ᤂᤠᤜᤢᤴᤛᤠᤒᤠ 1 - LIFOTNT

ᤁᤧᤖᤧᤰ ᤐᤠ᤺ᤴᤜᤠ᤹ ᤜᤏᤧᤒᤠ ᤆᤥᤰ

¹ ᤍᤠᤀᤢᤍᤖᤧ ᤁᤢᤛ᤻ᤛᤠ. ᤕᤖᤢᤛᤗᤧ᤺ᤶᤒᤠ ᤜᤠᤱ. ᤂᤠᤜᤢᤴᤛᤠᤒᤧᤸᤗᤧ ᤁᤢᤒᤠ᤺ᤴᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ—

² ᤂᤠᤜᤢᤴᤛᤠᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤜᤏᤧ ᤌᤣᤏᤠᤎᤣᤖᤰᤗᤥ. ᤜᤏᤧ ᤌᤣᤏᤠᤎᤣᤖᤰᤗᤥ. ᤜᤡᤱᤔᤴᤏᤡᤴ ᤜᤏᤧ ᤌᤣᤏᤠᤎᤣᤖᤰᤗᤥ. ᤁᤧᤖᤧᤰ ᤐᤠ᤺ᤴᤜᤠ᤹ ᤜᤏᤧ ᤌᤣᤏᤠᤎᤣᤖᤰᤗᤥ॥”

³ ᤔᤏᤠ᤺ᤸᤗᤧ ᤏᤠᤶᤔᤡᤸᤗᤧ ᤁᤢᤛᤡᤃᤠᤱ ᤛᤩᤠᤱᤔᤧᤴᤍᤠᤱ ᤔᤧᤈᤥᤃᤢᤒᤠ ᤂᤢᤴᤇᤡ᤹ ᤛᤡᤛᤡᤒᤠ ᤕᤠ᤺ᤶᤒᤰᤗᤠᤶ ᤌᤣ ᤁᤢᤈᤰ ᤂᤥᤛᤢᤀᤠᤱᤒᤣ᥅

⁴ ᤗᤳᤌᤡᤰ ᤌᤠ᤺ᤰ ᤐᤣ᤺ᤰᤗᤥ. ᤜᤧᤰᤁᤩᤠᤱ ᤘᤣ᤹ ᤌᤠ᤺ᤰᤁᤡᤴ ᤋᤠᤖᤥ. ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤀᤠᤓᤧᤸᤗᤧᤛᤠᤱ ᤜᤠᤒᤠ ᤏᤧᤖᤥ॥

⁵ ᤏᤠᤶᤔᤡᤴ ᤁᤧᤳᤗᤥ ᤜᤧᤰᤁᤩᤠᤱ ᤏᤠᤶᤔᤡᤴ ᤌᤠᤖᤥ. ᤂᤧᤴ ᤁᤢᤃᤧᤵᤔᤠ ᤋᤧᤴᤏᤥ ᤜᤠᤖᤠᤜᤠᤖᤠ ᤏᤢ᤺ᤱᤒᤣ᤺ᤰᤗᤥ॥

⁶ ᤛᤢᤖᤡᤳ ᤁᤣᤈᤱᤅᤡᤴ ᤕᤥ ᤗᤠᤱᤃᤧᤳ ᤗᤧᤵᤔᤠᤱ ᤜᤢᤖᤥ. ᤜᤧᤰᤁᤩᤠᤱ ᤌᤠᤱᤃᤧᤳ ᤗᤧᤵᤔᤠᤱ ᤜᤢᤎᤠᤱᤗᤥ. ᤂᤧᤴ ᤀᤠᤓᤧᤸᤗᤧᤛᤠᤱ ᤁᤢᤀᤡᤔᤠᤍᤧᤴᤏᤥ ᤏᤢ᤺ᤱᤅᤠᤱ ᤀᤡᤀᤠᤱ ᤘᤠ᤹ᤖᤥ॥

⁷ ᤁᤧᤖᤧᤰ ᤘᤜ᤺ᤱᤜᤠ᤹ ᤋᤢᤱᤃᤥᤍᤡᤱ ᤘᤖ᤺ᤱᤅᤥ ᤔᤧᤃᤢᤱ ᤔᤧᤗᤠ᤺ᤳᤗᤥ. ᤁᤖ ᤘᤖ᤺ᤱᤅᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤍᤡᤶᤏᤧᤴᤗᤥ॥ ᤀᤠᤳᤋᤡᤴ ᤋᤧᤴᤏᤥᤗᤠᤶ ᤘᤜ᤺ᤱᤜᤠ᤹ ᤔᤧᤃᤢᤱ ᤔᤧᤍᤠ᤹᤺ ᤂᤧᤴ ᤘᤜ᤺ᤱᤜᤠ᤹ ᤕᤠᤶᤔᤥ ᤂᤧᤵᤔᤥᤀᤣ ᤔᤧᤏᤢ᤺ᤱ ᤔᤧᤒᤣ᤺ᤰᤗᤥ॥

