ᤛᤠᤶᤕᤥᤌᤡᤶ ᤀᤡᤱ 5 - LIFOTNTᤌᤡᤒᤥᤱ ᤀᤡᤱᤈᤠᤱ ( ᤗᤠ ᥈᥆:᥇-᥇᥍ ) 1 ᤔᤥᤛᤠ᤺ᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤀᤡᤛᤪᤠᤀᤡᤗᤡᤛᤣ. ᤀᤠᤀᤡᤴ ᤀᤠᤱᤃᤠ᤹ ᤂᤡᤏᤡ᤹ ᤐᤡᤏᤡᤱᤒᤠ ᤌᤡᤶ ᤏᤢ ᤛᤠᤶᤕᤥ ᤛᤠᤰᤌᤡᤶᤜᤠ᤹ ᤂᤧᤵᤛᤧᤶᤔᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤡᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥ 2 “ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ᤏᤢ ᤜᤥᤖᤣᤒ ᤁᤥ᤺ᤰᤔᤠᤀᤥ ᤔᤠᤱᤜᤢᤵ ᤆᤥᤃᤢ॥ 3 ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤔᤠᤱᤜᤢᤵᤐᤡᤴ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤏᤢᤖᤰ ᤔᤣ᤺ᤴ. ᤁᤖ ᤀᤠᤀᤡᤴ ᤁ᤹ᤕᤥ ᤀᤠᤏᤡ᤹ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ ᤀᤠᤏᤡ᤹ ᤁᤧᤖᤧᤰᤏᤢᤀᤠᤱ ᤆᤥᤃᤢ॥ 4 ᤁᤥ᤺ᤰᤔᤠ ᤑᤠᤱᤈᤱᤅᤥ ᤕᤜᤘᤣ ᤍᤠᤱᤒᤧᤴ ᤔᤡᤎᤢᤱ ᤔᤡᤖᤠ᤺ᤰ ᤗᤢᤶᤔᤥᤗᤠᤶ ᤂᤡᤏᤡ᤹ᤏᤢ ᤏᤠᤖᤠ ᤋᤢᤶᤍᤢᤶᤒᤠ ᤋᤠ᤹ᤈᤧᤰᤂᤧ॥ 5 ᤂᤧᤴ ᤕᤧᤶᤔᤥ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤴ ᤏᤢ ᤂᤡᤏᤡ᤹ ᤗᤢᤶᤔᤥ ᤐᤥ᤺ᤰᤂᤠᤱᤅᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤧᤴ ᤂᤡᤏᤡ᤹ ᤔᤧᤵᤔᤠᤖᤧ ᤗᤠᤃᤡ ᤕᤧᤒᤠᤱ. ᤌᤣᤀᤠᤱᤓᤧᤸᤗᤧ ᤔᤡ᤺ᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤁᤧᤃᤡᤛᤡᤀᤠᤱ ᤁᤥ᤺ᤰᤔᤠ ᤑᤠᤱᤈᤱᤅᤥ ᤁᤧᤴᤎᤥ᤺ᤰᤁᤠᤛᤡᤴ॥ ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ. 6 “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ. ᤀᤠᤱᤃᤠ᤹ ᤔᤡᤛᤪ ᤗᤠᤈᤣ᤹. ᤀᤡᤃᤪ ᤕᤥᤰ ᤁᤧᤶᤈᤥᤃᤡᤒᤠ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤗ᤺ᤳᤏᤡᤱ ᤑᤧᤳᤏᤡᤱ॥ 