ᤛᤠᤶᤕᤥᤌᤡᤶ ᤀᤡᤱ 7 - LIFOTNTᤁᤏᤠᤏᤡᤜᤠ᤹ᤏᤢ ᤑᤢᤳᤇᤡᤱᤔᤠ ᤔᤧᤏᤢ᤹ᤏᤧᤴ ( ᤗᤠ ᥉᥊:᥇᥇-᥇᥌ ) 1 ᤀᤠᤸᤗ ᤂᤡᤏᤡ᤹ ᤕᤢᤰ ᤆᤥ᤺ᤰᤔᤠ ᤑᤠ᤹ᤀᤠᤱ ᤐᤣ᤺ᤰᤔᤠ ᤁᤧᤈᤥᤃᤡᤒᤠ ᤗᤠᤈᤣ᤹ᤀᤥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤓᤧᤳᤋᤡ᤹. ᤜᤧᤰᤁᤩᤠᤱ ᤂᤡᤏᤡ᤹ᤏᤢ᤺ᤸᤗᤧ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤏᤢ ᤐᤎᤢᤶ ᤁᤧᤎᤢᤶᤒᤠ ᤁᤴ ᤏᤢᤛᤡ ᤔᤧᤴᤇᤠᤶ ᤛᤢᤘᤠᤱ. ᤜᤡᤳᤋᤡ. ᤃᤡᤷᤃᤠᤛᤡ. ᤀᤣᤔᤥᤖᤡ. ᤁᤏᤠᤏᤡ. ᤐᤖᤡᤈ᤻ᤈᤡ. ᤜᤡᤒ᤻ᤒᤡ ᤏᤢ ᤕᤒᤢᤛᤡᤜᤠ᤹ ᤂᤡᤏᤡ᤹ ᤋᤃᤡᤗᤠᤶ ᤂᤢᤏᤧ᤹ ᤏᤠ᤺ᤳᤋᤢᤍᤣᤛᤢᤛᤡ᤹. 2 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤂᤡᤏᤡ᤹ ᤕᤢᤰᤁᤥ ᤋᤠᤖᤢᤛᤡ ᤁᤧᤒᤡᤖᤡ᤹. ᤂᤧᤒᤩᤠᤱ ᤂᤡᤏᤡ᤹ ᤂᤧᤱᤜᤠ᤹ ᤁᤧᤏᤠ᤺ᤴᤍᤢᤶᤛᤡᤶᤒᤠ ᤔᤧᤒᤥᤱ᤹. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤂᤧᤱᤜᤠ᤹ ᤂᤰᤐᤧᤳ ᤔᤧᤰᤂᤧᤶᤛᤡᤶᤔᤧ᤹॥ ᤂᤡᤏᤡ᤹ ᤂᤧᤱᤜᤠ᤹ᤏᤢ ᤌᤧᤔᤠ ᤐᤠ᤺ᤴᤏᤥᤀᤠᤱ ᤔᤧᤍᤱᤅᤠᤛᤡᤶᤔᤡᤴᤏᤧ᤹॥ ᤂᤧᤱᤜᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤧᤶᤛᤡᤶᤔᤡᤴᤏᤧ᤹॥ 3 ᤂᤧᤱᤜᤠ᤹ᤏᤢ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤈᤥᤃᤧᤶᤔᤡᤴᤏᤧ᤹॥ ᤂᤡᤏᤡ᤹ ᤔᤧᤴᤇᤢᤔᤠ ᤛᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤒᤡᤳᤇᤠᤛᤠᤜᤠ᤹ ᤔᤧᤒᤡᤖᤧᤶᤛᤡᤶᤔᤡᤴᤏᤧ᤹ ᤀᤡᤃᤪ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤴᤇᤢᤔᤠ ᤛᤠᤜᤠ᤹ ᤂᤡᤏᤡ᤹ ᤕᤧᤶᤒᤡᤳᤇᤠ ᤛᤠᤜᤠ᤹ᤖᤧ ᤗᤠᤃᤡ ᤔᤧᤍᤠᤖᤧᤶᤛᤡᤶᤔᤡᤴᤏᤧ᤹. 4 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤕᤧᤶᤒᤡᤳᤇᤠᤛᤠᤜᤠ᤹ ᤕᤜᤘᤣ ᤍᤠᤱᤒᤠᤗᤠᤶ ᤔᤧᤜᤢᤛᤢᤛᤡᤀᤠᤱ ᤘᤣ᤹ ᤔᤠᤱᤜᤠ᤹ ᤛᤧᤘᤠ ᤔᤧᤵᤔᤠ ᤔᤧᤒᤠᤱᤄᤢᤛᤡ᤹॥ ᤀᤰᤂᤣ ᤐᤥᤱᤒᤠᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤴ ᤂᤡᤏᤡ᤹ ᤛᤶᤎᤠᤱ ᤌᤠᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤂᤡᤏᤡ᤹ ᤂᤡᤔᤥ ᤁᤧᤔᤧᤰᤂᤡ᤹॥ 