⁸ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤢᤍᤥᤂᤠᤶᤍᤥ ᤁᤧᤍᤠᤒᤠ ᤆᤥᤰᤗᤥ. ᤜᤠ᤺ᤳᤗᤧᤀᤠᤱ ᤂᤧᤴ ᤆᤧᤱᤔᤠ ᤐᤠ᤺ᤵᤔᤠ ᤔᤧᤛᤢᤰᤋᤢᤶᤒᤠ ᤆᤥᤰᤗᤥ॥ ᤏᤡᤔᤏᤠᤒᤠ ᤐᤠ᤺ᤴᤏᤡᤸᤗᤧ ᤔᤡᤰᤁᤡᤴ ᤀᤠᤓᤧᤸᤗᤧᤀᤠᤱ ᤔᤧᤄᤠᤏᤧᤴᤗᤥ. ᤀᤡᤃᤪ ᤁᤧᤄᤧᤶᤒᤠ ᤏᤧᤰᤂᤥ᤹ᤀᤡᤴᤏᤠᤱ ᤁᤢᤏᤡᤱᤘᤠ᤹ ᤔᤧᤍᤠᤏᤧᤴᤗᤥ॥

⁹ ᤌᤣ ᤐᤥ᤺ᤰᤂᤧᤀᤠᤱ ᤘᤠ᤹ ᤂᤧᤴ ᤕᤠᤶᤔᤥ ᤐᤥᤱᤗᤥ. ᤜᤧᤰᤁᤩᤠᤱ ᤌᤧᤔᤠ ᤆᤥ᤺ᤰᤔᤏᤠᤀᤠᤱ ᤘᤠ᤹. ᤕᤠᤶᤔᤥ ᤆᤥ᤺ᤰᤔᤠ ᤐᤥᤱᤗᤥ. ᤏᤠᤶᤔᤡᤸᤗᤧ ᤁᤢᤛᤡᤃᤠᤱ ᤀᤠᤳᤋᤡᤴ ᤐᤠ᤺ᤴᤏᤡᤴᤏᤠᤱ ᤁᤢᤛᤱ ᤜᤥᤵᤗᤥ॥

¹⁰ ᤔᤏᤠᤖᤧ ᤔᤧᤒᤠ᤺ᤳᤋᤢ᤹. “ᤀᤥᤔᤧᤳᤋᤧᤶᤔᤧ᤹. ᤁᤱᤃ ᤁᤢᤛᤱ ᤐᤠ᤺ᤴᤗᤥ” ᤑᤠ᤹ᤀᤠᤱ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤜᤠ᤺ᤳᤗᤧ ᤐᤠ᤺ᤵᤔᤠ ᤛᤢᤰᤋᤢᤒᤣ᥅ ᤂᤧᤱᤃ ᤀᤠᤏᤡ᤹ ᤀᤠᤘᤕᤧᤒᤠᤏᤢ᤺ᤸᤗᤧ ᤕᤖᤡᤰ ᤋᤃᤡᤀᤠᤱᤎᤥᤀᤣ ᤘᤕᤧᤖᤥ॥

¹¹ ᤀᤢᤏᤠᤜᤢᤖᤡ ᤕᤧᤶᤔᤥᤒᤠ ᤔᤏᤠᤜᤠ᤹ ᤜᤠ᤺ᤳᤗᤧᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤛᤡᤴᤗᤥ. ᤜᤧᤰᤁᤩᤠᤱ ᤀᤠᤸᤗᤛᤠᤱ ᤋᤠᤔᤠ ᤁᤧᤒᤥᤱᤒᤠ ᤌᤠ᤺ᤰᤜᤠ᤹ ᤔᤧᤘᤠ᤹ᤖᤥ. ᤂᤧᤱᤜᤠ᤹ ᤂᤢᤴᤇᤡ᤹ᤏᤢ᤺ᤸᤗᤧ ᤕᤠᤱᤛᤡ ᤁᤧᤍᤠᤒᤠ ᤌᤠ᤺ᤰᤜᤠ᤹ᤖᤧ ᤔᤧᤴᤀᤡ᤺ᤳᤋᤢᤛᤡᤴᤗᤥ॥

ᤛᤡᤰᤁᤢᤶᤏᤡᤱᤘᤠᤴ ᤌᤣᤏᤠᤎᤣᤖᤰ

¹² ᤀᤠᤱᤃᤠ᤹. ᤂᤠᤜᤢᤴᤛᤠᤒᤧᤴ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤠᤱᤅᤠᤱ ᤕᤖᤢᤛᤗᤧ᤺ᤶᤔᤥ ᤜᤠᤱᤕᤢᤰ ᤆᤥᤃᤢᤱᤅᤠᤱ ᤘᤕᤧ॥

