ᤛᤠᤶᤕᤥᤌᤡᤶ ᤀᤡᤱ 9 - LIFOTNTᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤡᤱᤈᤠᤱ ᤔᤧᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴ 1 ᤀᤡᤛᤪᤠᤀᤡᤗᤡᤛᤣ. ᤂᤧᤵᤛᤧᤶᤔᤧ᤹᥄ ᤂᤡᤏᤡ᤹ᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤢ ᤔᤢᤰᤛᤠᤶᤛᤠᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤀᤡᤴ ᤂᤡᤏᤡ᤹ ᤕᤷᤍᤏ ᤏᤠᤎᤠ᤺ᤶᤒᤡ ᤁᤧᤒᤣᤃᤡᤖ ᤁᤧᤒᤳᤇᤡ॥ ᤂᤧᤱᤜᤠ᤹ ᤋᤠᤱᤛᤠᤱᤒᤠ ᤁᤧᤍᤰᤐᤠ ᤗᤢᤱᤎᤠᤰᤜᤠ᤹ᤖᤧ ᤌᤣ᤺ᤰᤋᤢᤒᤠ ᤕᤧᤰᤕᤰᤜᤠ᤹ᤀᤥ ᤔᤧᤕᤢᤱ᤹᥄ 2 ᤂᤧᤵᤔᤥᤒᤠ ᤔᤏᤠᤜᤠ᤹ᤃ ᤀᤏᤠᤁᤡᤛᤡᤖᤥ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤂᤡᤏᤡ᤹ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹॥ ᤂᤧᤱᤜᤠ᤹ ᤁᤧᤎᤢᤶᤒᤠ ᤏᤢ ᤁᤣ᤺ᤶᤒ ᤁᤣ᤺ᤶᤒᤠ ᤔᤧᤈᤥᤰ॥ ᤂᤡᤏᤡ᤹ ᤀᤰᤋᤱᤒᤠ ᤐᤠᤴ ᤁᤧᤄᤧᤵᤛᤢᤶᤔᤠᤱ ᤘᤠ᤹. “ᤀᤏᤠᤁᤡᤜᤠ᤹ᤖᤧ ᤂᤢᤴᤇᤡ᤹ ᤐᤣᤛᤠᤱ ᤜᤠᤳ ᤕᤧᤵᤔᤠ ᤛᤢᤰᤐᤣ᥅” 3 ᤁᤖ ᤀᤠᤀᤡᤴ ᤁᤴ ᤐᤠ᤺ᤴᤏᤡᤴ ᤛᤧᤰᤂᤠᤀᤣ ᤁᤢᤛᤡᤱ ᤏᤡ᤺ᤳᤋᤧᤶ ᤕᤢᤰᤂᤧᤶᤔᤧ᤹. ᤂᤠᤵᤐᤢᤌᤩ᤺ᤱ ᤀᤠᤔᤧᤱᤔᤧᤱᤒᤠ ᤔᤡᤎᤢᤱ ᤔᤡᤖᤠ᤺ᤰ ᤁᤢᤀᤡᤛᤡᤰ ᤂᤡᤏᤡ᤹ ᤋᤃᤠᤱ ᤋᤃᤠᤱ ᤁᤧᤒᤣ᤺ᤰᤐᤠ ᤕᤜᤘᤣ ᤍᤠᤱᤒᤠᤴ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣᤖᤥ॥ ᤂᤢᤏᤧ᤹ ᤂᤧᤱᤜᤠ᤹ ᤕᤢᤔᤪᤧᤰ ᤔᤧᤰᤂᤢᤛᤡ᤹ ᤂᤧᤒᤩᤠᤱ ᤂᤡᤏᤡ᤹ ᤕᤢᤰᤁᤥ ᤋᤠᤖᤢᤛᤡ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ᤏᤢ ᤔᤠᤱᤜᤢᤵ ᤆᤥᤃᤢᤒᤠ ᤜᤧᤰᤁᤣᤀᤣ ᤂᤡᤏᤡ᤹ ᤂᤧᤱᤜᤠ᤹ ᤁᤧᤏᤠ᤺ᤳᤋᤢᤶ ᤁᤧᤍᤣᤛᤢᤶᤛᤡᤶᤔᤠᤱ ᤜᤠᤖᤠᤀᤣ ᤁᤧᤔᤧᤰᤂᤢᤶᤛᤡᤶ᤹॥ 