ᤛᤠᤶᤕᤥᤌᤡᤶ ᤀᤡᤱ 8 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤢᤵ ᤆᤥᤃᤢᤒᤠ ᤗᤠᤈᤣ᤹

¹ ᤀᤠᤱᤃᤠ᤹ ᤂᤡᤏᤡ᤹ ᤐᤡᤏᤡᤱᤗ ᤐᤳᤋᤠᤒᤠ ᤁᤧᤖᤧᤰ ᤀᤡᤱᤈᤠᤱᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤁᤢᤜᤡᤱᤘᤧᤳ ᤘᤠ᤹ᤔᤠ ᤁᤧᤛᤢᤰᤋᤡᤖ ᤜᤧᤰᤁᤩᤠᤱ ᤕᤖᤡᤰ ᤐᤥ᤺ᤶᤔᤠ ᤌᤧ᤹ᤔᤠ ᤁᤧᤛᤢᤰᤋᤡᤖ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤔᤠᤱᤜᤧᤰᤋᤢᤛᤡᤀᤠᤱ ᤔᤠᤱᤜᤢᤵ ᤆᤥᤃᤢᤒᤠ ᤗᤠᤈᤣᤴ ᤂᤡᤏᤡ᤹ ᤐᤣ᤺ᤰᤔᤠᤀᤠᤱ ᤕᤢᤰ ᤆᤥ᤺ᤰᤔᤠ ᤁᤧᤛᤢᤰᤋᤢᤶᤗ॥

² ᤂᤡᤏᤡ᤹ ᤏ᤺ᤶᤏ᤺ᤶᤒᤠ ᤆᤥ᤺ᤰᤔᤠᤖᤧ ᤗᤠᤃᤡ. ᤏᤡᤱᤘᤠ᤹ ᤛᤠ᤹ᤔᤠᤖᤧ ᤗᤠᤃᤡ ᤏᤢ ᤂᤢᤏᤧ᤹ ᤁᤢᤀᤡᤱᤈᤠ᤺ᤱᤅᤡᤴ ᤂᤡᤏᤡ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤏᤡᤱᤘᤠ᤹ ᤁᤧᤃᤳᤋᤢᤶᤒᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤵᤔᤠᤖᤧ ᤗᤠᤃᤡ ᤁᤴ ᤗᤡᤒᤥᤱ ᤋᤱᤒᤣ ᤌᤠᤖᤡᤰᤐᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤗᤠᤶᤍᤡ᤺ᤰᤁᤥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤀᤠᤰᤂᤣᤗ᤹ᤖᤡᤰ ᤗᤠᤶᤃᤧᤗᤥᤛᤡ. ᤂᤧᤴ ᤂᤡᤏᤡ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹॥

³ ᤂᤢᤏᤧ᤹ ᤂᤡᤏᤡ᤹ ᤏ᤺ᤶᤏ᤺ᤶᤒᤠ ᤆᤥ᤺ᤰᤔᤠᤖᤧ ᤗᤠᤃᤡ ᤛᤠᤰᤁᤡᤸᤗᤧ ᤁᤧᤍᤖᤡᤖ ᤁᤧᤕᤠ᤺ᤴᤍᤡ. ᤜᤧᤰᤁᤩᤠᤱ ᤂᤢᤏᤧ᤹ ᤂᤡᤏᤡ᤹ ᤔᤴᤏ ᤁᤧᤈᤠ᤺ᤳᤋᤡ. ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤡᤏᤡ᤹ ᤏᤢ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤌᤧᤔᤠᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤁᤧᤘᤕᤡ॥ ᤔᤧᤴᤇᤠᤶ ᤕᤠᤵᤔᤡᤴ ᤁᤢᤈᤠ᤺ᤸᤗᤧᤖᤰ ᤔᤧᤜᤡᤱᤏᤧᤴ. ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤈᤠ᤺ᤰᤁᤡᤸᤗᤧ ᤜᤡᤱ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗ ᤑᤠ᤹ᤀᤠᤱ ᤂᤢᤏᤧ᤹ ᤀᤰᤂᤣ ᤆᤥᤃᤢᤒᤠᤖᤥ॥

⁴ ᤂᤧᤴ ᤗᤡᤒᤥᤱ ᤋᤱᤒᤣ ᤌᤠᤖᤡᤰ ᤂᤡᤏᤡ᤹ ᤌᤰᤁᤥᤒᤠ ᤆᤠᤱᤜᤠ᤹ ᤔᤧᤍᤧ᤺ᤰᤂᤧᤴ. ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤱᤜᤠ᤹ ᤔᤧᤎᤱᤍᤢᤴ॥