5 ᤂᤡᤏᤡ᤹ ᤂᤧᤱᤜᤠ᤹ᤏᤢ ᤀᤰᤋᤱᤒᤠ ᤕᤠ᤺ᤶᤒᤰ ᤆᤥᤃᤧᤶᤔᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤕᤴᤇᤧᤶ ᤐᤡᤖᤧᤶᤛᤡᤶᤔᤧ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤂᤥᤒᤠ ᤗᤢᤱᤜᤠ᤹ ᤑᤕ᤺ᤵᤑᤕ᤺ᤵ ᤕ᤺ᤵᤛᤧᤶ ᤐᤡᤖᤧᤶᤛᤡᤶᤔᤧ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤛᤣᤖᤠ ᤔᤠᤱᤅᤡᤸᤗᤧ ᤁᤢᤛᤡᤳᤗᤠᤱᤜᤠ᤹ ᤂᤰᤋᤧᤶᤔᤧ᤹ᤀᤠᤱ ᤛᤥ᤺ᤴᤍᤧᤶ ᤐᤡᤖᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤂᤧᤜᤠ᤹ᤖᤧ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ ᤔᤡᤀᤥ ᤔᤡᤎᤡᤰᤂᤧᤶ ᤐᤡᤖᤧᤶᤛᤡᤶᤔᤧ᤹॥ 6 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤂᤡᤏᤡ᤹ ᤗᤳᤇᤠ ᤛᤣᤛᤣᤒᤠ ᤛᤢᤘᤠᤱᤏᤡᤱᤗᤥ॥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤗᤠᤶ ᤂᤢᤏᤧ᤹ ᤁᤢᤗᤠᤃᤡ ᤗᤳᤇᤠ ᤁᤧᤕᤧᤰᤐᤠ ᤛᤢᤘᤠᤱ. ᤗᤳᤇᤠ ᤀᤡᤔᤧᤸᤗᤢᤱᤒᤠ ᤕᤠᤱᤛᤠᤁᤢᤴᤎᤣ ᤆᤥ᤺ᤰᤔᤠᤖᤧ ᤗᤠᤃᤡ ᤂᤡᤏᤡ᤹ ᤁᤧᤛᤣᤃᤡᤀᤠᤱ ᤘᤠ᤹॥ 7 ᤂᤡᤏᤡ᤹ ᤂᤠᤏᤡ᤺ᤳᤋᤥ ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ᤺ᤸᤗᤧ ᤕᤖᤡᤰ ᤁᤧᤕᤥᤖᤡᤒᤠᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠ ᤀᤡᤃᤪ ᤁᤧᤛᤣᤃᤡᤒᤠ ᤔᤣ᤺ᤴ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤂᤠᤏᤡ᤺ᤳᤋᤥ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ᤺ᤸᤗᤧ ᤆᤒᤧᤳᤇᤡᤰ ᤁᤧᤘᤕᤡ॥ 8 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠᤸᤗᤧ ᤆᤥᤃᤢᤸᤗᤧ. ᤜᤧᤰᤁᤩᤠᤱ ᤂᤢᤏᤧ᤹ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤏᤢ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤁᤧᤵᤔᤠᤖᤧ ᤗᤠᤃᤡᤀᤣ ᤕᤜᤘᤣ ᤍᤠᤱᤒᤠᤸᤗᤧ ᤂᤢᤏᤧ᤹ ᤀᤠᤵᤑᤣᤰ ᤁᤢᤔᤢᤰᤛᤠᤶᤔᤡᤸᤗᤧ ᤂᤡᤏᤡ᤹ ᤁᤧᤗ᤺ᤳᤋᤡ ᤁᤧᤓᤧᤳᤋᤡ. ᤂᤧᤒᤩᤠᤱ ᤔᤡᤛᤪᤒᤠ ᤜᤠᤱ ᤑᤠᤖᤥᤸᤗᤧ ᤁᤢᤜᤢᤰᤁᤥᤗᤠᤶ. ᤕᤥᤰ ᤁᤧᤶᤈᤥᤃᤡᤒᤠ ᤗᤠᤈᤣ᤹ᤗᤠᤶ ᤆᤥ᤺ᤰᤕᤢᤶᤓᤥ ᤁᤧᤒᤡᤖᤡ॥ 