ᤛᤠᤶᤕᤥᤌᤡᤶ ᤀᤡᤱ 4 - LIFOTNTᤁᤢᤀᤡᤈᤠ᤺ᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤳᤔᤠ 1 ᤀᤠᤸᤗ. ᤀᤡᤛᤪᤠᤀᤡᤗᤡᤛᤣ. ᤀᤠᤱᤃᤠ᤹ ᤂᤡᤏᤡ᤹ ᤜᤢ᤹ᤔᤠ ᤆᤥ᤺ᤰᤏᤡᤱᤒᤠ ᤛᤠᤰᤌᤡᤶᤜᤠ᤹ᤀᤥ ᤏᤡᤱᤘᤠ᤹ ᤐᤡᤖᤧᤶᤔᤧ᤹॥ ᤂᤧᤱᤜᤠ᤹ ᤂᤡᤏᤡ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹. ᤂᤧᤒᤩᤠᤱ ᤂᤡᤏᤡ᤹ ᤁᤧᤜᤡᤅᤡ᤹. ᤂᤶᤓᤩᤠᤱ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤐᤡᤔᤠ ᤁᤧᤀᤡ᤺ᤳᤋᤡᤒᤠ ᤗᤠᤈᤣᤴ ᤕᤢᤰ ᤁᤧᤈᤥᤃᤢᤶ᤹॥ 2 ᤀᤠᤱᤃᤠ᤹ ᤂᤡᤏᤡ᤹ ᤐᤡᤏᤡᤱᤒᤠ ᤀᤡᤱᤈᤠᤱᤜᤠ᤹ᤀᤥ ᤁᤢᤓᤠ ᤌᤧᤔᤠᤀᤠᤱ ᤔᤧᤕᤥ᤹ᤖᤧᤶᤔᤡᤴᤏᤧ᤹. ᤌᤧᤔᤠᤀᤠᤱ ᤔᤧᤄᤰᤋᤧᤶᤔᤡᤴᤏᤧ᤹ ᤁᤖ ᤀᤠᤱᤃᤠ᤹ ᤂᤡᤏᤡ᤹ ᤐᤡᤏᤡᤱᤗ ᤐᤳᤋᤠᤒᤠ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤈᤠ᤺ᤱᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥ 3 ᤒᤠᤗ-ᤐᤥᤖᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤌᤧᤔᤠ ᤆᤥᤃᤢ ᤂᤧᤴ ᤂᤡᤏᤡ᤹ ᤀᤠᤵᤑᤣᤰ ᤔᤡᤰᤁᤡᤸᤗᤧ ᤁᤧᤏᤡᤛᤢᤶᤔᤠᤱ ᤘᤠ᤹॥ ᤐᤥᤖᤒᤠ ᤒᤠᤗ ᤔᤠᤱᤅᤡᤴ ᤁᤧᤍᤡᤶᤒᤠ ᤁᤧᤖᤧᤰ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤗᤢᤶᤔᤥᤗᤠᤶ ᤔᤧᤰᤂᤢᤛᤡ॥ 4 ᤁᤖ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤆᤰᤔᤧᤸᤗ᤹ᤀᤣ ᤁᤧᤒᤵᤐᤠ ᤂᤡᤏᤡ᤹ ᤗᤢᤶᤔᤥᤒᤠ ᤔᤏᤠᤜᤠ᤹ ᤁᤧᤖᤧᤰ ᤀᤠᤀᤡᤴ ᤌᤠᤖᤡᤰᤛᤠᤱ ᤁᤢᤜᤡᤱᤘᤧᤳ ᤔᤧᤘᤠ᤹॥ 5 ᤀᤥᤔᤧᤳᤋᤧᤶᤔᤧ᤹. ᤕᤜᤘᤣ ᤍᤠᤱᤒᤠ ᤀᤠᤱᤃᤠ᤹ ᤔᤠᤱᤛᤧᤘᤠ ᤔᤧᤳᤋᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤈᤠᤱ ᤐᤡᤖᤠᤱᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤕᤢᤰ ᤆᤥ᤺ᤰᤔᤠ ᤁᤧᤈᤥᤃᤢᤶᤒᤠ ᤗᤠᤈᤣ᤹ᤀᤥ ᤁᤴᤜᤠ᤹ ᤁᤧᤖᤧᤰ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡᤀᤣ ᤀᤠᤱᤃᤠ᤹ ᤂᤡᤏᤡ᤹ ᤁᤴ ᤌᤡᤶᤜᤠ᤹ ᤜᤢ᤹ᤏᤡᤱᤅᤠᤱ ᤘᤠ᤹॥ 6 ᤂᤡᤏᤡ᤹ ᤂᤧᤴ ᤀᤡᤱᤈᤠᤱᤜᤠ᤹ᤀᤥ ᤋᤧᤴᤍᤧᤶᤔᤧ᤹ ᤜᤧᤰᤁᤩᤠᤱ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤀᤠᤶᤓᤠ ᤁᤴᤗᤠᤶ ᤘᤣ᤹ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤡᤏᤡ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤏᤢ ᤂᤠᤛᤡᤱᤏᤡ᤺ᤵᤔᤠᤴ ᤀᤡᤱᤔᤧᤓᤥᤛᤢ᤹॥ ᤁᤴ ᤁᤧᤖᤧᤰ ᤌᤡᤶᤜᤠ᤹ ᤔᤧᤄᤧᤵᤛᤢᤀᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ᤹. “ᤛᤧᤰᤂᤠᤛᤠᤱ ᤁᤴ ᤐᤕᤶ ᤕᤶᤒᤠ ᤛᤢᤘᤠᤱᤒᤠ ᤔᤏᤠᤜᤠ᤹ ᤛᤠ᤹ᤖᤡᤰ ᤛᤡᤰᤁᤢᤶᤛᤠᤒᤠ ᤏᤢ ᤂᤠᤛᤡᤱ ᤁᤧᤏᤡ᤺ᤵᤐᤠᤛᤡᤖᤧᤳᤇ᥄” 7 ᤀᤠᤏᤡ᤹ ᤂᤢᤏᤧ᤹ ᤐᤣᤗᤡ ᤀᤠᤓᤠᤰᤋᤢᤶᤔᤡᤸᤗᤧ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ ᤏᤡ᤺ᤳᤋᤠᤱ ᤘᤠ᤹ᤒᤠ ᤜᤧᤰᤁᤣ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤏᤡ᤺ᤳᤋᤠᤱ ᤁᤧᤘᤠ᤹ᤒᤠ ᤘᤣ᤹ ᤀᤠᤳᤋᤡᤴ ᤐᤕᤶ ᤕᤶᤒᤠ ᤔᤧᤴᤇᤠᤶ ᤛᤢᤘᤠᤱ ᤘᤠ᤹ᤒᤣ᥅ 8 ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤐᤡᤏᤡᤱᤒᤠ ᤁᤴ ᤛᤠᤶᤕᤥᤌᤡᤶᤜᤠ᤹ ᤁᤢᤀᤡᤛᤡᤰ ᤛᤠᤶᤕᤥ ᤛᤠᤰᤌᤡᤶᤜᤠ᤹ ᤁᤧᤃᤵᤐᤠ ᤘᤣ᤹ ᤀᤠᤳᤋᤡᤴ ᤐᤕᤶ ᤕᤶᤒᤠ ᤛᤢᤘᤠᤱ ᤘᤠ᤹ᤒᤣ᥅ 9 ᤁᤖ ᤛᤡᤱᤛᤡᤱ ᤘᤕᤧᤶᤔᤧ᤹ ᤜᤧᤰᤁᤩᤠᤱ ᤀᤠᤵᤑᤣᤰ ᤏᤡᤱᤘᤠ᤹ ᤕᤧᤰᤕᤧᤰ ᤗ᤹ᤖᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤔᤡᤰᤁᤡᤸᤗᤧ ᤁᤧᤏᤡᤛᤢᤶᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤂᤧᤴ ᤂᤡᤏᤡ᤹ ᤜᤡᤱᤜᤡᤱ ᤌᤠᤖᤡᤰ ᤂᤡᤏᤡ᤹ ᤏᤡᤱᤘᤠ᤹ᤀᤥᤏᤢ ᤔᤧᤗ᤺ᤴᤏᤧᤴ ᤔᤧᤒᤣ᤺ᤰᤏᤧᤴᤗ॥ ᤂᤧᤱᤜᤠ᤹ ᤂᤡᤏᤡ᤹ ᤛᤠᤜᤠ᤹ ᤏᤢ ᤔᤧᤴᤇᤠ᤹ᤜᤠ᤹ ᤜᤢ᤹ᤖᤧᤶᤛᤡᤶᤔᤧ᤹॥ 10 ᤜᤥᤖᤣᤒ ᤁᤥ᤺ᤰᤔᤠᤀᤥ ᤂᤡᤏᤡ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤁᤧᤕᤧᤒᤡᤒᤠ ᤕᤧᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹. ᤀᤠᤸᤗ ᤂᤢᤏᤧ᤹ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤀᤠᤱᤃᤠ᤹ ᤀᤠᤒᤠ᤺ᤴᤈᤠᤰ ᤂᤧᤶᤔᤠᤖᤧ ᤗᤠᤃᤡ ᤔᤏᤠᤜᤠ᤹ ᤀᤠᤱᤃᤠ᤹ ᤀᤠᤍᤃᤡ ᤛᤢᤵᤛᤧᤛᤧ᤹. ᤜᤧᤰᤁᤩᤠᤱ ᤂᤧᤴ ᤗᤠᤈᤣ᤹ᤀᤥ ᤂᤢᤴᤇᤡ᤹ ᤜᤡᤱᤜᤡᤱ ᤀᤠᤱᤃᤠ᤹ᤏᤢ ᤁᤡᤔᤠ ᤔᤧᤜᤢ᤹ᤛᤡᤱᤗ ᤂᤶᤓᤩᤠᤱ ᤂᤧᤴ ᤐᤠ᤺ᤴᤈᤠ᤺ᤰᤜᤠ᤹ ᤂᤢᤴᤇᤡ᤹ ᤛᤠᤜᤠ᤹ᤀᤠᤱ ᤔᤧᤜᤢ᤹ᤖᤢᤛᤡᤖ॥” 11 ᤁᤥ᤺ᤰᤔᤠ ᤑᤠᤱᤈᤱᤅᤥ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤐᤥᤃᤧᤀᤠᤱ ᤋᤠᤱᤛᤠᤱᤒᤥ ᤌᤠᤖᤡᤰᤁᤣ ᤁᤧᤖᤧ. ᤜᤧᤰᤁᤩᤠᤱ ᤁᤢᤒ᤺ᤳ ᤁᤢᤒ᤺ᤳ ᤂᤠ᤹ᤔᤡᤳ ᤀᤡᤰᤛᤡᤱ ᤋᤩᤧᤀᤠᤱ ᤂᤧᤵᤔᤥ ᤂᤠᤔᤠᤰᤋᤧᤒᤠ ᤕᤧᤶᤔᤥ ᤂᤡᤏᤡ᤹ ᤁᤧᤍᤩᤧ᤹ᤀᤡ ᤜᤧᤰᤁᤩᤠᤱ ᤁᤥ᤺ᤰᤔᤠ ᤑᤠᤱᤈᤱᤅᤡᤸᤗᤧ ᤁᤢᤒᤢᤱᤅᤥ ᤁᤧᤕᤧᤒᤡ॥ 