⁵ ᤂᤡᤏᤡ᤹ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤵᤔᤠ ᤐᤥᤱ᤹. ᤔᤏᤠ᤺ᤸᤗᤧ ᤀᤠᤵᤑᤣᤰ ᤁᤢᤛ᤻ᤛᤠᤴ ᤜᤧᤴᤌᤡᤶ ᤕᤠᤰᤋᤢᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤜᤧᤴᤌᤡᤶ ᤁᤧᤕᤠᤰᤋᤡ᤹॥

⁶ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤶᤔᤥ ᤗᤠᤱᤄᤣᤃᤧᤶᤔᤧ᤹ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤡᤛᤧᤶᤔᤧ᤹ᤀᤠᤱ ᤂᤢᤏᤧ᤹ ᤁᤢᤀᤡᤱᤈᤠᤱᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥

⁷ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤗᤳᤇᤠ ᤏᤢᤒᤠ ᤗᤠᤈᤣ᤹ᤀᤥ ᤁᤧᤍᤣ᤹ᤖᤡᤖ ᤁᤧᤒᤳᤇᤡ᤹॥ ᤂᤧᤵᤔᤥ ᤘᤜ᤺ᤱ ᤕᤜ᤺ᤱ ᤏᤢ ᤘᤠᤒᤢᤴᤍᤠᤰᤘᤠ ᤁᤧᤗᤠᤰᤐᤠ ᤁᤧᤗ᤺ᤶᤒᤠ ᤆᤫᤠ᤺ᤳᤋᤡᤴ ᤁᤥ᤺ᤰᤔᤠ ᤑᤠᤱᤈᤱ ᤏᤢ ᤏᤧᤏᤧᤒᤠᤍᤧᤴ ᤐᤥᤱᤅᤠᤱ ᤁᤢᤱᤗᤥ॥

⁸ ᤂᤧᤴ ᤗᤠᤈᤣᤴ ᤔᤠᤛᤡ. ᤜ᤺ᤰᤛᤡ. ᤆᤧᤸᤗᤧᤰᤛᤣ᤹. ᤐ᤺ᤳᤇᤣ᤹. ᤑᤢᤳᤗᤧ᤹ᤛᤣ᤹. ᤐᤧ᤺ᤱᤘᤠᤗᤡ᤺ᤳᤇᤣ᤹ ᤏᤡ᤺ᤱᤃᤣ᤹ ᤏᤢ ᤛᤰᤘᤠᤄᤢ᤺ᤸᤗᤧ ᤁᤧᤍᤡᤶᤒᤠ ᤆᤥᤰ॥

⁹ ᤂᤧᤴ ᤗᤠᤈᤣ᤹ᤀᤥ ᤂᤡᤏᤡ᤹ ᤗᤠᤃᤡ ᤁᤢᤈᤠ ᤛᤠᤰᤁᤡᤸᤗᤧ ᤁᤧᤴᤍᤖᤡᤴ॥ ᤂᤧᤵᤔᤥ ᤂᤡᤏᤡ᤹ ᤗᤠᤃᤡ ᤌᤧᤔᤠ ᤐᤠ᤺ᤴᤏᤥᤀᤠᤱ ᤁᤢᤜᤥ᤺ᤵᤔᤠ ᤁᤢᤛᤠᤰᤔᤥ ᤁᤧᤴᤎᤩᤧ᤹ᤀᤡᤴ॥ ᤂᤧᤴ ᤗᤠᤈᤣ᤹ᤀᤥᤒᤠ ᤗᤢᤱᤜᤠ᤹ᤀᤥ ᤑᤧᤴᤈᤣ᤹ ᤕᤠᤰ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤁᤥ᤺ᤰᤔᤠᤜᤠ᤹ᤀᤥᤗᤠᤶ ᤑᤧᤔᤡ ᤁᤧᤗ᤺ᤳᤋᤢᤶ᤹॥

¹⁰ ᤀᤠᤸᤗ ᤂᤡᤏᤡ᤹ ᤁᤧᤄᤠᤛᤡᤖ ᤌᤠᤖᤡᤰ ᤆᤠᤔᤠ ᤁᤧᤄᤥᤛᤢᤶᤔᤡᤸᤗᤧ. ᤂᤢᤏᤧ᤹ ᤂᤡᤏᤡ᤹ ᤁᤧᤒᤡᤖᤡᤒᤠ ᤗᤠᤈᤣ᤺ᤸᤗᤧ ᤗᤠᤃᤡ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ॥

