ᤛᤠᤶᤕᤥᤌᤡᤶ ᤀᤡᤱ 6 - LIFOTNT

ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤀᤡᤱᤈᤠᤱ

¹ ᤂᤡᤏᤡ᤹ ᤕᤷᤍᤏ ᤏᤠᤎᤠ᤺ᤶᤒᤡ ᤁᤧᤒᤣᤃᤡᤀᤠᤱ ᤕᤢᤰ ᤆᤥ᤺ᤰᤔᤠ ᤁᤧᤀᤡ᤺ᤳᤋᤢᤶᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤗ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤜᤢ᤹ᤛᤧ ᤀᤠᤱᤃᤠ᤹ ᤀᤡᤱᤈᤠᤱ ᤐᤡᤖᤠᤱᤒᤠ ᤀᤡᤱᤈᤠᤱ. ᤌᤡᤶ ᤏᤢ ᤛᤠᤶᤕᤥ ᤛᤠᤰᤌᤡᤶᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥

² ᤂᤡᤏᤡ᤹ ᤜᤡᤱᤜᤡᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤡᤛᤧᤶᤔᤧ᤹ᤀᤠᤱ ᤂᤡᤏᤡ᤹ ᤏᤢ ᤂᤡᤏᤡ᤹ ᤛᤠᤀᤣᤜᤠ᤹ ᤜᤧᤰᤁᤩᤠᤱ ᤔᤧᤴᤇᤠ᤹ᤜᤠ᤹ᤖᤧ ᤀᤠᤱᤃᤠ᤹ ᤐᤡᤏᤡᤱᤗ ᤐᤳᤋᤠᤒᤠ ᤁᤧᤖᤧᤰ ᤁᤢᤎᤡᤶᤜᤠ᤹ ᤏᤢ ᤁᤢᤀᤡᤱᤈᤠᤱᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤌᤠ᤺ᤰ ᤆᤠ᤹ᤖ॥

³ ᤀᤡᤛᤪᤠᤀᤡᤗᤡᤛᤣ ᤂᤧᤵᤛᤧᤶᤔᤧ᤹. ᤁᤴᤜᤠ᤹ ᤁᤧᤖᤧᤰ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹. ᤂᤧᤒᤩᤠᤱ ᤂᤡᤏᤡ᤹ ᤁᤧᤏᤢᤖᤡ ᤁᤧᤍᤠᤛᤡᤖ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤏᤢ ᤔᤠᤱᤜᤢᤵ ᤆᤥᤃᤢᤒᤠ ᤁᤢᤀᤡᤛᤡᤰ ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤕᤖᤡᤰ ᤁᤧᤒᤥ᤺ᤴᤍᤡ ᤁᤧᤎᤧ᤹ᤖᤡ᤹ᤀᤠᤱᤗᤥ॥

⁴ ᤀᤡᤛᤪᤠᤀᤡᤗᤡᤛᤣ. ᤂᤧᤵᤛᤧᤶᤔᤧ᤹. ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱ. ᤕᤜᤘᤣ ᤍᤠᤱᤒᤠ ᤗᤳᤇᤠᤖᤰ ᤘᤠ᤹॥

⁵ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤁᤧᤖᤧᤰ ᤛᤡᤰᤗᤢᤱᤔᤠ᤹ᤖᤧ. ᤂᤡᤏᤡ᤹ ᤁᤧᤖᤧᤰ ᤏᤡᤱᤘᤠ᤹ᤖᤧ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰ ᤔᤢᤰᤛᤠᤶᤔᤡᤸᤗᤧ ᤔᤡ᤺ᤶᤈᤡ ᤔᤧᤳᤋᤠᤶᤔᤧ᤹॥

⁶ ᤜᤧᤰᤁᤩᤠᤱ ᤀᤠᤀᤡᤴ ᤀᤠᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱᤒᤠ ᤁᤴ ᤀᤡᤱᤈᤠᤱᤜᤠ᤹ ᤂᤡᤏᤡ᤹ ᤁᤧᤖᤧᤰ ᤛᤡᤰᤗᤢᤱᤔᤠ᤹ᤀᤥ ᤕᤢᤰᤂᤧᤶᤔᤧ᤹॥