12 ᤂᤧᤒᤩᤠᤱ ᤔᤡᤎᤢᤱ ᤔᤡᤖᤠ᤺ᤰ ᤗᤢᤶᤔᤥᤗᤠᤶ ᤕᤜᤘᤣ ᤍᤠᤱᤒᤧᤴ ᤂᤡᤏᤡ᤹ᤏᤢ ᤐᤠᤖᤧ॥ ᤂᤧᤴ ᤕᤧᤶᤔᤥ ᤂᤡᤏᤡ᤹ ᤐᤠ᤺ᤴᤇᤣ᤺ᤰᤘᤠ ᤀᤡᤰᤗᤠ᤺ᤴᤗᤰ ᤁᤧᤄᤧᤵᤛᤢᤶ. ᤁᤖ ᤁᤢᤓᤠ ᤌᤧᤔᤠ ᤆᤀᤡ᤺ᤳᤋᤠᤱ ᤁᤧᤴᤏᤡᤛᤢᤶᤔᤡᤴ॥ ᤂᤡᤏᤡ᤹ ᤗᤳᤇᤠ ᤀᤡᤰᤗᤠᤖᤰ ᤁᤧᤄᤧᤵᤛᤢᤶ॥ 13 ᤂᤢᤏᤧ᤹ ᤁᤢᤔᤠᤱᤜᤢᤵᤐᤡᤴ. ᤌᤡᤒᤥᤱ ᤁᤢᤀᤡᤱᤈᤠᤱᤜᤠ᤹ ᤂᤡᤏᤡ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤗ ᤑᤠ᤹ᤀᤠᤱ ᤂᤢᤏᤧ᤹ ᤁᤧᤒᤡᤖᤡ. ᤜᤧᤰᤁᤩᤠᤱ ᤏᤧᤳᤇᤡ ᤛᤠᤵᤗᤢᤱᤅᤥ ᤂᤧᤱᤜᤠ᤹ ᤛᤠᤵᤋᤢ ᤁᤧᤒᤡᤖᤡ॥ 14 ᤕᤷᤍᤏ ᤏᤠᤎᤠ᤺ᤶᤒᤡ ᤁᤧᤃᤠ᤺ᤰᤋᤢᤶᤔᤠᤱ ᤂᤡᤏᤡ᤹ ᤕᤢᤰ ᤆᤥ᤺ᤰᤔᤠ ᤁᤧᤀᤡ᤺ᤳᤋᤢᤶᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹ ᤑᤠ᤹ᤀᤠᤱ ᤌᤡᤶ ᤛᤠᤰᤌᤡᤶᤜᤠ᤹ ᤂᤡᤏᤡ᤹ ᤜᤢ᤹ᤔᤠ ᤀᤡᤱᤈᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤕᤧᤶᤔᤥ ᤀᤠᤱᤃᤠ᤹ ᤐᤡᤖᤠᤱᤅᤠᤱ ᤘᤕᤧᤖᤥ॥ ᤏᤠᤘᤠᤀᤡᤳᤗᤠ ᤛᤧᤘᤠ ᤔᤧᤵᤔᤠ ᤔᤣ᤺ᤴ 15 ᤜᤥᤖᤣᤒ ᤁᤥ᤺ᤰᤔᤠᤀᤥ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤗᤢᤶᤔᤥᤗᤠᤶ ᤕᤜᤘᤣ ᤍᤠᤱᤒᤧᤴ ᤐᤠᤖᤧᤸᤗᤧ ᤕᤠ᤺ᤴᤍᤡᤰ ᤂᤡᤏᤡ᤹ ᤌᤧᤔᤠᤀᤠᤱ ᤆᤀᤡ᤺ᤳ ᤁᤧᤴᤏᤡᤛᤢᤶᤔᤡᤴ॥ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤘᤕᤧᤶᤔᤧ᤹. 16 ᤔᤣ᤺ᤴᤏᤧᤓᤃᤪ ᤂᤡᤏᤡ᤹ ᤑᤧᤰᤁᤧᤸᤗᤠ᤹ᤖᤡ᤹. ᤂᤡᤏᤡ᤹ ᤀᤠᤵᤑᤣᤰ ᤗᤠᤃᤡ ᤗᤳᤇᤠ ᤏᤠᤘᤠᤀᤡᤳᤗᤠ ᤁᤧᤈᤥᤃᤢᤶ᤹ ᤜᤧᤰᤁᤩᤠᤱ ᤁᤢᤓᤠ ᤕᤧᤶᤒᤡᤳᤇᤠ ᤀᤡᤃᤪ ᤔᤧᤴᤇᤢᤔᤠ ᤆᤀᤡ᤺ᤳ. 17 ᤀᤡᤃᤪ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤌᤰᤛᤠᤜᤠ᤹ ᤁᤡᤃᤪ ᤁᤢᤓᤠ ᤋᤠᤱᤛᤠᤱᤒᤥ ᤁᤧᤒᤧᤒᤠ ᤁᤢᤓᤠ ᤐᤢ᤺ᤸᤗᤧᤴ. 18 ᤂᤠᤶᤒᤠᤱᤅᤥ ᤁᤧᤛ᤺ᤴᤇᤡᤱᤒᤠ ᤁᤢᤓᤠ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠ ᤀᤡᤃᤪ ᤆᤫᤠ᤺ᤳᤋᤥ ᤁᤧᤕᤠᤰᤐᤠ ᤁᤢᤓᤠ ᤅᤠ᤺ᤸᤗᤧ ᤁᤢᤈᤀᤡ᤺ᤳ ᤔᤧᤈᤥᤃᤧᤶᤔᤡᤴᤏᤧ᤹॥ 19 ᤋᤠᤱᤛᤠᤱᤒᤥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤗᤠᤃᤡ ᤐᤡᤖᤢᤛᤡᤒᤠ ᤏᤠᤶ. ᤗᤠᤒᤠ. ᤂᤣ᤺ᤶᤛᤡᤰᤐᤠᤜᤠ᤹ ᤁᤧᤖᤧᤰ ᤂᤣᤛᤣᤒᤠᤜᤠ᤹ ᤁᤣᤏᤡᤛᤢᤶᤛᤡᤶᤔᤡᤸᤗᤧ ᤂᤧᤱᤜᤠ᤹ᤀᤥ ᤂᤡᤏᤡ᤹ ᤛᤡᤰᤔᤧᤛᤶᤏᤧᤴᤗ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤠᤱᤛᤧᤘᤠ ᤏᤢ ᤛᤧᤘᤠ ᤔᤧᤔᤧᤳᤋᤧᤶᤛᤡᤶᤔᤡᤴᤏᤧ᤹॥ 