ᤕᤜᤘᤣ ᤍᤠᤱᤒᤧᤴ ᤏᤡᤱᤘᤠ᤹ᤑᤣ᤺ᤶᤔᤠ ᤔᤧᤏᤢ᤹ᤏᤧᤴ

¹¹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤘᤕᤧᤶᤔᤧ᤹᥄ ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤐᤡᤏᤡᤱᤒᤠ ᤂᤢᤏᤧ᤹ ᤁᤢᤀᤡᤱᤈᤠᤱᤜᤠ᤹ ᤏᤢ ᤂᤢᤏᤧ᤹ ᤁᤢᤎᤡᤶᤜᤠ᤹ ᤔᤧᤓᤣ᤺ᤴᤍᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹॥

¹² ᤔᤣ᤺ᤴᤏᤧᤓᤃᤪ ᤀᤠᤸᤗ ᤂᤡᤏᤡ᤹ ᤁᤧᤈᤠᤶᤔᤠᤱ ᤂᤡᤏᤡ᤹ ᤁᤧᤄᤠᤛᤡ᤹. ᤂᤶᤓᤩᤠᤱ ᤏᤢ᤺ᤒ᤻ᤏᤢᤒᤠ ᤜᤡᤶᤜᤠ᤹ ᤁᤧᤈᤥᤃᤢᤶᤔᤠᤱ ᤁᤧᤕᤢᤅᤡ᤹.

¹³ ᤂᤧᤒᤩᤠᤱ ᤂᤡᤏᤡ᤹ ᤌᤰᤛᤠᤗᤢᤵᤜᤠ᤹ ᤏᤢ ᤌᤰᤛᤠ ᤛᤢᤶᤜᤠ᤹ ᤕᤖᤡᤰ ᤔᤧᤒᤥᤱᤗ ᤔᤧᤒᤣ᤺ᤰ. ᤜᤧᤰᤁᤩᤠᤱ ᤂᤡᤏᤡ᤹ ᤛᤠᤶᤔᤩᤠᤱ ᤕᤢᤵᤐᤠ ᤏᤢ ᤂᤡᤏᤡ᤹ ᤁᤧᤃᤳᤋᤢᤶᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤘᤧᤳᤋᤧᤛᤖᤧ ᤐᤥᤱ᤹.

¹⁴ ᤂᤧᤒᤩᤠᤱ ᤂᤡᤏᤡ᤹ ᤀᤠᤱᤍᤡᤱ ᤁᤧᤗ᤹ᤖᤡᤀᤠᤱ ᤕᤥᤰ ᤁᤧᤶᤈᤥᤃᤡᤒᤠ ᤗᤠᤈᤣ ᤔᤡᤛᤪᤗᤠᤶ ᤁᤧᤗ᤺ᤵᤐᤠ ᤁᤧᤓᤧᤵᤐᤠ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤡᤱᤘᤠ᤹ ᤁᤧᤓᤣ᤺ᤳᤇᤢᤶ᤹॥

¹⁵ ᤁᤢᤏᤡᤱ ᤁᤧᤀᤠ᤺ᤵᤐᤠ ᤀᤛᤣ᤺ᤰ ᤏᤢ ᤋᤠᤱᤛᤠᤱ ᤂᤧᤒᤰᤜᤠ᤹ ᤁᤧᤕᤠᤰᤐᤠ. ᤆᤡᤈᤡ ᤂᤰᤂᤰᤐᤠ ᤏᤢ ᤆᤠ ᤔᤧᤴᤏᤢ᤹ᤔᤏᤠᤒᤠ ᤗᤠᤈᤣ᤹ ᤁᤧᤏᤧᤒᤠ ᤐᤕᤶ ᤕᤶᤒᤠ ᤜᤧᤰᤁᤩᤠᤱ ᤁᤡᤵᤔᤠ ᤁᤧᤄᤢᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤡᤸᤗᤧ ᤁᤢᤗᤢᤶᤔᤥ ᤂᤢᤏᤧ᤹ ᤂᤡᤏᤡ᤹ ᤗᤠᤶᤃᤧᤗᤥᤛᤡ ᤁᤧᤓᤧᤳᤋᤡ॥ ᤂᤢᤏᤧ᤹ ᤂᤡᤏᤡ᤹ ᤗᤠᤃᤡ ᤛᤡᤕᤠᤰᤐᤣ᤹ ᤌᤧᤕᤠᤰᤐᤣ᤹ᤗᤠᤶ ᤆᤫᤠ᤺ᤳ ᤗ᤺ᤳᤋᤢ॥

