ᤂᤠᤜᤢᤴᤛᤠᤒᤠ 11 - LIFOTNT

ᤛᤡᤰᤁᤢᤶᤏᤡᤒᤠ ᤔᤏᤠ᤺ᤸᤗᤧ ᤁᤢᤕᤠ᤺ᤶᤒᤰ

¹ ᤁᤧᤕᤠᤱᤛᤠᤁᤢᤴᤎᤣᤴ ᤏᤡᤱᤘᤠ᤹ ᤜᤴᤍᤧᤀᤠᤱ ᤐᤡᤖᤧᤛᤧ᤹ᤀᤥ ᤜᤧᤰᤁᤩᤠᤱ ᤕᤖᤡᤰ ᤕᤧᤴ ᤀᤣᤃᤠᤱ ᤂᤧᤏᤧ᤹ ᤂᤧᤴ ᤕᤠᤶᤔᤥ ᤁᤧᤄᤥᤛᤢᤖᤥ॥

² ᤂᤧᤏᤧ᤹ ᤏᤢᤛᤡ. ᤕᤧᤳᤇᤡ ᤔᤏᤠᤜᤠ᤹ ᤜᤠ᤺ᤳᤋᤧᤛᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤂᤧᤴ ᤁᤧᤴᤏᤡᤛᤢᤴᤗᤥ. ᤗᤠᤈᤣ᤹ᤀᤥ ᤀᤠᤰᤋᤱᤒᤠ ᤕᤧᤳᤋᤢᤰᤂᤣ ᤋᤠᤀᤡᤖᤥ॥

³ ᤂᤠ᤹ᤔᤡ᤺ᤵᤐᤠᤴ ᤆᤫᤠ᤺ᤳᤋᤡᤸᤗᤧ ᤋᤡᤶᤏᤧ ᤑᤃᤪ ᤂᤧᤸᤗᤧ ᤐᤠᤱᤃᤧᤴᤍᤡᤱ ᤘᤠᤜᤡᤳᤔᤠᤴ ᤌᤠᤛᤢᤖᤥ॥ ᤛᤡᤱᤒᤢᤱᤅᤡᤴ ᤌᤠᤱᤃᤧᤳ ᤗᤧᤵᤔᤠᤱ ᤆᤥ᤺ᤴᤇᤠᤱ ᤀᤡᤃᤪ ᤗᤠᤱᤃᤧᤳ ᤗᤧᤵᤔᤠᤱ ᤆᤥ᤺ᤴᤇᤠᤱ ᤂᤧᤴ ᤀᤠᤳᤋᤥ ᤗᤧᤵᤔᤠᤱ ᤆᤠᤴ ᤜᤠᤒᤠ ᤂᤧᤵᤔᤥᤀᤣ ᤏᤧᤖᤥ॥

⁴ ᤛᤢᤖᤡᤳ ᤜᤢᤒᤠ ᤔᤡᤰᤆᤥ ᤁᤧᤔᤧᤵᤐᤧᤸᤗᤧ ᤀᤠᤵᤑᤠᤸᤗᤧᤀᤠᤱ ᤕᤠᤰᤘᤠ ᤔᤧᤍᤣᤛᤢᤴᤗᤥ ᤂᤠ᤹ᤔᤡᤳ ᤀᤥᤃᤧᤔᤧᤵᤐᤠᤖ ᤁᤧᤏᤧᤒᤠᤸᤗᤧ ᤀᤠᤓᤧᤸᤗᤧᤀᤠᤱ ᤁᤢᤈᤠ ᤔᤧᤛᤢᤵᤛᤢᤴᤗᤥ॥

⁵ ᤛᤢᤖᤡᤳᤋᤧᤸᤗᤧ ᤁᤢᤗᤠᤶᤔᤡᤴ ᤁᤧᤴᤏᤡᤛᤢᤴᤗᤥ ᤀᤡᤃᤪ ᤔᤧᤴᤇᤢᤰᤔᤠ ᤁᤧᤘᤠ᤹ᤔᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤛᤠᤵᤐᤥ᤺ᤰᤐᤥᤒᤠ ᤀᤅᤧ᤺ᤰᤘᤠᤴ ᤏᤠᤘᤠᤆᤀᤡᤳ ᤗᤧᤱᤛᤡᤱᤒᤠᤴ ᤁᤢᤛᤡᤱ ᤏᤡ᤺ᤵᤔᤠ ᤁᤧᤴᤇᤢᤰᤋᤢᤴᤗᤥ ᤜᤧᤰᤁᤣᤗ᤹ᤖᤡᤰᤁᤣ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤈᤥ᤺ᤰᤐᤠ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤡᤴ ᤁᤢᤛᤡᤱ ᤏᤡ᤺ᤵᤔᤠ ᤁᤧᤴᤇᤢᤰᤋᤢᤴᤗᤥ॥