20 ᤁᤖ ᤂᤡᤏᤡ᤹ᤃ ᤕᤜᤘᤣ ᤍᤠᤱᤒᤧᤸᤗᤧ ᤑᤧᤴᤈᤣ᤹ ᤕᤥ᤺ᤶᤔᤠ ᤔᤡᤄᤠᤱᤃᤪᤥ᤺ᤰ ᤜᤧᤰᤋᤱᤒᤠ ᤔᤡᤛᤪᤗᤠᤶ ᤀᤠᤵᤑᤣᤰ ᤁᤢᤗᤰᤂᤥᤔᤠ ᤜᤧᤰᤋᤱᤒᤠ ᤀᤠᤀᤡᤴ ᤁᤧᤘᤕᤡᤒᤠ ᤜᤧᤰᤁᤣ ᤁᤢᤔᤏᤠ ᤆᤥ᤺ᤰᤔᤠᤏᤡᤱᤗᤧ ᤗᤠᤃᤡ ᤁᤧᤗ᤺ᤳᤋᤡ ᤁᤧᤓᤧᤳᤋᤡᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹॥ 21 ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧ ᤕᤜᤘᤣ ᤍᤠᤱᤒᤧᤴ ᤀᤠᤱᤃᤠ᤹ᤏᤢ ᤁᤢᤕᤠ᤺ᤰᤗᤧ᤹ᤖᤧ. ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤷᤍᤏ ᤏᤠᤎᤠ᤺ᤶᤒᤡ ᤐᤣ᤺ᤰᤔᤠ ᤔᤧᤱᤄᤥᤶᤏᤠᤒᤠ ᤏᤢ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤕᤢᤰ ᤐᤡᤔᤠ ᤁᤧᤀᤡ᤺ᤳᤋᤡᤒᤠ ᤂᤧᤴ ᤏᤢᤒᤠ ᤗᤠᤈᤣ᤹ᤀᤥ ᤗᤠ᤺ᤵᤔᤠ ᤔᤧᤄᤥᤀᤠᤴᤒᤠ ᤔᤠᤱᤜᤧᤰ ᤆᤥᤃᤢ॥ 22 ᤀᤠᤱᤃᤠ᤹ ᤜᤠᤒᤠ ᤁᤴ ᤗᤠᤈᤣ᤹ᤀᤥᤀᤣ ᤛᤡᤔᤠ ᤁᤧᤒᤥᤱᤒᤠ ᤘᤠ᤹॥ ᤀᤠᤱᤃᤠ᤹ ᤕᤷᤍᤏ ᤏᤠᤎᤠ᤺ᤶᤒᤡ ᤐᤣ᤺ᤰᤔᤠ ᤔᤧᤄᤥᤀᤠᤴ. ᤁᤖ ᤂᤡᤏᤡ᤹ ᤏᤠᤎᤠ᤺ᤶᤒᤡ ᤐᤣ᤺ᤰᤔᤠᤀᤠᤱ ᤂᤧᤴ ᤏᤢᤒᤠ ᤗᤠᤈᤣᤴ ᤕᤢᤰ ᤆᤥ᤺ᤰᤔᤠ ᤁᤧᤈᤥᤃᤢᤶ᤹॥ 23 ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹॥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤏᤢ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹. ᤜᤧᤰᤁᤩᤠᤱ ᤂᤢᤏᤧ᤹ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ ᤐᤠ᤺ᤳᤋᤢᤒᤠ ᤀᤠᤳᤋᤡᤴ ᤐᤠ᤺ᤴᤏᤡᤴᤏᤠᤱ ᤂᤡᤏᤡ᤹ ᤏᤠᤘᤠᤀᤡᤳᤗᤠ ᤔᤧᤈᤥᤃᤧᤶᤔᤡᤴᤏᤧ᤹॥ 24 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤀᤠᤔᤧᤱᤔᤧᤱᤒᤠ ᤔᤡᤖᤥ. ᤂᤢᤏᤧ᤹ᤃ ᤘᤣ᤹ ᤔᤠᤱᤜᤠ᤹ ᤏᤠᤛᤡᤔᤧᤴᤎ᤺ᤵᤔᤏᤠᤒᤠ ᤏᤡᤱᤘᤠ᤹ᤑᤢᤔᤠᤱᤗᤥ॥ 25 ᤂᤡᤏᤡ᤹ ᤕᤧᤶᤒᤡᤳᤇᤠ ᤔᤧᤴᤇᤢᤔᤠ ᤛᤠᤜᤠ᤹ ᤏᤢ ᤔᤧᤴᤇᤠ᤹ᤜᤠ᤹ ᤁᤧᤃᤳᤋᤢᤶ ᤁᤧᤛᤢᤖᤢᤶᤛᤡᤶᤔᤠᤱ ᤜᤠᤒᤠ ᤂᤧᤴ ᤗᤠᤈᤣ᤹ᤀᤥ ᤕᤖᤡᤰ ᤋᤱᤒᤣ ᤕᤠᤖᤡᤰ ᤁᤧᤕᤢᤅᤡ ᤁᤧᤈᤢᤖᤡ ᤜᤧᤰᤁᤩᤠᤱᤛᤠᤱ ᤑᤧᤳᤁᤧᤗᤠᤖᤡᤀᤠᤱ ᤁᤢᤓᤠ ᤐᤠ᤺ᤴᤏᤡᤸᤗᤧ ᤁᤢᤈᤀᤡ᤺ᤳ ᤁᤢᤀᤡᤛᤡᤰ ᤁᤢᤀᤡ᤺ᤳ ᤁᤧᤗᤰᤋᤢᤶ ᤁᤧᤄᤥ᤺ᤴᤍᤢᤶᤔᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤰᤛᤠᤀᤥ ᤑᤧᤴᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱ ᤂᤢᤏᤧ᤹ ᤁᤢᤛᤡᤰ ᤁᤧᤓᤥ᤺ᤰᤂᤢᤶᤏᤧᤓᤃᤪ. 