⁷ ᤂᤡᤏᤡ᤹ ᤜᤡᤶᤔᤥ ᤁᤧᤘᤕᤡᤸᤗᤧ. ᤗᤠᤶᤔᤥ ᤗᤠᤱᤃᤧᤄᤣᤃᤡᤸᤗᤧ. ᤁᤧᤏᤠ᤺ᤶᤔᤠᤛᤡᤸᤗᤧ ᤏᤢ ᤁᤧᤒᤥᤃᤡᤸᤗᤧ ᤂᤡᤏᤡ᤹ ᤂᤧᤱᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤴᤇᤢᤶ ᤀᤡᤱᤛᤢᤶ ᤋᤠᤖᤧᤶᤔᤧ᤹ ᤂᤶᤓᤩᤠᤱ ᤂᤡᤏᤡ᤹ ᤛᤠᤜᤠ᤹ ᤜᤢ᤹ᤖᤧᤶᤛᤡᤶᤔᤧ᤹॥

⁸ ᤂᤧᤱᤜᤠ᤹ ᤂᤡᤏᤡ᤹ ᤜᤢᤰᤁᤥ ᤔᤡᤰᤛᤣ᤺ᤴᤗᤧ ᤗᤠᤃᤡ ᤀᤡᤄᤣ᤺ᤰᤂᤧᤶ ᤑᤳᤇᤧᤶᤔᤧ᤹॥ ᤂᤧᤱᤜᤠ᤹ ᤂᤡᤏᤡ᤹ ᤋᤫᤠᤒᤥ ᤂᤣ᤺ᤰᤂᤠᤶ ᤑᤳᤇᤧᤶᤔᤧ᤹॥

⁹ ᤂᤧᤱᤜᤠ᤹ ᤂᤡᤏᤡ᤹ ᤜᤡᤶ ᤗᤠᤶᤎᤣ᤺ᤳᤐᤢᤱ ᤏᤢ ᤔᤠᤗᤠᤶᤎᤣ᤺ᤳᤜᤠ᤹ᤀᤥ ᤛᤠᤵᤋᤠᤶᤔᤧ᤹॥

¹⁰ ᤀᤠᤸᤗ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤐᤠᤎᤧᤒᤠ ᤀᤒᤪᤠᤜᤠᤔ. ᤀᤡᤛᤜᤠᤁ ᤜᤧᤰᤁᤩᤠᤱ ᤕᤠᤁᤢᤒᤧᤴᤏᤢ ᤂᤡᤏᤡ᤹ ᤐᤡᤏᤡᤱ ᤑᤠ᤹ᤀᤠᤱ ᤔᤠᤱᤜᤧᤰ ᤆᤥᤃᤢᤒᤠ ᤗᤠᤈᤣ᤹ᤀᤥ ᤂᤢᤏᤧ᤹ ᤁᤧᤃᤧᤳᤋᤡ᤹. ᤂᤡᤏᤡ᤹ ᤁᤧᤴᤈᤥᤃᤢᤶᤔᤡᤴᤒᤠ ᤕᤶᤒᤕᤶᤒᤠ ᤏᤢ ᤏᤢ᤺ᤒ᤻ᤏᤢᤒᤠ ᤕᤧᤰᤕᤰᤜᤠ᤹ ᤁᤧᤏᤧᤒᤠ ᤗᤠᤈᤣ᤹ᤀᤥ.

¹¹ ᤂᤧᤵᤔᤥ ᤂᤡᤏᤡ᤹ ᤁᤧᤴᤇᤢᤵᤛᤢᤶᤔᤡᤴᤒᤠ ᤛᤠ᤹ᤖᤡᤰ ᤏᤢᤒᤠ ᤐᤠ᤺ᤴᤜᤠ᤹ᤖᤧ ᤛᤎᤧᤰ ᤁᤧᤍᤡᤶᤒᤠ ᤜᤡᤶᤜᤠ᤹ ᤔᤧᤕᤢᤱ᤹. ᤜᤧᤰᤁᤩᤠᤱ ᤁᤧᤴᤍᤕᤢᤶᤔᤡᤴᤒᤠ ᤘᤒᤠᤰᤜᤠ᤹ ᤏᤢ ᤁᤧᤸᤗᤣ᤺ᤳᤋᤢᤶᤔᤡᤴᤒᤠ ᤆᤧᤸᤗᤧᤰᤛᤣ᤹ ᤏᤢ ᤆᤤᤋᤢᤏ ᤀᤡᤰᤋᤠᤵᤜᤠ᤹ ᤏᤧᤖᤥ. ᤂᤧᤒᤩᤠᤱ ᤂᤡᤏᤡ᤹ ᤂᤧᤱᤜᤠ᤹ ᤁᤧᤈᤠᤶᤔᤠᤱ ᤁᤧᤄᤠᤛᤡ᤹.

