ᤂᤠᤜᤢᤴᤛᤠᤒᤠ 10 - LIFOTNT

¹ ᤁᤧᤛᤡᤒᤠ ᤕᤠᤱᤏᤠ ᤛᤡᤈᤠᤜᤠ᤹ᤖᤧ ᤁᤢᤏᤠᤶᤃᤧᤏᤢ᤹ᤒᤠ ᤑᤢᤱᤏᤠᤶ ᤕᤠᤱᤔᤠ ᤐᤷᤕᤠᤔᤠᤴ ᤏᤠᤶᤃᤧᤛᤢᤒᤠ ᤆᤥ᤺ᤰᤔᤠ ᤔᤧᤛᤢᤰᤋᤢᤖᤥ ᤜᤧᤰᤁᤩᤠᤱ ᤗᤳᤌᤡᤰ ᤆᤢᤰᤛᤠ ᤀᤍᤱ ᤕᤠ᤺ᤶᤒᤰᤗᤧ ᤕᤶᤒᤠ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤜᤏᤧᤒᤠ ᤆᤥ᤺ᤰᤔᤠ ᤛᤢᤰᤋᤢᤖᤥ॥

² ᤛᤡᤰᤁᤢᤶᤍᤠᤱᤒᤠᤸᤗᤧ ᤁᤢᤏᤡᤱᤘᤠᤴ ᤏᤢᤒᤠ ᤗᤠᤶᤔᤥ ᤘᤠ᤹ᤖᤥ ᤁᤖ ᤀᤍᤱ ᤔᤏᤠ᤺ᤸᤗᤧ ᤁᤢᤏᤡᤱᤘᤠᤴ ᤐᤧᤷᤃᤧᤰᤁᤧᤰᤐᤠ ᤗᤠᤶᤔᤥ ᤐᤣ᤺ᤰᤗᤥ॥

³ ᤀᤍᤱ ᤔᤏᤠᤴ. ᤗᤠᤶᤔᤥ ᤗᤠᤱ ᤗᤠᤱᤄᤣ᤺ᤰᤁᤡᤸᤗᤧᤀᤠᤱ ᤂᤢᤏᤧ᤹ ᤁᤢᤏᤧᤜᤡ ᤛᤢ᤺ᤴᤏᤠᤱ. ᤁᤢᤀᤍᤱ ᤐᤠ᤺ᤴᤏᤡᤴ ᤁᤧᤖᤧᤰ ᤀᤢᤛᤣ᤺ᤴᤎᤠᤱ ᤆᤥᤃᤢᤛᤡᤖᤥ॥

⁴ ᤜᤠᤱᤕᤢᤰᤐᤠᤴ ᤂᤧᤏᤧ᤹ᤏᤢ ᤁᤢᤕᤠ᤺ᤰᤗᤧ᤹ᤛᤠᤱ ᤂᤧᤏᤧ᤹ ᤕᤠ᤺ᤶᤒᤰᤁᤡᤴ ᤔᤧᤗᤧᤖᤧᤴᤏᤧ᤹ᤀᤥ. ᤂᤧᤏᤧ᤹ ᤏᤠᤛᤡ ᤌ᤺ᤳᤋᤧ᤹ᤀᤠᤱ ᤛᤫᤠ᤺ᤳ ᤕᤢᤅᤧ᤹ᤀᤥ. ᤜᤧᤰᤁᤣ᤺ᤸᤗᤧ ᤕᤶᤒᤠ ᤕᤠ᤺ᤶᤒᤰ ᤐᤣ᤺ᤶᤔᤠᤗᤠᤶ ᤗᤧᤵᤔᤡ ᤂᤥᤔᤠ ᤁᤧᤛᤢᤰᤋᤢᤖᤥ॥

⁵ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤱᤃᤠ᤹ ᤗᤳᤇᤠ ᤑᤧᤏᤩᤠᤶᤒᤰ ᤌᤡᤰ ᤏᤡᤛᤢᤱᤗᤥ. ᤀᤰᤋᤱᤒᤠ ᤐᤡᤷᤒᤣ᤺ᤶᤒᤠ ᤐᤠᤴ ᤛᤢᤜᤠᤱᤕᤢᤰᤐᤠᤗᤠᤶ ᤐᤥᤱᤗᤥ॥