¹⁶ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤒᤠ ᤔᤴᤏ᤺ᤴ ᤁᤧᤈᤠ᤺ᤳᤋᤡᤀᤠᤱ ᤁᤢᤏᤢᤵᤔᤥ ᤂᤡᤏᤡ᤹ ᤁᤧᤏᤢᤖᤡ ᤁᤧᤍᤠᤛᤡᤖ ᤑᤠ᤹ᤀᤠᤱ ᤂᤢᤏᤧ᤹ ᤂᤡᤏᤡ᤹ ᤏ᤺ᤶᤏ᤺ᤶᤒᤠ ᤁᤧᤈᤥᤃᤡ ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤱᤘᤠ᤹ ᤛᤠ᤹ᤖᤢ॥

¹⁷ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤢᤏᤧ᤹ᤀᤣ ᤆᤥᤃᤢ ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤀᤰᤂᤣ ᤔᤧᤗ᤹ᤖᤧᤶᤔᤡᤴᤏᤧ᤹. “ᤁᤴ ᤕᤠᤱᤛᤠᤁᤢᤴᤎᤣᤜᤠ᤹ ᤀᤠᤏᤡᤃᤣ ᤌᤢᤶᤔᤠ ᤛᤠᤰᤔᤠ ᤏᤢ ᤔᤢᤰᤁᤡᤸᤗᤧ ᤂᤥᤛᤢᤶᤒᤧ॥”

¹⁸ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤣ ᤂᤡᤏᤡ᤹ ᤕᤠᤱᤛᤠᤁᤢᤴᤎᤣ ᤂᤥᤔᤠ ᤔᤢᤰᤛᤠᤶ ᤁᤧᤒᤡᤖᤡ᤹॥ ᤁᤶᤓᤗ᤹ᤖᤡᤰᤁᤣ ᤂᤢᤏᤧ᤹ ᤂᤡᤏᤡ᤹ ᤐᤠᤎᤧᤒᤠ ᤋᤠᤰᤌᤧᤒᤠᤜᤠ᤹ᤏᤢ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤀᤠᤵᤑᤠᤸᤗᤧᤛᤠᤱ ᤘᤠ᤹ᤖ ᤆᤥᤃᤢ᤹. ᤂᤧᤴ ᤀᤠᤀᤡᤴ ᤌᤠᤖᤡᤰᤁᤣ ᤜᤠᤒᤠ ᤘᤠ᤹॥

¹⁹ ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤁᤴ ᤁᤧᤛᤠᤰᤐᤠ ᤛᤠᤶᤍᤡᤱ ᤐᤡᤏᤡᤱᤗ ᤐᤳᤋᤠ. ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤡᤱᤘᤠ᤹ ᤁᤧᤔᤢ᤺ᤳᤇᤢᤶ᤹ ᤜᤧᤰᤁᤩᤠᤱ ᤘᤣ᤹ ᤔᤠᤱᤜᤠ᤹ ᤁᤧᤍᤡᤶᤍᤢᤶᤛᤡᤶᤔᤠᤱ ᤂᤧᤱᤜᤠ᤹ ᤔᤠᤱᤛᤧᤘᤠ ᤏᤢ ᤛᤧᤘᤠ ᤁᤧᤔᤧᤳᤋᤢᤶᤛᤡᤶᤏᤧᤓᤃᤪ. ᤂᤡᤏᤡ᤹ ᤛᤧᤰᤂᤠᤛᤠᤱ ᤁᤧᤔᤧᤃᤡ᤹॥

²⁰ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤁᤧᤴᤀᤡ᤺ᤳᤋᤢᤶᤔᤡᤴ ᤁᤧᤴᤏᤠ᤺ᤳᤋᤢᤶᤔᤡᤴᤏᤧᤓᤃᤪ. ᤂᤡᤏᤡ᤹ ᤋᤃᤡᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤰᤂᤢᤛᤡᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤜᤧᤰᤁᤣ ᤂᤡᤏᤡ᤹ᤀᤠᤱ ᤁᤧᤔᤧᤰᤂᤡᤖᤥ॥