¹² ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤛᤡᤱᤛᤡᤱ ᤕᤧᤰᤕᤰ ᤗ᤹ᤖᤧᤶᤔᤧ᤹. ᤜᤧᤰᤁᤩᤠᤱ ᤕᤥᤰ ᤁᤧᤶᤈᤥᤃᤡᤒᤠ ᤗᤠᤈᤣ᤹ ᤔᤡᤛᤪᤗᤠᤶ ᤂᤡᤏᤡ᤹ ᤁᤧᤗ᤺ᤵᤐᤠ ᤁᤧᤓᤧᤵᤐᤠ ᤕᤜᤘᤣ ᤍᤠᤱᤒᤧᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹॥

¹³ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤡᤖᤧᤶᤔᤧ᤹. ᤂᤢᤏᤧ᤹ᤀᤡᤴᤗᤰ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤁᤢᤔᤡᤱᤅᤥ ᤔᤠᤱᤜᤧᤰᤁᤠᤛᤡᤶᤔᤧ᤹॥

¹⁴ ᤂᤡᤏᤡ᤹ ᤁᤒᤪᤡᤱ ᤐᤡᤛᤠᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤘᤣ᤹ ᤔᤠᤱᤜᤠ᤹ ᤔᤧᤍᤡᤶᤍᤧᤶ ᤔᤧᤏᤠ᤺ᤳᤋᤧᤶᤛᤡᤶᤔᤧᤴᤏᤧ᤹.

¹⁵ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤗᤢᤶᤔᤥ ᤁᤧᤘᤠ᤹ᤒᤠ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤘᤣ᤹ ᤔᤠᤱᤜᤠ᤹ ᤏᤠᤛᤡᤔᤧᤴᤎ᤺ᤵᤔᤏᤠᤒᤠ ᤏᤡᤱᤘᤠ᤹ᤑᤢᤔᤠᤱᤗᤥ॥ ᤔᤣ᤺ᤴᤏᤧᤓᤃᤪ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤴ ᤂᤡᤏᤡ᤹ ᤛᤶᤎᤠᤱ ᤆᤢᤰ. ᤂᤧᤒᤩᤠᤱ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤂᤡᤏᤡ᤹ ᤁᤧᤔᤧᤰᤂᤡ᤹॥

¹⁶ ᤔᤛ᤻ᤛᤠᤀᤥ ᤜᤧᤰᤁᤣ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤡᤱᤘᤠ᤹ ᤔᤧᤛᤠ᤹ᤖᤧᤶᤔᤡᤴᤏᤧ᤹॥

¹⁷ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤌᤡᤶ ᤁᤢᤀᤡᤱᤈᤠᤱᤜᤠ᤹ ᤏᤢ ᤂᤢᤏᤧ᤹ ᤂᤡᤏᤡ᤹ ᤁᤧᤒᤡᤖᤡᤒᤠ ᤌᤡᤶᤜᤠ᤹ ᤜᤧᤰᤁᤩᤠᤱ ᤛᤠᤶᤕᤥᤌᤡᤶᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥

¹⁸ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤰᤛᤠᤀᤥ ᤀᤠᤳᤋᤡᤴ ᤀᤠᤳᤋᤡᤴ ᤐᤠ᤺ᤴᤜᤠ᤹ ᤁᤢᤍᤥ᤺ᤵᤔᤠ ᤏᤢ ᤏᤢᤒᤠ ᤆᤥᤰ ᤂᤧᤴ ᤆᤥᤃᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤁᤧᤏᤢᤖᤡ ᤁᤧᤍᤠᤛᤡᤖ. ᤂᤧᤒᤩᤠᤱ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤔᤠᤱᤜᤧᤰᤛᤡᤱᤅᤠᤱ ᤔᤠᤱᤜᤧᤰ ᤆᤥᤃᤢᤒᤠ ᤂᤧᤴ ᤏᤢᤒᤠ ᤗᤠᤈᤣᤴ ᤂᤡᤏᤡ᤹ ᤜᤢᤰᤁᤠᤵ ᤆᤥᤃᤧᤶᤔᤧ᤹.