7 “ᤀᤠᤱᤃᤠ᤹ᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴ ᤔᤠᤱ ᤛᤠᤶᤔᤠᤱᤜᤠ᤹ᤀᤠᤱ ᤛᤧᤘᤠ ᤔᤧᤔᤧᤳᤋᤧᤶᤛᤡᤶᤔᤡᤴᤏᤧ᤹॥ 8 “ᤂᤡᤏᤡ᤹ ᤀᤠᤵᤑᤣᤰ ᤗᤠᤃᤡ ᤔᤧᤄᤥ᤺ᤴᤍᤧᤶ ᤔᤧᤗᤰᤋᤧᤶᤔᤡᤴᤏᤧ᤹ᤀᤠᤱ ᤀᤠᤳᤋᤡᤴ ᤐᤖᤡᤰᤗᤧᤴᤏᤠᤱ ᤏᤠᤘᤠᤀᤡᤳᤗᤠ ᤔᤧᤈᤥᤃᤧᤶᤔᤡᤴᤏᤧ᤹. ᤌᤠ᤺ᤱ ᤋᤠᤱᤛᤠᤱᤒᤠ ᤀᤡᤃᤪ ᤔᤢ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤁᤡᤃᤪ ᤆᤫᤠ᤺ᤳᤋᤥ ᤁᤧᤕᤠᤰᤐᤠ ᤌᤧᤔᤠ ᤐᤠ᤺ᤴᤏᤡᤸᤗᤧ ᤁᤢᤀᤡᤳᤋᤥᤀᤠᤱ ᤆᤀᤡ᤺ᤳ ᤏᤠᤘᤠᤀᤡᤳᤗᤠ ᤔᤧᤈᤥᤃᤧᤶᤔᤡᤴᤏᤧ᤹॥ 9 ᤂᤧᤱᤜᤠ᤹ ᤋᤃᤡ ᤀ᤺ᤰᤂᤢᤶ ᤔᤧᤓᤴᤏᤠᤛᤡᤶᤔᤡᤴᤏᤧ᤹. ᤂᤧᤱᤜᤠ᤹ ᤔᤠᤱᤛᤧᤘᤠ ᤔᤧᤔᤧᤳᤋᤧᤶᤛᤡᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤘᤣ᤹ ᤔᤠᤱᤜᤠ᤹ ᤏᤠᤛᤡᤔᤧᤴᤎ᤺ᤵᤔᤏᤠᤒᤠ ᤏᤡᤱᤘᤠ᤹ᤑᤢᤔᤠᤱᤀᤠ॥ ᤀᤠᤱᤃᤠ᤹ ᤁᤧᤏᤠ᤹ᤒᤠ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤂᤢᤶᤍᤡᤱᤅᤡᤴ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤌᤡᤴᤍᤠᤱ ᤛᤠᤕᤥᤒᤥᤜᤠ᤹ᤖᤧ ᤂᤢᤴᤇᤡ᤹ ᤛᤢᤶᤛᤡᤃᤣᤰᤐᤠ ᤗᤡᤛᤡᤃᤣᤰᤐᤠ ᤌᤠ᤺ᤰ ᤌᤠᤖᤡᤰ ᤐᤡᤖᤢᤱᤛᤡᤱ᤹. 10 ᤁᤖ ᤀᤠᤱᤃᤠ᤹ ᤔᤡ᤺ᤶᤈᤡ ᤁᤧᤔᤧᤵᤐᤠ ᤏᤢ ᤀᤠᤱᤃᤠ᤹ ᤀᤠᤀᤡᤱᤈᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤜᤧᤴᤇᤡᤱ ᤌᤠ᤺ᤰ ᤌᤠᤖᤡᤰ ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤢᤱᤛᤡᤱ᤹॥ 11 “ᤀᤠᤳᤋᤡᤴ ᤋᤠᤵᤑᤧ᤺ᤶᤒᤠ ᤏᤡᤱᤛᤣ᤺ᤰᤗᤧ ᤗᤠᤃᤡᤀᤠᤱ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤜᤏᤧ ᤔᤧᤒᤠᤋᤠᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤡᤱ ᤑᤧᤰᤁᤧᤗᤠ᤺ᤶᤒᤠᤜᤠ᤹ ᤀᤠᤱᤃᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹॥ 12 “ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤈᤠᤱ ᤁᤧᤒᤡᤖᤡᤒᤠ ᤜᤧᤰᤁᤣ ᤛᤒᤠᤌ ᤕᤧᤴᤏᤡᤴ ᤛᤣᤛᤣ ᤗ᤹ᤖᤡᤰ ᤏᤧᤵᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤀᤥ ᤕᤢᤰᤂᤧᤶᤔᤧ᤹॥ 13 ᤂᤡᤏᤡ᤹ ᤕᤠ᤺ᤶᤒᤰᤁᤡᤴ ᤋᤢᤰᤛᤡ ᤕᤧᤴ ᤌᤠᤖᤡᤰ ᤆᤥᤃᤧᤶᤔᤧ᤹. 14 ᤁᤖ ᤏᤢᤛᤡᤃᤣᤰᤐᤠ ᤕᤧᤴᤏᤡᤱᤃ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤛᤒᤠᤌᤖᤥ॥ ᤂᤧᤸᤗᤧ ᤕᤠ᤺ᤴᤍᤡᤰ ᤂᤡᤏᤡ᤹ ᤌᤧᤔᤠᤀᤠᤱ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹—ᤂᤡᤏᤡ᤹ ᤛᤠᤜᤠ᤹ᤖᤧ. ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ᤖᤧ. ᤐᤡᤳᤜᤠ᤹ᤖᤧ. ᤀᤍᤱ ᤁᤢᤓᤠ ᤌᤰᤛᤠ ᤕᤧᤰᤕᤰᤁᤥ ᤁᤧᤘᤠ᤹ᤒᤠ ᤘᤣ᤹ ᤗᤠᤈᤣ᤹ᤒᤠᤸᤗᤧᤀᤠᤱ ᤌᤧᤔᤠ ᤕᤠ᤺ᤶᤒᤰᤁᤠᤱ ᤔᤧᤈᤥᤃᤢᤴᤗ॥ ᤂᤡᤏᤡ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤂᤡᤏᤡ᤹ᤏᤢ ᤔᤧᤏᤠ᤺ᤶᤛᤡᤱᤗ॥ 15 ᤔᤡᤛᤪ ᤗᤠᤈᤣ᤹ᤀᤥ ᤂᤡᤏᤡ᤹ ᤕᤥᤰ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤢᤔᤢᤰᤛᤠᤶ ᤏᤢ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤂᤡᤏᤡ᤹ ᤁᤧᤗ᤺ᤳᤋᤡ ᤁᤧᤓᤧᤳᤋᤡ. ᤂᤧᤴ ᤂᤡᤏᤡ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹॥ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤒᤠᤌ ᤕᤧᤴᤏᤡᤴ ᤏᤧᤵᤔᤠᤖᤧ ᤗᤠᤃᤡ ᤂᤡᤏᤡ᤹ ᤀᤡᤱᤈᤠᤱ ᤁᤧᤒᤡᤖᤡᤒᤠᤖᤥ॥ 