4 ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤋᤃᤡᤗᤠᤶ ᤂᤧᤱᤜᤠ᤹ ᤗ᤺ᤳᤋᤢᤍᤣ᤹ᤖᤢᤛᤡ ᤛᤢᤖᤢᤛᤡᤀᤠᤱ ᤂᤡᤏᤡ᤹ ᤏᤡᤱᤘᤠ᤹ᤀᤥ ᤀᤰᤂᤣ ᤔᤧᤒᤠ᤺ᤳᤋᤧᤶᤔᤡᤴᤏᤧ᤹. “ᤀᤠᤏᤡ᤹ ᤛᤠᤶᤕᤥᤒᤠ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧᤀᤣ ᤁᤴ ᤗᤠᤈᤣᤴ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡ᤹ ᤀᤠᤍᤠᤖᤧᤒᤠᤖᤥ॥” ᤐᤖᤢᤔᤠᤸᤗᤧ ᤁᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤀᤠᤏᤡ᤹ ᤋᤃᤡᤗᤠᤶ ᤏᤠ᤺ᤳᤋᤢᤍᤣᤛᤢᤛᤡ᤹॥ 5 ᤂᤡᤏᤡ᤹ ᤛᤠᤶᤕᤥᤒᤠ ᤕᤠ᤺ᤶᤒᤰ ᤀᤡᤃᤪ ᤁᤢᤍᤥ᤺ᤵᤔᤠ ᤁᤧᤈᤥᤃᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤈᤣᤴ ᤕᤢᤰ ᤆᤥ᤺ᤰᤔᤠᤖᤧ ᤂᤡᤏᤡ᤹ ᤗᤠ᤺ᤵᤔᤠ ᤁᤧᤀᤡ᤺ᤳᤋᤡᤒᤠ ᤔᤣ᤺ᤴ॥ ᤁᤖ ᤁᤴ ᤔᤧᤴᤇᤠᤶ ᤛᤢᤘᤠᤜᤠ᤹ᤖᤧ ᤂᤢᤏᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤌᤠ᤺ᤰᤌᤧᤒᤠ ᤀᤒᤪᤠᤜᤠᤔ. ᤀᤡᤛᤜᤠᤁ ᤜᤧᤰᤁᤩᤠᤱ ᤕᤠᤁᤢᤒᤧᤴᤏᤢ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤁᤧᤵᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴᤜᤠ᤹ ᤂᤡᤏᤡ᤹ ᤋᤃᤡᤗᤠᤶ ᤗ᤺ᤳᤋᤢᤍᤣᤛᤢᤛᤡ᤹॥ 6 ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤜᤧᤳᤋᤠᤛᤡᤶᤔᤧ᤹. ᤂᤡᤏᤡ᤹ ᤛᤠᤶᤕᤥᤒᤠ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤁᤴ ᤏᤢᤒᤠ ᤗᤠᤈᤣᤴ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤕᤢᤰᤁᤥ ᤐᤡᤔᤠ ᤁᤧᤈᤥᤃᤡᤒᤠ ᤔᤣ᤺ᤴ॥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤔᤏᤠᤏᤡᤱᤗᤥ॥ ᤛᤠᤶᤔᤩᤠᤱ ᤏᤠᤘᤠᤀᤡᤳᤗᤠ 7 ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤀᤠᤰᤂᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤠᤰᤁᤧᤴ ᤁᤧᤓᤥ᤺ᤰᤂᤢᤶ. ᤁᤴ ᤐᤠ᤺ᤴᤏᤡᤴ ᤂᤡᤏᤡ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹॥ ᤔᤡᤛᤪᤗᤠᤶ ᤁᤧᤗ᤺ᤴᤍᤡᤒᤠ ᤕᤧᤴᤏᤠᤱᤎᤥ ᤁᤴ ᤋᤧᤴᤏᤥ ᤁᤧᤃᤧᤖᤡ ᤁᤧᤓᤧᤖᤡᤒᤠ ᤌᤠᤖᤡᤰᤗᤧ ᤂᤡᤏᤡ᤹ ᤕᤜᤘᤣ ᤍᤠᤱᤒᤧᤴ ᤜᤠᤒᤠ ᤁᤧᤀᤳᤋᤢᤶᤔᤠᤱᤅᤣ ᤁᤧᤒᤳᤇᤡ᤹॥ 8 ᤜᤥᤖᤧᤒᤀᤥᤀᤠᤱ ᤕᤜᤘᤣ ᤍᤠᤱᤒᤧᤴ ᤂᤡᤏᤡ᤹ ᤁᤢᤛᤠᤰᤁᤧᤴ ᤁᤧᤓᤥ᤺ᤰᤂᤢᤶ. ᤜᤧᤰᤁᤩᤠᤱ ᤂᤡᤏᤡ᤹ ᤕᤢᤔᤪᤧᤰ ᤔᤧᤱᤔᤠᤏᤡᤱ ᤌᤠᤖᤡᤰ ᤕᤜᤘᤣ ᤍᤠᤱᤒᤠᤴ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧᤀᤠᤱ ᤘᤕᤧ॥ 9 ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ᤏᤢ ᤆᤥᤃᤢᤒᤠ ᤔᤠᤱᤜᤢᤵ ᤁᤧᤒᤵᤐᤠ ᤛᤠᤵᤗᤢᤱᤜᤠ᤹ ᤕᤢ᤺ᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤁᤥ᤺ᤰᤔᤠ ᤑᤠᤱᤈᤱᤅᤥ ᤀᤠᤱᤃᤠ᤹ ᤌᤠ᤺ᤱ ᤌᤥ᤺ᤰᤛᤡᤱ ᤐᤣᤃᤠᤱᤅᤠᤱ ᤘᤕᤠᤱ. ᤂᤧᤒᤩᤠᤱ ᤀᤠᤱᤃᤠ᤹ ᤂᤧᤴ ᤁᤥ᤺ᤰᤔᤠ ᤑᤠᤱᤈᤱᤅᤥ ᤛᤧᤴᤍᤡᤰ ᤗᤧᤴᤍᤡᤰ ᤗᤡᤒᤥᤱ ᤕᤧᤴ ᤌᤠᤖᤡᤰ ᤘᤕᤠᤱ॥ ᤀᤠᤱᤃᤠ᤹ ᤂᤖᤧ᤺ᤱ ᤀᤡᤃᤪ ᤆᤫᤠ᤺ᤳ ᤔᤧᤴᤈᤠᤒᤠ ᤔᤧᤴᤎᤢᤱᤒᤠ॥ 10 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤢᤰᤁᤡᤸᤗᤧ ᤛᤠᤵᤋᤢᤒᤠ ᤛᤠᤵᤗᤢᤱ ᤏᤧᤳᤇᤡ ᤀᤠᤱᤃᤠ᤹ ᤜᤢᤰᤛᤢᤵᤋᤠᤱ॥ ᤁᤥ᤺ᤰᤔᤠ ᤑᤠᤱᤈᤱ ᤛᤶᤎᤠᤱ ᤔᤡᤎᤢᤱ ᤔᤡᤖᤠ᤺ᤰᤗᤢᤶᤔᤥ ᤆᤢᤶᤓᤥ᤺ᤸᤗᤧ ᤕᤠ᤺ᤴᤍᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤐᤡᤖᤠᤱᤒᤠ ᤁᤧᤖᤧᤰ ᤀᤡᤱᤈᤠᤱᤜᤠ᤹ ᤂᤧᤵᤔᤥ ᤐᤳᤇᤧ॥ 