⁶ ᤀᤍᤱ ᤔᤏᤠᤜᤠ᤹ ᤌᤥᤛᤔᤠ ᤕᤢᤰᤛᤠᤒᤠ ᤋᤠᤰᤑᤠ ᤔᤧᤒᤡᤖᤢᤛᤡᤖᤥ ᤜᤧᤰᤁᤩᤠᤱ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ ᤕᤥᤛᤔᤠ ᤋᤠᤰᤑᤠ ᤔᤧᤒᤡᤖᤢᤛᤡᤖᤥ॥

⁷ ᤀᤠᤱᤃᤠ᤹ ᤕᤥ᤺ᤃ᤻ᤒᤠᤜᤠ᤹ ᤀᤴ ᤔᤧᤕᤢᤰᤋᤢᤀᤠᤱ ᤔᤧᤒᤣᤒᤠ ᤏᤢ ᤗᤠᤶᤗᤥᤒᤠᤜᤠ᤹ ᤕᤥᤃ᤻ᤒᤠ ᤜᤧᤰᤁᤣ ᤗᤠᤱᤔᤧᤄᤣᤃᤧᤒᤠ ᤏᤡᤛᤢᤱᤛᤡᤱᤅᤠᤱ ᤘᤠ᤹ᤖᤥ॥

⁸ ᤀᤠᤳᤋᤡᤸᤗᤧ ᤗᤢᤶᤒᤠᤳ ᤋᤕᤢ᤹. ᤂᤢᤏᤧ᤹ ᤜᤠᤒᤠ ᤂᤧᤵᤔᤥᤀᤣ ᤌᤠᤖᤥ॥ ᤀᤠᤳᤋᤡᤸᤗᤧ ᤗᤢᤱᤎᤠᤰᤁᤡᤴ ᤗᤢ᤺ᤴᤍᤢ᤹. ᤀᤠᤶᤓᤠ ᤂᤧᤴ ᤀᤛᤣ᤺ᤰᤁᤡᤸᤗᤧ ᤀᤃᤢᤖᤥ॥

⁹ ᤗᤢᤱ ᤜᤧᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤴ ᤗᤢᤱᤅᤡᤸᤗᤧᤀᤣ ᤂᤠ᤺ᤴᤍᤢᤖᤥ॥ ᤛᤡᤱ ᤁᤧᤄᤧ᤺ᤵᤐᤠᤴ ᤛᤡᤱᤅᤡᤸᤗᤧᤀᤣ ᤂᤠ᤺ᤴᤍᤢᤖᤥ॥

¹⁰ ᤋ᤺ᤴᤍᤡᤴ ᤜᤠᤃᤧᤎ᤺ᤵᤐᤠ ᤆᤥ᤺ᤰᤁᤠᤱ ᤂᤧᤴ ᤕᤠᤖᤠᤵᤔᤠ ᤔᤣ᤺ᤴᤏᤧᤑᤃᤪ ᤂᤧᤴ ᤕᤠᤱᤔᤠᤸᤗᤧ ᤛᤠ᤹ᤖᤡᤰ ᤌᤢᤶ ᤕᤠᤰᤔᤠ ᤐᤥᤱᤗᤥ॥ ᤁᤖ ᤜᤢᤰᤆᤥ ᤘᤠ᤹ᤔᤠᤖᤧ ᤁᤢᤗᤡᤱᤍᤥ ᤀᤠᤃᤧᤳᤗᤥ॥

¹¹ ᤀᤛᤣ᤺ᤰ ᤁᤧᤍᤧᤶᤒᤧᤴ ᤀᤛᤣ᤺ᤰᤁᤧᤸᤗᤧ ᤀᤃᤢᤏᤧᤑᤃᤪ ᤂᤧᤸᤗᤧ ᤀᤛᤣ᤺ᤰᤁᤧᤴ ᤁᤢᤎᤏᤠ ᤗᤧᤱᤗ ᤕᤠ᤺ᤶᤔᤠ ᤗᤧᤛᤢᤒᤠ ᤔᤢ᤺ᤴᤎᤢᤶᤔᤡᤴ ᤌᤣ ᤀᤡᤴᤎᤠ ᤐᤥ᤺ᤰᤂᤧᤒᤣ᥅

