤥ. ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤡᤖᤧ᤹ᤀᤥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤱᤈᤠ᤺ᤱᤅᤡᤴ ᤀᤡ᤺ᤳᤋᤧ ᤏᤠ᤺ᤳᤋᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤂᤧᤶᤔᤩᤠᤰ ᤆᤥ᤺ᤰᤔᤠᤖᤰ ᤔᤏᤠᤴ ᤏᤠᤘᤠᤃᤧᤴ ᤆᤀᤡ᤺ᤳ ᤐᤥ᤺ᤰᤂᤧᤒᤠᤖᤥ॥

¹⁴ ᤀᤠᤏᤡ᤹ ᤆᤥ᤺ᤰᤔᤏᤠᤒᤠ ᤁᤧᤖᤧᤰ ᤕᤠ᤺ᤶᤒᤰᤁᤡᤴ ᤏᤢᤒᤠ ᤐᤥᤱᤛᤠᤱ ᤀᤡᤃᤪ ᤋᤠᤵᤑᤧ᤺ᤶᤒᤠ ᤐᤥᤱᤛᤠᤱ. ᤛᤫᤠ᤺ᤳᤋᤠᤱ ᤆᤥ᤺ᤰᤔᤏᤠᤒᤠ ᤕᤠ᤺ᤶᤒᤰᤁᤡᤴᤏᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤠᤛᤧᤴ ᤆᤥᤃᤢᤖᤥ॥