11 ᤕᤜᤘᤣ ᤍᤠᤱᤒᤧᤸᤗᤧ ᤗᤡᤒᤥᤱ ᤕᤧᤴ ᤏᤢ ᤗᤡᤒᤥᤱ ᤛᤧᤴᤍᤡᤰ ᤁᤢᤏᤢᤵᤔᤥ ᤔᤠᤱᤜᤢᤵᤐᤥᤒᤠ ᤂᤧᤴ ᤏᤧᤳᤇᤡ ᤛᤠᤵᤗᤢᤱᤜᤠ᤹ ᤀᤠᤱᤃᤠ᤹ ᤐᤡᤖᤠᤱ॥ 12 ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤐᤥᤃᤧ᤹. ᤂᤡᤔᤥ ᤁᤵᤔᤥᤏᤢ ᤕᤥ ᤌᤠᤛᤡᤱ ᤐᤣᤃᤧ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤔᤡᤛᤪᤗᤠᤶ ᤁᤧᤓᤧᤳᤋᤢᤛᤡᤒᤠ ᤂᤧᤏᤧ᤹ ᤁᤧᤔᤏᤠᤜᤠ᤹ ᤑᤧᤳᤔᤧᤗᤠ᤹ᤖᤧᤀᤠᤱ ᤔᤧᤘᤠ᤹॥ ᤀᤠᤱᤃᤠ᤹ ᤂᤧᤱᤜᤠ᤹ ᤘᤠ᤹ᤔᤠᤖᤧ ᤗᤠᤃᤡ ᤐᤡᤖᤢᤱᤛᤡᤱᤒᤠ ᤀᤡᤱᤈᤠᤱᤅᤥᤗᤠᤶ ᤂᤧᤱᤜᤠ᤹ ᤀᤠᤰᤂᤧᤴ ᤜᤠᤖᤠ ᤔᤧᤏᤢ᤺ᤰᤂᤧ ᤔᤧᤒᤣ᥄ ᤜᤧᤰᤁᤩᤠᤱ ᤔᤧᤕᤥᤴᤍᤢᤀᤠᤱ ᤂᤢᤴᤇᤡ᤹ ᤗᤠᤃᤡ ᤗᤳᤇᤠ ᤏᤠᤘᤠᤀᤡᤳᤗᤠ ᤔᤧᤈᤥᤃᤢᤀᤠᤱ ᤘᤠ᤹᥄” 13 ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣᤀᤠᤱ ᤔᤧᤳᤋᤠᤱ. “ᤀᤠᤱᤃᤠ᤹ ᤁᤴ ᤔᤏᤠᤜᤠ᤹ ᤀᤥᤔᤧᤳᤋᤢᤱᤛᤡᤱ. ᤜᤧᤰᤁᤩᤠᤱ ᤁᤴᤜᤠ᤹ᤃ ᤛᤠ᤹ᤖᤡᤰ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤔᤏᤠᤛᤡᤖᤧᤳᤇ॥ 14 ᤀᤠᤸᤗ ᤀᤠᤱᤃᤠ᤹ ᤗᤧᤖᤠᤱᤍᤣᤛᤠᤱᤅᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤴᤜᤠ᤹ ᤜᤍ᤹ ᤔᤧᤰᤂᤢᤱᤛᤡᤱ᤹. ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤅᤡᤴ ᤛᤠᤱᤃᤪᤠᤶᤐᤣᤍᤠᤱ ᤛᤡᤃᤠᤱᤗᤠᤶ ᤔᤠᤛᤢᤱ ᤐᤡᤖᤢᤱᤛᤡᤱ᤹॥ ᤜᤧᤰᤁᤩᤠᤱ ᤂᤧᤏᤧ᤹ ᤗᤠᤶᤒᤠᤀᤣ ᤂᤧᤱᤜᤠ᤹ᤏᤢ᤺ᤸᤗᤧ ᤔᤢᤰᤁᤧᤃᤢᤒᤠ ᤏᤢ ᤕᤖᤡᤰ ᤁᤧᤕᤥᤒᤠ ᤔᤧᤴᤇᤠᤶ ᤛᤢᤘᤠᤱ ᤆᤥᤃᤢᤱᤛᤡᤱ᤹॥” 15 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤜᤡᤸᤗᤡᤰ ᤜᤡᤛᤡᤱᤅᤠᤱ ᤜᤧᤰᤁᤩᤠᤱ ᤁᤥ᤺ᤰᤔᤠ ᤑᤠᤱᤈᤱᤅᤥᤗᤠᤶ ᤕᤥ ᤌᤩᤠᤱ॥ ᤂᤧᤴ ᤕᤧᤶᤔᤥ ᤁᤥ᤺ᤰᤔᤠ ᤑᤠᤱᤈᤱᤅᤡᤴ ᤔᤡᤎᤢᤱᤍᤡᤱ ᤔᤡᤖᤠ᤺ᤰᤁᤧᤸᤗᤧ ᤋᤡᤖᤧᤀᤠᤱ ᤕᤢᤅᤧ. ᤜᤧᤰᤁᤩᤠᤱ ᤋᤃᤠᤱ ᤏᤢ ᤀᤣᤃᤠᤱ ᤏᤧᤵᤔᤠᤱ ᤗᤧᤵᤔᤠᤱ ᤛᤠᤵᤔᤏᤠᤒᤠ ᤔᤠᤱᤜᤢᤵᤐᤡᤸᤗᤧᤴ ᤏᤧᤳᤇᤡ ᤛᤠᤵᤗᤢᤱᤜᤠ᤹ ᤀᤠᤱᤃᤠ᤹ ᤀᤠᤜᤢᤰᤁᤥ ᤘᤕᤧ॥ 16 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤡᤏᤡ᤹ ᤗᤠᤕᤥ ᤁᤧᤈᤥᤃᤢᤶᤒᤠ ᤏᤡᤛᤢᤱ ᤂᤧᤒᤩᤠᤱ ᤂᤡᤏᤡ᤹ ᤀᤠᤵᤑᤣᤰ ᤗᤠᤃᤡ ᤁᤧᤕᤥ᤺ᤴᤍᤢᤶᤔᤠᤱ ᤗᤳᤇᤠ ᤐᤡᤳᤛᤠᤳ ᤏᤠᤘᤠᤀᤡᤳᤗᤠ ᤁᤧᤈᤥᤃᤢᤶ॥ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤁᤧᤒᤡᤖᤡᤒᤠ ᤀᤡᤱᤈᤠᤱᤗᤠᤶ ᤁᤶᤓᤩᤠᤖᤡᤰ ᤜᤠᤖᤠ ᤌᤡᤰᤏᤠᤜᤠᤱ ᤁᤧᤏᤢ᤺ᤰᤂᤡ ᤁᤧᤒᤣᤃᤡᤀᤠᤱ ᤁᤧᤘᤕᤡ॥ 17 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤴ ᤏᤧᤵᤔᤠᤱ ᤛᤠᤵᤗᤢᤱᤜᤠ᤹ ᤕᤠᤱᤛᤡᤱᤅᤠᤀᤠᤱ ᤀᤠᤜᤢᤰᤁᤥᤗᤠᤶ ᤗᤠᤵᤑᤣᤛᤢᤱ ᤜᤧᤰᤁᤩᤠᤱ ᤂᤡᤏᤡ᤹ ᤔᤡᤰ ᤋᤃᤡᤀᤣ ᤐᤰᤁᤪᤧ᤹ ᤐᤰᤁᤪᤧ᤹ ᤜᤧᤖᤢᤱ॥ 18 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤰᤛᤠᤀᤥ ᤂᤡᤏᤡ᤹ ᤑᤧᤴᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱ ᤂᤡᤏᤡ᤹ ᤁᤧᤖᤧᤰ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤛᤠᤰᤁᤧᤴ ᤁᤧᤓᤥ᤺ᤰᤂᤢᤶ॥ ᤂᤧᤸᤗᤧᤆᤥᤃᤢᤸᤗᤧ ᤋᤃᤡᤒᤠ ᤜᤧᤰᤁᤣ ᤛᤧᤴᤍᤡᤰ ᤗᤧᤴᤍᤡᤰ ᤗᤡᤒᤥᤱ ᤕᤧᤴ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤗᤧᤶᤒᤧᤳ ᤏᤧᤛ᤻ᤛᤠᤱᤃᤖᤠᤱ॥ ᤀᤠᤱᤃᤠ᤹ ᤂᤖᤧ᤺ᤱ ᤀᤡᤃᤪ ᤆᤫᤠ᤺ᤳ ᤔᤧᤴᤈᤠᤒᤠ ᤔᤧᤴᤎᤢᤱᤒᤠ॥ 19 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰ ᤐᤥ᤺ᤰᤔᤠ ᤏᤢ ᤁᤢᤕᤠ᤺ᤰᤗᤧ᤹ᤔᤠᤗᤠᤶ ᤀᤠᤱᤃᤠ᤹ ᤁᤡᤛᤠᤱ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤕᤢᤔᤪᤧᤰ ᤔᤧᤱᤔᤠ ᤌᤠᤖᤡᤰ ᤂᤢᤏᤧ᤹ ᤁᤢᤕᤠ᤺ᤰᤗᤧ᤹ᤖᤧᤀᤠᤱ ᤘᤕᤧ॥ ᤁᤖ ᤁᤴᤇᤢᤔᤥᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤠᤒᤣᤗᤡᤴ ᤂᤧᤵᤛᤢ॥ 20 ᤜᤠᤖᤢᤏᤧᤴᤏᤠᤱ ᤔᤧᤱᤔᤠ ᤕᤠᤖᤡᤰ ᤕᤜᤘᤣ ᤍᤠᤱᤒᤧᤴ ᤂᤢᤏᤧ᤹ᤏᤢ ᤁᤢᤕᤠ᤺ᤰᤗᤧ᤹ᤖᤧᤀᤠᤱ ᤘᤕᤧ. ᤁᤖ ᤀᤠᤱᤃᤠ᤹ ᤂᤧᤴ ᤕᤧᤶᤔᤥ ᤜᤠᤖᤢᤏᤖᤧ ᤁᤢᤗᤠᤃᤡᤀᤠᤱ ᤐᤣᤗᤡ ᤑᤠᤰᤋᤢᤱ॥ 21 ᤂᤧᤴ ᤀᤣᤃᤠᤱ ᤀᤠᤱᤃᤠ᤹ ᤂᤡᤏᤡ᤹ ᤗᤠᤕᤥᤒᤠ ᤆᤡᤃᤰᤘᤠ. ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤂᤧᤴ ᤐᤡᤳᤛᤠᤳᤋᤧᤴ ᤕᤠᤱᤛᤡᤱᤅᤠᤀᤠᤱ ᤔᤡᤀᤥ ᤔᤡᤎᤡᤰᤂᤢᤱ ᤜᤧᤰᤁᤩᤠᤱ ᤂᤧᤴ ᤑᤕ᤺ᤵᤑᤕ᤺ᤵ ᤕ᤺ᤵᤛᤢᤱᤅᤠᤱ ᤁᤢᤶᤈᤡᤰᤔᤠ ᤆᤥᤃᤢᤱ. ᤂᤶᤓᤩᤠᤱ ᤂᤧᤴ ᤁᤢᤶᤈᤡᤰᤔᤠᤴ ᤁᤥ᤺ᤰᤔᤠ ᤑᤠᤱᤈᤱᤅᤥᤏᤢ ᤁᤧᤎᤠᤒᤠ ᤘᤜ᤺ᤱᤅᤥ ᤗᤠᤵᤑᤣᤛᤢᤱ ᤁᤣ᤺ᤳᤋᤢᤱ॥ 22 ᤋᤒᤣᤖᤠ. ᤔᤛ᤻ᤛᤠ ᤏᤢ ᤁᤡᤒᤪᤥᤌ-ᤜᤳᤋᤠᤘᤠᤀᤥᤀᤠᤱ ᤕᤜᤘᤣ ᤍᤠᤱᤒᤠᤴ ᤂᤡᤏᤡ᤹ ᤛᤠ᤹ᤖᤡᤰ ᤁᤢᤛᤡᤰ ᤁᤧᤓᤥ᤺ᤰᤂᤢᤶ॥ 23 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤠᤍᤣᤛ-ᤒᤷᤏᤣᤗᤠᤶ ᤂᤡᤏᤡ᤹ ᤀᤰᤂᤣ ᤁᤧᤔᤧᤳᤋᤡᤀᤠᤱ ᤁᤧᤒᤠᤱᤄᤡ. “ᤂᤡᤏᤡ᤹ ᤐᤣᤃᤧᤶᤔᤧ᤹ᤀᤠᤱ ᤀᤠᤱᤃᤠ᤹ ᤂᤡᤏᤡ᤹ ᤐᤡᤏᤡᤱᤒᤠ ᤗᤠᤈᤣᤴ ᤕᤢᤰ ᤆᤥᤃᤧᤶᤔᤧ᤹॥” ᤁᤖ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤁᤧᤀᤳᤋᤢᤶ. ᤂᤧᤒᤩᤠᤱ ᤂᤡᤏᤡ᤹ ᤂᤢᤏᤧ᤹ ᤁᤢᤏᤠ ᤁᤧᤴᤇᤠ᤹ᤖᤢᤶᤔᤡᤴ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤒᤠ᤺ᤴᤏᤠᤱ ᤁᤧᤱᤄᤧᤵᤛᤢᤶᤔᤡᤴ॥ 24 ᤀᤠᤱᤃᤠ᤹ ᤂᤡᤏᤡ᤹ ᤁᤢᤛᤡᤱ ᤏᤡ᤺ᤳᤏᤡᤱᤒᤠ ᤕᤧᤴᤏᤠᤱᤎᤥᤀᤣ ᤂᤡᤏᤡ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤘᤕᤡ॥ 