¹² ᤛᤡᤰᤁᤢᤶᤛᤠᤒᤠᤸᤗᤧ ᤁᤢᤒᤠ᤺ᤴᤏᤡᤸᤗᤧ ᤔᤡᤱᤛᤥ ᤀᤡᤱᤎᤠᤱ ᤋᤠᤖᤢᤖᤥ ᤁᤖ ᤀᤍᤱᤅᤡᤸᤗᤧ ᤁᤢᤒᤠ᤺ᤴᤏᤡᤸᤗᤧ ᤂᤢᤏᤧ᤹ ᤀᤠᤒᤠᤅᤣ ᤔᤧᤰᤂᤢᤖᤥ॥

¹³ ᤁᤢᤜᤣ᤺ᤰᤛᤡᤱᤔᤥ ᤂᤧᤸᤗᤧ ᤀᤍᤱᤐᤠᤴ ᤐᤠ᤺ᤳᤋᤢᤖᤥ ᤁᤢᤏᤢᤵᤔᤥ ᤂᤧᤸᤗᤧ ᤁᤢᤒᤠ᤺ᤴᤏᤡᤴ ᤋᤠᤵᤑᤧ᤺ᤸᤗᤡᤰᤁᤠᤱ ᤏᤠᤱᤏᤠᤱ ᤌᤠᤵᤌᤠᤵ ᤁᤧᤗ᤹ᤒᤠ ᤐᤥᤱᤗᤥ॥

¹⁴ ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤔᤏᤠᤴ ᤆᤰᤔᤧᤸᤗ᤹ᤀᤣ ᤐᤠ᤺ᤳᤗᤥ॥ ᤁᤖ ᤋᤠᤕᤧᤶᤔᤥ ᤌᤣ ᤐᤥᤱ᤹ ᤁᤧᤗ᤹ᤒᤧᤴ ᤀᤠᤳᤋᤡᤸᤗᤧ ᤏᤡᤛᤢᤒᤣ᥅ ᤛᤡᤔᤧᤴ ᤀᤣᤃᤠᤱ ᤌᤣ ᤐᤥᤱ᤹. ᤜᤠ᤺ᤳᤗᤧᤀᤠᤱ ᤐᤠ᤺ᤵᤔᤠ ᤔᤧᤛᤢᤰᤋᤢᤴᤗᤥ॥

¹⁵ ᤀᤍᤱ ᤔᤏᤠᤴ ᤀᤠᤵᤑᤣᤰ ᤁᤢᤕᤠ᤺ᤶᤒᤰᤁᤡᤸᤗᤧ ᤏᤠᤖᤥ ᤂᤧᤸᤗᤧᤆᤥᤃᤢᤸᤗᤧ ᤕᤧᤰᤕᤰᤁᤥ ᤐᤣ᤺ᤰᤔᤠ ᤗᤠᤶᤔᤠᤱ ᤂᤧᤸᤗᤧ ᤏᤡᤔᤠ ᤔᤧᤛᤢᤰᤋᤢᤴᤗᤥ॥

¹⁶ ᤂᤧᤴ ᤗᤠᤈᤣ᤺ᤱᤃ ᤁᤢᤍ᤹ᤕᤠᤴ ᤁᤧᤓᤧᤶᤒᤠᤖᤥ. ᤂᤧᤴ ᤗᤠᤈᤣ᤹ᤒᤠ ᤜᤠᤱᤅᤡᤴ ᤗᤳᤇᤠ ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤠ ᤆᤵᤐᤪᤰᤐᤠ ᤆᤥᤰᤗᤥ. ᤜᤧᤰᤁᤩᤠᤱ ᤗᤠᤶᤗᤥᤒᤠᤜᤠ᤹ ᤏᤠᤶᤁᤧᤵᤔᤠᤏᤢ ᤛᤥᤖᤡᤰ ᤛᤠᤓ᤺ᤱᤈᤠᤀᤥ ᤔᤧᤈᤖ ᤔᤧᤎᤢᤅᤢᤖ ᤔᤧᤕᤠᤰᤗᤥ॥