¹⁹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤁᤧᤖᤧᤰ ᤏᤡᤱᤔᤡᤜᤠ᤹ ᤂᤡᤏᤡ᤹ ᤋᤃᤡᤗᤠᤶ ᤏᤠ᤺ᤳᤋᤧᤶᤍᤣᤛᤧᤶᤛᤡᤶᤔᤧ᤹॥

²⁰ ᤁᤧᤍᤠᤒᤠ ᤕᤧᤶᤔᤥ ᤂᤡᤏᤡ᤹ ᤕᤧᤶᤒᤡᤳᤇᤠ ᤛᤠᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤛᤣ᤺ᤴᤁᤧᤶᤍᤥᤛᤡ᤹. “ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤡᤖᤧᤒᤠ ᤁᤴ ᤌᤡᤶᤜᤠ᤹ ᤏᤢ ᤛᤠᤶᤕᤥᤌᤡᤶᤜᤠ᤹ᤖᤧ ᤁᤢᤒᤣᤴ ᤌᤧᤔᤠᤒᤣ᥅”

²¹ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤧᤶᤛᤡᤶᤔᤧ᤹. “ᤔᤡᤛᤪ ᤗᤠᤈᤣ᤹ᤀᤥ ᤑᤠᤖᤥᤸᤗᤧ ᤁᤢᤕᤥ᤺ᤃ᤻ᤒᤠ ᤀᤠᤘᤕᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤡᤛᤪᤗᤠᤶ ᤂᤢᤏᤧ᤹ ᤁᤢᤔᤢᤰᤛᤠᤶᤔᤡᤸᤗᤧ ᤀᤠᤗ᤺ᤳᤋᤧ ᤀᤠᤓᤧᤳᤋᤧ॥

²² ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡ᤹ ᤔᤡᤰᤁᤡᤸᤗᤧ ᤏᤡᤛᤢᤖᤀᤣ ᤔᤡᤛᤪᤡᤜᤠ᤹. ᤑᤠᤖᤥᤴ ᤏᤢ ᤂᤢᤏᤧ᤹ ᤁᤧᤖᤧᤰ ᤁᤢᤜᤡᤶᤛᤕᤱᤜᤠ᤹ᤀᤥ ᤛᤠ᤹ᤖᤡᤰ ᤁᤡᤵᤔᤠᤃᤧᤄᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣᤴ ᤏᤢ ᤏᤧᤜᤡᤏᤡᤱᤘᤠ᤹ᤖᤧ ᤔᤧᤴᤎᤠᤵᤔᤏᤠᤒᤠ ᤕᤠ᤺ᤶᤒᤰᤜᤠ᤹ ᤀᤥᤛᤣ᤺ᤴᤎᤠᤱ ᤆᤥᤃᤢ॥

²³ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤏᤢ ᤔᤠᤱᤜᤧᤰᤛᤡᤱᤅᤠᤱ ᤐᤡᤏᤡᤱ ᤗ᤹ᤖᤡᤰ ᤔᤠᤱᤜᤢᤵ ᤆᤥᤃᤢᤒᤠ ᤗᤠᤈᤣ᤹ᤀᤥ ᤀᤠᤏᤡ᤹ ᤑᤧᤵᤔᤠᤖᤧ ᤗᤠᤃᤡ ᤂᤢᤏᤧ᤹ ᤂᤧᤵᤔᤥᤗᤠᤶ ᤀᤠᤗ᤺ᤳᤋᤧ॥

²⁴ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤀᤠᤏᤡ᤹ ᤁᤴ ᤁᤧᤖᤧᤰ ᤌᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤏᤢ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤡᤵᤔᤠᤖᤧ ᤗᤠᤃᤡ ᤀᤡᤱᤈᤠᤱ ᤀᤠᤒᤡᤖᤧᤒᤠᤖᤥ. ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤆᤰᤔᤧᤸᤗ᤹ᤀᤣ ᤀᤠᤏᤢ᤹ ᤀᤠᤍᤠᤖ. ᤜᤧᤰᤁᤩᤠᤱ ᤀᤠᤀᤡᤴ ᤜᤧᤰᤁᤣᤀᤣ ᤀᤠᤏᤡ᤹ᤀᤠᤱ ᤋᤠᤵᤌᤣᤰ ᤕᤠᤶᤎᤣᤰᤁᤥ ᤀᤠᤘᤠ᤹ᤖ॥

²⁵ ᤂᤢᤏᤧ᤹ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤔᤡᤰᤛᤠ ᤋᤃᤡ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤁᤧᤖᤧᤰ ᤁᤢᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤀᤠᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰ ᤀᤠᤗ᤹ᤏᤧᤓᤃᤪ. ᤜᤠᤒᤠ ᤂᤧᤴᤏᤣ ᤀᤠᤏᤡ᤹ ᤗᤠᤃᤡ ᤛᤠᤶᤕᤥᤒᤠ ᤐᤥᤱᤗᤥ॥”