25 ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤔᤧᤱᤔᤠ ᤐᤠᤴ ᤐᤠ᤺ᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤀᤠᤱᤃᤠ᤹ ᤗᤡᤒᤥᤱ ᤕᤧᤴ ᤛᤧᤴᤍᤡᤰ ᤗᤧᤴᤍᤡᤰ ᤏᤧᤛ᤻ᤛᤠᤱᤃᤖᤠᤱ॥ 26 ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ ᤐᤣᤗᤡ ᤑᤠᤰᤋᤢᤱᤅᤠᤱ ᤔᤧᤳᤋᤢᤱ. “ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤕᤶᤒᤠ ᤁᤧᤔᤢᤰᤛᤠᤶᤔᤥᤗᤠᤶ ᤁᤧᤛᤧᤴᤍᤢᤛᤡᤀᤠᤱ ᤔᤢᤰᤛᤠᤶᤛᤠᤒᤠ ᤁᤧᤜᤢᤰᤗᤠᤶ ᤔᤡᤛᤪᤗᤠᤶ ᤁᤧᤗ᤺ᤳᤋᤢ ᤁᤧᤓᤧᤳᤋᤢᤛᤡᤒᤠ ᤂᤧᤏᤧ᤹ ᤁᤧᤔᤏᤠᤜᤠ᤹ ᤏᤢ ᤂᤧᤏᤧ᤹ ᤀᤠᤵᤑᤣᤰ ᤁᤧᤗᤰᤂᤥᤒᤠᤜᤠ᤹ ᤔᤧᤔᤧᤰᤂᤧᤛᤧᤴᤏᤧ᤹॥ 27 ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤛᤧ᤹॥ ᤁᤴ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤐᤠᤴ ᤔᤧᤱᤄᤧᤶᤔᤠ. ᤑᤧᤴᤕᤠ᤺ᤶᤒᤰ ᤏᤢ ᤗᤠᤕᤥᤜᤠ᤹ ᤀᤥᤔᤧᤔᤧᤳᤋᤧᤴᤏᤧ᤹. 28 ᤔᤣ᤺ᤴᤏᤧᤓᤃᤪ. ᤂᤧᤏᤧ᤹ ᤀᤠᤏᤡᤃᤣ ᤕᤠᤵᤔᤡ ᤁᤧᤗ᤺ᤳᤋᤧ ᤁᤧᤓᤧᤳᤋᤧᤒᤠ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. ‘ᤕᤜᤘᤣ ᤍᤠᤱᤒᤧᤸᤗᤧ ᤔᤠᤱᤜᤢᤵ ᤆᤥᤃᤢᤒᤠ ᤗᤠᤈᤣ᤹ᤀᤥ ᤂᤧᤱᤜᤠ᤹ ᤋᤣ᤹ᤔᤠ ᤔᤧᤛᤢᤰᤋᤢᤛᤡᤴᤒᤠ ᤏᤢ ᤂᤧᤱᤜᤠ᤹ ᤆᤡ᤺ᤳᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤢᤏᤧ᤹ ᤂᤧᤱᤜᤠ᤹ ᤛᤧᤳᤇᤧ ᤋᤣ᤹ᤖᤢᤛᤡ॥’ 29 ᤁᤖ ᤂᤧᤏᤧ᤹ ᤕᤶᤒᤠ ᤁᤧᤔᤢᤰᤛᤠᤶ ᤏᤢ ᤀᤠᤵᤑᤣᤰ ᤁᤧᤜᤢᤰᤁᤡᤴ ᤁᤧᤛᤴᤇᤢᤀᤠᤱ ᤁᤧᤗ᤺ᤳᤋᤢ ᤁᤧᤓᤧᤳᤋᤢᤛᤡᤒᤠ ᤂᤧᤱᤜᤠ᤹ ᤂᤧᤏᤧ᤹ ᤁᤧᤔᤏᤠ ᤏᤢ ᤂᤧᤏᤧ᤹ ᤀᤠᤵᤑᤣᤰ ᤁᤧᤕᤠᤱᤛᤠ ᤁᤢᤴᤎᤣᤛᤡᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.