¹⁷ ᤁᤖ ᤂᤧᤴ ᤗᤠᤈᤣ᤹ᤒᤠ ᤜᤠᤱᤅᤡᤴ ᤏᤢᤒᤠ ᤜᤡᤶᤛᤕᤱᤗᤠᤶᤒᤠ ᤜᤧᤰᤁᤩᤠᤱ ᤗᤠᤶᤗᤥᤒᤠᤜᤠ᤹ ᤌᤢᤶᤗᤧ ᤗᤠᤃᤡ ᤛᤢᤕᤧᤶᤔᤥᤖᤰ ᤁᤢᤈᤠ ᤔᤧᤈᤖᤥ. ᤁᤖ ᤛᤣᤈᤱᤘᤠᤴ ᤔᤧᤎᤢᤅᤢᤀᤠᤱ ᤔᤧᤶᤔᤛᤡᤱᤅᤡᤴᤗᤥ. ᤂᤧᤴ ᤗᤠᤈᤣᤴ ᤁᤢᤍ᤹ᤕᤠᤴ ᤁᤧᤏᤢ᤹ᤒᤠᤖᤥ॥

¹⁸ ᤁᤢᤗᤧᤶᤁᤧᤕᤢᤒᤠ ᤔᤏᤠ᤺ᤸᤗᤧ ᤁᤢᤜᤡᤶᤔᤡᤴ ᤘᤠᤕᤢᤖᤥ ᤜᤧᤰᤁᤩᤠᤱ ᤂᤧᤴ ᤁᤢᤜᤡᤶᤔᤡᤴ ᤕᤴᤏᤠᤱ ᤆᤥ᤺ᤴᤗᤥ॥

¹⁹ ᤛᤠᤓ᤺ᤱᤈᤠᤴ ᤆᤠᤔᤠᤸᤗᤧ ᤐᤛ᤺ᤳ ᤀᤠᤛ᤺ᤳᤗᤥ ᤜᤧᤰᤁᤩᤠᤱ ᤛᤣᤈᤱᤘᤠ᤺ᤸᤗᤧ ᤏᤡᤱᤘᤠ᤹ ᤋᤠᤛᤢᤖᤥ॥ ᤁᤖ ᤕᤠᤱᤅᤡᤸᤗᤧ ᤌᤣᤛᤠᤱ ᤂᤥᤍᤧᤳᤗᤥ॥

²⁰ ᤜᤠᤱᤅᤡᤴ ᤆᤧ᤹ᤕᤠ ᤀᤡᤱᤍᤥ ᤔᤧᤔᤧᤳᤋᤧᤴᤏᤧ᤹ᤀᤥ. ᤁᤴ ᤁᤧᤏᤡᤱᤘᤠ᤹ᤀᤥᤀᤠᤱ ᤔᤧᤀᤡ᤺ᤳᤋᤧᤴᤏᤧ᤹ᤀᤥ॥ ᤏᤧᤳᤏᤠ ᤕᤠᤰᤑᤠᤱᤅᤥᤀᤠᤱ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤏᤠᤴ ᤛᤠᤰᤔᤢᤖᤠ ᤔᤧᤔᤧᤳᤋᤧᤴᤏᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤋᤠᤱᤛᤠᤱᤎᤥᤒᤠ ᤐᤢ᤺ᤸᤗᤧ ᤀᤡᤱᤄᤱ ᤋᤣ᤹ᤖᤢᤖᤥ ᤜᤧᤰᤁᤩᤠᤱ ᤁᤧᤒᤧᤒᤠ ᤐᤢ᤺ᤸᤗᤧ ᤁᤧᤒᤠ᤺ᤴᤏᤡᤴ ᤔᤏᤠᤜᤠ᤹ ᤔᤧᤳᤋᤢᤛᤡᤖᤥ॥