16 “ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤈᤠᤱ ᤁᤧᤒᤡᤖᤡᤒᤠ ᤜᤧᤰᤁᤣᤀᤣ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ ᤏᤢ ᤔᤠᤏᤢᤍᤡᤱ ᤔᤠ᤺ᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤌᤠ᤺ᤰ ᤆᤠ᤹ᤖ. ᤂᤧᤒᤩᤠᤱ ᤂᤧᤵᤔᤥ ᤂᤡᤏᤡ᤹ ᤁᤧᤏᤢᤖᤡ ᤁᤧᤍᤠᤛᤡᤖ॥ 17 “ᤔᤏᤠ ᤔᤧᤛᤧᤖᤧᤶᤔᤧᤴᤏᤧ᤹॥ 18 “ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹॥ 19 “ᤂᤡᤏᤡ᤹ ᤔᤧᤄᤢ᤺ᤳᤋᤧᤶᤔᤡᤴᤏᤧ᤹॥ 20 “ᤂᤡᤏᤡ᤹ ᤜᤡᤶᤒᤣᤛᤠᤱᤒᤧᤴ ᤔᤧᤴᤘᤠ᤹ᤔᤏᤠᤒᤠ ᤀᤠᤵᤋᤡᤰ ᤔᤧᤃᤢᤋᤧᤶᤔᤡᤴᤏᤧ᤹॥ 21 “ᤂᤡᤏᤡ᤹ ᤜᤡᤶᤒᤣᤛᤠᤱᤒᤧᤸᤗᤧ ᤁᤢᤔᤣᤳ. ᤁᤢᤜᤡᤶ. ᤁᤢᤀᤡᤰᤋᤠᤵ. ᤁᤢᤕᤥ᤺ᤃ᤻ᤒᤠ. ᤁᤢᤕᤥ᤺ᤃ᤻ᤔᤠ. ᤁᤢᤒᤡᤳ. ᤁᤢᤀᤍᤱ ᤀᤡᤃᤪ ᤂᤧᤸᤗᤧ ᤁᤢᤎᤧᤔᤠ ᤐᤠ᤺ᤴᤏᤡᤴᤏᤠᤱ ᤔᤡᤰ ᤔᤧᤃᤣ᤺ᤳᤋᤧᤶᤔᤡᤴᤏᤧ᤹॥” 22 ᤁᤴ ᤀᤡᤱᤈᤠᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤥ᤺ᤰᤔᤠ ᤑᤠᤱᤈᤱᤅᤥ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤏᤢ ᤂᤠ᤹ᤔᤡᤳ ᤜᤧᤰᤁᤩᤠᤱ ᤂᤠᤔᤠᤰᤔᤠ ᤗᤢᤶᤔᤥᤗᤠᤶ ᤕᤶᤒᤠ ᤀᤡᤰᤗᤠᤀᤥ ᤂᤡᤏᤡ᤹ ᤁᤧᤖᤧᤰ ᤆᤢᤶᤓᤥ᤺ᤴ ᤁᤧᤔᤧᤳᤋᤡ॥ ᤂᤢᤏᤧ᤹ ᤁᤢᤕᤥ᤹ᤒᤠ ᤘᤣ᤹ ᤌᤧᤔᤠᤀᤠᤱ ᤔᤧᤒᤠ᤺ᤳᤋᤢᤴ॥ ᤜᤧᤰᤁᤩᤠᤱ ᤂᤧᤴ ᤀᤡᤱᤈᤠᤱᤜᤠ᤹ ᤏᤧᤳᤇᤡ ᤛᤠᤵᤗᤢᤱᤜᤠ᤹ᤀᤥ ᤛᤠᤵᤋᤢᤀᤠᤱ ᤀᤠᤱᤃᤠ᤹ ᤐᤡᤖᤠᤱᤗᤥ॥ ᤀᤡᤛᤪᤠᤀᤡᤗᤡᤜᤠ᤹ ᤁᤡᤔᤠ ᤕᤱᤔᤠᤀᤥ ᤔᤧᤎᤩᤧ ( ᤗᤠ ᥈᥆:᥇᥎-᥈᥇ ) 23 ᤂᤡᤏᤡ᤹ ᤂᤠᤔᤠᤰᤔᤠ ᤗᤢᤶᤔᤥᤗᤠᤶ ᤀᤡᤰᤗᤠᤴ ᤁᤧᤄᤧᤵᤛᤢᤶ. ᤜᤧᤰᤁᤩᤠᤱ ᤁᤥ᤺ᤰᤔᤠ ᤑᤠᤱᤈᤱᤅᤡᤴ ᤔᤡᤎᤢᤱ ᤔᤡᤖᤠ᤺ᤰ ᤋᤡᤖᤧᤀᤠᤱ ᤕᤢᤅᤧ. ᤂᤧᤒᤩᤠᤱ ᤂᤡᤏᤡ᤹ ᤌᤠ᤺ᤰᤁᤥᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤏᤢ ᤋᤢᤶᤔᤩᤠᤱᤜᤠᤱᤜᤠ᤹ ᤀᤠᤱᤃᤠ᤹ ᤀᤠᤒᤣᤛᤠᤱ ᤔᤧᤍᤩᤧ॥ 24 ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤏᤢ ᤁᤢᤜᤠᤱᤘᤠᤴ ᤀᤠᤏᤡᤃᤣ ᤀᤥ᤺ᤴᤎᤠᤰᤋᤡᤃᤧ॥ ᤀᤠᤏᤡᤃᤣ ᤂᤢᤏᤧ᤹ ᤁᤢᤀᤡᤰᤗᤠᤴ ᤔᤡᤎᤢᤱ ᤔᤡᤖᤠ᤺ᤰᤗᤠᤶ ᤂᤧᤵᤛᤢᤶᤒᤧ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤏᤠᤜᤠ᤹ᤏᤢ ᤐᤠᤖᤧᤛᤠᤱ ᤔᤏᤠᤜᤠ᤹ ᤁᤢᤜᤡᤱᤘᤧᤳ ᤔᤧᤘᤠ᤹ᤒᤠ ᤀᤠᤏᤡᤃᤣ ᤀᤠᤀᤡᤴᤏᤣ ᤏᤡᤛᤢᤶᤒᤧ॥ 25 ᤁᤖ ᤀᤠᤸᤗ. ᤁᤶᤓᤩᤠᤖᤡᤰ ᤕᤶᤒᤠ ᤔᤡᤎᤢᤱ ᤔᤡᤖᤠ᤺ᤰᤁᤥ ᤌᤣᤀᤠᤱ ᤔᤡᤍᤡᤰᤔᤠᤀᤠᤱ ᤛᤡᤔᤠᤒᤣ᥅ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤰᤗᤠᤴ ᤀᤠᤸᤗᤛᤠᤱ ᤀᤠᤏᤡ᤹ ᤀᤠᤄᤧᤵᤛᤢᤶᤏᤧᤓᤃᤪ ᤀᤠᤏᤡ᤹ ᤀᤠᤛᤡᤖᤥ᥄ 26 ᤔᤡᤎᤢᤱ ᤔᤡᤖᤠ᤺ᤰᤁᤥᤗᤠᤶ ᤁᤢᤜᤡᤱᤘᤧᤳ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤠᤖᤧᤒᤠᤴ ᤁᤧᤄᤧᤶᤒᤠᤀᤠᤱ ᤀᤠᤏᤡ᤹ ᤜᤧᤰᤁᤣ ᤁᤧᤜᤡᤱᤒᤠ ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤀᤠᤳᤋᤡᤴ ᤔᤏᤠᤴ ᤘᤠ᤹ᤒᤣ᥅ 27 ᤂᤧᤏᤧ᤹ ᤀᤠᤵᤑᤣᤰᤁᤣ ᤏᤡ᤺ᤳᤋᤠᤱ ᤐᤣᤃᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤵᤛᤧ᤹ᤀᤠᤱ ᤀᤠᤏᤡᤃᤣ ᤀᤥᤔᤧᤳᤋᤧ᤹. ᤂᤧᤒᤩᤠᤱ ᤀᤠᤏᤡᤃᤣ ᤂᤧᤵᤛᤢᤶᤒᤧᤀᤠᤱ ᤀᤡ᤺ᤳᤋᤢᤶ ᤏᤠ᤺ᤳᤋᤢᤶᤒᤧ॥” 28 ᤂᤡᤏᤡ᤹ ᤀᤠᤱᤃᤠ᤹ᤏᤢ ᤁᤧᤒᤠᤖᤡᤒᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤵᤛᤢ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤁᤴ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤶᤔᤧᤳᤋᤠᤒᤠᤴ ᤀᤠᤱᤃᤠ᤹ ᤂᤧᤵᤛᤢᤱ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤁᤢᤍᤥ᤺ᤵᤔᤠᤀᤣ ᤔᤧᤒᤠ᤺ᤳᤋᤢ॥ 29 ᤀᤠᤱᤃᤠ᤹ᤏᤢ ᤁᤡᤔᤠ ᤜᤧᤰᤁᤩᤠᤱ ᤀᤠᤓᤧᤸᤗᤧᤛᤠᤱ ᤁᤧᤖᤧᤰ ᤀᤠᤒᤠ᤺ᤴᤜᤠ᤹ ᤂᤧᤶᤔᤠ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤁᤧᤃᤳᤋᤢᤶᤔᤡᤸᤗᤧᤃ ᤏᤢᤒᤠ ᤐᤥ᤺ᤰᤂᤧᤒᤠ ᤘᤕᤧ. ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤏᤢ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤛᤍᤠᤍᤡᤱ ᤔᤧᤏᤢᤖᤧ ᤔᤧᤍᤠᤛᤧᤒᤠᤔᤧᤴ॥ 30 ᤐᤣᤃᤧ᤹ᤀᤠᤱ ᤂᤧᤏᤧ᤹ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤂᤡᤏᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤛᤠ᤺ᤱᤃᤠᤜᤡᤶᤔᤥ ᤏᤢ᤺ᤰᤂᤧᤶᤔᤧ᤹॥’ 31 ᤁᤖ ᤂᤧᤏᤧ᤹ ᤁ᤹ᤕᤥ ᤀᤠᤱᤃᤠ᤹ ᤀᤠᤒᤣᤛᤠᤱ ᤕᤧᤒᤧ᤹॥ ᤜᤧᤰᤁᤩᤠᤱ ᤂᤧᤏᤧ᤹ ᤂᤧᤱᤜᤠ᤹ ᤜᤢ᤹ᤔᤠᤛᤡ ᤁᤧᤒᤥᤱᤒᤠ ᤁᤧᤖᤧᤰ ᤀᤡᤱᤈᤠᤱᤜᤠ᤹. ᤌᤡᤶ ᤏᤢ ᤛᤠᤶᤕᤥᤌᤡᤶᤜᤠ᤹ ᤀᤠᤱᤃᤠ᤹ ᤂᤧᤏᤧ᤹ ᤔᤧᤳᤏᤧ. ᤂᤧᤒᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤐᤡᤖᤢᤱᤛᤡᤱᤅᤠᤱ ᤏᤧᤒᤠ ᤗᤠᤈᤣ᤹ᤀᤥ ᤂᤧᤱᤜᤠ᤹ᤖᤧ ᤂᤧᤴ ᤌᤡᤶᤜᤠ᤹ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤖ॥” 32 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤁᤢᤀᤡᤱᤈᤠᤱᤜᤠ᤹ ᤏᤢᤖᤡᤰᤁᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹. ᤆᤢᤰᤘᤠ ᤑᤧᤱᤘᤠ ᤗᤧᤵᤔᤠᤱ ᤀᤠᤳᤋᤡᤀᤠᤱ ᤔᤧᤒᤣᤃᤧᤶᤔᤡᤴᤏᤧ᤹॥ 33 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤗᤠᤱᤄᤣ᤺ᤰᤔᤠᤖᤧ ᤗᤠᤃᤡ ᤁᤧᤒᤡᤖᤡᤒᤠ ᤀᤡᤱᤈᤠᤱ ᤁᤢᤀᤡᤛᤡᤰ ᤁᤧᤖᤧᤰ ᤗᤠᤶᤜᤠ᤹ᤀᤥ ᤗᤠᤱᤄᤣᤃᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤕᤢᤰ ᤁᤧᤈᤥᤃᤢᤶᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤁᤢᤜᤡᤱᤘᤧᤳ ᤘᤕᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤏᤢᤖᤡ ᤁᤧᤍᤠᤛᤡᤖ. ᤂᤧᤒᤩᤠᤱ ᤂᤡᤏᤡ᤹ ᤌᤠ᤺ᤰ ᤆᤠ᤹ᤖᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.