26 ᤂᤡᤏᤡ᤹ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤕᤷᤍᤏ ᤏᤠᤎᤠ᤺ᤶᤒᤡ ᤐᤣ᤺ᤰᤔᤠ ᤁᤧᤀᤡ᤺ᤳᤋᤡᤒᤠ ᤂᤧᤴ ᤗᤠᤈᤣ᤹ᤀᤥ ᤜᤠᤖᤠᤀᤣ ᤂᤡᤏᤡ᤹ ᤁᤧᤖᤧᤰ ᤜᤷᤃᤢᤵ ᤁᤧᤔᤧᤃᤡ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤠᤀᤡᤴᤒᤠ ᤕᤧᤴᤏᤥ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤀᤡᤱᤛᤢᤱ᤹. ᤜᤧᤰᤁᤩᤠᤱ ᤕᤖᤡᤰ ᤕᤧᤴ ᤕᤢᤱᤔᤠ ᤁᤧᤱᤄᤥᤛᤢᤶᤔᤡᤴ᤹ ᤁᤖ ᤘᤖᤧᤱᤗᤧᤱ ᤕᤢᤔᤪᤧᤰ ᤁᤧᤔᤧᤃᤡ᤹॥ 27 ᤕᤜᤘᤣ ᤍᤠᤱᤒᤧᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤗᤢᤶᤔᤥ ᤑᤢᤳᤇᤡᤱᤈᤩᤠᤱ ᤁᤧᤈᤥᤃᤡ᤹. ᤜᤧᤰᤁᤩᤠᤱ ᤂᤢᤏᤧ᤹ ᤂᤡᤏᤡ᤹ ᤁᤧᤏᤠ᤺ᤳᤋᤡ ᤁᤧᤍᤣᤛᤡᤒᤠ ᤗᤠᤈᤣ᤹ᤀᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤗᤢᤶᤔᤥ ᤂᤡᤏᤡ᤹ ᤛᤠ᤹ᤖᤡᤰ ᤛᤢ᤺ᤸᤗᤡᤰ ᤁᤧᤒᤥ᤺ᤰᤂᤡ᤹॥ 28 ᤂᤧᤵᤔᤥ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤡᤸᤗᤧ ᤔᤧᤈᤥᤃᤢᤛᤡᤒᤠ. ᤏᤡᤔᤠ ᤔᤧᤴᤇᤢᤰᤔᤏᤠᤒᤠ. ᤂᤧᤶᤔᤠ ᤔᤧᤴᤇᤢᤰᤔᤏᤠᤒᤠ. ᤆᤠᤔᤠ ᤔᤧᤴᤇᤢᤰᤔᤏᤠᤒᤠ. ᤏᤠᤶᤔᤠ ᤔᤧᤴᤇᤢᤰᤔᤏᤠᤒᤠ ᤛᤡᤱ ᤏᤢ ᤗᤢᤱ ᤔᤠᤱᤜᤠ᤹ ᤂᤡᤏᤡ᤹ ᤛᤧᤘᤠ ᤁᤧᤔᤧᤳᤋᤢᤶᤛᤡᤶ᤹॥ 29 ᤁᤖ ᤂᤧᤵᤔᤥᤀᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤁᤧᤃᤥ᤺ᤳᤋᤢᤶ᤹ ᤂᤧᤒᤩᤠᤱ ᤂᤡᤏᤡ᤹ ᤁᤧᤖᤧᤰ ᤛᤡᤰᤗᤢᤱᤔᤠ᤹ ᤏᤢ ᤛᤰᤔᤠ ᤛᤠᤶᤔᤡᤸᤗᤧ ᤁᤧᤜᤰᤛᤢᤶᤏᤧᤓᤃᤪ ᤂᤡᤏᤡ᤹ ᤂᤢᤏᤧ᤹ ᤁᤧᤄᤥᤛᤢᤶ᤹॥ 30 ᤕᤠᤱᤛᤡᤒᤠ ᤕᤧᤴᤜᤠ᤹ᤀᤥ ᤀᤠᤸᤗ ᤂᤡᤏᤡ᤹ ᤁᤧᤛᤠᤰᤐᤥ ᤁᤧᤎᤩᤧ᤹ᤀᤡ ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤧᤳᤏᤡᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤛᤶᤎᤠᤱ ᤀᤡᤍᤠᤖᤥ. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤀᤠᤵᤑᤣᤰ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤁᤧᤏᤢ᤺ᤰᤂᤡ᤹. ᤂᤶᤓᤩᤠᤱ ᤂᤢᤏᤧ᤹ ᤁᤢᤒᤠ᤺ᤴᤈᤠᤰᤁᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶ᤹॥ 31 ᤂᤢᤏᤧ᤹ ᤂᤡᤏᤡ᤹ ᤗᤠᤵᤁᤧᤴᤍᤡᤛᤡᤴ᤹ ᤁᤧᤶᤔᤧᤰᤂᤡᤴ᤹॥ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤏᤢ ᤂᤢᤏᤧ᤹ ᤆᤥᤃᤢᤒᤠ ᤔᤠᤱᤜᤧᤰᤗᤠᤶ ᤏᤡ᤺ᤴᤎᤥ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤂᤢᤏᤧ᤹ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤴ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤆᤥᤰᤗᤥ॥ ᤏᤡᤱᤘᤠ᤹ᤑᤢᤔᤠᤱ ᤗᤳᤇᤠᤖᤰ ᤘᤠ᤹ 32 ᤀᤰᤋᤱᤒᤠ ᤐᤕᤶ ᤕᤶᤒᤠ ᤜᤡᤴᤍᤥᤰ ᤀᤠᤵᤑᤠᤸᤗᤧ ᤐᤥ᤺ᤰᤂᤧᤀᤠᤱ ᤘᤕᤧ ᤀᤡᤃᤪ ᤂᤧᤶᤍᤧᤳᤋᤧᤀᤠᤱ ᤘᤕᤧᤒᤣ᥅ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤇᤠᤶ ᤕᤠᤵᤔᤡ ᤏᤠᤘᤠᤃᤧᤴ ᤆᤥᤃᤢᤛᤡᤒᤠ ᤋᤥᤗᤡᤱᤛᤥᤔᤢᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤥ᤺ᤳᤋᤧᤶ ᤜᤰᤛᤧᤶᤔᤧ᤹॥ ᤋᤠᤱᤛᤠᤱᤒᤠᤸᤗᤧ ᤁᤳᤏᤠᤛᤔᤠ ᤁᤢᤕᤠᤀᤥᤏᤢ ᤏᤠᤛᤔᤠ ᤁᤢᤕᤠᤀᤥ ᤌᤠᤖᤡᤰᤁᤠᤱ ᤜᤠᤒᤠ ᤁᤴ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤆᤥᤃᤧᤶᤔᤧ᤹॥ 33 ᤀᤠᤳᤋᤡᤴ ᤛᤢᤘᤠᤱᤜᤠ᤹ᤖᤧ ᤂᤡᤏᤡ᤹ ᤜᤧᤰᤁᤣᤀᤣ ᤔᤡᤗᤠᤶ ᤁᤧᤒᤠ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤔᤧᤘᤠ᤹ᤒᤣ᥅ ᤜᤧᤰᤁᤩᤠᤱ ᤔᤧᤜᤡᤅᤧᤀᤠᤱ ᤔᤧᤘᤠ᤹ᤒᤡ᥅ 34 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤗᤠᤃᤡ ᤔᤡᤛᤪ ᤗᤠᤈᤣ᤹ᤀᤥ ᤆᤥᤃᤢᤒᤠ ᤁᤢᤀᤡᤛᤡᤰ ᤀᤠᤳᤋᤡᤴ ᤔᤠᤱᤅᤡᤸᤗᤧ ᤁᤢᤛᤢᤘᤠᤱᤅᤡᤴ ᤘᤣ᤹ᤛᤔᤠ ᤛᤢᤘᤠᤱᤗᤠᤶ ᤗ᤺ᤳᤋᤢᤛᤡᤀᤠᤱ ᤀᤠᤵᤑᤣᤰ ᤁᤢᤔᤏᤠ ᤆᤥᤃᤢᤛᤡᤀᤠᤱ ᤘᤠ᤹ᤒᤣ᥅ ᤂᤡᤏᤡ᤹ᤀᤣ ᤔᤡᤰ ᤋᤃᤡ ᤂᤢᤏᤧ᤹ ᤐᤕᤶ ᤕᤶᤒᤠ ᤁᤢᤔᤢᤰᤛᤠᤶᤔᤡᤴ ᤏᤢ ᤁᤢᤔᤢᤰᤁᤡᤴ ᤀᤥᤃᤵ ᤆᤥᤃᤢ॥ ᤂᤢᤏᤧ᤹ ᤐᤕᤶ ᤕᤶᤒᤠ ᤔᤠᤱᤍᤢᤰᤔᤠ ᤏᤢ ᤋᤧᤴᤎᤱ ᤐᤥᤃᤧᤖ ᤕᤠ᤺ᤴᤍᤢ. ᤏᤧᤜᤡᤏᤡᤱᤘᤠ᤹ᤖᤧ ᤔᤧᤴᤎᤠᤵᤔᤏᤠᤒᤠ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤀᤠᤱ ᤁᤡᤵᤔᤠ ᤁᤧᤄᤢᤒᤠ ᤐᤠ᤺ᤴᤜᤠ᤹ ᤐᤥ᤺ᤰᤂᤧᤖ ᤕᤠ᤺ᤴᤍᤢ॥ 35 ᤕᤜᤘᤣ ᤍᤠᤱᤒᤧᤴᤏᤣ ᤏᤡᤱᤘᤠ᤹ᤑᤢᤔᤠᤱ. ᤜᤧᤰᤁᤩᤠᤱ ᤂᤢᤏᤧ᤹ᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤋᤠᤱ ᤜᤥᤵ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤑᤠ᤹ᤀᤠᤱ ᤂᤧᤱᤜᤠ᤹ ᤂᤢᤏᤧ᤹ ᤀᤥ᤺ᤴᤎᤠᤰᤋᤢᤛᤡᤒᤠᤖᤥ॥ 36 ᤂᤡᤏᤡ᤹ ᤜᤧᤴᤌᤡᤶ ᤕᤠᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤢᤀᤡᤰᤗᤠᤴ ᤁᤧᤄᤧᤵᤛᤢᤶᤗ ᤁᤧᤕᤠ᤺ᤴᤍᤡ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤢᤏᤧ᤹ ᤕᤶᤒᤠ ᤔᤡᤴ ᤀᤥ᤺ᤴᤃᤧᤎᤠᤰᤋᤡ॥ ᤔᤡᤗᤠᤶᤒᤠ ᤂᤡᤏᤡ᤹ ᤂᤢᤏᤧ᤹ ᤁᤢᤒᤠ᤺ᤴᤜᤠ᤹ ᤁᤧᤄᤧᤵᤛᤢᤶ॥ 37 ᤂᤢᤏᤧ᤹ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤣᤃᤠᤱ ᤂᤢᤴᤇᤡ᤹ ᤌᤠ᤺ᤰᤜᤠ᤹ ᤛᤣᤃᤢᤛᤡᤒᤠᤸᤗᤧ ᤆᤥᤃᤢᤸᤗᤧ. ᤂᤢᤏᤧ᤹ ᤀᤠᤵᤑᤣᤰ ᤁᤢᤘᤠ᤹ᤔᤠ ᤏᤢ ᤂᤢᤏᤧ᤹ ᤐᤕᤶ ᤕᤶᤒᤠ ᤁᤢᤔᤢᤰᤛᤠᤶᤗᤠᤶ ᤔᤡᤛᤪᤗᤠᤶ ᤂᤡᤏᤡ᤹ ᤁᤧᤗ᤺ᤳᤋᤡ ᤁᤧᤓᤧᤳᤋᤡ॥ 38 ᤂᤡᤏᤡ᤹ ᤀᤠᤵᤑᤣᤰᤏᤢ᤺ᤸᤗᤧ ᤕᤶᤒᤠ ᤏᤢ ᤔᤢᤰᤛᤠᤶᤒᤠ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤗᤠᤈᤣ᤹ᤀᤥ ᤗᤠ᤺ᤵᤔᤠᤀᤠᤱ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤀᤡᤴ ᤂᤢᤏᤧ᤹ ᤂᤧᤱᤜᤠ᤹ ᤏᤠ᤺ᤳᤋᤢᤍᤣᤛᤢᤛᤡᤀᤠᤱ ᤘᤠ᤹॥ 39 ᤕᤜᤘᤣ ᤍᤠᤱᤒᤧᤴᤏᤣ ᤌᤠ᤺ᤱ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤕᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤛᤶᤎᤠᤱ ᤏᤡᤱᤘᤠ᤹ᤑᤢᤔᤠᤱᤗᤥ ᤜᤧᤰᤁᤩᤠᤱ ᤂᤢᤏᤧ᤹ᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤋᤠᤱ ᤜᤥᤵ ᤁᤧᤗ᤹ᤒᤠ ᤀᤠᤀᤡᤴ ᤂᤡᤏᤡ᤹ ᤏᤡᤱᤘᤠ᤹ ᤂᤥᤛᤧᤶᤔᤧ᤹ᤀᤠᤱ ᤛᤡᤰᤗᤢᤱᤔᤠ᤹ᤀᤥ ᤕᤢᤰᤂᤧᤶᤔᤧ᤹॥ 40 ᤀᤠᤀᤡᤴ ᤀᤠᤱᤃᤠ᤹ ᤂᤡᤏᤡ᤹ ᤐᤡᤏᤡᤱᤒᤠ ᤂᤢᤏᤧ᤹ ᤁᤢᤎᤡᤶ ᤏᤢ ᤁᤢᤀᤡᤱᤈᤠᤱᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹. ᤂᤧᤒᤩᤠᤱ ᤂᤡᤏᤡ᤹ ᤏᤢ ᤂᤡᤏᤡ᤹ ᤕᤠᤱᤛᤡᤒᤠ ᤌᤠ᤺ᤰᤜᤠ᤹ ᤔᤧᤏᤢ᤹ᤔᤧᤍᤠᤖ. ᤂᤶᤓᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤍᤠᤍᤡᤱᤗᤧ ᤗᤠᤃᤡ ᤁᤧᤒᤡᤖᤡᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤌᤠ᤺ᤰ ᤆᤠ᤹ᤖᤖᤥ॥ ᤕᤷᤍᤏ ᤏᤠᤱᤃᤧᤴ ᤐᤡᤛᤠᤱᤒᤠ ᤛᤧ᤺ᤵᤛᤡᤱᤔᤠᤍᤧᤴ ᤕᤧᤰᤕᤰᤜᤠ᤹ 41 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤕᤷᤍᤏ ᤏᤠᤱᤃᤧᤴ ᤗᤧᤵᤔᤠᤱ ᤕᤧᤰᤕᤰ ᤛᤢᤶᤛᤡ ᤗᤠ᤺ᤳᤗᤠ᤺ᤳ ᤛᤧᤴᤍᤢ॥ 42 ᤂᤧᤵᤔᤥ ᤏᤡᤱᤔᤡ ᤔᤧᤴᤘᤠ᤹ᤀᤣ ᤏᤢ ᤛᤧᤵᤔᤠ ᤏᤡᤱᤘᤠ᤹ ᤔᤧᤴᤀᤡ᤺ᤳᤋᤣ ᤁᤢᤓᤠᤖᤧ ᤀᤠᤴᤈᤠᤏᤡ᤺ᤸᤗᤧ ᤔᤏᤠ ᤛᤩᤧᤖᤢᤏᤧᤓᤃᤪ ᤂᤢᤏᤧ᤹ ᤂᤧᤴ ᤕᤧᤰᤕᤰᤜᤠ᤹ᤀᤥᤒᤠ ᤗᤳᤇᤠ ᤕᤧᤰᤕᤰᤁᤥ ᤂᤧᤳᤇᤡᤱᤔᤠ ᤐᤣ᤺ᤰᤔᤠᤀᤠᤱ ᤛᤧ᤺ᤵᤛᤡᤱᤔᤠ ᤛᤢᤰ॥ 