9 ᤁᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤀᤥ ᤕᤢᤰᤂᤧᤶᤔᤧ᤹. ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤗᤳᤇᤠ ᤏᤛᤠ᤺ᤴᤛᤠᤒᤠ ᤏᤡᤱᤘᤠ᤹ᤑᤢᤔᤠᤱ ᤘᤠ᤹॥ ᤂᤢᤏᤧ᤹ ᤔᤡ᤺ᤶᤈᤡ ᤁᤧᤔᤧᤵᤐᤠ ᤏᤢ ᤂᤢᤏᤧ᤹ ᤁᤢᤀᤡᤱᤈᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤜᤧᤴᤇᤡᤱ ᤌᤠ᤺ᤰᤜᤠ᤹ᤀᤥ ᤏᤛᤠ᤺ᤴᤛᤠᤒᤠ ᤁᤢᤔᤠᤱᤜᤢᤵᤐᤡᤴ ᤁᤧᤳᤋᤢ᤹॥ 10 ᤁᤖ ᤂᤢᤏᤧ᤹ ᤁᤧᤏᤠ᤹ᤒᤠᤜᤠ᤹ ᤛᤧᤰᤂᤠᤛᤠᤱ ᤔᤧᤰᤂᤢᤛᤡ᤹. ᤂᤶᤓᤩᤠᤱ ᤂᤢᤏᤧ᤹ ᤁᤧᤈᤡ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤁᤢᤗᤧᤰᤘᤠ ᤏᤢ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤔᤧᤛᤢᤏᤧᤴ॥ 11 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤐᤡᤏᤡᤱᤒᤠ ᤀᤡᤱᤈᤠᤱ. ᤌᤡᤶ ᤏᤢ ᤛᤠᤶᤕᤥᤌᤡᤶᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥ ᤀᤡᤱᤈᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤗᤠᤃᤡ ᤔᤢ᤹ᤀᤡᤛᤠᤶ ( ᤛᤠᤶᤕᤥ ᤀᤡᤱ ᥈᥎:᥇-᥇᥊ ) 12 ᤂᤡᤏᤡ᤹ ᤁᤴ ᤌᤡᤶᤜᤠ᤹ ᤁᤧᤄᤧᤵᤛᤢᤶᤔᤠᤱ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧᤓᤃᤪ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤏᤢ ᤔᤠᤱᤜᤢᤵ ᤆᤥᤃᤢᤀᤠᤱ ᤘᤕᤧᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠ ᤁᤢᤔᤠᤱᤜᤢᤵᤐᤡᤴ ᤁᤧᤳᤋᤢ᤹॥ 13 ᤂᤢᤏᤧ᤹ ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤋᤡ᤹. ᤜᤧᤰᤁᤩᤠᤱ ᤂᤢᤏᤧ᤹ ᤂᤡᤏᤡ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤡᤀᤠᤱ ᤂᤡᤏᤡ᤹ ᤁᤧᤓᤥᤛᤡ᤹॥ ᤂᤢᤏᤧ᤹ ᤐᤡᤏᤡᤱ ᤑᤠ᤹ᤀᤠᤱ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤏᤢ ᤔᤠᤱᤜᤢᤵ ᤆᤥᤃᤢᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤌᤰᤗᤠᤖᤧ ᤗᤠᤃᤡ ᤕᤖᤡᤰ ᤛᤠᤔᤧᤴᤇᤠ᤹ᤜᤠ᤹ ᤁᤧᤒᤡᤖᤡ᤹. ᤀᤡᤰᤋᤠᤵᤐᤥ ᤁᤧᤎᤥ᤺ᤰᤐᤠ ᤁᤢᤈᤠᤖᤧ ᤗᤠᤃᤡ. ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡ ᤏᤢ ᤏᤡ᤺ᤱᤃᤣ᤹. ᤐᤡᤳᤌᤰᤛᤠ. ᤁᤢᤶᤒᤠᤒᤠ ᤁᤢᤶᤔᤠᤔᤠ ᤐᤡᤳᤛᤠᤳᤜᤠ᤹ ᤏᤢ ᤔᤧᤸᤗᤢᤰ ᤔᤧᤴᤍᤠᤰ ᤛᤠ᤺ᤳᤜᤠ᤹ᤀᤥᤀᤠᤱ ᤂᤢᤏᤧ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤌᤠᤛᤢ᤹॥ 14 ᤂᤡᤏᤡ᤹ ᤘᤣ᤹ ᤔᤏᤠᤜᤠ᤹ᤏᤢ᤺ᤸᤗᤧ ᤛᤠ᤹ᤖᤡᤰ ᤔᤢ᤹ᤀᤡᤛᤠᤒᤠ ᤁᤧᤒᤥ᤺ᤰᤂᤡ᤹॥ ᤂᤡᤏᤡ᤹ ᤕᤧᤶᤒᤡᤳᤇᤠ ᤀᤡᤃᤪ ᤔᤧᤴᤇᤢᤔᤠ ᤔᤏᤠᤜᤠ᤹ᤀᤥ ᤀᤠᤳᤋᤡᤴᤜᤠ᤹ᤀᤠᤱ ᤗᤢᤰᤐᤠ ᤂᤰᤐᤠ ᤔᤧᤶᤒᤥᤱᤏᤧᤴ ᤜᤧᤰᤁᤩᤠᤱ ᤌᤰᤛᤠᤜᤠ᤹ᤀᤥᤀᤠᤱ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤴᤎᤠᤵᤔᤏᤠ ᤔᤧᤶᤒᤥᤱᤏᤧᤴ॥ 15 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤁᤧᤖᤧᤰ ᤋᤢᤰᤔᤠ ᤗᤠ᤺ᤰᤔᤠᤗᤠᤶ ᤁᤧᤘᤣ᤺ᤴᤍᤡ᤹॥ ᤔᤡᤛᤪᤀᤥ ᤂᤡᤏᤡ᤹ ᤁᤧᤏᤡᤛᤢᤶᤒᤠ ᤁᤡᤵᤔᤠ ᤁᤧᤄᤢᤒᤠ ᤔᤡᤱᤍᤣ᤹ᤜᤠ᤹ ᤂᤡᤏᤡ᤹ ᤛᤶᤎᤠᤱ ᤔᤧᤍᤠᤖᤢᤴ᤹. ᤁᤖ ᤂᤡᤏᤡ᤹ᤏᤢ ᤏᤡᤱᤔᤡ ᤁᤧᤈᤥ᤺ᤰᤐᤠᤜᤠ᤹ᤀᤥ ᤂᤧᤴ ᤔᤡᤱᤍᤣ᤹ᤜᤠ᤹ ᤋᤠᤖᤢ᤹॥ 16 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤜᤢᤰᤁᤥ ᤁᤧᤒᤡᤖᤡᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤡᤏᤡ᤹ ᤔᤧᤰᤂᤧᤶᤛᤡᤶᤔᤧ᤹. ᤂᤧᤱᤜᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤧᤶᤛᤡᤶᤔᤧᤴᤏᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤧᤶᤛᤡᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤀᤠᤶᤓᤠ ᤂᤧᤴᤏᤣ ᤂᤡᤏᤡ᤹ ᤀᤡᤀᤥ ᤌᤠᤔᤠ ᤀᤡᤈᤥ ᤐᤥᤱ᤹॥ 