⁶ ᤋᤠᤏᤠᤶᤛᤠ ᤕᤠ᤹ᤖᤡ᤺ᤶᤒᤠᤴ ᤜᤣ᤹ᤖᤧᤀᤥ. ᤕᤢ᤺ᤴᤇᤡᤰᤁᤠᤱ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤛᤫᤠ᤺ᤳ ᤔᤧᤕᤢᤅᤧᤴᤏᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤕᤠ᤹ᤖᤡ᤺ᤶᤒᤠᤸᤗᤧ ᤁᤢᤈᤠ᤹ ᤑᤳᤇᤢ᤹ ᤀᤠᤸᤗᤥ ᤜᤣ᤹ᤔᤏᤠᤒᤠ ᤕᤠ᤹ᤖᤡ᤺ᤶᤒᤠᤴ ᤀᤡᤃᤪ ᤆᤥ᤺ᤰᤔᤏᤠᤒᤠ ᤕᤠ᤺ᤶᤒᤰᤁᤡᤴ ᤀᤡ ᤏᤢᤒᤠ ᤐᤥᤱᤒᤡ. ᤂᤧᤴ ᤂᤧᤏᤧ᤹ ᤀᤠᤵᤑᤠᤸᤗᤧᤀᤠᤱ ᤁᤧᤴᤏᤡᤛᤢᤴᤗᤥ॥

⁷ ᤂᤠᤃᤧᤀᤥ᤺ᤵᤐᤠ ᤀᤥ᤺ᤳᤋᤡ᤺ᤴ ᤏᤢᤒᤠ ᤆᤥᤰᤗᤥ. ᤔᤡᤰᤁᤡᤸᤗᤧ ᤏᤠᤶᤔᤡᤴ ᤀᤥᤔᤧᤵᤔᤠ ᤁᤢᤛᤡᤖᤠ᤹ ᤌᤠᤱᤗᤥ॥

⁸ ᤜᤡᤱᤔᤴᤒᤠ ᤁᤧᤖᤧᤰ ᤋᤱᤒᤣᤜᤠ᤹ᤖᤧ ᤗᤠᤃᤡ ᤛ᤺ᤳᤋᤧ᤹ᤶᤔᤧ᤹ᤀᤥ॥ ᤂᤡᤏᤡ᤹ ᤀᤠᤰᤂᤧᤴ ᤁᤣ᤺ᤸᤗᤡᤰ ᤌᤠ᤺ᤰ ᤆᤠ᤹ᤛᤠᤱ ᤂᤧᤴᤏᤢ᤺ᤸᤗᤧ ᤁᤣ᤺ᤶᤒᤠᤃ ᤛᤡᤔᤧᤴ ᤀᤣᤃᤠᤱᤒᤠ ᤕᤧᤶᤔᤡᤴ ᤐᤥᤱᤗᤥ ᤁᤴ ᤐᤠ᤺ᤴᤏᤡᤴ ᤂᤡᤏᤡ᤹ ᤏᤡᤱᤘᤠ᤹ᤀᤥ ᤕᤢᤰᤂᤧᤶᤔᤧ᤹ᤀᤥ॥ ᤁᤧᤍᤠᤒᤠ ᤐᤠᤴ ᤁᤧᤖᤧᤰ ᤌᤣᤏᤠᤎᤣᤖᤥ॥

⁹ ᤌᤠᤱᤒᤧᤴᤇᤣ. ᤂᤡᤏᤡ᤹ ᤌᤠᤱᤒᤧᤴ ᤕᤧᤶᤔᤥ ᤕᤧᤕᤧ ᤗ᤹ᤖᤧᤶᤔᤧ᤹ᤀᤥ. ᤌᤠᤱᤒᤧᤴ ᤁᤧᤘᤕᤡᤖ ᤌᤠᤖᤡᤰ ᤏᤢᤖᤧᤶᤔᤧ ᤋᤠᤛᤧᤶᤔᤧ᤹ᤀᤥ॥ ᤏᤡᤱᤘᤠ᤺ᤸᤗᤧ ᤀᤡ᤺ᤳᤋᤢᤒᤠ ᤛᤡᤖᤠ᤹ᤃᤧᤎᤠᤱᤒᤠ ᤜᤧᤰᤁᤩᤠᤱ ᤂᤡᤏᤡ᤹ ᤔᤡᤰ ᤁᤧᤗᤠ᤺ᤵᤐᤠ ᤐᤠ᤺ᤴᤜᤠ᤹ ᤁᤧᤳᤋᤧᤶᤔᤧ᤹ᤀᤥ ᤁᤖ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ᤀᤥ ᤕᤢᤰᤂᤧᤶᤔᤧ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤠᤖᤠᤳ ᤕᤢᤰᤂᤢᤖᤥ॥

¹⁰ ᤂᤧᤸᤗᤧᤆᤥᤃᤢᤸᤗᤧ ᤌᤣ ᤐᤠ᤺ᤴᤏᤥᤀᤠᤱ ᤏᤡᤱᤛᤠᤱ ᤔᤧᤒᤢᤃᤧᤴᤏᤧ᤹ᤀᤥ. ᤏᤠᤛᤡᤃᤧᤴ ᤁᤧᤎᤰᤁᤥᤒᤠ ᤋᤢᤰᤔᤠᤗᤠ᤺ᤰᤔᤠᤀᤥ ᤏᤡᤱᤘᤠ᤹ ᤔᤧᤒᤡᤖᤧᤴᤏᤧ᤹ᤀᤥ॥ ᤂᤧᤏᤧ᤹ ᤛᤍᤠᤍᤡᤱ ᤌᤠᤖᤡᤰ ᤌᤠᤱᤒᤧᤴ ᤏᤢ ᤁᤧᤎᤢᤶᤒᤠ ᤁᤧᤴᤘᤠ᤹ᤏᤧᤴᤗᤥ॥