43 ᤂᤧᤴ ᤕᤧᤰᤕᤰᤜᤠ᤹ ᤁᤴᤜᤠ᤹ᤀᤣ ᤏᤧᤛ᤻ᤛᤧ—ᤖᤢᤒᤣᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤛᤶᤎᤠᤱᤒᤠ ᤋᤧᤸᤗᤰ ᤒᤣᤛᤣᤖ. ᤜᤧᤰᤁᤩᤠᤱ ᤃᤠᤍᤡᤜᤠ᤹ᤖᤧ ᤃᤡᤗᤠᤍᤒᤠ ᤖᤠᤔᤥᤋ ᤏᤢ ᤔᤏᤛ᤻ᤛᤣᤖᤧ ᤁᤢᤔᤢ᤹ᤀᤡᤍᤠᤱᤜᤠ᤹ᤖᤧ ᤗᤠᤃᤡ ᤒᤠᤛᤠᤏᤒᤠ ᤃᤥᤗᤠᤏᤧᤴ ᤏᤧᤛ᤻ᤛᤧᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤎᤡᤶᤜᤠ᤹ ᤂᤥᤔᤠᤏᤢ᤺ᤸᤗᤧ ᤋᤃᤡᤒᤠ ᤜᤡᤴᤍᤥᤰᤜᤠ᤹ 44 ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤐᤡᤖᤢᤛᤡᤒᤠ ᤛᤠᤶᤕᤥᤌᤡᤶᤔᤡᤴ ᤜᤠᤒᤠ ᤁᤴᤗᤥ॥ 45 ᤔᤡᤛᤪᤗᤠᤶ ᤔᤧᤗ᤺ᤴᤍᤧ ᤔᤧᤓᤧᤖᤧᤀᤠᤱ ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤢᤛᤡᤒᤠ ᤌᤡᤶ ᤏᤢ ᤛᤠᤰᤌᤡᤶᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ॥ 46 ᤁᤴ ᤌᤡᤶᤜᤠ᤹ ᤔᤥᤛᤠ᤺ᤸᤗᤧ ᤕᤷᤍᤏᤗᤠᤶ ᤏᤠᤱᤃᤧᤴ ᤐᤡᤛᤠᤱ ᤒᤣᤌ-ᤐᤥᤖ ᤋᤃᤠᤱᤒᤠ ᤏᤧᤏᤧᤒᤠᤍᤧᤴ ᤜᤣᤛ᤻ᤒᤥᤏᤀᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠ ᤀᤣᤔᤥᤖᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤛᤡᤜᤥᤏᤖᤧ ᤁᤢᤗᤠᤈᤣ᤹ᤀᤥ ᤐᤡᤖᤢᤛᤡᤀᤠᤱ ᤘᤕᤧ॥ ᤔᤥᤛᤠᤴ ᤏᤢ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪᤗᤠᤶ ᤔᤧᤗ᤺ᤴᤍᤧ ᤔᤧᤓᤧᤖᤧᤖ ᤔᤧᤒᤳᤇᤧᤸᤗᤧ ᤛᤡᤜᤥᤏᤧᤴ ᤔᤧᤏᤠ᤺ᤴᤍᤢ॥ 47 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤧ᤹ ᤁᤢᤗᤠᤈᤣᤴ ᤏᤢ ᤒᤠᤛᤠᤏᤒᤠ ᤜᤠᤱ ᤀᤥᤃᤖᤧ ᤁᤢᤗᤠᤈᤣᤴ. ᤜᤧᤰᤁᤩᤠᤱ ᤕᤷᤍᤏ ᤏᤠᤱᤃᤧᤴ ᤐᤡᤛᤠᤱ ᤁᤧᤏᤧᤒᤠ ᤏᤧᤳᤇᤡ ᤀᤣᤔᤥᤖᤡ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤜᤠ᤹ ᤕᤢᤰ ᤔᤧᤈᤥᤃᤢ॥ 48 ᤂᤧᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤖᤥᤀᤣᤖᤗᤠᤶ ᤀᤷᤏᤥᤏ ᤜ᤺ᤱᤃᤢ᤺ᤸᤗᤧ ᤁᤢᤕᤠᤀᤥᤒᤠ ᤆᤡᤓᤡ᤹ᤓᤡ᤹ᤒᤠ ᤁᤧᤖᤧᤰ ᤋᤧᤴᤜᤠ᤹ ᤛᤡᤖᤡᤕᤥᤴ ᤁᤥ᤺ᤰᤔᤠ ᤌᤠᤖᤡᤰ. ᤜᤣᤷᤔᤥᤏ ᤁᤥ᤺ᤰᤔᤠᤀᤠᤱ ᤔᤧᤔᤧᤳᤋᤢᤒᤠ ᤌᤠᤖᤡᤰ ᤔᤧᤏᤠ᤺ᤴᤍᤢ॥ 49 ᤜᤧᤰᤁᤩᤠᤱ ᤕᤷᤍᤏ ᤘᤜ᤺ᤱ ᤏᤠᤱᤃᤧᤴ ᤐᤡᤛᤠᤱ ᤐᤡᤛᤃᤠᤒᤠ ᤛᤢᤖᤣ᤺ᤶᤗᤧ᤺ᤶᤒᤠ ᤋᤧᤴᤏᤡᤸᤗᤧ ᤁᤢᤛᤡᤃᤠᤱ ᤁᤧᤏᤧᤒᤠ ᤕᤢᤶᤗᤠ᤺ᤰᤂᤠᤱ ᤘᤖ᤺ᤱᤅᤥᤏᤢ ᤕᤥ ᤗᤧᤵᤔᤠᤱ ᤌᤠᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤏᤠ᤺ᤴᤍᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.