17 ᤂᤡᤏᤡ᤹ ᤀᤠᤒᤠᤅᤣ ᤀᤰᤂᤣ ᤁᤧᤀᤡ᤺ᤳᤋᤢᤶᤒᤡᤗᤠ. “ᤁᤴ ᤛᤢᤘᤠᤱᤜᤠ᤹ ᤀᤠᤏᤡ᤹ᤏᤢ᤺ᤸᤗᤧ ᤁᤧᤎᤢᤶᤒᤠ ᤔᤧᤈᤥᤰ॥ ᤀᤠᤏᤡ᤹ ᤀᤠᤰᤂᤣᤀᤠᤱ ᤁᤴᤜᤠ᤹ ᤏᤠ᤺ᤵᤔᤠ ᤀᤠᤛᤢᤰᤋᤢᤶᤛᤡᤶᤒᤣ᥅” 18 ᤁᤖ ᤂᤡᤏᤡ᤹ ᤔᤧᤃᤡᤛᤧᤶᤔᤡᤴᤏᤧ᤹॥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤠᤖᤥᤴ ᤏᤢ ᤁᤧᤖᤧᤰ ᤔᤡᤛᤪ ᤗᤠᤈᤣᤴ ᤀᤠᤰᤂᤣ ᤔᤧᤳᤋᤢ ᤂᤧᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹॥ 19 ᤕᤶᤒᤕᤶᤒᤠ ᤋᤢᤰᤂᤣ ᤗᤠᤰᤂᤣᤜᤠ᤹. ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤏᤢ ᤂᤧᤴ ᤏᤧᤜᤡᤖᤧ ᤔᤧᤴᤎᤠᤵᤔᤏᤠᤒᤠ ᤐᤕᤶ ᤕᤶᤒᤠ ᤕᤠ᤺ᤶᤒᤰᤜᤠ᤹ ᤀᤠᤵᤑᤣᤰ ᤂᤡᤏᤡ᤹ ᤔᤡᤰᤁᤡᤸᤗᤧ ᤁᤧᤏᤡᤛᤢᤶ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤢᤰᤛᤠᤶ ᤏᤢ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤂᤢᤏᤧ᤹ ᤂᤡᤏᤡ᤹ ᤁᤧᤗ᤺ᤳᤋᤡ ᤁᤧᤓᤧᤳᤋᤡᤒᤠᤴ ᤂᤧᤵᤔᤥ ᤂᤡᤏᤡ᤹ ᤀᤠᤵᤑᤣᤰ ᤁᤧᤏᤡᤛᤢᤶᤔᤠᤱ ᤁᤧᤘᤕᤡ—ᤜᤧᤰᤁᤣᤗ᤹ᤖᤡᤰᤁᤣ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤀᤠᤸᤗᤥ ᤁᤧᤃᤡᤖᤢᤶᤛᤡᤶᤒᤠ ᤂᤧᤴ ᤛᤢᤘᤠᤱᤜᤠ᤹ᤀᤠᤱ ᤜᤧᤰᤁᤣᤀᤣ ᤔᤧᤳᤋᤢᤛᤡ᤹॥ 20 ᤁᤴᤏᤢ᤺ᤸᤗᤧ ᤘᤣ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤏᤢ ᤂᤡᤏᤡ᤹ᤗᤠᤶ ᤁᤧᤈᤡᤱᤛᤡᤱᤒᤠᤜᤠ᤹ ᤔᤧᤶᤔᤧᤰᤏᤧᤴᤗ ᤌᤠᤖᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤛᤠᤘᤠᤜᤠ᤹ ᤐᤠᤱᤄᤢ ᤋᤠᤛᤢᤛᤡ᤹॥ 21 ᤂᤧᤱᤜᤠ᤹ᤏᤢ ᤂᤡᤏᤡ᤹ ᤔᤧᤃᤡᤛᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ᤏᤢ ᤘᤠ᤹॥ ᤂᤢᤏᤧ᤹ ᤐᤕᤶ ᤕᤶᤒᤠ ᤏᤢ ᤁᤡᤵᤔᤠ ᤁᤧᤄᤢᤒᤠ ᤏᤡᤱᤘᤠ᤹ᤑᤢᤔᤠᤱ ᤆᤥᤰ॥ 22 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤛᤢᤘᤠᤱᤜᤠ᤹ ᤕᤅᤣ᤺ᤰ ᤕᤅᤣ᤺ᤰ ᤂᤡᤏᤡ᤹ ᤋᤃᤡᤗᤠᤶ ᤗ᤺ᤳᤋᤢᤍᤣᤛᤢᤛᤡ᤹॥ ᤂᤡᤏᤡ᤹ ᤂᤧᤱᤜᤠ᤹ ᤌᤡᤰᤗᤧᤱᤗᤧ ᤔᤧᤱᤔᤠ ᤁᤧᤱᤄᤥᤛᤢᤶᤛᤡᤶᤔᤡᤴ᤹. ᤔᤣ᤺ᤴᤏᤧᤓᤃᤪ ᤂᤡᤏᤡ᤹ ᤁᤒᤪᤡᤱ ᤐᤡᤛᤠᤱᤒᤠ ᤋᤠᤶᤓᤢᤱ ᤌᤰᤛᤠᤜᤠ᤹ ᤕᤖᤡᤰ ᤔᤧᤒᤥ᤺ᤴᤗ ᤔᤧᤒᤣ᤺ᤰ॥ 