¹³ ᤋᤠᤱᤛᤠᤱᤒᤧᤸᤗᤧ ᤁᤢᤛᤡᤃᤠᤱ ᤌᤣᤎᤣ ᤐᤥᤱᤗ ᤐᤳ ᤂᤧᤱᤜᤠ᤹ ᤁᤧᤖᤧᤰ ᤛᤡᤰᤁᤢᤶ ᤏᤡᤱᤘᤠ᤹ᤗᤠᤶ ᤏᤡ᤺ᤵᤔᤠ ᤏᤢ ᤁᤥ᤺ᤶᤓᤥ ᤆᤥ᤺ᤰᤔᤠ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤏᤡ᤺ᤴᤎᤥ ᤆᤥᤃᤢᤱ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠ᤹ᤖᤡᤰ ᤕᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤗᤰᤐᤧᤴ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤐᤡᤖᤢᤛᤡᤀᤠᤱ ᤘᤠ᤹᥄

¹⁴ ᤏᤠᤶᤔᤡᤸᤗᤧ ᤁᤢᤛᤡᤃᤠᤱ ᤆᤥ᤺ᤰᤔᤏᤠᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤀᤠᤱᤃᤠ᤹ ᤏᤡᤛᤢᤱᤅᤠᤱ ᤘᤠ᤹॥ ᤂᤧᤱᤜᤠ᤹ ᤁᤧᤖᤧᤰ ᤜᤏᤧ ᤌᤣᤏᤠᤎᤣ ᤛᤠᤶᤔᤡ᤺ᤳ ᤁᤣᤈᤱᤅᤡᤴ ᤏᤠ᤺ᤵᤔᤏᤠᤒᤠ ᤜᤧᤰᤁᤣᤖᤰᤗᤥ॥

¹⁵ ᤀᤠᤳᤋᤡᤴ ᤐᤠ᤺ᤴᤏᤡᤴ ᤀ᤺ᤰᤂᤢ᤹ᤂᤢ᤹ᤒᤠ ᤆᤥᤰ. ᤂᤧᤴ ᤋᤥ᤺ᤴᤍᤥᤶᤒᤠ ᤆᤥ᤺ᤰᤔᤠ ᤛᤢᤰᤔᤧᤍᤧᤳᤏᤧᤴᤗᤥ. ᤀᤠᤳᤋᤡᤴ ᤐᤠ᤺ᤴᤏᤡᤴ ᤜᤥᤵ. ᤂᤧᤴ ᤏᤡᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥

¹⁶ ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤏᤡᤱᤘᤠ᤹ᤀᤥ ᤀᤡ᤺ᤳᤋᤢᤱ. “ᤀᤥᤔᤧᤳᤋᤧᤛᤠ᤹ᤖᤧ. ᤀᤠᤱᤃᤠ᤹ᤏᤢ᤺ᤸᤗᤧ ᤋᤃᤡ ᤕᤖᤢᤛᤗᤧ᤺ᤶᤔᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠ ᤀᤠᤳᤋᤡᤴᤏᤢ᤺ᤸᤗᤧ ᤕᤖᤡᤰ ᤀᤠᤱᤃᤠ᤹ ᤛᤡᤰᤁᤢᤶ ᤏᤡᤱᤘᤠ᤹ ᤕᤠᤱᤄᤥ᤺ᤳᤋᤢᤱᤅᤠᤱ ᤘᤠ᤹॥ ᤛᤡᤰᤁᤢᤶ ᤏᤡᤱᤘᤠ᤹ ᤏᤢ ᤏᤧᤜᤡᤏᤡᤱᤘᤠ᤹ᤀᤥ ᤀᤠᤱᤃᤠ᤹ ᤕᤖᤡᤰ ᤁᤧᤗᤧᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹॥”

¹⁷ ᤂᤧᤒᤩᤠᤱ ᤀᤠᤱᤃᤠ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤁᤢᤛᤡᤱ ᤏᤡ᤺ᤵᤔᤠᤖᤧ ᤗᤠᤃᤡ ᤜᤧᤰᤁᤩᤠᤱ ᤏᤠᤱᤏᤠᤱ ᤌᤠᤵᤌᤠᤵ ᤗ᤹ᤔᤠᤴ ᤏᤢ ᤀᤍᤱ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥᤔᤠᤖᤧ ᤗᤠᤃᤡ ᤏᤡᤱᤘᤠ᤹ ᤐᤡᤖᤢᤱ॥ ᤁᤖ ᤁᤴᤏᤠᤱ ᤛᤠᤶᤔᤡ᤺ᤳ ᤁᤣᤈᤱᤅᤡᤴ ᤏᤠ᤺ᤵᤔᤏᤠᤒᤠ ᤜᤧᤰᤁᤣᤖᤰ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱ॥

¹⁸ ᤌᤣᤀᤠᤱᤓᤧᤸᤗᤧ ᤕᤖᤡᤰ ᤛᤡᤰᤁᤢᤶᤏᤡᤱᤘᤠ᤺ᤸᤗᤧ ᤕᤖᤡᤰ ᤋᤢᤰᤂᤣ ᤋᤠᤖᤢᤖᤥ. ᤕᤖᤡᤰ ᤏᤧᤜᤡᤏᤡᤱᤘᤠ᤺ᤸᤗᤧ ᤕᤖᤡᤰ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤠ ᤐᤠ᤺ᤴ ᤋᤠᤖᤥ॥