23 ᤁᤖ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤂᤡᤏᤡ᤹ ᤕᤢᤰᤁᤥ ᤋᤠᤖᤢᤛᤡ ᤁᤧᤒᤡᤖᤡ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤶᤔᤧᤰᤏᤧᤴᤗ ᤌᤠᤖᤡᤰ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤏᤠᤰᤗ ᤕᤠ᤺ᤴᤍᤢᤛᤡ᤹॥ 24 ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤜᤠ᤹ ᤂᤡᤏᤡ᤹ ᤜᤢᤰᤁᤥ ᤌᤠᤛᤢᤛᤡ ᤁᤧᤒᤡᤖᤡ᤹. ᤂᤶᤓᤩᤠᤱ ᤂᤡᤏᤡ᤹ ᤋᤠᤱᤛᤠᤱᤒᤠᤸᤗᤧ ᤁᤢᤛᤡᤃᤠᤱᤗᤠᤶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤅᤣ ᤁᤧᤔᤠᤛᤢᤶ ᤁᤧᤒᤡᤖᤢᤶᤛᤡᤶ᤹॥ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤂᤡᤏᤡ᤹ ᤋᤃᤡ ᤕᤧᤵᤔᤠ ᤔᤧᤴᤇᤢᤰᤏᤧᤴ॥ ᤂᤡᤏᤡ᤹ ᤂᤧᤱᤜᤠ᤹ ᤁᤧᤔᤧᤰᤂᤢᤶᤛᤡᤶ᤹॥ 25 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ᤖᤧᤴ ᤏᤠᤘᤠᤀᤡᤳᤗᤠᤜᤠ᤹ ᤔᤡᤀᤥ ᤂᤡᤏᤡ᤹ ᤔᤡᤎᤡᤰᤂᤧᤶᤍᤣᤛᤧᤶᤛᤡᤶᤔᤧ᤹॥ ᤏᤠᤘᤠᤀᤡᤳᤗᤠᤀᤥ ᤁᤧᤕᤠᤰᤐᤠ ᤛᤠᤶᤔᤩᤠᤱ ᤕᤢᤵᤐᤠᤜᤠ᤹ ᤔᤡᤰ ᤔᤧᤃᤣ᤺ᤳᤋᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤀᤠᤵᤑᤣᤰ ᤗᤠᤃᤡ ᤔᤧᤔᤧᤳᤋᤠᤛᤡᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤀᤠᤶᤓᤠ ᤂᤧᤴᤏᤣ ᤂᤡᤏᤡ᤹ ᤀᤡᤀᤥ ᤌᤠᤔᤠ ᤀᤡᤈᤥ ᤐᤥᤱ᤹॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤁᤴ ᤁᤢᤛᤡᤰᤁᤧᤗᤧ᤺ᤱᤒᤠ ᤆᤥᤰ॥ 26 ᤀᤠᤳᤋᤡᤴ ᤛᤡᤰᤁᤧᤗᤧ᤺ᤱᤒᤠ ᤐᤠ᤺ᤴᤏᤡᤴᤏᤠᤱ ᤂᤡᤏᤡ᤹ ᤜᤡᤶᤔᤥ ᤔᤧᤍᤠᤖᤠᤶᤔᤡᤴᤏᤧ᤹. ᤔᤣ᤺ᤴᤏᤧᤓᤃᤪ ᤂᤡᤏᤡ᤹ᤀᤠᤱ ᤂᤧᤴ ᤜᤧᤰᤁᤣ ᤔᤧᤰᤔᤠᤖᤧ ᤗᤠᤃᤡ ᤗᤠ᤺ᤳᤗᤠ᤺ᤳ ᤁᤧᤒᤥ᤺ᤰᤂᤡ᤹॥ ᤂᤡᤏᤡ᤹ ᤂᤧᤴ ᤆᤠ᤹ᤖᤡᤰᤁᤣ ᤆᤡ᤺ᤳᤋᤧᤶᤔᤧ᤹ ᤂᤧᤒᤩᤠᤱ ᤏᤠ᤹ᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤔᤧᤱᤔᤠᤖᤧ ᤗᤠᤃᤡ ᤗᤠ᤺ᤳᤗᤠ᤺ᤳ ᤛᤧᤶᤔᤏᤠᤒᤠ ᤐᤠ᤺ᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.